info@energjia.al

Situata politike përgjatë vitit 2017 vonoi ngritjen e bursës së energjisë,  që është një prej projekteve kryesore të parashikuara në modelin energjetik shqiptar.

Konstatimi vjen nga Sekretariati i Komunitetit të Energjisë, i cili ka publikuar raportin e fundit mbi ecurinë e vendeve të Ballkanit Perëndimor, në sektorët e energjisë, gazit, eficencës dhe hidrokarbureve.

Në një raport të mëparshëm Sekretariati u shpreh me rezerva mbi mundësinë e ngritjes së bursës, por tashmë kujton se modeli i Tregut e autorizon ministrin të vendosë afatin e ri para përfundimit të vitit 2017. Gjithashtu, raporti vëren se  procedura e certifikimit të Operatorit të Sistemit të Transmetimit është e përfunduar, por ende kërkohet një mekanizëm pajtueshmërie.

Ndërkohë që, vonesë konstatohet edhe në drejtim të ndarjes së Operatorit të Shpërndarjes së Energjisë Elektrike si dhe de rregullimit të çmimeve për gjenerimin dhe furnizimin me energji. Ndërkaq, në drejtim të sektorit të gazit, raporti flet me nota më pozitive, duke theksuar se Shqipëria ka arritur përparim në lidhje me prioritetet e përcaktuara në Raportin e mëparshëm.

“Në veçanti, Shqipëria ka përparuar në mënyrë të konsiderueshme nga ndarja e Albpetrol dhe krijimi i  Operatorit të Sistemit të Transmetimit, Albgaz.”

Scan Tv,  11.11.2017

Operatori i Shpërndarjes së Energjisë Elektrike bëri me dije se nga dhjetori i vitit 2014 e deri në fund të 8 mujorit 2017 nga skemat lehtësuese të pagesës me këste të detyrimeve të prapambetura përfituan 339 mijë abonentë. Në aspektin financiar kjo u ka kursyer atyre 200 milionë dollarë kamatëvonesa që iu janë falur.

Sipas OSHEE gjysma e kësaj vlere reduktimi i takon kategorive në nevojë, si familje me ndihmë ekonomike, pensionistë mbajtës të kontratës, si dhe invalidët. Numri i tyre është të paktën  mbi 60 mijë  të cilëve, OSHEE u ka ofruar mundësinë e pagesës me këste 1000 dhe 1200 lek/muaj, dhe nëse janë korrekt për një periudhë 6-mujore, i zerohet i gjithë kamata.

Treguesit e 8-mujorit

Treguesit e performancës së OSHEE për periudhën janar-gusht tregojnë një rritje të energjisë së hedhur për konsum dhe faturuar.

Sasia e energjisë së shitur rezulton me rritje 2.7% ose 1,2 miliardë lekë, në raport me 8-mujorin e 2016-s.

Në total, kemi rreth 42.7 miliardë arkëtime, kurse niveli i humbjeve, po si 8-mujor ka zbritur në 27.5 nga 28.1 që ishte vitin e kaluar, duke mos harruar se 4 vjet më parë ishte mbi 44%.

Për rrjedhojë, kemi reduktim të borxhit, ku sipas të cilës, për fatura 2007-2014, nga 67.8 miliardë lekë, deri në fund të gushtit 2017, zbriti në 49.5 miliardë lekë.

Revista monitor,  26.09.2017

Fjala e Ministrit të Energjisë dhe Industrisë z.Damian Gjiknuri gjatë seancës së sotme parlamentare:

Sapo dëgjuam poezinë e radhës për Zharrëzën, nga njeriu që Zharrëzën nuk e kishte dëgjuar ndonjëherë edhe vite më parë kur problemi ka qenë prezent. Fatkeqësisht, kur erdhe këtu me poezinë tënde mund të kishe gjetur një rresht diku që të paktën të thoje një fjalë të mirë për këtë qeveri. Ti na dole një delirant, delirant i fjalës së lirë apo i interesave popullore të Zharrëzës, duke bërë lidhje fallco dhe duke e nxjerrë në pah që ajo protestë u instrumentalizua politikisht dhe synonte të linte në hije atë që në fakt po bënte qeveria shqiptare prej dy muajsh. Disa të vërteta duhen thënë. Fatkeqësisht, edhe media shpesh dominohet nga tendenca populiste kundër çdo gjëje të mirë që mund të bëhet në këtë vend. Problemi i Zharrëzës është shumë më i thellë, problemi ka filluar 10 vite më parë kur njerëzit protestonin dhe ziheshin me dru nga policia. Asnjë masë qeveria e asaj kohe nuk kishte marrë. Përkundrazi, as në media nuk dilte problemi. Madje, deputetë tanë janë tërhequr zvarrë kur kanë qenë bashkë me banorët për të protestuar apo për të ngritur shqetësimin dhe asnjë njeri nuk e ngriti zërin.

Kjo qeveri që në vitin 2013 e mori seriozisht këtë problem dhe gjëja e parë që bëmë vumë sizmografët. Instituti i Gjeoshkencave është një institut shkencor dhe i vetmi përgjegjës që mund të nxjerrë ndonjë lidhje shkak-pasojë pasi ky është problem shkencor, nuk është çështje poezie. Këto janë fenomene shkencore që duan kohë të hetohen, nuk janë nga ato zgjidhje që jepen kështu duke pirë kafe në tavolinë. Këtij instituti i mungonin sizmografët për të monitoruar zonën e Zharrëzës. Pikërisht për shkak të presionit tone, edhe duke detyruar Bankersin meqë ti e ke merak, bëmë që të bliheshin sizmografët dhe që të monitorohej në mënyrë më të imtë zona.

U mor masa e dytë, kompania italiane SNAPE e cila injektonte fluide me presion në puse. Nafta jonë është një naftë e rëndë, e cila nxirret bashkë me një pjesë të ujit dhe uji teknologjik duhet futur diku, është një pus i thellë që shpohet dhe futet me presion aty. Mendohet që ky fenomen mund të ketë lidhje shkak-pasojë me lëkundjet. Edhe instituti ynë, pas matjeve të shumta dhe kur tërmetet u rikthyen me intensitet në periudhën e Dhjetorit të vitit 2016 veproi menjëherë.

Qeveria pezulloi injektimin e ujit teknologjik i cili ka edhe një faturë ekonomike, që ta dinë shqiptarët se janë 20 milion dollarë në vit që i mungojnë ekonomisë kombëtare. Gjithësesi detyra e parë e qeverisë është të prandalojë çdo lloj pasoje të rëndë për banorët dhe ne ndaj e ndaluam injektimin. Qeveria duhet të dalë në konkluzione shkencore se nuk janë çështje që zgjidhen me poezi këto.  Fjalë të bukura mund të thotë gjithësecili, dikush lexon më shumë, ty mbase ta ka dhënë natyra talent të shkruash por problemi është që do të marrësh vendime, do qeverisësh. Do marrësh edhe interesin ekonomik por do e fusësh në llogari edhe interesin publik të njerëzve. Ekonominë duhet ta zhvillosh por njëkohësisht duhet të ruash edhe shëndetin e njerëzve dhe të gjithë komunitetit aty. Kështuqë nuk janë vendime të thjeshta. E megjithatë, për të parandaluar çdo lloj pasoje ne morëm një vendim që pezulluam injektimin e ujit.

Ndërkohë, me urdhër të Kryeministrit, po atë ditë u ngrit një grup pune me specialistë nga Instituti i Gjeoshkencës, specialistë të naftës edhe specialistë të tjerë në fusha të tjera të emergjencës civile për të investiguar paraprakisht dhe për të nxjerrë konkluzione se çfarë lidhje ka ky fenomen, pra fenomenet e industrisë hidrokarbure me tërmetet. Arritëm në konkluzione paraprake që mund të ketë lidhje por nuk është konkluzion përfundimtar. Është fenomen shkencor i cili do vite monitorime, do edhe sizmografë shtesë të cilët ne do ti marrim dhe do ta monitorojmë më në thellësi zonën për të nxjerrë konkluzionet e sakta nëse do të dalë lidhja shkak-pasojë ndërmjet industrisë hidrokarbure dhe fenomenit të tërmeteve sepse tërmete aty edhe sot që flasim ka vazhdimisht. Për ta ditur, ajo është zonë e njohur sizmike ku pllakat tektonike kanë bashkimin me njëra-tjetrën dhe vazhdimisht ka tërmet. Na duhet një shpjegim shterues dhe për të kuptuar se çdo të bëjmë përfundimisht me atë komunitet. Edhe çfarë ngarkese do të ketë kompania edhe çfarë do të bëhet me industrinë e naftës. Ashtu siç kanë bërë vende të tjera të përgjegjshme, ky fenomen duhet studiuar për të dalë në konkluzionet nëse ka lidhje aktiviteti hidrokarbur me fenomenet e tërmeteve. Konkluzioni thashë është paraprak.

Asnjë shtet nuk mund të veprojë në mënyrë arbitrare dhe idioteske dhe të marrim masa të menjëhershme. Përkundrazi! Meqenëse e përmende vendimin dhe që duhet ta kishe përshëndetur, po të lexosh në vendim, pjesa e dëmshpërblimeve, e atyre 70 shtëpive që janë dëmtuar rëndë, gjysma përballohet nga qeveria dhe gjysma nga Bankers. Faji akoma nuk është përcaktuar përfundimisht dhe do ekspertizën ndërkombëtare që ne e kemi marrë. Sa për ta ditur shqiptarët, që në momentin që doli fenomeni dhe kur filluam pezullimin e operacioneve hidrokarbure në atë zone, përzgjodhëm 5 institute ndërkombëtare për të përzgjedhur një prej tyre. Zgjodhem Institutin Italian të Gjeofizikës dhe Vullkanologjisë që të sjellë ekspertët e tij për të investiguar fenomenin e operacioneve hidrokarbure, pra të kësaj teknologjie me lëkundjet e tokës, për të dalë me një konkluzion përfundimtar.

Nëse del në mënyrë shteruese, megjithëse ne besojmë se mund të ketë lidhje, pra nëse del që kjo ka lidhje patjetër që ne duhet të marrim masa konkrete. Masa të cilat mund të jenë ose reduktim të aktivitetit hidrokarbur në atë zonë ose ndryshim të çdo lloj aspekti teknologjik që mund të ketë lidhje me lëkundjet e tokës ose mbase edhe zhvendosje të banorëve kundrejt një kompensimi të drejtë që patjetër të gjitha këto shpenzime do ti paguajë kompania. Kjo është e shkruar qartë në marrëveshjen hidrokarbure dhe patjetër shteti do ta zbatojë këtë. Por, nuk mund të flitet këtu në mënyrë populiste dhe të dalësh e të hedhësh akuza të tilla pa parë se çfarë punë e mirë është bërë për të realizuar edhe këtë që kemi realizuar. Mbi të gjitha, qeveria tregoi përgjegjshmëri për të ndërprerë çdo lloj aktiviteti edhe me kosto ekonomike, në mënyrë që të parandalohej çdo lloj pasoje.

E dyta, të merremi pak me grevën, aspekte të grevës, se ju vetëm doni të mohoni se çfarë është bërë në këto 3 vite për një fenomen që thashë ka vite që ekziston dhe asnjë nuk ka guxuar të flasë madje njerëzit zhdëpeshin në dru dhe nuk i jepej një përgjigje. Ajo grevë, me një pjesë të tyre u manipulua. U financua nga një organizatë që drejtuesit e asaj organizate kanë qenë edhe drejtues të institucioneve që mbikëqyrnin naftën dikur. Njerëz që në atë kohë kur ishin tërmetet nuk e ngritën njëherë zërin. Përkundrazi, morën 7 veta peng sepse 400 banorë të tjerë nuk ju bashkuan atyre por plotësuan formularët e po bashkëpunonin me grupet e monitorimit për dëmshpërblimet. Pse nuk ia shtruat vetes pyetjen, ku ishin 400 banorë të tjerë? Përse 400 banorë të tjerë tek zyra e kryebashkiakes së Patozit po plotësonin formularët dhe po bashkëpunonin me grupet të cilët po monitoronin dëmtimet për të marrë shpërblimin?! Kush është e vërteta? 7 njerëz të manipuluar, të mbështetur edhe nga njerëz që duan të gjejnë kauzë politike, se ti nuk ke kauzë, ti je tipik njeriu që Zharrëzën nuk e dije megjithëse këto fenomene kanë qenë që më pare. Nuk të kam dëgjuar njëherë të flasësh atëherë në opozitë, meqenëse flet si opozitë tani por asnjëherë nuk e ngrite zërin. Përkundrazi, të doli një temë për të kapitalizuar dhe njerëzit që janë tipik populistë e nuk kanë dijeni nga shteti, marrin tema të ndryshme, bëjnë atë rokokonë e tyre për të qenë interesant tek njerëzit. Çdo njeri e bën atë.

Përkundrazi banorët e tjerë nuk u ngritën për këtë proces por besuan tek masat e qeverisë, bashkëpunuan me qeverinë dhe po prisnin daljen e vendimeve. Vendimet e qeverisë dalin pas konkluzioneve paraprake, nuk janë vendimet e qeverisë si ato ëndrrat që të vijnë në kokë, as si ide. Vendimi i qeverisë do një strukturë, do të dhëna paraprake, do konkluzione, do edhe faturë. Pikërisht këtë bëmë ne por 7 njerëz të manipuluar politikisht dhe të mbështetur edhe nga organizata jo qeveritare me financim për ti bërë presion qeverisë pasi ky është një plan më i thellë. Plani ishte të bllokoheshin institucionet shqiptare por qeveria patjetër reagoi në kohë sepse ishte në proces të punës së saj. Plani ishte për të mbledhur çdo plagë sociale që janë normale për një vend, në çdo vend demokratik ka plagë sociale. Synohej për të mbledhur grupe, për të bërë presion ndaj çdo ministrie të qeverisë shqiptare në mënyrë që të bllokohej puna. Dhe ky është plani i vërtetë. Këtë duan njerëz si ty apo opozitë si ata që janë në çadër, që çdo lloj pakënaqësie sado e vogël të jetë të mbledhë një grup dhe në formë presioni të gjunjëzojë qeverinë. Nuk qeveriset shteti kështu, as me njerëz si ty që thjesht bëjnë poezi këtu. Prandaj, minimalisht kur dole këtu duhet të kishe thënë se qeveria reagoi në kohë për herë të parë për një fenomen që ka 10 vjet.

Ti flet për sistemin hidrokarbur por nëse ne do të ishim të blerë nga Bankersi meqë thua kështu, a nuk ishim ne që në vitin 2014 ngritëm disa taksa të holluesit dhe të gjithë proceseve të tjera teknologjike që përdoren nga Bankersi dhe që praktikisht i sollën Buxhetit të Shtetit 40 milion dollarë më shumë çdo vit?! Po të ishim ne të blerë nga Bankersi, pse do të bënim audit ne dhe do të shkonim në arbitrazh ndërkombëtar duke e ngarkuar Bankersin me qindra milionë dollarë, duke pretenduar shpenzime të fryra në mënyrë që të evadoheshin taksat, tatim fitimi mbi shtetin shqiptar?! Sot që flasim, vetëm për vitin 2011, Bankers ka paguar 37 milion dollarë më shumë të cilat kanë vajtur në Buxhetin e Shtetit. Kjo qeveri ka treguar përgjegjshmëri. Qeveria nuk mund të bjerë pre e frymës populiste të njerëzve që janë të papërgjegjshëm, që meqenëse ka një tendencë anti-kapitaliste apo njerëz që vjen dikush dhe thotë ta sulmojmë industrinë sepse i tillë je dhe ti. O burra ti turremi kompanive ne me gjoba ti mbyllim, apo siç thoshte diku ta mbyllim fare naftën. Me llafe, se ke ti në dorë ta mbyllësh, as ne me dëshirat tona. Ajo do një qasje shumë të strukturuar që do të vijë, e thashë mbas konkluzioneve që do të dalin nga puna shkencore, jo nga vargje poetike që thuhen këtu në parlament. Puna shkencore është punë shkencore. Do djersë puna, do ulesh aty do bisedosh edhe me shkencëtar, do shohësh edhe anën ekonomike të çështjes, do shohësh edhe anën mjedisore dhe do të dalësh në konkluzion. Kështu bëhet shteti. Po është kollaj kështu të vish tek mikrofoni, shkruan aty, pi një gotë verë në darkë, madje edhe me njerëz që mund të jenë edhe ata kapitalistë se me ata rri dhe ti. Rri me elitën e Tiranës, merr ndonjë ide aty dhe vjen do ti bie unë atyre. Jo Blush, po ta them miqësisht se unë nuk dua të hy në replika personale. Që të kesh mbështetje të vërtet dhe nëse mendon se ndonjëherë do të bëhesh shtetar duhet të flasësh objektivisht. Të pranosh edhe atë që është bërë mirë, por patjetër edhe të na kritikosh për ato që nuk janë bërë mirë. Ky vendim ka pjesën e pranimit të asaj të mire që ti duhet ta bëje, jo ta bëje si poezi se ajo nuk të del nga shpirti, por pesë fjalë të mira mund ti kishe thënë për një gjë që nuk është bërë.

Së fundi, për sektorin hidrokarbur dhe për t’ia thënë qytetarëve në çdo vend të botës, edhe në Shqipëri, mendohet që kompanitë e naftës janë kompani që evadojnë, kanë shpenzime të fryra. Që kanë dobësi institucionet tona këtë nuk e mohojmë. Por, të paktën përpjekjet tona gjatë gjithë këtyre viteve janë shumë serioze. Mbi të gjitha, një shembull tjetër i qartë është modeli i ri i kontratave që po promovojmë. SHELL është kompania e dytë më e madhe në botë dhe e detyruam që me kontratën që po nënshkruan me qeverinë shqiptare, shteti që në fuqinë e parë përveç rentës do marrë edhe fitim. Pra, do ti njihen kostot hidrokarbure vetëm deri në 90% dhe në pjesën e mbetur, që në fuçinë e parë 5% shkojnë për shtetin e 5% për kompaninë. Kjo është një arritje e madhe e që normalisht meriton vlerësim. Këtë e bën vetëm një qeveri që nuk mund të jetë e kapur nga industria naftës, përkundrazi është një qeveri që e sheh industrinë e naftës si partner. E sheh si partner por edhe me syhapur për të qenë vigjilent që ato shpenzime të fryra, për shkak të modelit të keq të trashëguar që ne kemi, të mos i lejojmë të evadojnë por njëkohësisht të shkojnë më shumë para për Buxhetin e Shtetit.

Duhet pohuar që ne kemi hequr edhe koncesione abuzive. Kontrata e 2007 e 2008, ku e ke Stream Oil?! Qeveria e mori mbrapsht atë fushë. Pse?  Dështoi koncesionari. Bankers ka 100 mëkate dhe nuk diskutohet që ai është një proces, por duhet thënë që ka performuar nga ana industriale. Pra, e ka rritur prodhimin dhe e ka respektuar të gjithë pjesën e investimeve. Ku janë kompanitë e tjera?! Grupe njerëzisht që e zhvatën naftën!! Qeveria shqiptare i ktheu ato fusha në dobi të shtetit dhe do të shikojmë mënyrën më të mirë sesi do të operojmë, qoftë duke mbajtur Albpetrolin, por qoftë dhe në perspektivë për ti dhënë kompanive të cilat do performojnë. Këto janë aktet e vërteta të qeverisë. Qeveritë maten me vepra, jo me fjalë si puna jote. Ti thjesht bën romane, ti shkruan libër KM, ëndërron të jesh kryeministër e bën libra për të. E kupton?! Ti e sheh shtetin si poezi, qeverisja është prozë. Thonë se opozita është poezi, qeverisja është prozë. Tek ty është e kundërta. Tek pjesa e qeverisë s’ke lidhje fare me prozën, ti do të mbetesh gjithmonë poezi e bukur. Kaq!

Faleminderit!

energjia.al  03.03.2017

Fjala e mbajtur në seancën parlamentare nga ministri i Energjisë dhe Industrisë z.Damian Gjiknuri

Flet ti për energjinë që po të dalin e-mailet se si shite asetin më të rëndësishëm kombëtar, po të dalin pazaret e disa viteve më parë. Flet ti për energjinë që je varrmihësi i sektorit elektroenergjetik shqiptar. Përmes privatizimit tënd të korruptuar, jo vetëm që shite asetet fizike në kundërshtim me çdo parim ndërkombëtar të privatizimit të sektorit të shpërndarjes por i shkaktove shtetit për shkak të veprimeve tua mbi 400 milion euro dëme të faktuara. Motivet e këtyre dëmeve po dalin qartë tashmë dhe po provohet se ka qenë një pazar nga prapa.

Çfarë do ti që flet për energjinë?! Gjatë viteve që ishe në qeveri, jo vetëm që e keqadministrove sektorin por në momentin që e morëm ne në vitin 2013, Buxheti i Shtetit gërryhej me mbi 200 milion USD për shkak të politikave tua. Kjo ndodhte për fat të keq pasi do duhej që ato para të shkonin për të mbuluar ato kontratat e rrugëve që i le rrugëve. Arsyeja e vërtetë pse ti falimentove financiarisht është pikërisht sektori i vdekur elektroenergjetik.

Çfarë do ti që flet për energjinë?! Bëre një vepër, një fantom energjetik në Vlorë dhe që sot shqiptarët vazhdojnë e paguajnë kostot e saj. Janë 120 milion dollarë të marra në kurriz të taksapaguesve shqiptarë dhe ne vazhdojmë paguajmë kostot. Vazhdojmë të kemi probleme me një termocentral i cili nuk ka as leverdi ekonomike dhe është shumë i vështirë që të vihet në punë. Shansi më i mirë për ta vënë atë në punë është ardhja e gazit në Shqipëri.

Çfarë do ti që flet për energjinë?! Harrove ato HEC-et që i lëshove në mënyrë kaotike dhe pa një model të qëndrueshëm ekonomik?! Kur erdhëm ne në pushtet kishin mbi 60 milion euro borxhe. Janë mbi 9 miliard lekë të cilat u shlyen për shkak të reformës sonë në sektorin energjitik. Çfarë do të thuash ti për energjinë?! Ti që sabotove projektin më të rëndësishëm kombëtar, linjën e interkonjeksionit dhe nuk ke turp e vjen këtu dhe thua e bllokon ky me Vuçiçin. Ishte qeveria Rama ajo e cila e bëri të mundur që ajo linjë të ndërtohet dhe pikërisht aleatët e tu, të cilëve ti ju dhe fjalën që nuk do të ndërtohej kurrë, janë ata që akoma e pengojnë vënien në funksion të asaj linje.

Çfarë do të thuash ti për energjinë kur mjafton të shikosh rezultatet e reformës së sotme se sa ka kontribuar sektori elektroenergjetik,  ndikimi tek Buxheti i Shtetit dhe në stabilitetin financiar të vendit. Energjetika është dështimi yt, megjithëse ti gjithçka e ndërtove tek ëndrra jote për superfuqi energjetike. Energjitika në fakt është simbol i dështimit tënd spektakolar dhe i zhytur në korrupsion sepse po dalin faktet përditë.

Ti ishe ai që edhe kur përmbyteshin nga shiu qytetarët e Shkodrës, ia vije faturën sektorit elektroenergjetik pasi nuk kishe para ti paguaje. Këtë e bëje edhe pse dëmet shkaktoheshin nga shkaqe të tjera dhe përgjigja duhet të vinte nga qeveria. Megjithatë, shqiptarët po e kuptojnë dhe shikojnë vet diferencën. Për ta nuk ka rëndësi se çfarë thotë ky njeri! Ky ka një shprehje që e dinë bashkëpunëtorët e tij, ky thotë nuk ka rëndësi gënjeshtra por se kush e thotë i pari. Djallëzinë e ka se ashtu ka çarë në jetë. Ky ka vetëm këtë veti që shpif, hedh gënjeshtra dhe kujton se do manipulojë mendjen e njerëzve për faktin se edhe ju jeni të pazotë si opozitë që akoma mbani shpresa tek kali i ngordhur Berisha, tashmë 72 vjeç.

Opozitë fatkeqe pasi nuk ka asnjë drejtim, ka një kryetar fiktiv, një kryetar që nuk bën asgjë dhe mes jush ju thotë çfarë do bëjmë, ne e kemi keq! Vetëm Saliu, shyqyr që është ai e na mban gjallë thotë kryetari juaj fiktiv. Unë e kam thënë edhe herë tjetër se është fatkeqësi për vendin kjo gjë pasi si qeveri mua do të më pëlqente që ju të jeni sa më shumë të zgërlaqur. Problemi në këtë rast është se ju po defaktorizoni opozitën në këtë vend, po krijoni një sistem asimetrik politik dhe fatkeqësisht i vetmi zëdhënës juaji që vazhdon shpif dhe ju mban peng është ky njeriu që vjen flet këtu, që dështimet e mëdha të tij në qeverisje do tani ti kthejë në suksese.

Po ta kishe negociuar mirë ti TAP-in zotëri, nuk do të merrnim ne 80 milion euro ekstra tani. E di që do të thotë e kam parashikuar unë, çfarë ke parashikuar ti?!  Ky është i vetmi njeri që vlerëson idenë, ideja ka rëndësi thotë dhe nuk ka rëndësi ai që e bën. Vetëm Sali Berisha thotë unë do mbahem mend për ide. Po mirë po ta jap të drejtën për ide, problemi është që nuk bëre asgjë! Siç kishe projekte të rrugëve që i le rrugëve edhe këto ide energjetike, i kishe ide të pabazuara në modele të qëndrueshme ekonomike, prandaj dështove.

Ndërkohë, meqë jemi tek ligji i energjive të rinovueshme mund të them se ky është një konfirmim tjetër, një nga paketat e fundit ligjore që konsolidon të gjithë reformën në sektorin elektroenergjetik. Një ligj që i vendos në baza të qëndrueshme të gjitha ato investime private që deri dje kishin qenë të gjitha në amulli, për shkak të mungesës së stabilitetit, prej mënyrës sesi ishin ndërtuar këto kontrata dhe mbi të gjitha për shkak të mungesës së likuiditetit financiar. Ku ka gjë më vrastare në ekonomi se të heqësh para, nuk garantohen kontratat dhe zhvillimet ekonomikë në letër. Letra, ide mund të hedhësh sa të duash por problemi është sa i bën ato. Ju keni shitur vetëm letra! Prodhuesit privat të energjisë tani po marrin para, po paguhen sepse u vendos rend në sektorin elektroenergjetik dhe ka likuiditetet.

Likuiditeti është çelësi që garanton investime. Likuiditeti garanton të gjithë kreditë bankare dhe është i vetmi çelës ku mund të ngrihen dhe e vetmja platformë ku mund të garantohen të gjitha investimet në energji. Çfarë po bëjmë me këtë ligj ne?! Po vendosim edhe një minimum të detyrueshëm likuid, jo si më përpara që prodhuesit e energjisë nuk dinin se çfarë do të ndodhte. Përkundrazi, po vendoset një minimum në këtë ligj i cili do ti mbrojë, megjithëse ka pasur rënie drastike të çmimeve dhe pavarësisht propagandës tuaj duke thënë që qeveria i ka vënë në pozita të vështira investitorët privat. Minimumi që garantohet me ligj i krijon mundësi bankave, institucioneve financiare që të bëjnë një parashikim konservator ekonomik. Kjo do të thotë që do të çlirohen investimet të reja, ashtu siç parashikohet edhe për diellin dhe erën. Po vazhdon procesi i dhënies së licencave për koncesionet tashmë eficiente, jo si koncesionet tuaja që treçereku nuk janë bërë dhe janë gënjeshtra ato që fliten këtu.

E di çfarë bëre ti me Devollin, meqë e parmende këtu?! Ti bëre një kontratë e cila nuk do të zbatohej po të mos kishim bërë ne ndërhyrjet e vitit 2014. E di pse?! Sepse ti izoloje rrethe të tëra, izoloje 70 mijë banorë dhe nuk i dhe zgjidhje. Përkundrazi! Thjesht bëre një projekt në letër i cili po mos bëhej ajo rruga nga Banja në Gramsh nuk do të bëhej hidrocentrali i Statkraftit ose do të bëhej duke përmbytur rrugën dhe duke lënë në izolim banorët e zonës. Çfarë bëmë ne? Negociuam siç duhet, kontribuam një pjesë nga Buxheti i Shtetit dhe mbi të gjitha e ulëm atë koston e rrugës që ti gjoja e kishe bëre në plan prej 60 e ca milion eurosh e cila nuk u bë fare në kohë. Përkundrazi, në momentin kur erdhi pika kritike e afateve koncesionare, i vetmi koncesion që keni bërë të suksesshëm edhe ai do të vihej në pikëpyetje.

Tani po bëhen hidrocentrale, po e ndjejnë të gjithë prodhuesit e energjisë që po marrin para dhe kjo është garancia e vetme për investime. Nga ana tjetër, si mund të flisni ju për dritat?! Si mund të flisni ju që shkaktuat aq dëme?! Si mund të flisni ju që gjunjëzuat vendin nga ana financiare për shkak të eksperimenteve tuaja energjetike?! Po ka një sektor që ju duhet të ulni kokën, të rrini squk dhe të thoni që ka qenë dështimi jonë më i madh ai është sektori elektroenergjetik. Përkundrazi, ju dhimbjen e ktheni në forcë me parimet e Enverit, “ta kthejmë, dhimbjen në forcë. Humbjen tua lëmë këtyre”.

A e keni lexuar raportet ndërkombëtare?! Çfarë thonë raportet ndërkombëtare? Lexo Bankën Botërore, lexo Fondin Monetar Ndërkombëtar çfarë thotë për sektorin energjetik, çfarë vlerësimesh ka dhënë. Ja çfarë ka thënë Standard & Poor’s: Reforma në sektorin elektroenergjetik ka qenë e suksesshme, ka dhënë mundësinë e konsolidimit fiskal. A e dini që sot sektori elektroenergjetik jep mbi 20 përqind  të të ardhurave tatimore. A e kuptoni se është kthyer në një sektor pagues, kur deri dje ishte gropë.

Flisni ju për abuzim me CEZ-in kur ju jeni ata që bëtë pazare me ta! I sollët në Shqipëri, i zhvatët dhe kur ju prishën pazaret e fundit, i përzutë dukë i vënë edhe zjarrin me idenë që do të zhdukni gjurmët. Gjërat dalin dhe shumë mirë që po vazhdon ai komision, le të dalin dhe faktet. Do të vijë dita që ai zotëria do të kapet një ditë, Nue Kalaj. Se ju ka dalë njeriu tani, një ditë do kapet por kur të kapet, ai do të flasë. Do të nxjerrë të dhënat ai ose i shkreti do ta mbajë të gjithën në kurriz dhe le të shkojë aty ku e ka vendin për të shkuar. Por do duhet ta mbajë të gjithën në kurriz, t’ju justifikojë 7 milion euro se ku kanë vajtur. Ai iku, se kështu e ka, hedh akuzën dhe ikën. Mos kini guximin të dilni këtu për gjëra që turpëroni veten dhe shqiptarët me ato që keni bërë. Ti që qesh nuk ke ndonjë ide për këtë se ta kam thënë unë, ti ke atë tenderin, si ajo kripë- sheqer se ka qenë një estradë. Po të të përmendësh tender ty, ti kërcen se je deputet tenderi. Deputet që objektivin e ka si të kthehem e të bëjë tendera.

Faleminderit!

energjia.al  06.02.2017

Fjala e mbajtur në Kuvend nga Ministri i Energjisë dhe Industrisë z.Damian Gjiknuri:

I nderuar Kryetar,

Të nderuar deputet,

Në fjalën e Mediut dëgjuam diçka të sinqertë. Nuk e kam për replikë me të por tha se Parlamenti ka kohë që e ka humbur sensin e tij e është kthyer në një teatër të vërtetë. Në fakt, ju jeni kontribuesit e vërtetë të këtij teatri, për arsye se për çdo temë që vini këtu, në vend që të ndihmoni meqenëse kërkoni vazhdimisht konsensus, vetëm hidhni lum akuzash,  si ajo shprehja “nga ndërzimi artificial tek lufta në Vietnam”. Pra, e filloni njëherë me drogën, kaloni tek zgjedhjet, më pas tek problemet e integrimit dhe me çdo gjë tjetër. Jeni bërë një koleksion i mbledhjes së çdo një mini pakënaqësie duke menduar që do të arrini ti ktheni në votë popullore. Por nëse do të ishte e tillë situata, ju duhet të ishit shumë të lumtur sepse zgjedhjet do ti kishit në xhep.

Në fakt është ndryshe. Ju ka përfshirë shthurja në gjithë pjesët e territorit të Shqipërisë si Parti Demokratike, ndaj keni vetëm një metodë për të mbijetuar. Vini dhe bëni teatër në këtë sallë e cila nuk i përmbahet fare rendit të ditës. Padashje, po bëhem edhe unë tani pjesë e këtij teatri por po i kërkoj ndjesë qytetarëve shqiptarë. Jeni ju ata që e shkaktoni këtë pikërisht nga paniku që keni prej humbjes. Keni nxjerrë pretendimin se me këtë qeveri nuk shkohet në zgjedhje dhe hidhni çdo lloj akuzë. Kur keni qenë në pushtet, nuk keni bërë asgjë për konsensusin dhe për të arritur ato që pretendoni këtu. Po të kujtojmë qeverinë tuaj, asgjë nuk e bë me konsensus, madje dhe kur humbët votat popullore e legjitimitetin numerik, huazuat disa deputetë me atë mënyrën e minutave të fundit dhe mbajtët qeverinë në këmbë. Tani i thoni kësaj qeverie ik se duhet një qeveri tjetër ose nuk hyjmë në zgjedhje. Thoni lloj-lloj historish se qeveria është e kanabizuar e drogëzuar pasi keni të vetmen mënyrë për të hyrë në zgjedhje. E kuptoni çfarë absurditeti është ky? Dhe flisni për konsensus pastaj.

Nuk ka gjë më të keqe se të kesh asimetri politike në vend, kur nuk ke opozitë. Gjëja më e keqe për një demokraci është kur opozita është e shpartalluar, pa një orientim të qartë. Ka një njeri që vjen këtu “bën ligjin”, ka një tjetër që rri në zyrë, tjetër gjë thotë ai, tjetër gjë thotë ky në sallë. Unë e di shumë mirë hallin tuaj dhe shqetësimet se vend i vogël jemi. Nuk ka gjë më të keqe sesa mungesa e shpresës, sepse mungesa e saj sjell kaos, sjell irritim. Jeni bërë si ata alkolistët që duan të rikuperohen nga pija dhe vetëm shfryjnë dufin për eksperiencat e tyre të këqija në jetë. Fatkeqësisht, ata kanë një të mirë sepse fillojnë mendojnë pozitivisht se si të rekuperohen ndërsa ju vetëm shfryni eksperiencat negative që merrni. Ju vetëm u thoni njerëzve që ne s’kemi shans të fitojmë, por e vetmja gjë që bëjmë është të hedhim baltë mbi këtë qeveri. Pra, praktikisht këtë keni bërë dhe nuk po i motivoni më njerëzit tuaj.

Normalisht një opozitë do të ishte më e lumtura që të kishte një proces vetingu. Përtej krenarisë kombëtare që ne të gjithë e kemi, kjo opozitë duhet të ishte e lumtur që të huajt të kishin një fjalë në problemet e këtij vendi sepse atyre u drejtoheni sa herë merrni ndonjë grimcë shpresë nga ndonjë deklaratë. Po të isha unë në rolin tuaj do ta kërkoja këtë me insistim. Ju pretendoni se kjo qeveri është e korruptuar, i paska zënë institucionet por edhe kur flasin institucionet e huaja ju filloni thoni nuk i duam, nuk duam opinionin e tyre. Ne nuk thamë pse ju drejtuat Gjykatës Kushtetuese megjithëse qe përdorimi i një mjeti legjitim për të shpëtuar nga një problem që ju e keni. Nuk ka asgjë të keqe këtu. Por kur ju drejtuam Komisionit të Venecias dhe morët një përgjigje, atëherë pse përbën problem për ju?! Komisioni i Venecias e dha opinionin e tij, le të kalojë ligji, le të bëjmë institucionet e drejtësisë.  Pra, praktikisht edhe kjo tregon dufin tuaj dhe mungesën e shpresës për të ardhmen çka reflektohet edhe këtu në sallë. Ktheni kushtet dhe kriteret, i ngatërroni me qëllimin tuaj, kujtoni se publiku i ha kollaj këto. Nuk është fare e vërtetë, njerëzit janë shumë të qartë sepse e shikojnë se vërtet mund të kishin ndërtuar pritshmëri më të mëdha, por nga ana tjetër progres po bëhet përditë.

Jo gjithçka shkon mrekullisht por nga ana tjetër, ju fatkeqësisht nuk ofroni asgjë për shpresën e njerëzve. Nuk ofroni asnjë program qeverisje, nuk ofroni asnjë zgjidhje të mundshme për kompromis. Ju do duhej tu interesonte një pushtet drejtësie stabël nëqoftëse pretendoni se qeveria është kaq e korruptuar dhe kaq e përfshirë në narkotrafik. Nuk ju justifikohen sulmet ndaj institucioneve ndërkombëtare sa herë ata thonë të vërtetën në lidhje me procesin e vetingut dhe me procesin e reformës në drejtësi. Aq më keq të kapeni pas çështjeve siç thatë këtu se kryeministri përmendi Vuçiç. Ore e kuptoni, e di sa qesharak u bëtë ju?! Të shihnit fytyrat tuaja kur fitoi Trumpi! Më kujtohet ajo periudha e viteve 2000 Bush-Berluskon-Berisha. Mendoni se fati juaj do të jetë nga ca lëvizje që do të ndodhin. Ore e kuptoni që pushteti është votë dhe legjitimitet popullor?

Po të jeni ju se e keni atë organizim dhe jeni të bindur se i keni mbushur mendjen njerëzve, që keni njerëzit e duhur, programin e duhur dhe mbështetjen e duhur, ju do të ishit shumë të lumtur që kjo qeveri të ishte e tillë. Por, nuk keni asnjë lloj shprese dhe vini këtu vetëm hidhni helm në këtë Parlament pa ofruar asnjë alternativë. Doni pikërisht ta fshini edhe axhendën e Parlamentit, duke shprehur dufin që mendoni që e kanë njerëzit por më shumë e keni ju. Mendoni se do të ç’orientoni publikun duke i dhënë një realitet fals. Realiteti nuk është lule por realitetin të gjithë e dinë. Krahasuar me 4 vite më parë është jashtëzakonisht i ndryshëm dhe shumë më i mirë në shumë fusha.

Dua të jap disa përgjigje edhe për akuzat që u hodhën në sektorin energjetik, madje duke bërë lidhje nga më të çuditshmet. Nga një episod kriminal apo një lirim i një të dënuari për shkak të papërgjegjshmërisë së gjykatave arritët të bëni lidhje deri tek korrupsioni apo mungesa e integritetit në sektorin energjetik. Vetëm ju mund ti bëni këto lloj lidhjesh!? Pse?! Sepse siç e thashë ju keni humbur toruan. Nuk keni më asnjë orientim dhe në të gjitha fushat që ka arritje ju doni ti quani dështim. Gjithsesi të gjithë e dinë dhe shifrat flasin vet.

Po të ishte se paska dështim si është e mundur atëherë që kjo qeveri në krye të katër viteve shton rrogat dhe pensionet?! Nuk duhet të harrohet se kur e morëm pushtetin ka qenë gropa më e madhe financiare dhe borxhi më i madh publik. Rritja u bë e mundur sepse paraja është përdorur siç duhet, reformat kanë dhënë sukses dhe shteti ka qenë në pozita shumë më të mira për të administruar paranë. Prandaj, përfundimi është i tillë që rriten rrogat dhe pensionet dhe shqiptarët e kanë të qartë.

Hodhët akuza për sektorin elektroenergjetik. Ju dëgjova që folët që nga ai deputeti i tenderave që thotë pse po bëhen investime. Investimet janë më të mëdhatë e ndërmarra në këto vite dhe në dobi të qytetarëve shqiptarë. Foli dikush këtu më parë, një profesor që ka qenë rastësisht edhe Ministër financash, faturojnë thotë 80% më shumë falso. Po mirë mo nga doli ky bilanc energjetik që konsumi energjisë është ulur dhe arkëtimet janë rritur?! Po të ishte se faturonim falso 80% do të ishte rritur konsumi të paktën i faturuari i energjisë në vlera të tjera. Ndërkohë, konsumi i energjisë ka rënë për arsye se njerëzit janë më të përgjegjshëm, kursejnë energji, nuk vjedhin dhe gropat financiare në sektor janë mbyllur. Pra, si shpjegohet dhe nga del kjo logjikë?!

Shikoni shifrat, meqenëse doni për pjesën energjetike. Shikoni arkëtimet, se foli dikush më parë këtu e tha kanë rënë arkëtimet. Do ndaloj pak edhe tek sektori elektroenergjetik për arsye sepse është tema e ditës dhe me normale do ishte të flisnim për të. Sot po diskutohet një nga kreditë më të rëndësishme që ka marrë Korporata Elektroenergjetike Shqiptare për të konvertuar të gjithë overdraftin që akumulonte keqmenaxhimin, vjedhjen, shpërdorimin. Të gjitha i janë ngarkuar ndër vite KESH-it që e shndërruan në një Kaskadë të eksperimenteve. KESH-it i jepet tashmë kredia 218 milion euro për të konvertuar këtë borxh afatshkurtër në afatgjatë dhe ky është hap reforme, votë konfidence. A ka institucione ndërkombëtare që nëqoftëse do të kishim këto 80% faturim falso siç pretendoni ju, të jepnin 218 milion euro?! Të jepnin më tej se kaq mbi 300 milion të tjera që janë siguruar këto vite?! Pse, janë të çmendur ndërkombëtarët?! Kujtoni ju se institucionet ndërkombëtare dëgjojnë këto dehjet tuaja këtu në sallën e parlamentit?!

Ju e dini shumë mirë se gjithë ekonomia shqiptare, sidomos sektori elektroenergjetik ashtu siç edhe financat shqiptare janë të mirëmonitoruara. Ka ekipe të Bankës Botërore të cilat janë instaluar në zyrat tona, me projekte konkrete dhe monitorojnë çdo vlerë, çdo shifër. Realiteti është krejt tjetër. Mjafton të shikojmë vitin 2013, arkëtonit vetëm 66% të faturës korente. Ja ku është realiteti sot, 87%. A ka një pjesë të faturës që nuk rikuperohet? Po, patjetër. Në çdo fushë, jo 100% e faturës rikuperohet. Por, praktikisht vlera këtu është brenda limitit, borxhit të keq të njohur në tarifat që paguan konsumatori dhe që praktikisht nuk shkakton asnjë gropë apo borxh tjetër publik. Ja arkëtimi i faturave.

Cili është niveli i humbjeve nëqoftëse gjërat do të kishin shkuar siç thoni ju?! Ja viti 2013 kur mesatarja e 11-Mujorit ishte 43.5%. Sot jemi 27.7%, reduktim drastik i humbjes. Në çfarë përkthehet kjo?! Mbyllja e gropës financiare, më shumë të ardhura për sektorin elektroenergjetik dhe më pak barrë për Buxhetin e Shtetit. Mjafton të kujtojmë se në vitin 2013, plot 21 miliard lekë, do të thotë 200 milion dollarë të asaj kohe i hiqeshin shqiptarëve nga sektorë të tjerë të rëndësishëm jetikë dhe shkonin për të mbuluar gropat dhe vjedhjet në sektorin elektroenergjetik për shkak keqmenaxhimi që i bëri ish qeveria. Ja ku është mbi bazë vjetore! 45% ishte niveli i humbjeve në vitin 2013 dhe këtë vit mbyllet nën 28%.

U hodhën shpifje të tjera që është rritur borxhi në sektorin elektroenergjetik. Mjafton të shikoni shifrat se si ka vajtur. Për shkak të keqmenaxhimit, 126 miliard lekë u krijua borxh. Sot që flasim, borxhi është reduktuar në 105 miliard lekë. Për çudi, për ironi të fatit, këtu hyjnë edhe paratë që kemi rikuperuar nga ajo që ju e quani aferë e që paskam ndarë unë me CEZ-in, se kështu thoni. Paratë janë këtu, po arkëtohen nga kompania ndërsa ju thoni se i paskam ndarë unë me CEZ-in.

Po cili është numri i aktmarrëveshjeve?! 450 mijë qytetarë shqiptarë kanë hyrë në marrëveshje me Operatorin e Shpërndarjes. Pse? Besuan tek ky proces dhe pikërisht unë po jua them qytetarëve shqiptarë, e deklaroi edhe Kryeministri, po e deklaroj edhe unë këtu: për shkak të mirëmenaxhimit dhe të ardhurave të shtuara, mbylljes së gropës financiare, ne do të mundësojmë edhe një reduktim tjetër në fund të vitit, për të gjithë personat që kanë kamatëvonesa e kanë qenë të rregullt me pagesat e faturës së energjisë elektrike. Ju thoni ulje çmimi por ulja e çmimit nuk realizohet me fjalë boshe. Nuk realizohet me premtimet që jep Lulëzim Basha që do fal 200 kv, a thua sikur i ka ato nga xhepi, sepse këto janë absurditete. Çdo njeri që ka punuar, që ka qenë njëherë Ministër apo që është marrë me atë sektor, qoftë ky i Financave apo i Energjetikës e di shumë mirë se ato para nuk kanë si të dalin. Përkundrazi, ato që bëjmë ne, vijnë si shkak i mirëperformancës dhe kursimit të parave të cilat ju kthehen mbrapsht qytetarëve.

Një sqarim ndërkohë edhe për ata që mërziten se po bëhen tendera sepse hodhi dikush ca akuza këtu e tha po përdoren 400 milion lekë nga Operatori i Shpërndarjes për makina. Po normal, 400 milion lekë për 140 makina për 3 vjet me proces leasing dhe që praktikisht është e njëjta kontratë që ka bërë edhe në kohën tuaj Sait Dollapi. Aktualisht kontrata po bëhet me më pak lekë dhe më e favorshme për kompaninë. Po ti hysh llogarisë është shumë më mirë që ti marrësh këto makina me leasing dhe ti mirëmbash sesa të mbash një flotë me makina dhe të shpërdorohen siç dihet që shpërdorohen asetet shtetërore fatkeqësisht në këtë vend. Të gjitha këto shpifje që hidhen flasin për të kundërtën, që sektori është i mirëmenaxhuar dhe pikërisht sepse është i mirëmenaxhuar shikoni vlerat e investimeve, se këto flasin vetë.

Në vitin 2013, në totalin e investimeve kishim vetëm 1.2 miliard lekë, sot totali i investimeve vetëm në sektorin e shpërndarjes ka vajtur 12.2 miliard lekë dhe në total sektori shkon 24 miliard, pra 200 e ca milion dollarë. Nga erdhën këto para? Aspak nga rritja e borxhit sepse borxhi ka rënë. Nga ky konvertim që po i bëhet overdrafteve me kredi afatgjatë, vetëm ky operacion financiar për të ulur kreditë do ti shpëtojë Korporatës Elektroenergjetike 5 deri në 6 milion dollarë çdo vit. Ndërkohë, do të çlirojë barrën e Buxhetit të Shtetit dhe ekspozimin e Buxhetit me garancitë sovrane që jep, për të krijuar mundësi që ne të mund të marrim kredi më të shëndetshme, jo për të mbuluar gropën dhe eksperimentet ne energjetikë, por kredi të shëndetshme për investime, për rrugë apo qoftë për aktivitete të tjera.

Mjafton të shikoni interesat, shikoni vitin 2013 me çfarë interesash i keni marrë ju, 6.58% apo 7.1% viti 2012. Ne pa bërë këtë konvertim bëmë të mundur që ti ulim interesat në 4.38% në 4 vite. Vetëm Korporata Elektroenergjetike Shqiptare nga ky operacion ka kursyer 25 milion dollarë. Shtron pyetjen dikush nga dalin paratë?! Ja pra, këtej dalin paratë, nga mirëmenaxhimi, ulje e vjedhjeve, mirëadministrim, çlirimi i investimeve dhe mos ngarkimi i Buxhetit të Shtetit me barrë siç është ngarkuar në kohën tuaj. Këto janë shifrat reale që njerëzit i kuptojnë sepse po e shikojnë përditë, investimet që po kryhen në këtë sektor.

Dikush tha vrau veten sepse nuk paguante dritat apo ikën dritat. Po kush i ha këto gjëra?! Si mund të zbresë politika në këto nivele? Harroni që keni qenë edhe ju në ato zyra? Si mund të spekulohet në këtë mënyrë? Vërtet probleme ka, por duhet të analizohet numri i ndërprerjeve që është ulur. E kemi thënë se Shqipëria ka një rrjet krejtësisht të amortizuar, do ketë probleme me ndërprerjet e energjisë por po investohet vazhdimisht. Do 1.7 miliard dollarë rrjeti elektroenergjetik shqiptar që të rinovohet dhe që ne të jemi në standardet europiane. Si do bëhen këto?! Ne kemi filluar diçka, kemi investuar mbi 200 e ca milion në këto vite. Patjetër, në krye të 5-6 viteve mendoj se po të vazhdohet me këto ritme do jetë një situatë krejt tjetër. Nuk duhet që energjitika të bëhet pre e spekulantëve politikë duke thënë do bëjmë ulje çmimesh apo do japim energji pa para! Të gjitha këto, nesër do ti kushtojnë barrë publikut dhe do ta shkatërrojnë këtë sistem, por mbi të gjitha do të shkatërrojnë integritetin e Buxhetit të Shtetit, gjithë stabilitetin financiar shqiptar. Pikërisht kjo do të ndodhë, ashtu siç ndodhi. Pra ky është një film i parë, ajo që ju i premtoni njerëzve është të ktheheni edhe njëherë në vitin 2013. Po shqiptarët janë ngopur me këtë dhe nuk ka më budallenj që t’iu besojnë në shfryrjen e atij dufi që keni këtu në sallë.

U hodhën këtu disa akuza edhe për dëmshpërblimet e qytetarëve të Shkodrës. Po shih çfarë absurditete keni bërë ju! Në vitin 2011 përmbytjet ishin për shkak të reshjeve, jo hapjes së digave. Çfarë bëri Sali Berisha siç i bën gjithmonë kur do të mbyllë një gropë. Nxori një VKM numër 842, datë 26.01.20111 ku thotë se për këto përmbytje të shkaktuara nga reshjet dhe jo për shkak të digave, fatura ti kalojë KESH-it. Pra, qe një mashtrim haptazi. Është tjetër gjë që është bërë me vendim qeverie dhe është në fuqi. Pavarësisht se është një vendim absurd duhet ta respektojmë, por është vendim absurd sepse ju çua fatura një kompanie që nuk i takonte, nuk kishte lidhje. Është si ajo që meqë ke mundësi hidhja faturën dikujt tjetër dhe lan duart si ponc pilati. Ne banorëve ju thamë, i keni borxh sektorit të energjisë elektrike? Hiqni borxhet, pra paratë që ju kanë borxh për shkak të përmbytjes do t’jua kthejmë duke reduktuar faturën e energjisë elektrike. Ndodhi edhe një fenomen tjetër kur filloi verifikimi. Doli që nga verifikimi vetëm 2790 banorë ishin realisht pjesë dhe që ishin prekur nga kjo përmbytje. Por shifra qe më e madhe, mbi 9 mijë e të gjithë fiktivë për interesa elektoralë.

Normal, kur faturën ia hedh një korporate tjetër që nuk mban përgjegjësi edhe lista njerëzve do bëhej si magazinë pa inventar. Siç i bënte Sali Berisha vazhdimisht investimet publike, thoshte kemi hapur rrugë pa pasur para, kemi krijuar kontrata koncesionare pa pasur para. Mos them fatura rrugëve 600 apo 700 milion dollarë. Pse kështu mund të funksionojë stabiliteti ligjor dhe flisni për stabilitet të kontratës që i jep tjetrit një copë letër e nuk garanton asnjë para. Ku ka gjë më kriminale për biznesin se ti thuash ke një kontratë, por unë nuk i kam paratë?! E gënjen sepse ia shet në titull qeveritar. Pra, këto janë gjërat që e shkatërrojnë një shtet. Ju që flisni për stabilitet apo për integrim europian, pikërisht nga kjo fillon. Është e vërtetë që integrimi europian ka të bëjë edhe me stabilitetin ekonomik por stabiliteti ekonomik fillon që nga marrëdhënia e ndershme që krijon shteti me biznesin. Jo me format që bëtë ju, filloni rrugë pa pasur para, ndërtoni TEC-in e Vlorës 100 milion euro por asnjëherë në punë sepse është një dështim tjetër, një masakër  energjitikë. Vazhdojnë shqiptarët të paguajnë për atë termocentral dhe akoma nuk është vënë në punë. Pra këto janë gropat e shkaktuara.

E dëgjoja një ditë Sali Berishën për Unazën e Jugut, e cila u përfundua nga kjo qeveri. Ka qenë ideja jonë thoshte, po mirë mo ta jap se ide bëjmë shumë ne. Kush nuk ka ide sot?! Mjafton të shikosh dhe të lexosh diku, vjen me ide të bukura por problemi është a i bën dot? A i ke paratë dhe a i ke mundësitë ti financosh ato? Pikërisht, ajo që kemi bërë ne në këtë sektor si dhe në shumë fusha të tjera është pikërisht që idetë i kemi bërë realitet me vepra, duke siguruar financime dhe duke mbyllur gropat financiare që ju keni hapur. Të gjitha ato akuza që hidhni këtu janë thjesht për të helmuar mendjen e atyre pak qytetarëve që mund të jenë në gjendje t’iu besojnë.

Mungesën e shpresës e keni tek anëtarësia, tek njerëzit tuaj sepse nuk ka gjë më të keqe tek një parti politike e cila ka katër vjet në opozitë që ta dijë të sigurtë humbjen se nuk ka ndodhur ndonjëherë. Dhe ne në vitin 2009 humbëm, dikush do të thotë me hile apo me të drejtë, por të paktën besonim që do të fitonim. Kurse ju hyni në një garë të kapitulluar. Atëherë çfarë do bësh, si ai njeriu që nuk ka shans, do bëjë zhurmë, do bëjë rrëmujë. Ky është i vetmi problem që ju keni, prandaj kjo asimetri është e tmerrshme për sistemin demokratik. Ky është problemi real, unë ju kuptoj. Ky është problemi juaj dhe vini e ktheni këtë sallë në një teatër akuzash pa asnjë pikë vlere. Prandaj kjo sallë e ka humbur legjitimitetin siç tha z.Mediu dhe e falënderoj për këtë.

Së fundi, doja të sqaroja edhe një problem tjetër në lidhje me çështjen që ngriti deputeti nga Fieri për situatën e lëkundjeve në Zharrëz. Është e vërtetë që fenomeni i lëkundjeve është shumë vjeçar në atë zonë. Ne të paktën si qeveri bëmë një gjë të mundur, arritëm të detyrojmë kompaninë Bankers Petroleum që të investonte për vendosjen e sismomatësave të cilët i administrojmë ne e përmes të cilëve bëhet matja e sizmikës. Në fakt, nga raportet e fundit që kam, raportet janë monitoruar në mënyrë rigoroze e duke nxjerrë disa konkluzione. Ka patur mbi 889 ngjarje lëvizje sizmike të një magnitude nga 0.3 deri në 3 ballë çka ka sjellë shqetësime edhe tek banorët. Është një shqetësim që në fakt has në vështirësi për investigimin nëse ka lidhje me aktivitetin hidrokarbur apo jo. Ne kemi dyshimet tona, të paktën këto të dhëna paraprake na kanë dhënë një mundësi të fokusojmë një investigim aty ku duhet. Patjetër që shteti do të marrë masa duke kontraktuar sëbashku me kompaninë ekspertë të pavarur që të bëjmë një investigim tërësor të këtij fenomeni, ashtu sikurse kanë bërë edhe vende të tjera aty ku ka aktivitet hidrokarbur.

Nuk duhet të politizohet ky problem, aq më tepër kur kjo qeveri u tregua e përgjegjshme për të instaluar pajisjet dhe detyruar kompaninë të ndajë të dhëna, jo si më parë kur shteti ishte i shurdhër dhe banorët detyroheshin të sulmonin asetet e kompanisë çka është një ngjarje jo e deshirueshme. Dua të sqaroj qytetarët e Fierit që këtij procesi do ti shkohet deri në fund. Do kohën e vet pasi është një proces i vështirë shkencor e teknologjik. Ne si ministri nuk i kemi ato mundësi, institute i gjeoshkencave ka gjithashtu kapacitete të limituara por me rëndësi është që na ka dhënë një pasqyrë për gjithë lëvizjet sizmike. Kjo është një bazë e mirë dhe e nevojshme që ne të mund të marrim ekspertizë ndërkombëtare dhe të investigojmë nëse ka lidhje aktiviteti hidrokarbur me lëvizjet sizmike e deri në çfarë shkalle në mënyrë që të nxjerrim përgjegjësitë qoftë për kompaninë apo qoftë edhe për shtetin. Kjo është e vetmja mënyrë dhe kërkoj mirëkuptim e jo spekulim politik. Industria gjithmonë ka probleme, sektori energjitik apo industrial ka shqetësimet e veta edhe në komunitet. Me rëndësi është që sëbashku të gjejmë adresimin e duhur sepse nuk kemi qëllim as të frikësojmë investitorët por njëkohësisht edhe të përgjigjemi para popullatës siç duhet.

Të dashur kolegë,

Ju lutem, dufin e mungesës së shpresës për të ardhur në pushtet mos e sillni në këtë sallë, kursejani shqiptarëve këtë gjë. Nëse doni vërtet drejtësi, miratojini të gjitha këto ligje dhe mundësisht lëjani palëve të huaja. Nuk më vjen mirë edhe mua si shqiptar, por faktikisht këtu jemi katandisur. Këtë thoni ju, nuk ka besim tek ky institucion se është ai i partisë, s’kam besim tek kjo tjetra. Atëherë lejani aktorëve të huaj. Meqenëse aktorët e huaj folën, do të ishte më e ndershme që edhe ju të thonit po. Aktorët folën le ta pranojmë. Ligji i vetingut bëhet dhe ky poçes të fillojë, për ti shkuar deri në fund të vërtetave. Edhe për të garantuar ndonjë frikë tuajën se nuk fitoni zgjedhjet se paska shumë drogë në qarkullim.

Faleminderit!

energjia.al  16.12.2016

Ministri i Energjisë dhe Industrisë z.Damian Gjiknuri prezantoi para Komisionit Parlamentar për Veprimtarinë Prodhuese Buxhetin e vitit 2017 për këtë institucion.

Në fjalën e tij para deputetëve, Gjiknuri deklaroi se reforma e ndërmarrë në sektor e ka çliruar Buxhetin e Shtetit nga barra dhe ka krijuar kushtet që qeveria të rrisë tashmë edhe pagat e pensionet.

“Barra e Buxhetit të Shtetit nga sektori elektroenergjitik në vitin 2013 ishte 21 miliard lek. Para këto të cilat subvenciononin vjedhjen e energjisë, mospagesën e saj dhe blerjen me çmime të larta nga importi. Për vitin 2017, barra e sektorit në Buxhet është reduktuar në vetëm 2.5 miliard lekë të cilat shkojnë vetëm për investime. Ndërkaq, KESH, OSHEE dhe OST kanë nisur të shlyejnë vet kreditë e marra me garanci qeveritare duke mos e rënduar Buxhetin edhe në këtë aspekt”, u shpreh z.Gjiknuri.

Nga ana tjetër, vijoi ai, kontributi direkt në Buxhet nga 3 kompanitë e sektorit elektroenergjitik ka ardhur në rritje dhe gjatë vitit 2015 KESH, OSHEE dhe OST kanë kontribuar me shumën prej rreth 8.4 miliard lekësh.

“Përtej asaj çka parashikon Buxheti i Shtetit, kompanitë me fondet e tyre janë duke kryer investime intensive në prodhim, transmetim dhe shpërndarje. Kështu, nëse në vitin 2013 investoheshin vetëm 4.6 miliard lekë, plani i investimeve të vitit 2016 arriti në 24.1 miliard lekë”, theksoi ministri.

Sipas tij, kostoja financiare e mbulimit të humbjeve nga Operatori i Shpërndarjes për periudhën 10 Mujore (Janar-Tetor 2016) arrin në 47.1 milion euro. Për të njëjtën periudhë të vitit 2013, kostoja e mbulimit të humbjeve ishte jo pak por 116.2 milion euro.

“Niveli i humbjeve në rrjet gjatë periudhës Janar-Shtator ka zbritur në 27.6%. Në të njëjtën periudhë të një viti më parë, ky tregues ishte 31.1%. Për vitin 2013 ky tregues ishte 43.3%. E njëjta ecuri pozitive paraqitet edhe sa i takon treguesve të nivelit të arkëtimit të faturave korente të energjisë elektrike. Gjatë periudhës Janar-Shtator 2016 janë arkëtuar nga faturat korente (pa llogaritur arkëtimet nga aktmarrëveshjet) 42,9 miliard lek. Për të njëjtën periudhë të një viti më parë ishin arkëtuar 41,5 miliard lek. Ndërsa në vitin 2013 ishin arkëtuar vetëm 28.8 miliard lek”, nënvizoi Gjiknuri.

Për vitin 2017 është parashikuar financim buxhetor në masën 3.309 milion lekë (10 % më shumë krahasuar 2016, i cili ishte në masën 2.984 milion lekë). 695 milion lekë, shpenzime korrente paga, sig.shoq, shp. operative të institucioneve buxhetore ndërsa 2.772 milion lekë, shpenzime kapitale të brendshme dhe të huaja.

Në Projektbuxhetin e 2017, pjesën më të madhe në shpenzimet kapitale të brendshme e zë rimbursimi i kostos së infrastrukturës zëvendësuese të Devoll Hidropower ( 10 milion Euro ), shpenzim i cili është në zbatim të Kontratës së Konçesionit miratuar me ligjin nr.10083  dt.23.02.2009 “Për miratimin Marrëveshjes së Konçesionit ndërmjet  Ministrisë  së Ekonomisë,  Tregtisë dhe Energjetikës,  si autoritet kontraktues dhe AVN AG, Statkraft AS dhe Devoll Hydropower sh.a si bashkëkonçesionarë, për projektimin, financimin, ndërtimin, marrjen në pronësi,  shfrytëzimin,  mirëmbajtjen  dhe  transferimin e projektit të hidrocentralit në lumin Devoll në Republikën e Shqipërisë”; ndërkohë janë miratuar kostot e rritura në masën 985 mijë Euro për vitin 2014 dhe 2.5 mln Euro për vitin 2015, të cilat duhet të parashikohen për tu rimbursuar brenda  programit afatmesëm pasi Qeveria Shqiptare nëpërmjet MEI-it si Autoritet Kontraktor është angazhuar në realizimin e këtij projekti të rëndësishëm energjetik mbi lumin Devoll.

Z.Gjiknuri ju përgjigj edhe pyetjeve të deputetëve lidhur me vendosjen e akcizës ndaj gazit për automjetet duke sqaruar se nisma synon disiplinimin e tregut dhe forcon sigurinë për qytetarët familjarë të cilët nuk duhet të mbushin bombolat në autogaze. Sipas tij, akciza do të ndikojë në rritjen e çmimit vetëm për autogazet dhe jo për konsumatorët e tjerë familjarë apo industrialë.

Ministri Gjiknuri hodhi poshtë edhe aludimet e deputetëve të opozitës për vendosjen e një kostoje shtesë mbi qytetarët për kolaudimin e matësave.

“Baza ligjore për kolaudimin e matësave është e hershme, që në qeverinë Berisha. Ne udhëzimin të cilit ju i referoheni, përkundrazi sanksionohet ulje e kostos së kolaudimit. Ndërkaq, koston e kolaudimit nuk e paguan konsumatori por e paguan kompania e shpërndarjes. Kolaudimi bëhet në respekt të Kodit të Matjes, me përjashtim të rasteve kur ka ankesë nga qytetari ose dyshim nga kompania”, sqaroi z.Gjiknuri.

energjia.al  17.11.2016

Fjala e mbajtur nga Ministri Gjiknuri në seancën e parlamentit si replikë ndaj deklaratave të bëra nga deputeti Sali Berisha

Të nderuar kolegë,

Nuk keni pse mërziteni, kur tjetri flet këtu 1 orë e hedh shpifje, anëtari i Kabinetit ka të drejtën të marrë fjalën në çdo kohë. Aq më tepër kur reagon për akuza nga më idiotet dhe absurdet që edhe e helmojnë mendjen e njerëzve, e për të cilat publiku kërkon sqarim. Nëse nuk keni durim thojini atij zotërisë të mos flasë këtu budalliqe 1 orë dhe të hedhë lloj-lloj akuzash. Ka shumë pak dëgjues ai zotëria tashmë, shyqyr ka gjetur një emision që del herë pas herë dhe nëse ka ndonjë njeri që e dëgjon se ska çfarë bën. Edhe këtu vjen mban atë fjalën 1 orë, gënjen dhe ikën por në fund të fundit njerëzit duan sqarime. Disiplinojeni atë drejtuesin tuaj hije dhe pastaj merrni përsipër të vendosni rendin këtu në sallë.

U hodhën akuza gjoja për privatizimin e Kaskadës së Drinit apo siç e quan ai zotëria, i paskemi dhënë serbëve manaxhimin e Kaskadës. Dua të sqaroj publikun për çfarë ka ndodhur dhe se përse akuzat e tij janë shpifje të mirëfillta. Mbase ai, në kokën e tij këtë që thotë e ka patur në mendje ta bëjë vet me serbët, që kur privoi Shqipërinë nga projekti më i rëndësishëm duke sabotuar në mënyrë sistematike lidhjen e Shqipërisë me Kosovën. Qëllimin e vërtetë e ka patur që aferat ti bëjë me serbët sepse me serbët e ka filluar me energjinë dhe me karburantin, kështu bëri në kohën e Milosheviçit, kështu vazhdoi edhe në kohën kur ishte në qeverisje sërish. Siç duket, i janë prishur planet për të vazhduar në këtë linjë edhe më tej me Fazlliçin, që e dimë mirë se çfarë planesh kishte për sektorin elektroenergjitik shqiptar.

Dua të sqaroj publikun për procedurën që ka të bëjë me depozitimin e energjisë në kushtet e prurjeve të mëdha. Korporata Elektroenergjitike Shqiptare, në rastet e prurjeve të mëdha detyrohet të derdhë ujë kot pa prodhuar energji ose prodhon energji nën kosto për të ruajtur nivelet e Kaskadës. Bëhet fjalë për energjinë e prodhuar natën, kur prurjet e mëdha janë të tilla që duhet të shkarkosh ujë ose të prodhosh energji edhe nën kosto që të mbash nivelin e Kaskadës për të mos rrezikuar përmbytjet.

Për shkak të këtyre operacioneve të shkarkimit të ujit të detyruar nga prurjet e mëdha, KESH humbiste çdo vit miliona e miliona euro. Detyrohej në disa raste të shiste energjinë nën kosto dhe në këtë mënyrë përfitonin tregtarët e energjisë që e blinin atë dhe ja shisnin nesër Operatorit të Shpërndarjes, ish-CEZ-it apo aktorëve tjerë që blejnë energjinë. Kjo e gjitha ndodhte në kurriz të interesave të publikut shqiptar. KESH pasi u konsultua profesionalisht për optimizimin e prodhimit të energjisë, shpalli një garë për kompani që marrin përsipër depozitimin e energjisë së tepërt. Çfarë do të thotë kjo? Ai ujë që deri dje derdhej kot dhe energji që shitej nën kosto, depozitohet dhe ti e përdor për të optimizuar të gjithë portofolin tënd. Pra, e përdor kur ke nevojë apo për të mbuluar nevojat e konsumatorëve familjarë apo në tërësi ata të rregulluar. Ky është një operacion që nuk rregullohet as nga ligji i prokurimit publik dhe as nga legjislacioni në fuqi për pjesën e rregulluar të sektorit. Pse? Duhet të kuptoni se KESH ka detyrimin për furnizimin e klientëve të rregulluar dhe çdo tepricë tjetër e energjisë tregtohet sipas rregullave të tregut. Kjo tepricë energjie, kjo prurje e cila është totalisht e pakontrolluar e që deri dje derdhej kot, u vendos që të hyjë në një portofol për depozitimin e energjisë. U bë një garë ku u ftuan disa kompani të cilat normalisht janë ato që kanë TEC-e e që e kanë të mundur të optimizojnë këtë lloj energjie. Një lloj kompanie që ka Termocentral ka mundësi që sëbashku me Kaskadën të bëjë një optimizim dhe gjithnjë bëhet fjalë për kushtet e prurjeve të mëdha. Nuk është një optimizim vjetor por për rastet kur ka reshje të shumta siç ka ndodhur në disa vite, kur uji derdhej kot apo energjia shitej nën kosto. Tani, kjo energji do të depozitohet dhe do të merret me një vlerë më të mirë në interes për KESH-in. Pse është bërë me afat 3 vjet? Sepse ka oshilacione të prurjeve të motit, një vit mund të jetë me prurje dhe tjetri pa prurje ndaj bëhet për këtë lloj periudhe. Nuk kemi të bëjmë fare me manaxhim Kaskade e as dhënie të Kaskadës një kompanie të huaj. Kjo është thjesht një shpifje e Sali Berishës me ato gjëra që ka patur ndërmend ti bëjë vet.

Damian Gjiknuri ne Kuvend parlamentSikur kjo marrëveshje depozitimi të kishte qenë në zbatim, vetëm për vitin 2016 Korporata Elektroenergjitike Shqiptare do të fitonte 5 milion USD të ardhura shtesë. Po të zbatohej në vitin 2015 kur kishte më shumë prurje janë 6.2 milion USD që do të ishin të ardhura po njësoj. Këto për të cilat po ju flas, janë analiza ekonomike të provuara dhe me konsulencën përkatëse. Vetëm për vitin 2013, kur sërish ka patur shumë prurje do ishin përfituar 3 milion USD të tjera nga KESH nëse do kishte një marrëveshje të tillë. Praktikisht, sikur të ishte aplikuar në 4 vitet e shkuara do ishin kursyer rreth 20 milion USD energji më shumë. Të gjitha këto do të shkonin në dobi të konsumatorit, ndaj këto shpifje që hidhen sot duhet ti marrin mbrapsht ata që i thonë. Siç duket, ai zotëria ka patur plane tjera me këto asete energjitike.

Ai është njeriu i fundit që duhet të flasë për energjinë pasi është varrmihësi i sistemit energjitik. Është i tërbuar plotësisht nga të gjitha sukseset e arritura dhe sistemi elektroenergjitik është kthyer në dobiprurës, ka dalë me bilanc pozitiv, po kontribuon në Buxhetin e Shtetit dhe sigurinë energjitike. Po kryhen investimet që zotëria tërbohet kur i sheh. Muaj pas muaji ka inaugurime në sektorin e shpërndarjes së energjisë elektrike. Në këtë situatë, ai gjen çdo rast që me shpifje të sulmojë qeverinë dhe sistemin energjitik që siç duket është dështimi i tij më i madh me atë ëndrrën e famshme të superfuqisë. E çoi Shqipërinë në varr energjitik në fakt dhe sa herë i del rasti njollos e sulmon.

Për tia sqaruar publikut dhe njëherë, ajo që kemi bërë është se i kemi ndikuar pozitivisht Buxhetit të Shtetit pa shkelur asnjë rregull, e mbi të gjitha duke siguruar furnizimin e qëndrueshëm të popullatës. Korporata përgjigjet fillimisht për klientët e rregulluar dhe më pas, tepricën e energjisë po e optimizon në mënyrën më të mirë. Në fund të fundit, qëllimi i kompanive, pavarësisht se ato janë publike është që të jenë fitimprurëse. Ato duhet të jenë të afta të dalin me fitim dhe më pas se si menaxhohet fitimi është diçka tjetër. Ai mund të kthehet në investime, mund të shkojë në Buxhetin e Shtetit ose mund të shkojë në dobi të sektorit deri edhe në uljen e tarifave.

Nëse do të rrinim duarkryq dhe të dëgjonim të dështuarin e madh të energjitikës, patjetër që sistemi do të lëngonte siç ka lënguar në kohën e tij. Sëfundi, përmendi një vendim të ERE-s ai dhe unë dua të sqaroj opinionin publik. Enti Rregullator, pa marrë informacionin e mjaftueshëm për procedurën që po zhvillonte KESH-i, doli me një vendim. Mendoi se kjo pjesë e këtij operacioni duhet të hynte brenda pjesës së rregulluar të sektorit të energjisë elektrike. Mund të duket shumë teknike për publikun por kjo është një pjesë jo e rregulluar e sektorit të energjisë elektrike. Pjesa e rregulluar është ajo pjesë që paguajnë konsumatorët shqiptarë e që ka të bëjë me tarifat e energjisë. Çdo gjë tjetër, kompanitë energjitike e trajtojnë në planin komercial. Vendimi i dyti i ERE-s, pas sqarimeve të nevojshme dhe konsultimeve me Sekretariatin e Energjisë, të cilin e kemi partner për veprimet në kuadër të reformës, doli në konkluzionin se kjo pjesë kërkon trajtim të veçantë jashtë pjesës së rregulluar. Pra, akuzat që hedh zotëria këtu i ka totalisht mashtrime. Dua të siguroj qytetarët se procedurat janë krejt transparente, dokumentacioni është plotësisht aty dhe nuk ka as dhënie Kaskade, as privatizim e as menaxhim Kaskade nga privati. Ka thjesht një menaxhim i mirë të ujërave që derdheshin kot nga KESH-i. Në vend që ato ujëra të derdheshin kot ato po sjellin para për publikun shqiptar dhe ky është operacioni.

Ai zotëria mërzitet shumë kur ja them se çfarë ka bërë në kohën e tij por mjafton tu them shifrat me të cilat e ka blerë energjinë nga importi Operatori i Shpërndarjes. Çmimi i importit të energjisë në kohën e Sali Berishës, nga të njëjtat kompani për të cilat sot ai na akuzon ne se kemi lidhje, shkonte 50-60 euro për megavat. Sot, OSHEE e ka ulur deri në 36 euro për megavat çmimin e blerjes së energjisë elektrike dhe të gjitha këto kanë sjellë rezultate shumë më të mira e pozitive për kompaninë. Shikoni se si ka shitur KESH-i në kohën e këtij zotërisë!! Në vitin 2011 kanë shitur me 20 euro nën çmimin e bursës; në vitin 2012 janë 13 euro nën bursë me çmimin e shitjes nga KESH-i. Këto euro që i merreshin KESH-it ishin fitim për tregtarët që ja shisnin prapë nesër Operatorit të Shpërndarjes.

Po të shikoni shitjet e fundit që ka bërë tani KESH-i konstaton se nuk janë më shumë se 5-6 euro nga çmimi i bursës. Kjo diferencë kuptohet sepse tek pjesa e bursës futen edhe elementët ekstra të transmetimit që e bëjnë energjinë në Shqipëri pak më të shtrenjtë. Në fund të fundit, po të shohim krahasimin e shifrave, nëse para 2013 shpenzohej për import energjie 150 milion euro energji, sot kjo vlerë është jo më shumë se 55 milion euro. Kjo ka ardhur nga reduktimi i humbjeve por edhe nga përmirësimet për shkak të procedurave më transparente dhe konkuruese.

Rezultati pozitiv i këtyre reformave në energji është i kuantifikuar në vlerë dhe ka kontribuar në mënyrë direkte në Buxhetin e Shtetit. Është reforma që ka dhënë kursimin më të madh në Buxhet dhe vlerat janë të konfirmuara e mjafton të lexoni raportet e Fondit Monetar Ndërkombëtar, Bankës Botërore.

Sot nuk merren më para nga Buxheti i Shtetit për të mbuluar keqmenaxhimet e mungesën e performancës. Ato pak para që merren janë vetëm si garanci për investimet që e kthejnë mbrapsht këtë angazhim.

Kaq besoj mjaftojnë për të hedhur poshtë mashtrimet e dështakut dixhital.

Faleminderit

energjia.al  07.10.2016

Qeveria helene ka dorëzuar në parlamentin e vendit një paketë të re reformash. Miratimi i kësaj pakete përkthehet në zhbllokimin e 2.8 miliardë eurove nga fondi i privatizimeve.

Reforma të reja në këmbim të parave të reja, dhe historia në parlamentin grek vazhdon të përsëritet. Paketa e reformave parashikon privatizimin e ndërmarrjeve të ujit dhe gazit.

Ky ishte një kusht i kreditorëve ndërkombëtarë për disbursimin e parave të reja nga plani i tretë i shpëtimit prej 86 miliardë eurosh. Reformat e ardhshme janë; shkurtimi i pensioneve, reforma në sektorin energjetik si dhe nxitja e privatizimeve.

Komisioni parlamentar ndërkohë e ka aprovuar paketën e re të reformave dhe pritet vetëm aprovimi nga parlamenti, që shihet thjesht si një formalitet.

Në mes të muajit Tetor ndërkohë, përfqësues të Komisionit Europian, Bankës Qendrore Europiane, Mekanizmit Europian të Stabilitetit si dhe Fondit Monetar Ndërkombëtar pritet që të zbarkojnë në Athinë, për të filluar me programin e dytë të rishikimit të reformave. Tema më e nxehtë pritet të jetë ajo e reformës në tregun e punës.

Scan Tv,  28.09.2016

Fjala e Ministrit të Energjisë dhe Industrisë z.Damian Gjiknuri në seancën parlamentare

I nderuar drejtues i seancës,

Në vend që të ishte një seancë ku vërtet të ballafaqoheshin politikat dhe ajo çka është bërë, del këtu ‘Sali komiku’, që është i vetmi njeri që e zbaton teorinë ‘dhimbjen ta kthejmë në forcë’. Ai del këtu të shesë dështimin për sukses, vetëm ai njeri mund ta bëjë. Shet dështimin e tij për të mos e bërë këtë linjë në kohë, për ta dështuar për interesa të vogla dhe dihet se është dështuar për shumë kohë.

Populli është shumë i qartë dhe i kupton shumë mirë këto gjëra. E ka parë se çfarë ka bërë ai njeri për sistemin elektroenergjitik. E ka kuptuar kufomën që ky njeri ka ngritur, fantazmën e tij gjoja gjigande me superfuqi, dështimin e gropën më të madhe që i bëri Buxheti të Shtetit dhe ekonomisë së vendit me politikat e tij të papërgjegjshme. Gjithsesi, unë këtu jam për të komunikuar me qytetarët shqiptarë por ai e meritonte një përgjigje për shpifjet që hodhi.

Sot është një moment i rëndësishëm, i paraprin një ngjarjeje e cila për tre javë do të bëhet realitet, që është inaugurimi i kësaj linje. Kjo është gjëja më e rëndësishme që duhet ta dëgjojnë qytetarët shqiptarë. Qeveria shqiptarë, në kohë rekord prej 2 vjetësh e përfundoi këtë vepër, këtë investim kaq strategjik mes Shqipërisë dhe Kosovës. Kjo vepër, në fund të Qershorit do të fillojë, do të hyjë në funksionim. Ky është lajm i mirë për të dy anët e kufirit, për të gjithë kombin tonë sepse Shqipëria po kryen investimet dhe po lidhet me infrastrukturë energjetike aq të nevojshme për të bërë të mundur edhe atë projekt të madh që kemi, bashkimi energjetik më Kosovën. Do mund të vëmë në funksion burimet e Kosovës në dobi të Shqipërisë dhe anasjelltas sepse përmbajtja e burimeve të Kosovës me linjitin dhe Shqipëria me hidron bëjnë një balancim jashtëzakonisht të mirë të sistemit elektroenergjetik. Këtu ka qenë qëllimi, investimi në këtë linjë dhe kjo u bë realitet nga kjo qeveri në një kohë rekord. Pati madje edhe një devijim të projektit për të ruajtur disa vlera historike siç ishte rasti i Komanit, të cilin qeveria e mëparshme nuk e kishte marrë parasysh. Pra, flasim për pjesën e Komanit ku ishin gjetje arkeologjike apo një qytetërim i cili duhet ruajtur dhe kjo e vonoi pak projektin. Ne jemi krenar që edhe trashëgimia kulturore e historike u shpëtua por dhe linja u përfundua në kohë.

Dje ishim në një ceremoni jashtëzakonisht të rëndësishme që ishte inaugurimi i qendrës dispeçer, truri i sistemit elektroenergjetik shqiptar. Po ta marrim këtë organizëm do të shikojmë që ai po funksionon në tërësinë e tij, megjithëse në vitin 2013 ishte tërësisht një kufomë. Një kufomë e plotë energjetike, e cila e rrezikonte Shqipërinë nga të gjitha pikëpamjet. Dje inauguruam trurin energjetik, i përfunduar vetëm në kohën tonë. Shqipëria, për shkak të këtij investimi të realizuar në qeverisjen tonë, u bë anëtar i ENSO-E, pra anëtar i Bashkimit Europian. Është një tregues që ne në sistemin energjetik, sot jemi anëtarë të plotë të Bashkimit Europian për shkak të këtyre investimeve.

Ju kjo ju bën xheloz sepse energjia ka qenë dështimi më i madh i juaji. Siç qe dikur kali juaj i betejës që hapët furinë e koncesioneve, qëlloi gropa më e madhe. Bëtë privatizimin më të dështuar në histori, që e futët vendin në një krizë të madhe dhe morët në qafë shumë investitorë, pa kryer një model të qëndrueshëm ekonomik. Tanti bëheni xheloz pse qeveria po e realizon me sukses një proces shumë të vështirë, i cili nuk është se ka mbaruar. Kjo reformë po vazhdon, ky ristrukturim i gjithë sektorit energjetik po vazhdon, por është një proces që po ecën me këmbë të sigurta. Këtu bëheni xheloz për shkak të investimeve që bëjmë. Doli një ish zv.ministër tha po bëhen tendera, nuk po bëhen investime. E kupton çfarë lloj niveli?! Po, zotëri investimet publike me prokurime publike bëhen, me tendera. Ju dilni dhe akuzoni Operatorin e Shpërndarjes, apo KESH-in dhe Operatorin e Sistemit të Transmetimit se pse po bën tendera? Pra thoni pse po bëhen investime aq të munguara në sistemin elektroenergjetik shqiptar? Shifrat flasin vetë. Kjo është e vërteta dhe thoni çfarë të doni. Qesharakë janë ata që nuk duan të ballafaqojnë shifrat. Kjo është e vërteta.

Në sistemin e shpërndarjes, pasi filloi disiplina në pagesat e energjisë elektrike, të marra sëbashku po bëhen mbi 100 milionë dollarë investime, aq sa ju kishit parashikuar në 4 vjet, nga vitit 2009 në vitin 2013. I drejtohem qytetarëve shqiptarë, se ju në fund të fundit jeni në misionin tuaj si opozitë, ju doni të bëni pis, thoni ato që thoni të shtyni ditët, prisni mbase zgjedhjet. Ky është misioni juaj. Unë ju drejtohem qytetarëve shqiptarë, të cilët përditë po shikojnë që disiplina në pagesa, rritja e likuiditetit financiar po kthehet në investime. Cilat janë këto investime? Ju e dini shumë mirë se çfarë investimesh po bëhen në Tiranë, në gjithë rrethinat e Tiranës me rrjet 20 kilovolt, me sistem që po futet në tokë, me kablla ABC. Ju e dini shumë mirë, shkoni në Fier, shkoni në Durrës, në Spitallë, zona që dikur kishin fije jo rrjet energjetik. Shikoni çfarë po bëhet në jugun e Shqipërisë. Për shkak të kësaj qeverie, u vu në funksion unaza e jugut. Shume shpejt, këto ditë po prokurohen dy nënstacionet. Po përfundon procedura për dy nënstacione,Orikumi dhe Himara. Ka filluar procedura e ndërtimit për nënstacionin e Dhërmiut. Pushuesit, në vitet në vijim do të kenë cilësi energjie si në qendër të Shqipërisë, në jugun e Shqipërisë.

Energjia është një pasuri e përbashkët. Nuk është as një mall elektoral që ju e tregtuat gjithmonë sa herë donit të vinit për fushata. Nesër pretendoni që të vinit vetë në pushtet, nuk mund të luani në mënyrë të tillë. Është mall i përbashkët, është një e mirë e përbashkët e cila po ju kthehet qytetarëve. Gjithë ajo mbështetje që dhanë qytetarët me pagesat e tyre, po ju kthehet në investime. Ata po e shikojnë që janë vendosur mijëra matësa vetëm 2 vitet e fundit për konsumatorë që nuk kanë pasur matësa të energjisë elektrike. Kanë mbetur edhe 21 mijë, të cilët do të plotësohen dhe në 2-3 muajt e mbetur. Në Shqipëri, për herë të parë pas 25 vjetësh, çdo qytetar ka matës në sistemin elektrik. Pra, do të paguajë në bazë të energjisë që konsumon dhe kjo është një arritje e kësaj qeverie.

Kjo erdhi pikërisht për shkak të disiplinës financiare, pagesave të shtuara, marrëveshjet që bënë njerëzit për pagesën e energjisë dhe patjetër këto të kthyera në investime. Të gjitha këto kanë hapur mundësi të mëdha, ne po kryejmë reforma të thella në këtë sektor. Nuk është vetëm ajo që duket sepse ju doni ta katandisni të gjithë reformën tek pjesa pagesës. Këtu po bëhen reforma në të gjithë kompanitë e sektorit elektroenergjetik. Po të shikoni të dhënat financiare janë shumë herë më të shëndosha se sa ishin. Do të thotë se nuk janë kthyer më barrë në Buxhetin e Shtetit.

damian gjiknuri parlamentJa tu tregoj një grafik që është domethënës dhe publiku ta shikojë. Shikoni sa lekë merreshin nga Buxheti i Shtetit në vitin 2013 vetëm për të mbuluar dështimin e kompanive elektroenergjetike. 21 miliard lekë, që do të thotë rreth 200 milion dollarë i hiqeshin shkollave, i hiqeshin spitaleve, i hiqeshin nevojave të tjerave të qytetarëve dhe shkonin për të mbuluar keqmenaxhimin. Shikoni si ka vajtur grafiku. 5 miliard është sivjet dhe vetëm garanci për investime. Pra, nuk është më para që shkon për keqmenaxhim, por janë para që shkojnë për investime. Pikërisht këto do të kthejnë cilësinë e furnizimit, këto do të konsolidojnë modelin tonë ekonomik me energji dhe këto po i hapin rrugën edhe investimeve private.

U bë një reformë e rëndësishme edhe në tregun e energjisë. Shumë shpejt, një pjesë e klientëve do të dalin në tregun e liberalizuar. Shtrohet pyetja, si do të furnizohen këta po nuk pati investime dhe një rrjet të qëndrueshëm? Pikërisht këto investime aty po shkojnë. Shumë shpejt do të fillojë linja me Maqedoninë. Pas përfundimit të Kosovës, vitin tjetër fillon linja e interkonjeksionit me Maqedoninë, një vepër prapë shumë e rëndësishme energjetike, që do të kryhet nga kjo qeveri. Pse? Me këtë mundësohet plotësisht interkonjeksioni i Shqipërisë me të gjitha vendet rajonale. Por çfarë do të thotë kjo? Do të thotë se burimet tona potenciale në energji do të kenë mundësi të tregtohen në të gjithë rajonin dhe kur ne mund të kemi nevojë mund të importojmë me çmime shumë më të lira sesa tani. Këto janë mundësitë e komunikimit, janë si rrugët edhe infrastruktura e interkonjeksionit energjetik.

Ju e dini shumë mirë që ato koncesionet që ju dhatë nuk i kishin bazuar në një model ekonomik të qëndrueshëm dhe kur filluat konfliktin me CEZ, ngritë të gjithë aspektin rregullator të sistemit elektroenergjetik. Dhe çfarë shkaktuat për shkak të ngrirjes?! Normal, u futët në një kaos që nuk do të dinit ku do të dilnit. Shkaktuat 9 miliard lekë borxhe tek hidrocentralet private, vetëm për shkak të ngrirjes së aspektit rregullator. Çfarë ndodhi?! Këto para u shlyen këto vite dhe sot prodhuesit privatë të energjisë elektrike, kuptohet me çmime të ristrukturuara bazuar në tregun ndërkombëtar të energjisë dhe me incentivën që i cakton sipas ligjit për energjitë e rinovueshme,  marrin pagesën e tyre në kohë. Pikërisht, kjo është për shkak të suksesit të këtyre reformave. Këto janë shifra kokëforta, mbase nuk ju pëlqejnë.

Pse po vijnë për herë të parë investitorët ndryshe nga modeli juaj i famshëm ekonomik?! Pse po vijnë po investojnë në hidrocentrale me kapacitete të mëdha pa garanci të blerjes së energjisë nga qeveria?! Sepse po ndodhim dy zhvillime. Së pari interkonektiviteti. Një rrjet i mirë dhe i qëndrueshëm, po krijojmë garancinë që ka treg për energjinë elektrike. Çfarë do të ndodhë me këto interkonektivitete? Këta prodhues, qoftë Poçemi, qoftë nesër Katundi i Ri, qoftë një hidrocentral i madh që po negociohet dhe shumë shpejt po fillon nga investitorë austriakë në një vlerë prej 60 milion eurosh. Pra, po ju them vetëm për 3 vitet e ardhshme, vetëm në investime private në fushën e hidroenergjisë do të ketë 300 milion euro investime dhe më një risi shumë interesante, pa garanci blerje energjie. Po hedhim hapa për krijimin e tregut të energjisë elektrike. Do të krijojmë një platformë ku të gjithë prodhuesit do të mund të tregtojnë në këtë platformë dhe aty do të blihet edhe energjia nga shumë konsumatorë që nesër do të dalin në tregun e liberalizuar. Kjo do të thotë, të krijosh një model tregu të qëndrueshëm ekonomik dhe jo të japësh premtime në letër.

Vetëm mentaliteti i Sali Berishës e quan një vepër të përfunduar kur ajo fillon pa para. Pa para e pa projekt, mjafton të hidhet llaçi aty dhe i fillova unë thotë rrugët, fillova unë veprat. Pra, këto janë gjëra që publiku shqiptar duhet ti dijë. Duhet ta dijë se edhe atë premtim që ne kemi dhënë do ta mbajmë, që me përfundimin e vendosjes së të gjithë matësave, qytetarët shqiptarë nuk do të kenë më fatura aforfe por përkundrazi do të paguajnë atë që konsumojnë. Kjo po bëhet realitet për shkak të pagesave të shtuara, për shkak të gjendjes financiare të Operatorit të Shpërndarjes.

Të gjitha këto reforma kanë konsoliduar mbi të gjitha Buxhetin e Shtetit sepse tanimë paratë nuk po shkojnë më për të mbuluar gropat dhe keqmenaxhimin por po shkojnë në drejtim të investimeve në sektorin elektroenergjitik. Duke krijuar kështu, premisat për qëndrueshmëri në çmimet e energjisë elektrike. Nëse do të vazhdonim me kaosin që kishin nisur, Shqipëria do të kërkonte të rriste akoma më shumë çmimet e energjisë. Përkundrazi, këto çka ne kemi bërë, do të na krijojnë stabilitet dhe në të ardhmen, pasi të krijohen të gjitha potencialet financiare që mund të shndërrojë reforma në energji, do të ketë mundësi mbase edhe për ndonjë ulje të çmimit të energjisë. Kjo është perspektiva e të gjithë këtyre reformave.

Investimet e tjera po bëjnë të mundur edhe vënien në punë të një vepre tjetër. Po i japim perspektivë një tjetër fantazme që para një jave Sali Berisha na e quajti investim për Vlorën. Po flas për atë fantazmën energjitike të TEC-it të Vlorës dhe prapë ai dështimin ta shet për sukses. Kemi investuar në Vlorë tha 100 milion USD për një fantazmë që rri aty si hekurishte. Me reformën që po kryejmë edhe në fushën e gazit, me interesin e investitorëve privatë, po krijohet mundësia që edhe kjo vepër të futet në funksion. Të gjitha këto janë efekte të reformës energjitike dhe normalisht e kam thënë se ju keni një detyrim të kërkoni ndjesë të madhe.

Sa për ilustrim po ju them një shifër tjetër që ju doni ta harroni. Shikoni se sa arkëtohej në sistemin elektroenergjitik në vitin 2013 prej jush. Nga 100 USD të hedhura vetëm 35 përfundonin në arkën e sistemit elektroenergjitik. Sot situata ka ndryshuar katërciprisht, humbjet po shkojnë në nivelin e nën 30% dhe sektori nga ana financiare po ndihet më i shëndoshë. Këto arritje në fakt ju nuk doni ti përmendni sepse janë njëkohësisht dështimi juaj.

Filluat para dy javësh një fushatë në lidhje me çmimin e energjisë por e patë se dolët bllof. Doli një kolege këtu në konferencë për shtyp por shumë shpejt mori sqarimin nga Enti Rregullator i Energjisë dhe nga Instituti Evropian i Statistikave. Ju nxorën bllof, pasi çmimi i energjisë për shkak të ristrukturimit të tarifës ka pësuar rënie, nëse do kishim të njëjtin model të konsumit të energjisë, me tarifat e vitit 2012-2013. Ja çfarë thotë Eurostat në vitin 2014 çmimi mesatar i energjisë në Shqipëri ishte 1,116 cent/euro, pra me gjithë TVSH rreth 13 lekë. Tanimë thotë se çmimi pas ndryshimeve tarifore bëhet 0,81 cent/euro. Pra, ka një rënie të dukshme të tarifës së energjisë elektrike.

Pas asaj tarife fshiheshin shumë hajdutë dhe kjo që e vërteta. Mjafton të shikoni konsumin e energjisë elektrike, është ulur 7%. Pse është ulur? Në kushtet e një rritjeje ekonomike 3% do duhet të rritej edhe konsumi. Kjo ndodh sepse nuk shpërdorohet më energjia, njerëzit paguajnë dhe nuk e harxhojnë energjinë si deri dje që nuk e paguanin. Tani që e paguajnë energjinë, kemi një rënie të konsumit edhe tek fasha. Ka rënë deri në 40% ajo që quhej fasha e famshme që do prekte siç thonin këta 70% të popullsisë. Prandaj, them se realiteti është ndryshe dhe ndaj çmimi mesatar i energjisë në sajë të reformës rregullatore është ulur. Qytetarët shqiptarë nuk e hëngrën parullën tuaj dhe ndaj e keni lënë edhe si betejë pasi nuk ju eci.

Tani keni nisur me skemën tjetër të mashtrimit, thoni fatura aforfe apo mbifaturime. Ju thjesht po nxisni njerëzit. Nga skema e tritolit tani po ju thoni njerëzve thyeni matësa dhe mos paguani energjinë. Unë ju drejtohej qytetarëve se vërtet do heqim faturat aforfe por kush guxon dhe prek matësin e energjisë elektrike që po investohet me djersën dhe kontributin e qytetarëve do të marrë ndëshkimin maksimal. Nuk do ti shpëtojnë pagesës së energjisë elektrike dhe nuk kanë asnjë shans. Do të marrim masat dhe çdo njeri do penalizohet nëse vepron në kundërshtim me ligjin.

Mos u bëni më thirrje njerëzve të mos e paguajnë energjinë, mos u bëni më thirrje njerëzve të thyejnë sahatet. Nuk bëhet politikë elektorale me energjinë elektrike. Energjia elektrike është një pasuri e përbashkët, prandaj qytetarët shqiptarë e konsiderojnë si një nga reformat më të rëndësishme e që po u kthehet atyre përditë në investime.

Faleminderit.

energjia.al  27.05.2016

Komisioni Evropian organizoi në Bruksel takimin ministerial të vendeve të Ballkanit Perëndimor mbi Energjinë dhe Transportin. Të pranishëm në këtë aktivitet ishin ministrat e vendeve të Ballkanit Perëndimor dhe Komisioneri për Zgjerimin dhe Fqinjësinë e Mirë Johannes Hahn. Ministria e Energjisë dhe Industrisë së Shqipërisë u përfaqësua në tryezë me zv.ministrin Z.Ilir Bejtja. Ministeriali i paraprin takimit të Kryeministrave të Ballkanit Perëndimor që do të mbahet brenda këtij viti, në vazhdën e procesit të dialogut të nisur në Berlin dhe të vazhduar në Vjenë vitin e kaluar.

Z.Bejtja bëri një prezantim të reformave të ndërmarra nga qeveria shqiptare në sektorin e energjisë duke theksuar progresin në rritje dhe rezultatet e prekshme. Gjithashtu u raportua progresi dhe realizimi i angazhimeve të ndërmarra në Samit me qëllim vazhdimin me të njëjtin ritëm të reformave të ndërmarra.

Z. Bejtja gjithashtu theksoi se Ministria e Energjisë do të përmbushë të gjitha detyrimet ligjore që përfshijnë ligjet kryesore, organizimin e tregut, liberalizimin e tij, forcimin e rregullatorit të pavarur përpara Samitit të Parisit që parashikohet të mbahet në 4 Korrik 2016.

Drejtuesit e Komisionit Evropian vlerësuan reformat progresive të ndërmarra nga qeveria shqiptare në sektorin e energjisë elektrike.

***

Gjatë qëndrimit në Bruksel zv.ministri Ilir Bejtja zhvilloi një takim edhe me Sekretarin e Përgjithshëm të Kartës së Energjisë Z. Urban Rusnak. Gjatë këtij takimi u  diskutua mbi  aktivitetet dhe prioritetet aktuale në procesin e Kartës së Energjisë.

Theksi u vu mbi konsultimet e vazhdueshme për krijimin e rregullave dhe parimeve të përbashkëta për Energy Transit, dhe rolin e rëndësishëm të Kartës së Energjisë në mbështetjen për të siguruar investimet e nevojshme në këtë sektor.

Z. Bejtja theksoi rëndësinë e Kartës së Energjisë dhe në veçanti në kontekstin rajonal të vendeve të Ballkanit Perëndimor, në lidhje me investimet e ardhshme të energjisë elektrike dhe të rrjeteve te gazit.

Ai ftoi Sekretariatin e  Kartës së Energjisë të organizojë sëbashku me Ministrinë e Energjisë dhe Industrisë  një “Charter Forum” të nivelit të lartë të energjisë në Tiranë gjatë vitit 2016, gjë e cila u mirëprit prej Z. Rusnak.

energjia.al  09.03.2016