info@energjia.al

Korporata Elektroenergjetike greke “DEI” ka shprehur shqetësimin e saj lidhur me shtimin e rasteve të vjedhjes së energjisë elektrike në vend. Sipas korporatës, gjatë vitit 2016 u evidentuan 10.616 raste të vjedhjes së energjisë, e llogaritur kjo në 1.640 gigaWat, ose 3.5% e të gjithë sasisë së prodhuar.

10 vite më parë, rastet e vjedhjes së energjisë llogariteshin në më pak se 500 në vit, ndërsa sasia e vjedhur ishte pothuajse e pallogaritshme.

Sasia e vjedhur e energjisë mjafton për të plotësuar nevojat energjetike pothuajse të të gjithë ishujve të Egjeut.

Vlera e energjisë së vjedhur llogaritet në 150-200 milionë euro në vit, të cilës nëse i shtohet edhe shuma e faturave të papaguara prej abonentëve të kësaj korporate gjatë 8 viteve të krizës që ka pllakosur vendin, shkon në më shumë se 1.8 miliardë euro, gjë që e bën DEI-n, një korporatë së cilës tregu i ka shumën më të madhe të borxheve në Europë.

Ndonëse ligji grek parashikon ndjekje penale për vjedhësit e energjisë, shumë pak vetë janë dërguar në burg, pasi pothuajse në të gjitha rastet, gjykatat kanë pranuar justifikimin se janë gjendja ekonomike dhe pamundësia për të paguar shkaktarë që i kanë detyruar të vjedhin energjinë.

Vjedhësit e energjisë janë kryesisht konsumatorë familjarë. Ata kanë të ardhura të ulëta dhe janë kryesisht grekë të varfër, shqiptarë, romë dhe emigrantë nga ish-Bashkimi Sovjetik, Pakistani dhe India, ndërsa nuk është vënë re thuajse asnjë rast i vjedhjes prej konsumatorëve të mëdhenj të energjisë ose bizneset.

Metodat më të përhapura të vjedhjes janë nëpërmjet vendosjes së magneteve pranë matësave elektrikë, ose lidhja drejtpërdrejt nga shtylla në banesë.

Për të shmangur vjedhjet, korporata ka vendosur të ndryshojë matësat, duke aplikuar teknologji dixhitale, si dhe një formulë matematikore matjeje. Në rastet që evidentohet vjedhje e energjisë, korporata thotë se do të vendosë gjoba të rënda ndaj kundërvajtësve.

Top Channel,  20.03.2017

Si shkak i një problemi në nënstacionin e Shkozetit Porti i Durrësit ka probleme në furnizimin me energji elektrike.

Ndërprerja e energjisë elektrike ka ndërprerë punën në sektorin e ngarkim-shkarkimit pasi nuk punojnë elektrovincat.

Kufiri i hyrje daljeve është funksional pasi kanë gjenerator automatik ndërsa po punohet për të riparuar dëmtimin.

Shqiptarja.com  21.01.2017

Komisioni hetimor për çështjen “CEZ” ka zhvilluar punimet mes debateve të ashpra. I pranishëm në komision për të dëshmuar ishte ministri i Energjetikës Damian Gjiknuri i cili mbrojti qendrimin se në zgjidhjen e mosmarrëveshjeve janë respektuar procedurat dhe afatet.

Mes replikave të forta mes anëtarëve të komisionit, ministri I Energjetikës mbrojti tezën se problematika ka lindur që në momentin e privatizimit e se zgjidhja e dhënë në fund ishte zgjidhja më e përshtatshme për shtetin shqiptar.

Ndërsa drejtuesi i seancës, Edmond Spaho kritikoi qeverinë se ka realizuar një marrëveshje e cila nuk ka shkuar në favor të shtetit shqiptar.

Pas debateve që përrfunduan në arbitrazh, qeveria shqiptare dhe kompania çeke CEZ arritën të zgjidhin mosmarrëveshjet duke arritur një konsensus jashtëgjyqësor. Ky konsensus, sipas opozitës,  përbën një aferë korruptive, çka ka bërë që Kuvendi të ngrejë një komision të posaçëm hetimor.

Scan TV,  20.12.2016

Edhe pse zhvillimi i bizneseve – të cilat për bazë kanë prodhimtarinë – do të gjeneronte vende të reja pune dhe do të ndihmonte zhvillimin ekonomik të shtetit të, ky sektor po përballet me probleme shumë të mëdha.

Sipas përfaqësuesve të bizneseve, ambienti i të bërit biznes në Kosovë nuk është përmirësuar, pasi ata ende përballen me telashe me energji elektrike, e cila është një faktor limitues për zhvillimin ekonomik.

Përgjithësisht, politikat jo të favorshme tatimore dhe energjia elektrike shihen si pengesat kryesore për prodhimin në vend.

Telegrafi,  19.09.2016

Njoftim i OSHEE:

Rikujtojme edhe nje here harten me numrat e kontaktit per probleme te mundshme te furnizimit me energji elektrike per zonat bregdetare.

Sqarojme gjithashtu, qe me keto numra telefoni kontaktohen inxhinieret/elektricistet e terrenit per probleme te furnizimit me energji elektrike dhe NUK SHERBEJNE per ceshtje te faturimit, matesit, kerkeses per x sherbim, etj.

Gjithashtu, kerkojme nga abonentet te respektojne dhe te jene korrekt me telefonuesin, pasi pengojne procesin e komunikimit me ato abonente qe ne te vertete kane rast mungese te dritave per te raportuar.

Per shqetesime te tjera, nevoje per informacion qe lidhet me çdo sherbim te OSHEE, eshte vendosur ne dispozicion nga ora 07.00 deri ne 23.00 numri i telefonit call center per te gjithe vendin 04 227 4141, per çdo ditë te javes, perfshi te shtune dhe te diele.

Faleminderit per mirekuptimin

energjia.al  06.07.2016

nr kntakti oshee

Shqiptarët e kanë gjetur zgjidhjen për të përballaur çmimin e lartë të naftës në vend. Blejnë naftë nga fqinjët dhe e shesin pak më shtrenjtë

Diferenca e çmimeve të naftës dhe benzinës në shitje, mes Shqipërisë dhe Maqedonisë, është rreth 60 lekë. Kjo ka bërë, që drejtuesit e mjeteve në zonën kufitare të udhëtojnë drejt Maqedonisë për t’u furnizuar me naftë, ku paguajnë vetëm 90 lekë për litër, nga 158 lekë që e blejnë në Shqipëri.

Pikat e karburantit në Maqedoni, që ndodhen afër me kurifin e Shqipërisë, 50 për qind të xhiros ditore e kanë vetëm prej drejtuesve shqiptarë të automjeteve, te cilet përdorin të gjitha mënyrat për të rritur volumin e serbatorëve të makinave, amdje I modifikojnë automjetet duke u vendosur serbatorë shtesë

Në rajon, Shqipëria mban çmimin record të karburanteve, ndërkohë që fqinjët tanë e ndjejnë uljen botërore, që ka pasur ari i zi në 2 vitet e fundit. Emisioni Fiks Fare përcolli mbrëmjen e djeshme mënyrën se si e shfrytëzojnë këtë fakt banorët e zonave kufitare. Ata falë edhe pozicionit të tyre gjografik kanë gjetur zgjidhjen. Makinat e tyre I furnizojnë me karburant ne shtetet fqinjë, madje bëjnë edhe tregti duke e shitur këtë naftë kontrabandë.

Gazetarët e fiksit morën rrugën dhe u nisën drejt pogradecit, ku taksixhiu pogradecar që i shoqëronte u tregonte mënyrën se si disa njerëz kishin gjetur një mënyrë të re për të bërë biznes, atë të shitjes së naftës pa paguar taksa dhe më lirë. Ai u pohon atyre se rreth 100 makina shkojnë në Strugë dhe ngarkohen me naftë , që më pas të vijnë e ta tregtojnë në Shqipëri.

Në tregun e fruta perimeve në Korçë gazetarët e Fiksit gjejnë edhe naftë me një çmim të arsyeshëm 130 lekë/litri. Naftë e marrë nga Mqedonia dhe që shitet fare lehtë në tregun e fruta perimeve në Korçë. Gazetaret pasi blejnë 2 bidona me naftë përkatësisht një 21 litra dhe tjetrin 22 litra , i kërkojnë tregtarit nëse ai mund t’u sjellë më shumë. Një sasi prej 200 ose 400 litrash. Pasi shkëmbejnë numrat mjafton që gazetarët, të shtirur si tregtar, ta njoftojnë një ditë më parë dhe sasinë e kërkuar e kanë në destinacion.

Më pas gazetarët i drejtohen Strugës,ku bisedojnë me punonjes të një pike garburanti. Ai u shpjegon arsyen, se pse shume shqiptarë furnizohen me karburant në Maqedoni, madje aq sa edhe për ta tregtuar. Përveç çmimit të ulët prej 65 cent ose 90 lekë të naftës e importuar nga Greqia , tjetër arsye është se Maqedonia e ka akcizën e arit të zi më të ulët se Shqipëria. Në pamjet e sjella mbrëmjen e djeshme nga Fiksi, duken qartë makinat me targa shqiptare në rradhë për t’u furnizuar me karburant. Kishte edhe nga ata që donin ta shfrytëzonin në maksimum serbatorin e makinës , duke e ngritur në kriko, për të nxënë sa më shumë karburant në të. Por edhe hipja në bordurën e pompës, apo trotuarë, është një alternative e mundshme. Madje nevoja ka bërë që njerëzit të gjejnë edhe përshtatje të tjera, ku serbatorin e një makine me benzinë (serbatori i tyre është i madh) t’ua modifikojnë makinave me naftë. Në pamundësi për t’u zëvendësuar sebratorët, njëri nga shoferët në video pohon se e frynte serbatorin me kompresor, për qellimin e vetëm, të marr sa më shumë litra në të.

Për Strugën, si qyteti i parë më i afërt, nuk është më fenomen blerja e karburantit nga korcarët apo pogradecarët. Dy prej shoferëve të pyetur nga gazetarët e Fiksit jo vetëm që e mbushnin makinën me karburant , por mbushin edhe bidona, që t’i kenë rezervë.

I njëjti fenomen ndodh edhe në Resnje. Makina të shumta me targa shqiptare mbushen me karburant dhe bidona nga 20 litra. Edhe pse shoferët e pohojnë që nuk u lejohet në doganë të kalojnë bidona me naftë, pamjet tregojnë qartë se policët doganor mbyllin sytë përpara këtij fakti.

Çmimi i naftës këto dy vitet e fundit ka rënë ndjeshëm në tregun ndërkombëtar, por në Shqipëri kjo ulje nuk është pasqyrur shumë. Kjo vjen për shkak të taksave të larta. Paralelisht me çmimin , taksat mbi hidrokarburet është rritur me shpejtësi duke e mbajtur çmimin kostant. Taksat e karburanteve në Shqipëri zënë mbi 65% të çmimit fundor, kjo ka bërë që Shqipëria të jetë një nga vendet me çmimin më të lartë të naftës në rajon e më gjerë.

Gazeta Dita, 09.02.2016

Teksa reshjet kanë nisur të përqendrohen me intensitet në vetëm disa ditë, përmbytjet janë shtuar dhe vëmendja për mirëmbajtjen e HEC-ve në lumin në Drin është shtuar.
Duke raportuar për gjendjen e HEC-ve, KESH shpjegon se në HEC-in e Fierzës mbeten problem rrotat e punës së turbinave 1 dhe 3, të cilat nuk janë zëvendësuar me rehabilitimin e Hidrocentralit. Por burimet zyrtare nga KESH njoftojnë se kompania ka në planet e saj afatgjata zëvendësimin e tyre.
HEC-Fierzë është parashikuar si vepër e klasit të parë përsa i përket rrezikshmërisë, shpjegon KESH. Diga e Fierzës është projektuar për prurje maksimale llogaritëse në periudhën e reshjeve 1 herë në 10 mijë vjet 6100 metër kub për sekondë dhe për prurje maksimale kontrolluese në periudhën e reshjeve 1 herë në 10 mijë vjet (9600 metër kub për sekondë).
Gjithashtu gjeneratorët e agregateve veçanërisht Ag-2 shfaqin rritje të temperaturave me rreth 12 gradë mbi normalen dhe kanë nevojë rehabilitimi me zëvendësim të nuklit të pështjellave.
Në vitin 2012 KESH përfundoi investimin 30 milionë euro për rehabilitimin e dy turbinave të hidrocentralit të Fierzës. investimi i kryer me ndihmën e donatorëve dhe burimeve të KESH-it bëri të mundur rritjen e prodhimit të energjisë elektrike me 2 për qind, por edhe pse të amortizuara rrotat e turbinave 1 dhe 3 nuk u ndërruan.
Sakaq KESH bën të ditur se, gjatë viteve të shfrytëzimit të HEC Firezë, me burimet e KESH janë kryer ndërhyrje për për mirëmbajtjen dhe përmirësimin e pajisjeve elektromekanike të agregateve nga të cilat. Janë bërë riparime dhe saldime të varjeve dhe kavitacioneve të lopatave të aparatit drejtues dhe rrotës së punës në turbinat 1 dhe 3, punim i cili ka përmirësuar kushtet e shfrytëzimit.
Hidrocentrali i Fierzës është i tipit me digë të rezervuar. Diga është me mbushje gurësh dhe bërthamë argjile. Diga është 161.5 metër e lartë dhe 380 metër e gjatë, gjerësia e digës shkon në 576 metër në bazamentin e saj në 13 metër në kreshtën e digës. Diga e Fierzë kur u nderua ishte e e dyta e këtij lloji në Europë për nga lartësia e saj. Ajo ka një volum prej 8 milionë metër kubë dhe krijon një rezervuar m,e një volum prej 2.7 miliardë metër kub ujë në një sipërfaqe 72 km katror. Punimet për ndërtimin e HEC-it nisën në vitin 1970 dhe në 1978 u viu në punë turbina e parë. HEC-i u vu në punë me kapacitet të plotë në vitin 1980.
Fierza u ndërtua me pajisje të ardhura nga Kina por mbi konceptet e inxhinierëve shqiptarë dhe për ndërtimin e saj u angazhuan 14 mijë punonjës.
HEC-et e kaskadës prodhojnë mesatarisht 3850 GWh ore energji elektrike në një vit duke krijuar të ardhura mesatare 17 miliardë lekë ose 1.3 për qind e PBB.

Revista Monitor,  08.01.2016

Qeveria e Kosovës do t’i bëjë studim fizibiliteti Termocentralit “Kosova A”. Ky studim do t’i ndihmojë Qeverisë së Kosovës për marrjen e vendimit për të ardhmen e termocentralit më të vjetër që ende është në operim, shkruan sot Koha Ditore.

Për rindërtimin e saj interesim ka shprehur kompania gjermane “Bilfinger”.

Gazeta ka mësuar se edhe kompania “General Electric” ka përgatitur plan konkret për modernizimin e njësisë A2, që prej kohësh nuk është në funksion.

Ministri i Zhvillimit Ekonomik, Blerand Stavileci, ka thënë se ka ardhur koha që këtij termocentrali t’i bëhet një studim, i cili do të tregojë opsionet më të mira për këtë projekt. Sipas tij, regjenerimi i termocentraleve ekzistuese është paraparë edhe në programin qeveritar.

Kryetari i Komisionit Parlamentar për Zhvillim Ekonomik, Muhamed Mustafa, ka kërkuar që brenda një kohe të shkurtër të merret vendimi për “Kosovën A”, pasi, sipas tij, janë edhe gjashtë vite deri në lëshimin në punë të termocentralit “Kosova e Re”.

Berat Rukiqi, kryetar i Bordit të KEK-ut, ka thënë se Termocentrali “Kosova A” nuk mund të zëvendësohet me ndërtimin e një termocentrali 500 megavatesh.

Telegrafi,  07.12.2015

Ministri i Diasporës, Valon Murati, në vazhdën e takimeve me investitorë nga diaspora ka vizituar të enjten fabrikën e tekstilit “KosovaTEX” në Prishtinë, në të cilën u interesua për kushtet e punës dhe plasmanin e produkteve të tyre brenda dhe jashtë vendit.

Ai ka thënë se kompania “KosovaTEX” tash e pesë vite është shndërruar në pikë reference për tekstil sidomos pantollave prej firmave më të njohura botërore dhe tregut gjermanë.

Ministri Murati ka thënë se kompanitë kanë arritur që të eksportojnë në vende të ndryshme, ndërsa sipas tij , problem kryesorë mbetet energjia elektrike.

“Bizneset janë të orientuara nga eksporti dhe është shumë shenjë e mirë, që kjo po e bënë që ambienti biznesor është duke u përmirësuar. Vërejtje e përgjithshme e bizneseve është energjia elektrike, e në këtë drejtim Qeveria është duke bërë përpjekje që të zgjidhet ky problem edhe përmes ndërtimit të kapaciteteve termoenergjetike”, ka thënë ai.

Ndërsa Selvir Aljkovic, menaxher i prodhimit në “Kosova TEX” ka thënë se si kompani kanë arritur që të depërtojnë fuqishëm në treg, pasi që sipas tij, kompania ka arritur të bëjë konkurrencë tregut aktual. Ai ka shtuar se e ardhmja e kësaj kompanie varet vetëm nga eksporti.

Sipas tij, kompania deri më tani ka të punësuar rreth 300 punëtorë, por që ky numër pritet të rritet deri në 400 veta. Ai ka thënë se po shqyrtojnë shembuj të partnerëve të kompanive të ndryshme që të zgjerohen.

Telegrafi, 09.10.2015

Ministri turk i Energjetikës dhe Burimeve Natyrore, Ali Riza Alaboyun ka thënë se Turqia nuk do të përballet me ndonjë problem në furnizimet me gaz nga Rusia këtë dimër.

‘Unë nuk pres ndonjë problem gjatë dimrit,’ tha Alaboyun gjatë një takimi për shtyp në 3 tetor në Stamboll, duke përmendur të drejtat kontraktuale.

Turqia, e cila është 60 për qind e varur nga gazi rus, ka një marrëveshje me Moskën deri në vitin 2021, sipas zyrtarëve të ministrisë.

Alaboyun gjithashtu tha se Turqia mbështet ndërtimin e një linjë të Turkish Stream prej ‘katër-këmbësh’, teksa Rusia pritet të ndërpresë linjën perëndimore, e cila siguron 14 miliard metra kub gaz për Turqinë, pas vitit 2019.

“Ne duhet të mbështesim tubacionin që vjen drejt Turqisë, pasi ne mund të përballemi me mungesa të gazit pas 2019. Ky është shqetësimi ynë kryesor, ‘tha ai.

Presidenti rus Vladimir Putin, i cili braktisi projektin e Rrjedhës së Jugut dhjetorin e kaluar, ka ofruar të ndërtojë një tubacion të ri përmes Turqisë dhe Greqisë për të transportuar gazin natyror në Evropë.

Megjithatë, duke iu referuar pengesave politike ndërmjet Evropës dhe Rusisë, Alaboyun tha se ai nuk mendon që BE-ja do i lejojë Greqisë të nënshkruajë një marrëveshje ndër-qeveritare me Moskës, raporton Hurriyet Daily.

Revista Monitor,  05.10.2015