info@energjia.al

Banorët e  lagjes “Arbana” në Prizren  kanë përfituar rrjet të ri energjetik. KEDS ka investuar në këtë lagje duke vendosur një trafo të re si dhe 44 shtylla.

Zëdhënësi i KEDS-it, Viktor Buzhala  tha se synim kryesor i këtij investimi ka qenë përmirësimi i infrastrukturës dhe furnizimi më i mirë i energjisë elektrike.

“Është vendos një trafo e re me fuqi 400 kVA, si dhe janë vendosur 44  shtylla betoni për tension të ulët”, tha Buzhala.
Sipas tij, përveç  trafos  dhe shtyllave,  në këtë lagje është bërë edhe ndërrimi i kabllove.

“Janë vendosur 3000 metra  kabllo nëntokësore për tension të mesëm dhe 2000 metra kabllo ajrore për tension të ulët”,tregon Buzhala. Ai shtori se  nga ky projekt kanë përfituar  50 konsumatorë.

Ndërkaq, banorët e lagjes “Arbana”,  thonë se ky investim ka qenë i nevojshëm.
Adem Krasniqi  tha se me këtë investim të KEDS-it, është përmirësuar furnizimi me energji elektrike në këtë lagje . “Rrjeti elektrik ka qenë shumë i vjetër”, tregon Krasniqi.

Ai falënderon KEDS-in për investimet që ka bërë në këtë lagje.“Vendosja e trafos së re ka përmirësuar furnizimin me energji elektrike,prandaj falënderojmë KEDS-in për këtë investim”, tha Krasniqi.

Zëdhënësi i KEDS-it, Viktor Buzhala ,tha se ky investim është bërë pikërisht për të përmirësuar furnizimin me energji elektrike.
Ai premton se KEDS, gjatë këtij viti, do të investojë edhe në lagjet e tjera të Prizrenit.

“Sigurisht, do të vazhdojmë me investime në mënyrë që rrjeti të jetë në standardet e kërkuara për të gjithë konsumatorët”, tha Buzhala.

Agjensia e lajmeve ekonomia,  20.04.2017

Rrjeti i vjetruar ka bërë që të paktën 150 shtëpi të fshatit Korishë të Prizrenit, për vite të tëra të vuajnë nga problemet e mëdha që iu ka shkaktuar sistemi jo stabil i energjisë elektrike.

Mirëpo, falë projektit të investimeve në rinovimin e rrjetit elektrik, tashmë banorëve të këtij fshati i është bërë zgjidhja.

KEDS, në këtë fshat, ka vendosur shtylla dhe kabllo të reja, për të stabilizuar rrymën.

Bujar Arifi, menaxher për projekte në KEDS tha se në Korishë, janë kryer 90 për qind e punimeve. “I kemi vendosur 55 shtylla dhe mbi 5000 metra kabëll”, tregon Arifi.

Sipas tij, nga ky projekt kanë përfituar rreth 150 shtëpi.

Kryetari i fshatit Korishë Abaz Bobaj tha se, nga ky investim kanë përfituar një pjesë e banorëve të fshatit. “Falënderojmë KEDS-in për ketë investim, sepse vërtet gjendja ka qenë shumë e rëndë”, tha Bobaj.

Ai tregon se rrjeti elektrik përveç që ka qenë shumë i dobët, ka rrezikuar edhe jetën e banorëve të fshatit.

Menaxheri për projekte në KEDS, tha se shtyllat e vjetra do të hiqen dhe dërgohen në depo. “Ende nuk ka përfunduar në tërësi projekti në Korishë. Në ditët e ardhshme, pritet të përfundojnë edhe ato pak punë që kanë mbetur. Edhe shtyllat e vjetra do të hiqen”, tha Arifi.

KEDS, sipas tij, në këtë fshat deri tash ka kryer punën në afat dhe sipas dinamikës së planifikuar.

Telegrafi,  25.11.2016

Lagja “Bajram Curri” në Prizren, do të përfitojë rrjet të ri energjetik nga KEDS-i, ku ndër të tjera përfshihen 4 trafo të reja dhe 500 shtylla betoni.

Banorët e lagjes tregohen të lumtur me këtë investim që është afër finalizimit.

Njëri nga këta banorë, Hasan Shala tha se për shkak rrjetit të stërvjetëruar dhe rritjes së popullësisë,në këtë lagje, kohëve të fundit kanë pasur probleme me rrymë.

“Kjo lagje është zgjeruar viteve të fundit, kurse rrjeti energjetik është dobësuar shumë”, tregon Shala.

Ai shpreson se pas investimeve do të përmisohet energjia elektrike në këtë lagje. “Shpresojmë që pas përfundimit të projeketeve, do të kemi furnizim stabil të rrymës”, shprehet ai.

Shala, falenderon KEDS-in për interesimin që ka treguar për të investuar në këtë lagje.

Bujar Arifi, menaxher për projekte në KEDS tha se aktualisht janë në fazën e kyçjes së shtëpive në trafot e reja, që janë vendosur. “Në këtë lagje të Prizrenit, jemi duke realizuar dy projekte investuese me rrjet të ri energjetik., ku do të vendosen katër trafo të reja, si dhe 500 shtylla betoni elektrike”, tha ai.

Sipas Arifit në këto dy projekte poashtu është paraparë të ristrukturohet në tërësi rrjeti elektrik me kabllo të reja.

Ai siguron banorët se pas përfundimit të punimeve, nuk do të kenë më probleme me rrymë. “Gjithashtu në kuadër të projekteve është paraparë të bëhet edhe largimi i rrjetit të vjetër”, tha Arifi.

Ai premton se realizimi i këtyre dy projekteve, pritet të finalizohet shumë shpejtë.

Telegrafi,  15.11.2016

“Lagjja e re” në Prizren furnizohet me rrymë përmes rrjetit nëntokësor. KEDS në këtë lagje, në vend të shtyllave elektronike, ka vendosur rrjetin nëntokësor.

Naim Arapi menaxher për projekte në KEDS tha se ky investim  në infrastrukturën nëntokësore ka rritur sigurinë e furnizimit dhe kualitetin e shërbimeve.

“Në këtë lagje kemi eliminuar furnizimin nga  shtyllat e  drurit, që kanë qenë në gjendje të rëndë dhe me përçues të zhveshur ajror, që kanë paraqitur rrezik të përhershëm për qytetarët”, tregon ai.

Arapi thotë se në këtë lagje, KEDS ka vendosur edhe një trafo të re, 1000 kvA (kilovolt Apmer).

“Trafoja në këtë lagje ka qenë e vjetër, prandaj është zëvendësuar me të ri”, thtotw Arapi.

Ndërkaq, banorët e lagjes thonë se ky investim ka qenë i qëlluar dhe i domosdoshëm.

Flamur Kryeziu, qytetar i kësaj lagjeje tha se me këtë investim është përmisuar furnizimi me energji elektrike.

“Infrastrukturën e kemi pasur shumë të dobët. Tash krejt kabllot e rrymës janë nëntokësor”, shprehet ai.

Ai falënderon KEDS-in për këtë investim. “Uroj që investime të tilla të bëhen edhe në të ardhmen”, shprehet ai.

Menaxheri i projektit në KEDS Naim Arapi,tha se ky investim është bërë pikërisht për të përmisuar furnizimin me energji elektrike si dhe për të hequr rreziqet që banorët e lagjes kanë pasur për shkak t ë vjetërsisë së infrastrukturës.

“Jemi të kënaqur me përfundimin e këtij projekti. Besojmë se kemi bërë një zgjidhje të mirë për konsumatorët e kësaj lagjeje”, tha Arapi.

Agjensia e lajmeve ekonomia,  05.05.2016

KEDS-i njofton se sot për shkak të mbingarkesës së paraqitur, KOSTT ka shkyçur njërin transformator në NS 110 /35/ 10kV “Prizreni 1″ dhe ka kërkuar që të bëhet reduktimi i ngarkesës 4 MW në orë.

Prandaj pritet të ketë reduktime të kohëzgjatjes prej një ore në Prizren me rrethinë deri në orën 16:00”, kanë njoftuar zyrtarët e KEDS-it.

Telegrafi,  25.08.2015

KEDS sh.a. ka vazhduar me zëvendësimin e pajisjeve të vjetruara me të reja, me qëllim të zvogëlimit të humbjeve teknike, komerciale si dhe përmirësimit të cilësisë së tensionit të energjisë elektrike.

Këto ditë është duke u bërë ndërrimi i shtyllave elektrike, shtrirja e kabllove, ndërrimi i bazave të siguresave në tensionin e lartë, si dhe investimet që do të bëjnë shkarkimin e transformatorëve distributiv të mbingarkuar në Distriktin e Prishtinës, Prizrenit dhe Gjakovës.

“Gjatë janarit të këtij viti, KEDS ka implementuar disa projekte në të gjitha distriktet e Republikës së Kosovës. Ekipet e implementimit të projekteve dhe ekipet e mirëmbajtjes nuk ndalen. Ata po ecin furishëm në arritjen e objektivave të parapara, madje edhe në tejkalimin e tyre”, tha z. Avni Alidemaj, Drejtor i Divizionit të Shpërndarjes.

Këto investime ndikojnë direkt tek konsumatorët.

“Pajisjet e reja do të përmirësojnë cilësinë e furnizimit dhe do të mundësojnë kapacitet më të lartë të shpërndarjes së energjisë elektrike. Për momentin, bëhen ndërrime të transformatorëve të mbingarkuar 630 kVa (kilovat-amper) me transformatorë të ri me fuqi prej 1000 kVa, bëhet zëvendësimi i shtyllave të vjetra me shtylla të reja të cilësisë së lartë e gjitha me qëllim të përmirësimit të furnizimit me energji elektrike”, informoi z. Alidemaj.

KEDS e ka trashëguar Rrjetin Distributiv të vjetruar dhe në gjendje shumë të rëndë. Por, është i zotuar në ndërrimin e kësaj situate për të mirë. Prandaj, projektet investuese do të intensifikohen edhe më shumë në të ardhmen. Kjo punë do të përshpejtojtohet më qëllim të ofrimit të shërbimeve sa më cilësore me energji elektrike për qytetarët në tërë territorin e Republikës së Kosovës në bazë të planit strategjik të investimeve. Prioritet kanë fytet e ngushta ku krijohen mbingarkesa.

Punimet aktuale janë vazhdimësi e investimeve të bëra gjatë vitit 2013. Vitin e kaluar përkundër faktit se konzorciumi fitues Çalik Holding dhe Limak e mori në pronësi KEDS-in tek në maj, ka tejkaluar shumën e investimeve të parapara. Tempoja e investimeve vetëm do të shtohet edhe në vitet në vijim me qëllim që konsumatorëve t’u ofrohen shërbime sa më cilësore.

energjia.al 27.01.2014

Kabllot ndriçuese të Autostradës “Ibrahim Rugova” janë vënë në shënjestër të hajnave kosovarë të cilët edhe si destinacion që t’i shesin ato kanë zgjedhur Shqipërinë. Policia në Prizren pranon se numri i vjedhjeve të ndriçimit në udhën e kombit është shtuar dukshëm kohëve të fundit, ndërsa vozitësit thonë se udhëtimi në “Rrugën e kombit” është i vështirë, sidomos gjatë orëve të mbrëmjes kur është e pranishme mjegulla, ndërsa mungojnë dritat.

Jeton Halili me përkatësi turke është njëri nga qytetarët e Prizrenit të cilit shumë shpesh i bie të udhëtojë në autostradë, pasi që edhe punon në Prishtinë. Për këtë vozitës makine, udhëtimi është bërë i mërzitshëm sidomos orëve të natës, pasi që pothuajse e tërë autostrada është në terr.

Jetoni u bënë thirrje organeve të rendit që ti shtojnë patrullimet me qëllim që të parandalohen vjedhjet. Kabllot elektrike të vendosura në autostradë janë vënë në shënjestër të hajdutëve kohëve të fundit, të cilët pasi që i marrin ato ia mësyjnë Shqipërisë për ti shitur.

Një gjë të tillë për Radio Kosovën e konfirmon edhe zëdhënësi i Drejtorisë Rajonale të Policisë në Prizren, Hazir Berisha, transmeton RTK. Berisha me këtë rast fton qytetarët e veçanërisht shoferët që e frekuentojnë autostradën që të bashkëpunojnë me organet e rendit me qëllim që të parandalohen këto vepra të shëmtuara prezente në autostradë të cilat janë bërë shqetësim për drejtuesit e automjeteve.

Kosova Sot, 14.01.2014

Në godinën e Lidhjes së Prizrenit, Ministri i Energjisë dhe Industrisë së Shqipërisë Z. Damian Gjiknuri dhe Ministri Kosovar për Zhvillimin Ekonomik, Z. Fadil Ismajli ishin dëshmitarë dhe mbështetës të firmosjes së kontratës për ndërtimin e linjës së interkonjeksionit 400 kV mes Shqipërisë dhe Kosovës.

Administratori i Përgjithshëm i Operatorit të Sistemit të Shpërndarjes së Shqipërisë Z.Engjëll Zeqo dhe ai i KOSTT-it të Kosovës Z.Naim Bejtullahu nënshkruan kontratën.

Kompania kroate Dalekovod do të ndërtojë linjën në pjesën e Kosovës ndërsa kompania Energoinvest nga Bosnje Hercegovina do të realizojë ndërtimin në pjesën e Shqipërisë.

Projekti i ndërtimit të linjës së tensionit të lartë 400 kV Kosovë-Shqipëri, është i ndarë në dy LOT-e. LOT1 përfshin ndërtimin e linjës interkonjektive e cila lidhë nënstacionet NS Kosova B (Kosovë) dhe NS Tirana 2 (Shqipëri) me një gjatësi totale prej 241.5 km. Ndërsa LOT2 përfshin ndërtimin dhe instalimin e pajisjeve të tensionit të lartë në këto nënstacione, si dhe infrastrukturën e nevojshme për ofrimin e shërbimeve të rregullimit sekondar (frekuencë – fuqi), në mes të Operatorit të Sistemit, Transmisionit dhe Tregut të Energjisë Elektrike të Kosovës (KOSTT) dhe Operatorit të Sistemit të Transmisionit të Shqipërisë (OST).

prizren ceremonia e firmosjes se kontratave te interkonjeksionit ministri gjiknuri

Qeveria Gjermane nëpërmjet KfW gjithashtu do të financojë pjesën e linjës në anën e Republikës së Shqipërisë. Financimi i projektit për pjesën e Kosovës do të bëhet nga Qeveria Gjermane bazuar në Marrëveshjen e Financimit që është nënshkruar në mes të KfW, Ministrisë së Ekonomisë dhe Financave (Qeveria e Kosovës) dhe KOSTT, për hua dhe kontribut financiar në vlerën e përgjithshme prej 33.5 milion Euro, nga e cila 16.5 milion euro grant + 17 milion euro kredi.

Ndërtimi i linjës së interkonjeksionit të tensionit të lartë 400kV Kosovë-Shqipëri do të ndikojë në optimizimin e dy sistemeve, ngritjen e kapaciteteve transmetuese, si dhe ngritjen e sigurisë dhe besueshmërisë së sistemeve elektroenergjetike të Kosovës dhe Shqipërisë, dhe po ashtu do të ndikojë në zhvillimin e tregut të të dy vendeve si dhe tregut rajonal të energjisë elektrike.

Me implementimin e projektit të Autostradës Energjetike Kosovë-Shqipëri, do të mundësohet shkëmbimi më i madh i energjisë elektrike në mes të dy vendeve sidomos pas ngritjes së kapaciteteve gjeneruese të planifikuara në Kosovë të bazuara kryesisht në linjit si dhe të kapaciteteve gjeneruese hidro të Republikës së Shqipërisë. Derisa Kosova dhe Shqipëria aktualisht janë të lidhura me një linjë interkonjeksioni 220 kV, kapaciteti i transferit të interkonjeksionit me Shqipëri nga aktualisht rreth 200MW, me vënien në operim të këtij projekti së bashku me linjën 400kV Tirana – Podgoricë do të ngrihet në rreth 900MW.

Nga momenti i fillimit të punimeve, ndërtimi i linjës interkonektive 400 kV Kosovë-Shqipëri parashihet që të përfundojë në afat prej 24 muajsh derisa kontraktuesit do të jenë tërësisht të koordinuar gjatë procesit të implementimit.

Fjala e mbajtur nga Ministri i Energjisë dhe Industrisë Z.Damian Gjiknuri:

Mirëdita të gjithëve! Edhe unë, kam kënaqësinë e veçantë që të jem këtu në këtë ditë të shënuar, në këtë vend të shënuar për vet simbolikën që përfaqëson edhe ngjarja e sotme po edhe historia.

Kur dëgjova Fadilin që mbajti fjalimin e tij teknik por në fakt edhe emocional, unë e lash anën teknike dhe do të merrem me atë që ndjej, do të flas fjalët e zemrës. E hodha poshtë atë fjalim që kisha përgatitur.

gjiknuri prizren fjalim per interkonjeksioninRealisht, më kujtohet ajo shprehja e famshme kur Kosova e fitoi pavarësinë e saj “Bac u Kry!”. Vendet, siç e tha mirë edhe ministri i Kosovës po lidhen me autostradën e tyre energjetike, energjia është siguria e vendeve, energjia është siguria e zhvillimit tonë në të ardhmen. Ne, si dy vende me një interes të përbashkët po krijojmë edhe këtë lidhje të fortë mes veti për ta përmirësuar situatën energjetike, për ta rritur sigurinë dhe zhvilluar ekonominë e dy vendeve tona. Ndaj, them se ky projekt ka një rëndësi të veçantë dhe me këtë rast një falenderim i rëndësishëm shkon për partnerët shumë të fuqishëm që e bënë të mundur, qeverinë e Republikës Federale të Gjermanisë dhe bankën që e financoi. Shpresoj që kjo vepër patjetër do të mbarojë në kohë dhe benefitet do t’i ndjejnë të dy popujt tanë, do të komunikojmë më shumë, do të shkëmbejmë më shumë energji, do të kemi më shumë siguri. Hapësira shqiptare ka shumë mundësi që të zhvillohet në një treg të përbashkët energjetik, të kthehet në një potentë të vërtetë në rajon.

Ky projekt ka dhe një simbolike tjetër. Kur po mendoja se çfarë përfaqësonte Ballkani shumë kohë më parë, kuptohet vende të konflikteve, gjakderdhjeve dhe problemeve të mëdha. Por, shikoni se si në këtë projekt mblidhen Shqipëria, Kosova, një firmë boshnjake e një firmë kroate që bashkëpunojnë në një projekt me interes jo vetëm shqiptar por edhe rajonal.

Nuk më mbetet gjë tjetër veçse pas 135 vitesh, në këtë godinë ku filloi ëndrra e Shqipërisë së asaj kohe të ndërtohet edhe ëndrra e fuqizimit energjetik të dy hapësirave tona për një zhvillim të qëndrueshëm ekonomik dhe perspektivë të qartë demokratike evropiane.

Suksese dhe paçim sa më shumë ngjarje e sebepe të tilla.

Ju faleminderit.

Fjala e mbajtur nga ministri kosovar i zhvillimit ekonomik, Fadil Ismajli:

ministri gjiknuri prizren ismajli interkonjeksioni me kosoven

I nderuari ministër Gjiknuri,
Miku im, ambassador Blomeyer,
Të nderuar z. Zeqo dhe z. Bejtullahu,
Pjesëmarrës të çmuar,

Më lejoni që sot, në këtë ditë të shënuar për historinë e energjisë së Kosovës, të shpreh konsideratat e mia më të larta, sikundër që edhe admirimin tim të madh, për finalizimin e një projekti kapital energjetik, për të cilin jo shumë vite më parë, do të tingëllonte jokorrekte të mendohej për të e mos të flasim për realizimin e tij praktik.

Pjesëmarrës të rrespektuar,

Të nderuar miq,Prizreni jonë, e brenda tij, vendi ku jemi mbledhur sot , përpos bukurisë së tij si vend, bartë me vete edhe vlera të historise dhe të civilizimeve të vjetra. Bartë me vete vulën e kultivimit të traditave të vjetra të shtresave aristokrate. Bartë me vete edhe data të shënuara të historisë sonë që gravuan krenarinë e kombit shqiptar, mushtin e qenjes njerëzore shqiptare. E, në vazhdën e këtyre ngjarjeve, sot po e skalisim edhe një të re, që ka peshën dhe përmasat e ngjashme me ato të parat…po nenshkruajmë kontraten për ndertimin e “autostrades energjetike”, Kosovë – Shqiperi.

Sektori i energjisë është një nga sektorët më të rëndësishëm për zhvillimin e qëndrueshëm ekonomik dhe shoqëror të vendit. Energjia është fundamentale për kualitetin e jetës tonë. Si shoqëri, sot jemi shumë të varur nga furnizimi kualitativ me energji, e cila na nevojitet, si për të jetuar ashtu edhe për të punuar. Është pra, përbërja kryesore e të gjithë sektorëve të një ekonomie moderne. Për ketë, Qeveria e Republikës së Kosovës është duke punuar që ky sektor të zhvillohet, ashtu qe të siguroj furnizim të qëndrueshëm dhe cilësor me energji, me çmime të përballueshme për konsumatorët, mirëpo në të njëjtën kohë duke u kujdesur maksimalisht për ruajtjen e mjedisit. E dimë që kërkesa për energji do të rritet edhe më shumë në të ardhmen, dhe me të, do të rritet edhe kërkesa për infrastrukturë transmetuese të saj.

Pasi vizioni ynë (ndër tjera) është që të kemi një treg të përbashkët energjetik Kosovë-Shqipëri, nënshkrimi i kontratës për ndërtimin e linjës interkonektive 400 kV, vetëm se do ta vërtetojë angazhimin tonë të përbashkët për zhvillim të qëndrueshëm ekonomik të të dyja vendeve.

Tradicionalisht, sektorët e energjisë janë zhvilluar dhe kane operuar në struktura të centralizuara, në të cilat, ndërmarrjet e integruara vertikalisht kanë operuar me shumicën ose të gjitha aktivitetet – prej gjenerimit, deri te bartja dhe distribucioni. Tani, situatën e kemi pak më ndryshe, situatë e cila në të ardhmen duhet të ndryshojë edhe më shumë. Vitet e fundit, në kemi bërë shthurrjen e ndërmarrjes vertikalisht të integruar (KEK) në gjenerim, transmision, distribucion dhe furnizim. Transmisioni ka mbetur entitet publik, ndërsa distribucioni dhe furnizimi janë privatizuar këtë vit. Me këtë rast, duhet theksuar se kemi akoma edhe shumë punë për të bërë, në mënyrë që të bëjmë hapjen e tregut, ashtu siç parashihet me legjislacionin e BE-se, gjegjësisht me pakon e tretë të energjisë.

Kur jemi tek linja interkonektive 400 kV, duhet përmendur që benefitet janë të shumta. Kjo ofron që të ngriten kapacitetet, qëndrueshmëria, dhe besueshmëria në mes të dy rrjeteve. Një linjë e tillë na mundëson që të dy operatorët të punojnë bashkarisht si një sistem shpërndarës, që do të ofrojnë përfitime të ndërsjellta për konsumatorët e të dyja vëndeve.
Kjo rritje e kapacitetit interkonektiv mundëson që të rriten kapacitetet e energjise elektrike dhe të mos ketë më barriera në mbështetjen që njëri vend mund ti ofroj tjetrit në kohë të mungesës së energjisë elektrike. Pra, me këtë linjë ne kemi bërë një hap të madh drejtë rritjes së sigurisë së furnizimit për të dy vëndet. Dhe kjo nuk është pak sukses, dhe kjo nuk është diqka që duhet të kalonte e pashënuar.

Do të ishte jokorrekte, madje e paimagjinueshme, që kjo ceremoni nënshkrimi të kalontë pa falenderimin me të thellë dhe më të sinqertë për Qeverinë e Republikës së Gjermanisë, pa ndihmën e së cilës ky projekt vështire se do të shihte dritën.

Shkelqesia Juaj, Ambasador Blomeyer, U falenderohem pambarim.

Dhe jo vetem kaq. Sepse kjo nuk është ndihmesa e vetme e Qeverisë Gjermane. Ishin shumë projekte të tjera, e padyshim, do vijnë dhe shumë pas saj, si rezultat i një bashkëpunimi dhe partneriteti strategjik qe kemi tash dhe do e kultivojmë edhe në të ardhmen me shtetin gjerman, të cilit përjetësisht i detyrohemi.

Krejt në fund, shumë të respektuar pjesëmarrës,

në emër të Qeverisë së Republikës së Kosovës, shpreh urimet më të sinqerta bashkë me dëshirën që mbarëvajtja e punimeve dhe kompletimi i këtij projekti të jetë temë e shpeshtë e debateve tona në muajt dhe vitet në vijim, për të hapëruar drejt projekteve tjera që kane në objektiv zhvillimin ekonomik të dy vendeve tona, që bashkë, si dy shtete të pavarura, ekonomikisht të zhvilluara, të jemi pjesë e familjes së madhe të shteteve europiane.

Edhe njëhere urime dhe ju faleminderit.

energjia.al 22.12.2013

Diten e sotme (e shtune, dt. 21 Dhjetor 2013), ora 14:00, ne qytetin e Prizrenit zhvillohet ceremonia e Nënshkrimit të Kontratës për Linjën e Interkonjeksionit 400 kV Shqipëri-Kosovë.

Ne ceremonine e cila do te mbahet ne shtepine e Lidhjes se Prizrenit marrin pjese Ministrat respektive nga Shqiperia dhe Kosova, perfaqesues te KfW dhe ambasades gjermane.

energjia.al 21.12.2013

Qeveria e Kosovës është mirënjohëse dhe shumë falënderuese ndaj Qeverisë Gjermane që përmes KfW-së parashikon të investojë 2.5 milionë euro grant nga korniza e fondit regjional për energji të ripërtëritshme dhe efiqiencë të energjisë, tha sot ministri i Financave Besim Beqaj pas nënshkrimit të Marrëveshjes për Financim dhe Projekt për të përkrahur përmirësimin e sistemit të ujit në Prizren.

Marrëveshja u nënshkrua nga ministri i Financave Besim Beqaj, drejtori i KfW-së për Kosovë, Maqedoni, Shqipëri dhe Mal të Zi, Joerg Meilicke, si dhe drejtori menagjues i KUR Hidroregjioni Jugor Besim Baraliu. Në ceremoninë e nënshkrimit prezent ishte edhe Milena Stein, përfaqësuese nga Ambasada Gjermane në Kosovë.

Me këtë rast ministri Besim Beqaj theksoi se projekti synon kursim të energjisë duke e rritur furnizimin me ujë me gravitet dhe duke e reduktuar konsumin e energjisë për pompim të ujit. Kjo njëkohësisht do të kontribuoj në mbrojtje të klimës dhe ambientit.

“Projekti ka një rëndësi të madhe sepse zvogëlon koston e prodhimit të ujit dhe mundëson që kompania të ketë performancë më të mirë financiare. Me këtë projekt i mundësohet ujësjellësit që të operojë më lehtë me fabrikën e ujërave të zeza që është poashtu bashkëfinancim i Qeverisë Gjermane dhe Qeverisë së Kosovës përmes KfW-së”, shtoi ministri Beqaj.

Sipas Ministri të Financave më këto dy projekte nuk përfundojnë të gjitha sfidat që i ka ujësjellësi i Prizrenit.

“Eliminimi i humbjeve të ujit dhe rritja e shkallës së inkasimit dhe integrimi i fshatrave në rrjetin e ujësjellësit regjional janë sfidat e radhës të Qeverisë së Kosovës, e cila është duke punuar në vazhdimësi me donatorët dhe ujësjellësin e Prizrenit që t‘i adresojë dhe të gjejë zgjidhje”.

Ai gjithashtu shtoi se bashkëpunimi me Qeverinë Gjermane në ujësjellësin e Prizrenit ka filluar qysh pasluftës në vitin 1999.

“ Kemi filluar nga periudha emergjente dhe kemi arritur që së bashku me Qeverinë Gjermane pas 13 vjet bashkëpunimi të bëjmë investime kapitale që kanë efekte nacionale dhe regjionale. Fabrika e ujërave të zeza mundëson që Kosova të mos ndotë ujërat e Shqipërisë, për këtë arsye ka edhe efekt regjional. Projekti i EE-së mundëson që kjo fabrikë të punojë me kapacitet të plotë pa pengesa”.

Ndërsa, drejtori i KfW-së për Kosovë, Maqedoni, Shqipëri dhe Mal të Zi, Joerg Meilicke , ka thënë se Republika Federale Gjermane përmes KfW-së (Bankës Gjermane për Zhvillim), për herë të parë do të investojë në një projekt të efiqiencës së energjisë në sektorin e ujit.

“ Qeveria Gjermane përmes KfW-së parashikon një investim të 2.5 milionë eurove nga korniza e fondit regjional për energji të ripërtëritshme dhe efiqiencë të energjisë. Projekti synon kursim të energjisë duke e rritur furnizimin me ujë me gravitet dhe duke e reduktuar konsumin e energjisë për pompim të ujit. Kjo njëkohësisht do të kontribuoj në mbrojtje të klimës dhe ambientit”, tha ai.

“Kërkesa për ujë momentalisht në qytetin e Prizrenit mbulohet 40% përmes stacioneve të pompimit dhe 60% përmes furnizimit me gravitet nga burimet ujore. Pas implementimit të projektit pritet që furnizimi me gravitet të rritet deri 70% dhe konsumi i energjisë të zvogëlohet për 10%. Projekti është paraparë të implementohet mes 2013-2016 përfshirë edhe periudhën e garancionit apo eliminimit të defekteve të mundshme”, ka shtuar Meilicke.

Projekti i EE-së ka si komponentë kryesore: ndërtimin e rrjetit që lidhë burimin e ujit “40 bunarët” me rezervarin dhe rrjetin ekzistues të ujit.

Ky investim ka një rëndësi të veçantë sepse është projekti i parë i efiqiencës së energjisë në sektorin e ujit. Ujësjellësit janë një ndër konsumuesit më të mëdhenj të energjisë elektrike. Për këtë arsye efektet e projektit janë të dyfishta, zvogëlohen kostot e ujësjellësit, poashtu zvogëlohet edhe konsumimi i energjisë.

Në Kompaninë e ujësjellësit regjional Hidroregjioni Jugor, Qeveria e Kosovës së bashku me Qeverinë Gjermane përmes KfW-së është duke e implementuar edhe një projekt për ujërat e zeza. Për përmirësimin e situatës në lidhje me ujërat e zeza është parashikuar investimi në: ndërrimin dhe rehabilitimin e rrjetit të ujërave të zeza, ndërtimin e impiantit të ujërave të zeza, ndërtimin institucional, trajnimin dhe ndërtimin e kapaciteteve njerëzore. Këto masa do të kontribuojnë në masë të madhe për përmirësimin e kualitetit të ujit të lumenjve dhe liqeneve si dhe ujërave nëntokësore direkt dhe indirekt që ndikojnë në përmirësimin e higjienës dhe kushteve shëndetësore të popullatës në përgjithësi.

energjia.al 11.12.2013