info@energjia.al

Shtetet e Bashkuara rikonfirmuan vendimin për t’u tërhequr nga Marrëveshja e Parisit mbi ndryshimet e klimës.

Departamenti i Shtetit deklaroi se ShBA-ja ka ndërmend të tërhiqet nga Marrëveshja e Parisit menjëherë sapo të jetë e përshtatshme. Një vendim i tillë mund të ndryshojë nëse kushtet e marrëveshjes “do të favorizonin” popullin amerikan.

Komentet u bënë gjatë bisedimeve mbi çështjet klimatike të cilat nisën javën e shkuar në Bon të Gjermanisë.

Siria ndërkohë, ka njoftuar se do të nënshkruajë Marrëveshjen e Parisit. Kështu që Shtetet e Bashkuara mbeten i vetmi vend në botë që hedh poshtë paktin global mbi klimën.

Agjensia e lajmeve ekonomia,  14.11.2017

“Koncepti i ngrohjes globale u krijua nga dhe për kinezët në mënyrë që prodhimi i SHBA të mos konkurojë.” Trump , 6 nëntor 2016 .

Kjo që pritej ndodhi: Trump mbajti fjalën për premtimin që kishte bërë gjatë fushatës elektorale për një tërheqje totale nga marrëveshja për klimën. Kjo erdhi pas një debati që praktikisht ndau më dysh edhe Shtëpinë e Bardhë, ku dhe e bija e Trump ishte kundër . Por pas debatit fitoi linja e konservatorëve të kryesuar nga Scott Pruitt, politikani që bëri karrierë në korporatat e naftës dhe u emërua nga Trump në krye të Agjensisë Mjedisore të SHBA (EPA) dhe nga Steve Bannon që e quajnë strategu i ultra të djathtës. Të humbur në këtë debat dolën Gary Cohn, ish drejtor ekzekutiv i Goldman Sachs që mban postin e kreut të ekspertëve ekonomikë në Shtëpinë e Bardhë dhe sekretari i shtetit Rex Tillerson i cili ka qënë drejtor në kolosin e naftës Exxon mobil (që ka përkrahur respektimin e marrëveshjes për klimën ). Edhe Elon Musk, numëri një i Tesla-s ka kërcënuar që do të dalë nga stafi presidencial që merret me ndryshimet klimatike. Po ashtu edhe një pjesë e mirë e botës së sipërmarrësve të mëdhej nga Wall Street te Silicon Valley, Apple e Microsoft, nuk e pranonin daljen nga marrëveshja përfshirë dhe gjigandët e naftës si Chevron e Bp.

Kështu, SHBA bëhet vendi i tretë nga gjithë shtetet e botës ( me Sirinë e Nikaraguan ) që nuk bëjnë pjesë nga marrëveshja historike e Parisit të përbërë nga 195 vende .
Trump deklaroi se : “ Marrëveshja e Parisit, negociuar nga Obama na imponon objektiva jo realistë për Shtetet e Bashkuara në reduktimin e emetimeve të gazeve serrë duke lënë shtete si Kina një lejekalimi për vite të tëra. Jam gati të rinegocioj për një marrëveshje të re. Nëse ja dalim do të jetë gjë e madhe, nëse jo përndryshe durim “.
Trump paraqiti njw arsyetim të mbushur me shifra, që tregon dhe natyrën e tij prej biznesmeni. Ai tha se :”termat e marrëveshjes së Parisit përbëjnë disavantazh ekonomik për SHBA. Tani është e qartë pse vendet e tjera kur firmosën ishin euforikë. Është një marrëveshje që ndëshkon Amerikën dhe pak ka të bëjë me klimën dhe shumë më tepër me avantazhet ekonomike që përfitojnë të tjerët nga SHBA”. Ai dha shembuj duke mbështetur idenë se kombet e tjera, në veçanti Kina, India por dhe Evropa “mund të vazhdojnë të ndërtojnë impiante me qymyr ndërsa ne nuk mund ta bëjmë këtë gjë “. Theksoi edhe se nëse SHBA do të vinin në jetë objektivat e marrëveshjes, ekonomia amerikane do të humbiste tre mijë miliardë dollarë nga prodhimi i brendshëm në dhjetëvjeçarin e ardhshëm dhe se qëllimi i tij ishte që rritja ekonomike të arrihej që vitin e ardhshëm në 3-4%.

Në njoftimin e tij ai u angazhua që SHBA nën administratën e tij do të jetë “vendi më i pastër dhe mjedisor në botë, do të kemi ajër më të pastër, ujë më të pastër, do të jemi ekologjistë por nuk do ti nxjerrim nga tregu ndërmarrjet tona “.
Por cili është shkaku i daljes së SHBA nga marrëveshja e Parisit që , midis të tjerave ka dhe një klauzolë që saktëson se dalja nga marrëveshja mund të bëhet jo më parë se 3 vjet nga vënia e saj në fuqi ( nëntor 2016). Për të gjithë është e qartë : sllogani i tij America first-Amerika e para , pra arësyetimi është i thjeshtë : nuk prekim mirëqënien e Amerikës . “American Dream”(Endrra Amerikane) nuk u ndërtua pa punë e pa energji. Eshtë meritë e popullit amerikan, por dhe e qeverive të tij. Këtë nuk e ve askush në diskutim.Niveli i lartë i jetesës u arrit me mund e sakrifica dhe u takon ta gëzojnë ata që e vendosën Amerikën në krye të shteteve të tjera. Por ky nivel, kërkon një sasi energjie shumë të madhe për të qëndruar atje ku është e akoma më tepër për t’u zhvilluar më tej, me ritmet me të cilat janë mësuar amerikanët.Boll të përmëndim se 1000 familje amerikane shfrytëzojnë energji, sa për 3200 familje europiane.Të mos harrojmë se Europa është edhe vetë e përparuar.Për të mos përmendur që mbi 2 miliardë njerëz në botë nuk kanë akses në energji elektrike .

Nga i vjen energjia Amerikës ? Në vend të parë ( sipas US Energy Generation-shkurt 2017) vjen nga gazi natyror e nafta me rreth 34% të prodhimit të energjisë elektrike , qymyri me rreth 30% , energjia bërthamore 20% dhe vetëm 15% energji e rinovueshme ( hidrocentrale , diellore , eolike etj..). Vlen për tu theksuar se 91% e qymyrit të nxjerrë shkon për prodhimin e enrgjisë elektrike . Një nga vendimet e para marrë nga administrata Trump ishte zhbllokimi i Keysonte Xl, naftësjellësi nga Kanadaja që do të transportojë 800 mijë fuçi në ditë në rafineritë e Teksasit e Luizianës në jug dhe të bllokuar nga administrata Obama për impaktin e madh mjedisor që shkaktonte në krahasim me përfitimet e pakta që do të ketë dhe numurin e vogël të të punësuarve . Po ashtu nga nxjerrja e naftës do të provokohej emetim i ndotjes gjë që e shtyu John Kerry-n të deklaronte atehere (2015) : “Po ta ndërtojmë do të minojë besueshmërinë tonë si udhëheqës në luftën kundër ndryshimeve klimatike “. Dhe tani jo vetëm që do të ndërtohet ai ( por do të ndërtohen edhe të tjerë )

Administrata e Trump-it ka deklaruar se do të hiqen limitet e emetimit të gazeve serrë të vendosura nga Obama me ligjin Clean Air Pakt , madje do ta abrogojë dhe atë ligj duke bërë të ekzaltohej J. Gerard, president i American Petroleum Institute: “Jemi të lumtur të konstatojmë se rruga e re e administratës e njeh rëndësinë e infrastrukturës energjetike “ nga që Trump deklaroi “Me mua merr fund lufta ndaj qymyrit e do ti vemë minatorët në punë “ paçka se qymyri është ndotësi më i madh i ajrit dhe Clean Air Pakt parashikonte reduktimin me 32% të ndotjes nga centralet me qymyr . Kjo për të rritur pavarësinë energjetike të Amerikës dhe për të krijuar mijra vende pune “të bëra tym” ( shprehje e tij ), nga agjenda e gjelbër e Obamës . Ndërsa për ambientalistët që e kanë kundërshtuar projektin , Trump , gjatë fushatës , disa ditë para zgjedhjes së tij deklaronte se “Ambientalistët kanë dalë jashtë kontrollit “.
Sa për energjinë e rinovueshme ka një histori edhe me presidentët e Ameriokës . Në 2010 Barack Obama vendosi të instaloheshin në Shtëpinë e Bardhë panele diellore dhe i vuri . Por nuk ishte ai i pari që bëri këtë gjë . Aty , ishin vendosur panele të tilla që më parë (1979- 32 panele ) nga presidenti Karter të cilat pas dy vjetësh u hoqën nga pasardhësi i tij R. Regan dhe u vendosën në një kafeteri të kolegjit Maine .

Të gjitha veprimet e Trump kanë në thelb slloganin e tij të ri : “Make America first Again- Ta bëjmë Amerikën përsëri të paren “ . Me këtë do të thotë se prioritet i tij do të jetë rritja e mirëqënies së qytetarëve edhe shtimi i vendeve të punë . Këtu , sipas filozofit dhe filologut amerikan Noam Çomski (Chomskey) dhe të tjerë e ka rrënjën politika proteksioniste , izolacioniste dhe antiglobalizmi i tij që e largojnë Amerikën nga një përvojë më se tridhjetë vjeçare . Këto janë vënë re që nga kërkesa që vendet e NATO-s të paguajnë më tepër gjë që vështirësoi marëdhëniet e tij me Merkel dhe drejtues e të tjerë evropianë ; nga sanksionet për industrinë e automobilëve që do të instalonin uzinat në Meksië kur SHBA me Ford , Crysler, Shevrolete e të tjerë gjigantë të prodhimit të automobilëve janë vendosur prej kohësh në Evropë ; nga “lufta e ftohtë” ekonomike me Kinën (dhe jo vetëm ) për ndalimin e eksporteve të saj në SHBA ndërsa në 2016 eksporti i SHBA në vendet e botës ishte 2.2 trilion dollarë në mallra dhe shërbime dhe vjen pas Kinës (1.3 miliardë njerëz ) dhe Bashkimit Evropian.

Vendimi i Trump për tërheqjen nga Marrëveshja e Parisit për klimën ka ngjallur si asnjëherë më parë një reagim në unison të të gjithë botës : “një gabim i madh” u deklarua nga Bashkimi Evropian e Kina në një deklaratë të përbashket; Putin tha :
“ Mund ta evitonte daljen nga marrëveshja “ ; Belgjika -“akt brutal kundër mjedisit” ; Vatikani u shpreh – “një katastrofë për planetin dhe një shembëël i keq për vendet e tjera” ; 28 shtete e shumë qytete amerikane kanë sfiduar Trump dhe kanë krijuar një lëvizjeje për të mbrojtur dhe vënë në jëtë marrëveshjen .
Merkel – “nuk do tja arrijë të ndalojë ne të gjithë që ndjehemi të detyruar të mbrojmë planetin “ e deri te presidenti i ri i Francës që perifrazoi slloganin e Trump-
“ Ta bëjmë planetin të madh përsëri”. Ndërsa nga politika jonë qeveritare e partiake nuk ka dalë ndonjë gjë e re pavarësisht se e kemi firmosur dhe ne Marrëveshjen e Parisit . Siç duket i kanë zënë ethet elektorale dhe nuk duan të prishen me mikun e madh .

Grupimi Ekolëvizja,  07.06.2017

Çmimet e naftës u regjistruan në rritje të ndjeshme gjatë sesionit të sotëm, duke marrë shtysë nga zërat se, shtetet e bashkuara të Amerikës mund të tërhiqen nga marrëveshja e Parisit mbi ndryshimet klimatike.

Edhe disa të dhëna të tjera që flasin për një rënie të papritur të rezervave në shtetet e bashkuara, kanë pasur ndikim në trajektoren e çmimeve gjatë sesionit të së enjtes.

Tërheqja e shteteve të bashkuara të Amerikës nga marrëveshja e klimës, sinjalizon eliminimin e rregullatorëve që kufizojnë përdorimin e karburanteve fosile, duke i dhënë kështu një shtysë çmimeve.

Në celje të sesionit të sotëm, nafta brent e Londrës kuotohej pranë nivelit të 51.34 dollarëve për fuçi, ndërsa ajo bruto amerikane pranë 48.96 dollarëve për fuçi.

Të mërkurën, benchamrku ndërkombëtar preku nivelin e 50.31 dollarëve për fuçi, pas raportimeve se Libia do të rrisë prodhimin me 800 mijë fuçi në ditë.

Scan tv,  01.06.2017

Ministri i Zhvillimit Ekonomik, Blerand Stavileci po merr pjesë në Forumi i Biznesit, që zhvillohet në kuadër të Samitit të Parisit për në Ballkanin Perëndimor, “Paris, Ballkan 2016”, që po mbahet në kryeqytetin francez, marrin pjesë edhe ministrat e linjës nga gjashtë vendet e Ballkanit Perëndimor si: Kosova, Shqipëria, Maqedonia, Serbia, Bosnja dhe Mali i Zi, Komisioneri Evropian për Zgjerim dhe Fqinjësi, Johannes Hahn, si dhe përfaqësues të institucioneve dhe mekanizmave financiare ndërkombëtare.

Në kuadër të Samitit të Parisit, Ministri Stavileci do të marrë pjesë edhe në pritjen që Presidenti i Francës, Francois Hollande do të organizojë për delegacionet e vendeve të Ballkanit në Pallatin Elysse, me ç’rast do të nënshkruhet marrëveshja ‘RYCO’ nga Kryeministrat.

Temë kyçe e Forumin e Biznesit, nikoqir i të cilit është Michel Sapin, Ministri francez i Financave dhe Thesarit do të jetë prezantimi i reformave në gjashtë vendet e Ballkanit Perëndimor për klimën e biznesit me fokus në sektorët: Transporti dhe Infrastruktura, Energjia dhe Mjedisi, Dixhitalizimi etj.

Forumi zhvillohet në sesione sektoriale, ku Ministri Stavileci do të referojë në sesionin Energjia dhe Mjedisi, në të cilin diskutohet çështjet si Burimet e Ripërtëritshme të Energjisë, Rrjetat Smart, Eficienca e Energjisë, Trajtimit e ujërave dhe mbeturinave.

Stavileci do të prezantojë të arriturat e Kosovës në këta sektorë që nga Samiti i fundit, duke nënvizuar të arriturat sidomos në fushën e energjisë, ku hyn përfundimi i interkoneksionit 400kV Kosovë-Shqipëri, tregu i përbashkët, projektet ndërkufitare në fushën e energjisë në të cilat synohet të përfshihet vendet fqinje, e që janë në harmoni me orientimet e BE-së, respektivisht nismës së Berlinit.

Ndryshe, në kuadër të Forumit do të diskutohen edhe projektet e nënshkruar në vitin 2015 dhe bashkë-financuar nga Komisioni Evropian, paraqitja e programeve të projekteve të financimit në Ballkan dhe sfidat aktuale etj.

Në ditën e dytë të vizitës në Paris, Ministri Stavileci do të zhvillojë takime të ndara me drejtues të kompanive të ndryshme franceze të sektorit të TIK dhe Inovacionit, si Finance Innovation, Cap Digital, La Paillasse dhe La Ruche, ku do të njihet për së afërmi me përvojën e tyre dhe mundësitë e bashkëpunimit me kompani nga Kosova.

Telegrafi,  07.04.2016

Industria e naftës e sheh marrëveshjen e klimës në Paris jo si një shenjë të kobshme vdekje, por një mundësi për përtëritje dhe madje edhe rritje.

Ndërsa marrëveshja historike e reduktimit të emisioneve në mesin e 195 vendeve në fund të vitit të kaluar është parë si një humbje për prodhuesit e karburanteve fosil, drejtuesit dhe ministrat e naftës dhanë një thirrje të qartë këtë javë në takimin e tyre të parë të madh që nga bisedimet e Parisit për më shumë kërkime në mënyrën e perfeksionizmit të teknologjisë së karbonit si dhe mënyrën për ta bërë më të lirë atë.

Shpresa qëndron në faktin se kjo dhe teknologji të tjera mund të shkurtojnë ndjeshëm emetimet e naftës dhe gazit natyror, për të mbrojtur industrinë nga degëzime të ndryshimit të legjislacionit të klimës dhe të sigurojnë ende qasje ndaj energjive të lira për ekonomitë në zhvillim.

Kjo mund të ndihmojë industrinë e naftës të shmangë skenarin më të keq për një botë pas-Parisi: qeveritë detyrojnë ndalimin e prodhimit të naftës dhe gazit në zona të caktuara.

Ali Al-Naimi, ministri i naftës së Arabisë Saudite, e quajti ndryshimin e klimës një sfidë më të madhe për industrinë e tij se vetë luhatjet e cmimeve të naftës.

Revista Monitor,  26.02.2016

Temperaturat globale do të rritën me një gradë celcius më shumë, çka sipas shkencëtarëve, është një fenomen që përfaqëson “territorin e panjohur për të gjithë ne”.Nëse termometri do të vijojë të tregojë temperaturat sikurse janë parashikuar, 2015-ta do të regjistrohet si viti më i nxehtë.

Më tej, Organizata Botërore Meteorologjike njoftoi se 2016 , do të jetë viti i parë në të cilin përqendrimi i dioksidit të karbonit në atmosferë do të jetë mbi nivelet e mesatares, për shkak të djegies së vazhdueshme të lëndëve djegëse fosile. Ky përqendrim në atmosferë është rritur në 43% që nga kohërat para-industriale.

Të dhënat më të fundit janë publikuar vetëm 3 javë përpara samitit për ngrohjen globale i cili do të mbahet në Paris, ku  do të mblidhen udhëheqësit botërorë përfshirë Barack Obama, Xi Jinping dhe David Cameron, të gjithë në përpjekje për të arritur një marrëveshje të re për uljen e emetimeve të gazeve.

Për Stephen Belcher, drejtorin e qendrës metereologjike “Hadley”, kjo është hera e parë që është pikërisht ndikimi i njeriut që e ka çuar klimën drejt territorit të panjohur.

Por, samiti i Parisit do të rrisë presionin mbi negociatorët që të hartojnë një marrëveshje të qëndrueshme për të shmangur ngrohjen globale me 2 gradë celcius, pasi nëse kjo gjë ndodh, pasojat do të ishin katastrofike.

Profesoresha Joanna Haigh në Imperial College të Londrës tha se samiti i fundit i klimës së OKB-së mbajtur në Danimarkë në vitin 2009 ka dështuar, duke e cilësuar takimin e Parisit si vendimtar. Të dhënat e reja e kanë shtuar urgjencën për një marrëveshje globale të klimës.

Sipas një analize të “the Guardian” të gjitha vendet duhet të kontribuojnë në përballimin e kësaj sfide. Britanikja shkruan se vendet në zhvillim kanë ende shumë punë për të bërë. Kjo është arsyeja pse, ndryshe nga protokolli i  mëparshëm ndërkombëtar i klimës, rregullat e reja do të zbatohen edhe nga vendet e pasura dhe në ato të varfra.

Top Channel,  09.11.2015

Ministri i Energjisë dhe Industrisë Z.Damian Gjiknuri mori pjesë në Konferencën e mbajtur në Paris me temë “Dita e Shqipërisë”. Aktiviteti organizohej nga UBIFRANCE, Agjencia Franceze për Zhvillimin e Aktiviteteve Ndërkombëtare të Investimeve të Shoqërive Franceze.

Konferenca kishte për objektiv kryesor afrimin e mëtejshëm të biznesit francez në vendin tonë. Ministri i Energjisë dhe Industrisë Z.Damian Gjiknuri, Ministrja e Inovacionit Zonja Milena Harito dhe Ministri i Transporteve Z.Edmond Haxhinasto diskutuan me sipërmarrësit për fushat respektive që mbulojnë duke ju përgjigjur pyetjeve konkrete.

Në fjalën e tij, Ministri Gjiknuri u ndal tek mundësitë që ofron vendi për investime efektive në sektorët e energjisë dhe industrisë ndërsa përmendi dhe faktin se tanimë ekzistojnë kornizat e përshtatshme ligjore për të garantuar sigurinë e investimeve.

Z.Gjiknuri u ndal tek investimet në energjetikë duke deklaruar se Shqipëria është e pasur me burimet ujore. Ministri tha se Qeveria Shqiptare është në diskutime me investitorët e interesuar potencialë për mundësinë e realizimit të projektit të hidrocentralit të Skavicës, një projekt me rëndësi strategjike për sigurinë energjetike.

Më tej, Ministri u ndal tek investimet në linjat e interkonjeksionit, linja me Kosovën dhe më pas edhe planet për linjën me Maqedoninë. Në këtë aspekt, Z.Gjiknuri tha se lidhja me vendet fqinje përmes këtyre linjave do të mund të zgjerojë mundësitë për tregtimin e energjisë së gjeneruar nga burimet e reja, një shans i mirë ky për investitorët privatë që duan të angazhohen në këtë fushë. z.Gjiknuri mori shembull firmën norvegjeze Statkraft e cila po ndërton një projekt të rëndësishëm në Kaskadën e Devollit.

“Lidhje më të mira do të thotë më shumë mundësi për tregti, do të thotë çmime më të qëndrueshme, si për konsumatorin ashtu edhe mundësi për të gjithë investitorët për tregtimin e energjisë”, u shpreh Z.Gjiknuri.

Ministri njohu investitorët edhe me reformën e energjisë të cilën po e ndërmerr qeveria shqiptare duke insistuar se synohet nxjerrja sa më shpejt e sistemit nga problemet financiare dhe liberalizimi i 40% të tregut të energjisë brenda vitit 2018.

Z.Gjiknuri ftoi investitorët francezë që krahas interesimit të tyre për fushën e energjisë të tregojnë vëmendje edhe ndaj zhvillimeve të fundit në industrinë minerare dhe sektorin e hidrokarbureve. Një element i veçantë sipas tij është padyshim projekti i gazsjellësit TAP, mundësitë që ofron ai për investime të huaja në kuadër të gazifikimit të vendit.

energjia.al  21.11.2014

Zv. Kryeministri dhe Ministri i Ekonomisë, Tregtisë dhe Energjetikës z. Edmond Haxhinasto mori pjesë dje në forumin e biznesit të organizuar në Paris nga agjencia shtetërore franceze për promovimin e investimeve UBIFrance. Në takim ishin prezent mbi 50 koorporata dhe kompani franceze prezente aktualisht dhe të interesuara për tregun shqiptar. Ishin prezent gjithashtu deputeti Le Borgu, senatori Berson, ambasadorja franceze Moro, etj.
Në prezantimin e tij, ministri Haxhinasto u shpreh se ekzistojnë mundësi të mëdha për biznesin francez për të rritur më tej prezencën në ekonominë shqiptare. Ai foli për mundësitë e mëdha që ofron Shqipëria për investitorët e huaj, në drejtim të pozicionit të saj gjeografik, të aksesit dhe të integrimit me tregun rajonal, të resurseve natyrore e njerëzore që ka vendi, si dhe të garancisë dhe sigurisë që ofron si vend anëtar i NATO dhe vend që aspiron për anëtarësim në Bashkimin Europian.
Më pas, ministri Haxhinasto bëri një paraqitje të politikave ekonomike e fiskale dhe lehtësive që ofron ekonomia shqiptare, të cilat kanë bërë të mundur që vendi të ketë një rritje të qëndrueshme ekonomike dhe rritjen e konkurrueshmërisë së saj.
Z. Haxhinasto paraqiti edhe potencialet konkrete që paraqesin sektorët strategjik të ekonomisë, si energjetika, minierat, infrastruktura, veçanërisht ajo hekurudhore, turizmi e bujqësia. Ai përmendi projektet e mëdha energjetike që ka vendi si Vjosa e Skavica, që do ta kthejë atë në një eksportues të energjisë elektrike, si dhe për projektin  TAP, i cili do të rrisë sigurinë energjetike të vendit.
Më pas, ministri Haxhinasto iu përgjigj interesit të shumtë të pjesëmarrësve, të cilët paraqitën projektet e tyre për investime në ekonominë shqiptare.

energjia.al, 04.12.2012

Parisi lançoi zyrtarisht projektin Autolib, që ofron për qytetarët mundësinë të udhëtojnë brenda qytetit me makina elektrike, me çmim të lirë dhe në pronësi publike të përbashkët. Në shërbim janë 250 vetura blu, krejtësisht elektrike. Ato mund të merren me qera midis 4 deri në 8 euro për gjysmë ore. Por fillimisht drejtuesve u kërkohet të paguajnë një abonim që nis nga 10 euro në ditë.
Organizatorët synojnë që deri në fund të vitit 2012, të shpërndajnë në 1 mijë stacionet përqark Parisit mbi 3 mijë vetura të këtij lloji. Ai bazohet në suksesin e Velib, që është skema e përdorimit të biçikletave të përbashkëta që ka nisur në vitin 2007. Në këtë formë autoritetet synojnë të reduktojnë nevojën e përdorimit të veturës private në bulevardet e Parisit.
Paralelisht kjo është një formë shumë e mirë për të zbuluar veturën elektrike dhe të përcaktojë një tjetër trend për blerjen e veturave. Siguracionet e larta dhe çmimi i kripur i parkingut sipas një studimi, ka bërë që 25% e parisienëve të heqin dorë nga veturat personale. Vetura elektrike, ashtu si biçikleta, ajo mund të merret në një stacion dhe të dorëzohet në një stacion tjetër. Projekti ofron shumë risi të teknologjisë së informacionit.

TV Scan, 06.12.2011

Fluturimi i parë transatlantik me karburant pjesërisht të gjelbër është ulur në Panairin e Fluturimeve në Aeroportin Ndërkombëtar të Parisit që u hap më 20 qershor. Biokarburet janë një prej shumë teknologjive të gjelbra, përfshirë energjinë diellore, që janë paraqitur në Panirin më të madh të Fluturimeve në botë.
I ndaluar në një nga pistat e aeroportit, ky avion që duket si gjithë të tjerët, sapo ka përfundur një udhëtim të veçantë që  mund t’u hapë rrugën fluturimeve me teknologjinë e gjelbër. Një prej motorëve të tij ishte i furnizuar 50% me biokarburant.
Për kompaninë Haniuell që ndërmori këtë nismë, ky është një hap që demonstron përpjekjet e saj për të komercializuar burimet alternative të karburantit për industrinë e aviacionit.
Dy ditë para se të hapej zyrtarisht panairi i Parisit, Gulfstream G450 i Haniuellit u nis nga Moristaun i Nju Xhërsit dhe pas shtatë orësh u ul të shtunën në aeroportin Lë Burzhe, duke përdorur gjatë udhëtimit karburant të gjelbër.
Piloti, udhëtarët, ekzekutivët e Haniuellit dhe disa gazetarë e përshkruan fluturimin si krejtësisht normal, pa ndonjë ndryshim të dukshëm nga fluturimet me karburant nga nafta.
Xhim Rekoski, zv/president dhe menaxheri kryesor i energjisë së rinovueshme dhe kimikateve u tha gazetarëve se fluturimi shënoi një fillim të suksesshëm drejt përdorimit të karburantit alternativ që do të ndihmojë në reduktimin e çlirimit të gazit karbonik në atmosferë.
“Në veçanti ky fluturim sot uli sasinë e gazit karbonik të çliruar me 5,5 tonë gjatë udhëtimit të tij nga Shtetet e Bashkuara në Paris, dhe nëse biokarburantet do të përdoreshin në masën 10% në aviacionin komercial, kjo do të çonte në reduktimin me më shumë se 15 milionë tonë të gazit karbonik të çliruar në atmosferë.  Me karburantin e gjelbër të përdorur për avionët nga Haniuell, ne japim një ndihmesë të ndjeshme për mbrojtjen e mjedisit dhe jemi krenarë që marim pjesë në këtë nismë”.
Haniuell ka prodhuar tashmë më shumë se 2 milionë e 500 mijë litra karburant të gjelbër.  Tani për tani, biokarburet nuk e justifikojnë koston, por piloti i avionit që fluturoi nga Nju Xhersi, Fred Gregori, beson se ky nuk është thjesht produkti i fundit në teknologjinë e gjelbër, por ai është një produkt premtues që do të përdoret në industrinë e aviacionit.
“Mendoj se në një peridhë afatgjatë, vlera ekonomike e këtij karburanti do të jetë determinuese, sepse kur çmimet e naftës bruto të shkojnë në 100 deri 150 dollarë për fuçi, përdorimi i biokarburanteve do të jetë më i leverdishëm dhe rrjedhimisht do të nxisë konkurencën për prodhimin e tyre”.
Në skajin tjetër të spektrit të energjisë alternative qendron Solar Impalls që fluturoi nga Brukseli në Paris e që konsiderohet një nga yjet e panairit në Lë Burzhe. Themeluesit e saj e quajnë atë avion me karburant zero, pasi ai furnizohet krejtësisht me energji diellore.
Më e dallueshme në konstruksionin e avionit janë krahët e tij të mëdhenj, prej mëse 63 metrash, më të mëdhenj se ato të një Airbusi A340, por vetë avioni peshon sa një makinë familjare.
Shpejtësia mesatare e fluturimit të tij është 70 kilometra në orë dhe lartësia maksimale 8 mijë e 500 metra.  Në krahët e tij janë vendosur më shumë se 10 mijë qeliza diellore që kapin energjinë e diellit.  Një pjesë e kësaj energjie përdoret për fluturim dhe pjesa tjetër akumulohet për t’u përdorur gjatë fluturimit natën.
Për Betrand Pikard, inisiatorin dhe shefin e Solar Impalls, ambicja nuk është revolucionarizimi i aviacionit apo komercializimi i paneleve gjigante diellore, por ai është një mjet për të tërhequr vemendjen ndaj nevojës për një të ardhme më gjelbër.
“Ne duam të tregojmë se teknologjitë që na japin mundësinë të fluturojmë ditën dhe natën pa karburant, mund të përdoren edhe në jetën e përditëshme për makinat personale, për sistemet ngrohëse, për ajrin e kondicionuar, për kompjuterët, për ndriçim e për gjithçka tjetër”.
Panairi i 49-të ndërkombëtar i Parisit në aeroportin Lë Burzhe do të qendrojë i hapur  deri më 26 qershor.

Zeri i Amerikes, 22.06.2011