info@energjia.al

Çmimet e naftës po qëndrojnë në rritje në sesionin e sotëm, pas deklaratës së OPEC, se tregu po ribalancohet.

Çmimet e naftës janë mbështetur edhe nga mos rifillimi i punës me kapacitet të plotë në rafineritë e Gjirit të Meksikës, për shkak të uraganit Nate.

Nafta Bruto amerikane po tregtohet pranë 50 dollarëve për fuçi, ndërsa nafta Brent e Londrës është ngjitur sërish përmbi 56 dollarë për fuçi. Tregtarët shprehen se, çmimet janë mbështetur nga komentet e Organizatës së Vendeve Prodhuese të Naftës, që deklaroi se, tregu po ribalancohet më shpejt se vlerësimet paraprake.

“Ka shenja të qarta se tregu po ribalancohet”, deklaroi sekretari i përgjithshëm i OPEC, Mohammad Barkindo për Reuters.

“Procesi i uljes së rezervave globale të naftës po vazhdon, ndërsa në anën tjetër, kërkesa po rritet”,shtoi ai. OPEC dhe vendet e tjera prodhuese të naftës janë angazhuar që të ulin prodhimin e naftës me 1.8 milionë fuçi në ditë, deri në mars të vitit të ardhshëm.

Por, në ditët e fundit janë shtuar spekulimet se, kjo marrëveshje mund të shtyhet përtej këtij afati. Ndërkohë, banka JP Morgan shprehet se, tensionet politike, sidomos mes Shteteve të Bashkuara të Amerikës dh Iranit, mund të mbështesin çmimet.

Në terma afatshkurtër, çmimet kanë gjetur një mbështetje edhe nga dëmtimi i prodhimit në Gjirin e Meksikës, për shkak të uraganit Nate. 85% e prodhimit në këtë zonë, ose 1.49 milionë fuçi në ditë, po i mungojë tregut, pasi rafineritë nuk kanë rifilluar punën me kapacitet të plotë.

Scan Tv,  11.10.2017

Çmimet e naftës janë stabilizuar në sesionin e sotëm, të mbështetur nga komentet se OPEC dhe prodhuesit e tjerë, do të ndërmarrin veprime të tjera për të balancuar tregun. Ndërkohë, platformat e prodhimit të naftës në Gjirin e Meksikës rifilluan aktivitetin, pasi uragani Nate, mbylli rreth 90% të aktivitetit në këtë zonë.

Për shkak të informacioneve kontradiktore, analistët shprehet se, nafta po përpiqet të gjejë drejtimin. Organizata e Vendeve Eksportuese të Naftës, OPEC, do të takohet në Vjenë më 30 nëntor, për të përcaktuar politikat e prodhimit në të ardhmen.

Sekretari i Përgjithshëm i OPEC, Mohammad Barkindo, deklaroi se, po zhvillohen diskutime për të shtyrë marrëveshjen për uljen e prodhimit përtej marsit të vitit të ardhshëm. Ai shtoi se, OPEC dhe vendet e tjera që janë pjesë e marrëveshjes, duhet të ndërmarrin disa masa të jashtëzakonshme, për tu siguruar që tregu do të balancohet në terma afatgjatë.

Nafta Brent e Londrës po tregtohet pranë 55.2 dollarëve për fuçi, ndërsa javën e kaluar ra me 3.3%, humbjet më të mëdha javore që nga qershori i vitit 2016. Ndërsa nafta Bruto amerikane po tregtohet pranë 49.2 dollarëve për fuçi. Analistët shprehen se, besimi në tregun e naftës vazhdon të jetë i fortë, dhe pritshmëritë janë për një tendencë në rritje të çmimeve.

Scan Tv,  09.10.2017

Çmimet e naftës janë karakterizuar nga luhatje të vogla në sesionin e sotëm, pasi investitorët po presin përfundimin e takimit të prodhuesve të naftës, që janë mbledhur në Vjenë. Nafta Brent e Londrës po tregtohet mbi 56.2 dollarë për fuçi, ndërsa nafta Bruto amerikane tregtohet mbi 50.3 dollarë për fuçi.

Ministrat e naftës të vendeve anëtare të OPEC dhe të disa vendeve të tjera që nuk janë pjesë e organizatës janë mbledhur për të diskutuar një shtyrje të mundshme të afatit për ujen e prodhimit, përtej marsit të vitit të ardhshëm.

Sekretari i Përgjithshëm i OPEC, Mohammad Barkindo, deklaroi në hapje të sesionit se, të gjithë faktorët e tregut do të diskutohen, duke përfshirë edhe disbalancat që krijohet nga nafta argjilore në Shtetet e Bashkuara.

Ndërsa, ministri rus i energjisë, Alexander Novak, tha se, të gjitha vendet duhet të koordinojnë veprimet dhe të punojnë së bashku për strategjinë e ardhshme.

Fokusi i investitorëve ka qenë i përqendruar edhe tek Nigeria dhe Libia, vende që janë përjashtuar nga marrëveshja për uljen e prodhimit, pasi deklaruan se do ti bashkohen uljes së prodhimit.

Scan Tv,  23.09.2017

Çmimet e naftës ranë me rreth 1% gjatë sesionit të fundit të kësaj jave, duke prekur nivelin më të ulët në më shumë se 1 javë.

Tendenca e re e çmimeve vjen pas deklaratave të agjencisë ndërkombëtare të energjisë, sipas së cilës, balancimi i tregut po kërkon kohë, për shkak të angazhimit të dobët të OPEC për të shkurtuar prodhimin, ashtu siç ka premtuar në fakt.

Në çelje të sesionit të sotëm, nafta Brent e Londrës kuotohej pranë nivelit të 51.42 dollarëve për fuçi, ndërsa ajo bruto amerikane pranë 48.11 dollarëve për fuçi.

Gjatë sesionit të djeshëm, çmimet e naftës prekën përkohësisht nivelet rekord maksimale të 3 muajve të fundit, por u tërhoqën më vonë me rreth 1.5%.

Scan Tv,  11.08.2017

Çmimet e naftës u regjistruan në rënie gjatë sesionit të parë të kësaj jave, duke konfirmuar kështu tendencën e çmimeve të filluar që prej javës së kaluar.

Pavarësisht kësaj, çmimet vijojnë të qëndrojnë pranë niveleve më të larta të 9 javëve të fundit, duke marrë shtysë nga të dhënat e fundit të tregut të punës në shtetet e bashkuara të Amerikës.

Në çelje të sesionit të sotëm, nafta brent e Londrës kuotohej pranë nivelit të 52.24 dollarëve për fuçi, ndërsa ajo bruto amerikane pranë 49.40 dollarëve për fuçi.

Rritja e prodhimit nga vendet e OPEC vijon kështu të ndikojë trajektoren e çmimeve të naftës në nivel global.

Nga ana tjetër, rënia e puseve aktive të naftës në shtetet e bashkuara të Amerikës po jep efektin e kundër në tregje.

Scan Tv,  07.08.2017

Pasi thyen më në fund barrierën e 50 dollarëve për fuçi, çmimet e naftës kanë zgjeruar fitimet gjatë sesionit të sotëm, me më shumë se 1% që në orët e para. Tendenca e re e çmimeve vjen si pasojë e apelit të OPEC ditën e djeshme për të ulur prodhimin por edhe si pasojë e të dhënave të fundit që flasin për një rënie të rezervave dhe ngadalësim të hapit të prodhimit në Shtetet e Bashkuara të Amerikës.

Në çelje të sesionit të sotëm, Nafta Brent e Londrës kuotohej pranë nivelit të 50.61 dollarëve për fuçi, ndërsa ajo bruto amerikane pranë 48.38 dollarëve për fuçi.

Vendet e OPEC dhe prodhues të tjerë jashtë organizatës u angazhuan ditën e djeshme për të ulur eksportet e naftës duke filluar prej muajit gusht, gjë që ka nxitur një marshim të çmimeve.

Scan Tv,  26.07.2017

Çmimet e naftë zgjeruan fitimet gjatë sesionit të sotëm, pasi Arabia Saudite u angazhua që të shkurtojë eksportet e arit të zi, duke filluar prej muajit të ardhshëm. Nga ana tjetër organizata e vendeve eksportuese i bëri thirrje vendeve të tjera prodhuese që t`i bashkohen në angazhimin për të shkurtuar prodhimin.

Në çelje të sesionit të sotëm, nafta Brent e Londrës kuotohej pranë nivelit të 48.82 dollarëve për fuçi, ndërsa ajo bruto amerikane pranë 46.57 dollarëve për fuçi.

Vendet e OPEC dhe prodhuesit e tjerë jashtë organizatës që u takuan të Hënën në Rusi u angazhuan edhe që të shtyjnë përtej Marsit 2018 marrëveshjen e shkurtimit të prodhimit, në rast se kjo do të jetë e nevojshme.

Scan Tv,  25.07.2017

Çmimet e naftës u regjistruan në rritje gjatë sesionit të parë të kësaj jave, duke reflektuar kështu optimizëm në pritje të takimit të vendeve prodhuese të OPEC dhe disa prodhuesve jashtë organizatës. Takimi do të fokusohet kryesisht te rritja e prodhimit të naftës në Nigeri dhe Libi.

Në çelje të sesionit të së hënës, Nafta Brent e Londrës kuotohej pranë nivelit të 48.18 dollarëve për fuçi, ndërsa ajo bruto amerikane pranë 45.84 dollarëve për fuçi. Të dy benchmarkët ranë me thuajse 1.5 dollarë gjatë së premtes, pas parashikimeve të një firme konsultimi, ku flitej për një rritje të prodhimit nga vendet e OPEC.

Takimi i prodhuesve do të zhvillohet ditën e Hënë në Shën Petersburg të Rusisë, dhe pritet që gjatë sesionit të sotëm, çmimet të luhaten ndjeshëm, në varësi të lajmeve që do të vijnë nga takimi.

Scan TV,  24.07.2017

Çmimet e naftës u regjistruan në rritje të lehtë gjatë sesionit të fundit të javës, në pritje të takimit të radhës së vendeve të OPEC javën e ardhshme.

Pavarësisht kësaj, nafta Brent e londrës vijon të mbetet ende poshtë nivelit të 50 dollarëve për fuçi.

Gjatë sesionit të kaluar, për të parën herë pas 6 javësh, benchmark-u ndërkombëtar arriti të thyejë përkohësisht këtë nivel.

Në çelje të sesionit të sotëm, Nafta Brent e Londrës kuotohej pranë nivelit të 49.40 dollarëve për fuçi, ndërsa ajo bruto amerikane pranë 46.99 dollarëve për fuçi.

Të dy benchmark-ët prekën nivelet e tyre rekord maksimale që prej muajit qershor gjatë së enjtes.

Scan Tv,  21.07.2017

Çmimet e naftës u regjistruan në luhatje minimale gjatë sezonit të sotëm, duke qëndruar shumë pranë nivelit të 50 dollarëve për fuçi. Të dy benchmarkët kryesorë kanë arritur të ruajnë fitimet e sesionit të djeshëm, kur të dhënat që flisnin për një rënie të rezervave në Shtetet e Bashkuara të Amerikës nxitën një marshim të çmimeve.

Në çelje të sesionit të sotëm, nafta Brent e Londrës kuotohej pranë nivelit të 49.68 dollarëve për fuçi, ndërsa ajo bruto amerikane pranë 47.09 dollarëve për fuçi.

Ekspertët shprehen se, tregjet nuk po e testojnë ende nivelin e  50 dollarëve për fuçi për shkak të shqetësimeve se, prodhimi i lartë nga vendet e OPEC do të prodhojë dobësi.

Scan TV,  20.07.2017