info@energjia.al

Erea Blakaj, nxënëse e klasës së VIII, të martën e kishte një ditë shkollore ndryshe nga mësimet e zakonshme. Ajo, bashkë me 60 nxënësit tjerë të Shkollës Fillore “Xhemajl Mustafa” të Prishtinës vizituan KEDS-in.
“Mësova shumë gjëra sot. Nuk e dija që ka kabllo të rrymës bistekë që mbështillen dhe nuk janë të rrezikshme edhe po u prekan me dorë”, thotë ajo, teksa vrojtonte vendosjen e rrjetit të tensionit të ulët në fshatin Dyz të Podujevës.
Aty KEDS po ndërton rrjetin e ri për 90 familje duke përfshirë edhe një trafo shtesë, përderisa nxënësit kanë parë në praktikë si ndërtohet rrjeti energjetik, cilat janë nivelet e tensionit, për çka shërbejnë dhe si transformohen ato në nivele më të ulëta, deri te konsumatori shtëpiak.
“E shoh ndryshe KEDS-in. Po më pëlqen shumë si funksionon në realitet distribuimi dhe furnizimi i energjisë elektrike. Kjo ma shton dëshirën që të bëhem inxhiniere”, shton Erea, e cila pos emrit të veçantë, ka edhe pasionin për të mësuar sa më tepër.
Kureshtja e nxënësve ka qenë e madhe, sidomos për faktorët e sigurisë. Atyre u është shpjeguar nga menaxheri i Departamentit të Mirëmbajtjes, Ramadan Arifi dhe stafi i tij, se si vendosen mbrojtësit në rrjet, të cilët mbrojnë rrjetin nga faktorët ekstern dhe njerëzit nga kontakti me shkarkimet elektrike.
“Këtu po ndërtojmë rrjetin e ri të tensionit 0.4 kV. Nga këto shtylla që po i vendosim dhe nga këta përçues, të cilët po i shihni tek i vendosin punëtorët e KEDS-it, furnizohen me energji elektrike direkt konsumatorët. Ky është niveli fundor i tensionit dhe lidhet direkt me shtëpitë përreth”, u tha Arifi nxënësve.
Nxënësit kanë mësuar edhe si funksionojnë KEDS-i dhe KESCO në përgjithësi, sikurse kanë bërë vizitë të veçantë në Qendrën e Kalibrimit. Aty, Menaxheri për AMR dhe Kalibrim, Shukri Aliu, u ka shpjeguar se si funksionojnë njehsorët e energjisë elektrike, që nga prodhimi i tyre, kalibrimi e deri te vendosja e tyre në shtëpitë e konsumatorëve.

energjia.al  11.10.2017

Ministri i Arsimit, Shkencës dhe Teknologjisë, Arsim Bajrami dhe drejtori i përgjithshëm i Kompanisë kosovare për distribuim dhe furnizim me energji elektrike (KEDS), George Karagutoff, nënshkruan Marrëveshje Bashkëpunimi, e cila ka për qëllim ofrimin e praktikës profesionale në ndërmarrje për nxënësit e shkollave të mesme profesionale, në arritjen e kompetencave profesionale të parapara në kurrikulen kombëtare.

Nënshkrimi i kësaj Marrëveshje Bashkëpunimi është vazhdim i angazhimit të MAShT për të krijuar partneritet në mes të shkollave profesionale me ndërmarrjet publike dhe private të Kosovës, me qëllim që të rinjtë (nxënësit dhe studentët) tanë të përfitojnë përvojë në punë praktike, për të qenë më afër tregut të punës.

Ministri Bajrami, me këtë rast ka vlerësuar se, bashkëpunimi i Ministrisë së Arsimit me KEDS- in është shembull i mirë i aftësimit të të rinjve për tregun e punës.

“Është bashëpunim i shkëlqyeshëm që kemi tash e disa vite, një shembull i mirë i investimit të kësaj kompanie në edukimin e të rinjve, duke marrë në vazhdimësi një numër të caktuar të nxënësve, duke u ofruar mundësinë që ata të ushtrojnë praktikën profesionale për gjashtë muaj, duke ndërtuar kompetencat dhe shkathtësitë dhe duke i punësuar. Ky është shembulli më i mirë i MAShT me bizneset”, ka thënë ministri Bajrami.

Ministri Bajrami po ashtu ka folur edhe për rëndësinë e krijimit të një partneriteti të fortë të shkollave profesionale me bizneset, për mundësuar që secila shkollë të ketë kompaninën, e cila u ofron nxënësve praktikën profesionale.

“Ajo çfarë pretendojmë në fushën e Arsimit dhe Aftësimit Profesional është arsim cilësor për punësim. Qëllimi i MAShT është që të krijojmë 100 partner të fortë të biznesit, në mënyrë që secili nxënës të plotësojë nevojat dhe shkathtësitë e veta duke punuar dhe duke u aftësuar në kompani”, është shprehur ministri Bajrami.

Ndërsa, drejtori i përgjithshëm i KEDS- it, z. George Karagutoff, tha se të rinjtë e përfshirë në këtë program i cili ofron kurse teorike dhe praktike janë shndërruar në menaxher të së ardhmes. “Jam i kënaqur që i shoh këta të rinjë duke marrë përgjegjësi të reja dhe duke marrë udhëheqje të reja në kompani. KEDS do të vazhdoj me këtë projekt, duke i ofruar të rinjve mundësi të reja për punësim”, është shprehur Karagutoff.

Ndryshe, KEDS, përkatësishtë Universiteti Bogazici i Turqisë ka tri vite që organizon Akademinë Profesionale për nxënësit dhe studentët nga Kosova, duke u ofruar aftësim teorik dhe praktik në ndërmarrje brenda një periudhe gjashtë mujore, certifikim dhe punësim, varësishtë nga nevojat e kompansië dhe performanca e të rinjve.

Agjensia e lajmeve ekonomia,  31.05.2016

Rreth 1.200 nxënës të shkollës 9-vjeçare “Adem Gjeli” në Fushë-Krujë janë nxjerrë nga klasat ku ata zhvillonin mësim nga mësuesit e tyre, pasi rrjedhja e gazit nga sistemi ngohës i shkollës, ka bërë të pamundur zhvillimin e mësimit.

Gazi ka bërë që disa nxënësit të kenë pasur probleme me frymëmarrjen, por nuk raportohet për dëmtime të rënda shëndetsore.

Burime nga policia kanë konfirmuar se rrjedhja e gazit erdhi si pasjoë e një defekti në sistemin ngrohës së shkollës.

Për shkak të kësaj ngjarjeje është anuluar edhe mësimi. Mësohet se në shkollën 9-vjeçare zhvillohej mësim me dy turne.

Shqiptarja.com  11.04.2016

Dy nxënës të shkollës se mesme në Bulqizë janë paraqitur mesditën e sotme në spitalin e qytetit pasi kanë shfaqur shenja intoksikimi.

Nxënësit kishin temperaturë të lartë, dhimbje koke e stomaku si dhe të vjella, ndërsa paraprakisht ata dyshohet se janë helmuar nga çlirimi i gazit, lloji i të cilit ende nuk është përcaktuar.

Mësohet se dy gjimnazistët kanë luajtur në një objekt i cili u ka shpërthyer dhe ka çliruar gaz, duke sjellë helmimin e dy nxënësve.

Mjeku Shahin Kaja, pohon se gjendja e dy pacientëve është e stabilizuar, ndërkohë policia vijon hetimet për zbardhjen e plotë të kësaj ngjarjeje.

Shqiptarja.com  14.10.2015

Dhjetëra nxënës dhe profesorë shqiptarë janë helmuar nga një gaz i panjohur që u ka shkaktuar dhimbje në trup dhe probleme me frymëmarrjen.

Incidenti ka ndodhur dje pasdite në Shkollën e Mesme Ekonomike, që ndodhet në lagjen Veri të Shkupit, që i takon komunës së Butelit.

Për shkak të gjendjes alarmante, menjëherë janë thirrur ekipet e ndihmës së shpejtë, të cilët kanë transportuar nxënësit dhe profesorët në Klinikën e Toksikologjisë në Shkup.

Momentalisht para shkollës ka prindër të revoltuar dhe kërkojnë përgjegjësi nga kryeministri, Nikolla Gruevski dhe partitë politike shqiptare, për rrethanat në të cilat janë helmuar nxënësit shqiptarë.

Sot News,  02.10.2015

Zyrtarët e KEDS-it sot patën një vizitë ndryshe nga ato të zakonshmet. Një grup nxënësish prej 30 vetave të Qendrës Kreative, Institucion Parashkollor në Prishtinë, qëndruan për një vizitë informative në KEDS.

Shkallët e Ndërtesës Qendrore gumëzhinin nga zërat gazmorë të fëmijëve të kësaj Qendre të shoqëruar nga drejtoresha dhe disa mësuese.

Fëmijët u pritën nga Drejtoresha e Burimeve Njerëzore në KEDS, Valbona Kadrijaj, e cila u shpjegoi në përgjithësi fëmijëve procesin e shpërndarjes së energjisë elektrike. Pastaj vazhduan në Departamentin e Kalibrimit, dhe aty fëmijët panë nga afër njehsorët për matjen e energjisë elektrike dhe bënë shumë pyetje. Si ndalet energjia elektrike, si vjen ajo deri te shtëpitë tyre, pse duhet ta kursejmë rrymën, ishin disa nga pyetjet e parashtrua nga nxënësit. Përgjigjet i morën nga Shukri Aliu, nga Departamenti i Kalibrimit, i cili me shembuj sa më të qarta ua shpjegoi të gjitha në detaje fëmijëve.

Nxënësve u pëlqeu shumë vizita dhe disa prej tyre shprehën dëshirën që kur të rriten të vijnë të punojnë këtu.

“ Unë kur të rritem dua të bëhem inxhinier dhe të punoj në KEDS”, thotë Edvin Rakovica, nxënës i klasës së dytë. Kurse nxënësja Liza Siqani, thotë “ Unë pashë sot orët e vjetra dhe ato të rejat për matjen e rrymës, por ato digjitalet më pëlqyen më shumë”. Kurse njëri prej nxënësve tha: “ Mua më së shumti më pëlqeu lëngu”.

Duke qeshur dhe duke kënduar ata përfunduan vizitën me shpresën që të takohemi përsëri.

energjia.al 28.11.2014

Telat e largpërçuesit të dyfishtë që kalonin mbi oborrin e shkollës “12 Maji” janë futur nëntokë duke e mënjanuar përgjithmonë rrezikun permanent që i nënshtroheshin nxënësit dhe personeli i shkollës. Ky nuk është veprimi i vetëm ndaj komunitetit që ndërmori kompania

Mbi 500 nxënësit e shkollës së mesme “12 Maji” nga Ratkoci i Rahovecit kryejnë aktivitetet e ndryshme dhe shëtisin shumë më të sigurt në oborrin e shkollës së tyre. Kjo, pasi KEDS ka futur nëntokë largpërçuesin e dyfishtë që kalonte përmes hapësirës së shkollës. “ Pas paralajmërimit, ne vepruam menjëherë. Largëpërçuesi i dyfishtë me shtylla metalike ,që furnizojnë një pjesë të madhe të fshatrave të Rahovecit, kalonte nëpër oborr të shkollës dhe përçuesit ishin në një distancë shumë të ulët nga toka. Ne e eliminuam rrezikun në kohën më të shkurtër të mundshme duke eliminuar largpërçuesin ajror dhe implementuar linjën kabllovike në segmentin që i takon oborrit të shkollës”, thotë Milot Kursoni, udhëheqës i ekipit të Mirëmbajtjes në Distriktin e Gjakovës.

Gjashtë telat e largpërçuesve 10 kV tashmë janë në një shtyllë metalike para fillimit të hapësirës shkollore dhe pjesa tjetër mbi 150 metra më tej. Në ato dy shtylla janë të vendosura vetëm dy tela që nuk mbajnë energji, por janë rrufepritës që mbrojnë shkollën nga fatkeqësitë eventuale natyrore. “Ne e falënderojmë KEDS-in për këtë intervenim. Tash nxënësit dhe personeli i shkollës mund të lëvizin lirshëm”, thotë Arsim Hoti, përgjegjës financiar i shkollës.

Atë ditë tetori, nxënësit po shëtisnin gjatë pushimit, përderisa një klasë po ushtronte në oborr gjatë lëndës së edukatës fizike. Lëvizjet tashmë ishin të lirshme dhe pa brenga.

Por, më herët gjendja nuk ishte aspak e mirë. Këtë e vërtetojnë edhe pjesëtarët e shkollës. “Telat në një pikë ishin vetëm 1.60 metra mbi tokë. Rreziku ishte evident”, shton Hoti.

KEDS e kishte trashëguar këtë gjendje pas privatizimit të Distribucionit, por shihej që kishte munguar edhe koordinimi në mes të autoriteteve vendore dhe kompanisë që menaxhonte me rrjetin elektrik. Largpërçuesit në këtë pjesë ishin shtrirë në vitin 2004, ndërsa shkolla ishte ndërtuar një vit pas, pra më 2005-tën. Telat ishin vendosur në mënyrë aspak profesionale, pasi në asnjë rrethanë nuk guxojnë të jenë nën 6 metra lartësi nga toka, ndërsa për shkak edhe të konfiguracionit të terrenit, ato binin edhe nën 2 metra, madje brenda hapësirës shkollore. Por, kjo tashmë i takon së kaluarës.

Pos kësaj ndërhyrje, KEDS është përkujdesur në vazhdimësi që të lirojë hapësirat për komunitetet. Në çdo intervenim apo investim në rrjetin elektrik nëpër lokalitetet e banuara, aty ku e kanë lejuar mundësitë teknike, KEDS ka devijuar rrjetin elektrik në të mirë të krijimit të hapësirave të përbashkëta. Një rast konkret është ai i Nabërxhanit të Pejës, ku telat u devijuan sepse kishte mundësi dhe tashmë aty është ndërtuar fusha e volejbollit për të rinjtë e fshatit.

energjia.al 24.11.2014

Në vazhdim të angazhimit për të investuar në fushën e arsimit në komunitetin pranë HEC-it të Ashtës, projekt-kompania Energji Ashta formalizoi sot iniciativën për të mbështetur financiarisht dy nxënës të shkollës austriake “Peter Mahringer” në Shkodër. Dietmar Reiner, Drejtor Menaxhues i kompanisë Energji Ashta dhe Gerlinde Tagini, drejtoresha e shkollës austriake, nënshkruan sot një marrëveshje bazuar në të cilën Energji Ashta angazhohet të paguajë bursën vjetore për dy nxënës të shkollës austriake. Përzgjedhja e nxënësve që do të përfitojnë bursat do të bëhet nga vetë shkolla bazuar në rezultatet akademike dhe/apo nevojës për ndihmë ekonomike.

Marrëveshja parashikon që nxënësit që përfitojnë nga bursa do të ftohen të vizitojnë mjediset e hidrocentralit të Ashtës një herë në vit në mënyrë që të mësojnë rreth punës së një hidrocentrali, çka përputhet po ashtu me profilin teknik të shkollës austriake. Energji Ashta do të sponsorizojë më tej aktivitete edukuese të shkollës “Peter Mahringer” sipas rastit të paraqitur si edhe programe trajnimi veror (stazh).

Mbështetja që po i bëhet kësaj shkolle vlen sidomos për nxënësit më rezultate me të mira të cilët mund edhe të gjejnë punësim pranë HEC-it të Ashtës. Për kompaninë ky është një investim afatgjatë bazuar në një strategji zhvillimi për një të ardhme të qëndrueshme. Në vitin 2011 Energji Ashta ka mbështetur financiarisht dy nxënës me rezultate të shkëlqyera nga e njëjta shkollë, të cilëve u akordoi nga 720 Euro për një vit shkollor secilit.

energjia.al 20.05.2014

Nxënës të shkollave 9 vjeçare në qytetin e Tiranës po sensibilizohen nga Milieukontakt Shqipëri, pjesë e rrjetit ECIM, mbi rëndësinë e efiçencës së energjisë. Përgjatë muajit maj Milieukontakt Shqipëri zhvilloi disa orë mësimi në klasat 4-5-8-9 në shkollat 9 vjeçare “4 Dëshmorët” dhe “Androkli Kostallari”. Fokusi kryesor gjatë këtyre orëve ishte informimi dhe ndërgjegjësimi i brezit të ri mbi rëndësinë e kursimit të energjisë në shkolla, shtëpi dhe në ambjentet ku jetojmë. Rreth 150 nxënës nga të dy shkollat u trajnuan në lidhje me masat që duhen marr mbi kursimin e energjisë dhe përdorimin sa më efiçent të saj. Materiali i përgatitur ishte i pasur me grafika dhe filma të shkurtër duke e bërë më interesante dhe interaktive bashkëbisedimin me nxënësit. Nxënësit treguan një interesim mjaft të madh, ku nuk munguan edhe pyetjet apo diskutimet mbi produktet e reja efiçente, që janë bërë pjesë e tregut Shqiptar së fundmi siç janë llambat LED, pajisjet elektroshtëpiake “energy star” dhe panelet diellore. Ato më të rriturit shfaqën dëshirën për tu përfshirë si vullnetarë në aktivitete të ndryshme ndërgjegjësuese të organizatës.

Përveç orëve mësimore që u zhvilluan, Milieukontakt do të punojë së bashku me një grup nxënësish nën kujdesin e një eksperti energjie për të hartuar një raport auditimi energjie për secilën nga shkollat. Në përfundim nxënësit do të dalin me rekomandime e masa qe duhen marr për të përmirësuar sistemin energjisë në ambjentet e shkollës.

Përmes këtij procesi nxënësit do të mësojnë se si bëhet auditimi i një ndërtese, por do të ndajnë dhe me prindërit e tyre mësime e vërejtje të vlefshme. Raporti do ti vihet në dispozicion drejtorisë së shkollës e cila mund të marr masa të mëtejshme për përmirësimin e problematikave që do të adresohen ne raport.

Aktvitetet janë mundësuar në kuadër të programit SENiOR-A.

Ekolëvizja, 16.05.2014