info@energjia.al

Sot shënohet përvjetori i parë i fillimit të ndërtimit të Gazsjellësit Trans Adriatik (TAP), një nga projektet më të mëdha dhe strategjike të infrastrukturës energjetike (gaz natyror) në Evropë, veprimtaritë në secilin nga tre vendet pritëse po zbatohen brenda afateve dhe brenda buxhetit.

Janë arritur shumë gjëra gjatë dymbëdhjetë muajve të fundit. Që nga fillimi i majit të vitit 2016:

“Për sa i përket historikut të sigurisë teknike në kantier, projekti ka nivelet më të larta botërore, ku shpeshtia e humbjes së kohës qëndron shumë më poshtë normave ndërkombëtare.

Kontraktorët e TAP-it kanë pastruar dhe sistemuar afërsisht 49% të gjurmës së projektit në Greqi dhe Shqipëri (371 km nga 765 km). Gjithashtu, 22.6% e tubave të salduara janë futur tashmë në tokë dhe janë mbuluar.

Në Itali, puna po vijon me grupin e parë të pemëve të ullirit që janë magazinuar përkohësisht në mënyrë që më vonë gjatë këtij vitit të nisë ndërtimi i mikro tunelit prej 1,5 km.

Rreth 68.5% e totalit prej 55.000 tubash, që do të përdoren për ndërtimin e tubacionit kanë mbërritur në Greqi, Shqipëri dhe Itali.

Më shumë se 5.200 persona kanë punuar për projektin në vendet pritëse të TAP-it, ku më shumë se 85% e tyre janë staf vendor.

TAP-i ka zbatuar një gamë të gjerë programesh për investime sociale dhe mjedisore (SEI) në komunitetet përgjatë gjurmës së tij. 70 projekte të tjera me një vlerë të përgjithshme prej rreth 15 milionë Euro do të prezantohen gjatë muajve në vijim. Gjithsej, TAP-i do të investojë më shumë se 55 milionë Euro në Greqi, Shqipëri dhe Itali në investime sociale dhe mjedisore”.

Drejtori i Përgjithshëm i TAP-it, Ian Bradshaw tha: “Jemi të kënaqur me performancën tonë. Për sa i përket ecurisë së përgjithshme të projektit, kemi përfunduar rreth 41% të tij, përfshirë këtu pjesën e inxhinierisë, prokurimit dhe ndërtimit. Jemi në rrugën e duhur për të shpërndarë sasitë e para të gazit nga Shah Deniz II në vitin 2020, duke u bërë kështu pjesë aktive e rrjetit energjetik evropian, duke furnizuar banesat dhe bizneset me energji më konkurruese dhe të sigurt. Jam me të vërtetë i kënaqur që sot rreth 173 km nga tubacioni i salduar, afërsisht 21 herë sa gjatësia e projektit tonë në Itali, janë mbuluar tashmë nëntokë në Greqi dhe Itali. TAP-i mbetet plotësisht i përkushtuar që të kthejë tokën në gjendjen fillestare, ose ta përmirësojë atë. Një projekt i kësaj shkalle dhe përmase do të përballet me sfida të përditshme, megjithatë, ne jemi në pozicionin e duhur për t’i trajtuar dhe administruar ato, duke punuar ngushtësisht me ekipet tona, me rrjetin tonë të furnizimit dhe bashkërisht me komunitetet”, shtoi Bradshaw.

TAP ka një program po kaq ambicioz të planifikuar për dymbëdhjetë muajt e ardhshëm. Vitin tjetër, në këtë kohë, TAP-i planifikon të përfundojë pastrimin dhe nivelimin e të gjithë gjurmës në Greqi dhe Shqipëri dhe të ketë futur në tokë (të ketë mbuluar) rreth 67% të tubave të salduar.

Rreth Gazsjellësit Trans Adriatik (TAP)

TAP-i do të transportojë gaz natyror nga fusha gjigante e Shah Denizit II, Azerbajxhan, në Evropë. Tubacioni, i gjatë 878 km, do të lidhet me Gazsjellësin Trans Anatolian (TANAP), në kufirin turko-grek në Kipoi, do të kalojë përmes Greqisë, Shqipërisë dhe detit Adriatik, përpara se të mbërrijë në brigjet e Italisë së Jugut.

Rruga që përshkon TAP-i mund të përmirësojë furnizimin me gaz të disa vendeve të Evropës Juglindore përfshirë Bullgarinë, Shqipërinë, Bosnjën dhe Hercegovinën, Malin e Zi, Kroacinë dhe vende të tjera. Dalja në tokë e TAP-it, në Itali, ofron mundësi të shumta për transportimin e mëtejshëm të gazit natyror të Kaspikut në disa prej tregjeve më të mëdha evropiane, si në Gjermani, Francë, Britani e Madhe, Zvicër dhe Austri.

TAP-i do të nxisë zhvillimin ekonomik dhe krijimin e vendeve të punës, gjatë gjithë gjurmës së gazsjellësit. Ai do të jetë një burim i madh investimesh të huaja direkte dhe nuk varet nga grante, apo subvencione. Pas fillimit të tregtimit të gazit në Gjeorgji dhe Turqi, synuar të nisë në fund të vitit 2018, sasia e parë e gazit do të mbërrijë në Evropë përafërsisht në fillim të vitit 2020.

Aksionarë të TAP-it janë: BP (20%), SOCAR (20%), Snam S.p.A. (20%), Fluxys (19%), Enagás (16%) dhe Axpo (5%).

Scan Tv,  17.05.2017

Një vit nga nisja, ndërtimi i gazsjellësit Trans Adriatic Pipeline (TAP), projekti më i madh infrastrukturor energjetik (gazi natyror) vlerësohet se po ecën sipas të gjitha parashikimeve.

Sipas deklaratave të bëra nga konsorciumi, projekti ka shënuar nivele të humbura kohore të frekuencave nën normat ndërkombëtare.

Rreth 49% e gjurmës që projekti do të ndjekë në Shqipëri dhe Greqi është pastruar (371 km nga 765 km). Rreth 22.6% e tubave janë tashmë të vendosur nën tokë.

Në Itali, puna vazhdon me grumbullimin e parë të pemëve të ullirit të magazinuara përkohësisht. Ndërtimi i mikro-tunelit prej 1,5 km mund të fillojë më vonë gjatë vitit.
Rreth 68.5% ose 55,000 tuba janë shpërndarë në Greqi, Shqipëri dhe Itali.
Më shumë se 5,200 njerëz po punojnë për projektin në të gjitha vendet pritëse të TAP-it. Mbi 85% e tyre janë punësime lokale.

Gjatë këtij viti TAP zbatoi një sërë projektesh me natyrë sociale. Janë rreth 70 projekte të tilla me një vlerë totale investimi prej rreth 15 milionë euro do të zbatohen në muajt e ardhshëm. Në total, TAP do të investojë mbi 55 milionë euro në projektet sociale në Greqi, Shqipëri dhe Itali.
Drejtori Menaxhues i TAP Ian Bradshaw tha se: “Ne jemi të kënaqur me punën tonë të deritanishme. Projekti ka pasur ecuri pozitive dhe mund të themi se afërsisht 41% e tij është realizuar duke përfshirë këtu aspektin inxhinierik, të prokurimit dhe ndërtimit. Ne jemi në rrugën e duhur për të ofruar sasinë e parë të gazit nga fushat e Shah Deniz II në vitin 2020, duke u bërë pjesë aktive e rrjetit europian të energjisë. Kjo do të mundësojë energji më konkurruese dhe më të sigurt për të gjithë rajonin.

Një vit nga nisja e punës për ndërtimin e gazsjellësit janë rreth 173 km tuba çeliku të salduara, rreth 21 herë sa gjatësia e projektit në Itali. Ato janë vendosur në Greqi dhe Shqipëri. TAP është i angazhuar për të bërë të mundur që toka të kthehet në gjendjen e saj origjinale. Një projekt i këtyre përmasave do të ballafaqohet me sfida të përditshme, megjithatë, ne sigurohemi që t’i adresojmë ato duke punuar ngushtë me ekipet, rrjetin e furnizimit, si dhe me komunitetet “, shtoi Bradshaw.
TAP parashikon që pas rreth një viti të ketë përfunduar pastrimin dhe klasifikimin e rrugës përgjatë Greqisë dhe Shqipërisë dhe të jenë vendosur në tokë rreth 67% e tubave të salduar.

Revista Monitor,  17.05.2017

Prej 4 ditësh një ekip i përbërë nga 30 shkencëtarë nga Austria, Gjermania, Sllovenia dhe Shqipëria, po kryejnë studime shkencore në Lumin e Vjosës të parë efektet që pritet te ketë ndërtimi i hidrocentralit të Pocemit.

Në një konferencë të mbajtur dje në fshatin Kutë, ata prezantuan rezultatet e para ku janë identifikuar 20 lloje të ndryshme të peshqve për vetëm dy ditë.

Profesori Fritz Schiemer nga Universiteti I Vjenes, teksa foli për vlerat e lumit të Vjosës, bëri thirrje për të ndaluar ndërtimin e hidroicentralit.

“Gjatë një jave do të studiojmë ekosistemin unik të Vjosës. Nëse HEC-i do të ndërtohet këtu, të gjithë dalim të humbur. Para se të ndërtohet një HEC duhet të bëhen studime të ndikimit në mjedis. Këtu dëmet ekologjike do të ishin të mëdha jo vetëm për sa i përket përmbytjes që do shkaktonte humbjen e florës dhe faunës në zonë, por do të ulte dhe nivelin e ujrave nëntokësor”, tha Fritz Schiemer.

Ndersa Besiana Guri, nga organizanta mjedisore Eko Albania, tha se shkencëtarë nga e gjithë bota kanë firmosur një memorandum që ndalon
ndërtimin e HEC-eve në Vjosë për 3 vjet.

“Në lumin e Vjosës është një kërkesë që është firmosur nga 228 shkencëtarë nga e gjithë bota, të cilët kanë kërkuar që të paktën për 3 vjet në lumin e Vjosës të mos ndërtohet asnjë hidrocentral për sa kohë që nuk ka studime të mirëfillta që tregojnë ndikimet që duhet të kishte ndërtimi i Hec-eve në këtë lumë”,tha Guri.

Kërkimet e shkenctarëve janë shkrirë në 5 km gjatesi dhe 2 km gjeresi ne afërsi te fshatit Kutë, i cili sipas tyre mund të permbytet nga rezervuari I digës nëse heci I Pocemit do të ndërtohet.

Shqiptarja.com  28.04.2017

Fillimi i punimeve për seksionin detar të gazsjellësit Trans-Adriatik do të fillojë vitin e ardhshëm, deklaron kompania “Saipem”, përgjegjëse për punimet e seksionit nënujor. “Saipem” deri më tani nuk është përfshirë në asnjë fazë të punimeve.

Seksioni nënujor në shtratin e detit Adriatik që do të lidhë Shqipërinë me rajonin e Puglias në Itali, do të jetë i gjatë 105 kilometra dhe në thellësinë më të madhe do të prekë 820 metra.

Aktiviteti i Saipem do të fillojë kur zona e mikro-tunelit të jetë e gatshme dhe në jemi të interesuar që kjo zonë të jetë e gatshme në mënyrë që të organizojmë operacionet. Po e ndjekim projektin me kujdes të veçantë“, deklaroi një burim pranë kompanisë.

Kompania është përgjegjëse për projektimin inxhinierik, prokurimin, ndërtimin dhe instalimin e gazsjellësit në seksionin nënujor, që do të jetë edhe faza përfundimtare  e gazsjellësit.

Në pjesën tjetër, atë tokësore, punimet po ecin me ritme të shpejta, dhe në Shqipëri e Greqi është mbyllur faza e parë për gjysmën e projektit, ndërkohë që në Itali janë zhbllokuar punimet për pjesën prej 8 kilometrash.

Scan Tv,  26.04.2017

Ministri i Energjetikës dhe Industrisë, Damian Gjiknuri, kryetari i Bashkisë së Tiranës, Erion Veliaj dhe ambasadorja e Gjermanisë në Tiranë, Susanne Schütz përuruan sot fillimin e punimeve për rindërtimin, sipas parimit të efiçiencës energjitike të godinave të Qytetit Studenti nr. 2, në kuadër të projektit për rehabilitimin e konvikteve ku Bashkia e Tiranës është përfituese direkte.

Projekti synon përmirësimin e kushteve të jetesës për rreth 600 studentë, nëpërmjet rinovimit të ndërtesave me një sistem më të mirë ngrohjeje dhe insulimi, si dhe rinovimit të strukturës së brendshme të ndërtesave për të rritur cilësinë e jetesës si dhe mundësite e ngrohjes për studentët. Kështu, studentët e shkollës së inxhinierisë dhe fakulteteve të tjera që jetojnë në Qytetin Studenti Nr.2, pranë “21 Dhjetorit”, do të kenë shumë shpejt mjedise tërësisht të rikonstruktura dhe me standarde që garantojnë ngrohje me efiçencë energjitike.

Kryebashkiaku i Tiranës, Erion Veliaj falenderoi qeverinë gjermane për kontributin e dhënë dhe theksoi se ky investim do të ofrojë për të gjithë studentët, kryesisht ata të inxhinierisë, por edhe të fakulteteve të tjera që jetojnë në këto konvikte, kushte më të mira e me standarde. “Bashkojmë energjitë që të kemi kushte më të mira në konvikte për 600 studentë të Tiranës. Është fatkeqësi të mendosh se kemi sot disa burgje që janë të standardeve evropiane, ndërkohë që kemi disa hapësira në qytetin e  studentëve ku, në fakt, konviktet i ngjajnë më shumë burgjeve të vjetra. Më vjen mirë që për 600 prindër, që i kanë çuar fëmijët e tyre të shkollohen në Tiranë, duke e parë Tiranën si vendin e mundësive, edhe konvikti që është në fakt shtëpia e tyre e dytë, të jetë sot në kushte të mira”, tha Veliaj.

Ai u shpreh se përmes këtij projekti bëhet e mundur përdorimi më efiçent i energjisë elektrike, duke ulur ndjeshëm kostot që duhet të paguajë Bashkia për ngrohje. “Deri para një vit e gjysmë, Bashkia e Tiranës hynte tek debitorët kryesorë të energjisë dhe besoj se për publikun nuk shkon kur ai e paguan energjinë elektrike, kurse vetë Bashkia ishte debitore. Kjo do të thotë se ashtu si publiku, edhe pushteti vendor është emancipuar; pra, jo vetëm duhet ta paguajë energjinë, por të gjejë mënyra alternative se si ta reduktojë faturën. Unë besoj se ky projekt i kënaq të gjitha këto interesa; edhe interesin për të pasur çmime të përballueshme në minimum për studentët që vijnë nga rrethet në Tiranë, por sigurisht edhe për të ulur faturën e energjisë Bashkisë së Tiranës me 20%, para të cilat mund të shkojnë për investime të tjera në të ardhmen”, shtoi Veliaj.

Kryetari i Bashkisë së Tiranës tha se Plani i Përgjithshëm Vendor parashikon që të gjitha ndërtimet e reja që do bëhen në Tiranë të jenë të pajisura me sistemin e efiçencës së energjisë. “Është një plan urbanistik, i cili ka vendosur për herë të parë edhe çështjen e efiçencës energjetike në të gjitha lejet e reja që do të jepen në Tiranë. Kjo do të thotë se nga tahmaja e viteve ’90, ku njerëzit ndërtonin pa limit, pa menduar si do ngrohemi, pa menduar se si do funksiononte lagështira, por vetëm për të siguruar nevojën bazë të hapësirës, besoj që sot, jo vetëm investitorët, por edhe çdo qytetar që bën një rregullim të shtëpisë, e ka si kusht që për të marrë leje do t’i duhet të bëjë të gjitha këto rregullime për të pasur ndërtesa me efiçencë energjetike”, u shpreh Veliaj. Më tej, ai theksoi se Bashkia e Tiranës ka parashikuar që edhe 20 shkollat e reja që ka nisur të ndërtojë, të jenë të pajisura edhe me sistemin e efiçencës së energjisë, duke ofruar ambiente më të ngrohta dhe që kërkojnë më pak shpenzime për energjinë elektrike.

Ministri i Energjisë dhe Industrisë, Damin Gjiknuri vlerësoi se ky është një investim që ofron jo vetëm mundësi dhe kushte më të mira për studentët, por edhe që bën të mundur që brenda një kohe shumë të shkurtër, me anë të kursimit të energjisë, të shlyejë veten e vet. “Rikonstruksion sipas parimit të efiçiencës energjitike, që do të thotë kursim deri në 20% të faturës së energjisë dhe një investim, i cili e lan veten në 8 vjet, por mbi të gjitha, kushte mjaft të mira për studentët. Këtë model që po ndërtojmë duam ta shtrijmë në të gjitha godinat publike të Shqipërisë. Pra, parimi i efiçiencës së energjisë të jetë një parim udhëheqës për rikonstruksionin apo edhe ndërtimet në të ardhmen, në mënyrë që të kursejmë energji. Këtu po aplikojmë për herë të parë disa teknologji të reja të energjisë së rinovueshme, që do të shërbejnë për ngrohjen dhe për shërbimet e tjera të kësaj godine”, u shpreh ministri Gjiknuri.

Ambasadorja gjermane, Susanne Schütz theksoi se Qeveria Federale ka vënë në dispozicion 15,5 milionë euro për të gjithë projektin; nga të cilët 9 milionë euro do të përdoren për rikonstrukionin energjitik të katër konvikteve, duke përmirësuar ndjeshëm izolimin termik dhe duke rinovuar impiantet e ngrohjes. “Gjermania dhe Shqipëria investojnë kësisoj shumëfish në të ardhmen e këtij vendi: Ne përmirësojmë kushtet e jetesës dhe para së gjithash kushtet e mësimit të studentëve. Njëkohësisht ne angazhohemi në favor të  mbrojtjes së mjedisit dhe klimës, duke penguar humbjet në ngrohje përmes dritareve të pa izoluara mirë, çka bën që  impiantet e vjetra të ngrohjes të konsumojnë më shumë lëndë djegëse fosile se sa e kanë të nevojshme”, deklaroi ambasadorja Schütz.

Projekti parashikon termoizolimin dhe sistemin kapot për sipërfaqet e jashtme dhe vendosjen e dyerve dhe dritareve të cilësisë më të lartë, duke synuar garantimin një ngrohje me më pak kosto përmes reduktimit në maksimum të shpërdorimit të energjisë. Kompleksi i Qytetit Studenti Nr. 2 që po rikosntruksohet përbëhet nga katër ndërtesa 6 katëshe. Ndërhyrja do të ruajë strukturën  ekzistuese dhe do të riorganizojë ndarjen në dhoma. Gjithashtu, në çdo kat janë shtuar  një kuzhinë, një hapësirë ngrënie dhe llozhë e përbashkët. Për herë të parë, do të instalohet një ashensor, si dhe do të vendosen dy shkallë të jashtme duke siguruar dalje emergjente.

energjia.al  26.04.2017

Flet Guillaume Batut, menaxher projekti i Spiecapag në Shqipëri

Me disa përjashtime që do të ndërtohen vitin e ardhshëm, i gjithë segment i gazsjellësit TAP midis Fierit dhe Beratit ka përfunduar, ndërsa aktiviteti kryesor i ndërtimit është përqendruar tani në zonën e Devollit, Maliqit dhe Korçës. Pas përfundimit të kësaj faze, do të nisë ndërtimi në zonat e vështira malore, ku është edhe pjesa më sfiduese.
Guillaume Batut, menaxher projekti i Spiecapag në Shqipëri, – kompanisë që fitoi të drejtën për të qenë kontraktor i projektit TAP për të ndërtuar segmentin tokësor të gazsjellësit në Shqipëri, 215 km- në një intervistë për Monitor flet lidhur me ecurinë e projektit të gazsjellësit.

Gati një vit më parë, kompania Spiecapag fitoi të drejtën për të qenë kontraktor i projektit TAP për të ndërtuar segmentin tokësor të gazsjellësit në Shqipëri, 215 km. Cila është rëndësia e kësaj kontrate për Spiecapag dhe cili është progresi aktual i punimeve?

Spiecapag ka mbi 90 vjet përvojë në ndërtimin e tubacioneve dhe objekteve përçuese në të gjithë botën. Kompania Spiecapag ka ndërtuar mbi 50,000 km tubacione në mbi 60 vende. TAP është një projekt i rëndësishëm i infrastrukturës së naftës gazit. Ndërtimi i tubacioneve në terrene të vështira, me profile sfiduese dhe me afate të përcaktuara, janë fusha të ekspertizës së Spiecapag. Ne synojmë që emri ynë të lidhet me projekte prestigjioze dhe TAP është një nga ato mundësi që nuk duhej humbur.
Sot, pothuajse i gjithë projekti inxhinierik ka përfunduar, ndërsa ka nisur procesi i prokurimit. Ne jemi ende duke adresuar disa rregullime për shkak të disa ndryshimeve në kushte, por ato nuk do të ndikojnë në aftësinë tonë për të vazhduar me ndërtimin.
Aktualisht punimet paraprake, duke përfshirë përgatitjen për magazinimin e tubave, platforma e kampit, si dhe një pjesë e mirëmbajtjes së rrugëve ka përfunduar në masën 30%, në përputhje me nevojat e ndërtimit të tubacionit.
Për ndërtimin e tubacionit, ne jemi mobilizuar plotësisht dhe aktualisht kemi arritur të realizojmë 15% të punimeve të ndërtimit.
Me disa përjashtime që do të ndërtohen vitin e ardhshëm, i gjithë segmenti midis Fierit dhe Beratit ka përfunduar, ndërsa aktiviteti kryesor i ndërtimit është përqendruar tani në zonën e Devollit, Maliqit dhe Korçës. Pas përfundimit të kësaj faze, ne do të nisim me ndërtimin në zonat e vështira malore, ku është edhe pjesa më sfiduese.

A kanë arritur kontraktorët/nënkontraktorët lokalë të angazhuar në ndërtimin e tubacionit ose objekte të tjera të përmbushin pritshmëritë tuaja? A zbatojnë ata standardet e kërkuara ndërkombëtare? Cilat janë kompanitë më të mëdha shqiptare që janë të kontraktuara nga Spiecapag?

Ne kemi pritshmëri të lartë për standardet QHSE që ua kërkojmë edhe nënkontraktuesve tanë t’i përmbushin. Çdo herë që ne angazhojmë një nënkontraktor, i japim mbështetje dhe trajnime të rëndësishme, duke i integruar në ekipin tonë sa më shumë që të jetë e mundur. Kompanitë me të cilat kemi punuar janë të përgjegjshme, tregojnë vullnet për t’u angazhuar, si dhe qasje pozitive. Ndërsa lista e kompanive shqiptare me të cilat ne punojmë është e gjatë, ku mund të përmendim: Salillari, Albstar, Emante, Sterkaj, Diamant, Nazzeri, etj.

Sa punonjës janë të punësuar nga Spiecapag? Sa prej tyre janë shqiptarë dhe se si do ta vlerësonit performancën e tyre?

Aktualisht, ne kemi të punësuar direkt rreth 700 punëtorë shqiptarë. Nënkontraktuesit tanë gjithashtu kanë të punësuar përafërsisht të njëjtën shifër.
Ne kemi konstatuar se punëtorët shqiptarë janë të përkushtuar dhe punojnë fort, janë mendjehapur ndaj qasjeve që mund të mos jenë të zakonshme për ta, duke përfshirë standardet e shëndetit dhe sigurisë. Ne ofrojmë trajnime në klasa, por edhe në terrenin e punës për të rritur aftësitë dhe kualifikimin e punëtorëve shqiptarë. Kjo do t’i ndihmojë ata që standardet t’i zbatojnë edhe në të ardhmen në përvoja të tjera.

Cilat janë problemet kryesore me të cilat Spiecapag është ndeshur në Shqipëri?

Ne po përballemi me disa kushte të vështira gjeologjike, gjeoteknike, por edhe aksesi në Shqipëri. Kemi shpenzuar kohë dhe përpjekje për të siguruar një rrugë finale të tubacionit, për ta ndërtuar në mënyrë të sigurt dhe për t’i garantuar jetëgjatësi tubacionit. Nga mesi i vitit 2017, ne do të përfundojmë ndërtimin në zonat e ulëta dhe fushore e më pas do të nisim me ato malore. Për ne, sfida jonë më e madhe është të arrijmë të instalojmë të sigurt tuba me diametër 48″, në një terren të pjerrët dhe shkëmbor.

Qeveria shqiptare ka paraqitur planin e saj ambicioz të gazifikimit, a shikoni ju mundësi për t’u përfshirë në projekte të tjera në Shqipëri?

Çdo gazsjellës është një mundësi për ne. Në këto kushte, edhe plani i gazifikimit të Shqipërisë është padyshim një mundësi për ne. Ne besojmë se përvoja jonë gjatë punës në Shqipëri mund të jetë një mbështetje e rëndësishme për këtë projekt.

A besoni se Spiecapag do të lërë një trashëgimi në Shqipëri?

Të gjithë punëtorët, të cilët punojnë me ne, po trajnohen si me kurse, ashtu edhe në terren. Pjesë e trashëgimisë është edhe ajo çfarë kanë arritur këta punëtorë me njohuritë dhe aftësimin e tyre, të cilët do të jenë në gjendje të mbështetin në të ardhmen zhvillimin e Shqipërisë. Nga ana tjetër, si pjesë e objektivave tona, duhet të theksojmë edhe faktin se ne kemi 78 km rrugë për të ndërtuar dhe për të mirëmbajtur. Por, trashëgimia më e madhe dhe më kryesore është vetë gazsjellësi që do të jetë pjesë e infrastrukturës kryesore të Shqipërisë.

Revista Monitor,  22.04.2017

Zëvendëspresidentja e Parlamentit Europian, Ulrike Lunacek, një adhuruese e natyrës shqiptare është nga lobueset me të forta kundër ndërtimit të hidrocentraleve në lumin e Vjosës. “Lumi i Vjosës është i vetmi ne Europë, që është ne rrjedhje të lire”, ka pohuar ajo gjatë një takimi me gazetarë nga Shqipëria në Parlamentin Europian në Bruksel.

Është e vërtetë që Shqipëria ka nevojë për energji, thotë ajo, por jo në këtë lumë.
Në këtë zonë, sugjeron ajo, Shqipëria mund të bejë investime në ekoturizëm.
Lunacek thotë se ajo ia ka shprehur dhe kryeministrit shqiptar mendimin e saj, por gjithsesi shton se në Shqipëri tani e gjithë vëmendja është e përqendruar te zgjedhjet.
Lunacek, që ka vizituar kanionet e Vjosës, pohon se nuk ka një studim të qartë për të evidentuar se çfarë flore dhe faune ka në atë zonë.

“Para çdo projekti është shume e rëndësishme të bëhet vlerësimi mjedisor”.
Ajo shprehet skeptike nëse vlerësimi që po bëhet nga firma turke është në linjë me standardet europiane të energjisë, një element që është shumë i rëndësishëm.
Po të bllokohet uji, flora nuk do te mbijetojë, ndërsa nuk dihen as pasojat e përmbytjeve të banorët, duhen bërë seanca dëgjimore me ta.
“Ndërtoni HE-e të tjera, por ju lutem lëreni Vjosën”, është mesazhi final i zëvendës presidentes së Parlamentit Europian.

Projektet e mëdha mbi Vjosë

Deri më tani qeveria shqiptare ka dhënë lejen për të ndërtuar një hidrocentral në Lumin e Vjosës ai i Poçemit.

Tenderi i zhvilluar në mars të vitit 2016 ka shpallur fituese për ndërtimin e këtij HEC-i kompaninë turke Çinar-San Hafriyat Nakliyat inşaat Turizm Sanayi Ve Ticaret Limited Şirketi.

Sipas marrëveshjes koncesionare, kompania turke do të investojë rreth 100 milionë euro për hidrocentralin e Poçemit. Koha e ndërtimit është parashikuar 3 vite, ndërsa sasia e prodhimit do të jetë 95 MW kilovat/orë energji në vit. Poçemi do të bëhet hidrocentrali i dytë më i madh i dhënë me koncesion për nga niveli i prodhimit, pas projektit të kaskadës së Devollit.

HEC-i Poëemit është i dyti në rrjedhën kryesore të Lumit pas atij të Kalivaçit që ka dështuar të ndërtohet deri më tani për shkak të problemeve që ka kaluar kompania e kontraktuar për ndërtimin e tij.

Studimi i studios franceze Sogreah e cila analizon skemat e mundshme të shfrytëzimit të potencialit ujor të lumit Vjosa, të cilin qeveria shqiptare ka si referencë parashikon ndërtimin e 25 hidrocentraleve në Lumin Vjosë.

Monitor zotëron të plotë studimin prej 140 fq. të studios “Soegrah”, me titull ” Consultants’ services for assessment of Power generation potential of selected Albanian rivers“.

Kapaciteti i instaluar i propozuar,sipas Sogreah për lumin Vjosa është 458 MW dhe prodhimi i energjisë parashikohet të 1810 GWh, duke përfshirë edhe Kalivaçin. Këto shifra janë të përafërta me studimet e deritanishme që shohin një kapacitet prodhimi prej 498 MW në Vjosë.

Ndër 25 HEC-e projektuara në Vjosë më të mëdhatë janë ai i Kaludhit, Dragotit, Kalivaçit, Pocemi dhe Karbonarit.

Lumi Vjosa rrjedh në jug të Shqipërisë. Gjatësia e saj është 272 km nga të cilat 80 km janë në Greqi. Ujëmbledhësi i saj është rreth 6704 km2 nga të cilat 4365 km2 në territorin e Shqipërisë Lartësia mesatare e pellgut parashikohet 855 metër. Burimi i Vjosës është malet e Pindit në Greqi.

Lumi hyn në Shqipëri në Perat. Në Shqipëri deri në Urën e Dragotit lumi rrjedh nëpër një luginë relativisht të ngushtë me përjashtim të disa pjesëve të vogla të gjera me tarraca të ulëta të vendosura në të dy anët e lumit. Midis Këlcyrës dhe Dragotit lumi rrjedh nëpër grykën Këlcyrë.

Pas Selenicës brigjet e lumit janë më të buta dhe të më të ulëta. Vjosa derdhet në detin Adriatik në afërsi të fshatit Poro në veri të lagunës së e Nartës.

Nëse projektet e HEC-ve vihen në zbatim popullsia që rrezikon evakuimin është rreth 35 000 persona.

Ndërtimi i HEC-ve në Vjosë ka hapur prej citesh një debat të madhe ndër ambientalistë, të cilët e kanë konsideruar një dëm të madh që i bëhet biodiversitetit.

Vitin e kaluar rreth 50 profesorë dhe studiues nënshkruan një kërkesë drejtuar Ministrisë së Mjedisit në Shqipëri për zbatimin e një moratoriumi 3-vjeçar mbi ndërtimet në lumin Vjosë dhe degët e saj

Më herët gjatë zgjedhjeve vendore të vitit 2015 Kryeministri Edi Rama kishte premtuar edhe njëherë se do të ndalonte ndërtimin e HEC-ve mbi lumin më unik të Europës. Por premtimi nuk është mbajtur teksa kompania turke ka nisur procedurat për ndërtimin e objektit.

Revista Monitor,  12.04.2017

Ministria e Energjisë dhe Industrisë njoftoi se ka shpallur një ofertë fituese për ndërtimin e hidrocenteralit të “Gurit të Bardhë”. Bëhet fjalë për një koncesion të formës BOT (Ndërtim, operim dhe Transferim) me një afat kontrate 35 vjet.

Sipas njoftimit të bërë në buletinin e Agjencisë së Prokurimit Publik pjesëmarrëse në garë ishin dy ofertues Alko-Impex General Construction” degë e një shoqërie të huaj që është skualifikuar për mungesë dokumentacioni dhe Bashkimi i Përkohshëm i Shoqërive “Sina 98” sh.p.k., “Besland” sh.p.k. dhe “Albmerkuri” sh.p.k të shpallur fitues.

Hidrocentrali pritet që të ndërtohet në pellgun ujëmbledhës të përrenjve të Zallit te Dishit dhe të Shehut. Fuqia e instaluar parashikohet të jetë 8805 kW, koha e zbatimit të kontratës 24 muaj dhe vlera e investimit pa përfshirë TVSH 5.8 milionë euro.

Ky është një ndër hidrocentralet e fundit të dhëna nga kjo Ministri që i shtohen listës së 525 të tjerëve që janë dhënë ndër vite. Një praktikë që po ndiqet së fundmi është ai i hidrocentraleve deri në 2MW që nuk konsiderohen si koncesione tipike.

Scan Tv,  28.03.2017

Dy investime në formën e HEC-eve të vogla mbi lumin Erzen janë lajmëruar nga kompania StarTek.

Kompania ka aplikuar zyrtarisht në Ministrinë e Industrisë dhe Energjetikës për ndërtimin e dy HEC-ve me fuqi të instaluar 2-MW në lumin Erzen që është edhe nga destinacionet me joshëse turistike në territorin e kryeqytetit.

HEC-et “Domja” dhe “Selba” pritet të ndërtohen sapo Ministri i Energjisë të japë miratimin. Kompania që do të zhvillojë këto projekte ka përvojë në fushën e ndërtimit nëpërmjet projekteve të vilave në Rolling Hills dhe në Gjirin e Lalëzit.

Kompanitë e ndërtimit vitet e fundit kanë vërshuar të diversifikojnë portofolin nëpër investimeve në HEC-e pasi sektorin në të cilin operonin prej vitesh u maturua.

Agjencia Kombëtare e Burimeve Natyrore (AKBN) ka bërë me dije se në vitin 2016 janë trajtuar 82 kërkesa për ndërtimin e objekteve të reja të prodhimit të energjisë nëpërmjet HEC-eve.

Aktualisht, pranë Drejtorisë Hidroenergjetike, janë 185 Kontrata Koncesionare (formës BOT, ROT, BOO) të nënshkruara ndërmjet Autoritetit Kontraktor (Ministrisë së Energjisë dhe Industrisë) dhe Shoqërive Koncesionare vendase apo të huaja, për ndërtimin e 525 hidrocentraleve të tipit me derivacion, me digë apo dhe të kombinuara. Nga këto HEC-e, sipas AKBN, 117 janë në prodhim dhe 43 në ndërtim, të tjerat janë në fazën e ndjekjes së procedurës së lejeve.

Gjatë monitorimeve janë vënë re vonesa të dokumentacionit dhe mosrespektim i afatit nga subjektet koncesionare dhe studiot e projektimit. AKBN vlerëson si problematike mungesën e një software për të mundësuar krijimin e një baze të dhënash hartografike mbi vendndodhjen e të gjitha HEC-eve në Shqipëri.

Me ndryshimet ligjore që janë bërë gjatë vitit 2015, investimet e reja në HEC-et 2MW bëhen me miratimin e Ministrit të Energjisë, pa pasur nevojë të kalojnë për miratim në Këshillin e Ministrave siç ka qenë praktika e mëparshme.

Megjithë ndikimin negativ në mjedis kërkesat për ndërtimin e HEC-ve të vogla kane qenë më rritje si edhe punimet në terren. Këto investime shpesh janë bërë duke krijuar dëme në bujqësi dhe zonat e Mbrojtura siç është rasti i Valbonës.

Revista Monitor,  28.03.2017

Qeveria i ka hapur dritën jeshile ndërtimit të një centrali të prodhimit të energjisë nga era nga një kompani shqiptare në fshatrat e Tepelenës.

Bëhet fjalë për një investim prej rreth 13 milionë euro, krejtësisht privat dhe kompania ka rreth 5 vite që ka nisur studimin e fizibilitetit, atë teknik dhe ka marrë autorizimet për lidhjen me rrjetin e OST-së. Po ashtu ajo ka marrë të drejtat e pronësisë mbi vendet ku do të ngrihen kullat e centraleve të erës.

Kullat do të jenë 6, me lartësi nga 80 deri në 92 metra, diametër 100 metra dhe me një fuqi të instaluar prej 12 megavatw. I gjithë investimi duhet të përfundojë brenda 7 muajsh nga dita e marrjes së lejes së ndërtimit.

Ndërkohë, Ministria e Energjisë dhe kompania investuese duhet që brenda një muaji të lidhin marrëveshjen mbi zbatimin e kontratës.

Autorizimi për parkun eolik është 25 vjet dhe kompania është e detyruar që 2 për qind të energjisë së prodhuar t’ia japë shtetit. Nëse realizohet, ky do të jetë rasti i parë i prodhimit të energjive të rinovueshme nga era në Shqipëri.

Kapaciteti i turbinës gejneruese 2 MW:

Lartësia 80/92 metra
Diametri i rotorit 100 m
Tipi turbinës “Vestas”
Shpjetësia mesatare e erës 6m/s

Top Channel,  23.03.2017