info@energjia.al

Ministri i Zhvillimit Ekonomik, Valdrin Lluka ka zhvilluar një takim pune me Ambasadorin e Japonisë në Vjenë jo-rezident në Prishtinë Kiyoshi Koinuma, me të cilin ka biseduar për zhvillimet ekonomike në vend.

Ministri Lluka e njoftoi Ambasadorin japonez me prioritetet e tij, duke u ndalë te projekti i Termocentralit “Kosova e Re”, rehabilitimi i TC Kosova B, planet për TC Kosova A, Teknologjinë informative dhe energjinë e ripërtëritshme

Ministri Lluka me këtë rast ka bërë të ditur masat që ka ndërmarrë Qeveria në rritjen e transparencës me qëllim që të përmirësojë ambientin për nxitjen e investimeve të huaja.

Kreu i MZHE-së, ka falënderuar Japoninë për ndihmën që i ka dhënë Kosovës përmes Agjencisë JICA, në sektorët që lidhen direkt me përmirësimin e jetës së qytetarëve.

Nga ana e tij, diplomati japonez Koinuma është ndalur edhe te sektori i energjisë ku tha se ky sektor është mjaft i rëndësishëm për zhvillimin e vendit, ndërsa ka vlerësuar bashkëpunimin e mirë mes dy vendeve duke shprehur gatishmërinë që ky bashkëpunim të vazhdojë edhe më tutje.

Scan Tv,  22.11.2017

Ministri i Zhvillimit Ekonomik, Valdrin Lluka ka vizituar sot  Ndërmarrjem Trepça.

“Në mëngjesin e sotëm, si pjesë e premtimeve për të rregulluar problemet e Trepçës, isha në vizitë në këtë ndërmarrje ku u takova me ekzekutivin dhe sindikatën.”

“Ishte një takim mjaftë i mirë dhe besoj që jemi në rrugën e duhur për të rregulluar shumicën e problemeve që hasin punëtorët e Trepçës”, ka theksuar ministri Lluka.

Vizita tjetër u planifikua të bëhet në fund të këtij muaji për të monitoruar progresin e premtimeve nga secila palë.

Ndërkohë ministri Lluka ka thënë se ata i ka informuar se Qeveria e Kosovës, në bazë të ligjit mbi Trepçën të sponsoruar nga Ministria e Zhvillimit Ekonomik, ka bërë shpalljen e pozitave për Drejtorët e Bordit Mbikqyrës, që është hapi i parë konkret drejtë aktivizimit të këtij gjigandi ekonomik.

Në këtë bord, nga 9 pozita të hapura, 2 do të përfaqësohen nga punëtoret e Trepçës!

“Ministria e Zhvillimit Ekonomik është duke i ndërmarrë të gjithat hapat e nevojshëm që i hapin rrugë zhvillimit të kësaj ndërmarrje, andaj vlerësoj se nisja e procesit për zgjedhjen e Bordit të Trepçës, do t’i paraprij hapave të tjerë konkretë që ka paraparë MZHE siç janë hartimi i Statutit dhe regjistrimi i ndërmarrjes si Trepça SHA”, ka thënë në fund ministri Lluka.

Agjensia e lajmeve ekonomia,  13.11.2017

Ministri i Zhvillimit Ekonomik Valdrin Lluka ka arritur një marrëveshje me minatorët e Minierës së Stantërgut, me të cilën ndërpritet greva e tyre, e nisur dje, ndërsa brenda 10 ditësh kërkesat e minatorëve do të trajtohen nga institucionet kompetente për të siguruar një zgjidhje të pranueshme.

Ministri Lluka me bashkëpunëtorë sot ka qëndruar në Trepçë ku është takuar Sindikalistët e Minatorëve, menaxhmentin e Trepçës dhe minatorët, nga të cilët është njohur me kërkesat e tyre dhe mundësinë e realizimit të tyre brenda një afati sa më të shkurtër.

Kreu i MZHE-së është zotuar se sipas përgjegjësive, së bashku me Ministrinë e Punës dhe Mirëqenies Sociale dhe Inspektoratin e Punës, do të shqyrtohen të gjitha kërkesat e minatorëve dhe brenda 10 ditësh do të gjendet zgjidhja për sistematizimin e punëtorëve, derisa kërkesat tjera do të përmbushen brenda këtij viti.

Ndryshe, dje minatorët e Trepçës, respektivisht Minierës së Stantërgut kanë hyrë në grevë me kërkesa; përmirësimi i cilësisë së ushqimit, zbatimi i kontratës kolektive, sistematizimi i punëtorëve sipas kërkesave.

Agjensia e lajmeve ekonomia,  27.10.2017

Qeveria e Kosovës në mbledhjen sotme ka aprovuar  Strategjinë e Energjisë së Kosovës 2017-2026, të cilën e ka prezantuar Ministri i Zhvillimit Ekonomik, Valdrin Lluka, me ç’rast tha se ky dokument synon krijimin e një sektori të zhvilluar të energjisë, të padëmshëm për mjedisin dhe shëndetin, në mbështetje të zhvillimit të qëndrueshëm ekonomik dhe mirëqenies shoqërore në Kosovë në kuadër të një tregu të lirë dhe konkurrues të energjisë.

Po ashtu, Ministri Lluka ka propozuar për miratim Koncept Dokumentin për Ndërmarrje Publike, që ka për qëllim ndryshimin e kornizës së re ligjore primare dhe sekondare për sa i përket Ndërmarrjeve Publike, duke thënë se MZHE ka punuar intensivisht në hartimin e këtij dokumenti, me përkrahjen edhe të donatorëve siç është IFC.

“Kjo do të definojë detyrat dhe përgjegjësitë e mekanizmave që ushtrojnë këtë të drejtë dhe ngritjen e nivelit të llogaridhënies lidhur me performancën e NP-ve. Hartimi i Ligjit të ri dhe akteve nënligjore të reja, do të mundëson harmonizimin e planeve të bizneseve të ndërmarrjeve me politikat e përgjithshme zhvillimore dhe ato sektoriale, rritjen e efikasitetit dhe kualitetit në qeverisje të Ndërmarrjeve Publike, arritjen e nivelit më të lartë të transparencës së Ndërmarrjeve Publike si dhe mundëson rritjen e nivelit të besueshmërisë më të lartë të konsumatorëve/ klientëve”, tha kreu i MZHE-së.

Duke folur për Strategjinë së Energjisë, kreu i MZHE-së, tha se krahas angazhimeve për arritjen e sigurisë së furnizimit me energji elektrike, Qeveria me mbështetjen edhe të institucioneve tjera shtetërore, institucioneve ndërkombëtare dhe donatorëve, do të angazhohet që të zbatojë praktikat  më të mira të vendeve të ngjashme me Kosovën, për trajtimin e komuniteteve të prekura nga aktivitetet e prodhimit të energjisë elektrike.

Për fund, Ministri Lluka potencoi se ky dokument strategjik plotëson të gjitha kriteret për të qenë një udhërrëfyes i qartë i politikave dhjetëvjeçare të Kosovës për sektorin e energjisë, dhe me kërkesë te ministrit Lluka, kabineti qeveritar aprovoi këtë dokument mjaftë të rëndësishëm.

Ndryshe, me qëllim të përgatitjes së debatit në Qeveri, është emëruar Komisionin Ministror për NP,  bazuar në neni 5 të Ligjit për Ndërmarrjet Publike, që obligim ka paraqitjen e  propozimeve ose vërejtje mbi çështjet e NP-ve.

Telegrafi,  07.10.2017

Ministri i Zhvillimit Ekonomik, Blerand Stavileci, ka marrë pjesë në prezantimin e kompanisë “Esaan”, e cila ka shpalosur planet e saj për investime në sektorin minerar në Kosovë, respektivisht krijimin e vendeve të punës.

Kjo kompani prezantimin e ka bërë në Prishtinë para studentëve të Gjeoshkencës së Universitetit “Isa Boletini” nga Mitrovica, kuadro që mund të jenë pjesë e investimeve që planifikon të bëjë kompania.

Ministri Stavileci tha se arsyeja që kanë dashur të kenë një prezantim të tillë para studentëve është se kompania “Esaan” si synim ka krijimin e vendeve të reja të punës, gjë që mund të jetë një mundësi edhe për studentët që në të ardhmen të jenë pjesë e kësaj kompanie.

“Ne kemi aprovuar Ligjin për Investime Strategjike përmes të cilit do të hapet një dritare e re për të pasur investime. Kemi investitorë të cilët e kanë parë si mundësi të jashtëzakonshme sektorin minerar. Jemi në diskutime se si ta gjejmë një balancë në mes të përfitimeve ekonomike të ambientit dhe aspekteve sociale. Një projekt është i suksesshëm vetëm atëherë ku ka bilanc ekonomik mjedisor dhe social”, ka thënë ministri Stavileci.

Ndërsa, drejtoresha e kompanisë “Esaan”, Serpil Enirel, tregoi para 5 vjetësh kjo kompani ka hapur degën e saj edhe në Kosovë dhe ka dy licenca dhe se është në pritje për t’i finalizuar investimet.

“Gjatë kësaj periudhe ne kemi finalizuar studimet tona eksploruese dhe jemi në proces të studimit të fizibilitetit. Ne e kuptojmë që ka fusha të tjera shtesë për t’u hulumtuar dhe duam të dimë çfarë ka, dhe nëse ka diçka për t’u investuar ne duam të investojmë dhe ne kemi një plan të cilin e kemi prezantuar në Ministrinë e Zhvillimit Ekonomik”, ka thënë ajo.

Rektori i Universitetit të Mitrovicës “Isa Boletini”, Alush Musaj, tha se sektori i minierave në Kosovë shihet vetëm si profesion për meshkujt, por jo edhe për femrat.

“Ne mendojmë që Kosova po shkon kah zhvillimi duke iu ofruar studentëve këto programe si kjo. Këtë mundësi që ju është dhënë sot shpresoj që do ta shfrytëzojnë studentët dhe mendoj se ata do ta gjejnë në të ardhmen një Kosovë më të zhvilluar”, theksoi Musaj.

Agjensia e lajmeve ekonomia,  05.04.2017

Disa ditë para përfundimit të këtij viti, asnjë strategji apo ligj që do të përcaktonte fatin e gjigantit metalurgjik “Trepça”, nuk është dërguar në Kuvendin e Kosovës. Kjo ka bërë që statusi i ndërmarrjes më të madhe në vend, të vazhdojë të mos jetë i definuar, edhe pse një gjë e tillë ishte premtuar nga Qeveria e Kosovës në fillim të këtij viti. Krejt çka është bërë deri më tani, është krijimi i një grupi punues që do t’i propozojë Qeverisë planin e veprimit për hapat lidhur me procesin e zhvillimit të sektorit minerar në Kosovë.

Ministria e Zhvillimit Ekonomik ka njoftuar se duhet pritur përfundimin e punës së Grupit Punues ndërinstitucional për sektorin minerar në përgjithësi, por edhe për “Trepçën” në veçanti. “Do të paraqes orientimin për ndryshimet e nevojshme ligjore, Planin Zhvillimor për ‘Trepçën’ i cili duhet të ofrojë zgjidhje lidhur me statusin, problemet sociale, kreditore dhe mjedisore”, thuhet në përgjigjet e kësaj Ministrie. Deri më tani është mbajtur një takim pune i këtij grupi ku kanë marrë pjesë përfaqësues të institucioneve të vendit.

Deputeti nga radhët e Lidhjes Demokratike të Kosovës, Muhamet Mustafa, ka thënë për gazetën “Zëri” se ende nuk kanë marrë ndonjë dokument në Kuvend lidhur me këtë çështje. Njëherësh kryetari i Komisionit për Zhvillim Ekonomik ka bërë të ditur se në Qeveri vetëm se kanë filluar punën dy trupa punuese për këtë çështje.

“Po punohet me intensitet edhe për të ndriçuar mirë gjendjen në ‘Trepçë’, sidomos lidhur me kërkesat e kreditore edhe për të eksploruar përvojat më të mira ndërkombëtare”, ka thënë Mustafa. Ai ka thënë se edhe në Kuvend dhe në Komisionin për Zhvillim Ekonomik janë të angazhuar në këtë çështje për të bërë zgjidhjet më të mira pa improvizime.

Telegrafi, 18.12.2015

Pas publikimit zyrtarë të Modelit 2050 te Energjisë së Evropës Juglindore, më 17 qershor në një ngjarje të përbashkët të Komisionit Evropian në Bruksel ne kuadër të aktivitetit te tyre vjetorë “Java e Qëndrueshmerisë Energjetike së BE-së”, qëllimi ynë është të fillojme dhe të diskutojmë këtë model edhe në Kosovë.

Përveç lansimit te modelit me ekspertët dhe aktere kryesorë në fushën e energjisë, ky aktivitet ka për qëllim të nxisë bashkëpunimin efektiv në mes të shoqërisë civile dhe qeverive në rajonin e Ballkanit Perëndimor (si dhe brenda Kosovës) për politikat energjetike.

Siç edhe mund të jeni në dijeni, ATRC në bashkëpunim me 17 organizata të 7 shteteve të rajonit është duke implementuar një projekt të përbashkët, i cili financohet nga Komisioni Evropian dhe që synon krijimin e Modelit Energjetik të secilit shtet veç e veç, i cili me pas do t’i shërbej qeverisë që mbi bazën e skenarëve të zhvilluar të hartoj strategji dhe plane afatgjate zhvillimi.

Modeli i Energjisë se Evropes Juglindore është i bazuar në një dizajn të zhvilluar nga Departamenti për Energji dhe Ndryshime Klimatike i Mbretërisë së Bashkuar, e përdorur aktualisht në një numër të madh të vendeve. Modeli energjetik i Kosovës do të jetë i ndarë në 4 sektorë, te cilët janë vlerësuar më me shumë ndikim në fushën e energjisë.

Gjatë kësaj ngjarjeje, Z.Blerand Stavileci- Ministër i MZHE (konfirmuar), Znj.Radica Nusdorfer- Nënkryetare e Seksionit Politik, Ekonomik dhe Sektorit për Integrime në BE pranë Zyrës së BE-së në Kosovë (konfirmuar), Znj.Mimoza K. Gojani – Zyrtare e Politikave per Ekonomi, Prosperitet, Energji, dhe Arsim- Ambasada Britanike në Prishtinë (konfirmuar) dhe Z. Luis Guzman- Zëvendës Drejtor i Zyrës për rritje ekonomike, Misioni i USAID në Kosovë (konfirmuar) do të mbajne fjalime rasti, ndërsa Z.Kushtrim Kaloshi- Këshilltar i lartë për projektin SEE SEP, dhe Znj.Anyla Beqa- Koordinatore e projektit SEE SEP, do të prezantojë modelin dhe përdorimin e tij.

Agjensia e lajmeve ekonomia,  26.06.2015

Ministria e Zhvillimit Ekonomik dhe Banka Botërore për Kosovë, sot lansuan nisjen e projektit për Efiçiencë të Energjisë dhe Energji të Ripërtëritshme, që do të përkrahet përmes kredisë së IDA në vlerë prej 31 milionë dollarë. Drejtues të MZHE-së, thanë se në programin e qeverisë, energjia është njëra nga objektivat kryesore, ku viteve të fundit ka qenë njëra nga barrierat kryesore për të bërë biznes energjia elektrike.

Ministri i Zhvillimit Ekonomik, Blerand Stavileci, tha se para disa kohësh Qeveria e Kosovës dhe Banka Botërore kanë nënshkruar një marrëveshje për projektin e efiçiencën së energjisë me një kredi prej 31 milionë dollarësh me kushte shumë të volitshme, e cila ka për qëllim zbatimin e masave të efiçencës në ndërtesat publike të nivelit qendrorë.

“Në programin e Qeverisë së Kosovës, energjia është njëra nga objektivat kryesore. Viteve të fundit ka qenë njëra nga barrierat kryesore për të bërë biznes sektori i energjisë, kjo është dëshmuar edhe nëpër anketimet e ndryshme. Dhe për këtë arsye ne kemi shpallur si njërin nga prioritet, nga njëra anë për të siguruar energji të qëndrueshme dhe stabile për të gjithë qytetarët e vendit tonë për bizneset dhe për amvisërit”, tha Stavileci.

Sipas tij, këto projekte për energji, janë edhe për të zbatuar standardet e ndryshme të cilat janë të definuara me direktivat e Bashkimit Evropian, sidomos për sa i takon masave të efiçiencës dhe të energjisë të ripërtritsheme.

“Së bashku me BB dhe më të gjitha grupet që përfaqësohen brenda saj, kemi pasur shumë aktivitetet të suksesshme, edhe për sa i takon projektit të “Kosovës së re”, por edhe për sa i takon projekteve të cilat rilidhen me fushën e efiçinecës dhe fushës së ripërtritshme”, tha ministri Stavileci.

Sipas tij, të gjitha këto projekte është me rendësi të ndiko janë në mirëqenien e qytetarëve, të ndikojnë edhe në avancimin e bizneseve kosovare. Ai theksoi se është jashtëzakonisht e rëndësishme të kursehet energjia elektrike, e cila ndikon po ashtu edhe në reduktimin e kostos operative për sa i takon të bërit biznes në kuadër të sektorit privat.

Ndërsa, drejtori i Bankës Botërore për Kosovë, Jan-Peter Olters, tha se Kosova nuk është aq e pasur të jetë në gjendje t’i lejojë vetes konsumin e panevojshëm të energjisë.

“Gjenerimi i energjisë në Kosovë nuk është aq i sigurt që të lejoj në gjendjet vetes konsumin e pa nevojshëm të energjisë dhe për këtë duhet fokusimi në burime alternative të energjisë. Në fakt për të gjeneruar normat më dinamike të rritjes ekonomike, duhet edhe të tërheq investimet e direkte të madhësisë dhe cilësisë me të cilat mund të rrisë produktivitetin e brendshëm në sektorin kyç të ekonomisë”, tha Olters, raporton Kosova Press.

Sipas tij, një nga hapat e rëndësishëm për Qeverinë është për të zbatuar strategjinë e energjisë në mënyrën gjithëpërfshirëse dhe të qëndrueshme . Ai tha se projektit prej 31 milionë dollarësh ose 27 milionë euro të financuara nga BB për efikasitetin e energjisë ripërtritshme do të ndikojë së sektorin publik.

Edhe Naser Kabashi, në emër të Fakultetit Teknik, ka falënderuar Qeverinë e Kosovës dhe Bankën Botërore për angazhimin lidhur me krijimin kushteve që të fillohet bash në vendin e duhur dhe në momentin e duhur. Sipas tij, në Fakultetin Teknik nuk ka pasur investime qe më shumë se 30 vjet. Ndryshe, me këtë projekt parashihet të përfitoj sektori publik që bëjnë pjesë spitalet, universitet, shkollat etj.

Telegrafi,  22.06.2015

Ministri i Zhvillimit Ekonomik, Blerand Stavileci i shoqëruar nga zëvendësministrja Besa Zogaj – Gashi, kanë vizituar Korporatën Energjetike të Kosovës (KEK), ku janë pritur nga Bordi i Drejtorëve dhe menaxhmenti i kësaj korporate me c’rast janë informuar me zhvillimet e fundit, respektivisht hapat që po merr me qëllim të rritjes së sigurisë së furnizimit me energji për qytetarët.

Ministri Stavileci ka theksuar se furnizimi stabil me energjie elektrike është fokus të cilit duhet kushtuar kujdes i veçantë. “Ne si MZHE kemi prioritet cilësinë e jetës së qytetarëve, ku bën pjesë edhe furnizimi i sigurt me energji elektrike, për të cilën duhet angazhuar dhe pasur kujdes te veçantë “, është shprehur ai.

Stavileci, po ashtu ka shprehur përkrahjen tij në angazhimet për projekte të cilat pos furnizimit me energji, kujdes të veçantë i kushtojnë edhe ambientit, elemente këto që kontribuojnë në jetën sa më cilësore të qytetarëve të Kosovës.

Nga ana tjetër, Arben Gjukaj – Drejtor Menaxhues ka prezantuar një historik të KEK-ut në vite, duke shtuar se furnizimi me energji elektrike është njëri nga sfidat kryesore që ka kjo korporatë, e cila do të tejkalohet.

Ai ka vë në dukje investimet e konsiderueshme që KEK ka bërë në drejtim të mbrojtjes së mjedisit si pyllëzimi i 25 hektarë tokë, instalimi i filtrave në blloqet A3, A4 dhe A5 të TC Kosova A.

Ndryshe zëvendësministrja e Zhvillimit Ekonomik Besa Zogaj- Gashi, ka zhvilluar një takim me drejtuesit e KOSTT-it, nga të cilët është informuar me të arriturat e kësaj ndërmarrje.

energjia.al 07.04.2015

Në Ministrinë e Zhvillimit Ekonomik, Komisioni për Vlerësimin e Ofertave, në prezencë të Komitetit Drejtues të Projektit (KDP), Këshilltarit të Transaksionit dhe Këshilltarit Strategjik, dhe anëtarëve vëzhgues, ka bërë hapjen e Propozimit Financiar për Fazën I për Termocentralin Kosova e Re, e dorëzuar nga ofertuesi Contour Global me seli në SHBA.

Në hapje të Propozimit Financiar të ftuar kanë qenë anëtarët vëzhgues nga Banka Botërore, BERZH, USAID, KfW, Ambasada Amerikane, Zyra e Bashkimit Evropian në Kosovë, si dhe përfaqësuesit e institucioneve tjera vendore që kanë të bëjnë me sektorin, KOSTT, KEK.

Duke u bazuar në kriteret e Kërkesës për Propozime, oferta e investitorit Contour Global përfshin Normën e Brendshme të Shlyerjes së Ekuitetit, e cila do të aplikohet për ekuitetin e kontribuar përgjatë jetëgjatësisë së Marrëveshjes së Blerjes së Energjisë, si dhe Koston Maksimale të Zhvillimit të Projektit, e cila nuk mund të tejkalohet dhe përfshin vetëm kostot specifikisht të lejuara për zhvillimin e projektit.

Nëpërmjet ofertës së tyre Contour Global ka konfirmuar se është e gatshme dhe ka kapacitet financiar që të investojë ekuitet deri në 30% të kostos totale të investimit në Projekt, si dhe ka qasje në financim nga kreditë për pjesën tjetër prej 70% të kostos së investimit në Projekt. Në bazë të analizave dhe studimeve të ndryshme të realizuara nga Këshilltari teknik i Transaksionit, kostoja totale e investimit në Projekt do të jetë rreth 1 Miliard Euro.

Komiteti Drejtues i Projektit është i përkushtuar në zhvillimin e një procesi transparent dhe në përputhje me legjislacionin e Kosovës dhe aplikimin e rregullave të Bankës Botërore. Mbi këtë bazë, Propozimi Financiar nga Contour Global do të vlerësohet nga Këshilltarët e Transaksionit, Këshilltarët Strategjik, dhe Komisioni i Vlerësimit si dhe do të konsultohet Banka Botërore për të siguruar se oferta i përmbahet kushteve dhe kritereve të Bankës Botërore.

Pas përmbylljes së kësaj faze, në Fazën 2 të Projektit do të shpallet një proces ndërkombëtar i konkurrimit për kontraktimin e EPC (Inxhiniering, Prokurim dhe Ndërtim) dhe O&M (Operim dhe Mirëmbajtje) dhe do të sigurohet financimi nga kreditorët për Projektin. Vetëm pas përfundimit të të gjitha këtyre fazave do të mund të definohet kostoja finale e investimit në Projekt dhe indikatorët e tjerë që ndërlidhen me Projekt.

MZHE do ta informojë me kohë opinionin publik për zhvillimet e ardhme në kuadër të Projektit.

energjia.al  04.03.2015