info@energjia.al

Kryeministri i Kosovës, Isa Mustafa, mori pjesë në inaugurimin e Fabrikës së re të ujit të pijshëm në Shkabaj të Prishtinës, nga funksionalizimi i të cilës do të furnizohen me ujë të pijshëm 24 orë banorët e Komunës së Prishtinës, Obiliqit dhe Fushë Kosovës, ndërkaq do të përfitojnë edhe komunat e Podujevës, Graçanicës, Drenasit, Lipjanit dhe Shtimes.

Para të pranishmëve, kryeministri Mustafa u shpreh i kënaqur që po merr pjesë në promovimin e një prej investimeve më të mëdha në Kosovë që ka të bëjë me ujin, në këtë rast të Ujësjellësit Rajonal “Prishtina”.

“Është kënaqësi që ne po zgjidhim problemet më të rënda të qytetarëve, problemin e ujit, problemin e energjisë, atë të ngrohjes, që nuk e kanë rënduar vetëm Prishtinën si komunën më të madhe të Kosovës dhe kryeqendrën e Kosovës, por kanë ngarkuar edhe komunat e tjera”, tha kryeministri.

Ai theksoi se me këtë nuk po zgjidhet vetëm problemi i furnizimit të rregullt me ujë të Prishtinës, por edhe të gjashtë komunave që janë të ndërlidhura me këtë ujësjellës rajonal, të cilat do të kenë ujë më shumë, për arsye të furnizimit më të madh.

“Jam i kënaqur, sepse edhe mua më ka rënë hise para pesë viteve kur e kemi përgatitur dokumentacionin për këtë investim që të nënshkruajmë, që të përcaktojmë strukturën e financimit. Më vjen mirë që Komuna e Prishtinës i ka përmbushur të gjitha obligimet e veta në shumë prej pesë milionë eurove, programi IPA i Bashkimit Evropian, po ashtu Banka Zhvillimore Gjermane prej 20 milionëve dhe kështu, kemi arritur që të realizohen dhe të kryhet përafërsisht në afatin e paraparë. Sot, po shfrytëzoj rastin që t’ju uroj juve, qytetarëve të Kosovës, qytetarëve të Prishtinës dhe veçmas të falënderoj shtetin gjerman, Bankën Gjermane, Komisionin Evropian për një investim shumë të rëndësishëm, sepse nuk ka gjë më të mirë se sa qytetarëve t’iu sigurohet uji dhe nevojat elementare te tyre”, tha kryeministri Mustafa.

Udhëheqësi i Ujësjellësit Rajonal “Prishtina”, Ilir Abdullahu e ka quajtur objekt me rëndësi të veçantë dhe nga më të mirët në regjionin e Ballkanit objektin e Fabrikës së Re në Shkabaj, duke i falënderuar të gjithë kontribuuesit që kanë bërë që ky projekt të arrijë në fazën finale.

Ai, po ashtu, bëri të ditur se projekti i cili u përurua sot është vazhdimësi e projektit të fazës Prishtina – faza e parë, e dytë dhe e tretë.

“Me lëshimin e punës me kapacitet të plotë të këtij impianti do të arrihet një furnizim i qëndrueshëm me ujë për banorët e Prishtinës, Fushë Kosovës, Obiliqit dhe indirekt do të përfitojnë Komuna e Podujevës dhe ajo e Graçanicës, por do të përfitojnë gjithashtu edhe komunat, të cilat ne i menaxhojmë, Drenasi, Lipjani dhe Shtimja. Para nesh janë edhe sfida tjera, si impiantet e trajtimit të ujërave të zeza, në mënyrë që të kemi një Kosovë shumë më të pastër”, tha Abdullahu.

Qeveria e Kosovës ka dhënë 5 milionë euro për ndërtimin e kësaj Fabrike.

Telegrafi,  19.03.2017

Kryeministri i Republikës së Kosovës, Isa Mustafa, u takua me drejtoreshën e Bankës Botërore për Ballkanin Perëndimor, Ellen Goldstein.

Gjatë takimit, ku ishin të pranishëm edhe ministrat Blerand Stavileci dhe Avdullah Hoti, kryeministri Mustafa foli për progresin e arritur në Kosovë në zhvillimin ekonomik, reformat në ambientin e biznesit, stabilitetin financiar dhe avancimin e proceseve tjera zhvillimore.

Kryeministri Mustafa theksoi përkushtimin e Qeverisë së Kosovës për bashkëpunim me Bankën Botërore duke e falënderuar për përkrahjen e deritashme, përfshirë mbështetjen në sektorin e energjisë.

Drejtoresha e Bankës Botërore për Ballkanin Perëndimor, Ellen Goldstein, vlerësoi të arriturat në Kosovë, duke premtuar përkrahjen e mëtejme për Kosovën.

Gjatë takimit u bisedua edhe për avancimin në sektorin e energjisë dhe projektet në drejtim të krijimit të kapaciteteve të reja energjetike, rritjen e efiçiencës në vend për konsum të energjisë dhe përkrahjen e Bankës Botërore në këtë sektor të rëndësishëm për zhvillimin e Kosovës.

Kryeministri Mustafa dhe drejtoresha Goldstein biseduan edhe për strategjinë e re të Bankës Botërore për Kosovë dhe aspekte tjera të bashkëpunimit dhe mbështetjes së saj për Kosovën.

Agjensia e lajmeve ekonomia,  09.11.2016

Kryeministri i Republikës së Kosovës, Isa Mustafa, së bashku me ministrin e Zhvillimit Ekonomik, Blerand Stavileci dhe ministrin e Financave, Avdullah Hoti, ka vizituar Ndërmarrjen Trepça, ku është takuar me drejtuesit e menaxhmentit, përfaqësuesit e sindikatës dhe minatorët e saj.

Me këtë rast, kryeministri Mustafa theksoi se me miratimin e Ligjit, Trepça ka marrë rrugën e vet dhe ardhmëria e saj është e sigurt.

“Vlerësuam bashkërisht se ardhmëria e Trepçës është e pa kthim, Trepça e ka marrë rrugën e vet, Ligji në mënyrën më të mirë e ka bërë zgjidhjen për perspektivën e Trepçës, dhe tani vetëm se duhet të punojmë që të përgatitemi që ne të implementojmë Ligjin posa ai të hyj në fuqi.”

“Është e drejtë e të gjithëve që të bëjnë ankesa, t’iu drejtohen institucioneve kompetente të Republikës së Kosovës dhe kjo fare nuk e pengon Trepçën dhe neve që të vazhdojmë këtë rrugë, sepse ne jemi të përcaktuar që ta forcojmë Trepçën, që Trepçën ta organizojmë si korporatë moderne dhe Ligji pikërisht e mundëson këtë organizim të “Trepçës” në interesin e punëtorëve të saj dhe qytetarëve të Mitrovicës dhe gjithë qytetarëve të Republikës së Kosovës”, theksoi kryeministri Mustafa.

Kryeministri Mustafa, po ashtu, u shpreh i kënaqur me statusin e minatorëve në Ligjin e ri i cili do të mundësoj tërheqjen e investimeve publike, private e të kombinuara, për procedimin e produkteve të Trepçës.

“Unë dëshiroj t’i uroj gjithë minatorët, të falënderoj Kuvendin e Republikës së Kosovës, kryetarin e Kuvendit, kryetarin e Komisionit Parlamentar dhe Grupet Parlamentare, të cilët në këtë moment kanë qenë gati të gjithë unik sa i përket këtij objektivi nacional të Kosovës dhe konsideroj se Trepça kështu si është paraparë me ligj, është në interes të të gjithëve.”

“Asnjë komunitet nuk mund ta sheh veten të rrezikuar, por e sheh veten të avancuar, sepse nuk kanë pasur shanse më përpara ta mendojë askush, se do të bëhet pjesë edhe pronësore e aseteve të Trepçës, ashtu siç ne tani e kemi rregulluar me Ligj. Çështjet tjera janë pastaj çështje të politikave, sepse e kemi thënë qartë, që ne me askënd nuk do ta diskutojmë çështjen e pronësisë së Trepçës.”

“Ajo i përket Kosovës, minatorëve të Kosovës, ndërkaq pasuritë minerare janë pasuri e shtetit të Kosovës dhe kjo çështje mbetet e mbyllur njëherë e përgjithmonë. E hapur mbetet, se si ne ta çojmë Trepçën përpara”, ka theksuar kryeministri.

Drejtori i kësaj ndërmarrjeje, Ahmet Tmava, vlerësoi se ligji është në interes të Trepçës, por mbi të gjitha është në interes edhe për vendin.

“Ne si Trepçë, si menaxhment, si punëtor, si sindikatë, e falënderuam kryeministrin dhe të gjitha institucionet të cilat kanë qenë të kyçura në kuadër të implementimit të këtij ligji, dhe tani më koha e entuziazmit për ne ka kaluar dhe i premtuam kryeministrit se me zyrtarizimin e ligjit, ne si punëtorë, si Trepçë, do të marrim të gjitha detyrat dhe përgjegjësitë zhvillimore që na takojnë dhe pritjet e shumta të qytetarëve në shkallë vendi do t’i bëjmë realitet”, theksoi Tmava.

Agjensia e lajmeve ekonomia,  26.10.2016

Gjigantit metalurgjik Trepça, që dikur numëronte mijëra punëtor, sot thuhet se i duhet kohë të rimëkëmbet, por me një punë, kjo mund të arrihet në periudhat e ardhshme.

Profesori universitar i ekonomisë, Muhamet Mustafa, tregon për lajmi.net periudhën e artë të Trepçës, atëherë kur në Mitrovicë nxirreshin metale që importoheshin në të gjithë botën.

Kryetari i Komisionit për Zhvillim Ekonomik në Kuvendin e Kosovës, Mustafa, thotë se koha e artë e Trepçës nisi në vitin 1972, ku nga Trepça u krijua një bazë që lindën shumë fabrika nëpër Kosovë.

Mustafa tregon se ishin shqiptarët, boshnjakët dhe serbët që punuan bashkë, nën udhëheqjen e Agim Devës, atëherë kur Trepça ishte gjigant metalurgjik në rajon.

“Kohë e arta të Trepçës nisin pas vitit 1972 dhe ato janë krijuar njerëzit që kanë punuar në Trepçë – një inteligjencë teknike e nivelit evropian: Minir Dushi, Hasan Hazbati, Fatmir Agolli, Enis Presheva dhe te tjerë (edhe serb e boshnjak) nën lidershipin imprersiv te Veli Devës. Mbi bazë të minierave të pasura të shoqëruara me floatacionet ata forcuan prodhimin e metalurgjive dhe ndërlidhen me to përpunimin e një sasie të këtyre metaleve në Kosovë, në fabrika që linden gjithandej që nga Vushtrria ( llamarina e zinguar, ngjyrat në Extra), Municioni në Skenderaj , bateritë në Mitrovicë, Pejë e Gjilan, përpunimi argjendtit në Prizren, enët e emajluara në Gjakovë e të ngjashme. Ky koncept duket se është zhvilluar nga këta njerëz që meritojnë admirimin tonë mbi bazën e një koncepti dhe studimi të një kompanie Gjermane”, tregon Mustafa për lajmi.net.

Ligji i ri i miratuar për Trepçë nga Kuvendi i Kosovës, krijon infrastrukturë të përshtatshme për zgjerimin e ish gjigantit, por asnjëherë si në kohërat e arta.

“Ligji i aprovuar në Kuvend krijon një infrastrukturë të përshtatshme për një zgjerim të spektrit ( portfolios) së produkteve dhe shërbimeve të Trepçës në tërë këtë zinxhirë , që fillon nga nxjerrje mineralit e deri te përpunimi tij”.

Mustafa thotë se i duhet një studim Trepçës për ta kuptuar se sa janë kapacitetet për të prodhuar.

“Se çka do të përsëritet nga produktet që kishte dikur dhe çfarë s’do të jenë produkte të reja posaçërisht në veçimin e nxjerrën e shumë metaleve të çmuara, me dhjetëra sosh që e shoqërojë xehen e Trepçës e që kanë një përdorim të gjerë në teknologjitë e reja të informacionit e të telekomunikimeve do të tregojë studimi i fizibilitetit që është kontraktuar nga AKP i cili do të ndriçojë aspektet e tregut, të teknologjisë dhe aspektet e arsyeshmërisë financiare, ekonomike e sociale dhe aranzhmanet e financimit , dhe e gjithë ajo që merr përgjigje pozitive do të mund të hyjë brenda Trepçë”.

Mustafa thotë se aksionarët e ri të Trepçës e kanë në dorë rikthimin e gjigantit të dikurshëm.

“Kjo rrugë zhvillimi varet nga vizioni i aksionarëve (Qeveria dhe të punësuarit atje) nga përbërja e Bordit mbikëqyrës dhe liderët menaxherial të Trepçës, pra kryekëput nga faktori njeri “.

Problem për Mustafën janë niveli i duhur tash inteligjencës së re teknike me dije moderne nga teknologjitë, tregu e financat rreth Trepçës.

“Një problem është se nuk jam i sigurte se sa kemi në nivelin e duhur tash inteligjencë te re teknike me dije moderne nga teknologjitë, tregu e financat rreth Trepçës, po këtë patjetër duhet ta sigurojmë, në një mënyrë apo tjetër . Pra unë besoj se rikthimi i shkëlqimit të të Trepçës është mundur nëse sigurojmë burimet dhe kompetencat e nevojshme dhe për këtë ia vlen të punojmë natë e ditë”, thotë Mustafa për lajmi.net.

Ai e pranon se veriu i Mitrovicës, ku shtrihet një pjesë e minierave e që nuk kontrollohen nga shteti i Kosovës, paraqesin problem. Sipas Mustafës, kjo mund të tejkalohet me integrimin e popullatës të asaj pjese.

“Natyrisht që gjithë këtë çështje e përcjellë aspekti politik Ligji me konceptin e tij ekonomik dhe strukturat menaxheriale ka dhëne një bazë solide për funksionimin unik të Trepçës mbi bazë të interesit ekonomik. Minierat dhe floatacoinet në përbërje të Trepça nuk mund të ekzistojnë të izoluara jashtë Trepçës dhe kuadrit institucional të Kosovës dhe kjo besoj se në një periudhë afatmesme do të provohet dhe do të ndikojë në tejkalimin e tensioneve politike dhe ndëretnike brenda Trepçës dhe për rreth saj. Këtë e kanë kuptuar më shumë në Serbi , se sa në Kosovë, ndaj gjithë kjo zhurmë e nervozë atje, tek qarqet rigjide për rreth Qeverisë serbe. Natyrisht që komplementare me këtë duhet të jetë progresi i integrimit të asaj pjese të Kosovës edhe në rrafshe të tjera, një proces ky i vështirë dhe me një progres të ngadalshëm për shkak të obstruksioneve të Serbisë, po një proces që me gjithë vështirësitë po shënon një progres”, thotë Mustafa.

Telegrafi,  25.10.2016

Kryeministri i Kosovës, Isa Mustafa ka theksuar sot se ‘Trepça’ paraqet sinonim për Kosovën.

Këtë deklaratë ai e bëri në mbledhjen e sotme të Qeverisë në rendin e ditës së të cilës ishte Projektligji i i ri për gjigantin metalurgjik “Trepça”.

“Duam me këtë ligj ta hapim të ardhmen e Trepçës e jo të kaluarën. Prona e Trepçës është pronë e Kosovë”, ka thënë sot Mustafa në mbledhjen e Qeverisë në rendin e ditës së të cilës ishte Projektligji i ri për gjigantin metalurgjik ‘Trepça’.

Edhe ministri i Zhvillimit Ekonomik, Blerand Stavileci ka thënë se Qeveria e Kosovës është 80 për qind aksionare e Trepçës, ndërsa 20 për qind janë punëtorët e këtij gjiganti metalurgjik.

Ndryshe, një nga problemet kryesore sa i përket Trepçës është cilësuar mos definimi i statusit të saj.

Me këtë ligj pritet të sqarohet kjo çështje, ndërsa drejtori i Trepçës, Ahmet Tmava ka shprehur bindjen se Ligji për Trepçën do të hyjë në fuqi më 2 nëntor.

Por, drejtori i Zyrës serbe për Kosovën, Marko Gjuriq ka thënë sot se autoritetet në Prishtinë përmes projektligjit për Trepça duan të shtetëzojnë këtë kombinat, por sipas tij kjo nuk do të kalojë dhe se Beogradi do ta mbrojë “Trepçën” në çdo mënyrë.

Telegrafi,  06.10.2016

Kreu i ekzekutivit, Isa Mustafa, në seancën plenare të Kuvendit të Kosovës ka thënë se Ligji për “Trepçën”, do të jetë në fuqi më 2 nëntor.

Mustafa po ashtu ka siguruar punëtorët e gjigantit metalurgjik, se asnjë punëtorë i “Trepçës” nuk do të rrezikohet nga ky ligj.

“Ky ligj nuk do të rrezikoj aspak punëtorët. Ligji më 2 nëntor do të jetë në fuqi. Ne jemi konsultuar me kryetarin e Kuvendit dhe kemi marrë të gjiha masat në mënyrë që më 2 nëntor ligji për Trepçën të nënshkruhet dhe të mos ketë asnjë problem”, ka deklaruar Mustafa.

Gazeta Zëri,  30.09.2016

Roli i Operatorit të Sistemit, Transmisionit dhe Tregut të Kosovës (KOSTT) në qëndrueshmërinë dhe stabilitetin e sistemit elektroenergjetik të vendit tonë është i pazëvendësueshëm. Kështu u vlerësua gjatë vizitës që Kryeministri i Kosovës, Isa Mustafa dhe Ministri i Zhvillimit Ekonomik, Blerand Stavileci i bënë kësaj ndërmarrje publike, ku nga drejtuesit e saj u njoftuan për të arriturat dhe punën që po bëhet.

Kryeministri Mustafa vlerësoi organizimin dhe operimin shumë të suksesshëm të kësaj ndërmarrje publike në pikëpamje të detyrave dhe në pikëpamje financiare.

“Ka pasur investime të suksesshme në periudhën e kaluar rreth 200 milionë euro, dhe po ashtu ka pas një plan shumë konkret të investimeve në të ardhmen, se bashkërisht me Shqipërinë dhe me kyçjen e Ministrisë së Zhvillimit Ekonomik është arritur një projekt tepër i rëndësishëm i transmisionit të energjisë elektrike prej 400 kilovolt, i cili tani po mbetet peng i marrëveshjes që ne e kemi pasur me Serbinë për anëtarësimin e KOSTT-it në organizatën evropiane të Transmisionit të Energjisë”, tha kryeministri.

Me këtë rast, kryeministri Mustafa tha se Qeveria do të bëjë maksimalen që të arrijë që KOSTT-i të operojë në tërë territorin e Republikë së Kosovës dhe po ashtu të jetë i barabartë me operatorët e tjerë evropianë në këtë operim.

Ndërsa, Ministri i Zhvillimit Ekonomik, Blerand Stavileci, vlerësoi rolin domethënës dhe të pazëvendësueshëm të KOSTT-it në kuptimin e qëndrueshmërisë, stabilitetit që i jep sistemit elektroenergjetik të vendit tonë.

“Ju e dini që në muajin e kaluar në qershor dhe muaj më parë në dhjetor të vitit të kaluar kemi lansuar linjën e re interkonjektive, pra Autostradën Energjetike, që është njëra nga kryeveprat më të mëdha kapitale që është bërë në Republikën e Kosovës por edhe në Republikën e Shqipërisë dhe presim që ky projekt të operacionalizohet me fillimin e funksionimit të KOSTT-it si një bllok i pavarur”, tha ministri.

Më tej Savileci tha se si nënshkrues të Traktatit të Komunitetit të Energjisë, Kosova ka një varg obligimesh duke theksuar edhe qëllimet e gjithë regjionit, por edhe shteteve anëtare të Bashkimit Evropian të integrohen në të ashtuquajturin treg, rrjet transevropian të energjisë.

Kreu i MZHE-së tha se ndërmarrjet dhe institucionet tjera të ekosistemit të energjisë janë duke bërë një punë shumë të madhe, e cila i jep sistemit tonë një stabilitet dhe na mundëson që të jemi të gatshëm edhe për projektet e të ardhmes energjetike të vendit tonë dhe mbi të gjithë të projektit “Kosova e Re”, dhe do të jemi të gatshëm për sfidat e ardhshme në momentin që jemi pjesë integrale e tregut rajonal të energjisë elektrike.

Mustafë Hasani, kryeshef ekzekutiv i KOSTT-it, e ka njoftuar kryeministrin Mustafa dhe ministrin Stavileci me të arriturat e KOSTT-it, për zhvillimin e kapaciteteve, për planifikimin e zhvillimit dhe mirëmbajtjen e ndërmarrjes, të cilën ai e quajti një ndër më të mirat në Kosovë.

“Ne po punojmë edhe për investimet në vazhdim, për të cilat shfrytëzoj rastin të falënderoj edhe Bankën Botërore, USAID, Komisionin Evropian, Bankën për Zhvillim Gjerman, Bankën Evropiane për Rindërtim dhe Zhvillim, që të gjitha këto kapacitete, kjo teknologji e avancuar dhe jashtëzakonisht bashkëkohore është në funksion të përditshëm të KOSTT-it”, tha Hasani.

energjia.al  31.08.2016

Kryeministri i Republikës së Kosovës, Isa Mustafa, vizitoi Operatorin e Sistemit, Transmisionit dhe Tregut (KOSTT), ku u njoftua nga kryeshefi ekzekutiv dhe bordi i kësaj ndërmarrje publike për të arriturat dhe punën që po bëhet.

Gjatë vizitës, në të cilën shoqërohej nga ministri i Zhvillimit Ekonomik, Blerand Stavileci, kryeministri Mustafa vlerësoi organizimin dhe operimin shumë të suksesshëm të kësaj ndërmarrje publike në pikëpamje të detyrave dhe në pikëpamje financiare.

“Ka pasur investime të suksesshme në periudhën e kaluar rreth 200 milionë euro, dhe po ashtu ka pas një plan shumë konkret të investimeve në të ardhmen, se bashkërisht me Shqipërinë dhe me kyçjen e Ministrisë së Zhvillimit Ekonomik është arritur një projekt tepër i rëndësishëm i transmisionit të energjisë elektrike prej 400 kilovolt, i cili tani po mbetet peng i marrëveshjes që ne e kemi pasur me Serbinë për anëtarësimin e KOSTT-it në organizatën evropiane të Transmisionit të Energjisë”, tha kryeministri.

Me këtë rast, kryeministri Mustafa tha se do të bëhen përpjekje maksimale që kjo marrëveshje të implementohet dhe që KOSTT-i të operojë në treg krahas fushave të tjera të cilat po i zhvillon në Kosovë, në mënyrë që të arrihet ushtrimi i sovranitetit të plotë në tërë territorin e Republikës së Kosovës në pikëpamje të energjisë elektrike.

“Zhvillimi i energjisë elektrike edhe në pikëpamje të gjenerimit edhe në pikëpamje të transmisionit, në pikëpamje të shpërndarjes, për ne është me rëndësi themelore. Është një resurs tepër i rëndësishëm i cili nuk ndërlidhet vetëm me kapacitetin e gjenerimit, por edhe me këto dy fusha tjera, veçmas edhe me këtë të transmisionit që jemi sot këtu. Është një prioritet i lartë i Qeverisë, tani prioritet edhe i Kuvendit të Kosovës, sepse është një organizatë e cila me ligjin e ri do të qeveriset në mënyrë koorporative drejtpërdrejt me kyçjen e Kuvendit të Republikës së Kosovës. Por, ne si Qeveri do të bëjmë maksimalen që ne të japim kontributin tonë që të arrijmë që KOSTT-i të operojë në tërë territorin e Republikë së Kosovës dhe po ashtu të jetë i barabartë me operatorët e tjerë evropianë në këtë operim”, theksoi kryeministri.

Ministri i Zhvillimit Ekonomik, Blerand Stavileci, vlerësoi rolin domethënës dhe të pazëvendësueshëm të KOSTT-it në kuptimin e qëndrueshmërisë, stabilitetit që i jep sistemit elektroenergjetik të vendit tonë.

“Ne natyrisht se jemi në kontakte të vazhdueshme me bordin dhe menaxhmentin për sa i takon edhe problematikave ditore që ekzistojnë por edhe aspekteve tjera strategjike të cilat i kemi. Ju e dini që në muajin e kaluar në qershor dhe muaj më parë në dhjetor të vitit të kaluar kemi lansuar linjën e re interkonjektive, pra Autostradën Energjetike, që është njëra nga kryeveprat më të mëdha kapitale që është bërë në Republikën e Kosovës por edhe në Republikën e Shqipërisë dhe presim që ky projekt të operacionalizohet me fillimin e funksionimit të KOSTT-it si një bllok i pavarur”, tha ministri.

Më tej, ministri Savileci tha se si nënshkrues të Traktatit të Komunitetit të Energjisë me seli në Vjenë, Kosova ka një varg obligimesh duke theksuar edhe qëllimet e gjithë regjionit, por edhe shteteve anëtare të Bashkimit Evropian të integrohen në të ashtuquajturin treg, rrjet transevropian të energjisë.

“Në këtë drejtim secila prej shteteve i kemi detyrimet dhe obligimet të cilat duhet t’i përmbushim dhe mund të them që në këtë drejtim ndërmarrjet tona dhe institucionet tjera që hyjnë në kuadër të ekosistemit të energjisë janë duke bërë një punë shumë të madhe, punë e cila ndoshta nuk vërehet nga jashtë për publikun, por një punë e pazëvendësueshme e cila i jep sistemit tonë një stabilitet dhe na mundëson që të jemi të gatshëm edhe për projektet e të ardhmes energjetike të vendit tonë dhe mbi të gjithë të projektit “Kosova e Re” të cilin brenda këtyre kapaciteteve të rrjetit që ekziston, edhe KOSTT-i me kapacitet që ka, do ta akomodojë dhe do të jemi të gatshëm për sfidat e ardhshme në momentin që jemi pjesë integrale e tregut rajonal të energjisë elektrike”, tha ministri Stavileci.

Mustafë Hasani, kryeshef ekzekutiv i KOSTT-it, e ka njoftuar kryeministrin Mustafa me të arriturat e KOSTT-it, për zhvillimin e kapaciteteve, për planifikimin e zhvillimit dhe mirëmbajtjen e ndërmarrjes, të cilën ai e quajti një ndër më të mirat në Kosovë.

“Ne po punojmë edhe për investimet në vazhdim, për të cilat shfrytëzoj rastin të falënderoj edhe Bankën Botërore, USAID, Komisionin Evropian, Bankën për Zhvillim Gjerman, Bankën Evropiane për Rindërtim dhe Zhvillim, që të gjitha këto kapacitete, kjo teknologji e avancuar dhe jashtëzakonisht bashkëkohore është në funksion të përditshëm të KOSTT-it”, tha Hasani.

Agjensia e lajmeve ekonomia,  21.07.2016

Qeveria e Kosovës, do të jap maksimumin në mënyrë që të arrijë, që KOSTT të operojë në tërë territorin e Kosovës.

Mustafa tha se KOSTT, është një kompani publike e cila është shumë e organizuar dhe e cila po operon në mënyrë shumë të suksesshme. Ndërsa sa i përket autostradës energjetike me Shqipërinë , Mustafa thotë se kjo po mbetet peng i marrëveshjes me Serbinë.

“Bashkërisht me Shqipërinë dhe me kyçjen e MZHE-së, është arritur një projekt tejet i rëndësishëm i transmisionit të energjisë elektrike prej 400 KW, i cili tani po mbetet peng i marrëveshjes që ne e kemi pasur me Serbinë, për anëtarësimin e KOSTT, në organizatën evropiane të transmisionit të energjisë. Dhe ne do të bëjmë maksimalen që të arrijmë që kjo marrëveshje të implementohet. Që KOSTT të operojë me tregun krahas fushave tjera që po i zhvillon në Kosovë dhe në të arrijmë të ushtrojmë sovranitetin e plotë në terë territorin e republikës së Kosovës në pikëpamje të energjisë elektrike”, tha Mustafa.

Por jo vetëm për marrëveshjet për energjinë. Mustafa thotë se ka ngecje në implementimin e të gjitha marrëveshjeve me Serbinë, pasi që ato nuk po implementohen.

“Ka ngecje në implementim dhe me problemin e ngecjes ne po ballafaqohemi që nga fillimi i dialogut. Sepse problemi qëndron, sepse marrëveshjen po arrihet. Mirëpo po duhet të punohen më gjatë se sa në arritjen e marrëveshjeve në arritjen e marrëveshjes se si të implementohen. Ne kemi bërë vërejtje se nuk mund të merremi gjithmonë me këto, të zhvillojmë dialog të pandërprerë dhe të pafund lidhur me mënyrën e implementimit”, tha kryeministri Mustafa.

E kryeshefi ekzekutiv i KOSTT-it Mustafë Hasani, nuk kurseu fjalët e mira, për ndërmarrjen të cilën ai udhëheq. Hasani tha se KOSTT, është ndër ndërmarrjet më të mirat në Kosovë.

“ Ne e njoftuam për të arriturat e KOSTT-it për zhvillimin e kapaciteteve, për planifikimin zhvillimin dhe mirëmbajtjen. Për një ndërmarrje që mund të them me plotë të drejtë, një nga më të mirat në Kosovë. Ne po punojmë edhe për investimet në vazhdim”, tha Hasani.

Ndërsa ministri i Zhvillimit Ekonomik Blerand Stavileci tha se ndërmarrja publike KOSTT, ka një rol shumë domethënës dhe të pazëvendësueshëm, në kuptimin e qëndrueshmërisë dhe stabilitetit që i jep sistemit elektroenergjetik të vendit tonë.

Telegrafi,  21.07.2016

Kryeministri Isa Mustafa, ka thënë se çështja e Trepçës nuk do të shkojë për tu diskutuar në Bruksel. Sipas tij Kosova nuk ka nevojë të diskutojë me as kënd për pronat e veta.

“Trepça assesi nuk do të shkojë në Bruksel, nuk do të bisedojmë për pronat e Kosovës me askënd. Ajo është pronë e Kosovës edhe sipas pakos së Ahtisaarit. Ne jemi të interesuar që të ketë një proces gjithëpërfshirës në hartimin e projektligjit për Trepçën. Edhe serbët do të jenë të përfshirë në këtë proces dhe do të ndihmojnë në hartimin e projektligjit. Ky do të jetë në interes të të gjithë qytetarëve të Kosovës”, ka thënë Mustafa, gjatë një konference për media shkruan Telegrafi.

Ai ka bërë të ditur se Ligji për Trepçën do të përgatitet nga Ministria e Zhvillimit Ekonomik (MZHE), pastaj do të shkojë në Kuvend.

“Komisioni për Trepçën më tepër ka rol koordinues. Do të kyçet edhe pala serbe në proces dhe rezultati do të jetë dërgimi i Ligji në Kuvendin e Kosovës”, ka thënë kryeministri Isa Mustafa.

Telegrafi,  15.03.2016