info@energjia.al

Këshilli i Ministrave ka miratuar vendimin për faljen e detyrimeve ndaj fondit të sigurimeve shoqërore të personave në pension invaliditeti dhe të personave që kanë marrë pension sipas ligjit “Për pensionet e punonjësve që kanë punuar në miniera, në nëntokë”. Borxhet që do të falën janë ato të krijuara deri me 31 dhjetor të vitit 2016. Falja përfshin edhe detyrimet e njohura me vendim të gjykatave, ndërsa çështjet në proces gjykimi nuk përbëjnë objekt konflikti gjyqësor dhe pushohen, raporton SCAN.

“Brenda 3 muajve nga hyrja në fuqi e këtij ligji, Instituti i Sigurimeve Shoqërore të evidentojë dhe të zbatojë të gjitha procedurat administrative dhe dokumentare të evidentimit të detyrimeve të falura. Detyrimet e personave të përcaktuar në nenin 1, të këtij ligji, të cilat mund të krijohen për shkak të punësimit pas datës 1.1.2017, nuk falen” përcaktohet në vendim.

Por si janë krijuar këto borxhe dhe kush përfiton?

I gjithë detyrimi është krijuar në kuadër të operacionit kundër informalitetit. Minatorët dalin në pension në moshën 55 vjeç e kur dorëzojnë dokumentet e pensionit, duhet të plotësojnë dhe një deklaratë që nuk kanë aktivitet ekonomik. Të gjithë minatorët e dalë në pension e kanë plotësuar këtë deklaratë, ndërkohë që disa prej tyre kanë vijuar të punojnë në kushte informale. Në kuadër të operacionit kundër informalitetit, punëdhënësit kanë bërë deklarimet ku ka rezultuar se ka minatorë të dalë në pension që vijojnë të punojnë. Në këto kushte është krijuar një borxh që varion nga 15 mijë deri në 150 mijë lekë, i cili konform ligjit duhej t’u mbahej këtyre pensionistëve nga pensioni i tyre. Për këtë qëllim, ka pasur edhe procese gjyqësore.

E njëjta gjë ka ndodhur edhe me ata që përfitojnë pension invaliditeti. Pavarësisht se janë deklaruar të paaftë për punë dhe trajtohej me pension, disa prej tyre kanë arritur të sigurojnë një punë që u përshtatet kushteve të tyre. Nëse kjo kategori personash gjen një punë të përshtatshme, atëherë duhet plotësuar deklarata pranë sigurimeve shoqërore,çka sjell ndërprerjen e pagesës së plotë dhe u jepet një invaliditet i pjesshëm. Në këto kushte është krijuar një detyrim që shkon në 4-5 mijë lekë. Përballë konstatimit të këtyre rasteve, Këshilli Administrativ i ISSH-së miratoi në fillim të këtij viti propozimin për faljen e këtyre detyrimeve që ishin parashikuar të mbaheshin nga pensionet dhe pushimin e çështjeve gjyqësore që ishin në proces.

Scan Tv,  20.04.2017

Deputeti i LSI për qarkun Dibër, Përparim Spahiu ka depozituar në Parlament një nismë të ngjashme me atë që minatorët kanë dërguar në Ministrinë e Energjisë, për përfshirjen e punonjësve të industrisë minerare në një status të veçantë.

“Normalisht nuk është propozim i imi personal, sepse një propozim i tillë ekziston prej vitesh sa i takon statusit të minatorit dhe besoj parimisht se gjithë spektri politik ka qenë dakord. Ndërhyrja ime ishte thjesht një nxitje e këtij procesi dhe aktualisht kam depozituar në Parlament pothuajse të njëjtin propozim të sindikatave që është depozituar pranë ministrive të linjës”, ka deklaruar Spahiu.

Nga ky status mund të përfitojnë trajtim të veçantë sa u përket pagave, pensioneve apo trajtimit mjekësor falas rreth 8.000 minatorë dhe ish-minatorë në pension. Por kjo mund të jetë një faturë e rëndë financiare.

“E them edhe si ekonomist që problem, nëse mund të quhet problem kryesor, është ai financiar pasi bëhet fjalë për një numër të madh personash që përfitojnë. Nëse e miratojmë brenda këtij mandati them që detyrimet financiare, pa dashur të abuzojmë në këtë aspekt, t’i kalojnë qeverisë së ardhshme duke dhënë zgjidhjet financiare. Ka mekanizma kontabël që ato kosto, që për ne janë detyrim, të mbulohen deri në ulje investimesh pasi për njëzet e ca vjet është diçka që pritet dhe nuk mund të zgjasë më shumë”, ka thënë Spahiu.

Statusi i minatorit po diskutohet aktualisht mes ministrive të Energjisë, Mirëqenies Sociale, asaj të Financave, Shëndetësisë dhe Drejtësisë.

Top Channel,  23.03.2017

Një shpërthim i fuqishëm në një minierë qymyri në pjesën perëndimore të Ukrainës, ka shkaktuar 8 viktima.

Sipas njoftimit të shërbimeve të emergjencës, 20 minatorë janë shpallur të zhdukur pas shpërthimit.

Ndërkohë mediat lokale raportojnë se gjashtë minatorë të plagosur kanë arritur të dalin në sipërfaqe.

Ekipet e shpëtimit kanë filluar një operacion kërkim-shpëtimi në thellësinë 550 metra, për 20 minatorët të cilët janë deklaruar të zhdukur.

Miniera në të cilën ka ndodhur shpërthimi, operohet nga kompania shtetërore “Lvivvuhillya” dhe ndodhet disa kilometra larg kufirit me Poloninë.

Shqiptarja.com  03.03.2017

Kryeministri i Republikës së Kosovës, Isa Mustafa, priti në takim përfaqësuesit e menaxhmentit, të sindikatës dhe një numër të minatorëve të Trepçës, me rastin e shënimit të Javës së Minatorëve, që shënohet për nder të 28 vjetorit të grevës së Minatorëve të Trepçës.

Në këtë takim, ku ishin të pranishëm edhe zëvendëskryeministri i parë, Hajredin Kuçi dhe ministri i Zhvillimit Ekonomik, Blerand Stavileci, u bisedua për problemet që janë me prioritet për Trepçën.

Kryeministri Isa Mustafa vlerësoi përpjekjet, punën dhe kontributin e minatorëve në rimëkëmbjen e Trepçës, jo vetëm tani por në të gjitha proceset e shtetndërtimit.
“Kontributi i minatorëve të Trepçës ka qenë i rëndësisë esenciale në të gjitha proceset e ndërtimit të Kosovës, edhe në proceset e pavarësisë dhe të lirisë së Kosovës dhe janë çështje, të cilat i vlerësojnë jo vetëm qytetarët e Kosovës, por i vlerësojnë të gjithë edhe më gjerë sesa në Kosovë”, tha kryeministri.

Kryeministri Isa Mustafa theksoi përpjekjet maksimale të Qeverisë për rikthimin e Trepçës në një dimension krejtësisht të ri.
“Është vështirë që të kopjohet gjendja që ka qenë përpara. Tash duhet të bëjmë diçka të re, sepse kemi të bëjmë me tregje të reja, me teknologji të re, me dije të reja dhe me ju bashkërisht ato t’i bëjmë”, tha kryeministri.

Më tej, kryeministri Mustafa tha se është aprovuar Ligji dhe ka kaluar edhe sfidën e Gjykatës Kushtetuese dhe po punohet për përcaktimin e kritereve për zgjedhjen e bordit, shpalljen e konkursit, në mënyrë që të jenë njerëzit më të mirë që e njohin punën, që e njohin atë fushë dhe mund të kontribuojnë që Trepça të zhvillohet si duhet.

“Është gati studimi i fizibilitetit dhe është zhvilluar një debat para disa ditëve. Edhe aty po presim një përgjigje se çka po thotë ky studim, çka duhet të bëhet më tutje për fazat e tjera të Trepçës, në fazën e përpunimit, finalizimit të produkteve, të shkritores, të metalurgjisë së zinkut, të industrisë kimike dhe në qoftë se duhet të bëjmë diçka tjetër, duhet që studimet të na tregojnë se cila është mënyra më e mirë e financimit të investimeve në të ardhmen. Por, ne do të mbesim të përkushtuar që të kemi investime atje dhe të finalizojmë produktet e Trepçës, mirëpo krejt me një koncept të ri”, theksoi kryeministri.

Gjatë takimit, kryeministri Mustafa tha se për të gjitha këto nevojitet bashkëpunim i të gjithëve, në mënyrë që të gjendet rruga më e mirë.
“Është mirë që situata në vitin e kaluar ka qenë më e mirë sesa një vit përpara. Shpresoj se tash në vitin 2017 do të jetë edhe më e mirë, mirëpo ajo që na duhet të kemi parasysh është që gjithmonë duhet të kemi pak durim, duhet t’i peshojmë gjërat mirë, ato që i dërgojmë përpara t’i matim, në mënyrë që mos të kthehemi dy herë të bëjmë të njëjtën punë dhe në këtë aspekt unë ju siguroj se, edhe unë si kryeministër, edhe zëvendëskryeministri Kuçi dhe ministri Stavileci, dhe të gjithë të tjerët do t’ju përkrahim maksimalisht dhe do të bashkëpunojmë me ju”, tha kryeministri Mustafa.

Zëvendëskryeministri Hajredin Kuçi tha se jo vetëm greva e minatorëve, por edhe puna e bërë me djersë, është shembull i mirë si mbrohet dhe si duhet vendi.

Duke folur për ndryshimet ligjore me Trepçën, zëvendëskryeministri Kuçi tha se ato kanë për qëllim që gjiganti ekonomik të kthehet në një ndërmarrje e cila është e gatshme të ballafaqohet me ekonominë e lirë të tregut.

“Natyrisht që Ligji ka qenë i konsultuar në plotëni, dhe mendoj që edhe udhëheqja që e ka bërë kryeministri, por edhe miratimi nga Kuvendi i Kosovës, ka krijuar një bazë të mirë për punë të re, për aktivitete të reja dhe për një riorganizim të plotësishëm të Trepçës. Në këtë drejtim, në radhë të parë është vullneti i Qeverisë që të jeni pjesëmarrës aktiv, por në anën tjetër, jeni edhe sipas Ligjit, pjesëmarrës në proceset e mëtejme që do të zhvillohen në Trepçë. Ne do të kemi gatishmërinë e plotë që ta ndihmojmë Trepçën, dhe pastaj Trepça ta ndihmoj edhe Buxhetin e Kosovës, ta ndihmoj ekonominë e Kosovës në tërësi. Ne ju përgëzojmë për “Javën e Minatorëve”, ju dhe të gjithë minatorët, ata që tani në pension, por edhe familjet e atyre që janë të ndjerë dhe presim që bashkërisht të punojmë në vitet që po vijnë, për ta ringjallur edhe më shumë Trepçën dhe për ta kujtuar Trepçën për kontributin e saj, por mbi të gjitha, për zhvillimin ekonomik që do ta kemi bashkërisht” , tha zëvendëskryeministri Kuçi.

Ministri i Zhvillimit Ekonomik, Blerand Stavileci, theksoi përkushtimin që viti 2017 të jetë vit i zgjidhjes së problemit ekonomik dhe social të kombinatit Trepça.
“Viti 2015 ka qenë vit i shpëtimit nga likuidimi i Trepçës. Viti i kaluar ka qenë vit i zgjidhjes ligjore dhe ky vit do të jetë vit i zgjidhjeve ekonomike dhe sociale. Të gjitha këto lidhen me zbatimin e ligjit, por edhe me derën e cila është hapur, në mënyrë që ne të kemi mundësi edhe për pjesën e investimeve kapitale. Mbetet që këtë vit, pasi të përfundojë fizibiliteti, të përgatitet Strategjia dhe në funksion të zbatimit të Ligjit, ne ta bëjmë bordin, statutin dhe ta regjistrojmë ndërmarrjen”, tha ministri.
Në këtë takim, ministri Stavileci njoftoi minatorët edhe për dy projekte konkrete, konferencën më të madhe për sektorin e minierave që në fokus do ta ketë Trepçën dhe projektin tjetër me shtetin gjerman i cili krijon mundësi për hapjen e vendeve të reja të punës.

Drejtori Menaxhues i Ndërmarrjes Trepça, Ahmet Tmava, tha se përkundër problemeve të shumta, këtë vit “Java e Minatorëve” është shënuar me një gjendje më të relaksuar, duke shtuar se ethet se Trepça do të hyj në procedurë të likuidimit i takojnë të kaluarës.

“Është emergjente që Ligji të zyrtarizohet në aspektin e obligimeve që dalin. Në këtë periudhë të tranzicionit kemi bashkëpunim të plotë me MZHE-në”, tha drejtori Tmava, duke theksuar se janë të gatshëm që t’i marrin të gjitha përgjegjësitë dhe detyrat që u takojnë.

Drejtues të sindikatës paraqitën kërkesat e tyre për formimin e Bordit të Trepçës, për Ligjin për Pensione, njohjen e përvojës së punës së minatorëve gjatë viteve të 90-ta, por edhe për nënshkrimin e një Memorandumi të Mirëkuptimit mes MZHE-së, menaxhmentit dhe sindikatës për adresimin e çështjeve që lidhen me minatorët e vdekur në vendin e punës dhe çështje të tjera.

Telegrafi,  01.03.2017

Minatorët e minierës së Trepçës në Stantërg, i kanë kërkuar Qeverisë së Kosovës që të fillojë së zbatuari Ligjin për kombinatin dhe të krijojë kushte më të mira të punës për ata.

Isuf Beqiri, minator në minierën e Stantërgut që prej vitit 1978, thotë për Radion Evropa e Lirë, se përveç moszbatimit të Ligjit për Trepçën, ata po përballen edhe me kushte të vështira të punës.

Sipas tij, minatorët e Trepçës janë të harruar nga institucionet e Kosovës dhe se nuk po punohet asgjë në krijimin e kushteve më të mira për ta.

“Nuk është bërë asgjë për neve minatorët. Një ligj që është bërë nuk ka filluar të zbatohet akoma. Gjendja e minatorëve është e vështirë, nuk kemi as sigurime shëndetësore, që nga pas lufta nuk kemi asgjë. Qeveria e Kosovës duhet të marrë masat për përmirësimin e kushteve të minatorëve”, thekson Beqiri.

Lidhur me zbatimin e Ligjit për Trepçën, i cili është miratuar nga Kuvendi i Kosovës në tetorin e vitit të kaluar, minatorët e Trepçës dhe udhëheqësit e këtij kompleksi metalurgjik thanë se autoritetet e vendit kanë treguar neglizhencë.

Më 7 tetor të vitit të kaluar, Kuvendi i Kosovës miratoi Ligjin për Trepçën, me të cilin mëtohet të rimëkëmbet dhe rivitalizohet ndërmarrja.

Por, që nga hyrja në fuqi e Ligjit për Trepçën, Qeveria e Kosovës nuk ka arritur të krijojë ende Bordin mbikëqyrës të Trepçës, në mënyrë që të mund të fillohet me zbatimin e ligjit.

Ministri i Zhvillimit Ekonomik në Qeverinë e Kosovës, Blerand Stavileci, i pati thënë Radios Evropa e Lirë se që nga hyrja në fuqi e Ligjit për Trepçën, ka gjashtë muaj afat për të themeluar Bordin për Trepçën.

“Bëhet fjalë për një ndërmarrje, e cila do të jetë në pronësi të qeverisë, prandaj edhe nuk është gjë e lehtë dhe e thjeshtë zgjedhja e bordit dhe e strukturave të tjera për këtë çështje”, kishte thënë Stavileci.

Ndërkohë, ish drejtori i Trepçës Halil Qela në një prononcim për Radion Evropa e Lirë e quan të pakuptimtë mos zbatimin e Ligjit për Trepçën.

Ai thotë se pavarësisht që Ligji për Trepçën ia ndërron pronësinë kompleksit Trepça, nga Agjencia Kosovare e Privatizimit tek ekzekutivi, Trepça vazhdon ende në disa gjëra të caktuara të menaxhohet nga AKP-ja dhe jo Qeveria e Kosovës.

“Fatkeqësisht sot e festuam 28 vjetorin në një kohë kur Ligji për Trepçën është miratuar, por që nuk është duke u zbatuar. Kjo është absurde. Kemi pritur që këtë përvjetor të grevës ta shënojmë me një bord profesionist siç e parasheh Ligji, me rezultatet e para të ligjit që e kemi kërkuar një kohë shumë të gjatë, por kjo nuk ka ndodhur”, thekson Qela.

Sipas Ligjit, qeverisja për Trepçën bëhet nga Bordi Mbikëqyrës dhe Bordi Menaxhues.

Bordi Mbikëqyrës përbëhet nga nëntë anëtarë, të cilët nuk mund të jenë anëtarë të forumeve politike, por që duhet të jenë ekspertë në fusha të caktuara, që nevojiten për mbikëqyrjen e kombinatit. Ky bord më pas zgjedh edhe anëtarët e Bordit Menaxhues të Trepçës.

Edhe statuti i Trepçës hartohet nga Bordi Mbikëqyrës dhe miratohet nga aksionarët.

Ndërkohë, drejtori i Trepçës, Ahmet Tmava, kërkon nga Qeveria e Kosovës që sa më shpejt të themelohen bordet mbikëqyrëse në mënyrë që të fillohet sa më shpejt me rimëkëmbjen e kombinatit Trepça.

“Jemi në kontakt tëpërhershëm më Qeverinë e Kosovës dhe ata janë zotuar që sa më shpejt që është e mundur të formohen këto organe që do të bëjmë zbatimin e ligjit. Edhe pse më hyrjen në fuqi të Ligjit ne mbikëqyremi nga Qeveria e Kosovës”, thekson Tmava për Radion Evropa e Lirë.

Trepça llogaritej si një prej ndërmarrjeve më të mëdha jo vetëm në Kosovë, por edhe në ish-Jugosllavi. Në vitet e tetëdhjeta, në kombinat punonin mbi 20 mijë punëtorë. Ndërkaq, vitet e fundit, ajo e kaloi fazën e mbijetesës dhe nuk numëronte më shumë se 1,400 punëtorë

Telegrafi,  22.02.2017

Mesazhi i ngushëllimit i Ministrit Gjiknuri për familjet e minatorëve kinez:

Pas shtatë ditësh kërkimesh intensive të Repartit të Inspektim Shpëtim Minierave dhe kompanisë kineze, para pak minutash u bë e mundur nxjerrja në sipërfaqe e trupave të pajetë të tre minatorëve shtetas kinez që kishin mbetur në nivelin e 21-të, pas aksidentit tragjik të së shtunës së kaluar. Menjëherë pas sinjalizimit për ngjarjen, Ministria e Energjisë e Industrisë dhe Reparti i Inspektim Shpëtim Minierave u angazhuan maksimalisht dhe morën masat e nevojshme për kryerjen e operacionit të vështirë të kërkim-shpëtimit.

Gjej rastin të shpreh ngushëllimet e mia të thella familjeve, miqve dhe të afërmve të minatorëve që humbën jetën në këtë aksident. Shpirti i tyre u prehtë në paqe!

Njëkohësisht dua të shpreh falenderimet e mia dhe për grupet avaro/shpëtuese që punuan në kushte jashtëzakonisht të vështira, natën e ditën, me shpresën se do të arrinin të nxirrnin të gjallë prej fundit të minierës tre punëtorët kinez. Shpresë e cila u shua fatkeqësisht mbrëmjen e kaluar kur u gjetën trupat e pajetë në vatrën e aksidentit.

Pas nxjerrjes së trupave, autoritetet shtetërore do të analizojnë dinamikën dhe shkaqet e këtij aksidenti për të garantuar marrjen e të gjitha masave të nevojshme që ngjarje të tilla të mos përsëriten.

energjia.al  11.02.2017

Ende pa rezultat kërkimet për trupat e tre minatorëve të mbetur të izoluar dje në minierën e Bulqizës pas një shpërthimi në nivelin 21 të galerisë.

Grupet e ekspertëve të kërkimit ende nuk kanë mbërritur në nivelin e minierës ku dhe ndodhi shpërthimi që dyshohet se i mori jetën tre minatorëve kinez. Veç tre minatoëve që deri tani dyshohet se kanë humbur jetën, mbeten te plagosur edhe tre minatorë të tjerë.

Të plagosurit u dërguan në spitalin e Bulqizës.

Ndërkohe nga pala shqiptare nuk ka dëme në njerëz dhe materiale.

Specialistët e Repartit të Inspektim Shpetimit të Minierave, ato të firmës Albchrome dhe ekspertë të aktualisht jane në nivelin e 17 ku sqarojnë se deri aty është pastruar i gjithë ajri nëpërmjet tubave të jashtme të ventilimit.

Paralelisht po punohet edhe për riparimin e pusit që do të bëjë të mundur zbritjen e ekspertëve dhe grupit hetimor në nivelin 21.

Gjithashtu mësohet se në seksionin e punimeve për pusin e ri, niveli 21, ku kompania Kineze ‘Xian Engineering’ e nënkontraktuar nga kompania ‘Albchrome’ po kryen punimet ka pasur një shpërthim gazi metani.

Grupet e shpetimit kanë mundur të shkojnë deri në nivelin e 14. Gjithashtu mësohet se në seksionin e punimeve për pusin e ri, niveli 21, ku kompania Kineze ‘Xian Engineering’ e nënkontraktuar nga kompania ‘Albchrome’ po kryen punimet ka pasur një shpërthim gazi metani.

Nga të dhënat paraprake mësohet se ngjarja ka ndodhur gjatë punimeve që po zhvillohen në kuadër të investimit për hapjen e pusit të thellësisë që do të shtojë jetëgjatësinë e kësaj zone mineralmbajtëse.

Investimi kryhet nga kompania koncesionare ‘Albchrome’, përmes kompanisë kineze ‘Wenzhou Mining Co Ltd’, e specializuar dhe nënkontraktuar nga koncesionari për këtë shërbim.

Menjëherë pas sinjalizimit të aksidentit nga shpërthimi i gazit të hidrogjenit, grupet e gatshme të avarive në ambientet e minierës kanë ndërhyrë ndërsa nga Tirana janë nisur zv.ministri z. Gëzim Musabelli, grupet e Repartit të Inspektim Shpëtim Minierave, drejtues të strukturave të mbikëqyrjes së minierave në Ministrinë e Energjisë dhe Agjencinë Kombëtare të Burimeve Natyrore.

Në përfundim të operacionit të kërkim-shpëtimit, strukturat përgjegjëse do të hartojnë raportin përkatës dhe analizojnë shkaqet e dinamikën e aksidentit të ndodhur.

Ora 14:40 Musabelli: Ndërhyrja në minierë, rrezik shpërthime të tjera
Kërkimi për tre minatorët e humbur praktikisht është bllokuar nga rreziku i një tjetër shpërthimi tjetër në minierën e Bulqizës.

Zëvendësministri i Energjetikës Gëzim Musabelli shpjegon se niveli i hidrogjenin të pus është ende shumë i lartë, gjë që mund të shkaktojë edhe një eksplozion tjetër, ndërkohë që deri tani kanë ndodhur tre shperthime.

Ai thotë se grupet e shpëtimit po përpiqen të ngrenë lartë çengelin kryesor të pusit, por strukturat kanë pësuar dëmtime të rënda dhe se ky proces paraqet rrezikshmëri shumë të lartë për momentin.

Musabelli thotë se çdo përpjekje e nxituar do të sillte humbje të tjera jetësh në pusin e minierës.

Sa për shkaqet e shpërthimit, Musabelli thotë se ato duhen analizuar në mënyrë të detajuar, që nga vendimi i grupit teknik të sigurisë së kompanisë kineze, i cili ka lejuar hyrjen e minatorëve në pus.

Ora 10: 30 Bedri Hoxha: Ekipet e kërkimit s’kanë pajisjet e duhura
Deputeti i Partisë Demokratike, Bedri Hoxha u shpreh në një lidhje telefonike për Report Tv se ekipet e kërkimit për gjetjen e tre minatorëve të bllokuar në minierë, nuk kanë pajisjet e duhura për të kryer operacionin në thellësi.

Sipas tij, miniera ka prezencë të madhe gazi, çka vështirëson depërtimin në thellësi.

Është e pamundur që me këto pajisje që kanë ekipet e kërkim shpëtimit, për t’u futur në thellësi të minierës për shkak të prezencës së madhe të gazit. Kjo do të hajë shumë kohë. Megjithatë, do të shohim sesi do të shkojnë ngjarjet sot“, u shpreh Hoxha.

I pyetur për fatin e tre minatorëve, Hoxha tha se situata është e paqartë, ndërsa u shpreh skeptik që ata të jenë gjallë.

Ajo që është problematike është mungesa e investimeve në miniera. Në të gjithë qarkun e Dibrës është në problem gangrenë. Edhe këto kontrolle që janë bërë nuk kanë për qëllim përmirësimin e kushteve të minierës, por për të goditur kompanitë e minierës”, tha deputet i PD.

Cupi: Qeveria të jetë më pranë  Bulqizës, Dibrës jo vetëm në ngjarje të tilla
Dhurata Cupi, deputetja e PD e kontaktuar nga Report Tv i ka bërë thirrje qeverisë që të ketë një përkujdesje më të madhe për Bulqizën, Dibrën jo vetëm në ngjarje të tilla. Ajo është shprehur se në bazë të informacione që ajo ka arritur të marrë, kushtet e punës në këtë minierë janë të mira ku kohët e fundit janë bërë investime se nuk mund të thuhet ende se arsyet e këtij shpërthimi.

Keta për Report TV: Janë ndërprerë kërkimet, sipas specialistëve minatorët kinezë kanë vdekur
Deputeti i PD Roland Keta në një lidhje telefonike për Report Tv ka deklaruar se sipas specialistëve 3 minatorët kinezë kanë humbur jetën pasi shpërthimi ka qenë tepër i fuqishëm. Ai shprehet se është tepër e vështirë që forcat e shpëtimit të deportojnë deri në nivelin 21. Sipas tij shpërthimi mund të ketë ndodhur si pasojë e një faktori të jashtëm  duke qenë se gazi metan nuk shpërthen pa shkak. Ai evidenton se kërkimet janë ndërprerë dhe do të rinisin sërish kur zona të pastrohet nga gazi.

Kryebashkiaku i Bulqizës Damsi: Nuk konfirmohet zyrtarisht vdekja e minatorëve kinez
Në një lidhje telefonike për Report Tv, kryebashkiaku i Bulqizës Damsi shprehet se nuk mund të konfirmohet zyrtarisht se tre minatorët e bllokuar prej disa orësh në minierë mund të kenë vdekur. Operacioni për gjetjen e tyre po vijon ende.

I pyetur për kushtet e punën në minierë, Damsi është shprehur se janë shumë të mirë, se janë bërë përmirësime nga dita në ditë. Gjithashtu ai u shpreh se minatorët kanë mbetur të bllokuar në nivelin e 21 dhe se aktualisht është e pamundur të futen specialistët.

Shqiptarja.com  06.02.2017

Këshilli Administrativ i Institutit të Sigurimeve Shoqërore i ka propozuar qeverisë faljen e borxheve, të krijuar për një kategori minatorësh dhe invalidësh, të cilët paralelisht me pensionin kanë zhvilluar aktivitet ekonomik si të punësuar”. Gjithçka bëhet me dije nga nëndrejtori i ISSH-së, Ali Emini, i cili përmes kësaj interviste dhënë për “Gazeta Shqiptare” shpjegon në detaje se cilët janë përfituesit nga vendimi i marrë në datën 23 dhjetor, të vitit që lanë pas.

Z. Emini, 3 javë më parë Këshilli Administrativ i ISSH-së miratoi vendimin “Për faljen e detyrimeve ndaj fondit të sigurimeve shoqërore, të invalidëve dhe ishminatorëve, që përfitojnë sipas ligjit nr. 150/2014”. Çfarë parashikon konkretisht ky vendim?
Në muajin dhjetor Këshilli Administrativ i Institutit të Sigurimeve Shoqërore mori një vendim që t’i propozojë Këshillit të Ministrave dhe më tej, Kuvendit, për një falje të disa borxheve që janë krijuar në llogaritë e pensioneve të disa invalidëve dhe disa ishminatorëve që kanë marrë pension si minatorë, por që kanë marrë pension në moshën 55 vjeç.

Përse ishin krijuar këto debi?
Historiku i krijimit të këtyre debive është i tillë për grupin e minatorëve. Një minator që del në moshën 55 vjeç nuk ka të drejtë që të marrë pensionin dhe njëkohësisht të punojë. Për këtë, të gjithë këta persona, kur kanë dorëzuar dokumentet pranë sigurimeve shoqërore, përveç dokumenteve që kanë provuar vjetërsinë e punës, etj. kanë dorëzuar dhe një dokument ku thuhet se nuk zhvillojnë aktivitet ekonomik. Faktikisht, një pjesë e tyre kanë zhvilluar aktivitet ekonomik. Ata që kanë dalë në pension janë rreth 3200 persona, por për një pjesë të tyre ka rezultuar se përveçse kanë marrë pension, kanë marrë dhe pagë nga puna. Kjo ka ardhur si pasojë e luftës kundër informalitetit, të ndërmarrë nga qeveria shqiptare ku midis të tjerash është edhe lufta kundër punës së zezë. Kështu që, të gjithë punëdhënësit kanë qenë të detyruar të deklarojnë punëmarrësit e vet.

Për çfarë periudhash flasim, pra kur janë krijuar këto debi?
Flitet për persona që kanë punuar në vitin 2016, për disa muaj ose përgjatë gjithë vitit.

Sa është masa e borxhit, që iu falet?
Borxhi i tyre vjen në nivelet që nga 15 mijë lekë të reja deri në 150 mijë lekë të reja.

Përse vjen ky propozim nga ana e ISSHsë?
Fakti që ISSH ndërmori këtë hap nuk ishte fakti që s’kishte dokumente që të provonim shkeljen e dispozitave ligjore nga këta persona, por jemi përpara kushteve kur këta janë një grup shoqëror me të ardhura të kufizuara, megjithëse janë në moshë të re sepse një burrë del 65 vjeç në punë. Sidoqoftë, duke qenë se janë pensionistë dhe kanë të ardhura të kufizuara, ndërkohë që edhe dispozitat ligjore janë të reja dhe ndoshta nuk e kanë fituar qytetarinë dhe nuk njihen mirë nga ata që e marrin këtë pension, u gjykua që t’i bëhet një propozim qeverisë dhe më pas Kuvendit, që të bëjë një amnisti vetëm për këtë periudhë. Ky është një propozim për të marrë një masë sociale, për të ndihmuar këta njerëz.

Po në rastin e invalidëve, përse janë krijuar borxhet?
E njëjta gjë ka ndodhur edhe me invalidët: të plotë apo të pjesshëm. Nëse një person merr pension invaliditeti dhe është komisionuar në Komisionet Mjekësore të Caktimit të Aftësisë për Punës (KMCAP), duke u përcaktuar si invalid që nuk mund të kryejë asnjë lloj pune, ky njeri absolutisht nuk ka të drejtë të punojë. Megjithatë ai mund të gjejë një punë të përshtatshme, sepse për shembull një invalid mund të mos ketë dy këmbët, por mund të punojë në një punë që është me karrige. Nëse kjo kategori personash e gjejnë një punë të përshtatshme, atëherë ata duhet të deklarohen pranë sigurimeve shoqërore, që t’u ndërpritet invaliditeti i plotë dhe t’u jepet një invaliditet i pjesshëm. Ata invalidë dhe të sëmurë janë dhe diçka duhet të marrin nga sigurimet shoqërore, por nuk mund të marrin një pension të plotë, i cili jepet vetëm atëherë kur nuk zhvillon aktivitet ekonomik.

Sa është numri i përfituesve nga ky vendim?
Ka pasur mjaft raste. Kanë qenë invalidë të plotë dhe janë verifikuar nga sigurimet shoqërore që realisht janë invalidë, por që kanë gjetur një punë të përshtatshme që mund ta bënin edhe pse ishin invalidë. Edhe për këta persona është propozuar që të ketë një falje të detyrimit të krijuar, i cili është në masën e pensionit të 2-3 muajve, dhe që shkon në masën e 4-5 mijë lekë të reja, por ka dhe invalidë që kanë edhe disa vite që punojnë.

Këtyre personave iu mbahet nga pensioni ky detyrim i krijuar?
Aktualisht ata janë në proces për t’iu mbajtur nga pensioni ose për të shkuar edhe te paditë, por është menduar që të propozohet kjo amnisti, sepse ata faktikisht janë invalidë dhe diçka duhet të përfitojnë nga sigurimet shoqërore. Ata nuk kanë qenë plotësisht të ndërgjegjshëm se çfarë veprimesh duhet të bënin pavarësisht se në dosjen e tyre është deklaruar që nuk zhvillojnë aktivitet ekonomik. Përveç këtyre janë dhe një kategori personash, jo e vogël, të cilët janë në kushtet e invaliditetit të pjesshëm dhe nga KMCAP është përcaktuar që duhet të punojnë me orar të reduktuar: në arsim, shëndetësi, ndërmarrje të ndryshme etj. Këta persona, megjithëse në kohën e komisionimit janë sjellë dokumente që punojnë me kohë të pjesshme, nga kontrolli që është bërë tani, ka rezultuar që këta persona kanë marrë pension të pjesshëm invaliditeti dhe ndërkohë kanë marrë dhe pagën e plotë. Nga studimi që i është bërë kësaj kategorie është konstatuar se ka arsimtarë që punojnë në fshatra, që nuk e kanë normën e plotë në arsim, pavarësisht se rrogën e marrin të plotë. Këta persona duhet të deklarohen se marrin rrogë për 6 orë, por faktikisht këtu kemi përplasjen që ai është invalid dhe duhet të marrë pensionin e invaliditetit, por edhe rrogën, sepse punon. Faktikisht, jemi në kushte kur përdorim fonde publike dhe natyrisht që fondet publike janë të harmonizuara me njëri-tjetrin. Për të gjitha këto, u mor vendimi nga Këshilli Administrativ i ISSH-së. Kjo masë, duke u kthyer dhe në ligj ndihmon këta persona që t’iu shkarkojë debitë e momentit, por ama krijon dhe një precedent që ndihmon këtë kategori, por që nuk duhet të përsëritet në të ardhmen.

Kjo është arsyeja që do të falen debitë e krijuara deri më datë 31 dhjetor 2016 dhe jo ato që krijohen pas kësaj date?
Po, nuk do të ketë më falje për debitë e krijuara pas kësaj date.

Keni informacion se kur do të kalojë për shqyrtim nga ana e qeverisë, propozimi juaj?
Jemi në kushtet e një propozimi nga Këshilli Administrativ, që më parë duhet të miratohet nga qeveria. Që ky propozim të shkojë në qeveri për t’u shqyrtuar duhet të merren mendimet e ministrive. Më konkretisht nga Ministria e Mirëqenies Sociale dhe Rinisë, e Financave dhe ajo e Drejtësisë dhe më pas do të shkojë në qeveri. Ndërkohë që, nëse miratohet në qeveri ajo do të jetë objekt shqyrtimi në parlament, sepse gjithmonë amnistitë miratohen me ligj.

Shqiptarja.com  16.01.2017

Autoritetet kineze e kanë konfirmuar se së paku 10 minatorët e ngujuar në një minierë të qymyrit kanë vdekur, duke e rritur numrin e viktimave në 32 të vdekur në tërësi, në Kinën veriore.

Konfirmimi i rasteve të fundit është dhënë një ditë pas një shpërthimi të shkaktuar nga gazi në minierën e qytetit, Chifeng.

Ekipet e shpëtimit kanë gjetur trupat e 22 minatorëve pothuajse menjëherë pas shpërthimit.

Në tërësi kanë qenë 181 minatorë që ishin duke punuar nën tokë kur ka ndodhur shpërthimi.

Agjencia shtetërore e lajmeve, Xinhua raporton se 149 minatorë kanë arritur të shpëtojnë.

Agjensia e lajmeve ekonomia,  05.12.2016

Barazim i masës së pensioneve të minatorëve me pensionet e forcave ajrore dhe detare. Kjo është kërkesa kryesore që vjen nga Sindikata e Pavarur e Minatorëve të Shqipërisë.

Pas uljes së moshës së daljes në pension, minatorët kërkojnë që të trajtohen edhe me një pension dinjitoz duke ju referuar edhe vështirësive të punës.

Gëzim Kalaja, presidenti  i SPMSH është shprehur se ka ardhur koha që pensionet e minatorëve të rriten, kërkesë kjo që duhet të merret në konsideratë për vitin 2017. Aktualisht pensioni që marrin forcat ajrore është sa 50% e pagës që kanë marrë në kohën që ishin në punë.

Pensionet e tyre, duke ju referuar edhe shkallës së vështirësisë, shkojnë deri në 60 mijë lekë.

Revista Monitor,  24.10.2016