info@energjia.al

Makina e parë elektrike e Porsche do të dalë në shitje në fund të vitit 2019, bëri të ditur prodhuesi i makinave në Frankfurt në “Motor Show”. E quajtur Mission E, makina do të ketë një çmim të ngjashme me Porsche Panamera, dhe do të ketë çmim rreth 80,000 dollarë ose më shumë në SHBA.

Mission E u zbulua fillimisht në vitin 2015, por tani është duke hyrë në fazat përfundimtare të zhvillimit përpara se të transportohet në të vërtetë, sipas Revistës së Makinave.

Mission E ka një motor krejtësisht elektrik, dhe është vendosur të zërë një vend midis Panamera dhe 911 në llojin e automjeteve Porsche. Është një makinë sportive me katër dyer, dhe po përgatitet për testet e para të prototipit publik.

Në konceptin origjinal makina elektrike kishte një motor prej 600 bhp dhe mund të ndihmojë Porsche-n që të shkojë ‘kokë më kokë’ me modelin e Tesla-s.

Scan Tv,  20.09.2017

Skandali ”Dieselgate”, ku u përfshinë rreth 100 milionë automjete në Evropë, ka shkaktuar vdekjen e 5 000 personave në vit.

Sipas një hulumtimi të realizuar nga Instituti Norvegjez i Meteorologjisë dhe i Analizës së Sistemeve të Aplikuara  rezulton se ka pasur një rritje te konsiderueshme në normat e vdekshmërisë në Evropë.

”Të paktën 10 mijë vdekje të foshnjave në Evropë kanë lidhje drejtpërdrejtë me ‘Dieselgate” sipas hulumtimit.

Gjithashtu theksohet se në mesin e vendeve evropiane, Italia, Gjermania dhe Franca për shkak të numrit të madh të popullsisë dhe përdorimit të automjeteve me naftë janë vendet të cilat janë prekur më shumë nga gazrat e çliruara nga automjetet.Ndërsa vendet e prekura me pak janë Norvegjia, Finlanda e pjesa greke e Qipros.

Skandali shpërtheu në shtator të vitit 2015 pas deklaratës se ”Volkswagen”se  kishte raportuar gabim normat, ndërsa ishte bërë e ditur se edhe kompanitë te tjera kishin aplikuar metoda të ngjashme të emetimit të naftës.

Vizion Plus,  19.09.2017

Royal Dutch Shell, që është operatori më i madh në botë për shpërndarjen e karburanteve, ka njoftuar dy lëvizje të reja, që hedhin dritë mbi planet e kompanisë për të ardhmen, por edhe për vetë të ardhmen e sektorit.

Së pari, kompania ka njoftuar se do të instalojë pika të karikimit të shpejtë të makinave elektrike. Së dyti, pas plot 100 vitesh, gjigandi anglo-holandez, njofton se është tërhequr nga nxjerrja e naftës nga Iraku.

Plani i parë, ai i instalimit të pikave të karikimit të makinave elektrike do të fillojë nga Europa dhe Kalifornia, dhe këto pika do të instalohen pranë pompave tradicionale të furnizimit me benzinë dhe naftë. Objektivi i kompanisë është që, brenda vitit 2025 të mbledhë 20% të të ardhurave nga pikat e furnizimit alternativ, jo vetëm elektrike, por edhe gaz, hidrogjen dhe biokarburant.

Shell i ka të gjitha mundësitë ta realizojë këtë, pasi ka më shumë pika karburanti seç ka pika McDonalds lokale nëpër botë, 43 mijë të tillë në 80 shtete të ndryshme. Shell bëhet kështu gjigandi i parë në sektor që vë bast te elektrikja.

Ndryshimi i planeve vjen edhe për shkak të bindjes së kompanisë se, çmimi i karburanteve do të mbetet i dobët përgjithmonë. Duke qenë se makinat elektrike janë kërcënimi më i madh për kompanitë e naftës, ky vendim i Shell përkthehet në një revolucion të mirëfilltë. Kompania ka dhënë një sinjal të qartë, dhe pritet që të tjerë ta ndjekin.

Scan Tv,  15.09.2017

Bashkia e Tiranës kërkon të japë shembullin në ekologjizimin e flotës së automjeteve në kryeqytet, duke blerë 6 automjete elektrike.

Në procedurën e hapur ditën e premte për blerjen e disa mjeteve të transportit për nevojat e Bashkisë, krahas 1 mikrobuzi, 2 karotrecash dhe 2 kamionçinash Pick-Up, preventivi përfshin edhe 5 autovetura elektrike dhe 1 autoveturë elektrike hibride, e cila funksion edhe me benzinë.

Krahas 6 autoveturave elektrike, tenderi përfshin edhe blerjen e një karikuesi fast-charger për këto lloje automjetesh, për një fond limit prej mbi 48 milionë lekësh.

Pjesa më e madhe e këtij fondi duket se do të shkojë pikërisht për blerjen e automjeteve elektrike të prodhuara 2 vitet e fundit me kilometrazh zero. Sipas specifikimeve për automjetet elektrike, kërkohet që bateria të ketë një kapacitet minimal prej 55 KWh dhe modelet më të lira me këto parametra nisin nga 37 mijë dollarë, deri në mbi 100 mijë dollarë për modelet më të kushtueshme Tesla.

Por pavarësisht avantazheve ekologjike, problemi më i madh me autoveturat elektrike mbetet distanca që mund të përshkojnë. Nëse këto automjete do të jenë të karikuara plotësisht, distanca maksimale do të jetë 300 kilometra, e cila është e mjaftueshme për të shkuar nga Tirana në skajet e Shqipërisë.

Nuk dihet nëse stacioni i karikimit të Bashkisë do të mund të përdoret edhe nga automjetet e tjera elektrike në kryeqytet, duke iu shtuar atyre të Sheshit Skënderbej dhe Bulevardit të ri, por diçka e tillë do t’i jepte një shtysë më shumë qytetarëve për të kaluar në makina elektrike me bateri.

Fituesi i këtij tenderi do të ketë 90 ditë kohë për të dorëzuar mjetet, çka nënkupton se me shumë gjasa do t’i shohim veturat elektrike në qarkullim në fillim të vitit të ardhshëm.

Scan Tv,  15.09.2017

Mbi 700 vjet pasi Marco Polo bëri rrugën drejt Kinës për arsye tregtare, rrjetin e vjetër të karavanëve të quajtur ‘Rruga e Mëndafshit’, një çift nga Gjermania vendosi se mund të bënte të njëjtën gjë me makinën e tyre elektrike Tesla.

Problemi kryesor do të ishte mungesa e stacioneve të karikimit, por Benedikt Ummen dhe e dashura e tij Magdalena Witty ishin të vendosur të bënin diçka që nuk e kishte bërë askush tjetër më parë.

“Motoja ishte që në fillim: ‘Dil jashtë Europës’. Ne donim të përjetonim sfida”, thonë ata.

Rruga do të kalonte nga Zvicra në Austri, Sloveni, Kroaci, Bosnje dhe Hercegovinë, e më pas Mali i Zi, Shqipëri, Kosovë, e Bullgari.

“Fillimi ishte shumë lodhës. Ne udhëtonim shumë gjatë çdo ditë dhe ishim gjithashtu të keqorganizuar”, thotë Ummen, i cili ka mbaruar për inxhinieri mekanike.

Nga mbulimi i rrugëtimit në Instagram, çifti duket se ka ndaluar edhe në Shkodër, në një servis.

Scan Tv,  14.09.2017

Kina do të caktojë një datë për prodhuesit e makinave, për të përfunduar shitjet e automjeteve që përdorin lëndë djegëse fosile, një lëvizje që synon të nxisë kompanitë për të përshpejtuar zhvillimin e makinave elektrike për tregun më të madh në botë.

Ministria e Industrisë dhe Teknologjisë së Informacionit deklaroi se Qeveria po punon me rregullatorët e tjerë mbi një afat kohor për të përfunduar prodhimin dhe shitjet.

Kjo lëvizje do të ketë një ndikim të madh në mjedisin dhe rritjen e industrisë së makinave në Kinë. Kjo do të bëjë që prodhuesit lokalë dhe globalë të zhvendosen drejt makinave elektrike, gjë që do të nxisë shitjen e tyre dhe reduktojë ndotjen.

Prodhuesi japonez Honda, ka lajmëruar se do të prezantojë një model elektrik për tregun kinez në vitin 2018.

Kina po përpiqet të mbajë premtimin për të limituar emetimin e gazrave ndotës deri në vitin 2030 dhe është vendi i fundit që planifikon të ndalojë makinat që përdorin lëndët djegëse fosile.

Mbretëria e Bashkuar deklaroi në Korrik se planifikon të ndalojë makinat që përdorin naftë dhe benzinë deri në vitin 2040, ndërsa Franca lajmëroi të njëjtën gjë, për të reduktuar ndotjen e ajrit dhe arritur angazhimet e rëna dakord në marrëveshjen e Parisit.

Scan Tv,  11.09.2017

Ekipi Sonnenwagen (makina diellore) Aachen zbuloi më 15 Korrik 2017 para spektatorëve në Nurburgring makinën e tyre që ushqehet vetëm me energji diellore. Skuadra do të jetë e vetmja nga Gjermania, e cila do të marrë pjesë në Sfidën Botërore Diellore, ku duhet të kapërcejë 300 km përmes Australisë, në kushtet nga më të vështirat në planet.

Një ide e tre studentëve nga qyteti i Aachen në verën e vitit 2015, u shndërruar në një projekt gjigand inxhinierik. Duke pranuar ndihmë nga shokët e klasës dhe miq të tjerë nga fusha të ndryshme, ekipi u rrit në 40 vetë dhe kështu lindin Sonnenwagen Aachen.

Ndryshe nga ekipet e tjera që do të konkurrojnë, skuadra nuk kishte asnjë eksperiencë në ndërtimin e një makine diellore, e as nuk mund t’ia lejonte vetes të shkëputej nga studimet për të dizajnuar automjetin.

Gjatë vitit të parë, gjatë fazave të konceptimit dhe dizajnimit, nuk ishte shumë e vështirë të balancoje studimet dhe projektin. Por kur filluar ta ndërtonim makinën, shumë njerëzve u duhej shumë informacion dhe kompanitë nuk para punojnë në darkë. Ndaj na duhej vazhdimisht të ndërprisnim mësimin me telefonata dhe emaile për t’u siguruar që gjërat po shkonin siç duhej”, tha Hendrik Lobberding, një student masteri në Inxhinieri Mekanike.

Gara është zhvilluar çdo dy vjet që prej 1987-ës. Për ta kryer rrugën nga Darwin në veri të Australisë, deri në Adelaide në jug duhen 8 ditë me energji diellore. 46 ekipet pjesëmarrëse mund të udhëtojnë deri në 8 orë në ditë, me mundësinë për t’u ndaluar gjatë kësaj kohe vetëm për ndërrime pilotësh dhe për riparime të vogla. Ndërsa natën ekipet do të duhet të ngrenë kampe në fusha.

Rregullorja strikte e kampionatit detyroi skuadrën të përdorë shumë materiale alternative si fibra karboni dhe të dizajnojë suspensione e lidhje të veçanta. Një ndryshim në rregulla solli edhe eliminimin e 1/3 së panelit diellor të ekipit për t’iu përmbajtur peshës dhe madhësisë së përcaktuar.

Teksa dielli do të jetë gjaku i kësaj gare, do të jetë edhe një nga problemet më të mëdha. Për të zvogëluar të papriturat, ekipi gjerman testoi disa bateri në kushte ekstreme brenda kabinave të saunave të skuadrave sportive të universitetit.

Sfida Botërore Diellore do të zhvillohet në datat 8-15 Tetor.

Scan Tv,  06.09.2017

Mbretëria e Bashkuar, ashtu si Franca, premtuan se do të ndalojnë shitjen e automjeteve me naftë dhe benzinë deri në vitin 2040, me synim rritjen e cilësisë së ajrit dhe uljen e çlirimit të gazrave, si pasojë e ngrohjes së planetit.
Kur dy industritë më të mëdha të Europës vendosën “shfuqizimin” e teknologjisë, e cila ka mbështetur industrinë e makinave për më gjatë se një shekull, vjen natyrshëm që investitorët t’i frikësohen këtij pozicioni sfidues ekzistencial për industrinë.

Por, edhe pse kalimi nga automjetet me djegie motorike të brendshme me karburant në automjete me motor elektrik, do të sjellë në terma afatshkurtër pak “dhimbje financiare” për prodhuesit e makinave (dhe disa prej suppliers-ave të tyre), në terma afatgjatë ai mund të jetë i favorshëm për përfitime. Dhe prodhuesit e Europës janë më të fortë sesa mund të mendojmë.

Sot, automjetet tërësisht elektrike shënojnë më pak se 1% të shitjeve të makinave të reja në Bashkimin Europian. Për të pasur këtë shifër pothuajse 100% brenda dy dekadave, sigurisht do të duhen miliarda euro investime (sidomos në vendosjen e kullave të karikimit të mjeteve). Drita jeshile është ndezur për makinat elektrike. Shifrat e publikuara javën e kaluar, treguan se shpenzimet e kërkimit dhe zhvillimit të Daimler AG u rritën në 19% në gjysmën e parë të 2017-s krahasuar me ato të një viti më parë.

Ligjvënësit e kanë vënë industrinë në një dilemë sepse po shtyjnë investimet, në mënyrë që t’i bëjnë motorët e veturave ekzistuese me djegie, më efikas.

Megjithatë kjo teknologji mund të bëhet e vjetër shumë shpejt, – veçanërisht nëse prodhuesit e makinave humbin një betejë të marrëdhënieve publike për të shpëtuar reputacionin e naftës. Rreziku që, një ditë atyre do t’ju duhet të ulin vlerën e motorit me djegie nuk është i papërfillshëm, – siç e shpjegova këtu.

Një ndryshim në kurbën e grafikut mund të shihet rreth vitit 2025, atëherë kur Bloomberg New Energy Finance, mendon se automjetet elektrike do të fillojnë të kenë çmime konkurruese me ato të makinave me djegie motorike me karburant (pa subvencione). Me qëllim uljen e kostove operacionale, shitjet e automjeteve elektrike duhet të nisin të rriten me shpejtësi. Kjo gjë mund të fillojë të ketë ndikim në vlerën e shitjes së mjeteve me naftë dhe benzinë, më përpara sesa qeveria të ndalojë me ligj çdo shitje të këtyre makinave.

Analistët e Berenberg thonë se një rënie prej 20% e “vlerës së mbetur të mjeteve me djegie motorike me karburant është e pritshme”, gjë që mund të kërcënojë biznesin e mbetur të prodhuesve të makinave, aktualisht një burim i mirë i të ardhurave. Daimler financon vetë gjysmën e shitjeve të makinave të saj dhe departamenti i saj i financës gjeneroi një 19 përqindësh mbresëlënës të kthyeshmërisë nga kapitali në tremujorin e fundit.

Ku është drita në fund të tunelit për të cilën po flisnim? Së pari, prodhuesit e makinave nuk janë aq të dobët sa çmimet e tyre të aksioneve mund t’ju kenë lënë të besoni. Kërkesa në rritje e ndihmoi Daimler të gjenerojë një fluks të rrjedhjes së parasë suplementar prej 3 miliardë eurosh në 6-mujorin e parë të vitit, ndërsa rivali PSA Group Ltd. u mburr me më shumë se 13 miliardë euro cash dhe ekuivalentë në fund të qershorit. Ai arriti një marzh operativ prej 7.3%, një sukses mjaft i jashtëzakonshëm për një prodhues të tregut për masat.

këta janë mbrojtës shumë të mirë, duke pasur parasysh shpenzimet e mëdha që do të duhen në vitet e ardhshme.
Me të kaluar pengesën e investimit fillestar, automjetet elektrike duhet të fillojnë të kushtojnë më pak për t’u prodhuar sesa automjetet me motor me djegie: kostot e baterisë po ulen shpejt, ka shumë më pak përmbajtje mekanike për një makinë elektrike dhe ndoshta do të nevojiten më pak punëtorë për ta bërë atë.
Analisti i Exane BNP Paribas, Stuart Pearson, thotë se makinat elektrike mund të arrijnë një kthim të shitjeve operacionale prej me shumë se 10% jo më vonë se 2025 – më mirë se rentabiliteti i një makine tipike me motor me djegie me karburant.

Pra, kemi arsye të besojmë se prodhuesit e makinave kanë mundësi t’i mbijetojnë vdekjes së automjeteve me karburante. Po me punëtorët, çfarë do të ndodhë? Megjithëse, të martën, qeveria angleze u lehtësua kur BMW AG premtoi prodhimin e një Mini në version elektrik në Oksford, pjesët elektrike të së cilës do të përgatiten në Gjermani. Ndalimi i shitjes së automjeteve me naftë apo benzinë është diçka, ndërsa sigurimi i vendeve të punës të krijuara nga revolucioni i industrisë së automjeteve elektrike për Britaninë, është tërësisht diçka tjetër.

Revista Monitor,  12.08.2017

Qeveria britanike pritet të lajmërojë ndalimin e prodhimit dhe rrjedhimisht përdorimit të makinave me naftë që prej vitit 2040.

Pjesë e paketës për të mbrojtur ambientin është edhe një fond prej 255 milion stërlinash për të ndihmuar këshillat lokalë të përballen me ndotjen aktuale të makinave me naftë, në kuadër të fondit të përgjithshëm prej 3 miliard stërlinash për të përmirësuar cilësinë e ajrit.

Para se të skadojë afati final i vendosur nga gjykata e lartë, qeveria do të publikojë strategjinë e saj për ajrin dhe në favor të makinave elektrike. Gjykata ndërhyri pas një beteje të gjatë ligjore dhe detyroi qeverinë që të hartonte plane të reja për tu përballur me nivelet e lartë të dioksidit të azotit.

Lëvizja britanike vjen ndërsa masa të tilla janë marrë edhe nga vende të tjera, më e fundit Franca që gjithashtu lajmëroi ndalimin e makinave me naftë pas vitit 2040. Por si në rastin e Francës, edhe në atë të Britanisë, nuk kanë munguar kritikat. Ekspertët e ambientin thonë se ambienti i ndotur ku jetojnë 40 milion njerëz në Britani ka nevojë për ndërhyrje tani dhe jo pas 23 vjetësh. Ndërsa ekspertë të teknologjisë thonë se ndalimi i makinave naftë në vitin 2040 është i pavlerë, pasi deri atëherë ato do të jenë zhdukur automatikisht si pasojë e përparimit të teknologjisë.

Telegrafi,  27.07.2017

Duke nisur nga 1 Shtatori i këtij viti, një test i ri për matjen e emisioneve nga automjetet, i quajtur WLTP, do të aplikohet për të gjithë modelet e reja të makinave që hyjnë në tregun europian.

Një vit më pas, testi laboratorik do të shtrihet edhe tek të gjitha makinat e reja të shitura përgjatë Bashkimit Europian.

Ky testim i ri do të sjellë kushte më realistike për matjen e emisioneve si CO2 se sa testi aktual laboratorik NEDC. Ai do të ofrojë përllogaritje më të sakta për konsumin e karburantit dhe emisionet e një makine, por do të ketë ndikime edhe në taksimin e automjeteve.

Aktualisht, 19 shtete anëtare aplikojnë taksim për CO2 tek makina, bazuar tek vlerat e tyre laboratorike. Duke qenë se testi i ri është më i vështirë, do të rezultojë në vlera më të larta për të njëjtin automjet, çka do të ketë një impakt negativ në taksimin e automjeteve.

Shoqata e prodhuesve të automjeteve i bën thirrje qeverive të këtyre vendeve të marrë masa që konsumatorët të mos preken nga testi i ti.

“Qeveritë kombëtare duhet të veprojnë për t’u siguruar se taksimi në bazë të CO2 do të jetë i drejtë, meqenëse WLTP do të rezultojë në vlera më të larta për të njëjtin automjet. Nëse nuk e bëjnë një gjë të tillë, barra financiare do t’i bjerë drejtuesve”, shkruan njoftimi i ACEA.

Duke nisur nga Shtatori i 2017, një model me vlera 100g CO2 për kilometër do të rezultojë në 120g CO2/km sipas testit të ri.

Scan Tv,  27.07.2017