info@energjia.al

Grupi gjerman Volkswagen deklaroi se planifikon të shpenzojë 10 miliardë euro deri në vitin 2025 për të zhvilluar dhe prodhuar automjete elektrike, ndërkohë që përpiqet të përshtatet me rregullat e ashpra të Kinës. Grupi, që përfshin Volkswagen dhe Audi, synon të prezantojë 15 modele të reja të makinave elektrike (NEV) në tre vitet e ardhshme dhe 25 modele shtesë deri në 2025-ën, deklaroi shefi i kompanisë për Kinën Jochen Heizmann.

Prodhimi dhe kuotat për shitjet të Kinës, që duhet të arrihen deri në vitin 2019, kanë nxitur një sërë marrëveshjesh për makinat elektrike, në mënyrë që të përputhen me rregullat. Ata që dështojnë ta bëjnë, janë detyruar të blejnë kredite.

Volkswagen zotëron rreth 10 modele elektrike në tregun e Kinës, megjithatë të gjitha janë modele të importuara me volum të limituar të shitjeve. Heizmann duke folur në shfaqjen e automjeteve në Guangzhou, shtoi se firma gjermane pritet të shesë 400,000 makina elektrike në vit në tregun kinez deri në 2020-ën dhe 1.5 milionë në vit deri në vitin 2025. Hiezmann tha se të gjitha këto modele do të kenë një limit udhëtimi prej 400-600 km për një karikim.

Për krahasim, model S i Tesla ka një limit prej 490 km e deri në 632 km, në varësi të kapacitetit të baterisë. Volkswagen deklaroi se ka gjithashtu besim se kompanitë brenda grupit dhe sipërmarrjet e përbashkëta në Kinë, do të gjenerojnë mjaftueshëm shitje të makinave elektrike për t’u përshtatur me kuotat deri në 2019-ën, duke shtuar se nuk do të jetë nevoja për të blerë kredite.

Scan Tv,  16.11.2017

Një kompani e re kaliforniane e quajtur RAESR (Rice Advanced Engineering Systems and Research) ka zbuluar një makinë krejtësisht elektrike që arrin një shpejtësi marramendëse.

Makina e quajtur Tachyon Speed, që e ka marrë emrin nga grimca teorike që lëviz më shpejt se drita, mendohet se mund të arrijë një shpejtësi maksimale rreth 390 km/h.

Ndërkohë, nga 0 në 100 km/h e bën për 3 sekonda.

Me sedilje të ngjashme me ato të makinave të Formulës 1, kjo makinë ka nisur që të konceptohet që në vitin 2012 e më në fund ka dalë në treg.

Porositë janë shumë të limituara.

Top Channel,  15.11.2017

Kompania gjermane EON do të bashkëpunojnë me norvegjezët e Clever që prodhojnë pika karikimi për të ndërtuar një rrjet me stacione karikimi të shpejta përgjatë autostradave europiane. Ky lajm vjen në një kohë që rajoni po has vështirësi të përhapjen masive të kërkesave për automjete elektrike.

Rrjeti do të mbështetet edhe nga një financim prej 10 milionë eurosh nga Bashkimi Europian dhe do të ketë fillimisht 180 stacione që shtrihen nga Italia në Norvegji. Stacionet e para në Gjermani dhe Danimarkë do të hapen para verës, ndërsa të tjerët do të vendosen të paktën çdo 180 kilometra dhe do të mundësojnë kështu udhëtimet brenda kontinentit.

Për të treguar dhe nxitur që makinat elektrike janë e ardhmja, BE po planifikon një standard të ri ndotjeje, duke u kërkuar prodhuesve të automjeteve me karburant të reduktojnë me 30% emetimet e gazit deri në vitin 2030.

“Ne duhet të jemi gati për adoptimin në masë të automjeteve elektrike. Na duhet infrastrukturë dhe na duhet të pakësojmë ankthin për rrezen e udhëtimit. Ajo çfarë na mungon është një rrjet që të lidhë qytete dhe shtete”, thotë Casper Kirketerp, shefi ekzektuiv i Clever.

Plani i Clever dhe EON është i ngjashëm me përpjekjet e Volkswagen, BMW dhe Mercedes-Benz që janë bashkuar për të ofruar një rrjet me 400 stacione karikimi deri në vitin 2020. Investimi reflekton vështirësinë e prodhuesve për të zbutur shqetësimet e individëve mbi përdorimin e automjeteve me bateri.

Shqetësimi parësor është distanca që mund të përshkojë makina pa patur nevojë të karikohet sërish, e cila me bateritë varion nga 100 kilometra për modelet më të lira dhe deri në 570 kilometra për ato më të kushtueshmet të ofruara nga Tesla.

Stacionet e karikimit që do të vendosen nga Clever, kompani e cila operon tashmë 1500 stacione në të gjithë Skandinavinë dhe Gjermaninë, do të mund të karikojnë baterinë e një makine për 20 minuta. Ato do të mund të akomodojnë 2 deri në 6 makina dhe do të vendosen kryesisht në vendpushimet nëpër autostrada.

Scan Tv,  10.11.2017

Makinat elektrike mund të mos lëshojnë gazra në atmosferë, por ato janë ekologjike vetëm po aq sa burimi që prodhon elektricitet për bateritë e tyre. Sipas Unionit të Shkencëtarëve të Shqetësuar, nëse një vend përdor qymyrin për të prodhuar energji, sasia e emetuar në atmosferë pavarësisht nëse përdorim një makinë elektrike, do të ishte e ngjashme me atë të një makine normale me karburant.

Duke analizuar prodhimin e energjisë të 141 vendeve, studiuesit pranë Universitetit të Michigan kanë bërë një klasifikim të shteteve që kanë kështu energji më të pastër apo më të ndotur për të ushqyer makinat e tyre elektrike.

Ata përllogaritën sasinë e gazrave serë që lëshon për kilometra të përshkuar. Në vende si Shqipëria, Paraguai, Nepali dhe Etiopia, ku hidrocentralet përbëjnë pjesën më të madhe të energjisë elektrike të prodhuar, drejtuesit e makinave elektrike lëshojnë më pak emetime të gazrave.

Në fakt Shqipëria është në krye të listës dhe nuk emeton fare gazra, duke marrë një vlerësim prej 5100 MPG (ghg). Për ta krahasuar me një automjet normal, konsumi i këtyre gazrave në vendin tonë për makinat elektrike është 0 L/100 km.

Nga ana tjetër, vende si Shtetet e Bashkuara apo Kina që mbështeten më shumë në qymyr, marrin një vlerësim prej vetëm 51.5 MPG (ghg) dhe 40 MPG (ghg). Ekuivalenti i gazrave të lëshuar në atmosferë duke udhëtuar me makina elektrike do të ishte 4.2 litra/100 km për SHBA dhe 5.9 litra/100 km për Kinën.

Gjithsesi rezulton se përdorimi i automjeteve me bateri elektrike është pothuajse gjithmonë më i pastër se automjetet tradicionale. Vetëm në 19 vende, si Nigeria, Sudani i Jugit, Eritrea, etj., ku impiantet e prodhimit të energjisë bazohen shumë në qymyr dhe naftë, udhëtimi me makinë elektrike rezulton të jetë në fakt më ndotës se udhëtimi me automjete me karburant.

Më poshtë është një listë me ekuivalentin e ndotjes të prodhuar nga udhëtimi me automjete elektrike për 12 ekonomitë më të mëdha të botës.

Shtetet e Bashkuara 51.5 MPG (ghg) 4.2 L/100 km
Kina 40 MPG (ghg) 5.9 L/100 km
Japonia 44.3 MPG (ghg) 5.3 L/100 km
Gjermania 52.1 MPG (ghg) 4.5 L/100 km
Mbretëria e Bashkuara 67.8 MPG (ghg) 3.5 L/100 km
Franca 524.6 MPG (ghg) 0.4 L/100 km
India 35.7 MPG (ghg) 6.6 L/100 km
Italia 64.5 MPG (ghg) 3.6 L/100 km
Brazili 155.9 MPG (ghg) 1.5 L/100 km
Kanadaja 169.5 MPG (ghg) 1.4 L/100 km
Korea e Jugut 50.7 MPG (ghg) 4.6 L/100 km
Rusia 70.7 MPG (ghg) 3.3 L/100 km
Shqipëria 5100 MPG (ghg) 0 L/100 km

Scan Tv,  08.11.2017

Kompania me automjetet më të shitura japoneze, Toyota ndërmori hapin e radhës për një të ardhme me makina elektrike me bateri.

Toyota mendon se si makinat me bateri ashtu edhe ato me hidrogjen, do të jenë të nevojshme për të mbushur hendekun që do të lihet nga makinat me karburant.

Për herë të parë kompania paraqiti makinat me hidrogjen si alternativë e atyre me karburant në 2014 dhe që nga ajo kohë është përhapur në shumë vende të botës.

Megjithatë pas daljes së makinave elektrike, makinat me hidrogjen u “harruan” disi.

Babai i Prius, Uchiyamda thotë se Toyota nuk është kundër makinave elektrike me bateri dhe ka investuar fuqishëm në teknologji të baterive Lithium-ion.

Por gjithashtu shikon avantazhe të mëdha për makinat me hidrogjen të cilat vihen në lëvizje nga elektriciteti i prodhuar nga bashkimi i hidrogjeni dhe oksigjenit.

Një problem i madh i makinave elektrike me bateri është koha e gjatë për tu ngarkuar, deri në 18 orë në disa raste, dhe problemi rritet dita ditës nisur nga nevoja për të përshkuar distanca më të gjata dhe si rezultat i madhësisë së baterive.

Teknologjitë e ngarkimit të shpejtë po avancohen, por të presësh 30-40 minuta, përsëri është shumë.

Sakaq një makinë me hidrogjen mund të furnizohet në vetëm 5 minuta, por kostoja e lartë e prodhimit të tyre dhe mungesa e stacioneve të ngarkimi janë një tjetër problem për Toyota-n.

Kompania ka nisur një bashkëpunim me rivalët Nissan dhe Honda si dhe kompanitë e energjisë si Nippon Oil për të ndërtuar një rrjet pikash furnizimi me hidrogjen, raporton PcWorld.

Toyota Mirai, ende një koncept, do të mund të përshkojë një distancë deri në 500 kilometër në një të ardhme të afërt. Gjithashtu ulja e konsumit dhe rritja e fuqisë janë tjera sfida për Toyota-n.

Kompania beson se një prej tregjeve më shpresëdhënëse për makinën e saj me hidrogjen është Kina. Muajin e kaluar, Shangai bëri publike planet për të promovuar zhvillimin e makinave me hidrogjen duke rritur numrin e stacioneve.

Objektivi i qytetit është vendosja e 30,000 automjeteve me hidrogjen në rrugë brenda 2025-ës.

Scan Tv,  27.10.2017

Kërkesat botërore për benzinë mund të arrijnë maksimumin edhe për 13 vite, kjo falë ndikimit që do të kenë makinat elektrike me motorët efikasë. Kështu parashikojnë ekspertët e energjisë, të cilët pohojnë se kërkesat pritet të ulen ndjeshëm pas vitit 2025.

Të dhënat janë bërë publike nga “Wood Mackenzie”, kompania e hulumtimit për çështjet e energjisë, me bazë në Britani të Madhe, ku më tej shkruhet:

“Kërkesa botërore për benzinë do të arrijë maksimumin në 13 vite, falë ndikimit të makinave elektrike dhe motorëve më efikasë. Futja e automjeteve elektrike do të ulë ndjeshëm kërkesën e benzinës, sidomos pas vitit 2025. Një raport i ri nga analistët sugjeron se kërkesa globale të benzinës pritet të arrijnë deri në vitin 2030”, thuhet në raport.

Britania e Madhe dhe Franca kanë thënë kohët e fundit se do të ndërpresin shitjet e makinave të reja me benzinë dhe naftë deri në vitin 2040. Kina, tregu më i madh në botë i makinave, po shqyrton një veprim të ngjashëm, i cili do të ketë një ndikim të rëndësishëm në kërkesën e naftës.

Scan Tv,  20.10.2017

Mitsubishi Electric, njësi e ndarë nga Mitsubishi Motors, ka zbuluar një koncept makine autonome që quhet Emirai 4.

E mësuar me prodhimin e pajisjeve elektrike shtëpiake, Mitsubishi Electric është futur edhe në tregun e automobilëve tashmë. Kjo makinë ka një sensor që kap drejtimin e rrezikshëm të mjetit nga ana e shoferit duke u bazuar në mënyrën e uljes në sedilje.

Më shumë detaje për këtë makinë të re elektrike do të zbulohen në Panairin e Tokios, që do të nisë në 27 tetor.

Top Channel,  19.10.2017

Një makinë dy vëndëshe e cila përshkruan një distancë autonome 100-120 kilometra dhe e aftë për një shpejtësi deri në 80 km në orë ka hyrë në prodhim dhe tashmë është në dispozicion për shitje në Greqi.

E projektuar dhe prodhuar përmes bashkëpunimit të firmës greke Ecosun dhe një fabrike industrial kineze “Ecocar” u prezantua për herë të parë në Panairin Ndërkombëtar të 82 të Selanikut në shtator.

Kompania greke Ecosun  krijoi idenë tre vjet më parë duke projektuar produktin dhe duke furnizuar sistemet elektrike dhe bateritë.

Ndërkohë pjesa tjetër është bërë në Kinë, ku edhe ka më shumë eksperiencë më prodhimin e automjeteve elektrike dhe kushte shumë më fleksibël të prodhimitq ë luajnë një rol të rëndësishëm në konkurrueshmërinë e çmimit përfundimtar të produktit.

Është vetëm 224.5 centimetra e gjatë, 129 centimetra e gjerë dhe 157 centimetra e lartë, duke peshuar në një total prej 670 kg me bateritë e saj. Në këtë makinë rehatohen lehtësisht 2 persona dhe motori elektrik i saj 7.5 kW mundësohet nga gjashtë bateri me 72 volt.

Këto bateri mund të ngarkohen me 80 për qind brenda disa minutave dhe stacionet e ngarkimit janë vende publike .

Sipas prodhuesve rimbushja e plotë e një automjeti me një prizë normale kërkon 6 deri në 8 orë.

Scan Tv,  16.10.2017

Ditën e djeshme, kompania LG njoftoi se  do të hapë fabrikën më të madhe në Evropë të prodhimit të baterive litium-ion për makinat elektrike.

Sipas Reuters, kjo fabrikë do të hapet në vitin 2019-ën në Poloni dhe do të ketë një kapacitet prodhimi prej 100,000 bateri çdo vit.

Për ta krahasuar, duhet të marrim parasysh fabrikën më të madhe në botë për prodhimit e baterive në pronësi të Panasonic në Kinë e cila prodhon 200,000 bateri në vit.

Por sipas Elon Musk fabrika e tij Gigafactory do të prodhojë 500,000 baterinë vit.

LG do të shpenzojë afro 1.63 miliard dollar për fabrikën e cila do të ndërtohet në Wroclaw, 190 kilometër larg nga kufiri me Gjermaninë, shtëpinë e grupit Volkswagen i cili synon të investojë 20 miliard Euro në makinat elektrike deri më 2030-ën.

Scan Tv,  14.10.2017

Toyota po themelon një sipërmarrje të re për të zhvilluar teknologjinë e makinave elektrike me partnerin Mazda, duke u përpjekur që të arrijë në të njëjtin ritëm me kompanitë rivale, për të prodhuar makinat me bateri.

Politikëbërës në tregje kryesorë si Kina,  po bëjnë thirrje të ashpër për të kaluar te makinat elektrike në dy dekadat e ardhshme, duke i vendosur nën presion prodhuesit tradicional që të formojnë planet e tyre për këto makina, në një kohë të rënies së kostos për bateritë.

Toyota deklaroi se kompania e re do të zhvillojë teknologjinë për disa kategori të makinave elektrike, përfshirë makinat e vogla, kamionçinat dhe modelet SUV.

Toyota do të ketë një zotërim prej 90% në këtë kompani,  të quajtur “EV Common Architecture Spirit”, ndërsa Mazda dhe Denso, që është furnitori më i madh i Toyota, do të kenë 5% secila.

Pas vitesh duke u fokusuar në futjen në treg të makinave me hidrogjen, Toyota krijoi një njësi vitin e kaluar për të zhvilluar makina elektrike, që drejtohet nga presidenti i firmës Akio Toyota dhe deklaroi se planifikon të prezantojë këto makina në Kinë në vitet e ardhshme.

Toyota dhe Mazda, nuk prodhojnë aktualisht makina elektrike për pasagjerë.

Toyota ka nënvizuar vargun e limituar të makinave që operojnë me bateri si një ndër barrierat kryesore.

Buxheti për Kërkim dhe Zhvillim (R&D) i Mazda është shumë më i vogël krahasuar me Toyota, duke e bërë të vështirë zhvillimin e makinave elektrike vetëm.

Pas lajmërimit, aksionet e Mazda u rritën me 3%, ndërsa Toyota mbeti e pandryshuar.

Scan Tv,  29.09.2017