info@energjia.al

Autoriteti i Konkurrencës vendosi të mbyllë procedurën e hetimit të thelluar në treg për produktin gaz i lëngshëm, për konsumin familjar dhe për bizneset. Bëhet fjalë për të gjitha segmentet e tregut të ngarkim- shkarkimit, importit, depozitimit dhe shitjes me shumicë të produktit gaz i lëngshëm.

Ky vendim me nr. 476, datë 05.10.2017 është marrë nga Komisioni i Konkurrencës, i cili është bërë publik sot me botimin në faqen zyrtare të Autoritetit të Konkurrencës. Vendimi, përveç njoftimit për mbylljen e hetimit, ka në përmbajte edhe rekomandimet për operatorët që do të veprojnë në treg.

Autoriteti i Konkurrencës vendosi që të monitorojë tregun e ngarkim- shkarkimit, importit, depozitimit dhe shitjes me shumicë të produktit gaz i lëngshëm për konsum familjar dhe biznes për një periudhë 1 (një) vjeçare, duke filluar nga data 16 Tetor 2016.

“Komisioni i Konkurrencës, në mbledhjen e datës 5 tetor 2017, me vendimin nr. 476, datë 05.10.2017 vendosi që të mbyllë procedurën e hetimit të thelluar në këtë treg për produktin gaz i lëngshëm për konsum familjar dhe biznes, si dhe të japë rekomandimet e mëposhtme:

  1. Operatorit Shtetëror të Autorizuar, Ministrisë së Infrastrukturës dhe Energjisë dhe Ministrisë së Financave për të hartuar dhe miratuar një metodologji për rregullimin e tregut, që të përcaktojë në mënyrë të qartë rolin, funksionet dhe mënyrën e funksionimit të çdo operatori që vepron në këtë treg.
  2. Risjelljen në vëmendje të zbatimit të vendimit të Komisionit të Konkurrencës nr. 390, datë 22.12.2015.
  3. Subjektet e mësipërme duhet të njoftojnë pranë Autoritetit të Konkurrencës mbi zbatimin e rekomandimeve brenda 90 ditëve nga hyrja në fuqi e këtij vendimi”, thuhet në vendim.

Scan Tv,  12.10.2017

Rreth 20% e financimeve të Komisionit Europian do të përdoren për krijimin e masave lehtësuese në këtë sektor.

Sipas një raporti të Komisionit Europian, më shumë se 100 milionë dollarë amerikanë do të përdoren në mbështetje të një terminali të ri të gazit të lëngshëm natyror në ishullin kroat.

Liderët europianë deklaruan mbështetjen e tyre për financime në shifrën 472 milionë dollarë për projektet e rëndësishme në fushën energjetike në këtë komunitet. Rreth 20% e këtij fondi do të përdoret për ndërtimin e një terminali të ri të gazit të lëngshëm natyror në Kroaci. Ky fond është pjesë e një përpjekjeje në kuadër të ndërtimit të një sektori energjetik të qëndrueshëm europian me emetime sa më të ulëta të karbonit.

Këto janë projekte të një rëndësie shumë të madhe dhe mbi të gjitha me pasoja ndërkufitare, u shpreh në një deklaratë për shtyp, Maros Sefcovic, zëvendëspresident i sektorit të Energjisë në Bashkimin Europian. Dy vjet më parë, Komisioni nënshkroi një memorandum mirëkuptimi në Kroaci me vendet e Europës Qendrore dhe Jugore, ku një ndër pikat kryesore ishte reduktimi në maksimum i humbjeve të gazit në rajon.

Vitin e kaluar, Komisioni mbështeti planet e Finlandës në dhënien e 31.5 milionë dollarëve për të ndërtuar një terminal të gazit të lëngshëm natyror në portin Hamina në bregdetin jugor të vendit. Sipas Komisionit, strategjia që po ndiqet është në përputhje me përpjekjet e rajonit për të përmirësuar sigurinë e sektorit të energjisë në rajon. Janë të shumta vendet e Bashkimit Europian të cilat mbështeten te Rusia për furnizimin e tyre me gaz natyror. Këtu mund të përmendim shtetin e Finlandës, i cili mbështetet tërësisht te Rusia për plotësimin e nevojave të saj me gaz natyror.

Europa po përparon në përpjekjet e saj për t’u shkëputur nga kthetrat ruse në sektorin e energjisë. Strategjia e Sektorit të Energjisë në BE ka në qendër të saj uljen e emetimeve të karbonit dhe sigurimin e ekonomisë konkurruese.

Ndërlidhjet e duhura të linjave të energjisë elektrike dhe tubacioneve të gazit formojnë shtyllën kryesore të një tregu energjetik europian të integruar.

Revista Monitor,  05.03.2017

Qeveria ka planifikuar që në janar të vitit të ardhshëm të aplikojë akcizë për gazin e lëngshëm në nivelin 3 lekë për litër. Ministria e Financave ka arsyetuar se kjo masë ka qëllim përafrimin me standardet e BE-së dhe të vendeve të rajonit që e taksojnë këtë produkt.

Duke llogaritur që importi vjetor i gazit të lëngshëm është rreth 100 mijë tonë në vit, efekti në të ardhurat buxhetore do të jetë 540 milionë lekë nga akciza dhe 107 milionë lekë nga TVSH. Në total, 647 milionë lekë.

Diferencimi i këtij produkti, në raport me nënproduktet e tjera të naftës, bie ndesh me politikat e përafrimit gradual me nivelin e detyrueshëm minimal të taksimit që aplikohet në BE ku aplikohet akcizë në nivelin e detyrueshëm sipas direktivës, argumenton Ministria e Financave në relacionin përkatës për Paketën Fiskale të 2017-s.

Për të mos ndikuar në rritjen e shpenzimeve nga përdoruesit familjarë të industrisë dhe për të shmangur abuzimet që mund të ndodhin, duke aplikuar nivele të diferencuara, me qëllim inicimin e procesit të përafrimit siç edhe ka ndodhur me produktet e tjera të akcizës, është propozuar një nivel minimal taksimi 3 lekë për litër.

Paketa Fiskale 2017 më së shumti është bazuar te masat lehtësuese. Ligji kryesor pritet të jetë ai i faljes së gjobave.

Amnistia e pjesshme fiskale që qeveria ka nisur ta ndërmarrë këtë vit pritet të sjellë në buxhetin e vitit 2017 rreth 4.3 miliardë lekë më shumë. Ministria e Financave ka programuar se ligji për rivlerësimin e pasurive të paluajtshme, pritet të ketë efekte pozitive në të ardhurat për vitin 2017, rreth 2.1 miliardë lekë.

Ndërsa efektet e pritshme të projektligjit për faljen e një pjese të gjobave me kusht pagimin e detyrimit tatimor rreth 2.5 miliardë lekë. Qeveria duket se është duke i dhënë dorën e fundit një projektligji që fillimisht u trajtua si amnistia më e madhe fiskle e ndërmarrë ndonjëherë në vend, por për shkak të kushtëzimeve të Fondit Monetar Ndërkombëtar, do të finalizohet si një falje e pjesshme e gjobave.

Revista Monitor,  04.11.2016

Rritet sërish çmimi i gazit të lëngshëm në tregun fierak. Veç rritjes së çmimit të karburanteve ku dje një litër benzinë arriti në 1800 lek të vjetra, një tjetër rritje është shënuar për xhepat e varfër të konsumatorëve fierakë. Në këtë stinë të ftohtë të pragdimrit është rritur ndjeshëm edhe gazi i lëngshëm kaq i domosdoshëm për familjet fierake, për ngrohje dhe gatim. Në ditën e djeshme gazi lëngshëm pësoi një rritje 10 lekë më shumë duke u krahasuar me muajt gusht-shtator. Kështu një litër gaz i lëngshëm sot është tregtuar me 1600 lekë dhe në shumë pika gazi edhe me 1700 çka do të thotë më tepër varfëri për fierakët. Qytetarët shprehen se do t’u rikthehen traditës së vjetër të sobave me dru dhe shumë prej tyre kanë pohuar se kanë faturuar lata druri si dikur në pikat e tregtimit të tyre. Kjo për faktin se energjia elektrike dhe gazi i lëngshëm nuk janë çmime shumë të favorshme për ekonominë e tyre familjare. Për më tepër që në të shumtën e rasteve energjia elektrike “I lë në baltë” nga prerjet e saj vend e pa vend. “Energjia elektrike dhe gazi i lëngshëm nuk na bëjnë shumë punë për ngrohje dhe gatim”,-thotë Kastriot Cerma banues në lagjen “15 tetori” të qytetit të Fierit sepse çmimet e tyre po shkojnë në stratosferë. Ne kemi blerë një sobë druri në Kosovë dhe ngrohemi me dru. Edhe gatuajmë edhe ngrohemi. E kemi zgjidhur këtë problem sepse kemi fëmijë të vegjël dhe natyrisht nuk mund të jetojmë dot pa ngrohje në kushtet e temperaturave të ulëta”. Por për pensionet e moshës së tretë edhe druri i zjarrit është një luks për ta. Një pensionist thotë se prej vitesh nuk ndez zjarr në shtëpi së bashku me bashkëshorten tij.

Gazeta Metropol, 16.11.2011

Në prag të stinës së Dimrit një prej aktiviteteve që lulëzon është edhe tregu i bombolave të gazit të lëngshëm. Prej vitesh ligjet e miratuara prej Parlamentit dhe qeverisë qëndrojnë në letër, por nuk zbatohen, duke u bërë jo në pak raste edhe shkak i rrezikimit të komunitetit të gjerë. Një prej tyre është kontrolli shpërndarja dhe tregtimi i bombolave të gazit. Problemi është aq i thellë saqë për vite me radhe flitet, por asnjëherë nuk është formalizuar ky treg që lulëzon në informalitet të plotë. Kjo është një prej situatave më  paradoksale në Durrës që tregon se si një bombol gazi 10 apo 15 litërshe tregtohet në çdo vend, pavarësisht rrezikut që mbart. Por nuk ka asnjë statistikë sa është sasia e gazit të lëngshëm që konsumohet, sa taksa vilen nga ky biznes, dhe sa i sigurt është konsumatori? Ashtu si edhe sa aksidente kanë ndodhur për shkak të plasjes së bombolave të gazit nëpër familje. Në spital të thonë se aksidentet e kësaj natyre janë në rritje nga viti në vit. Ka patur mjaft viktima si pasojë e shpërthimeve nga gazi përveç të plagosurve dhe janë raste që vijnë si nga qyteti ashtu dhe nga fshati bëjnë të ditur mjekët  në Spitalin e Durrësit
Çmimet
Duket se fillimi i stinës së ftohtë ka rritur edhe kërkesën në treg për këtë mall. Me rritjen e kërkesës është rritur edhe çmimi që i ofrohet klientit. Një bombol 15-litërshe kushton deri në 2000 lekë, 300 lekë më shumë se një vit më parë. Në tjetër bombol 10 litërshe, të cilat janë më të përdorshmet në treg, kushton jo më pak se 1300 lekë. Por duket se pavarësisht çmimeve, cilësia e gazit dhe sasia lënë shumë për të dëshiruar. Nuk ka asnjë siguri se malli që blihet ka sasinë e duhur dhe cilësinë e deklaruar.
Policia zjarrfikëse
“Tregtimi i bombolave të gazit në ambiente, ku tregtohen mallrat ushqimorë është i kundraligjshëm”, deklaron shefi i Policisë Zjarrfikëse të Durrësit, Et’hem Bardhi.  “Situata është kaotike në këtë drejtim sepse qysh në fillim depozitat e karburanteve dhe ato të gazit të lëngshëm janë ndërtuar pa leje e pa asnjë dokumentacion në qytetin e Durrësit. Ky lloj aktiviteti ka qenë tërësisht informal për vetë specifikën që mbart. Por pesha dhe kontrolli i sigurisë, i bombolave të gazit është përgjegjësi e Inspektorati të Enëve nën Presion dhe Peshëmatjes, të cilët duhet të marrin përgjegjësinë për çdo aksident të ndodhur”, tha Bardhi. Në fakt ky Inspektorat ka pasur dy inspektorë me detyrë në Durrës, por mësohet se janë transferuar në Tiranë. Ky inspektorat ka për detyrë të kontrollojë depozitat dhe të gjitha enët që përmbajnë gaz që përfshijnë depozitat  mijëra tonëshe deri tek bombolat e thjeshta të gazit për sasinë, cilësinë, dhe sigurinë para se të shkojnë tek konsumatori. Pikat e tregtimit të karburanteve janë ndërtuar ngjitur me blloqet e banimit e poshtë pallateve kanë ndërtuar edhe depozitat. Policia zjarrfikëse e hedh fajin tek pushteti vendor, i cili ka dhënë lejen e ndërtimit për këto subjekte.
Banorët: “Ka ardhur koha të ketë shërbim të specializuar”
Banorët në Durrës shprehen se duhet të ketë shërbim të specializuar për gazin e lëngshëm që përdoret gjerësisht në të gjitha familjet shqiptare dhe jo vetëm. Ashtu sikurse të gjithë mallrat që kanë rrezikshmëri të lartë edhe për gazin e lëngshëm duhet të ketë shërbim, të specializuar, që në fund të ketë një përgjegjës, për çdo problem të vërejtur, dhe jo vetëm në rastet kur ndodhin fatkeqësitë, dhe faji mbetet jetim. “Nuk jemi fare të sigurt me gazin në shtëpi, por është i vetmi artikull që na nxjerr nga situata”, thonë banorët.

Gazeta Telegraf, 09.11.2011

Sipas drejtoreshës së këtij institucioni, është hapur hetim i thelluar ndaj kompanisë në Porto-Romano
Në tregun e shërbimit të gazit të lëngshëm ka monopol.
Me këtë konkluzion, Autoriteti i Konkurrencës i referohet situatës së krijuar në Porto Romano, ku kompania koncnesinare ndalon ngarkimin-shkarkimin e anijeve të gazit të lëngashëm.
Sipas drejtoreshës së këtij institucioni, Lindita Lati, Autoriteti ka hapur hetim të thelluar ndaj kompanisë Porto-Romano, e cila për shkak të sjelljes së saj të përsëritur, që shkel ligjin e konkurrencës, rrezikon penalizimi.
Ndër të tjera, Lati sqaron se arsyet që çojnë në krijimin e monopoleve si dhe ato që do të mund të shmangnin situata të tilla.
Aktualisht puna e Autoritetit të Konkurencës është e përqendruar në disa tregje, drejt të cilave kanë ardhur edhe ankesat e shumta nga konsumatorët.
Përsa i përket hetimit të thelluar në tregun e gazit të lëngshëm, disa ditë më parë.
Komisioni i Konkurrencës u shprehe se mund të ndodhemi përballë të rrezikut të kryerjes së një dëmi të rëndë dhe të pariparueshëm për konkurrencën, duke parë dhe mundësinë e shkeljes së ligjit “Për mbrojtjen e konkurrencës”.

TV ABC News, 16.08.2011