info@energjia.al

Shtetet e Bashkuara rikonfirmuan vendimin për t’u tërhequr nga Marrëveshja e Parisit mbi ndryshimet e klimës.

Departamenti i Shtetit deklaroi se ShBA-ja ka ndërmend të tërhiqet nga Marrëveshja e Parisit menjëherë sapo të jetë e përshtatshme. Një vendim i tillë mund të ndryshojë nëse kushtet e marrëveshjes “do të favorizonin” popullin amerikan.

Komentet u bënë gjatë bisedimeve mbi çështjet klimatike të cilat nisën javën e shkuar në Bon të Gjermanisë.

Siria ndërkohë, ka njoftuar se do të nënshkruajë Marrëveshjen e Parisit. Kështu që Shtetet e Bashkuara mbeten i vetmi vend në botë që hedh poshtë paktin global mbi klimën.

Agjensia e lajmeve ekonomia,  14.11.2017

Një raport për klimën thotë se Shtetet e Bashkuara tashmë janë duke vërejtur efektet e ndryshimeve klimatike, pasi temperaturat janë rritur në mënyrë drastike gjatë katër dekadave të fundit.

Sipas raportimeve të The New York Times, e cila ka thënë se ka siguruar një kopje të raportit të shkenctarëve nga 13 agjenci federale, thuhet se, valët e të nxehtit janë bërë shumë me të shpeshta në krahasim me valët e të ftohtit që nga vitit 1980.

Në këtë raport, po ashtu thuhet se gazrat serrë do të ndikojnë në rritjen e temperaturës globale, gjë të cilën presidenti i Shteteve të Bashkuara, Donald Trump dheanëtarët e kabientit të tij e kanë hedhur poshtë.

Një shkencëtar i cituar në mënyrë anonime nga Times, ka thënë se ai dhe hulumtesit e tjerë janë të shqetësuar se administrata e presidentit Trump, e cila duhet fillimisht ta miratojë raportin në mënyrë që të publikohet, do ta refuzojë një gjë të tillë.

Agjensia e lajmeve ekonomia,  09.08.2017

Deklarata përfundimtare e liderëve të grupit të 20 ekonomive më të industrializuara të botës, vuri në dukje një ndarje mes Shteteve të Bashkuara dhe vendeve të tjera anëtare mbi marrëveshjen e Parisit për klimën.

Kancelarja gjermane, Angela Merkel, tha se është e kënaqur që të gjithë vendet anëtare përveç SHBA, janë dakord se marrëveshja e Parisit është e pakthyeshme.

Ajo tha se nuk ka të njëjtin këndvështrim me Kryeministren e Britanisë, Theresa May, e cila tha se Washingtoni mund të vendosë që të rikthehet në marrëveshjen e klimës.

Për tregtinë, një tjetër pikë kyçe, liderët ranë dakord se do të luftojnë proteksionizmin, përfshirë të gjithë praktikat e padrejta tregtare.

“Tregjet duhet të qëndrojnë të hapura dhe proteksionizmi duhet luftuar. Gëzohem që jemi dakord për këtë. Të gjithë vendet anëtare jemi gati që veprimet tona të monitorohen nga Organizatat kryesore. Ne jemi gjithashtu dakord se avantazhet e tregtisë  ndërkombëtare nuk kanë  prekur akoma të gjithë”, tha kancelarja gjermane Angela Merkel.

Në lidhje me protestat që u zhvilluan gjatë samitit, Merkel tha se e dënon ashpër dhunën e përdorur  kundër oficerëve të policisë.

Scan Tv,  10.07.2017

Ministrat e G7-s publikuan të hënën një deklaratë të përbashkët mbi ndryshimet klimatike dhe planet e tyre për të financuar zhvillimin e qëndrueshëm, ndërsa Shtetet e Bashkuara nuk kanë pranuar ta nënshkruajnë marrëveshjen.

Në fund të samitit ministror dyditor për klimën të zhvilluar në Bolonjë të Italisë, ministrat e vendeve të tjera shprehën keqardhje për vendimin e ShBA-së.

Ministri italian i Mjedisit Gian Luca Calletti tha: “Ne punuam për të ndërtuar ura dhe jo për të ngritur mure. Italia, Franca, Gjermania, Japonia, Kanadaja, Mbretëria e Bashkuar dhe Bashkimi Europian deklaruan fuqimisht se Marrëveshja e Parisit është e pakthyeshme, e panegociueshme dhe i vetmi mjet i mundshëm për të luftuar ndryshimin e klimës. Ne shpresojmë se do të vazhdojmë dialogun konstruktiv mbi këtë bazë me Shtetet e Bashkuara në të ardhmen “.

Shtetet e Bashkuara kanë deklaruar se vendimi i tyre pasqyron njoftimin e fundit për t’u tërhequr nga Marrëveshja e Parisit dhe angazhimet financiare përkatëse.

Këtë muaj, presidenti i ShBA-së Donald Trump njoftoi planet për të braktisur marrëveshjen e ndryshimit të klimës të Parisit, duke thënë se ajo dëmtonte ekonominë amerikane.

Një gjë e tillë vlerësohet si një goditje e madhe ndaj përpjekjeve në mbarë botën për të luftuar ngrohjen globale dhe është kritikuar nga fuqitë kryesore të botës.

Agjensia e lajmeve ekonomia,  14.06.2017

“Koncepti i ngrohjes globale u krijua nga dhe për kinezët në mënyrë që prodhimi i SHBA të mos konkurojë.” Trump , 6 nëntor 2016 .

Kjo që pritej ndodhi: Trump mbajti fjalën për premtimin që kishte bërë gjatë fushatës elektorale për një tërheqje totale nga marrëveshja për klimën. Kjo erdhi pas një debati që praktikisht ndau më dysh edhe Shtëpinë e Bardhë, ku dhe e bija e Trump ishte kundër . Por pas debatit fitoi linja e konservatorëve të kryesuar nga Scott Pruitt, politikani që bëri karrierë në korporatat e naftës dhe u emërua nga Trump në krye të Agjensisë Mjedisore të SHBA (EPA) dhe nga Steve Bannon që e quajnë strategu i ultra të djathtës. Të humbur në këtë debat dolën Gary Cohn, ish drejtor ekzekutiv i Goldman Sachs që mban postin e kreut të ekspertëve ekonomikë në Shtëpinë e Bardhë dhe sekretari i shtetit Rex Tillerson i cili ka qënë drejtor në kolosin e naftës Exxon mobil (që ka përkrahur respektimin e marrëveshjes për klimën ). Edhe Elon Musk, numëri një i Tesla-s ka kërcënuar që do të dalë nga stafi presidencial që merret me ndryshimet klimatike. Po ashtu edhe një pjesë e mirë e botës së sipërmarrësve të mëdhej nga Wall Street te Silicon Valley, Apple e Microsoft, nuk e pranonin daljen nga marrëveshja përfshirë dhe gjigandët e naftës si Chevron e Bp.

Kështu, SHBA bëhet vendi i tretë nga gjithë shtetet e botës ( me Sirinë e Nikaraguan ) që nuk bëjnë pjesë nga marrëveshja historike e Parisit të përbërë nga 195 vende .
Trump deklaroi se : “ Marrëveshja e Parisit, negociuar nga Obama na imponon objektiva jo realistë për Shtetet e Bashkuara në reduktimin e emetimeve të gazeve serrë duke lënë shtete si Kina një lejekalimi për vite të tëra. Jam gati të rinegocioj për një marrëveshje të re. Nëse ja dalim do të jetë gjë e madhe, nëse jo përndryshe durim “.
Trump paraqiti njw arsyetim të mbushur me shifra, që tregon dhe natyrën e tij prej biznesmeni. Ai tha se :”termat e marrëveshjes së Parisit përbëjnë disavantazh ekonomik për SHBA. Tani është e qartë pse vendet e tjera kur firmosën ishin euforikë. Është një marrëveshje që ndëshkon Amerikën dhe pak ka të bëjë me klimën dhe shumë më tepër me avantazhet ekonomike që përfitojnë të tjerët nga SHBA”. Ai dha shembuj duke mbështetur idenë se kombet e tjera, në veçanti Kina, India por dhe Evropa “mund të vazhdojnë të ndërtojnë impiante me qymyr ndërsa ne nuk mund ta bëjmë këtë gjë “. Theksoi edhe se nëse SHBA do të vinin në jetë objektivat e marrëveshjes, ekonomia amerikane do të humbiste tre mijë miliardë dollarë nga prodhimi i brendshëm në dhjetëvjeçarin e ardhshëm dhe se qëllimi i tij ishte që rritja ekonomike të arrihej që vitin e ardhshëm në 3-4%.

Në njoftimin e tij ai u angazhua që SHBA nën administratën e tij do të jetë “vendi më i pastër dhe mjedisor në botë, do të kemi ajër më të pastër, ujë më të pastër, do të jemi ekologjistë por nuk do ti nxjerrim nga tregu ndërmarrjet tona “.
Por cili është shkaku i daljes së SHBA nga marrëveshja e Parisit që , midis të tjerave ka dhe një klauzolë që saktëson se dalja nga marrëveshja mund të bëhet jo më parë se 3 vjet nga vënia e saj në fuqi ( nëntor 2016). Për të gjithë është e qartë : sllogani i tij America first-Amerika e para , pra arësyetimi është i thjeshtë : nuk prekim mirëqënien e Amerikës . “American Dream”(Endrra Amerikane) nuk u ndërtua pa punë e pa energji. Eshtë meritë e popullit amerikan, por dhe e qeverive të tij. Këtë nuk e ve askush në diskutim.Niveli i lartë i jetesës u arrit me mund e sakrifica dhe u takon ta gëzojnë ata që e vendosën Amerikën në krye të shteteve të tjera. Por ky nivel, kërkon një sasi energjie shumë të madhe për të qëndruar atje ku është e akoma më tepër për t’u zhvilluar më tej, me ritmet me të cilat janë mësuar amerikanët.Boll të përmëndim se 1000 familje amerikane shfrytëzojnë energji, sa për 3200 familje europiane.Të mos harrojmë se Europa është edhe vetë e përparuar.Për të mos përmendur që mbi 2 miliardë njerëz në botë nuk kanë akses në energji elektrike .

Nga i vjen energjia Amerikës ? Në vend të parë ( sipas US Energy Generation-shkurt 2017) vjen nga gazi natyror e nafta me rreth 34% të prodhimit të energjisë elektrike , qymyri me rreth 30% , energjia bërthamore 20% dhe vetëm 15% energji e rinovueshme ( hidrocentrale , diellore , eolike etj..). Vlen për tu theksuar se 91% e qymyrit të nxjerrë shkon për prodhimin e enrgjisë elektrike . Një nga vendimet e para marrë nga administrata Trump ishte zhbllokimi i Keysonte Xl, naftësjellësi nga Kanadaja që do të transportojë 800 mijë fuçi në ditë në rafineritë e Teksasit e Luizianës në jug dhe të bllokuar nga administrata Obama për impaktin e madh mjedisor që shkaktonte në krahasim me përfitimet e pakta që do të ketë dhe numurin e vogël të të punësuarve . Po ashtu nga nxjerrja e naftës do të provokohej emetim i ndotjes gjë që e shtyu John Kerry-n të deklaronte atehere (2015) : “Po ta ndërtojmë do të minojë besueshmërinë tonë si udhëheqës në luftën kundër ndryshimeve klimatike “. Dhe tani jo vetëm që do të ndërtohet ai ( por do të ndërtohen edhe të tjerë )

Administrata e Trump-it ka deklaruar se do të hiqen limitet e emetimit të gazeve serrë të vendosura nga Obama me ligjin Clean Air Pakt , madje do ta abrogojë dhe atë ligj duke bërë të ekzaltohej J. Gerard, president i American Petroleum Institute: “Jemi të lumtur të konstatojmë se rruga e re e administratës e njeh rëndësinë e infrastrukturës energjetike “ nga që Trump deklaroi “Me mua merr fund lufta ndaj qymyrit e do ti vemë minatorët në punë “ paçka se qymyri është ndotësi më i madh i ajrit dhe Clean Air Pakt parashikonte reduktimin me 32% të ndotjes nga centralet me qymyr . Kjo për të rritur pavarësinë energjetike të Amerikës dhe për të krijuar mijra vende pune “të bëra tym” ( shprehje e tij ), nga agjenda e gjelbër e Obamës . Ndërsa për ambientalistët që e kanë kundërshtuar projektin , Trump , gjatë fushatës , disa ditë para zgjedhjes së tij deklaronte se “Ambientalistët kanë dalë jashtë kontrollit “.
Sa për energjinë e rinovueshme ka një histori edhe me presidentët e Ameriokës . Në 2010 Barack Obama vendosi të instaloheshin në Shtëpinë e Bardhë panele diellore dhe i vuri . Por nuk ishte ai i pari që bëri këtë gjë . Aty , ishin vendosur panele të tilla që më parë (1979- 32 panele ) nga presidenti Karter të cilat pas dy vjetësh u hoqën nga pasardhësi i tij R. Regan dhe u vendosën në një kafeteri të kolegjit Maine .

Të gjitha veprimet e Trump kanë në thelb slloganin e tij të ri : “Make America first Again- Ta bëjmë Amerikën përsëri të paren “ . Me këtë do të thotë se prioritet i tij do të jetë rritja e mirëqënies së qytetarëve edhe shtimi i vendeve të punë . Këtu , sipas filozofit dhe filologut amerikan Noam Çomski (Chomskey) dhe të tjerë e ka rrënjën politika proteksioniste , izolacioniste dhe antiglobalizmi i tij që e largojnë Amerikën nga një përvojë më se tridhjetë vjeçare . Këto janë vënë re që nga kërkesa që vendet e NATO-s të paguajnë më tepër gjë që vështirësoi marëdhëniet e tij me Merkel dhe drejtues e të tjerë evropianë ; nga sanksionet për industrinë e automobilëve që do të instalonin uzinat në Meksië kur SHBA me Ford , Crysler, Shevrolete e të tjerë gjigantë të prodhimit të automobilëve janë vendosur prej kohësh në Evropë ; nga “lufta e ftohtë” ekonomike me Kinën (dhe jo vetëm ) për ndalimin e eksporteve të saj në SHBA ndërsa në 2016 eksporti i SHBA në vendet e botës ishte 2.2 trilion dollarë në mallra dhe shërbime dhe vjen pas Kinës (1.3 miliardë njerëz ) dhe Bashkimit Evropian.

Vendimi i Trump për tërheqjen nga Marrëveshja e Parisit për klimën ka ngjallur si asnjëherë më parë një reagim në unison të të gjithë botës : “një gabim i madh” u deklarua nga Bashkimi Evropian e Kina në një deklaratë të përbashket; Putin tha :
“ Mund ta evitonte daljen nga marrëveshja “ ; Belgjika -“akt brutal kundër mjedisit” ; Vatikani u shpreh – “një katastrofë për planetin dhe një shembëël i keq për vendet e tjera” ; 28 shtete e shumë qytete amerikane kanë sfiduar Trump dhe kanë krijuar një lëvizjeje për të mbrojtur dhe vënë në jëtë marrëveshjen .
Merkel – “nuk do tja arrijë të ndalojë ne të gjithë që ndjehemi të detyruar të mbrojmë planetin “ e deri te presidenti i ri i Francës që perifrazoi slloganin e Trump-
“ Ta bëjmë planetin të madh përsëri”. Ndërsa nga politika jonë qeveritare e partiake nuk ka dalë ndonjë gjë e re pavarësisht se e kemi firmosur dhe ne Marrëveshjen e Parisit . Siç duket i kanë zënë ethet elektorale dhe nuk duan të prishen me mikun e madh .

Grupimi Ekolëvizja,  07.06.2017

Çmimet e naftës u regjistruan në rritje të ndjeshme gjatë sesionit të sotëm, duke marrë shtysë nga zërat se, shtetet e bashkuara të Amerikës mund të tërhiqen nga marrëveshja e Parisit mbi ndryshimet klimatike.

Edhe disa të dhëna të tjera që flasin për një rënie të papritur të rezervave në shtetet e bashkuara, kanë pasur ndikim në trajektoren e çmimeve gjatë sesionit të së enjtes.

Tërheqja e shteteve të bashkuara të Amerikës nga marrëveshja e klimës, sinjalizon eliminimin e rregullatorëve që kufizojnë përdorimin e karburanteve fosile, duke i dhënë kështu një shtysë çmimeve.

Në celje të sesionit të sotëm, nafta brent e Londrës kuotohej pranë nivelit të 51.34 dollarëve për fuçi, ndërsa ajo bruto amerikane pranë 48.96 dollarëve për fuçi.

Të mërkurën, benchamrku ndërkombëtar preku nivelin e 50.31 dollarëve për fuçi, pas raportimeve se Libia do të rrisë prodhimin me 800 mijë fuçi në ditë.

Scan tv,  01.06.2017

Presidenti i zgjedhur Donald Trump hodhi poshtë premtimin e fushatës për të burgosur Hillary Clinton, refuzoi çdo ide për konflikt interesi për shkak të perandorisë së tij të biznesit, kritikoi lëvizjen neonaziste që festoi fitoren e tij dhe gjithashtu shfaqi një qëndrim më të butë ndaj ndryshimeve klimaterike.

Që prej fitores, Trump nuk ka zhvilluar asnjë konferencë për shtyp, por këto komente të fundit u bënë gjatë një takimi me reporterë dhe redaktorë të “New York Times”. Miliaderi tha se arrestimi i Clinton do të ndante vendin, diçka që ai nuk e dëshuiron, ndërsa theksoi se liderët republikanë, që para katër javësh nuk e donin, tani e dashuronin.

Përsa i takon bizneseve të tij, Trump tha se ligji është në krahun e Presidentit dhe shprehet mjaft qartë se kreu i Shtëpisë së Bardhë nuk mund të ketë konflikte interesi. Trump tha se nuk i intereson më biznesi dhe se perandoria e tij do t’i kalojë fëmijëve të tij. Ai gjithashtu u tregua mjaft energjik në dënimin e grupit të supremacistëve të bardhë të njohur si “alt-right”, që bënë nderimin nazist për fitoren e Trump.

Presidenti i zgjedhur tha se grupe të tilla jo vetëm që nuk duhen nxitur, por nëse janë të entuziazmuar duhet kuptuar pse.

Sidoqoftë, ndryshimi më i madh i Trump u shfaq në çështjen e ngrohjes globale. Më herët, biznesmeni njujorkez kishte refuzuar pikwpamjet e shkencëtarëve se njerëzit kanë ndikuar tek ngrohja globale, ndërsa para reporterëve të “New York Times” tha se mund të ketë një lidhje dhe se ai po e shqyrton nga afër dhe me mendje të hapur këtë çështje.

Në kuadër të politikës së jashtme, Trump tha se SHBA nuk duhet të jetë më vendi që ndërton kombe, megjithëse shprehu dëshirën të ishte njeriu që do të sjellë paqe mes palestinezëve dhe izraelitëve, ndërsa theksoi se çmenduria që po ndodh në Siri duhet ndalur, po si zakonisht në stilin e tij, pa dhënë detaje apo specifika se si.

Top Channel,  22.11.2016

BE-ja është e vendosur për të arritur objektivin e 2020-ës, pavarësisht rritjes së lehtë të emetimeve të gazit serrë në vitin 2015. Sipas disa raporteve të fundit të Agjencisë Evropiane të Mjedisit (EEA), emetimet e Bashkimit Evropian në vitin 2015, ishin 22% më të ulëta se nivelet e vitit 1990. Raportet konfirmojnë se BE-ja është në rrugën e duhur për të përmbushur objektivin e saj të emetimeve të gazit serrë të vendosur për vitin 2020.

Dy raportet e Agjencisë Europiane të Mjedisit (EEA), “Tendencat dhe projeksionet në Evropë 2016: Progres në targetet Evropiane të klimës dhe energjisë” dhe “Inventari i gazit serrë të BE-së, i përafruar: Llogaritja e emetimeve të gazit serrë për vitin 2015 ” ofrojnë të dhëna të përditësuara të progresit të Bashkimit Evropian dhe vendeve evropiane në lidhje me masat zbutëse të ndryshimeve klimatike. Raporti Tendencat dhe Projeksionet do të zhvillohet më tej me një vlerësim të progresit të bërë në objektivat e energjisë.

Emetimet nga industritë në sistemin e tregut të emetimeve (ETS) janë ulur vazhdimisht deri në në vitin 2015. Nga ana tjetër, emetimet që nuk janë përfshirë në ETS janë rritur, në veçanti emetimet që vijnë nga transporti.

“Raporti i këtij viti tregon se pavarësisht nga rritja e vogël e emetimeve në vitin 2015, BE-ja mbetet në rrugën e duhur drejt objektivave të saj klimatike të 2020-ës. Ky progres formon një bazë të fortë për zbatimin e Marrëveshjes së Parisit, e cila ka hyrë në fuqi. Megjithatë, në arritjen e qëllimeve ambicioze afatgjata për vitin 2030 dhe 2050 nevojiten më shumë ndryshime të thella dhe një tranzicion në një ekonomi të ulët të karbonit “, u shpreh Hans Bruyninckx, Drejtor Ekzekutiv i EEA (Agjencia Europiane e Mjedisit).

Progresi i shteteve anëtare në lidhje me objektivat klimatike të 2020-ës

Projeksionet kombëtare që janë vënë në dispozicion nga shtetet anëtare të BE-së tregojnë se deri në vitin 2020, emetimet e gazit serrë të BE-së do të mbeten edhe më poshtë objektivit të 2020-ës. Në vitin 2014, të gjitha vendet anëtare, me përjashtim të Maltës, i arritën objektivat e tyre vjetore. Një situatë e ngjashme ka qenë edhe në vitin 2015.
Njëzetë e tre shtete që janë anëtare të BE-së, do t’i arrijnë objektivat e tyre kombëtare në vitin 2020, nisur nga projeksionet e tyre lidhur me politikat dhe masat që do të ndërmarin për reduktimin e emetimeve. Pesë shtete të tjera anëtare të BE-së: Austria, Belgjika, Danimarka, Irlanda dhe Luksemburgu do të duhet të zbatojnë masa shtesë për të arritur objektivat e tyre. Shtetet anëtare mund të përdorin mekanizma fleksibël që i lejojnë ata për të transferuar kreditet e emetimeve nga njëri vit në tjetrin, ose midis shteteve anëtare.

Ekolëvizja,  13.11.2016

Më se 130 vende pritet ta nënshkruajnë Marrëveshjen për klimë në Paris, më 22 prill, në çastin kur dokumenti do të hapet për nënshkrim, kanë njohtuar Kombet e Bashkuara.

Në këtë mënyrë do të tejkalohet rekordi i mëparshëm kur këtë marrëveshje e kishin nënshkruar 119 vende në vitin 1994.

“Parisi është hsitorik”, tha mbrëmë sekretari i përgjithshëm i OKB-së, Ban Ki-moon, dhe ka shtuar se “ky është vetëm fillimi dhe ne duhet t’i përshpejtojmë në mënyrë urgjente përpjekjet për tu marrë me ndryshimet klimatike”.

Agjensia e lajmeve ekonomia,  08.04.2016

Industria e naftës e sheh marrëveshjen e klimës në Paris jo si një shenjë të kobshme vdekje, por një mundësi për përtëritje dhe madje edhe rritje.

Ndërsa marrëveshja historike e reduktimit të emisioneve në mesin e 195 vendeve në fund të vitit të kaluar është parë si një humbje për prodhuesit e karburanteve fosil, drejtuesit dhe ministrat e naftës dhanë një thirrje të qartë këtë javë në takimin e tyre të parë të madh që nga bisedimet e Parisit për më shumë kërkime në mënyrën e perfeksionizmit të teknologjisë së karbonit si dhe mënyrën për ta bërë më të lirë atë.

Shpresa qëndron në faktin se kjo dhe teknologji të tjera mund të shkurtojnë ndjeshëm emetimet e naftës dhe gazit natyror, për të mbrojtur industrinë nga degëzime të ndryshimit të legjislacionit të klimës dhe të sigurojnë ende qasje ndaj energjive të lira për ekonomitë në zhvillim.

Kjo mund të ndihmojë industrinë e naftës të shmangë skenarin më të keq për një botë pas-Parisi: qeveritë detyrojnë ndalimin e prodhimit të naftës dhe gazit në zona të caktuara.

Ali Al-Naimi, ministri i naftës së Arabisë Saudite, e quajti ndryshimin e klimës një sfidë më të madhe për industrinë e tij se vetë luhatjet e cmimeve të naftës.

Revista Monitor,  26.02.2016