info@energjia.al

Një vit nga nisja, ndërtimi i gazsjellësit Trans Adriatic Pipeline (TAP), projekti më i madh infrastrukturor energjetik (gazi natyror) vlerësohet se po ecën sipas të gjitha parashikimeve.

Sipas deklaratave të bëra nga konsorciumi, projekti ka shënuar nivele të humbura kohore të frekuencave nën normat ndërkombëtare.

Rreth 49% e gjurmës që projekti do të ndjekë në Shqipëri dhe Greqi është pastruar (371 km nga 765 km). Rreth 22.6% e tubave janë tashmë të vendosur nën tokë.

Në Itali, puna vazhdon me grumbullimin e parë të pemëve të ullirit të magazinuara përkohësisht. Ndërtimi i mikro-tunelit prej 1,5 km mund të fillojë më vonë gjatë vitit.
Rreth 68.5% ose 55,000 tuba janë shpërndarë në Greqi, Shqipëri dhe Itali.
Më shumë se 5,200 njerëz po punojnë për projektin në të gjitha vendet pritëse të TAP-it. Mbi 85% e tyre janë punësime lokale.

Gjatë këtij viti TAP zbatoi një sërë projektesh me natyrë sociale. Janë rreth 70 projekte të tilla me një vlerë totale investimi prej rreth 15 milionë euro do të zbatohen në muajt e ardhshëm. Në total, TAP do të investojë mbi 55 milionë euro në projektet sociale në Greqi, Shqipëri dhe Itali.
Drejtori Menaxhues i TAP Ian Bradshaw tha se: “Ne jemi të kënaqur me punën tonë të deritanishme. Projekti ka pasur ecuri pozitive dhe mund të themi se afërsisht 41% e tij është realizuar duke përfshirë këtu aspektin inxhinierik, të prokurimit dhe ndërtimit. Ne jemi në rrugën e duhur për të ofruar sasinë e parë të gazit nga fushat e Shah Deniz II në vitin 2020, duke u bërë pjesë aktive e rrjetit europian të energjisë. Kjo do të mundësojë energji më konkurruese dhe më të sigurt për të gjithë rajonin.

Një vit nga nisja e punës për ndërtimin e gazsjellësit janë rreth 173 km tuba çeliku të salduara, rreth 21 herë sa gjatësia e projektit në Itali. Ato janë vendosur në Greqi dhe Shqipëri. TAP është i angazhuar për të bërë të mundur që toka të kthehet në gjendjen e saj origjinale. Një projekt i këtyre përmasave do të ballafaqohet me sfida të përditshme, megjithatë, ne sigurohemi që t’i adresojmë ato duke punuar ngushtë me ekipet, rrjetin e furnizimit, si dhe me komunitetet “, shtoi Bradshaw.
TAP parashikon që pas rreth një viti të ketë përfunduar pastrimin dhe klasifikimin e rrugës përgjatë Greqisë dhe Shqipërisë dhe të jenë vendosur në tokë rreth 67% e tubave të salduar.

Revista Monitor,  17.05.2017

Telashet për gazsjellësin trans-adriatik në Itali duket se nuk kanë të sosur. Pasi u duk se çdo gjë mori fund pas vendimit të Këshillit të Shtetit, tashmë ka ndërhyrë gjykata administrative e Lazios, duke pezulluar punën në kantier, të paktën deri në datën 18 prill kur do të mbahet seanca e radhës.

Gjykata ka vendosur të marrë parasysh kërkesës e rajonit të Puglias, se punimet në zonë mund të gjenerojnë një dëm të parikuperueshëm. Rreth 211 rrënjë ullinj janë kthyer në mollën e sherrit, dhe gjatë javëve të fundit ka pasur përplasje të shumta me forcat policore që kanë shkuar deri në përdorimin e dhunës.

Jo vetëm banorët kundërshtojnë shpërnguljen e ullinjve por edhe protestues të tjerë, të cilët pretendojnë se gazsjellësi do të sjellë dëme ambientale. Plot 94 kryetarë komunash i kanë bërë apel edhe presidentit të republikës duke shpresuar se punimet do të pezullohen.

Ndërkohë, protestuesit kanë vendosur të bllokojnë disa segmente rrugore në mënyrë që ta bëjnë të pamundur për kamionët që të shkojnë në kantier. Gazsjellësi trans-adriatik, më shumë se 800 kilometra i gjatë, do të përfundojë pikërisht në rajonin e Puglias, dhe pavarësisht se bëhet fjalë për vetëm 8 kilometra gazsjellës në fund të rrugëtimit, situata është komplikuar së tepërmi.

Por, nga ana tjetër, gazsjellësi duket se ka mbështetjen e plotë të qeverisë italiane. Ministri italian i ekonomisë, Carlo Calenda, deklaroi se projekti është një prioritet për qeverinë.

“Qeveria italiane beson se, implementimi i TAP është mjaft i rëndësishëm, dhe se duhet siguruar që të mos ketë asnjë shtysë në ketë proces”-deklaroi ai.

Scan Tv,  07.04.2017

Protestat e banorëve, të sindikatave apo edhe shoqatave ambientaliste në San Foca të Italisë, ishin kthyer në një kërcënim serioz për mbarëvajtjen e ndërtimit të gazsjellësit Trans Adriatic Pipeline (TAP). Por, më në fund, duket se gjithçka është zgjidhur. TAP ka arritur të marrë të gjitha lejet për ndërtimin e pjesës së gazsjellësit në Itali.

Lajmin e bëri të ditur ministri i Kohezionit Territorial, Claudio De Vincenti.
“Nuk ka më asnjë pengesë për TAP, autorizimet u morën dhe puna duhet të vazhdojë”, tha ministri italian. Ai theksoi edhe mundësitë që do të hapen për banorët e zonës me ndërtimin e gazsjellësit.

Ndërsa Lisa Givert, drejtoresha e Komunikimit pranë TAP, tha se projekti do të ketë ndikime minimale në mjedisin italian.
Pas përfundimit të ndërtimit në vitin 2019, pemët e ullirit do të mbillen sërish në vendin e tyre të origjinës.
“Të gjitha ngastrat private të tokës janë blerë tashmë nga konsorciumi, ndërsa pritet të blihen edhe tre toka shtetërore. Ndërkohë grupi i punës është duke bërë kërkime për pjesët e tjera të tokës që do të duhet të merren në pronësi”,- bëri të ditur konsorciumi.

Për të shmangur çdo lloj ndikimi në mjedis në plazhin San Foca në Itali, TAP do të ndërtojë një tunel të vogël me gjatësi 1.5 km. Kjo vepër inxhinierike do të miminizojë ndjeshëm ndikimet në mjedis. Për të bërë të mundur nisjen e punimeve, hapi i parë i TAP është zhvendosja e 231 pemëve të ullirit, të cilat në përfundim do të rivendosen në vendin e tyre të mëparshëm. Nga këto, 16 pemë janë monumente të natyrës dhe zhvendosja e tyre do të kërkojë një procedurë të veçantë.

Në një fazë të dytë, TAP-it do t’i duhet të zhvendosë edhe 2,000 pemë të tjera ulliri për të krijuar 8 km korridor për tubat e gazsjellësit. Kjo është edhe gjatësia nga tuneli i vogël te Terminali Pritës (PRT).
TAP është pjesë e Korridorit Jugor të Gazit që është një nga projektet prioritare të energjisë të BE-së.
Ai do të jetë 878 kilometra i gjatë (Greqi 550 km, Shqipëri 215 km, Deti Adriatik 105 km dhe Itali 8 km).
Pika më e lartë e tij do të jetë në Shqipëri, në lartësinë 1,888 metra, ndërsa më e ulëta 820 metra nën thellësinë e detit.

Revista Monitor,  28.03.2017

Tre shqiptarë në Compagnia di Vittoria në Itali janë arrestuar nga karabinierët për shkak se vidhnin  energjinë elektrike. Pas kontrolleve të ushtruara në zonë, karabinierët kanë zbuluar se të rinjtë shqiptarë kishin lidhur rrjetin e banesës së tyre me rrjetin e ndriçimit publik, çka ka çuar në arrestimin e H.M., 26 vjeç, H.F., 24 vjeç dhe V.S., 22 vjeç.

Gjatë kontrollit në banesën e shqiptarëve, karabinierët kanë zbuluar një kavo të fshehur mirë që merrte energjinë nga shtyllat e ndriçimit të rrugëve.

Pas arrestimit dhe përfundimit të formaliteteve, tre shqiptarët janë lënë  në arrest shtëpi, në dispozicion të zëvendësprokurorit të Republikës pranë Gjykatës së Raguzës.

Ende nuk është saktësuar koha gjatë së cilës të rinjtë kanë vjedhur energjinë, si dhe sasia e vjedhur.

Shqiptarja.com  18.01.2017

Një shpërthim i fuqishëm ka ndodhur pasditen e kësaj të enjtje në Itali, në rafinerinë e naftës “Eni” në Sannazzaro de’ Burgondi, pranë Pavias.

Autoritetet lokale raportojnë se nuk ka viktima, ndërsa mësohet se vetëm një person është plagosur lehtë.

Bëhet fjalë për një punëtor, i cili teksa largohej me shpejtësi nga vendngjarja, ka pësuar lëndime të lehta në gju.

Rafineria e përfshirë nga flakët cilësohet si më e madhja në vendin fqinj.

Shqiptarja.com  02.12.2016

Rreziku i dështimit duket se më në fund është shuar. TAP ka arritur një gjejë një zgjidhje në lidhje me protestat që janë zhvilluar në rajonin e Pulias, në Itali.

“TAP do të angazhohet që të rimbjellë pemët e ullinjve anës rrugës në zonën tokësore të kalimit në Itali, duke filluar nga pjesa e tunelit të vogël. Puna do të nisë në nëntor të këtij viti”. Lajmi konfimohet nga Lisa Givert, drejtoresha e Komunikimit të TAP.

Rajoni i Pulias e ka kundërshtuar vazhdimisht ndërtimin e projektit TAP, pasi pretendohej se në këtë mënyrë do të shkatërroheshin ullinj, më shumë se 400-vjeçarë.

Givert tha se TAP, që në fazat e hershme të TAP, ka qenë një kontakt të vazhdueshëm me aksionerët, si dhe me komunitetin në Itali. “Janë realizuar disa tavolina diskutimi për të rënë dakord në lidhje me masat që do të duhet të merreshin mbi reduktimin e ndikimit në mjedis”, tha ajo.

TAP është pjesë e Korridorit Jugor të Gazit, që është një nga projektet prioritare të BE-së. 870 kilometra tubacione do të lidhen me TANAP në kufirin turko-grek, për të vazhduar më pas drejt Greqisë, Shqipërisë dhe detit Adriatik, për të përfunduar nën ujë në pjesën jugore të Italisë.

“Një nga prioritetet tona të komunikimit mbetet rajoni i Pulias dhe ne jemi të angazhuar që të krijojmë sa më pak efekte në mjedis në zonat ku do të kalojë TAP”, thotë Givert.

Në anën tjetër, theksoi shembujt që vijnë nga rajonet e tjera të Italisë, ku plazhet dhe gazsjellësit bashkëjetojnë pa krijuar probleme. Sipas saj, TAP e ka realizuar studimin gjeologjik në një kohë rekord 1.5 ditë.

Drejtoresha e Komunikimit shtoi se TAP mbetet i angazhuar në çështjet lokale që kanë të bëjnë me projektin, duke ofruar informacione dhe qartësi. Sipas saj, TAP do të arrijë të përmbushë afatet për të garantuar që sasia e parë e gazit nga fushat e Shah Deniz 2 të jetë gati në vitin 2020.

“TAP do të vazhdojë me procesin e rimbjelljes së ullinjve përgjatë rrugës, duke filluar nga zona e tunelit të vogël, nga nëntori i këtij viti”. Sipas saj, TAP po zbaton standarde të njëjtja në të gjithë linjën, si në Itali, Shqipëri, ashtu edhe në Greqi.

“Zona e landfill-it në San Foca u zgjodh si mundësia më e mirë për t’u futur në Itali. Është zona që do të ketë më pak ndikim në mjedis edhe gjatë fazës së ndërtimit. Kjo është konfirmuar edhe nga Komiteti Kombëtar Teknik kur miratoi ndikimin mjedisor në vitin 2014. TAP ka marrë në analizë 20 zona përgjatë gjithë vijës bregdetare puljeze.

Pak ditë më parë ishin drejtuesit e kompanisë azere SOCAR, që deklaruan se TAP mund të dështonte pikërisht për shkak të problemeve me rajonin e Pulias.

Revista Monitor,  18.10.2016

Referendumi në Itali rreth kërkesës nëse kompanitë duhet të kërkojnë naftë  deri në 12 km nga brigjet konsiderohet i pavlefshëm pasi votuan vetëm 31.19% e zgjedhësve. Në mënyrë që referendum të ishte i vlefshëm  duhej të siguroheshin  të paktën  50% e votave.

Aktiviteti i marrjes së gazit dhe naftës  brenda 12  km nga bregu do të vazhdojë  deri në mbarimin e tij por vetëm për licensat që janë tashmë active. Nëse në referendum fitonte  Po-ja, atëhere nuk do të lejohej asnjë shpim në det për kërkim dhe nxjerrje nafte

Kryeminisitri  Italian Mateo Renzi icily  e kundershtoi kete referendum u shpreh  se jane hedhur poshtë 300 milionë euro Per organizimin e tij. Ndersa Kreu i lëvizjes 5 yjet Beppe Grillo ka falenderuar të gjithë qytetarët të cilët votuan pro.

Qeveria e koalicionit e kryeministrit italian Matteo Renzi në dhjetor të vitit të kaluar ka miratuar masa legjislative me të cilat në zonën e 12 kilometrave të bregdetit nuk do të hapen platforma të reja të naftës, pasi  ato ekzistueset mund të nxjerrin naftë dhe gaz nga deti pa kufizime kohore.

Shqiptarja.com  19.04.2016

Zv. presidenti Lukoil Vladimir Nekrasov ka thënë se kompania po negocion me autoritetet iraniane në furnizimin e naftës së papërpunuar iraniane ndaj rafinerive në Bullgari, Rumani, dhe Itali.

‘Shkëmbimi i naftës’, i cili parashikon dërgesat e naftës së papërpunuar nga Irani në këmbim për një produkt të rafinuar është dërguar në Republikën Islamike, ka cituar gazeta e përditshme ruse Kommersant, Nekrasov.

Nëse bisedimet rezultojnë të suksesshme, shkëmbimi mund të fillojë në fillim të këtij viti.

Revista Monitor,  17.02.2016

Në Ministrinë e Energjisë dhe Industrisë u zhvillua sot takimi i parë i Komisionit në kuadër të Marrëveshjes ndërmjet Shqipërisë, Italisë dhe Greqisë për projektin e gazsjellësit TAP.

Komisioni i nivelit teknik, me përfaqësues nga të tre shtetet u ndoq nga afër prej përfaqësuesve të shoqërisë TAP. Në hyrje të takimit, Ministri i Energjisë dhe Industrisë Z.Damian Gjiknuri mbajti një fjalë përshëndetëse në të cilën dha vlerësimet e tij për ecurinë e deritanishme të projektit të ndërtimit të gazsjellësit.

“Gazsjellësi është një projekt kyç e strategjik për infrastrukturën e gazit në rajonin tonë. Punimet po shkojnë sipas parashikimeve në të gjitha vendet ku kalon ky projekt”, u shpreh z.Gjiknuri.

Sipas tij, Shqipëria po ndërmerr veprimet e nevojshme për tu bërë jo vetëm vend tranzit i gazit por edhe konsumator. “Shumë shpejt do mund të përmbyllim edhe Masterplanin e gazit në Shqipëri, një dokument me shumë rëndësi për të ardhmen e gazifikimit të vendit”, nënvizoi z.Gjiknuri.

Ai inkurajoi bashkëpunimin mes Shqipërisë, Italisë dhe Greqisë për të garantuar mbarëvajtjen e fazës aktuale të ndërtimit të gazsjellësit.

Gjatë takimit, përfaqësuesit e tre shteteve shkëmbyen opinionet e tyre dhe vlerësimet respektive të zhvillimeve të deritanishme në kuadër të projektit TAP dhe kontributi i tij në zhvillimet e sektorëve përkatës të gazit në të tre vendet.

Angazhimi i Komisionit të Zbatimit në këtë fazë të zhvillimit të projektit TAP, duke pasur parasysh natyrën ndërkufitare të gazsjellësit, do të bëjë të mundur krijimin ndërmjet palëve të kushteve të koordinuara dhe të njëtrajtshme, në lidhje me tërësinë e projektit, përfshirë këtu kushtet teknike, shoqërore, ato në lidhje me sigurinë, mjedisin, komunitetin dhe kushtet e punës.

Komisioni ka një detyrë konkrete që të punojë me investitorin e projektit me qëllim rënien dakord mbi një protokoll që do të nënshkruhet midis palëve, i cili do të krijojë një strukturë kushtesh të koordinuara dhe të njëtrajtshme, të cilat do t’i zbatohen projektit në tërësi dhe me miratimin e anëtarëve të tij, do të ndërmarrë çdo veprim tjetër të konsideruar të nevojshëm për të lehtësuar zbatimin e kësaj marrëveshjeje.

Në përfundim të takimit, përfaqësuesit e tre shteteve dolën me një deklaratë të përbashkët në të cilën mbështesin fuqimisht bashkëpunimin praktik mes shoqërinë TAP AG me secilin prej vendeve tona. “Gjë e cila ka bërë që jo vetëm projekti i Gazsjellësit Trans Adriatik të jetë projekti i përzgjedhur si fitues nga Konsorciumi Shah Deniz në Azerbajxhan, por edhe të fillojë aktualisht me shumë sukses fazën e punimeve mbështetëse në territorin Shqiptar, si dhe rolin e këtij projekti dhe të kompanisë TAP AG, në mbështetje të zhvillimit të sektorit të gazit në rajonin e Ballkanit Perëndimor, por edhe direkt për zhvillimin e projektit IAP”, thuhet në deklaratë.

energjia.al  25.01.2016

TAP shpall dy fituesit e dy kontratave, njëra për Ndërtim, Inxhinieri dhe Prokurime të Terminalit Pritës të Gazsjellësit dhe tjetra për ndërtimin e tubacionit në pjesën tokësore në Itali (tubacion me gjatësi 8 km dhe diametër prej 36 inç). Kontrata e parë është fituar nga Renco S.p.a., ndërtim ky final në lidhjen e Tap me rrjetin Snam të gazit në Itali.
Grupimi i Enereco S.p.a. dhe Max Streicher S.p.aka fituar kontratën për tubacionin tokësor në Itali, që do të lidhë pjesën detare të projektit në pikën e hyrjes në tokë me PRT-në.

Ian Bradshaw, Menaxheri Drejtues i TAP, duke përgëzuar kompanitë fituese, tha se do të punohet më tej në arritjen e standardeve teknike dhe shëndetësore, si dhe përkujdesja ndaj mjedisit përreth. “ Dua gjithashtu të theksoj se ky projekt do të sigurojë punësim për vendasit, duke shpresuar se do të ndihmojë në zhvillimin e vendit dhe të investimeve në Itali”- ka thënë z. Ian.

Renco S.p.A. është një kompani italiane, ka nisur aktivitetin e saj në vitin 1979, mundëson shërbime që përfshijnë ndërtim dhe pajisje inxhinierike. Enereco S.p.a është një kompani inxhinierike e themeluar në 1988, mbulon kryesisht fushën e infrastrukturës dhe transportimin e gazit. Max Streicher S.p.a, si degë e kompanisë së madhe Streicher Group shquhet si kompani që merret me projekte gazi dhe nafte.

Këtë vit TAP ka dhënë disa kontrata të rëndësishme, që kanë të bëjnë kryesisht me: ndërtimi dhe përmirësimi i rrugëve dhe urave ndihmëse në Shqipëri (prill 2015), valvulat sferike me diametër të madh dhe aktivizuesit (korrik 2015), dhe turbo kompresorët (shtator 2015) dhe fashaturat lidhëse, bërrylave izolues dhe pritësve të sondave pastruese (tetor 2015), 270 km tuba linje dhe bërryla për pjesën tokësore (tetor 2015) si dhe 495 km tuba linje për pjesën tokësore (nëntor 2015). TAP-i do të transportojë gaz natyror nga fusha gjigante e Shah Denizit II, në Azerbajxhan, në Evropë. Tubacioni, i gjatë 878 km, do të lidhet me Gazsjellësin Trans Anatolian (TANAP) në kufirin turko-grek në Kipoi, duke kaluar përmes Greqisë dhe Shqipërisë dhe Detit Adriatik, përpara se të mbërrijë në brigjet e Italisë së Jugut.

Rruga që përshkon TAP-i mund të lehtësojë furnizimin me gaz të disa vendeve të Evropës Juglindore, përfshirë Bullgarinë, Shqipërinë, Bosnjën dhe Hercegovinën, Malin e Zi, Kroacinë dhe të tjera. Dalja në tokë e TAP-it, në Itali, ofron mundësi të shumta për transportimin e mëtejshëm të gazit natyror të Kaspikut në disa nga tregjet më të mëdha evropiane, si Gjermania, Franca, Britania e Madhe, Zvicra dhe Austria.

TAP-i do të nxisë zhvillimin ekonomik dhe krijimin e vendeve të punës përgjatë rrugës së tubacionit; ai do të jetë një burim i madh i investimeve të huaja direkte dhe kjo nuk varet nga grante apo subvencione. Pas shitjeve të para të gazit në Gjeorgji dhe Turqi, të synuara për fund-vitin 2018, prurjet e para në Evropë do të fillojnë përafërsisht me fillim-vitin 2020.

Struktura aksionare e TAP-it përbëhen nga BP (20%), SOCAR (20%), Snam S.p.A. (20%), Fluxys (19%), Enagás (16%) dhe Axpo (5%).

Revista Monitor,  23.12.2015