info@energjia.al

Inspektoriati Shtëtëror Teknik ka gjobitur 19 karburante gjatë muajit mars. ISHTI bën me dije se gjobat janë vendosur për mungesë cilësie por edhe për mungesë dokumentacioni.

Në total ISHTI ka vendosur 7.2 milionë lekë gjoba. “Inspektorati Shtetëror Teknik dhe Industrial (ISHTI) publikon rezultatet e inspektimeve të ushtruara në subjektet e tregtimit me shumicë dhe pakicë të karburanteve dhe të lëndëve djegëse, pajisjeve nën presion dhe instalimeve elektrike për muajin Mars 2017.

Fokusi i kontrolleve të kryera ishte zbatimi i dispozitave të ligjit nr.8450 datë 24.02.1999 “Për përpunimin, transportimin dhe tregtimin e naftës, të gazit dhe nënprodukteve të tyre”, ligji nr.32/2016 datë 24.03.2016 “Për garantimin e sigurisë së punës së pajisjeve/instalimeve nën presion” si dhe VKM  nr.212, datë 16.3.2016 “Për përcaktimin e kushteve dhe të rregullave teknike për përpunimin e bombolave të mbushura me gaz të lëngshëm të naftës (GLN)” dhe ligji nr. 8734, datë 01.02.2001 “Për garantimin e sigurisë se punës te pajisjeve dhe instalimeve elektrike”, i ndryshuar. Nga inspektimet e bëra nga Inspektorati Shtetëror Teknik dhe Industrial për periudhën Mars 2017 janë gjobitur 19 subjekte”, thuhet në një njoftim të ISHTI.

Shqiptarja.com  19.04.2017

Incidentet e vazhdueshme me bombolat e gazit sjellin gjithmonë në vëmendje kujdesin që duhet të tregojnë qytetarët. Në shumë raste shkak i këtyre incidenteve janë bombolat e konsumuara.

Por me ndryshimet që ju bënë ligjit një vit më parë lindi edhe detyrimi i krijimit të regjistrit elektronik.

Kompanitë duhet të depozitojnë pranë Inspektoratit kodet e bombolave që zotërojnë dhe njëkohësisht me këtë ka pasur një tendencë për import.

Ndryshimet ligjore të një viti më parë synonin rregullimin dhe rritjen e sigurisë sa i përket pajisjeve nën presion përfshirë bombolat e gazit.

Scan Tv,  30.01.2017

Inspektoriati Shtetëror Teknik pas inspektimit në Tepelënë ku humbën jetën nëna dhe foshnja 8 muajsh ka dalë në konkluzion se ngjarja ndodhi për shkak të rrjedhjes së gazit. Sipas ISHTI bombula nuk kishte shpërthyer dhe nuk kishte shenja çarje.

“Pas inspektimit në vendngjarje u arrit ne konkluzionin se shkaku i kësaj ngjarje të  rënde mund të jetë rrjedhja e gazit nga tubi furnizues prej gome ose nga vendi i bashkimit të reduktorit të presionit me bombolen. Ndërkaq nga inspektimi rezulton se bombola nuk ka shperthyer dhe nuk ka shenja çarje”, thuhet në njoftimin e ISHTI.

Zbardhja e plote e kesaj ngjarje pritet te behet pas perfundimit te hetimeve.

Ora News,  28.12.2016

Informacion paraprak nga Inspektorati Shtetëror Teknik dhe Industrial(ISHTI) në lidhje me ngjarjen e ndodhur në Repartin e Hidropastrimit të KPTHN Ballsh

Impianti i hidropastrimit është një nga repartet kryesore të rafinerisë së naftës në Ballsh, i cili ka si qëllim  pastrimin  e squfurit nga nënproduktet e naftës. Në datën 10.11.2016, rreth orës 2242, në separatorin e presionit të ulët të impiantit të Hidropastrimit në rafinerinë e naftës – Ballsh,  ndodhi një shpërthim i fuqishëm dhe u shfaq një vatër zjarri me përmasa të konsiderueshme që si rezultat solli ndërprerjen e veprimtarisë të këtij sektori.

Rrethanat

Reparti i Hidropastrimit në rafinerinë e naftës – Ballsh ishte në procesin e lëshimit për vënien në punë. Rreth orës 22.42 të datës 10.11.201, në seperatorin e presionit të ulet si rezultat i tejkalimit të menjëhershëm të presionit të punës të pajisjes, ndodhi një shpërthim i fuqishëm në seperatorin R-201, duke krijuar një vatër zjarri të konsiderueshme. Presioni  i llogaritur i pajisjes që shpërtheu sipas projektit është 15 atm, ndërsa presioni në punë normale 6- 9 atm. Mbajtja e presionit të pajisjes sipas projektit rregullohet nga një valvol pneumatike automatike e cila për shkak defekti ishte jashtë funksioni.

Përdorimi i linjave direkte midis seperatorit të presionit të lartë dhe seperatorit të ulët bëri që presioni të tejkaloje vlerat e lejuara rreth 3 herë. Nga verifikimi paraprak i dokumentacionit teknik të pajisjes rezulton se seperatori i presionit të ulët R-202 është inspektuar nga shoqëria e licencuar “ALBA ENERG” sh.p.k, e cila me raport inspektimi 00197 A, datë 22.11.2015 ka siguruar se pajisja garanton sigurinë e punës.

Në  legjislacionin në fuqi:

  •  ligjin nr.10489, datë 15.12.2011 “Per sigurinë e produkteve jo ushqimore “,
  •  ligjit nr.10433, datë 16.06.2011 “Për inspektimin në Republikën e Shqipërisë”,
  •  ligjit 32/2016 “Për sigurinë e punës të pajisjeve nën presion”,
  • “Rregullores për projektimin, prodhimin, vendosjen, shfrytëzimin dhe riparimin e pajisjeve nën presion”.

Është përcaktuar se kontrolli teknik i pajisjeve nën presion kryhet nga trupa të treta të licencuara dhe akredituara. Kontrolli teknik i planifikuar nga shoqëria e licencuar do të kryhej brenda datës 22.11.2016.

Shkaqet

Nga sa më sipër, shkaku i shpërthimit dhe  i shfaqjes të kësaj vatre të madhe zjarri ishte mos funksionimi i valvolës të sigurimit të pajisjes dhe mosrespektimi i rregulloreve të shfrytëzimit duke përdorur linjat direkte.

Pasojat

Nga ky shpërthim dhe zjarr:

  1. Humbi jetën një punonjës i repartit të hidropastrimit dhe u plagosen disa të tjerë.
  2. Impianti u ndal plotësisht.
  3. Pati dëmtime të pariparueshme të seperatorit të presionit të ulët, tubacioneve teknologjike, linjave përcjellëse të ajrit dhe të energjisë të aparateve matëse dhe sinjalizuese në zonën rreth rezervuarit

Masat

Nga ana e personelit drejtues të kësaj rafinerie dhe repartet zjarrfikëse u morën masat për fikjen e zjarrit dhe normalizimin e gjendjes. Në vijim do të analizohet avaria e ndodhur, dhe njëkohësisht kanë filluar përgatitjet e nevojshme teknologjike për kalimin në remont dhe rikuperimin e tubacionit të dëmtuar. Konkluzionet përfundimtare do të dalin pas hetimit të plotë të avarisë nga Prokuroria.

energjia.al  12.11.2016

Inspektorati Shtetëror Teknik ka reaguar për ngjarjen në Ballsh, duke u shpreuhr se shkak ka qënë mosrespektimi i rregullave teknike të shfrytëzimit. Sipas ISHTI-së, ngajrja në impiantin e hidropastrimit të karburanteve ka ndodhur gjatë procesit të manovrimit për vënien në punë të separatorit të presionit të ulët.

ISHTI thotë se u rrit presioni me hidrogjen tre herë mbi normale, në mënyrë të menjëhershme dhe për këtë nuk funksionoi valvula e sigurimit të pajisjes që bën mbrojtjen e saj.

Konkluzionet e ISHTI-t për ngjarjen do t’i vihen në dispozicion Prokurorisë për kryerjen e hetimeve prej saj.

“Do jetë prokuroria ajo e cila përmes hetimeve do të zbardhë plotësisht ngjarjen”, thuhet në njoftimin e ISHTI.

Top Channel,  11.11.2016

Në qytetin e Vlorës është shmangur një tragjedi e cila mund t’i kishte marrë jetën një gruaje.

61 vjeçarja ka qenë duke montuar një bombol gazi në kushte shtëpie teksa ka rrjedhur gazi, e për pasojë gruaja ka marrë djegie të lehta në duar dhe në fytyrë.

Familjarët kanë lajmëruar menjëherë zjarrfikësit të cilët kanë bërë të mundur nxjerrjen jashtë të bombolës dhe fikjen e zjarrit.

Gruaja është dërguar në spital, e cila ndodhet jashtë rrezikut për jetën. Po ashtu, drejt Vlorës janë nisur edhe specialistë të Inspektoratit Shtetëror Teknik dhe Industrial. Pas verifikimit, inspektoret saktesuan se nuk ka eksplozion dhe deme te tjera materale, porse zjarri ka ardhur nga pakujdesia e zonjes e cila ka provuar me shkrepese, bombolen e montuar e cila kishte rrjedhje gazi pasi ventilit ku montohet vatra e zjarrit.

“Pas sinjalizimit inspektore te ISHTI jane nisur drejt vendngjarjes ku mesohet se rreth ores 8 e 30 minuta ne banesen e z.Xhevat Leskaj ne Lagjen Isa Buletini ne Vlore, duke ndezur soben zj.Tefta Leskaj eshte djegur lehte ne dore dhe pak ne fytyre.Zonja eshte jashte rreziku per jeten . Pas verifikimit, inspektoret saktesuan se nuk ka eksplozion dhe deme te tjera materale . Zjarri ka ardhur nga pakujdesia e zonjes e cila ka provuar me shkrepese, bombolen e montuar e cila kishte rrjedhje gazi pasi ventilit ku montohet vatra e zjarrit. Inspektore te ISHTI , me porosi te kryeinspektorit, vijojne inspektimet ne gjithe vendin. Vetem nje dite me pare ISHTI ne bashkepunim me policine bashkiake,policine e shtetit dhe Tatimet, gjate inspektimeve ne vlore, kane gjobitur dy subjekte private.”-shkruan ISHTI.

Shqiptarja.com  17.07.2016

Kryeinspektori i ISHTI, Gazmend Osmani dhe inspektorë të këtij institucioni janë nisur menjëherë drejt qytetit bregdetar të Vlorës pas shpërthimit të bombolës së gazit në lagjen “Partizani”.

Inspektorët verifikuan situatën ku ndodhi ngjarja dhe bëjnë me dije se subjekti që po bënte shpërndarjen e gazit nga një bombol e madhe për bombola të vogla të konsumatorëve familjarë ishte pirat dhe i palicencuar.

Sipas ISHTI, subjekti nuk zotëronte asnjë dokument në përputhje me ligjin.

Nga shpërthimi, i cili nuk është shoqëruar me flakë mësohet se janë lënduar 2 persona, punonjësi Nezir Cana 67 vjeç dhe Gjergji Xhebraj 52 vjeç, konsumator familjar.

Ngjarja ndodhi në kohën që po kryhej transfuzioni i gazit nga bombola në bombol.

Ndërkaq inspektorët pas verifikimit të kushteve do të marrin masën ndëshkimore, sipas ligjit, për subjektin i cili rezulton të jetë i paregjistruar dhe praktikisht i palicencuar.

Nga verifikimi i  këtij subjekti privat rezulton se edhe dy muaj më parë , me 2 maj 2016, ISHTI e kishte gjobitur me  me 500 mijë lekë të rinj, për mosrespektim të kushteve teknike në ushtrimin e aktivitetit.

Në vendngjarje kanë mbërritur dhe forcat zjarrfikëse dhe ato të policisë, këta të fundit kanë ndaluar pronarin Gazmor Nelo.

ISHTI po kryen procedurat në bashkëpunim dhe me policinë ndërsa çështja do i referohet Prokurorisë.

Ora News,  12.07.2016

Me rritjen e temperaturave të stinës së verës, shtohet ndjeshëm përdorimi i bombolave GLN në plazhet shqiptare, në bare , restorante apo edhe në ambjente të hapura. Për këtë arsye, si dhe në zbatim të ligjit “Për përpunimin transportimin ,tregtimin e naftës ,gazit dhe nënprodukteve të tyre “të ndryshuar ,vendimit nr.212 ,date 16.03.2016 të Këshillit të Ministrave “Për përcaktimin e kushteve dhe te rregullave teknike për përpunimin e bombolave të gazit të lëngëzuar te naftes”, Inspektoriati Shtetëror Teknik dhe Industrial (ISHTI) e gjen me vend të informojë qytetarët në lidhje me kujdesin që duhet të tregojnë për të shmangur çdo rrezik.

Pavarësisht se bombolat janë të sigurta, nëse përdoren si duhet dhe zbatohen rregullat e përcaktuara, përdorimi i gabuar i GLN mund të rezultojë me shpërthime, zjarre, humbje të pasurisë dhe më rrezkishmja humbje të jetës së qytetarëve.
Për të shmangur ngjarje të tilla ISHTI këshillon që:
- Instalimi i pajisjeve të përdorimit të GLN duhet të kryhet vetëm nga persona të licensuar ose kompani shërbimi.

-Çdo bombol GLN duhet të inspektohet nga një shoqëri e autorizuar të paktën një herë në pesë vjet. Të dhënat e kontrollit duhet të jenë gdhendur qartë në bombol dhe të verifikohen nga përdoruesi.

- Të përdoret një përzierje uji me sapun për të zbuluar rrjedhjet. Ndalohet përdorimi i flakëve të hapura ,shkrepëseve apo cakmakëve për verifikimin e tyre.

- Mbushja e bombolës së gazit në një autogaz është një vepër penale.

- Bombola e gazit duhet të ruhet larg burimeve të nxehtësisë .

- Mos kryeni gatim në kuzhinë pa mbikëqyrje. Shuarja e flakës mund të krijojë ambjent të rrezikshëm për eksplozion.

- Në rast rrjedhje gazi, menjëherë bëhet mbyllja e bombolës të gazit dhe ventilimi i ambjentit. Ndalohet përdorimi I çelësave elektrik , prizave dhe celularëve.

- Mos mbani kurrë një bombol plot apo bosh në një makinë të mbyllur, në parking, bodrum, mos e hidh atë në mbeturina. Bombola bosh është e rrezikshme njësoj si bombola plot.

- Në lokalet e shërbimit, bombolat duhet të përdoren vetëm nga punonjës të trajnuar që njohin rregullat e sigurisë.

- Bombolat e gazit duhet të ruhen, transportohen dhe përdoren vetëm kur janë në pozicion vertikal.

- Bombolat të mos përdoren në dhoma me volum më të vogël se 10 metër kub.

- Të mos mbushen bombolat e gazit më shumë se 80 % të volumit.

-Tubat e gomës duhet të kontrollohen vazhdimisht, që të mos takohen dhe të jenë në kontakt me temperaturat e sobës së gatimit .

- Gjatë gatimit në sobë nuk duhet të vendosen rroba ose material plastike.

- Nëse rrjedhja nuk eleminohet, nxirret me shpejtësi bombola në ambjent të hapur në distancat e sigurisë nga objektet e tjera.

- Mos vendosni bombol në nivelin e tokës pasi GLN është me e rëndë se ajri dhe mund të krijojë xhepa për rreziqe të mundshme.

- Mos bëj kurrë transferimin e gazit nga një bombol në tjetrën.

- Përdorni detektor tymi alarmues për monoksidin e karbonit dhe gazin e lëngëzuar në ambjentet e familjes.

- Mbani larg fëmijët nga vatrat e djegies dhe bombolat e gazit.

- Nëse largoheni nga shtëpia për periudha të mesme apo të gjata, duhet ti vendosni gjithë celesat në pozicionin off.

- Mos përdorni pije alkoolike pranë vatrave të djegies

- Pas përfundimit të gatimit bëhet shkyçja e bombolës së gazit.

Barbekytë janë shumë popullore gjatë muajve të nxehtë. Nëse neglizhohet me regullat e perdorimit ato mund të jenë burim për aksidente tragjike. Masat paraprake dhe mbajtja larg e fëmijëve është me shumë rëndësi. Vendosja e tyre duhet të bëhet në zonat e ventiluara mirë ku shpejtësia e erës nuk kalon 10 km /ore.

Nga statistikat rezulton se 70% e zjarreve shkaktohen në stinën e verës dhe në 50% e rasteve ato vijnë nga ambjentet e gatimit.
Masat më të mira për të shmangur zjarret dhe ngjarjet tragjike janë ato parandaluese të cilat nuk neglizhojnë asnjë nga normat e sigurisë. Po ashtu strukturat e ISHTI-it janë angazhuar për të siguruar konsumatoret se të gjitha bombolat që qarkullojne në treg nga ana e shoqërive të tregtimit me shumicë respektojnë kushtet e sigurisë të përcaktuara në kuadrin ligjor.

Shqiptarja.com  21.06.2016

Inspektorati Shtetëror Teknik ka rritur kontrollet e tij në zonën e bregdetit duke e fokusuar atë tek zbatimi korrekt i kërkesave për përdorimin e bombolave të gazit.

Në një dalje për mediat Nako Petro, inspektor pranë drejtorisë së naftës dhe gazit vuri theksin në disa nga detajet që duhet të kenë parasysh konsuamatorët për mënyrën sesi instalojnë dhe mbushin bombolat. Ai bëri thirrje që këto procedura të kryhen vetëm nga persona të autorizuar.

Sakaq kontollet e shpeshta po garantojnë që në treg të ketë bombola që përmbushin kushtet teknike. Deklarata nga Inspektorati vjen në një kohë kur legjislacioni i ndryshuar që lidhej direkt me sigurinë e bombolave të gazit ka pak kohë që po zbatohet dhe kalon një pjesë të mirë të përgjegjësive tek importuesit e mëdhenj.

Gjatë vitit të kaluar por edhe gjatë këtij viti ka pasur disa herë incidente me pasoja fatale për jetën e njerëzve të përfshirë. 

Scan TV,  20.06.2016

Inspektoriati Shtetëror Teknik gjobit 33 subjekte private për muajin prill. Gjatë inspektimeve të kryera në të gjithë vendin në 693 subjekte private inspektorët kanë vendosur ndëshkimin për të gjitha subjektet e tregtimit me shumicë e pakicë të karburanteve dhe të lëndëve djegëse.

Këto masa administrative janë marrë në kuadër të inspektimit në të  gjitha subjektet e tregtimit me shumicë e pakicë  të karburanteve  dhe të lëndëve djegëse ku vetëm gjatë muajit prill  janë kryer 693  inspektime në gjithë vendin, nga të cilat 127 janë sh.a dhe 566 sh.p.k

Vendimi i komisionit për gjobë ndaj këtyre subjekteve merret në bazë të ligjit “Për përpunimin, transportimin dhe tregtimin e naftës, të gazit dhe nënprodukteve të tyre”.

Inspektoriati Shtetëror  Teknik dhe Industrial në një deklaratë të shpërndarë për mediat thotë se, do të vijojë  pa ndërprerje kontrollet  në të gjitha pikat e tregtimit të karburantit dhe të lëndëve  djegëse.

Nga ana tjetër ISHTI u bën apel atyre  të blejnë bombola  gazi (GLN) në pikat e shpërndarjes të cilat janë të certifikuara dhe që përmbushin elementët e sigurisë teknike.

Shqiptarja.com  12.05.2016