info@energjia.al

Një samit ndërkombëtar që po mbahet këto ditë, kryesisht me vendet e Ballkanit Perëndimor, për energjinë eklektike nga hidrocentralet, ka nxjerrë në pah në diskutime mbi totalin e vlerës së investimit dhe numrin e projekteve. Në një hartë të publikuar në faqen zyrtare të Hydro Balkans që po menaxhon edhe samitin që nisi në datë 15 nëntor me një vizitë në hidrocentralin e Ashtës dhe mbyllet sot me diskutime në Malin e Zi, jepen edhe shifrat mbi të ardhmen e energjisë në 10 vende të Ballkanit dhe më gjerë.

Kalivaçi dhe Shala

Për Shqipërinë shifra që jepet është ajo e hidrocentraleve që do të jenë të ndërtuara deri në vitin 2025 që është 436 hidrocentrale. Kjo vjen në kushtet kur qeveria vetëm këtë vit ka dhënë disa kontrata që ju ishin hequr kompanive të mëparshme pasi nuk kishin respektuar kushtet. Në prezantimin për Shqipërinë thuhet se projekti më i rëndësishëm që do të ndërtohet është ai i Kalivaçit mbi Vjosë i cili ka një historik të gjatë dhe të komplikuar. Vlera e investimit kap 125 milionë euro dhe ndërtuese do të jenë dy kompanitë Ayen Energy dhe Fusha sh.p.k.

Edhe pse nuk përmendet në raport një hidrocentral tjetër me vlerë të konsiderueshme por edhe kapacitet të instaluar mbi mesataren është ai që do të ndërtohet mbi lumin Shalë në Alpe. Në shtator u shpallën edhe fituesit e koncesionit që janë bashkim i përkohshëm i shoqërive “Çinar-San Hafriyat Nakliyat Insaat Turizm Sanayi Ve Ticaret LTD.STI”, “Shala Energy PLC” dhe “Falak Properties LLC”  kurse vlera e investimit kap 100 milionë euro.

Gjithsesi pjesa virale e hidrocentraleve duket se është e përgjithshme për Ballkanin. Në total vlera e investimeve në hidrocentrale të ndërtuar ose të parashikuar për gjithë këtë rajon kap shifrën 819 miliardë euro ku të paktën 240 miliardë janë investim nga Banka Europiane për Rindërtim dhe Zhvillim.

Të dhëna të shpejta për rajonin

Shqipëria 436 hidrocentrale deri në 2025

Sllovenia 568 hidrocentrale deri në 2020

Kroacia 1655 MW kapacitet të instaluar deri në 2018

Bosnjë-Hercegovina më shumë se 6000 MW potencial për hidrocentralet

Mali i Zi 18% potencial fillestar për fuqi të instaluar në hidrocentrale

Kosova 140 MW kapacitete të instaluar në hidrocentrale deri në 2020

Rumania 6715 MW kapacitet i instaluar në hidrocentrale

Serbia 2835 MW kapacitet i instaluar në hidrocentrale

Bullgaria 522MW kapacitet i ri objektiv deri në 2018

Maqedonia 5500 Gwh potencial për hidrocentrale.

Revista Monitor,  17.11.2017

Disa familje kuksiane kërkojnë azil në Shtetet e Bashkuara të Amerikës. Në një kërkesë publike drejtuar Ambasadës Amerikane, ata thonë se nuk kanë të ardhura për të mbijetuar në Shqipëri.

Tokat e tyre u përmbytën nga ndërtimi i HEC-it të Fierzës dhe prej më shumë se dy dekadash nuk janë dëmshpërblyer.

Kryetari i shoqatës “Tokat e Përmbytura” nga liqeni i Fierzës, Sherif Kastrati ia drejton thirrjen në emër të familjeve edhe ambasadave të vendeve të BE-së në Tiranë.

“Të hapin rrugë për t’i garantuar mbijetesën këtij populli. Nuk ka bukë, nuk ka punë, mungon energjia”, thotë Kastrati.

Janë gjithësej 5.500 familje apo rreth 40 mijë banorë, shumica e të cilëve asnjëherë nuk ka përfituar para nga tokat e përmbytura.

Ndërtimi i hidrocentralit të Fierzës në vitin 1978 përmbyti Kukësin e vjetër dhe 36 fshatra të rretheve Kukës, Has, Tropojë dhe Pukë.

Top Channel,  15.11.2017

HEC-i i Moglicës, një nga dy hidrocentralet e kaskadës së Devollit, në 2019 do të hedhë në rrjet energjinë e prodhuar, duke përforcuar kapacitetet prodhuese në vend. Punimet janë brenda parashikimeve dhe kjo iu bë e ditur Kryeministrit Edi Rama nga drejtuesit e kompanisë, gjatë inspektimit që Kryeministri, sëbashku me ministrin e Infrastrukturës dhe Energjetikës, Damian Gjiknuri, bëri sot në këtë vepër.​

“Do të fillojmë me mbushjen e digës vitin tjetër, në 2018 dhe do të shkojmë më tej me prodhimin gjatë pranverës së vitit 2019 dhe në fund të vitit 2019 do të përfundojë gjithçka,” – u shpreh një nga drejtuesit e Statkraft.

Me kapacitet të instaluar 256 Më, HEC-i i Moglicës rrit kapacitetet prodhuese të energjisë në vend me 700 Gëh dhe e gjithë kaskada e Devollit do të rrisë me 17% furnizimin me energji. HEC-i i Moglicës është një vepër unikale në projektim e ndërtim. Për herë të parë, diga e Moglicës do të lidhet me centralin e prodhimit nëpërmjet një tuneli 11 km të gjatë, i cili do të ndërtohet brenda në shkëmb.

“11 kilometra tunele nga këtu te centrali i prodhimit, i cili do të jetë nëntokë. Ky do të jetë centrali i parë i ndërtuar në Shqipëria nëntokë,” – u shpjegoi një nga drejtuesit e punimeve.

Po ashtu, me një lartësi prej 160 metrash, diga e Moglicës është një ndër digat më të lartë në botë në llojin e saj.  “Është një ndër më të lartët në llojin e tij. Mendoj se është vetëm një në Kinë që është pak më e lartë, por është thuajse e njëjta. Është një ndërtim unikal dhe shumë i madh,” – theksoi një nga inxhinierët zbatues.

Për ndërtimin e kësaj vepre aktualisht janë angazhuar rreth 1400 punonjës. “Përafërsisht, duke përfshirë edhe rrugët zëvendësuese, janë 1300-1400 njerëz,” – u shpreh një nga inxhinierët zbatues.

Përveç investimit në veprën energjetike, kompania ka investuar 60 milionë euro në infrastrukturën rrugore, duke iu ardhur në ndihmë banorëve të zonës së Devollit.

energjia.al  14.11.2017

Pas vizitës në hidrocentralin e Moglicës, Ministri i Infrastrukturës dhe Energjisë, Damian Gjiknuri ka publikuar edhe një video ku paraqitet grafikisht projekti i Kaskadës së Devollit.

2 HEC-et që po ndërtohen prej vitit 2015, Moglica dhe Banja, do  të rrisin me 17% furnizimin me energji të vendit. Vetëm për veprën e dytë të këtij projekti, pikërisht hidrocentralin e Moglicës, deri më tani janë investuar 215 milionë euro.

Lartësia e digës do të jetë 160 m, kapaciteti i instaluar 183 MW dhe prodhimi mesatar 450 GWh.

Scan Tv,  13.11.2017

Potenciali i zhvillimit të këtij turizmi në Shqipëri. Flet ekspertja amerikane për turizmin e aventurës, Paige Viren

Turizmi i aventurës po tërheq gjithnjë e më shumë turistë drejt Shqipërisë, duke ndjekur trendet e kësaj industrie në botë. Ekspertja amerikane për turizmin e aventurës, Paige Viren, tregoi për “Monitor” se si mund të përfitojnë komunitetet lokale duke ruajtur balancën ekonomike, mjedisore dhe kulturore. Ajo ngre shqetësimin e largimit të të rinjve nga zonat me potencial zhvillimi…

Paige Viren, eksperte në sipërmarrje dhe turizëm, është njohur me ofertën e Shqipërisë për sa i përket turizmit të aventurës dhe ka kryer takime dhe diskutime me grupe sipërmarrësish lokalë, biznese dhe aktivistë të organizatave joqeveritare.
Paige vjen në Shqipëri pas një vizite dhe në Kosovë, në kuadër të përdorimit të teknologjisë dhe inovacionit për të mbështetur zhvillimin e qëndrueshëm të turizmit, veçanërisht të turizmit mbështetur mbi aventurën, kulturën e pasur dhe natyrën, për të cilët ajo shikon potencial zhvillimi.

Shqipëria ofron të gjitha llojet e turizmit, me një natyrë të shfrytëzueshme në të gjitha stinët, dhe një distancë të afërt të bregut të detit dhe zonës malore. Si dobësi të këtyre zonave, Paige Viren evidentoi hendekun e përdorimit të teknologjisë, që të sillte më afër turistëve bukurinë e këtyre zonave, por edhe dëshirën e të rinjve për t’u larguar nga këto zona.

Për ta ndaluar këtë, Paige Viren, e vuri theksin te fuqizimi i vendasve. Njerëzit duhet ta duan vendin e tyre, të kenë dëshirë të jetojnë dhe të mendojnë si ta kthejnë në përfitimin e tyre ekonomik dhe kjo, duke u mbështetur mbi politika që nxisin zhvillimin e qëndrueshëm të turizmit. Ky do të jetë çelësi i suksesit, njerëzit të duan të jetojnë në vendin e tyre.

Me grupin e saj, udhëtuan nga Kukësi në Llogora, në më pak se pesë orë, me shpejtësi normale. Nëse mund të organizohet në një mënyrë më të mirë, mund të krijosh produkte turistike që të përfshijnë të dyja zonat, malore dhe bregdetare.

Cila është përshtypja juaj e parë nga Shqipëria?

Përshtypja e parë nga Shqipëria ishte e shkëlqyer. Bukuritë natyrore dhe kultura janë mbresëlënëse, keni plot gjëra të mira për të ndarë. Përfundimisht është një rajon i paprekur, edhe pse ka disa përpjekje për zhvillimin e turizmit, unë shikoj potencial për turizmin. Duhet të krijohet ekonomi bazuar mbi turizmin e qëndrueshëm, me fokus në turizmin e aventurës, apo turizmin kulturor dhe mjedisin natyror. Kjo do të ishte mënyra më e zgjuar.

Mbresa

Bukuritë natyrore dhe kultura janë mbresëlënëse, keni plot gjëra të mira për të ndarë. Përfundimisht është një rajon i paprekur, edhe pse ka disa përpjekje për zhvillimin e turizmit, unë shikoj potencial për turizmin. Duhet të krijohet ekonomi bazuar mbi turizmin e qëndrueshëm, me fokus në turizmin e aventurës, apo turizmin kulturor dhe mjedisin natyror. Kjo do të ishte mënyra më e zgjuar.

Shqipëria ka burime të pafundme natyrore, të cilat kanë filluar të tërheqin ndjeshëm vëmendjen e të huajve së fundmi. Cili është rekomandimi juaj,çfarë duhet të bëjë Shqipëria për të shfrytëzuar këtë moment dhe për të nxitur zhvillimin e qëndrueshëm?

Ju keni kaluar shumë sfida dhe besoj se është koha që njerëzit të fillojnë të ndihen mirë me vendin ku jetojnë, të kenë ndjenjën e krenarisë. Kjo do të inkurajojë njerëzit që të mbrojnë mjedisin. Nëse do të ndihen të lidhur me vendin e tyre dhe do të ndiejnë se i përkasin atij vendi, do të kujdesen më shumë për të. Kur njerëzit hedhin plehrat në rrugë, është e qartë se nuk e mendojnë si vendin e tyre. Një vend i mirë për të jetuar, është një vend i mirë për t’u vizituar.
Nuk ka thjesht të bëjë me promovimin për të tërhequr turistë, por që njerëzit të kenë një punë që mund t’ju mundësojë të jetojnë jetën që duan, t’ju sigurojë disa para më shumë.

Jo të gjithë duan që të jetojnë në qytet. Nëse doni një zhvillim të qëndrueshëm duhet të bëni këtë. Ka shumë të rinj në këto vende, të cilët nuk duan të jetojnë në zonat rurale, si mund ta bëni një vend që njerëzit të duan që të jetojnë. Biznesi i turizmit është në atë nivel, nivel të ulët, por që njëkohësisht mund të inkurajojë njerëzit të qëndrojnë nëpërmjet vendeve të punës.
Bar-kafetë, tur-operatorët, apo individët që mundësojnë vozitjet me kajakë, dikush që gatuan, apo një tjetër që organizon piknik në natyrë, apo dikush që ndan një përvojë unike si përgatitja e rakisë, unë do të paguaja për këtë. Nuk ka nevojë për mjedise luksi, mjafton që të hapin shtëpitë e tyre dhe të ndajnë mënyrën e tyre të jetesës me turistët.

Nuk e di sa jeni në dijeni, por së fundmi ka pasur një debat në Shqipëri, pasi në zonat malore (më të bukurat në Shqipëri), si dhe në Jug (lumi i Vjosës) janë dhënë leje për zhvillimin e hidrocentraleve, që rrezikojnë të dëmtojnë natyrën e virgjër. Cili do të ishte rekomandimi juaj në këtë drejtim?

Kur fokusohesh tek turizmi i bazuar mbi burimet natyrore, mendoj se do të ndikohej zhvillimi nga projekte, siç janë hidrocentralet apo industria e rëndë. Duhet të ndryshohet qasja se si njerëzit e perceptojnë turizmin, pasi hidrocentralet vërtet mund të gjenerojnë të ardhura, apo të hapin vende të reja pune për komunitetin, por dëmtojnë dhe mjedisin. Nëse në vizionin tuaj duhet të mbroni asetet natyrore, kulturën lokale duhet të përforconi zhvillimin që nuk i dëmton ato. Nuk duhen parë paratë që sjell në afatshkurtër një Projekt, por edhe ndikimi negativ.

Në mendimin tim duhet të zhvilloni një linjë të bazuar mbi tre shtylla kryesore, kur bëhet fjalë për ekonominë. Kjo linjë treshe, çfarëdo zhvilli që të ndërmerrni, duhet të ketë ndikim pozitiv në ekonomi, kulturë dhe mjedis. Nëse planifikoni të ndërtoni një digë për ndërtimin e hidrocentralit, kjo mund të jetë ekonomike, por çfarë është vlera mjedisore dhe kulturore?

Në Shtetet e Bashkuara të Amerikës, të gjitha industritë që u ngritën përgjatë lumenjve, tashmë janë shpërngulur. Tani po përpiqemi që të rregullojmë çka është dëmtuar. Keni mundësinë në Shqipëri që të forconi dhe të mbroni atë që keni në një mënyrë të qëndrueshme dhe të menduar mirë, që iu mundëson punë vendasve dhe gjithashtu forcon kulturën.

Kujdes!

Kur fokusohesh tek turizmi i bazuar mbi burimet natyrore, mendoj se do të ndikohej zhvillimi nga projekte, siç janë hidrocentralet apo industria e rëndë. Duhet të ndryshohet qasja se si njerëzit e perceptojnë turizmin, pasi hidrocentralet vërtet mund të gjenerojnë të ardhura, apo të hapin vende të reja pune për komunitetin, por dëmtojnë dhe mjedisin

Rritja e fluksit të turizmit në zonat rurale së fundmi mund të ushtrojë presion për rritjen e kapaciteteve akomoduese, që mund të dëmtojnë natyrën. Cili do të ishte rekomandimi juaj për të zgjidhur këtë problem?

Në mendimin tim duhet të ketë përdorim optimal të burimeve mjedisore, të cilat ndihmojnë që të ruhet trashëgimia natyrore dhe biodiversiteti. Duhet të respektohet origjinaliteti socio-kulturor i komuniteteve mikpritëse dhe të mundësohen përfitime socio-ekonomike për të gjitha grupet e interesit.

Si mund të nxitet turizmi i aventurës në Shqipëri, në funksion të zhvillimit të komunitetit lokal, por edhe nxitjes së zhvillimit të qëndrueshëm?

Diçka që kam vënë re është se këtu njerëzit janë mikpritës dhe të ngrohtë, ushqimi është i mirë dhe keni burime natyrore të pafundme. Pra, ju i keni, por duhet të organizoni përpjekjet. Gjatë vizitës sime këtu kam takuar njerëz që përpiqeshin që të bënin të njëjtën gjë, por vetëm. Jam e mendimit se duket të krijohet rrjeti dhe të koordinohet puna midis njerëzve që bëjnë të njëjtën gjë, por që me vështirësi bëhen bashkë.

Në patëm një takim në Vlorë, ku u njohëm me një grup që organizonin zhytje, apo hedhje me parashutë, të cilët po bëjnë gjëra të mira. Ka shumë pjesë që duhet të bëhen bashkë, mbase krijimi i një shoqate, që të tregojë se çfarë politike mund të na ndihmojë për të zhvilluar më tej atë që tashmë e keni. Në këtë mënyrë, do të tërhiqni njerëz në Shqipëri, por edhe vetë shqiptarët. Ne shkuam në Shishtavec dhe shumë nga shqiptarët nuk e kishin vizituar ende atë vend.

Nëse keni njohuri, cilat janë zonat më interesante në Shqipëri për zhvillimin e turizmit të aventurës?

Varet se nga vijnë turistët, p.sh., unë vij nga Karolina e Veriut, një vend bregdetar dhe do të isha e interesuar që të shkoja në male, por në të njëjtën kohë e pëlqej dhe detin. Mendoj se ju i keni të gjitha dhe mund të plotësoni nevojat dhe interesin e secilit turist. Besoj se nuk është problem që të akomodoni turistët në zonat bregdetare gjatë sezonit të verës apo udhëtimet e fundjavës nuk kanë pse të jenë vetëm buzë detit. Por nëse përfshini aktivitetet si hiking, vozitje me kajak dhe mund të zgjeroni sezonin turistik jo vetëm gjatë sezonit veror dhe mund ta shtrini në të gjitha zonat.

Përpos kësaj, ju mund ta përfshini edhe në kurrikulat e shkollës, në mënyrë që të edukoni brezin e ri me dashuri ndaj mjedisit dhe natyrës. Pse të mos e mësojnë mësimin e biologjisë në vendin e tyre?

Në këtë mënyrë, edhe vendasit duhet të dinë se çfarë të sugjerojnë për zonën e tyre, pra të nxisin turizmin.
Gjithashtu, edhe në Tiranë keni burime të mrekullueshme natyrore që mund të shfrytëzohen edhe më shumë. Një shembull është edhe zona e Pëllumbasit.

Çfarë ndërhyrjesh mund të bëjë qeveria shqiptare për të nxitur turizmin e aventurës në vend?

Sikurse e thashë, ka grupe apo individë që po përpiqen të bëjnë të njëjtën gjë, të paorganizuar. Roli i qeverisë është që t’i bëjë këto grupe, të cilët operojnë në industrinë e turizmit vetëm, bashkë. Qeveria duhet të formësojë disa politika që njerëzit të dinë t’i ndjekin ato dhe të rrisin përfitimet e tyre ekonomike. Organizimi i industrisë së turizmit do të ishte një mënyrë e mirë për të vendosur ura komunikimi midis bizneseve të përfshira në këtë industri dhe qeverisë.

Si është sot në botë kërkesa për turizmin e aventurës dhe si mund të përfitojë Shqipëria prej saj?

Kërkesa për turizmin e aventurës është e lartë, ashtu si dhe për lloje të tjera të turizmit. Duhet kuptuar se cili është targeti dhe nëse targeti juaj janë turistët që kërkojnë aventurën duhen kanalizuar përpjekjet për të përfituar nga kjo kërkesë. Fokusi duhet të vendoset tek ekonomitë lokale dhe te vendasit, duke i fuqizuar ata. Ndoshta, një mënyrë mund të jetë ofrimi i trajnimeve të ndryshme, si për shembull si të përmirësojnë shërbimin ndaj klientëve. Duhet të ndihmojnë njerëzit që të kuptojnë industrinë e turizmit.

Në periferi të Tiranës ndodhet fshati i Pëllumbasit, ku çdo të diel organizohet pazari, ku shiten ushqimet tradicionale të zonës. Vendasit bëhen bashkë çdo të diel dhe në përgjithësi shkojnë shqiptarët, por kjo mund të zgjerohet edhe te të huajt. Kështu njerëzit fillojnë të pëlqejnë vendin e tyre, bëhen krijues dhe gjejnë mënyra se si të përfitojnë.
Pashë që njerëzit atje po shisnin mjaltë në rrugë. Me një paketim interesant mund të tërheqin turistët dhe të nxjerrin përfitimet e tyre ekonomike.

Paige Viren, eksperte e turizmit

Kreu studimet bachelor për Rekreacion dhe studimet master për Edukim dhe Studime në Turizëm në Universitetin Shtetëror të Bowling Green, si dhe doktoraturën në Universitetin Shtetëror të Miçiganit në Departamentin e Burimeve Turistike, Rekreacionit dhe Parqeve.

Kërkimet e Paige Viren bazohen mbi marketingun, komunikimin dhe sjelljen konsumatore lidhur me turizmin, me interes të veçantë te turizmi i aventurës dhe eko-turizmi, si dhe në zhvillimin e qëndrueshëm të komunitetit. Me një përvojë të gjatë në industrinë e turizmit, shpalos një qasje me vlerë për këtë industri. Znj. Viren ka punuar për organizatat Adventure Travel Trade Association (ATTA) dhe Konservimi Ndërkombëtar dhe ka kryer studime për kërkesën dhe ofertën në industrinë e turizmit.

Paige Viren ka punuar gjithashtu me komunitetet rurale me interes në zhvillimin e qëndrueshëm bazuar mbi turizmin, si një alternativë për të diversifikuar ekonominë rurale. Turizmi i qëndrueshëm, sikurse nënvizohet edhe nga Organizata Botërore e Turizmit, duhet të ketë një përdorim optimal të burimeve mjedisore, të cilat ndihmojnë që të ruhet trashëgimia natyrore dhe biodiversiteti, të respektohet origjinaliteti socio-kulturor i komuniteteve mikpritëse dhe të mundësonte përfitime socio-ekonomike për të gjitha grupet e interesit.
Turizmi i qëndrueshëm ka potencialin që të krijojë lidhje midis ruajtjes së natyrës dhe mirëqenies së komuniteteve lokale përmes përfitimeve si gjenerimi i të ardhurave, ruajtja e kulturës dhe kapaciteteve ndërtuese.

Eksperte në:
Sjellje konsumatore
Turizmin e aventurës
Zhvillimin e qëndrueshëm të turizmit
Marketingun e turizmit
Anketat studimore

Revista Monitor,  04.11.2017

Gjykata Administrative rrëzon padinë e banorëve për ndalinimin e ndërtimit të HEC në Valbonë.

Sipas vendimit e gjykatës ndërtimi i HEC-ve është konsideruar e ligjshme. Gjykata rrëzoi padinë e banorëve të njësisë administrative Markgegaj.

Ndërtimi i hidrocentraleve në Valbonë është kundërshtuar vazhdimisht, herë me protesta e herë me koncerte, nga banorët e zonës dhe nga aktivistë të mjedisit.

Banorët shprehen se ndërtimi i qoftë edhe një HEC-i të vetëm, do të dëmtonte në mënyrë të pariparueshme Luginën e Valbonës dhe turizmin në këtë zonë.

Ora News,  03.11.2017

Katër kërkesa të reja për hidrocentrale deri në 2 MW janë dorëzuar në Ministrinë e Infrastrukturës dhe Energjisë në dy ditët e fundit të tetorit. Ashtu sikurse e kërkon procedura aplikimet janë shpallur në faqen e ministrisë për të pritur reagimet nga ndonjë palë interesi, ose kundërshtime në rast se ka. Kërkesat edhe pse të formuluara në katër aplikime përfshijnë në fakt ndërtimin e shtatë hidrocentraleve. Por kush janë në fakt subjektet që kanë aplikuar për zhvillimin e këtyre projekteve dhe zonat që parashikohen të ndërtohen në rast se meret miratimi

Aplikimet

HEC “Empier” është aplikimi i parë i bërë nga “Anesti  Jaupllari/Eralda Intimo” me një , me kapacitet prodhues deri në 2 MË, në pellgun ujëmbledhës të burimeve të Moglicës, degë të lumit Devoll, Bashkia Maliq, Qarku Korçë.

HEC “Agolli”, me kapacitet prodhues deri në 2 MË, në pellgun ujëmbledhës të përroit të Goces, Gjyrasit dhe Bickës, degë të lumit Devoll, Bashkia Maliq, Qarku Korçë është projekti i dytë, aplikuar nga ErvinKita/Taverna Agolli.

Aplikimi I tretë është për HEC “Emanueli”, me kapacitet prodhues deri në 2 MË, në pellgun ujëmbledhës të përroit të Vomësit, degë e lumit Gjadër, Qarku Lezhë. Shoqëria që ka aplikuar është Shoqëria “Gjoni Kalivac” sh.p.k., është një shoqëri me përgjegjësi të kufizuar me objekt të aktivitetit: Ndërtime civile, industriale, turistike, bujqësore, rrugore.

Aplikimi i katër për tre hidrocentrale ““Bena, Bena 1 dhe Bena 2”, me kapacitet prodhues deri në 2 MË, në pellgun ujëmbledhës të përroit të Benes, degë e lumit Drin, Qarku Shkodër është i shoqërisë “Marjakaj” sh.p.k., është një shoqëri me përgjegjësi të kufizuar me objekt të aktivitetit: Prodhimi dhe tregtimi i energjisë elektrike në H/C Bene, Komuna Shllak, Shkodër.

Ministria edhe më herët ka bërë të qartë se të gjitha kompanitë kanë të drejtë të aplikojnë por kjo nuk I bën ato automatikisht kompani që mund të zhvillojnë projektin. Nëse propozimet e tyre nuk përmbushin kushtet ligjore atëherë ato refuzohen. Deri në 15 shtator të këtij viti në ministri janë paraqitur mbi 200 aplikime por që kishin marrë miratim final vetëm 22.

Revista Monitor,  02.11.2017

Pas 20 vitesh zvarritjeje, hidrocentali i Kalivaçit duket se po shkon më në fund drejt realizimit. Ministria e Energjisë njoftoi se ka shpallur fituesin e tenderit për dhënien me koncesion të hidrocentralit që kushton 125 milionë euro.

Në tenderin ndërkombëtar u paraqitën ofertues. Ato ishin shoqëria “Doko Sh.p.k.”, bashkimi i kompanive “Gener 2” dhe “Favina”, si dhe konsorciumi i kompanisë turke “Ayen Enerji” me atë shqiptare “Fusha Sh.p.k.”. Pas hapjes së ofertave, Ministria ka shpallur fitues pikërisht konsoricumin “Ayen enerji”-“Fusha”.

Ministria thotë se ndërtimi i hidrocentralit në lumin e Vjosës do të zgjasë dy vite e gjysmë. Ai do të ketë një fuqi të instaluar prej 120 megash dhe do të prodhojë 366.6 milionë kilovat/orë energji në vit.

Saga e hidrocentralit të Kalivaçit ka nisur plot 20 vite më parë, kur u dha me koncesion nga qeveria e atëhershme te një kompani italiane e zotëruar nga biznesmeni Francesco Becchetti. Por projekti nuk u finalizua asnjëherë, edhe pse afati i tij u shty tri herë.

Dy vite më parë, kompania italiane e paditi qeverinë shqiptare në Arbitrazh. Ajo pretendon se faji për mosndërtimin e hidrocentralit është i shtetit shqiptar, ndërkohë që qeveria thotë se faji është i kompanisë, e cila për 20 vite, jo vetëm që nuk e përfundoi hidrocentralin, por ka kryer vetëm punime minimale.

Gjyqi vazhdon, por sipas Ministrisë, të dyja palët kanë pranuar se kontrata e koncesionit tashmë ka përfunduar. Rrjedhimisht, vitin e kaluar, shteti shqiptar vendosi ta rihedhë sërish në tender hidrocentralin.

Top Channel,  30.10.2017

Pas 20 vitesh qeveria rikthen ndërtimin mbi lumin Vjosë të hidrocentralit të Kalivaçit. Vepra është menduar të ketë një kapacitet prej 110 megavat orë dhe do të kushtojë 125 milion euro.

Bashkimi i dy firmave “Ayen Enerji” dhe “Fusha” , fituese të tenderit, duhet të përfundojnë brenda 30 muajsh ndërtimin e HEC-it. Qeveria shqipatre prishi përpara 6 muajsh kontratën me kompaninë Hidro srl, e cila zotëronte aksionet e shoqërisë Kalivaçi Green Energy, në pronësi të Françesko Beketit dhe rihapi garën për dhënien me koncesion për 35 vjet të hidrocentralit.

“Ayen Enerji” dhe “Fusha” arritën të fitonin garën mbi dy firmat e tjera pjesëmarrëse Doko dhe Gener 2.Impakti mjedsior që ka ndërtimi i veprës mbi lumi Vjosë kushtëzoi edhe kriteret për përzgjedhjen e fituesit. Është vendosur që shoqëria që ka marrë koncesionin të ndërtojë një rrugë kalimi për peshqit me anë të një By-pass-i të posaçëm dhe të prekë sa më pak sipërfaqe që është e mundur.

Pas dhënies së kontratës për hidrocentralin e Poçemit, i cili nuk ka nisur punimet pasi është konstestuar nga banorët e zonës në gjykatë, ky është HEC-i i dytë me këtë madhësi që ndërtohet mbi lumin Vjosë. Organizata të shumta mjedisore shqiptare dhe të huaja kanë kundërshtuar ndërtimin e hidrocentraleve mbi këtë lumë.

Shqiptarja.com  30.10.2017

Ministria e Infrastrukturës dhe Energjisë njofton se ka marrë një aplikim për ndërtimin e një hidrocentrali në lumin e Bistricës, në një seksion të kanalit të Çukës.

Bashkimi i Përkohshëm i Shoqërive “Alb BB Auditing” sh.p.k. dhe “Qendra e Vlerësimit dhe Zhvillimit të Pasurive Ujore” sh.p.k. ka riaplikuar pranë këtij institucioni pas dështimit një vit më parë për të siguruar dritën jeshile për ndërtimin e HEC-it “Saranta”.

Shkak për mosmiratimin e aplikimit herën e parë duket se ka qenë kapaciteti shumë i ulët prodhues prej 1 MW, pasi tashmë projekti ka dyfishuar fuqinë e instaluar në 2 MW.

Sa i takon shoqërive, “ALB BB Auditing” ka si veprimtari kryesore kryerjen e misioneve të kontrollit ligjor, të llogarive dhe të ekspertizave kontabël, ndërsa nuk paraqet asnjë eksperiencë në fushën e energjisë apo ndërtimit.

Ndërsa shoqëria “Qendra e Vlerësimit dhe Zhvillimit të Pasurive Ujore” sh.p.k., e regjistruar në Qendrën Kombëtare të Biznesit në vitin 2012, rezulton të ketë kapital prej vetëm 100 lekësh të reja. Përshkrimi i kompanisë thotë se ajo merret me vlerësimin e pasurisë ujore, por edhe zhvillimin e hartimin e projekteve për realizimin e ndërtimeve civile, industriale e hidroenergjitike.

Kjo është kërkesa e dytë pranë Ministrisë së Energjisë për ndërtimin e një hidrocentrali prej 2 MW, pas kërkesës për ngritjen e HEC-it “Gunja” pranë fshatit Guri i Bardhë.

Sakaq, interesi më i madh i investitorëve të brendshëm e të huaj është në lidhje me ndërtimin e parqeve fotovoltaike për shfrytëzimin e energjisë diellore.

Scan Tv,  23.10.2017