info@energjia.al

Qeveria greke ka miratuar propozimin për të eksploruar për burime hidrokarburesh nënujorë në detin Jon, pranë kufirit me Shqipërinë, si dhe në Kretë, siç duket edhe nga kjo hartë.

Ishte ministri grek i mjedisit, George Stathakis ai që miratoi propozimin e dytë për eksplorim në Greqinë Perëndimore, me kërkesë të Energean Oil and Gas. Kërkesën për të eksploruar në Kretë e kanë bërë Total, Exxon Mobil dhe Hellenic Petroleum consortium.

Energean oil and gas, është e interesuar për eksplorim nënujor  dhe gëzon të drejtat për ta bërë këtë në blloqet 3 dhe 7 të detit jon.

Këto blloqe, janë njëri në pjesën ujore që rrethon ishullin e Korfuzit nga ana perëndimore dhe tjetri në jug të ishullit, në bllokun që përfundon në Gjirin e Artës.

Bëhet fjalë për një sipërfaqe totale prej 6700 kilometrash katrorë.

Nëpërmjet një njoftimi për shtyp, Energean, kompania që do të kryejë eksplorimin deklaroi se një epokë e re po vjen. Në pjesën veriperëndimore të Greqisë, pranë kufirit me vendin tonë, mendohet se ekziston një rezervë nënujore gjigande nafte.

Scan Tv,  27.06.2017

Gazsjellësi Trans-Adriatik do të dhurojë rreth 92 automjete shërbimi për komunitetet lokale në të tre prefekturat e Greqisë Veriore, në të cilat kalon gazsjellësi. Kjo iniciativë është pjesë e programit të investimit në shoqëri dhe mjedis, për të cilën TAP ka vendosur një fond prej 32 milionë eurosh.

Përmes shumës së 9 milionë eurove, TAP në bashkëpunim me qeverinë greke do të blejnë:

  • 33 ambulanca
  • 22 kamionë pastrimi
  • 17 automjete pyjore
  • 14 borëpastruese
  • dhe 6 automjete për mbrojtjen civile

Njoftimi u bë nga vetë kompania gjatë një konference për shtyp, ku merrnin pjesë krerët e tre prefekturave greke, si edhe presidenti i Qendrës Kombëtare të Emergjencave Civile.

Programi i TAP është implementuar në bashkëpunim me administratën lokale, me këtë të fundit që dërgonte kërkesa pranë TAP.

Tre përfaqësuesit e Maqedonisë Qendrore, Maqedonisë Perëndimore dhe Maqedonisë Lindore e Trakës falenderuan TAP për standardin që vendos në përgjegjësinë sociale të korporatave dhe për donacionin që do të përmirësojë menaxhimin e mjedisit në Greqinë Veriore, dhe që do të përmirësojë cilësinë e jetës të banorëve të saj.

Përmes programeve të ngjashme të përgjegjësisë sociale, TAP ka investuar edhe në vendin tonë, duke ndërtuar ura, segmente rrugore dhe një sërë projektesh të tjera. I fundit ishte inaugurimi i dy ballkoneve mbi Kanionin e Osumit, nga ku mund të shihet panorama.

Scan Tv,  23.06.2017

Ndërtimi për gazsjellësin Trans-Adriatik vijon me një ritëm të përshpejtuar, deklaroi kryeministri grek Alexis Tsipras, gjatë konferencës së përbashkët për shtyp me homologun e tij turk, Binali Yildirim.

Për Alexis Tsipras, TAP është një ndër projektet më të rëndësishme në rajon.

Korridori jugor i gazit që përbehet nga gazsjellësi trans-anatolian dhe ai Trans-Adriatik do të kalojë përmes Azerbaixhanit, Turqisë, Greqisë, Shqipërisë dhe do të përfundojë në Itali.

I gjatë rreth 878 kilometra dhe me një kosto totale prej 4.5 miliardë eurosh, ky projekt shihet me rëndësi mjaft të veçantë për zhvillimin e rajonit.

Tap është cilësuar si prioritet kyç edhe nga Bashkimi Europian, që kërkon të ulë varësinë e Europës nga gazi rus.

Projekti në tërësi parashikohet të përfundojë në vitin 2019, dhe Bashkimi Europian ka bërë vazhdimisht thirrje që të respektohen afatet.

Deri më tani, si në territorin grek, si në Shqipëri e si në 8 kilometrat e territorit italian çdo gjë po shkon sipas parashikimeve dhe nuk ka asnjë vonesë.

Scan Tv,  21.06.2017

Një vit nga nisja, ndërtimi i gazsjellësit Trans Adriatic Pipeline (TAP), projekti më i madh infrastrukturor energjetik (gazi natyror) vlerësohet se po ecën sipas të gjitha parashikimeve.

Sipas deklaratave të bëra nga konsorciumi, projekti ka shënuar nivele të humbura kohore të frekuencave nën normat ndërkombëtare.

Rreth 49% e gjurmës që projekti do të ndjekë në Shqipëri dhe Greqi është pastruar (371 km nga 765 km). Rreth 22.6% e tubave janë tashmë të vendosur nën tokë.

Në Itali, puna vazhdon me grumbullimin e parë të pemëve të ullirit të magazinuara përkohësisht. Ndërtimi i mikro-tunelit prej 1,5 km mund të fillojë më vonë gjatë vitit.
Rreth 68.5% ose 55,000 tuba janë shpërndarë në Greqi, Shqipëri dhe Itali.
Më shumë se 5,200 njerëz po punojnë për projektin në të gjitha vendet pritëse të TAP-it. Mbi 85% e tyre janë punësime lokale.

Gjatë këtij viti TAP zbatoi një sërë projektesh me natyrë sociale. Janë rreth 70 projekte të tilla me një vlerë totale investimi prej rreth 15 milionë euro do të zbatohen në muajt e ardhshëm. Në total, TAP do të investojë mbi 55 milionë euro në projektet sociale në Greqi, Shqipëri dhe Itali.
Drejtori Menaxhues i TAP Ian Bradshaw tha se: “Ne jemi të kënaqur me punën tonë të deritanishme. Projekti ka pasur ecuri pozitive dhe mund të themi se afërsisht 41% e tij është realizuar duke përfshirë këtu aspektin inxhinierik, të prokurimit dhe ndërtimit. Ne jemi në rrugën e duhur për të ofruar sasinë e parë të gazit nga fushat e Shah Deniz II në vitin 2020, duke u bërë pjesë aktive e rrjetit europian të energjisë. Kjo do të mundësojë energji më konkurruese dhe më të sigurt për të gjithë rajonin.

Një vit nga nisja e punës për ndërtimin e gazsjellësit janë rreth 173 km tuba çeliku të salduara, rreth 21 herë sa gjatësia e projektit në Itali. Ato janë vendosur në Greqi dhe Shqipëri. TAP është i angazhuar për të bërë të mundur që toka të kthehet në gjendjen e saj origjinale. Një projekt i këtyre përmasave do të ballafaqohet me sfida të përditshme, megjithatë, ne sigurohemi që t’i adresojmë ato duke punuar ngushtë me ekipet, rrjetin e furnizimit, si dhe me komunitetet “, shtoi Bradshaw.
TAP parashikon që pas rreth një viti të ketë përfunduar pastrimin dhe klasifikimin e rrugës përgjatë Greqisë dhe Shqipërisë dhe të jenë vendosur në tokë rreth 67% e tubave të salduar.

Revista Monitor,  17.05.2017

Korporata Publike e Energjisë në Greqi do të shesë përfundimisht 24% të Operatorit të Pavarur të Sistemit të Transmetimit tek kompania kineze SGID (State Grid International Development).

Marrëveshja kap shifrat e 320 milionë eurove dhe mori aprovimin e Komisioni Europian, pasi nuk paraqet asnjë rrezik për konkurrencën duke qenë se dy kompanitë IPTO dhe SGID nuk janë të ndërlidhura në asnjë formë.

Privatizimi i aksioneve të kompanisë greke u imponua nga ligji, pas një marrëveshjeje të korrikut 2015 mes Greqisë dhe trojkës europiane, ku parashikohej ndarja e IPTO nga kompania mwmw. Pas vlerësimit të ofertave, më e larta rezultoi ajo e SGID.

Kompania kineze kontrollohet nga Këshilli Shtetëror i Mbikëqyrjes së Aseteve të Republikës Popullore të Kinës dhe merret kryesisht me investime dhe operimin e kompanive të transportit e shpërndarjes së elektricitetit jashtë Kinës.

SGID aktualisht zotëron 40% të aksioneve të Operatorit të Transmetimit në Filipine, 25% të aksioneve të kompanisë portugeze të energjisë REN, 44,1% të australianes ElectraNet dhe 12 kompani braziliane transmetimi.

Scan Tv,  12.05.2017

Korporata Elektroenergjetike greke “DEI” ka shprehur shqetësimin e saj lidhur me shtimin e rasteve të vjedhjes së energjisë elektrike në vend. Sipas korporatës, gjatë vitit 2016 u evidentuan 10.616 raste të vjedhjes së energjisë, e llogaritur kjo në 1.640 gigaWat, ose 3.5% e të gjithë sasisë së prodhuar.

10 vite më parë, rastet e vjedhjes së energjisë llogariteshin në më pak se 500 në vit, ndërsa sasia e vjedhur ishte pothuajse e pallogaritshme.

Sasia e vjedhur e energjisë mjafton për të plotësuar nevojat energjetike pothuajse të të gjithë ishujve të Egjeut.

Vlera e energjisë së vjedhur llogaritet në 150-200 milionë euro në vit, të cilës nëse i shtohet edhe shuma e faturave të papaguara prej abonentëve të kësaj korporate gjatë 8 viteve të krizës që ka pllakosur vendin, shkon në më shumë se 1.8 miliardë euro, gjë që e bën DEI-n, një korporatë së cilës tregu i ka shumën më të madhe të borxheve në Europë.

Ndonëse ligji grek parashikon ndjekje penale për vjedhësit e energjisë, shumë pak vetë janë dërguar në burg, pasi pothuajse në të gjitha rastet, gjykatat kanë pranuar justifikimin se janë gjendja ekonomike dhe pamundësia për të paguar shkaktarë që i kanë detyruar të vjedhin energjinë.

Vjedhësit e energjisë janë kryesisht konsumatorë familjarë. Ata kanë të ardhura të ulëta dhe janë kryesisht grekë të varfër, shqiptarë, romë dhe emigrantë nga ish-Bashkimi Sovjetik, Pakistani dhe India, ndërsa nuk është vënë re thuajse asnjë rast i vjedhjes prej konsumatorëve të mëdhenj të energjisë ose bizneset.

Metodat më të përhapura të vjedhjes janë nëpërmjet vendosjes së magneteve pranë matësave elektrikë, ose lidhja drejtpërdrejt nga shtylla në banesë.

Për të shmangur vjedhjet, korporata ka vendosur të ndryshojë matësat, duke aplikuar teknologji dixhitale, si dhe një formulë matematikore matjeje. Në rastet që evidentohet vjedhje e energjisë, korporata thotë se do të vendosë gjoba të rënda ndaj kundërvajtësve.

Top Channel,  20.03.2017

Shtatë muaj pas fillimit të procesit të ndërtimit të gazsjellësit Trans Adriatic Pipeline, janë rreth 95 kilometra tubacione që janë instaluar si në Shqipëri, ashtu edhe në Greqi. Sipas të dhënave zyrtare në territorin shqiptar janë instaluar rreth 40 km tubacione dhe janë pastruar rreth 55 kilometra.

Ky gazsjellës do të ketë një gjatësi prej 878 kilometrash. Kapaciteti fillestar i gazit do të jetë 10 miliardë metër kub, për t’u zgjeruar më pas në 20 miliardë.

Nisja e transportimit pritet të bëhet në vitin 2020. Në zhvillimin e këtij projekti pritet që gjatë vitit 2017 të përfshihet edhe Banka Europiane për Rindërtim dhe Zhvillim, e cila parashikohet të bëhet investitor përmes një huaje të madhe që do të sigurojë.

Në Shqipëri, parashikohet që gjatë vitit 2017, ndikimi i drejtpërdrejtë i këtij projekti në Prodhimin e Brendshëm Bruto të jetë në rreth 500 milionë euro. Shifra e saktë e investimit që TAP do të bëjë në Shqipëri gjatë këtij viti nuk dihet ende zyrtarisht, por në total pritet të jetë në mbi 1 miliard euro.

Revista Monitor,  11.01.2017

Policia Financiare në Greqi ka shkatërruar një rrjet që ndërhynte në matësat e energjisë elektrike dhe vidhte energjinë.

Tre anëtarë të rrjetit; një grek, një rom dhe një shtetas shqiptar; janë arrestuar në flagrancë gjatë ndërhyjres në disa matësa elektrikë. Ndërsa 7 të tjerë, pas denoncimeve të kontrollorëve të Operatorit të Energjisë Elektrike, që kanë zbuluar në kabinat elektrike se kishin ndërhyrë me mënyra artizanale në aparatet matës të tyre, në biznese dhe në shtëpi, duke vjedhur sasi të konsiderueshme energjie në muajt e fundit.

Anëtarët e rrjetit, për çdo ndërhyrje në matësa familjarë merrnin 50 euro, ndërsa për bizneset e vogla 100 euro, duke përfituar mijëra euro në vit nga veprimtaria e tyre.

Deri më tani janë zbuluar mbi 110 raste të ndërhyjres në matësat elektrikë, në të cilët tashmë regjistrohej vetëm 20% e energjisë së konsumuar. Të arrestuarit janë çuar në Prokurori, ku janë njohur edhe me aktakuzat.

Sipas ligjeve greke, dënimet për vjedhjen e energjisë elektrike shkojnë deri në 3 vite burgim, përveç gjobave financiare.

Rastet e vjedhjes së energjisë në vend janë regjistruar qysh para fillimit të krizës, por gjatë viteve të fundit është evidentuar dhjetëfishimi i tyre, duke marrë përmasa të konsiderueshme.

Top Channel,  11.11.2016

Parlamenti grek ka kaluar ligjet që do t’i hapin rrugë paketës së ndihmës prej 2.8 miliardë dollarësh që do të jepet në javët e ardhshme.

Paketa ligjore, e cila u miratua me 152 vota pro, përfshin privatizimin e shërbimit të ujësjellësit dhe energjisë, duke liberalizuar kështu dhe tregun e energjisë elektrike.

Në total, përfshihen 13 ligje nga 15, të cilat qeveria vendosi që t’i adaptojë në maj në përfundim të rishikimit të programit të shpëtimit me BE-në, Mekanizmit të Stabilitetit Europian dhe Fondin Monetar Ndërkombëtar.

Javën e kaluar, deputetët miratuan dhe dhënien me koncesion të një pjese të madhe të aeroportit kombëtar të Athinës. Sipas marrëveshjes në maj, dhe pas miratimit të dy projektligjeve paraprake mbi pensionet dhe tatimet, Greqia mori 7.5 miliardë euro nën këstin e detyrimeve të saj dhe për të ndihmuar në detyrimet e prapambetura të brendshme.

Një këst i dytë prej 2.8 miliardë eurosh do të disbursohet pas së enjtes.  Vendimi mund të merret nga Eurogrupi më 10 tetor, në qoftë se kreditorët janë të kënaqur me detajet e masave.

Revista monitor,  04.10.2016

Ndërtimi i gazsjellësit Trans Adriatic Pipeline (TAP), i cili parashikon të transpotojë gaz nga Azerbajxhani për në Europë po bën progres. Sipas të dhënave zyrtare të TAP janë shtruar rreth 30 kilometra tuba si në territorin shqiptar, ashtu edhe në atë grek. I gjithë tubacioni që do të kalohë në këto territore do të jetë nën tokë në një metër thellësi. Ecuria, sipas burimeve të TAP është brenda parashikimeve të bëra. Ky gazsjellës do të furnizohet nga faza e 2 e zhvillimit të fushës së Shah Deniz dhe do të përfundojë në tregjet europiane. Nevojat e e Shqipërisë llogariten mesatarisht në 5% të sasisë që do të transportohet në fazën e parë e që është rreth 10 miliardë metër kub.

Parashikohet që 870 kilometra tubacione do të lidhen me gazsjellësin tjetër TANAP më kufirin turko – grek.

Në Greqi, gjatësia e projektit është rreth 550 km, seksioni më i gjatë dhe kostoja llogaritet në rreth 2.3 miliardë euro, ndërsa për Shqipërinë ajo llogaritet në rreth 1 miliard euro dhe gjatësia është 215 kilometra. Rreth 37 km tubacion do të jenë nën ujë, në detin Adriatik. Pjesa e Shqipërisë nis në Bilisht Qendër, në rajonin e Korçës, në kufi me Greqinë dhe mbërrin në detin Adriatik, 17 km në veri- perëndim të Fierit.

Revista Monitor,  30.09.2016