info@energjia.al

Të paktën 8 incidente janë raportuar që kur Apple lançoi telefonat në 22 shtator.

Në secilën prej këtyre rasteve problemi ka qenë i njëjtë me bateritë e telefonit të cilat fryheshin aq sa hapnin edhe kapakun e telefonit duke e bërë kështu telefonin të papërdorshëm.

Apple konfirmoi se po e heton këtë problem dhe se është në dijeni të të gjitha situatave.

Numri duket i madh, por ende nuk është statistikisht i rëndësishëm duke marrë parasysh se sa milionë njësi iPhone 8 Apple ka shitur deri më tani.

Ekspertët mendojnë se është një gabim në prodhim dhe Apple po përpiqet të identifikojë linjën e prodhimit.

Kur bëhet fjalë për incidente të tilla njerëzit e kanë akoma të freskët rastin vitit të kaluar të  Galaxy Note 7.

Por pavarësisht incidentit me Galaxy Note 7, Samsung dëshmoi me Galaxy S8 dhe Galaxy Note 8 se mësoi shumë nga fatkeqësia e Galaxy Note 7.

Scan Tv,  12.10.2017

Konsumatorët po ankohen se faturat e fundit të KEDS-it për muajin janar janë dyfishuar krahasuar me ato të muajit paraprak. Kjo ka bërë që të shtohen radhët e gjata në sportelet e KEDS-it, ku ankesat e qytetarëve lidhur me faturat e energjisë për muajin janar, janë të shumta.

Qytetarët po tregojnë se me gjithë shfrytëzimin e paktë të energjisë gjatë këtij muaji faturat u kanë ardhur shumëfish më shtrenjtë se muajve të kaluar. Disa nga ta, madje, kanë akuzuar KEDS-in se po i fsheh kostot e shpenzimeve nga faturat, të cilat ky distributor u dërgon në shtëpitë e tyre.

Kjo gjë i ka ndodhur konsumatorit nga Hani i Elezit, Naim Mejdi Bushi, i cili në faturën e tij ka gjetur se KEDS-i në shumën totale e ka faturuar për 9 euro më tepër.

Deri sa ky konsumator me kalkulimin e KEDS-it ka paguar në total faturën prej 46.08 eurosh, me një llogaritje të tijën Bushi ka gjetur se realisht është dashur të paguajë 37.12 euro.

Po ashtu edhe Ajvaz Hajrullahu, banor i “Lagjes së Spitalit” në Prishtinë, derisa mbante faturën në dorë, borxhin e së cilës sapo e kishte shlyer në sportelet e KEDS-it, thotë se deri në muajin dhjetor ka paguar nga 20 euro, kurse për këtë muaj ka paguar 40 euro.

Gazeta Zëri,  28.01.2016

Radhët e qytetareve që po bëjnë ankesa në zyrat e KEDS-it për fryrje të faturave edhe më tej vazhdojnë të jenë të gjata. Dhjetëra konsumatorë edhe ditën e së martën, ia mësynë zyrës për ankesa në KEDS, me pretendimin se këta të fundit, faturat i kanë fryre faturat e fundit.

Një ndër konsumatorëve të cilët ishin duke u ankuar në zyrën e ankesave në KEDS, ishte edhe Bajrush Hoxha, i cili me zë të lartë u drejtohej punëtorëve të KEDS-it. I nervozuar Hoxha nuk donte të dëgjonte se çka ju thoshin punëtoret e kësaj kompanie, pasi që ai ishte i tmerruar nga fatura e fundit që ka marrë nga kjo kompani.

“Vetëm për muajin dhjetor fatura me ka ardhur 190 euro. Ndërkaq, për muajin nëntor, fatura më ka ardhur diku 69 euro. Unë e di se sa mund të kem harxhuar gjatë këtyre dy muajve dhe se kjo shumë nuk përkon aspak me atë të cilën është shpenzuar energjia”, ka thënë ai.

Hoxha thotë se me probleme të njëjta sikurse ai janë përballur edhe fqinjët e tij. “Nuk na duhen neve arsyetime të tyre. Madje as keqardhje siç kanë thënë nëpër deklarata këta të KEDS-it. Neve si konsumatorë na intereson të zbatohen këto shumë që kanë ardhur janë marramendëse”, ka deklaruar ai.

Edhe Fazli Morina, banor i lagjes “Bregu i Diellit”, me një letër në duar dhe me dy faturat bashkë të muajve të fundit, shihej duke u ngjitur kah shkallet e KEDS-it. Ai pasi që i dorëzoi ankesën që fatura e muajit të fundit i kishte ardhur 143 euro e 70 centë dhe ai këtë gjë e kishte bërë alarmante, ngase siç ka treguar ai, nuk është e mundur që muajin tetor fatura i ka ardhur gati tre herë më pakë se sa në muajin dhjetor Sipas tij, Qeveria duhet të marrë masa ndaj KEDS-it.

Akuza edhe për Qeverinë

Përpos ankesave të cilat i kanë karshi KEDS-it dhe kritikave të shumta për këta të fundit, qytetarët të shumtë, janë ankuar edhe për neglizhencën ose siç e kanë quajtur ata, heshtjen e institucioneve karshi kësaj hajnie, siç dhe e kanë emëruar ata.

Besim Hajdini, ka kritikuar ashpër edhe Qeverinë e Kosovës e cila sipas tij nuk është duke ndërmarrë diçka në lidhje me këto fatura.

“Nuk mundem me besuar, se qysh institucionet e vendit, rrinë heshtur karshi këtij krimi. Kjo nuk është bërë vetëm tash, kjo është ka bëhet rutinë qe dy vite rresht dhe ata heshtin nuk u dalin në ndihmë qytetarëve”, ka thënë ai.

Sipas tij, për muajin nëntor, fatura i ka ardhur në vlerë prej 72 euro, ndërkaq për muajin dhjetor i ka ardhur fatura 189.73 cent.

Ai më tej thotë se gjatë muajit dhjetor ai nuk ka shpenzuar edhe aq shume energji elektrike. Derisa kalonin njerëzit aty pranë sportelit për ankesa, të tjerë prej disa kompanive të cilët nuk deshën që të flasin për gazetën, mirëpo dëgjoheshin duke biseduar me punëtorë të KEDS-it, duke ngritur zërin se në kompaninë e tyre, fatura për muajin e fundit u kishte ardhur mbi 600 euro derisa faturën të cilën e mbanin në duar së bashku me ankesën, në muajin nëntor, fatura ishte 322 euro.

Edhe Anjeza Mejzini, e cila nuk kishte dy javë që kishte ardhur së bashku me bashkëshortin dhe dy fëmijët e saj nga Holanda, e që banonin në lagjen “Dardania”, kishte ardhur në sportelin e KEDS-it, me ankesën se dy muajt e fundit, ajo nuk kishte qenë në banesë dhe se faturat i kishin ardhur që të dyja njësoj nga 30 euro. “Unë nuk kam qenë fare këtu dhe fatura më ka ardhur për dy muaj rresht njësoj, nga 30 euro. Erdha këtu të kuptoj se çka është duke ndodhur”, ka thënë ajo.

Edhe Sara Rugova, banore e “lagjes së Spitalit”, ka treguar se faturat për muajt e fundit, janë shumë të larta duke krahasuar me shpenzime që janë bërë.

“Unë mund të them se faturat për muajt e fundit, kanë ardhur njëjtë ashtu të fryra sikur se në fund të vitit të kaluar. Kjo politikë e KEDS-it, është e fëlliqur dhe ata vazhdimisht do e praktikojnë këtë gjë ngase askush nuk po i kontrollon besa”, ka shtuar ajo.

Gazeta Zëri, 16.01.2014

Për të adresuar shqetësimet e konsumatorëve për faturat e dhjetorit dhe për të dhënë sqarime të nevojshme për mediat dhe konsumatorët, Kompania Kosovare për Distribuim dhe Furnizim me Energji Elektrike (KEDS) ka organizuar Konferencë për media, më 9 janar 2013 në Hotelin Sirius në Prishtinë.

“KEDS është gjithmonë i mobilizuar për lexim të drejtë të njehsorëve sidomos gjatë muajit të dimrit, pasi KEDS është i vetëdijshëm që për shkak të mënyrës se si llogaritet shpenzimi i energjisë elektrike në dhjetor dhe në muajt tjerë të dimrit mund të ketë paqartësi te konsumatorët. Për këtë KEDS ka krijuar grupe emergjente të veprimit apo grupe shtesë për shqyrtimin e ankesave me të vetmen arsye për të qenë afër konsumatorëve”, theksoi Naxhije Pajaziti Arifaj, Menaxhere e Departamentit për Komunikime me Media dhe Publik në KEDS.

Falë mobilizimit për menaxhimin e kësaj situate, shqyrtimi i ankesave për faturat e dhjetorit, për të gjithë konsumatorët, nga afati i përcaktuar 30-ditor, i përcaktuar me rregulla të Zyrës së Rregullatorit për Energji është zvogëluar në afat 15-ditor. Për më shumë, gjatë shqyrtimit të ankesave konsumatorët që kanë bërë ankesë lidhur me faturat e muajit dhjetor nuk do të shkyçen nga rrjeti elektrik në afatin sa zgjat shqyrtimi dhe zgjidhja e ankesës.

Me marrjen e kompetencave për distribuim dhe furnizim me energji elektrike, KEDS funksionimin e vet e mbështet në ligjet që miratohen në Kuvendin e Republikës së Kosovës. Më saktësisht, rregulloret që i aprovon ZRrE, KEDS është i obliguar t’i respektojë në përpikëri. Pjesë e këtyre obligimeve është edhe respektimi i sistemit të tarifave të faturimit të energjisë elektrike, që do të thotë respektimi i tarifës verore e dimërore si dhe të bllok tarifave. Duke pasur parasysh se tani aplikohet tarifa dimërore dhe për shkak të temperaturave të ulëta, rrjedhimisht, edhe faturat vijnë më të larta. Dhe, ndonëse e kuptojmë shqetësimin e konsumatorëve, KEDS nuk mund të ndryshojë asgjë, por duhet të implementojë plotësisht çdo vendim të Zyrës së Rregullatorit.

Përveç zvogëlimit të afatit të shqyrtimit të ankesave të pranuara nga 30 në 15 ditë, KEDS ka shtuar kompetencat e Qendrës së Thirrjes, me ç’rast qytetarët përveç që mund të dorëzojnë ankesat në sportelet e KEDS, këtë mund ta bëjnë edhe përmes thirrjes në numrin kontaktues: 038 501 701 1000 ose përmes emailit në contactcenter@keds-energy.com si dhe përmes uebfaqes së KEDS te vegëza Ideja Juaj.

“Këtë e bëjmë pasi bashkëndjejmë me konsumatorët tonë dhe dëshirojmë të jemi sa më transparentë. Në këtë mënyrë dëshmojmë se i respektojmë në mënyrë të përpiktë ligjet e Republikës së Kosovës dhe se jemi në shërbim të plotë të konsumatorëve tonë. KEDS është gjithmonë i mobilizuar për lexim të drejtë të njehsorëve sidomos gjatë muajve të dimrit, pasi KEDS është i vetëdijshëm që për shkak të mënyrës se si llogaritet shpenzimi i energjisë elektrike në dhjetor dhe në muajt tjerë të dimrit mund të shfaqë paqartësi te konsumatorët”, theksoi Guri Shkodra, përgjegjës për komunikim me media në KEDS.

Për dallim nga muaji nëntor 2013, konsumi i energjisë elektrike në dhjetor është rritur për 35.34% dhe duke marrë parasysh sistemin tarifor të sezonit të dimrit të përcaktuar nga ZRrE, me tarifa të shkallëzuara që parashohin çmim më të lartë për shpenzues më të mëdhenj, konsumatorët janë ballafaquar me fatura më të larta për muajin dhjetor.

KEDS apelon te të gjithë konsumatorët që të dorëzojnë ankesat e tyre përmes formave zyrtare të përcaktuara dhe siguron të gjithë qytetarët që ankesat e tyre do të merren parasysh me seriozitetin më të madh dhe përfundimisht luten të gjithë të kursejnë energjinë elektrike duke pasur parasysh që veprime të tilla ndikojnë në zvogëlimin e konsumit dhe rrjedhimisht edhe në shumën e faturës mujore.

energjia.al 09.01.2014

Ministri i Zhvillimit Ekonomik, Besim Beqaj gjatë një konference për media sot ka bërë sot publike të gjeturat e Komisionit Mbikëqyrës për trajtimin e ankesave të qytetarëve drejtuar KEK-ut lidhur me faturat e energjisë, me ç’rast ka përjashtuar mundësinë e fryrjes së faturave, ndërsa ka konfirmuar se ka pasur gabime në leximin e njësorëve të energjisë elektrike.
Kreu i MZHE tha se javën e kaluar kishte marrë një vendim që të themelojë një Komision Mbikëqyrës për trajtimin e ankesave adresuar në KEK për shqetësimet e qytetarëve lidhur me pretendimet për fryrjen e faturave dhe faturimin e mbingarkuar në përbërje të cilit ishin MZHE, MTI – Departamenti i Metrologjisë që merret me bazhdarimin e orëve, Departamenti për Mbrojtjen e Konsumatorëve, Zyra e Rregullatorit të Energjisë, Korporata Energjike e Kosovës dhe OJQ – Konsumatori.
“Puna e këtij grupi ka qenë që të marrë mostra nga grupi i të gjitha ankesave që kanë ardhur në KEK,  për të monitoruar punën se a janë trajtuar të gjitha ankesat e konsumatorëve sipas rregullave dhe përgjegjësive ligjore që ka KEK-u apo nuk janë trajtuar”, tha Beqaj.
Ministri tha Komisioni ka evidentuar gabime të caktuara. Gabimet janë të natyrës njerëzore dhe  kanë të bëjnë me leximin e orëve, gabime nga mungesa e qasjes në leximin e orëve, ndërrimi i orëve nga momenti që është hequr deri te vendosja e orës së re dhe gabime tek lidhjet e reja.
“Nga totali i të gjitha ankesave të cilat kanë qenë të evidentuara, ky grup i ka monitoruar 31 lëndë sipas mostrës të zgjedhur nga OJQ Konsumatori. Nga këto lëndë, prej tyre 8 ankesa kanë qenë në ndërrim të orës, të cilat janë korrigjuar; 13 ankesa për gabime në lexim, nga të cilat 7 janë korrigjuar dhe 6 janë refuzuar si të pabaza; 5 ankesa për mos qasje në lexim, të gjitha  janë korrigjuar dhe 2 ankesa në lidhje të reja, të cilat janë korrigjuar”, ka bërë të ditur Beqaj.
Sipas tij, kjo çon në konkludimin se ka gabime dhe se gabimet nuk janë të natyrës së fryrjes dhe ngarkimit me kilovatë të tepruar, por gabime të natyrës njerëzore në lexim dhe mos qasje në lexim dhe ndërrim të orëve.
“Në bazë të këtij raporti do të kërkoj nga Bordi i KEK-ut që të marrë masat e duhura brenda KEK-ut për të gjitha gabimet që kanë rrjedh dhe konform gabimit të merren masat që të evidentohen”, tha Beqaj.
Ministri tha se janë krahasuar ankesat që janë dorëzuar në KEK në periudhën e njëjtë të viteve 2011-1012 dhe tash, dhe është vërtetuar se numri i ankesave është përafërsisht i njëjtë.
Një çështje tjetër që ka ngritur ministri Beqaj, e që është deklaruar edhe nga ZRRE është problemi që mosleximi i orëve mund të çojë në ndryshimin e bllok tarifave, andaj tha se ZRRE dhe Kuvendi duhet të rishikojnë çështjen e tyre dhe se a duhet të jenë 2 apo 3 bllok tarifa  dhe cili është niveli i kalimit, ngase kalimi nga një tarifë në tjetrën është me kosto mjaft të lartë.
Numri një i MZHE-së ka siguruar qytetarët se në rastet që ka gabime e gjithë mbingarkesa do t’u rimbursohet dhe për këtë nuk duhet të ketë shqetësim, ndërsa për gabimet nga neglizhenca apo të qëllimshme do të merren masa disiplinore.
Ai me këtë rast ka ftuar sërish të gjithë konsumatorët që kanë dilemë se janë të mbifaturuar të ankohen dhe ankesa e tyre do të trajtohet dhe do të ketë transparencë të plotë dhe se ky ka qenë qëllimi i formimit të komisionit.
Sa i përket saktësisë së matjeve të orëve digjitale përgjegjës, ministri përsëriti se kjo është përgjegjësi e Departamentit të Metrologjisë në MTI, i cili ka siguruar që orët në fjalë kanë matje të saktë.

energjia.al, 15.02.2013

Instalimi i njehsorëve digjitalë ka bërë që disa qytetarë të ankohen në dyfishimin e faturave të energjisë elektrike. Ata dyshojnë në saktësinë e këtyre njehsorëve, por njëkohësisht akuzojnë KEK-un se edhe me anë të bllok-tarifave po i detyron ata të shpenzojnë më shumë energji.
Drita Pacit, banore e bllokut të parë të banimit në rrugën “Afrim Loxha”, në Prishtinë, i është dyfishuar fatura e energjisë elektrike në periudhën 12-mujore. Ajo, në dhjetorin e vitit 2011, kishte paguar një faturë për harxhimet e energjisë elektrike prej 150 eurosh. Kurse, për dhjetorin e vitit 2012 asaj i është faturuar për shpenzimet 374 euro. Ajo thotë të mos ketë harxhuar më shumë energji elektrike. Fajin ia vë njehsorit të ri digjital të cilin e kanë montuar Korporata Energjetike e Kosovës. Ajo dyshon se njehsori digjital nuk e bën matjen e saktë të kilovatëve të harxhuar. Paci kërkon nga organet kompetente që të bëjnë testimin e këtyre njehsorëve dhe pastaj të tregohet nëse ata bëjnë matjen e saktë.

Gazeta Koha Ditore, 11.01.2013