info@energjia.al
Me datë 5 tetor 2017, Gazsjellësi Trans Adriatik (TAP) mori pjesë në ceremoninë e përurimit të shkollës së rikonstruktuar “Thanas Ikonomi” në fshatin Grecalli, Fier. TAP ka investuar për rikonstruksionin e kësaj shkolle rreth 340,000 euro, si pjesë e Investimeve Sociale dhe Mjedisore. Punimet përfshijnë rikonstruksionin e plotë të godinës dhe pajisjen e klasave me mjetet e nevojshme për zhvillimin e mësimit.

Të pranishëm në ceremoninë e përurimit ishin drejtues të TAP, Kryetari i Bashkisë së Fierit dhe përfaqësues nga Drejtoria Rajonale Arsimore e Fierit. Nxënësit e shkollës, me rastin e ceremonisë së përurimit, organizuan një spektakël të vogël artistik me valle tradicionale të zonës së Fierit dhe këngë. Gjithashtu ishte përgatitur edhe një ekspozitë me foto nga shkolla para rikonstruksionit.

“Deri para disa kohësh kjo godinë mund të ishte gjithçka përveçse shkollë. Ka qenë mbështetja e menjëhershme e TAP që e ka kthyer në jetë këtë shkollë të rrënuar e të harruar prej vitesh. Sot kjo shkollë është një hap përpara shkollave të qytetit. Standardet e përdorura nga TAP në rikonstruksionin e kësaj shkolle ne do t’i kthejmë në një manual për rikonstruksionin e shkollave të tjera.” tha Kryetari i Bashkisë së Fierit, Armando Subashi.

Mbi 210 nxënës të shkollës “Thanas Ikonomi” tashmë do të mësojnë në kushte shumë të mira dhe të sigurtë. Një vëmendje të veçantë gjatë rikonstruksionit i është kushtuar efiçencës në përdorimin e energjisë duke bërë izolimin termik të godinës dy-katëshe.

Shkolla është pajisur me sistem alarmi për zjarrin, duke e bërë një ndër shkollat e para me një sistem të tillë. Gjithashtu shkollës i janë shtuar edhe shkallë për dalje emergjence duke ofruar standardet më të larta të sigurisë.

Puna për rikonstruksionin e shkollës zgjati rreth katër muaj dhe për të punuan rreth 70 punëtorë. Punimet u realizuan nga kompania shqiptare Agbes dhe u mbikëqyrën nga Abkons, kontraktor i TAP.

energjia.al  07.10.2017

Një abonente nga Fieri kishte hequr metesin duke e fshehur ate, veprim i cili eshte konstatuar nga grupet e OSHEE, te cilet e kallëzuan ate ne Polici.
Aksionet per vjedhjen e energjisë vijojnë normalisht, ku ne Fier, p.sh., janë konstatuar disa raste. Aksione të përqëndruara ka patur edhe në zonën e Librazhdit.

Konkretisht në Fier, abonentja Bajame G., zhduku matesin e energjise dhe për këtë arsye u denoncua.

Të tjera raste si: Qemal K., nuk kishte kontrate dhe u gjet i lidhur me energji, duke mos patur as matës; Çobo B., procedim për rilidhje të paligjshme; si dhe Lulzim T., u kap në flagrancë duke vjedhur energjinë elektrike.

Po nga Fieri regjistrohet nje incident i shentuar, ku për shkak të detyrës goditet elektricisti Indrit M. Punonjësi ka asistuar në kontrollet e natës per vjedhjen e energjisë nga abonentët, në fshatin Radostinë.

Në Librazhd, zonë nën administrim nga Drejtoria Rajonale OSHEE Elbasan, janë zbuluar raste të vjedhjes së energjisë elektrike, ku konkretisht:

Ilmi B., Altin S., Gentian S., dhe Alil A., u kapën me rilidhje të paligjshme të energjisë. Policia, në vendngjarje, kreu veprimet, kurse materialet i kaluan prokurorisë.

energjia.al  18.09.2017

Fieri duket të jetë zona më e preferuar për ndërtimin e parqeve fotovoltaikë pasi një tjetër aplikim i është shtuar listës së projekteve që kërkojnë miratim paraprak nga Ministria e Energjisë dhe Industrisë. (MEI)

Bëhet fjalë për një park në zonën e Roskovecit me një vlerë të parashikuar investimi 1.7 milionë euro.

MEI bëri me dije se kompania 2FAF SH.P.K ka paraqitur aplikimin e saj i cili do të jetë i afishuar për më shumë se dy javë për të pritur kundërshtimet apo pretendimet në rast se ka.

Projekti i afishuar dhe kush është kompania

“Shoqëria “2FAF” Sh.P.K. ka aplikuar për pajisjen me autorizim paraprak në bazë të Vendimit të Këshillit të Ministrave nr. 822, datë 7.10.2015 “Për miratimin e rregullave dhe procedurave të ndërtimit të kapaciteteve të reja prodhuese të energjisë elektrike, që nuk janë objekt koncesioni” i ndryshuar, për ndërtimin e një parku fotovoltaik në Zonën në “Njësinë Administrative Roskovec, fshati Jagodinë – Bashkia Roskovec” me një sipërfaqe totale të projektit rreth 26,400 m2 ku kapaciteti i instaluar do të jetë 2 MW me një vlerë investimi rreth 1.7 milion Euro”

Kompania 2FAF nuk është e panjohur për sektorin e energjisë. Ajo sipas një kontrate të nënshkruar me qeverinë shqiptare ka marrë të drejtën për një koncesion hidrocentrali të formës ndërtim, operim mirëmbajtje. Bëhet fjalë për hidrocentralin “Nishani” sipas një kontrate të nënshkruar në korrik të vitit 2013.

Rriten kërkesat

Në prill pas disa rregullimeve ligjore ato që vërshuan ishin aplikimet për parqe fotovoltaikë deri në 2 MW. Nga 6 prilli deri më 31 korrik 2017 janë bërë të paktën 8 aplikime për parqe fotovoltaike me fuqi të instaluar deri në 2 megavat.

Kompanitë që kanë aplikuar janë biznese të ndryshme nga bujqësia tek elektronika apo agropërpunimi.

Në total vlera e investimeve të parashikuara për parqe dhe centrale fotovoltaike nga 2016 e e deri më tani është 85.4 milionë euro dhe fuqia e instaluar e parashikuar 113.72MW. Sipërfaqja e tokës që do të zenë këto parqe llogaritet në 174.08 hektarë.

Revista Monitor,  02.09.2017

Korriku është mbyllur me një kërkesë të re, për një park fotovoltaik në zonën e Fierit.

Ministria e Energjisë dhe Industrisë bëri me dije se operatori që ka shprehur interes është “Hydro Valbona” sh.p.k.

Shoqëria ka aplikuar për  për ndërtimin e një parku fotovoltaik në Zonën në “Perëndim të fshatit Topojë (Fier)”me një sipërfaqe totale të projektit rreth 20,000 m2 ku kapaciteti i instaluar do të jetë 2 MW me një vlerë investimi rreth 2.4 milion Euro.

Sipas ekstraktit në Qendrën Kombëtare të Biznesit “Hydro Valbona” ka në objekt të saj prodhimin e energjisë elektrike duke shfrytëzuar burimet e energjisë të cilat gjenden në natyrë dhe janë të rinovueshme, si ajo hidrike, diellore, e erës, gjeotermale, e biomasës ose biogazit si dhe energjia nga mbetjet urbane.

Kërkesat e bëra në Ministrinë e Energjisë dhe Industrisë për parqe fotovoltaike vetëm në korrik kanë regjistruar numrin pesë nga të cilat një në Shkodër, tre në Fier dhe një në Elbasan që në total e çojnë vlerën e projekteve të propozuara për ndërtim në 10.7 milionë euro.

Të gjithë parqet kanë një kapacitet të instaluar më pak se 2 megavat që nuk konsiderohen si koncesione të zakonshme duke mos kaluar në procedurat që kërkohet për këtë kategori.

Aktualisht për projekte nën 2 MW si për hidrocentralet edhe për parqet fotovoltaikë miratimi mund të jepet vetëm nga Ministria e Energjisë dhe Industrisë duke lënë një periudhë konsultimi për palët e treta që shfaqin pretendime para miratimit të projektit.

Në rastin e koncesioneve tipike është e rëndësishme që të kalohen edhe hallka të tjera shtesë mes të cilave edhe dhënia e miratimit nga Këshilli i Ministrave.

Revista Monitor,  01.08.2017

Ministria e Energjisë dhe Industrisë ka shpallur dhënien me koncesion të hidrocentraleve të vegjël në zonën e Dibrës dhe Fierit.

Agjencia e Prokurimit Publik ka njoftuar shprehjen e interesit në buletin zyrtar që mban datën 19 qershor, ndërkohë që afati i fundit i dorëzimi të ofertave dhe shpallja e fituesve bëhet më 17 korrik të këtij viti. Aplikimi do të jetë në formë elektronike.

Sipas dokumenteve të publikuar investimi duhet të jetë tërësisht privat, ndërsa koncesionet zgjasin 35 vite dhe janë të tipit, ndërtim-operimin-transferim.
Hidrocentralet do të ndërtohen në perroin  e Luses në Dibër, dhe tjetri në rezvuarin e ndërtuar tashmë të Thanës në qarkun e Fierit.

Kriteret e përzgjedhjes së fituesve fillojnë me fuqinë e instaluar, tarifën koncesionare, analizën ekonnomike për të vazhduar me kapacitetin financiar, ndikimin në mjedis etj.
Në buletinin e një jave më parë ministria pati shpallur dhënien me koncesion të një tjetër hidrocentrali të vogël në Kukur të Gramshit.

Kriteret e përzgjedhjes së fituesit

Fuqia e instaluar 25 pikë
Tarifa Koncesionare 15 pikë
Analiza ekonomiko-financiare 15 pikë
Kapaciteti financiar 13 pikë
Ndikimi ekologjik dhe social 13 pikë
Lidhja me sistemin elektroenergjetik 10 pikë
Koha e zbatimit te punimeve 6 pikë
Kosto njësi per makineritë e pajisjet 3 pikë

Top Channel,  20.06.2017

Rifillojnë sërish protestat nga punëtorët e rafinerisë së naftës.

Sipas tyre premtimet për dhënien e dy pagave mujore dhe të mbi 12 muajve sigurime janë shkaku që janë ngritur sërish në protestë.

Protesta e fundit ishte para dy javësh në Ministrinë Energjetikes për këtë shqetësim disa mujor.

Shqiptarja.com  01.06.2017

Rreth 40 punëtorë te rafinerisë së naftës në Fier kanë dalë në protestë sërish, por këtë radhë kanë hipur në kolonat kryesore të uzinës.

Punëtorët kërkojnë që uzina të nisë punën dhe t’iu paguhen sigurimet shoqërore.

Kërkesat e punëtorëve të rafinerisë ka bërë që të hipin në kolonat në një lartësi 33 metra.

Mes protestuesve mësohet se ka edhe gra që protestojnë. Punëtorët shprehen se nuk do zbresin pa u zgjidhur problemi.

Shqiptarja.com  28.04.2017

Në Shqipëri janë rritur aplikimet për ndërtimin e centraleve të prodhimit të energjisë nga panelet diellore. Kërkesa konkrete janë depozituar në Ministrinë e Energjisë për një central në zonën e Topojës në Fier. Bëhet fjalë për investime private me një fuqi të instaluar deri në 2 megavat, pothuajse sa një hidrocentral i vogël.

“Janë bërë dy aplikime deri tani dhe po vazhdon një i tretë. Janë deri në 2 megavat, brenda pritshmërisë që kemi ne, të cilat i kemi në përpunim e sipër”, thotë Gjergj Simaku, drejtor i Energjisë së Rinovueshme, MEI.

Autoritetet synojnë të tërheqin investime të mëdha me fuqi të instaluar prej qindra megavatësh. Por në çdo rast kërkohet që, sipërfaqet që do të mbulohen me panele të jenë toka jobujqësore, ose me prodhimtari të ulët.

“Nëse Shqipëria ka të disponueshme një sasi toke, që mund të jetë një tokë e kripur diku, dhe është e bindur që aty mund të vendosen panelet fotovoltaikë të një niveli më të lartë sesa 2 MË, atëherë organizohet një ankand. Ankandi nuk ka kuptimin e tenderit, por kuptimin e përfitimit të çmimit të ulët të shitjes së energjisë”, thekson më tej Gjergj Simaku.

Por energjia nga dielli mund të kthehet në një opsion të leverdisshëm edhe për qytetarët. Një çati me panele diellore mund të mbulojë një konsum mesatar mujor prej 500 kilovatësh. Prodhimi zgjat deri në 25 vite dhe kostoja mbulohet brenda 8 viteve të para. Për investime të tilla nuk nevojitet licenca nga ERE, madje energjia e tepërt mund të hidhet në rrjetin e OSHEE-së.

Top Channel,  19.04.2017

Prej 2 muajsh kompania nuk u jep pagat, rreth 200 punonjës kanë protestuar sot në dyert e uzinës të rafinerisë së naftës “Armo” në Fier.

Punonjësit kanë ndërprerë punën pasi kanë 2 muaj pa marrë rrogat ndërsa shtojnë se prej afro 2 vitesh kompania nuk i siguron.

Protestës i janë bashkuar edhe punonjës të Ballshit, Vlorës dhe Përrenjasit të cilët deklarojnë se prej 22 muajsh punojnë pa rrogë dhe siguracione.

Shqiptarja.com  03.04.2017

Rreth 150 punonjës të rafinerisë së naftës së ARMO-s në Fier, kanë protestuar sot para uzinës.

Shkak është bërë mungesa e rrogave prej tre muajsh, ndërsa kontributet shoqërore nuk iu paguhen prej rreth 16 muajsh.

Punëtorët janë ankuar, por nuk dinë se kujt t’i ankohen pasi nuk dinë kush është pronari i tyre.

Edhe këtë protestë që u bë, ata thonë se ndihen të kërcënuar se mos i pushojnë nga puna. Uzina sot ka ndaluar punën pas protestës së naftëtarëve.

Shqiptarja.com  25.10.2016