info@energjia.al

Ka shumë arsye për mungesën e zhvillimit të sektorit hidroenergjetik në Ballkan, përfshi këtu edhe Shqipërinë. Është Komisioni Europian që ka realizuar një studim mbi zhvillimin e sektorit hidroenergjetik e ku rendit potencialin e munguar, si dhe hapat që duhet të ndërmarrin qeveritë.

Për këtë qëllim, në fund të muajit mars, në Podgoricë pritet të mbahet takimi i parë ku do të marrin pjesë Shqipëria, Mali i Zi, Maqedonia, Kosova, Serbia dhe Bosnjë – Hercegovina.

Sipas studimit, ndër arsyet e mungesës së zhvillimit janë: ndryshimet politike dhe institucionale që e kanë bërë planifikimin më të ndërlikuar, mungesa e financimeve nga ana e investitorëve, si dhe ndryshimet e shpeshta ligjore dhe kompleksiteti i tyre.

Ka pasur raste, thuhet në studim, që zhvillimi i tyre është penguar edhe nga shoqëria civile e organizatat joqeveritare (përfshi këtu edhe Shqipërinë) për shkak të ndikimit që mund të kishin në zonat e mbrojtura, parqet kombëtare etj.

“Nisur nga zhvillimi i mundshëm i këtij sektori mund të thuhet se në Ballkanin Perëndimor ka mundësi që të ngrihen rreth 350 projekte hidroenergjetike të gjelbra me kapacitet më të madh se 10 MW”, thuhet në studimin e realizuar nga KE-ja.

Qëllimi i tij është që të garantojë balancën e zhvillimit mes hidrocentraleve të mundshme që mund të ndërtohen dhe ndikimit sa më të ulët të tyre në mjedis.

Në rajonin e Ballkanit Perëndimor (WB6), thuhet në studim, ka ende mundësi të pashfrytëzuara për të gjeneruar elektricitet nga burimet hidrologjike. Bazuar në disa burime vlerësohet se potenciali hidro i pashfrytëzuar varion nga 60-90%. Ka dallime të mëdha nga njëri shtet në tjetrin. Kështu për shembull, në Kosovë, sasia e instaluar nuk është më e madhe se 57 MW (0.7% e totalit të WB6), në Maqedoni kjo shifër është në 610 MW (7.2%) e totalit, në Mal të Zi në  676 MW (8.0%), në Shqipëri në 1,824 MW (21.6%), në Bosnjë – Hercegovinë në 2,139 MW (25.4%) dhe në Serbi në 3,122 MW (37.0%).

Kapaciteti total i instaluar në të gjashtë vendet e Ballkanit është 8,427 MW, nga të cilat 8,005 MW (95.0%) në 54 hidrocentrale me fuqi më të madhe se 10 MW, ndërsa pjesa e mbetur 422 MW (5.0%) janë fuqi e instaluar e 206 HEC-eve me fuqi më të vogël se 10 MW.

E pavarësisht këtyre shifrave këto impiante arrijnë të sigurojnë vetëm 5% të energjisë së gjeneruar.

Kjo tregon se edhe pse rajoni ka burime të mjaftueshme ujore, gjatë 25 viteve të fundit zhvillimi ka qenë i ulët, ai ka mbetur i skeduluar në strategji e dokumente kombëtare, edhe pse rajoni njihet për numrin e madh të ekspertëve të fushës.

Revista Monitor,  20.03.2017

Komisioni Europian do të alokojë rreth 14 milionë euro për gazsjellësin Trans-Adriatik. Ky fond do të përdoret për hulumtime në zonat arkeologjike duke garantuar kështu mos cënimin e tyre nga punimet e gazsjellësit që do të transportojë gazin nga Azerbaixhani në Europën perëndimore duke kaluar edhe përmes Shqipërisë.

Në total vendet anëtare janë dakordësuar të financojnë projekte të Komisioni Europian për një vlerë prej 444 milionë eurosh. Në total janë 18 projekte, të cilësuara si prioritet për unionin, dhe Tap është një prej tyre.

Pak ditë më parë, zëvendës Presidenti i Komisionit Europian deklaronte se gazsjellësi Trans-Adriatik si  pjesë e korridorit jugor të gazit është një prioritet kyç për Bashkimin Europian, pasi garanton stabilitet energjetik nëpërmjet diversifikimit.

Ndër të tjera, Bashkimi Europian nënvizonte se përfundimi i projektit brenda afateve, pra në vitin 2020, është me rëndësi të veçantë për unionin. Ditën e Enjte ndërkohë, në Baku të Azerbaixhanit do të mbahet takimi i tretë ministerial i Këshillit të Korridorit Jugor të Gazit, dhe ku do të marrin pjesë përfaqësues të Shqipërisë, Azerbaixhanit, Bosnje Hercegovinës, Bullgarisë, Kroacisë, Gjeorgjisë, Greqisë, Italisë, Malit të Zi, Serbisë, Turqisë si dhe përfaqësues nga Mbretëria e Bashkuar dhe Shtetet e Bashkuara të Amerikës.

Scan Tv  22.02.2017

Lajmi se Kosova ka cilësi të dobët të naftës ka mbërritur deri në Bruksel. Nga atje, i është kërkuar institucioneve të vendit që të marrin masa urgjente për të rritur kontrollin duke përforcuar ligjet dhe kapacitetet.

Në raportin e Progresit për Kosovën, është ngritur si shqetësim se cilësia e dobët e derivative dhe kontrolla e dobët teknike e automjeteve po shkaktojnë ndotje të konsiderueshme, shkruan Gazeta Fjala.

“Veprime urgjente duhen të ndërmerren në fushën e standardeve të ndotjes dhe kontrolla e ndotjes nga transporti, duke përforcuar legjislacionin në kontrollën teknike të makinave, kualitetin e naftës, si dhe në subtancat shteruese të ozonit dhe gazrave të flourit”, thuhet në raport.

Edhe vetë naftëtarët vlerësojnë se duhet marrë masa, derisa Gazeta Fjala është në pritje të komenteve nga institucionet kompetente.

Por, Komisioni Evropian në raportin për Kosovën vlerëson se nuk ka kapacitete të mjaftueshme për të rregulluar cilësinë e naftës dhe ndotjen në përgjithësi. “Kapacitetet administrative dhe aktivitetet ne ngritjen e vetëdijesimit duhet të përforcohet konsiderueshëm”, thuhet në raport.

Nafta në Kosovë nuk kontrollohet fare

Kritikat për cilësinë e naftës nga Bashkimi Evropian i sheh shumë me vend kryetari i Shoqatës se Naftëtarëve të Kosovë, Fadil Berjani.

Ai ka thënë për Gazetën Fjala se gjendja është edhe më alarmante, kur dihet se nuk ka fare kontrolle të cilësisë nga institucionet përkatëse.

Ministria e Tregtisë dhe Industrisë funksionon sipas tij vetëm me disa trupa inspektues të cilat vetëm e lexojnë dokumentacionin rreth naftës, por nuk kryhet kurrfarë kontrolli në laboratore.

“Këto trupa inspektuese deri tani vetëm kanë lëshuar certifikata konformiteti pa e kontrolluar cilësinë e naftës. Ne, si shoqatë, e kemi ngritë zërin edhe të ministres Bajrami që të largohen këta trupa inspektues dhe këtë punë ta merr Dogana e Kosovës, e cila do të kryente më pas kontrolle nëpër laboratore testuese”, ka thënë Berjani.

Sipas tij, ministrja Bajrami nuk ka arritur të bëjë asgjë sa i përket rritjes se cilësisë se naftës, përkundër premtimeve.

“Ministria që udhëheq Bajrami e kontrollon 2 për qind cilësinë e naftës. Ministrja ka dhënë premtime se trupat inspektues do të largohen, por as pas 3 vjet e gjysmë nuk janë largu”, thotë Berjani.

Ndërsa për pronarin e HIB Petrolit, Ibrahim Bucaliu, problemi më i madh tek cilësia e naftës është mungesa e ligjit, i cili nuk ka arritur të kaloj në Kuvend.

Deri sa të mos këtë Ligj që e rregullon këtë çështje, Bucaliu thotë se iu mbetet në vullnetin e bizneseve se prej nga do ta importojnë naftën.

Problem tjetër sipas tij është mungesa e një laboratori shtetëror për cilësi.

“Ne e importojmë naftën nga rafineri me siguri të lartë. Kryesisht në Greqi dhe nga Gaspromi. Por në mungesë të ligjit kjo njëherë ka mbetur në vullnetin e secilit”, thotë Bucaliu.

Ai pajtohet se këtë punë duhet ta marr në dorë shtetit përmes krijimit të infrastrukturës ligjore dhe mekanizmave adekuat për kontroll të cilësisë.

“Laboratorëve privat unë nuk iu besoj”, shprehet Bucaliu, derisa shton se nafta në HIB është cilësore dhe se asnjëherë nuk ka pasur ankesa nga klientët.

90 për qind e veturave në Kosovë mbi 18 vjet

Shqetësim për vendin, në raport përmendet edhe ndotja nga automjetet, të cilat në Kosovë vlerësohen që më afro 90 për qind janë të vjetra.

Sipas Ministrisë se Punëve të Brendshme në Kosovë, thuhet se automjete aktive në vend janë mbi 385 mijë. Kurse 308 mijë automjete janë regjistruar në vitin 2015, që përfshin regjistrimin e parë të automjeteve, vazhdimin e regjistrimit të automjeteve, legalizimin e automjeteve, si dhe ri regjistrimin e automjeteve.

Në një raport të Institutit për Studime të Avancuara GAP thuhet se mesatarja e vjetërsisë së veturave që qarkullojnë në Kosovë është 18 vite, apo 10 vite më shumë se sa mesatarja e veturave që qarkullojnë brenda Bashkimit Evropian.

Ndërkaq në Ministrinë e Mjedisit kanë thënë për medie se të gjitha automjetet të cilat dalin në qarkullim duhet t’i plotësojnë standardet për lirimin e gazrave.

Kosova vazhdimisht edhe në raportet e organizatave ndërkombëtare është theksuar se gjendet në pozitë të rëndë mjedisore.

Sipas një analize të mëhershme të Bankës Botërore, është thënë se një realitet i tillë e rendit Kosovën në nivelin më të ulët të standardeve mjedisore në Ballkanin Perëndimor dhe në Evropë.

Ndotja e ajrit, ujit dhe tokës në Kosovë, thuhet se kanë marrë përmasa alarmante dhe gjendja po keqësohet çdo ditë e më shumë.

Gazeta Fjala,  16.11.2016

Shqipëria në Samitin e Vjenës ka përfituar vetëm për projektet e rrjetit energjetik për Ballkanin Perëndimor. Në faqen zyrtare të Ministrisë së Ekonomisë së qeverisë austriake është dhënë në detaje mënyra e shpenzimit të shifrave të 600 milionë eurove, ku pjesën më të madhe të fondit e ka përfituar Serbia, e më pas shtetet e tjera. “Torta” e ndarjes së fondeve të BE-së në Samitin e Vjenës duket se e ka lënë të pakënaqur Shqipërinë, e cila pret që të përfitojë më shumë euro në vitin e ardhshëm nga investimet që do të realizohen në infrastrukturë. Ndërsa nga të dhënat zyrtare të publikuara në faqen e Ministrisë së Ekonomisë së Austrisë, Shqipëria nuk përfiton nga projektet hekurudhore për Ballkanin Perëndimor. Gjashtë ministrat e Ekonomisë për Ballkanin Perëndimor gjatë punimeve të Samitit të Vjenës kanë paraqitur 24 projekte investimesh me vlerë 7.7 miliardë euro. Edhe pse vetëm një pjesë e tyre u arrit që të përfitonte mbështetje financiare, bëhet e ditur se këto projekte do të jenë pjesë e diskutimit të samitit të ardhshëm, për të cilën BE-ja ka parashikuar ta mbajë në Francë gjatë 2016-s. Sipas dokumentit zyrtar, vetëm 1 miliard euro do të jepen nga Komisioni Europian, si pjesë e fondit IPA II për shtetet e Ballkanit, pjesa tjetër do të sigurohet nga institucionet e tjera financiare të BE-së, siç është dhe Banka Europiane e Investimeve. Nga 600 milionë euro të akorduara në Samitin e Vjenës, do të jepen për 10 projektet e ndryshme të miratuara me konsensus mes vendeve anëtare.

Shpërndarja

Nga 600 milionë euro të dhëna nga BE-ja për vendet e Ballkanit Perëndimor, parashikojnë pikërisht mbështetjen në investime për projektet energjetike, ato infrastrukturore, si dhe hekurudhore. Edhe pse vendi ynë përfitoi ndihmën financiare më të vogël në rajon për çështjen e migracionit dhe menaxhimit të kufijve në Ballkan, duket se BE-ja nuk është treguar aq zemërgjerë edhe në mbështetje për investime në fusha të tjera, ku delegacioni shqiptar në Vjenë kërkoi mbështetje financiare për projekte konkrete. Konkretisht në projektet për energjinë që u paraqitën nga ministri i Ekonomisë, Arben Ahmetaj, vendi ynë arriti që përfitonte vetëm shumën e 26 milionë eurove për interkonjeksionin mes vendit tonë dhe Maqedonisë. Ndërkohë që mbështetjen financiare më të madhe në rajon në lidhje me projektet në këtë fushë e ka marrë Mali i Zi për korridorin TransBallkanik të energjisë, ku nga grandet e dhëna prej BE-së ka marrë 31.6 milionë euro. Ndërkohë që mbështetje në këtë samit kanë marrë edhe dy projekte të rëndësishme infrastrukturore, siç është ai i ndërtimit të autostradës Adriatiko-Joniane, apo siç quhet ndryshe “Korridori i kaltër” që vjen nga Kroacia, zbret në Malin e Zi dhe Shqipëri, duke përshkuar të gjithë vijën rrugore pranë bregdetit, duke shkuar më tej në Greqi, si dhe ai për ndërtimin e autostradës Durrës – Prishtinë – Nish. Kjo autostradë, përveçse do të lidhë të tria vendet me një rrugë të përbashkët, do të mundësojë edhe daljen e Serbisë në detin Adriatik nëpërmjet Shqipërisë. Fondet do të bëhen publike në samitin e ardhshëm të Francës. Ndërkohë që nga fondet IPA, një shumë të konsiderueshme e ka marrë Serbia, pikërisht për dy projekte, atë të rrjetit hekurudhor që do të lidhë Serbinë me Maqedoninë, si dhe atë të ndërtimit të terminalit Intermodal me vlerën e 62.5 milionë eurove. Projektet e rrugëve mësohet se do të jenë pjesë e rrjetit europian të transporteve, pra që do të mirëmbahen nga BE-ja.

Fondet për emigracionin

Shqipëria është vendi me mbështetjen më të vogël financiare nga Bashkimi Europian për sa i përket emigracionit dhe menaxhimit të kufijve. Komisioni Europian ka publikuar më 27 gusht, një dokument në lidhje me përfitimin e fondeve financiare për secilin vend të Ballkanit në kuadrin e fondeve IPA për çështjen e emigracionit në perspektivën financiare 2007 – 2013 dhe 2014 – 2020. Kështu, 4.5 milionë euro është fondi për Shqipërinë, duke u radhitur në vendin e fundit të përfituesve të fondit, madje edhe Kosova ka përfituar më shumë se vendi ynë. Nga ky fond ka përfituar edhe Kosova, 7,1 milionë euro, prej të cilave 2,5 milionë parashikohen për vitin e ardhshëm. Sipas dokumentit, Serbia ka përfituar 54 milionë euro në tërësi për çështjet e migrimit, ku 45 milionë që prej vitit 2007, i janë shtuar edhe 8,2 milionë të tjera, që do të përdoren vitin e ardhshëm për aftësitë pritëse për emigrantët, për zbatimin e reformës së azilit dhe sistemin e mbikëqyrjes së kufijve, infrastrukture etj. Ndërkohë që Maqedonia ka përfituar në tërësi 24 milionë euro, prej të cilave 12 milionë euro nga IPA II janë parashikuar të jepen për vitin e ardhshëm për rinovimin e postave kufitare të policisë, menaxhimin e trafikut të qenieve njerëzore dhe në forcimin e kapaciteteve për menaxhimin e kufijve, ndërsa Mali i Zi ka përfituar 22,6 milionë euro nga IPA II, prej të cilave 2,63 milionë të parashikuara për periudhën 2018 – 2020. Bosnja ka përfituar 10,5 milionë euro, prej të cilave 2 milionë euro për 2015, për ndërtimin e një objekti pritës për emigrantët dhe mbështetje për policinë kufitare, ndërsa Turqia ka përfituar një fond prej 469 milionë eurosh. Pjesa më e madhe e fondit do të shkojë për menaxhimin e integruar të kufirit me një fokus në kufijtë tokësorë dhe kufijtë detarë, ndërtimin e qendrave të pritjes së azilkërkuesve, mbështetje për antitrafikun e qenieve njerëzore.

Projektet në energji

Shqipëria: Interkonjeksioni WBIF CF 1001 Shqipëri – Maqedoni 14 milionë euro

Interkonjeksioni II Shqipëri – Maqedoni: 12 milionë euro

Mal i Zi: TransBalkan Electricity Corridor: 25 milionë euro

Mali i Zi: Serbia TransBalkan Electricity Corridor: 6.6 milionë euro

Projektet në transport

Bosnjë-Hercegovina: 22 milionë euro korridori i Mesdheut Bosnjë-Hercegovinë – Kroaci

Bosnjë-Hercegovina: 6.8 mln euro. Pjesë e korridorit të Mesdheut Bosnjë-Hercegovina dhe Kroaci

Kosova: 38.54 mln euro për lidhjen hekurudhore Maqedoni – Kosovë – Serbi

Mal i Zi: 20 mln euro për lidhjen hekurudhore Mal i Zi – Serbi.

Fondet IPA: 62.5 milionë euro ka përfituar Serbia pikërisht për lidhjen hekurudhore me Maqedoninë 47 mln euro, si dhe shumën tjetër 13.8 mln euro për ngritjen e terminalit intermodal

Gazeta Shqip, 03.09.2015

Një delegacion i larte i Komisionit Evropian, i udhëhequr nga z. Jean-Eric Paquet, Drejtor per Ballkanin Perëndimor në DG NEAR vizitoi KEK-un.

Me ketë rast ai vizitoi zonen e ish Gasifikimit dhe  Azotikut, termocentralin “Kosova A” dhe termocentralin Kosova B. Gjate kësaj vizite, delegacioni u prit dhe u shoqërua nga Drejtori Menaxhues i KEK-ut, Arben Gjukaj si dhe menaxhmenti i KEK-ut.

Gjukaj informoi delegacionin e Bashkimit Europian rreth proceseve neper te cilat po kalon KEK-u, aktiviteteve dhe rezultateve te arritura operuese dhe mjedisore.

KEK-u ka trashëguar një situatë të vështirë sa i përket ambientit, për shkak të degradimeve të bëra nga e kaluara. Si ilustrim, ish Gazifikimi dhe Azotiku, ku zhvilloheshin procese komplekse teknologjike, ne vitin 1988 ndërpret punën, pa asnjë plan ndalese, rikuperimi apo de-komisionimi. Si pasoje për me tepër se 20 vite, stabilimentet e braktisura pa asnjë kontrolle,ne një zone me mbi 100 hektar kishte paraqitur rrezik permanent, duke pasur një sasi te madhe te materieve te rrezikshme.

“Përkundër sfidave te ndërlidhura me stabilizimin e prodhimit , një prej objektivave kryesore të korporatës tash e pese vite, ishte dhe mbetet mbrojtja e mjedisit në hapësirat ku operon.Në këtë rast, jemi dëshmitar të përfundimit të suksesshëm të investimeve të filluara tash e katër vite në mbrojtje të mjedisit, që kapin shumën prej mbi  50 milion Euro, kryesisht nga mjetet vetanake.” tha Gjukaj.

Ne këtë vije  është implementuar edhe projekti i financuar nga Banka Boterore dhe Mbreteria Holandeze për asgjësimin e mbi 20 mijë tonelatave të fenoleve dhe materialeve tjera te rrezikshme që gjendeshin ne ish Gasifikim dhe Azotik, zone ku KEK asnjëherë nuk ka operuar, me crast pjesa më e madhe e tyre janë asgjësuar, ndërsa pjesa tjetër janë transportuar jashtë vendit për trajtim të mëtutjeshëm në vendet e BE-së.Me tej, delegacioni u njoftua edhe në lidhje me investimet tjera në projektet ambientale te finalizuar vitin e kaluar siç është ndërrimi i elektro-filtrave të njësive të Termocentralit “Kosova A”, transporti hidraulik i hirit dhe rehabilitimi kodrave te hirit. Te gjitha keto projekte  u realizuan me mjetet vetanake të KEK-ut dhe donacionet e Mbretersie Holandeze dhe Bankes Boterore.

Gjate vizites ne Termocentralin Kosova A, delegacioni u informua edhe rreth përfundimit me sukses te remonteve pas avarise se vitit te kaluar, me c’rast ky termocentral tashme eshte duke prodhuar sipas planit.

Ne kete vije, z Gjukaj falënderoi Bashkimin Europian për përkrahje te vazhdueshme te dhene gjate viteve te kaluara e cila po vazhdon edhe me tej.

Paquet theksoi vlerësimin e BE-së për punën e bërë në të kaluarën nga KEK-u, e sidomos për shkak të kushteve të vështira në të cilat funksionon.

Jean-Eric Paquet u fokusua në mënyrë të veçantë në rëndësinë e përmirësimit të standardeve mjedisore në sektorin e energjisë dhe siguroi mbështetjen e vazhdueshme të BE-së në arritjen e këtij synimi.

“BE-ja ka qenë gjithmonë mbështetëse e sektorit të energjisë së Kosovë. Përderisa të gjithë jemi të vetëdijshëm për rëndësinë e sigurimit të energjisë së sigurt, nuk duhet asnjëherë të harrojmë rëndësinë e njejtë për respektim të ambientit.

“Së shpejti, procesi i dekomisionimit të njësive jo-gjeneruese të Kosovës A duhet të filloi. Ne do të mbështesim gjithashtu një studim fizibiliteti për rehabilitimin e Kosovës B në harmoni me normat më strikte të BE-së, dhe për ndërtimin e një deponije për materiet e rrezikshme.”

“Si gjithmonë, BE-ja mbetet e përkushtuar në mbështetje të masave për efiçiencë të energjisë dhe burime të ripërsëritshme të energjisë përmes fondeve tona IPA 2014-2020″, tha z. Paquet.

Agjensia e lajmeve ekonomia,  10.07.2015

Duke përafruar politikat e energjisë me udhëzuesin e Bashkimit Evropian për energjinë, duke mbyllur të gjitha termocentralet me qymyr dhe duke i zëvendësuar ato me burime të energjisë së rinovueshme, vendet e Evropës JL mund të kenë një sistem energjitik më të pastër dhe më të lirë.

Këto janë gjetjet që vijnë nga 7 modele të reja energjie të zhvilluar për rajonin e Evropës JL, të bazuara në të dhëna të aksesueshme dhe në mbi 500 konsultime me aktorë të ndryshëm interesi, të cilat u prezantuan sot në një konferencë të organizuar nga SEE Change Net në bashkëpunim me Drejtorinë e Përgjithshme të Komisionit Evropian për Fqinjësinë dhe Negociatat e Zgjerimit, në kuadër të Javës Evropiane për Energjinë e Qendrueshme.

Këto modele tregojnë gjithashtu se duke zbatuar qëllimet e Udhëzuesit të BE për Energjinë, shtetet do të reduktojnë me 60% konsumin e tyre vjetor të energjisë, në vend që ta rrisin atë me 6% sipas skenarëve të propozuar nga Business as Usual (Biznesi si zakonisht). Këto shtete gjithashtu do të rrisin eficencën e energjisë në të gjithë sektorët, të parandalojnë rritjen e kostove shëndetësore si dhe të reduktojnë rreziqet klimatike.

“Nëse rruga e shtruar nga BE është teknikisht e mundur për tu zhvilluar dhe me të njëjtën kosto që ka përqasja aktuale ,“Rruga drejt asgjësë”, e cila po udhëheq qeveritë e Evropës JL larg standarteve Evropiane, atëherë pse nuk po investojmë në një system energjitik i cili do të jetë më i drejtë, më i pastër dhe më efikas për të gjithë banorët e Evropës JL?”, pyet Garret Tankosić-Kelly, Drejtor i SEE Change Net, i cili udhëhoqi këtë sesion.

Modelet e energjisë për Evropën JL bazohen në Llogaritësin 2050, i cili është zhvilluar nga Departamenti i Energjisë dhe Ndryshimeve Klimatike (DECC) në Mbretërinë e Bashkuar. Zëvendës Drejtori i DECC, Tom Counsell, shpjegoi përfitimet që ka Llogaritësi 2050: “Në Mbretërinë e Bashkuar, kemi zbuluar se arrijmë në një nivel diskutimi më të lartë, kur diskutojmë për të ardhmen e energjisë, nëse angazhohemi në një proces i cili është transparent, i sfidueshëm, dhe që ka mjete që përdoren lehtë sikundër është Llogaritësi 2050. Jemi shumë të kënaqur që shtete dhe rajone të tjerë kanë zhvilluar teknika të njëjta, kështu që edhe ato të mund të kenë debate të fuqishme, dhe të një cilësie të mirë, rreth zgjedhjeve dhe vendimeve më të mira për ta.”

“Këto modele energjie tregojnë se udhëheqja e energjisë dhe klimës nëpërmjet koordinimit rajonal mund të shndërrojë në realitet vizionin për një zhvillim të qendrueshëm dhe hapjen e vendeve të punës në sektorin e energjisë”, thotë Dan Kammen, drejtor i laboratorit për Energji të Rinovueshme dhe të Përshtatshme të Berkeley UC (RAEL), i cili prezantoi rezultatet kryesore të modeleve të energjisë. “Nëpërmjet këtij udhëzuesi për energjinë dhe klimën, Evropa JL po tregon se duke përfituar nga zhvillimi i shpejtë i teknologjive të energjisë së pastër dhe ndarjes së njohurive, mund të bëhet një lider në marshin drejt të ardhmes së energjisë që ne duam, dhe jo thjesht atë që rastësisht kemi trashëguar.”

Sipas të dhënave të publikuara nga raporti më i fundit i Organizatës Botërore të Shëndetit, Evropa JL harxhon mesatarisht 19% të GDP së saj në kosto ekonomike për vdekjet nga ndotja e ajrit, e barabartë me 30 bilion dollarë.

Në kundërshti me përqasjen aktuale të rajonit, “Rruga drejt asgjësë”, e cila do të rezultojë në reduktimin e emisioneve me vetëm 25% për 2050, rruga drejt BE do të thotë që të mos ketë ndërtime termocentralesh të reja përvec atyre që tashmë po ndërtohen në rajon. Kjo rezulton në reduktimin e emisioneve me 80% për vitet midis 2010 dhe 2050.

“Duke investuar të njëjtën sasi parash në energji të rinovueshme dhe jo në praktikat e dëmshme të përfitimit të energjisë nga linjiti, duke investuar në reduktimin e humbjeve të energjisë në rrjet, dhe duke rritur eficencën e energjisë e mitiguar ndotjen, rajoni mund të fillojë udhëtimin e tij në një rrugë të re, të nevojshme dhe të qendrueshme për energjinë ”, deklaron Ana Ranković nga organizata Fractal në Serbi, në emër të grupit të modeluesve të energjisë, që përfaqësojnë 9 organizata të Evropës JL, të cilët kanë punuar për krijimin e modelve të energjisë.

Ekolëvizja, 19.06.2015

Komisioni Evropian do të paraqesë vitin e ardhshëm një propozim për të rritur mbikëqyrjen e kontratave të gazit natyror me Rusinë dhe furnizues të tjerë të jashtëm, referoi shefi i bashkimit të energjisë Maroš Sefcovic.

Një projektligj, i cili pritet të sigurojë nëse marrëveshjet e gazit mes qeverive janë në përputhje me rregullat e Bashkimit Evropian, do të pasojë miratimin në mars për masën nga 28 vendet e bllokut, sipas Sefcovic

“Ne do të shohim se cila do të jetë mënyra më efikase për ta bërë dicka të tillë, ‘tha ai në një intervistë më 7 maj në Bruksel. ‘Ne mund të propozojmë përfaqësuesit e Komisionit Evropian në ekipet negociuese, ne mund të propozojmë konsultime të ngushta ndërsa vijon zhvillimi i negociatave të tilla apo mund edhe të mendojmë se do të kemi një lloj klauzolestandarde për të siguruar se marrëveshjet janë në pajtueshmëri me rregullat e BE-së .

Kriza në Ukrainë theksoi nevojën që Europa të ‘shtrëngojë’ lidhjet e energjisë ndërmjet shteteve anëtare dhe të reduktojë varësinë e saj nga Rusia, e cila furnizon 27 për qind të gazit natyror të bllokut. Për të siguruar që marrëveshjet ndërqeveritare me Rusinë nuk e shkelin ligjin e BE-së, rregullatori duhet ekzaminojë përmbajtjen e tyre gjatë negociatave dhe jo vetëm pak përpara miratimit të marrëveshjeve, sipas Sefcovic.

Revista Monitor, 14.05.2015

Ndërtimi i hidrocentralit të Lengaricës ka sjellë edhe reagimin e deputetëve të Parlamentit Europian e madje pritet të diskutohet në seancë plenare në Strazburg.

Gjatë diskutimeve mbi projekt-rezolutën e raportuesit për Shqipërinë në PE, Knut Fleckenstein në Komisionin e Punëve të Jashtme, një prej eurodeputetetëve ngriti shqetësimin mbi ndërtimin e këtij hidrocentrali në një zonë të mbrojtur natyrore. Eurodeputeti Igor Soltes, nga grupi parlamentar i të Gjelbërve tha se kjo çështje përbën një shqetësim mjedisor dhe ekonomik, që edhe pse i përfshirë në projektrezolutën e Fleckenstein duhet ngritur edhe në nivel plenar.

“Janë 43 projekte për hidrocentrale përgjatë lumit Vjosë, një prej lumenjve të paktë të rrëmbyeshëm në Europë ku madje pritet të hapet një park kombëtar për Europën në atë zonë. Por një prej projekteve, ai i Langaricës është tashmë në fazë ndërtimi dhe një kompani austriake po e ndërton atë me bashkëfinancim nga Banka Botërore. Por leja e ndërtimit u nënshkrua vetëm pak pasi projekti ishte ndaluar nga qeveria. Ka shumë pikëpyetje lidhur me këtë projekt pasi bëhet fjalë për një zonë të ruajtua. Kryetari i bashkisë atje deklaron se është në favor të parkut kombëtar dhe jo hidrocentralit por pretendon se nuk ka influencë të mjaftueshme. Edhe vetë kryeministri Edi Rama ka deklaruar se është në favor të këtij parku dhe ka ndaluar të gjitha projektet që janë në fazën e planifikimit. Parlamenti Europian duhet të ngrejeë këtë cështje të rëndësishme mjedisore dhe ekonomike në seancën e ardhshme plenare”, deklaroi eurodeputeti Igor Soltes

Hidrocentrali i Lengaricës po ndërtohet nga kompania austriake Enso Hydro në Parkun Kombëtar të Përmetit, pasi u pajis me licensë dhe leje mjedisore nga qeveria e mëparshme e drejtuar prej ish-kryeministrit Sali Berisha.

Ambientalistët pretendojnë se ndërtimi i hidrocentralit u parapri nga një proces korruptiv dhe u shoqërua me shkelje të Kushtetutës, të Vendimit të Këshillit të Ministrave dhe Ligjit për Zonat e Mbrojtura. Kanioni i Lengaricës konsiderohet nga ekspertët si një zinxhir monumentesh unike të natyrës dhe trashëgimisë kulturore që përbëjnë një pasuri të madhe për zhvillimin e turizmit në Shqipëri dhe burim të ardhurash edhe për banorët vendas përgjatë viteve të fundit.

Shqiptarja.com  14.04.2015

Bashkimi Evropian ka vendosur të hartojë planin për të krijuar lidhje më të ngushta të energjisë midis 28 vendeve të saj, në përpjekje për të shmangur rreziqet e furnizimit nga kriza në Ukrainë dhe për të lehtësuar zhvendosjen e planifikuar drejt ekonomisë që përdor nje energji me te paster.

Komisioni Evropian, krahu rregullator i BE-së, pritet të publikojë në mesditë në Bruksel strategjinë për të ndërtuar bashkimin e energjisë. Ai gjithashtu do të paraqesë planin mbi marrëveshjen e klimës globale dhe një strategji rreth përmirësimit të flukseve të energjisë në të gjithë Evropën.

“Qëllimi i një Bashkimi elastik të Energjisë me një politikë ambicioze të klimës në thelbin e saj synon ti ofrojë konsumatorëve të BE-së – shtëpive dhe bizneseve- energji të sigurtë, të qëndrueshme, konkurruese dhe të përballueshme ‘, sipas një draft dokumenti të komisionit.

Komisioni dëshiron të përshpejtojë interkonjeksionet ndërkufitare të gazit dhe të energjisë, të eleminojë barrierat e tregut dhe të diversifikojë burimet e energjisë duke reduktuar emetimet e gazit-serrë. Kriza ukrainase ka nënvizuar nevojën që Europa të reduktojë varësinë e saj të energjisë mbi Rusinë, e cila furnizoi 27 përqind të gazit natyror që konsumoi BE vitin e kaluar.

Reduktimi i importeve të përgjithshme është një tjetër sfidë për rajonin, i cili blen 53 për qind të energjisë që konsumon nga furnizuesit e jashtëm me një kosto prej 1 miliardë euro (1.1 miliardë dollarë) në ditë, sipas komisionit.

Plani i bashkimit të energjis është caktuar të bazohet në pesë shtylla: sigurinë e furnizimit; integrimin e tregjeve kombëtare; reduktimin e kërkesës për energji; reduktimin e dioksidit të karbonit; dhe promovimin e kërkimit dhe inovacionit, sipas draft dokumentit.

Revista Monitor,  25.02.2015

Udhëheqësit e Bashkimit Evropian kanë rënë dakord për zbatimin e projekteve të reja në sektorin e gazit, duke përfshirë korridorin Veri-Jug, Korridorin Jugor të Gazit dhe ngritjen e një qendre të re të gazit në Evropën Jugore.

Bashkimi Evropian pritet të financojë projekte të reja në sektorin e gazit, duke filluar nga rajoni i Detit Kaspik, ai i Lindjes së Mesme dhe në rajone të tjera në Europë.

Udhëheqësit e Bashkimit Evropian kanë rënë dakord për zbatimin e projekteve të reja në sektorin e gazit, duke përfshirë korridorin Veri-Jug, Korridorin Jugor të Gazit dhe ngritjen e një qendër të re të gazit në Evropën Jugore.

Marrëveshja e të premtes vjen në një kohë kur janë rritur tensionet ndërmjet Bashkimit Evropian dhe Rusisë, pasi blloku 28-vendesh i BE-së kërkon të ulë varësinë e importimit nga gazi rus.

Ndërkohë Rusia, BE-ja dhe Ukraina nuk arritën të bien dakord për të nënshkruar një marrëveshje të martën për furnizimin e Ukrainën me gaz rus gjatë dimrit.

Pa u publikuar shumë detaje dhe specifika, në një deklaratë të lëshuar nga Këshilli Evropian thuhet se projektet synojnë garantimin dhe funksionimin e tregut të energjisë.

Korridori Jugor i Gazit është një iniciativë e Komisionit Evropian – organi ekzekutiv i BE-së përgjegjëse për zbatimin e vendimeve, që synon furnizimin me gaz nga rajoni i Kaspikut dhe Lindjes së Mesme për në rajonet e Europës.

Vendet partnere të përfshira në iniciativën përfshijnë Turqinë, Azerbajxhanin, Kazakistanin, Irakun dhe Egjiptin.

Agjensia e lajmeve ekonomia, 27.10.2014