info@energjia.al

Në tre vitet e fundit, gjykatat shqiptare kanë dënuar mbi 12 mijë e 200 vetë për vjedhjen e energjisë elektrike dhe drejtimin e parregullt të automjeteve. Shifrat janë bërë publike në raportin vjetor të prokurorisë për gjendjen e kriminalitetit në vend gjatë vitit 2016.

Sipas të dhënave, për veprën e vjedhjes së energjisë, gjatë periudhës 2014-2016, janë dënuar rreth 3860 vetë. Sipas prokurorisë, nga analiza e të dhënave rezulton se faktori kryesor që ndikon në këtë vepër është papunësia, pasi rreth 62.5% e të pandehurve që janë proceduar për vjedhjen e energjisë, rezultojnë të papunë.

Për këtë arsye, prokuroria thotë se është treguar e kujdesshme në politikën e dënimit, duke kërkuar dënimin me burg për 55% të të pandehurve që janë proceduar për këtë shkelje. Megjithatë, sipas organit të akuzës, procedimet për këtë vepër janë përgjysmuar pas vitit 2014, kur qeveria nisi aksionin e gjerë kombëtar kundër vjedhjes së energjisë.

Në lidhje me veprën e dytë, atë të drejtimit të parregullt të automjeve, gjatë tre viteve të fundit janë dënuar 8367 persona. Për këtë vepër, prokuroria vëren se problematik mbetet përfshirja e të miturve, pasi mbi 22% e personave të dënuar, janë nën moshën 18 vjeç.

Por, ashtu si në rastin e vjedhjes së energjisë, edhe për drejtimin e parregullt të automjeteve numri i procedimeve është ulur gjatë dy viteve të fundit.

Top Channel,  07.05.2017

Oda Ekonomike e Kosovës ka prezantuar sot një raport me titull “Si të fuqizohet sektori privat në Kosovë”. Raporti prezanton problemet kryesore me të cilat përballen bizneset në Kosovë dhe rendit ndër to koston e lartë të çmimit të energjisë, konkurrencën e pandershme, informalitetin në ekonomi dhe mungesën e stabilitetit politik.

Kryetari i OEK Safet Gërxhaliu vlerësoi se rezultatet e gjetura janë më së reale dhe përfaqësojnë situatën e biznesit në Kosovë.

Duhet t’i marrim seriozisht gjetjet e këtij raporti, pasi i tregon qartë barrierat e të bërit biznes dhe definitivisht në këtë hulumtim ka edhe vërejtje e kritika”, tha Gërxhaliu.

Ndërkohë Ministri i Financave Avdullah Hoti tha se e ka analizuar studimin me vëmendje dhe se rezultatet ishin të pritshme për të.

Janë fakte, janë vlerësime, të cilat në masë të madhe konfirmojnë ato sektorë dhe politika ku ka patur më shumë probleme. Edhe rekomandimet në fund të raportit janë të mirë se ardhura”, tha Ministri Hoti.

Ndërkohë, këshilltari strategjik i Odës, Berat Rukiqi, përveç çmimit të lartë të energjisë, edhe ndërprerjet i kanë kushtuar biznesit rreth 290 milionë euro në shpenzime në gjeneratorë.

Problemi i kostos së energjisë elektrike nuk është i ri në Kosovë. I njëjti raport për vitin e kaluar tregon se ai përfaqësonte vetëm 32.5% të problemeve të deklaruara nga bizneset, çka tregon se ky problem është duke u bërë gjithmonë e më shqetësues.

Scan TV,  16.03.2017

Grupi i interesit, i përbërë nga Dhomat e Tregtisë dhe Shoqatat e biznesit të listuara (Aneksi A), I kanë drejtuar një kërkesë Entit Rregulator të Energjisë (ERE), ku pasi I parashtrojnë të dhënat mbi performancën e mirë financiare të tre operatorëve energjetikë, kërkojnë që tarifat e energjisë të ulen, pasi sipas atyre ato janë tepër të larta, sidomos për biznesin.

Në shkresë argumentohet se fitimet e tre operatorëvë të energjisë (KESH, OST, OSHEE) janë tepër të larta dhe vijnë kryesisht nga tarifat e larta dhe sidomos diferenca e tarifave mes operatorëve. Diferencat ndërmjet çmimeve dhe totalit të tarifave variojnë nga 0.6 deri në 9 Lekë për këh. Sipas shkresës, këto diferenca të paarsyeshme dëshmojnë qartë se me vendimet e fundit të ERE, tre operatorët e mëdhenj (sidomos OSHEE) mund të “lundrojnë” në para, me norma fitimi të panjohura nga sektorët e tjerë, gjithnjë në kurriz të bizneseve. Më të dëmtuarit nga çmimet janë konsumatorët e niveleve të tensioneve 35, 20 – 6, 0.4 kv, që do të thotë të gjitha kategoritë e bizneseve, përveç furrave të bukës.

Shoqatat dhe Dhomat kanë argumentuar në shkresën dërguar ERE (e plotë më poshtë) që është krejtësisht e padrejtë që bizneset operuese në Shqipëri ta paguajnë kaq shtrenjtë energjinë elektrike. Tarifat e larta si dhe diferencat e mëdha të totalit të tyre me çmimet (Aneksi D) vërtetojnë qartësisht se, duke i reduktuar ato, çmimi i energjisë elekrike ka pasur dhe ka një mundësi të vetme, atë të uljes ndjeshëm të tij.

Revista Monitor,  13.03.2017

Ministri i Energjisë dhe Industrisë z.Damian Gjiknuri bashkë me administratorët e OSHEE-së, KESH-it dhe OST-së realizuan një bashkëbisedim me gazetarët referuar treguesve të sektorit elektroenergjitik për vitin 2016.

Ministri Gjiknuri deklaroi se raportet e fundit të institucioneve prestigjioze ndërkombëtare si Fondi Monetar Ndërkombëtar, Banka Botërore apo agjenci të njohura si “Standart & Poor’s” dhe “Moody’s” e kanë konsideruar reformën në sektorin elektroenergjitik shumë të suksesshme.

“Hapat e ndërmarra kanë krijuar një efekt pozitiv në financat publike duke e çliruar Buxhetin e Shtetit nga barra e rëndë e këtij sektori që rrezikonte të fundoste financat publike. Vetëm gjatë tre viteve të fundit janë paguar 23 miliard lekë në tatim/taksa si kontribut direkt në Buxhetin e Shtetit. Ndërkaq, 135 milion Euro është efekti pozitiv indirekt në Buxhet përmes reduktimit të mbështetjes buxhetore për sektorin dhe çlirimin e garancive sovrane në 2013-2017”, u shpreh Gjiknuri.

Sipas tij, në 2016 niveli i humbjeve u reduktua në shifrën rekord prej 28.04% ndërsa në vitin 2013 u gjet jo pak por 45%.  Operatori i Shpërndarjes arkëtoi për vitet 2015-2016 shumën totale prej 126 miliard lek ndërsa tre vite më parë mblidheshin vetëm 38,3 miliard. Arkëtimi i faturave korente nga 66.7% që ishte në 2013, vitin e fundit u arrit në 86.6%. Totali i arkëtimeve për vitin 2016 përfshirë edhe kamatat arrin në 93.8%.

Rezultati ekonomik vjetor për OSHEE-në u mbyll pozitiv me 11.5 miliard lekë, Korporata Elektroenergjitike Shqiptare me bilanc pozitiv vjetor prej 1.7 miliard lekësh dhe Operatori i Sistemit të Transmetimit 1 miliard lek.

Në tre vitet e fundit, KESH, OST dhe OSHEE kanë investuar në sektor një shumë prej 45.6 miliard lekësh ndërsa për vitin 2017 plani i investimit arrin në 24 miliard lek.

Detyrimet e të tretëve ndaj OSHEE-së, pra rikuperimi i gjendjes së debisë përfshirë kamatat ka ardhur në rënie. Nëse në vitin 2013 ato ishin 117.8 miliard lekë, në vitin e fundit u mbyllën me 105.2 miliard lekë.

Borxhi i OSHEE-së ndaj KESH, OST dhe palëve të tjera të treta nga 99.9 miliard lekë që ishte në vitin 2013 është ulur tashmë në 93.6 miliard lekë.

Nëse në vitin 2013 shpenzoheshin 151 milion euro për mbulimin e humbjeve me blerje energjie nga importi, në vitin e fundit kjo është reduktuar në 61 milion euro.

Ndërkaq, KESH shpenzoi 12 milion euro më pak për blerje energjie nga importi krahasuar me vitin 2015 dhe 34 milion euro më pak se mesatarja e 5 viteve të fundi. Korporata Elektroenergjitike rriti gjithashtu me 22 milion euro të ardhurat nga eksporti krahasuar me 2015 dhe 41 milion euro krahasuar me mesataren e 5 viteve të fundit.

Normat e interesit të KESH-it për stokun e borxhit të trashëguar u ulën nga 6.58 % që ishte në 2013 tashmë në 3.94%.

Referuar përfituesve të skemave lehtësuese të shlyerjes së borxheve të prapambetura, deri më tani kanë përfituar 332 000 abonentë nga reduktimi deri në zerim të plotë të kamatëvonesës. Vlera e përfituar prej tyre deri më tani është 147 milion USD për periudhën 2014-2016. Deri në Qershor 2017 pritet të përfitojnë edhe 68000 abonentë duke e çuar shumën totale të detyrimeve të falura në 230 milion USD.

energjia.al  16.02.2017

Enti Rregullator i Energjisë ka miratuar tarifat e reja të aksesit të bizneseve në rrjetin e shpërndarjes. Përveç çmimit të energjisë elektrike, bizneset që furnizohen në 35 kilovolt do t’i paguajnë edhe 1.5 lekë për kilovat tarifë OSHEE-së për përdorimin e rrjetit dhe bizneset 20 kilovolt do të paguajnë mbi çmimin 11 lekë të energjisë për kilovat edhe 3.9 lekë të tjera si tarifë përdorimi për rrjetin e OSHEE-së.

Me këtë vendim, të 6200 bizneset që furnizohen nga rrjeti 20 kilovolt do të paguajnë për shkak të tarifës së re deri në 35% më shtrenjtë energjinë dhe 82 bizneset që furnizohen nga rrjeti 35 kilovolt do të paguajnë 15% më shumë.

Këto tarifa do të aktivizohen gjatë këtij viti dhe të parët që do të penalizohen nga rritja e çmimit të energjisë janë bizneset në rrjetin 35 kilovolot. Burimet nga OSHE bëjnë me dije se në muajin shkurt është gati e gjithë infrastruktura teknike e sistemit të matjes për të nxjerrë në treg të lirë këto biznese. Kështu, muajin tjetër, bizneset e këtij grupi do të nisin të paguajnë një tarifë 11 lekë për kilovatorë, nga 9.5 lekë që paguajnë aktualisht, nga e cila 9,5 lekë është tarifë për çmimin e energjisë dhe 1.5 lekë tarifë për përdorimin e rrjetit të OSHEE-së.

Por ekspertët e OSHEE shpresojnë se bizneset do të mund të gjejnë furnizues me çmim më të lirë, e cila mund të amortizojë tarifën e re të përdorimit të rrjetit. Por bizneset e kësaj kategorie, më herët gjatë muajit nëntor 2016, pohuan për ‘Monitor’ se kishin dështuar të gjenin një furnizues privat energjie me çmime të logjikshme.

Ndërsa tarifat më të larta pritet t’i paguajnë bizneset e rrjetit 20 kilovolt. Numërohen rreth 6200 subjekte të tilla, të cilat pritet të dalin në tregun e pavarur në gjashtëmujorin e dytë të vitit. Këto biznese do të paguajnë 14.9 lekë për kilovat, nga e cila 11 lekë është çmimi i energjisë për kilovatorë dhe 3.9 lekë për kilovat është tarifa e re që ERE miratoi pak ditë më parë për përdorimin e rrjetit të energjisë. Aktualisht ato paguajnë 11 lekë për kilovat.

Me ligjin e ri të energjisë, 6200 biznese që furnizohen në linjën 20 kv duhet të dilnin nga tregu në janar të këtij viti dhe 82 kompani të tjera që marrin energji në tensionin 35 kv duhet të kishin dalë që në korrik 2016.

Por, për shkak se infrastruktura teknike e sistemit të matjes nuk ishte gati, dalja në treg të lirë e konsumatorëve nga 35 kv është shtyrë për muajin që vjen dhe konsumatorët në 20 kv për gjashtëmujorin e dytë të vitit.

Tarifat e reja të energjisë me 2017 për 6300 biznese
Çmimi i energjisë Tarifa e re e përdorimit te rrjetit Rritja në %
Konsumatorë në 35 KV 9.5 1.5 15.79
Konsumatorë në 20 KV 11 3.9

Revista Monitor  09.01.2017

Ministri i Energjisë dhe Industrisë, Damian Gjiknuri, prezantoi para Komisionit Parlamentar për Veprimtarinë Prodhuese, projektligjin e ri për “Nxitjen e përdorimit të energjisë nga burimet e rinovueshme”.

Ky ligj do të kontribuojë në rritjen e sigurisë së furnizimit, shfrytëzimin e të gjitha burimeve kombëtare dhe krijimin e mundësive për prodhimin e energjisë për përdorim vetjak familjar apo për nevoja prodhimi e shërbimi. Në kuadër të zhvillimeve të reja për krijimin e një tregu të hapur dhe konkurrues, nëpërmjet këtij ligji trajtohen të gjitha rregullat dhe marrëdhëniet për një pjesëmarrje të gjerë jo vetëm në tregun vendas, por edhe atë rajonal.

Ligji krijon mundësinë e zbatimit të skemës incentivuese edhe për investimet e krijimit të burimeve të reja të energjisë nga era dhe dielli. Projektet e vogla të energjisë së rinovueshme, të cilat autorizohen nga Ministria me procedurë të lehtësuar, konsistojnë në mundësinë e shoqërive të vogla apo konsumatorëve familjarë, për të instaluar një kapacitet total për prodhimin e energjisë elektrike nga era ose dielli nën 500 kW. Për këtë, këto kategori klientësh duhet të jenë të pajisur me një matës me dy drejtime, të cilët gjenerojnë një pjesë ose të gjithë energjinë që nevojitet për nevojat e tyre dhe që mund të injektojnë energjinë e tepërt të prodhuar në rrjetin e shpërndarjes.

Mbështetja për prodhuesit me përparësi të energjisë elektrike mund të jepet nëpërmjet një procesi konkurrues tenderimi. Mbështetja do të jetë në formën e një shpërblimi për arritjen e çmimit të caktuar, si shtesë e çmimit të referencës.

Prodhuesit me përparësi, të cilët kanë nënshkruar kontrata shitblerje të energjisë elektrike, para hyrjes në fuqi të këtij ligji, do të hyjnë në tregun e organizuar të energjisë elektrike, në përputhje me skedulimin e parashikuar në Modelin e Tregut të energjisë elektrike.

Prodhuesit e energjisë së rinovueshme do të jenë përgjegjës për balancimin e prodhimit në përputhje me programin e pranuar në përputhje me rregullat e tregut dhe procedurave përkatëse që do të miratohen nga ERE, kushte të cilat nuk zbatohen për prodhuesit me kapacitet të instaluar më të vogël se 2 MË, ose për projektet demonstruese, përveç rasteve të energjisë elektrike të prodhuara nga energjia e erës, ku përjashtimi aplikohet për kapacitete të instaluara të energjisë elektrike prej 3 MW ose për 3 njësi prodhimi.

Kontrata për diferencë parashikohet për një shpërblim të ndryshueshëm, të llogaritur si diferenca midis çmimit me të cilin prodhuesi i energjisë së rinovueshme është shpallur fitues në procesin konkurrues për dhënien e ndihmës (çmimi i paracaktuar) dhe çmimit të tregut të energjisë elektrike (çmimi referencë). Këshilli i Ministrave miraton procedurën për organizimin e procedurës konkurruese të ankandit, për dhënien e mbështetjes ndaj prodhuesve me përparësi të energjisë.

Projektligji parashikon mbështetje financiare në bazë të një kontrate për diferencë, pa asnjë proces tenderimi për impiantet me kapacitet të instaluar të energjisë elektrike më pak se 2 MW, apo për projektet demonstruese.

Mbështetja financiare për njësi të energjisë nuk e tejkalon diferencën midis kostove totale të njehsuara të prodhimit të energjisë nga teknologjia në fjalë dhe çmimit të tregut, apo kostot totale të njehsuara të prodhimit të energjisë mund që të përfshijnë një kthim normal mbi kapitalin.

Mbështetja financiare për prodhuesit e energjisë së rinovueshme do të jepet deri në vetëshlyerjen e plotë të impiantit, në përputhje me rregullat e kontabilitetit dhe çdo ndihmë investimi të marrë më parë. Kontrata për diferencë do të ketë një kohëzgjatje maksimale prej 12 vjetësh.

Ligji parashikon Operatorin e Energjisë së Rinovueshme, i cili është Operatori i Tregut dhe do të financohet me anë të detyrimit të vendosur mbi të gjithë konsumatorët fundorë të energjisë elektrike për promovimin e energjisë nga burime të rinovueshme (“detyrimi për energjinë e rinovueshme”), bazuar energjinë elektrike të matur dhe të përdorur nga konsumatori fundor. Operatori i energjisë së rinovueshme, bazuar në kontrata bilaterale me çdo Furnizues të Energjisë Elektrike do të faturojë dhe mbledhë pagesat për “detyrimin për energjinë e rinovueshme”. Në këtë kuadër, ERE do të miratojë procedurën e kompensimit dhe do të përcaktojë “detyrimin për energjinë e rinovueshme” që do të paguhet nga ana e konsumatorëve të energjisë elektrike, në një bazë vjetore.

Aksesi në rrjet është një nga barrierat e deritanishme. Ligji parashikon lehtësi të mëtejshme me qëllim për lidhjen në rrjet të energjisë elektrike nga burime të rinovueshme, ka të bëjë me lidhjen në rrjet të këtyre burimeve. OST dhe OSSH garantojnë mbi baza transparente, jodiskriminuese dhe bazuar në tarifat e miratuara dhe të publikuara nga ERE lidhjen me rrjetin.

Revista Monitor,  07.12.2016

Në Kryesinë e Kuvendit është ndërprerë energjia elektrike për disa minuta.

Nuk dihet shkaku i ndërprerjes së energjisë elektrike, por raportohet se ka mungëse të energjisë edhe në disa zona të tjera të Tiranës.

Në Kyresinë e Kuvendit janë duke zhvilluar punimet disa komisione parlamentare.

Ora News,  05.12.2016

Ruajtja e një konkurrence të shëndetshme në treg që i shërben mbi të gjitha cilësisë së shërbimit ndaj konsumatorit dhe politikave të caktimit të një çmimi të drejtë është objekt vëzhgimi kudo në botë i rregullatorëve.

Sekretariati për Energjinë në një raport të hartuar nga konsulenti i kontraktuar ka marrë në analizë një sërë aspektesh që lidhen me konkurrencën dhe barrierat në tregun e energjisë dhe gazit në vende të ndryshme të Ballkanit dhe më gjerë.

Faza e parë lidhet me çmimet që aplikohen lidhur me licencimin e operatorëve. Shqipëria referuar shifrave hyn tek vendet më tarifa të kripura që aplikohen në fazën e parë. Konkretisht për një licencë në energji ajo aplikon një tarifë fillestare prej 7 mijë eurosh. Bosnjë –Hercegovina aplikon një tarifë fillestare prej 1000 eurosh për licencat në energji dhe naftë dhe 500 euro për ato në gaz.

Në Maqedoni vlera fillestare është e unifikuar në 500 euro për të gjitha. Për Kosovën të dhënat i referohen vetëm atyre mbi hidrocentralet ku politika e licencimit është në varësi të megavatëve të instaluar dhe fillon nga 3000 euro për ato deri në 50 mega deri në 12 mijë euro për ato mbi 400 mega.

Në Mal të Zi licenca kushton në fillim 1500 euro, kurse në Serbi 2500 euro plus një seri taksash për procedurat që limitohen në nivelet e 6 eurove. Ukraina aplikon për licencat e gazit dhe energjisë një nivel 54 euro në fillim.

Një pjesë e vendeve kanë edhe tarifa mirëmbajtje për licencat që janë vjetore. Në këndvështirmin e Sekretariatit çmimet që aplikohen për operatorët e rinj që duan ti bashkohen tregut janë mesatarë duke parë edhe mundësitë dhe potencialin që ofron secili treg.

Scan Tv,  22.09.2016

Edhe pse zhvillimi i bizneseve – të cilat për bazë kanë prodhimtarinë – do të gjeneronte vende të reja pune dhe do të ndihmonte zhvillimin ekonomik të shtetit të, ky sektor po përballet me probleme shumë të mëdha.

Sipas përfaqësuesve të bizneseve, ambienti i të bërit biznes në Kosovë nuk është përmirësuar, pasi ata ende përballen me telashe me energji elektrike, e cila është një faktor limitues për zhvillimin ekonomik.

Përgjithësisht, politikat jo të favorshme tatimore dhe energjia elektrike shihen si pengesat kryesore për prodhimin në vend.

Telegrafi,  19.09.2016

Humbjet e energjisë elektrike janë ulur më tej në gjysmën e parë të vitit 2016. Mbështetur në të dhënat e Institutit të Statistikave, humbjet në rrjet janë ulur në 29.2%, nga niveli 31.3% në të njëjtën periudhë të vitit 2015.

Në veçanti, humbjet në rrjetin e shpërndarjes për gjashtëmujorin zbritën në 26.2%, nga 28.8% që kishin qenë një vit më parë. Mbështetur në atë çka vetë Operatori i Shpërdarjes së Energjisë Elektrike raporton, pjesa më delikate e humbjeve, ajo joteknike, ka zbritur për gjashtëmujorin në 7.15%, nga 10% që ishte në gjashtëmujorin e vitit të kaluar.

Sipas Instat, kjo shkallë humbjesh përfshin edhe diferenca statistikore, megjithatë, kryesisht ajo tregon se këtë vit sasia e energjisë së vjedhur apo të papaguar ka rënë më tej. Megjithatë, të dhënat statistikore që ndajnë humbjet teknike nga ato joteknike janë, janë vetë vlerësime të OSHEE dhe të pacertifikuara nga ndonjë ent i pavarur.

Sidoqoftë, ana tjetër e medaljes është niveli ende shumë i lartë i humbjeve teknike në transmetim dhe shpërndarje. Ky tregues është rritur në 22% për gjashtëmujorin e parë të vitit, nga 21.3% që kishte qenë vitin e kaluar. Sipas Instat, kjo ka ardhur sidomos për shkak të rritjes së humbjeve në rrjetin e transmetimit, që janë zgjeruar me afro 15%.

Kjo do të thotë, më së shumti, se sistemi energjetik ka nevoja të mëdha për investime, me qëllim uljen e nivelit të lartë të humbjeve. Gjysma e parë e vitit rezultoi piozitive për treguesit e prodhimit dhe eksportit të energjisë elektrike.

Prodhimi arriti në 4065 GWH (gigavatorë), në rritje me 8% krahasuar me gjashtëmujorin 2015. Ajo që bie në sy, megjithatë është stanjacioni i prodhimit në HEC-et publike, me shifra afërsisht të njëjta me vitin e kaluar. Rritja ka ardhur e gjitha nga HEC-et private dhe koncesionare, që e kanë zgjeruar prodhimin me 36% krahasuar me vitin e kaluar.

Pesha e impianteve private dhe koncesionare arriti në 32% të prodhimit, nga 25% që kishte qenë vitin e kaluar. Për këtë vit, energjia e përdorur nga ekonomia shqiptare ra me 5% krahasuar me vitin e kaluar.

Ky mund të jetë një indikator i dobësisë së rritjes ekonomike, por, edhe i faktit se energjia paguhet më shumë, ndja edhe shpërdorohet më pak. Gjithashtu, një ndikim mund të ketë pasur edhe ndërprerja e përkohshme e prodhimit nga konsumatorë shumë të mëdhenj, si kompania Kurum.

Scan Tv,  01.09.2016