info@energjia.al

Shtatë persona të armatosur dhe me maska kanë ushtruar dhunë fizike ndaj 6 punonjësve të HEC-it të Valikardhës në Bulqizë. Report Tv mëson se ngjarja e rëndë është shënuar pasditen e kësaj të marte, ndërsa policia e Bulqizës është nisur drejt vendit të ngjarjes. Mësohet se 2 prej 6 personave të lënduar kanë marrë plagë të rënda dhe ndodhen në kujdesin intensive të mjekëve. Agresorët janë larguar në drejtim të paditur, ndërsa mendohet se ajnë banorë të zonës. Këta të fundit kundërshtojnë ndërtimin e HEC-it janë kundër ndryshimit rrjedhës së lumit në Mat, çka sipas tyre do kishte pasoja të rënda të ekosistemit.

Shqiptarja.com  11.10.2017

Dy elektricistë të OSHEE Gjirokastër janë rrahur barbarisht me shkop bejsbolli nga dy pronarë të një lokali në një nga ishujt, pasi tentuan që të ndërprisnin lidhjet e paligjshme të energjisë elektrike.

Elektricistët e dhunuar janë Qani Sulejmani dhe Elton Proko, ndërsa aktualisht pas marrjes së ndihmës mjekësore janë larguar nga spitali.

Ata u qëlluan në pjesë të ndryshme të trupit nga të dy pronarët e lokalit, ndërsa dy elektricistët pas ngjarjes deklaruan se policia po e mban të fshehtë ngjarjen.

Sipas gazetarit të Report Tv, Piro Nase, dy elektricistë janë shprehur se pas njoftimit për një lidhje të paligjshme janë nisur në drejtim të ishullit në Ksmail, por kanë hasur në rezistencën e pronarëve që i kanë goditur disa herë me shkop bejsbolli.

Scan Tv,  14.07.2017

Nuk paguan dritat prej 2008-s, dhunon zyrat e OSHEE-së

Ngjarja ka ndodhur para disa ditësh në Koplik të Shkodrës, me autor L.F, abonent i Operatorit të Shpërndarjes së Energjisë Elektrike (OSHEE), dhe është rasti tipik i reagimit, sikurse ka ndodhur edhe me parë (nga te tjerë abonentë), kur përballen me faktin e “pa imagjinueshëm” se, vjen një ditë dhe dritat duhen paguar!

Pavarësisht konsumit normal, mesatar nën 20 mijë lekë, autori kishte prej vitit 2008 që nuk paguante dritat, duke akumuluar një debi prej 1 milion e gjysmë lekë (të vjetra).

Në këto kushte, i pritet energjia elektrike dhe ftohet nga OSHEE për t’i paguar detyrimet me këste (sipas aktmarrëveshjes), në mënyrë që t’i rilidhen dritat.

Reagimi i tij lë pa fjalë punonjësit e OSHEE dhe të policisë, me të cilën ai tashmë po përballet.

energjia.al  18.05.2016

Kompania CEZ ka kryer një padi ndaj deputetit të Partisë Socialiste, Gjovalin Kadeli, me pretendimin se ka ushtruar dhunë fizike ndaj punonjësit P.M, gjatë aksionit për ndërprerjen e energjisë elektrike në Komunën Kolsh të Lezhës. Kadeli është deputet i Qarkut të Lezhës dhe kishte mbërritur në zonën e tij elektorale pas ankesave të shumta nga banorët e komunës dhe fshatrave përreth për mungesë dritash prej më shumë se 34 ditësh. Kadeli ka mbërritur ditën kur po kryhej aksioni, ku ishin të pranishëm edhe forca të policisë dhe kërkoi sqarime lidhur me kufizimet, që sipas tij, janë të padrejta.
Kompania CEZ thotë se deputeti ka goditur punonjësin e saj dhe rastin e ka denoncuar në Policinë e Lezhës. “Do të mbrojmë ligjërisht punonjësin tonë dhe do të mbështesim çdo ekip të kompanisë që sulmohet gjatë ushtrimit të funksionit”, thotë kompania. Por deputeti, i kontaktuar nga gazeta “Shqip”, nuk pranon të ketë goditur njeri. “Sqarimi im me punonjësit e CEZ-it nuk shkoi deri në përplasje fizike, por kërkova llogari për padrejtësinë që u bëhet banorëve të zonës sime. Ata e paguajnë rregullisht energjinë elektrike dhe jam kategorikisht kundër atyre që nuk e paguajnë, madje kam ofruar ndihmën time te CEZ për realizimin e qëllimit. Dua t’i bëj me dije përfaqësuesve të CEZ se po kryen krime kundër popullatës në bashkëpunim dhe në mënyrë të përsëritur me strukturat e shtetit. Nuk mund t’i lejoj CEZ-it që të dënojë në mënyrë kolektive banorët e Komunës së Kolshit e Zejmenit. Si pronarë i mbështes në të drejtën që kanë, por kurrë nuk do t’i lejoj të shkelin mbi të drejtat e qytetarëve të cilët e kanë paguar energjinë elektrike”, deklaron Kadeli. Me indinjim ai thotë se kompania, në bashkëpunim me strukturat e shtetit po godasin padrejtësisht komunat me elektoral të majtë dhe se do të kryejë kallëzim sipas rastit. Sakaq, CEZ thotë se muajt e fundit, punonjësit e saj janë përballuar me dhunën në shumë raste dhe shpeshherë nuk kanë qenë të sigurt për ushtrimin e punës.

Gazeta Shqip, 03.11.2012

Një 19 vjeçar nga fshati Bugjon i Pukës dhe me banim në Shkodër është vënë në prangat e policisë, pasi tentoi të vidhte me dhunë nën kërcënimin e armës së zjarrit në një pikë karburanti.
Mhill Gjergji i dënuar edhe më parë për vjedhje u arrestua pasi pasditen e djeshme nën kërcënimin e një arme zjarri tip pistoletë dhe i maskuar me skafandër motori ka tentuar të vjedhë shitësin e pike karburanti, në lagjen “Ahmet Haxhia” të qytetit Shkodër.
Burime zyrtare nga policia thanë për noa.al, se nga veprimet e deritanishme hetimore mësohet se autori i ngjarjes në tentativë për të vjedhur shitësin e pikës së karburantit, gjatë përleshjes me këtë të fundit, ka qëlluar një herë me armë zjarri, por pa shkaktuar dëmtime dhe në vendin e ngjarjes në cilësinë e provës materiale u gjet dhe u sekuestrua  një gëzhojë model 54 .
Gjithashtu në cilësinë e provës materiale autorit të ngjarjes iu sekuestruan dy motoçikleta njëra e markës Dajan me targë SH 254, dhe tjetra e markës Motoaupa si dhe një skafandër motori, mjete këto me të cilat dyshohet se 19 vjeçari ka tentuar te kryej vjedhjen.
Në vijim të hetimeve vijon puna për kapjen e bashkëpunëtorëve të mundshme ndërsa nisën hetimet për veprat penale “Vjedhje me armë e mbetur në tentativë” dhe “Armëmbajtje pa leje”.

Agjensia e Lajmeve NOA, 23.05.2012