info@energjia.al

Në tryezën e mbajtur sot nga Komiteti për Energjitikë i Vetëvendosje!-s me temë “Sfidat e energjitikës – problemet në minierat e qymyrit” mbajtën prezantimet e tyre Kryetari Visar Ymeri, Drejtuesi i Komitetit për Energjetikë, Naim Hoxha, Ismet Raqa dhe Sylejman Krasniqi, inxhinierë dhe ekspertë të fushës si dhe deputetja Donika Kadaj.

Ekspertët me eksperiencë të gjatë pune në minierat e KEK-ut u shprehën për degradimin me intensitet të lartë në divizionin e qymyrit. Ata po ashtu paraqitën dhe keqpërdorimet e gjithanshme që i janë bërë këtij sektori ku më së shumti u theksua mungesa e çfarëdo vizioni, planifikimi apo strategjie.

Diskutim ngjalli edhe prezantimi i Kryetarit Visar Ymeri, në pikën e ndërtimit të Korporatës së Qymyrit, që është dhe propozim programor i Lëvizjes.

Ai shpjegoi se rithemelimi i Korporatës publike të Qymyrit do të përfshijë minierat ekzistuese, fushat e shfrytëzimit dhe zonat hulumtuese.

Ymeri u ndal po ashtu në rrezikun e shtuar që po paraqitet nga improvizimet me prapavijë interesa klienteliste sa i takon sigurisë së prodhimit të energjisë elektrike në Kosovë. E në këtë drejtim Lëvizja Vetëvendosje! do të intensifikojë veprimet e ndërhyrjet e saj veçanërisht në Kuvend.

Prof. Naim Hoxha tha se pavarësisht çështjeve që i kemi adresuar vazhdimit, situata po vazhdon të mbetet e njëjtë.

Ai pasi paraqiti problemet me vendimet e qeverive sa i takon trajtimit të pronave përreth minierave vuri theksin në nevojën emergjente të strategjisë së zhvillimit të sektorit energjitik si parakusht i zhvillimit ekonomik.

Eshtë tejet i rëndësishëm, hartimi i strategjisë zhvillimore energjetike që nuk ndalet te klishetë boshe të këtyre 18 viteve por që analizon e parashikon si do të zhvillohet si park energjitik zona e termocentraleve, se si do të mbrohet ambienti e shëndeti i popullatës dhe se si do të ndërtohen e planifikohen kapacitetet e reja energjitike.

Inxhinieri Ismet Raqa paraqiti gjendjen e minierës, projektin fillestar për hapen e saj dhe devijimin e qëllimtë nga projekt-ideja.

Gjendja e tashme e minierës dhe zonat ku po punohet sinjalizojnë për rreziqe të reja përpos atyre që tashmë dihen sa i takon banorëve aty pranë por edhe krizës për qymyr në gjashtëmujorin e parë të vitit në vijim 2018.

Kurse, inxhinieri Sylejman Krasniqi foli për shkaktarët e krizës energjetike. Problemin e shtëpive në Shipitullë dhe Hade, ai e sheh si problem që e ka zanafillën që prej vitit 2004.

“Drejtori aktual i KEK-ut do që ta reduktojë minierën vetëm në dy hektarë tokë për aq sa i kanë premtuar pronarët e tokave në Shipitullë. Kjo është shaka me opinionin sepse kjo nuk mjafton as për gjerësinë e një ekskavatori”, u shpreh ai.

Krasniqi po ashtu paraqiti të dhënat mbi abuzimet milionëshe që po bëhen me fondet publike të KEK duke kontraktuar kompani private për të larguar materialet nga djerrinat ndërkohë që automjetet e specializuara në gjendje punë si dhe punëtorët e specializuar të KEK qëndrojnë pa punë.

Kriza në këtë sektor është krijuar më vetëdije. Nuk mungojnë shembujt e ngjashëm në rajon. Është e qartë se sa i takon minierave të qymyrit brenda Korporatës Energjitike të Kosovës abuzimet kanë datë, të paktën prej vitit 2004 e deri më tash. Ato janë përgjithësisht të natyrës korruptive por edhe të qëllimshme.

Lejimi i ndërtimeve në zonat e shpallura me interes të veçantë, përreth minierave dhe devijimi i projektidesë për hapjen e minierave të reja janë dy anët e të njëjtë medalje, asaj të dobësimit të qëllimshëm të Korporatës dhe veçanërisht të divizionit të qymyrit si sektorë kyç i energjitikës në Kosovë.

Agjensia e lajmeve ekonomia,  11.10.2017

Potenciali i zhvillimit të këtij turizmi në Shqipëri. Flet ekspertja amerikane për turizmin e aventurës, Paige Viren

Turizmi i aventurës po tërheq gjithnjë e më shumë turistë drejt Shqipërisë, duke ndjekur trendet e kësaj industrie në botë. Ekspertja amerikane për turizmin e aventurës, Paige Viren, tregoi për “Monitor” se si mund të përfitojnë komunitetet lokale duke ruajtur balancën ekonomike, mjedisore dhe kulturore. Ajo ngre shqetësimin e largimit të të rinjve nga zonat me potencial zhvillimi…

Paige Viren, eksperte në sipërmarrje dhe turizëm, është njohur me ofertën e Shqipërisë për sa i përket turizmit të aventurës dhe ka kryer takime dhe diskutime me grupe sipërmarrësish lokalë, biznese dhe aktivistë të organizatave joqeveritare.
Paige vjen në Shqipëri pas një vizite dhe në Kosovë, në kuadër të përdorimit të teknologjisë dhe inovacionit për të mbështetur zhvillimin e qëndrueshëm të turizmit, veçanërisht të turizmit mbështetur mbi aventurën, kulturën e pasur dhe natyrën, për të cilët ajo shikon potencial zhvillimi.

Shqipëria ofron të gjitha llojet e turizmit, me një natyrë të shfrytëzueshme në të gjitha stinët, dhe një distancë të afërt të bregut të detit dhe zonës malore. Si dobësi të këtyre zonave, Paige Viren evidentoi hendekun e përdorimit të teknologjisë, që të sillte më afër turistëve bukurinë e këtyre zonave, por edhe dëshirën e të rinjve për t’u larguar nga këto zona.

Për ta ndaluar këtë, Paige Viren, e vuri theksin te fuqizimi i vendasve. Njerëzit duhet ta duan vendin e tyre, të kenë dëshirë të jetojnë dhe të mendojnë si ta kthejnë në përfitimin e tyre ekonomik dhe kjo, duke u mbështetur mbi politika që nxisin zhvillimin e qëndrueshëm të turizmit. Ky do të jetë çelësi i suksesit, njerëzit të duan të jetojnë në vendin e tyre.

Me grupin e saj, udhëtuan nga Kukësi në Llogora, në më pak se pesë orë, me shpejtësi normale. Nëse mund të organizohet në një mënyrë më të mirë, mund të krijosh produkte turistike që të përfshijnë të dyja zonat, malore dhe bregdetare.

Cila është përshtypja juaj e parë nga Shqipëria?

Përshtypja e parë nga Shqipëria ishte e shkëlqyer. Bukuritë natyrore dhe kultura janë mbresëlënëse, keni plot gjëra të mira për të ndarë. Përfundimisht është një rajon i paprekur, edhe pse ka disa përpjekje për zhvillimin e turizmit, unë shikoj potencial për turizmin. Duhet të krijohet ekonomi bazuar mbi turizmin e qëndrueshëm, me fokus në turizmin e aventurës, apo turizmin kulturor dhe mjedisin natyror. Kjo do të ishte mënyra më e zgjuar.

Mbresa

Bukuritë natyrore dhe kultura janë mbresëlënëse, keni plot gjëra të mira për të ndarë. Përfundimisht është një rajon i paprekur, edhe pse ka disa përpjekje për zhvillimin e turizmit, unë shikoj potencial për turizmin. Duhet të krijohet ekonomi bazuar mbi turizmin e qëndrueshëm, me fokus në turizmin e aventurës, apo turizmin kulturor dhe mjedisin natyror. Kjo do të ishte mënyra më e zgjuar.

Shqipëria ka burime të pafundme natyrore, të cilat kanë filluar të tërheqin ndjeshëm vëmendjen e të huajve së fundmi. Cili është rekomandimi juaj,çfarë duhet të bëjë Shqipëria për të shfrytëzuar këtë moment dhe për të nxitur zhvillimin e qëndrueshëm?

Ju keni kaluar shumë sfida dhe besoj se është koha që njerëzit të fillojnë të ndihen mirë me vendin ku jetojnë, të kenë ndjenjën e krenarisë. Kjo do të inkurajojë njerëzit që të mbrojnë mjedisin. Nëse do të ndihen të lidhur me vendin e tyre dhe do të ndiejnë se i përkasin atij vendi, do të kujdesen më shumë për të. Kur njerëzit hedhin plehrat në rrugë, është e qartë se nuk e mendojnë si vendin e tyre. Një vend i mirë për të jetuar, është një vend i mirë për t’u vizituar.
Nuk ka thjesht të bëjë me promovimin për të tërhequr turistë, por që njerëzit të kenë një punë që mund t’ju mundësojë të jetojnë jetën që duan, t’ju sigurojë disa para më shumë.

Jo të gjithë duan që të jetojnë në qytet. Nëse doni një zhvillim të qëndrueshëm duhet të bëni këtë. Ka shumë të rinj në këto vende, të cilët nuk duan të jetojnë në zonat rurale, si mund ta bëni një vend që njerëzit të duan që të jetojnë. Biznesi i turizmit është në atë nivel, nivel të ulët, por që njëkohësisht mund të inkurajojë njerëzit të qëndrojnë nëpërmjet vendeve të punës.
Bar-kafetë, tur-operatorët, apo individët që mundësojnë vozitjet me kajakë, dikush që gatuan, apo një tjetër që organizon piknik në natyrë, apo dikush që ndan një përvojë unike si përgatitja e rakisë, unë do të paguaja për këtë. Nuk ka nevojë për mjedise luksi, mjafton që të hapin shtëpitë e tyre dhe të ndajnë mënyrën e tyre të jetesës me turistët.

Nuk e di sa jeni në dijeni, por së fundmi ka pasur një debat në Shqipëri, pasi në zonat malore (më të bukurat në Shqipëri), si dhe në Jug (lumi i Vjosës) janë dhënë leje për zhvillimin e hidrocentraleve, që rrezikojnë të dëmtojnë natyrën e virgjër. Cili do të ishte rekomandimi juaj në këtë drejtim?

Kur fokusohesh tek turizmi i bazuar mbi burimet natyrore, mendoj se do të ndikohej zhvillimi nga projekte, siç janë hidrocentralet apo industria e rëndë. Duhet të ndryshohet qasja se si njerëzit e perceptojnë turizmin, pasi hidrocentralet vërtet mund të gjenerojnë të ardhura, apo të hapin vende të reja pune për komunitetin, por dëmtojnë dhe mjedisin. Nëse në vizionin tuaj duhet të mbroni asetet natyrore, kulturën lokale duhet të përforconi zhvillimin që nuk i dëmton ato. Nuk duhen parë paratë që sjell në afatshkurtër një Projekt, por edhe ndikimi negativ.

Në mendimin tim duhet të zhvilloni një linjë të bazuar mbi tre shtylla kryesore, kur bëhet fjalë për ekonominë. Kjo linjë treshe, çfarëdo zhvilli që të ndërmerrni, duhet të ketë ndikim pozitiv në ekonomi, kulturë dhe mjedis. Nëse planifikoni të ndërtoni një digë për ndërtimin e hidrocentralit, kjo mund të jetë ekonomike, por çfarë është vlera mjedisore dhe kulturore?

Në Shtetet e Bashkuara të Amerikës, të gjitha industritë që u ngritën përgjatë lumenjve, tashmë janë shpërngulur. Tani po përpiqemi që të rregullojmë çka është dëmtuar. Keni mundësinë në Shqipëri që të forconi dhe të mbroni atë që keni në një mënyrë të qëndrueshme dhe të menduar mirë, që iu mundëson punë vendasve dhe gjithashtu forcon kulturën.

Kujdes!

Kur fokusohesh tek turizmi i bazuar mbi burimet natyrore, mendoj se do të ndikohej zhvillimi nga projekte, siç janë hidrocentralet apo industria e rëndë. Duhet të ndryshohet qasja se si njerëzit e perceptojnë turizmin, pasi hidrocentralet vërtet mund të gjenerojnë të ardhura, apo të hapin vende të reja pune për komunitetin, por dëmtojnë dhe mjedisin

Rritja e fluksit të turizmit në zonat rurale së fundmi mund të ushtrojë presion për rritjen e kapaciteteve akomoduese, që mund të dëmtojnë natyrën. Cili do të ishte rekomandimi juaj për të zgjidhur këtë problem?

Në mendimin tim duhet të ketë përdorim optimal të burimeve mjedisore, të cilat ndihmojnë që të ruhet trashëgimia natyrore dhe biodiversiteti. Duhet të respektohet origjinaliteti socio-kulturor i komuniteteve mikpritëse dhe të mundësohen përfitime socio-ekonomike për të gjitha grupet e interesit.

Si mund të nxitet turizmi i aventurës në Shqipëri, në funksion të zhvillimit të komunitetit lokal, por edhe nxitjes së zhvillimit të qëndrueshëm?

Diçka që kam vënë re është se këtu njerëzit janë mikpritës dhe të ngrohtë, ushqimi është i mirë dhe keni burime natyrore të pafundme. Pra, ju i keni, por duhet të organizoni përpjekjet. Gjatë vizitës sime këtu kam takuar njerëz që përpiqeshin që të bënin të njëjtën gjë, por vetëm. Jam e mendimit se duket të krijohet rrjeti dhe të koordinohet puna midis njerëzve që bëjnë të njëjtën gjë, por që me vështirësi bëhen bashkë.

Në patëm një takim në Vlorë, ku u njohëm me një grup që organizonin zhytje, apo hedhje me parashutë, të cilët po bëjnë gjëra të mira. Ka shumë pjesë që duhet të bëhen bashkë, mbase krijimi i një shoqate, që të tregojë se çfarë politike mund të na ndihmojë për të zhvilluar më tej atë që tashmë e keni. Në këtë mënyrë, do të tërhiqni njerëz në Shqipëri, por edhe vetë shqiptarët. Ne shkuam në Shishtavec dhe shumë nga shqiptarët nuk e kishin vizituar ende atë vend.

Nëse keni njohuri, cilat janë zonat më interesante në Shqipëri për zhvillimin e turizmit të aventurës?

Varet se nga vijnë turistët, p.sh., unë vij nga Karolina e Veriut, një vend bregdetar dhe do të isha e interesuar që të shkoja në male, por në të njëjtën kohë e pëlqej dhe detin. Mendoj se ju i keni të gjitha dhe mund të plotësoni nevojat dhe interesin e secilit turist. Besoj se nuk është problem që të akomodoni turistët në zonat bregdetare gjatë sezonit të verës apo udhëtimet e fundjavës nuk kanë pse të jenë vetëm buzë detit. Por nëse përfshini aktivitetet si hiking, vozitje me kajak dhe mund të zgjeroni sezonin turistik jo vetëm gjatë sezonit veror dhe mund ta shtrini në të gjitha zonat.

Përpos kësaj, ju mund ta përfshini edhe në kurrikulat e shkollës, në mënyrë që të edukoni brezin e ri me dashuri ndaj mjedisit dhe natyrës. Pse të mos e mësojnë mësimin e biologjisë në vendin e tyre?

Në këtë mënyrë, edhe vendasit duhet të dinë se çfarë të sugjerojnë për zonën e tyre, pra të nxisin turizmin.
Gjithashtu, edhe në Tiranë keni burime të mrekullueshme natyrore që mund të shfrytëzohen edhe më shumë. Një shembull është edhe zona e Pëllumbasit.

Çfarë ndërhyrjesh mund të bëjë qeveria shqiptare për të nxitur turizmin e aventurës në vend?

Sikurse e thashë, ka grupe apo individë që po përpiqen të bëjnë të njëjtën gjë, të paorganizuar. Roli i qeverisë është që t’i bëjë këto grupe, të cilët operojnë në industrinë e turizmit vetëm, bashkë. Qeveria duhet të formësojë disa politika që njerëzit të dinë t’i ndjekin ato dhe të rrisin përfitimet e tyre ekonomike. Organizimi i industrisë së turizmit do të ishte një mënyrë e mirë për të vendosur ura komunikimi midis bizneseve të përfshira në këtë industri dhe qeverisë.

Si është sot në botë kërkesa për turizmin e aventurës dhe si mund të përfitojë Shqipëria prej saj?

Kërkesa për turizmin e aventurës është e lartë, ashtu si dhe për lloje të tjera të turizmit. Duhet kuptuar se cili është targeti dhe nëse targeti juaj janë turistët që kërkojnë aventurën duhen kanalizuar përpjekjet për të përfituar nga kjo kërkesë. Fokusi duhet të vendoset tek ekonomitë lokale dhe te vendasit, duke i fuqizuar ata. Ndoshta, një mënyrë mund të jetë ofrimi i trajnimeve të ndryshme, si për shembull si të përmirësojnë shërbimin ndaj klientëve. Duhet të ndihmojnë njerëzit që të kuptojnë industrinë e turizmit.

Në periferi të Tiranës ndodhet fshati i Pëllumbasit, ku çdo të diel organizohet pazari, ku shiten ushqimet tradicionale të zonës. Vendasit bëhen bashkë çdo të diel dhe në përgjithësi shkojnë shqiptarët, por kjo mund të zgjerohet edhe te të huajt. Kështu njerëzit fillojnë të pëlqejnë vendin e tyre, bëhen krijues dhe gjejnë mënyra se si të përfitojnë.
Pashë që njerëzit atje po shisnin mjaltë në rrugë. Me një paketim interesant mund të tërheqin turistët dhe të nxjerrin përfitimet e tyre ekonomike.

Paige Viren, eksperte e turizmit

Kreu studimet bachelor për Rekreacion dhe studimet master për Edukim dhe Studime në Turizëm në Universitetin Shtetëror të Bowling Green, si dhe doktoraturën në Universitetin Shtetëror të Miçiganit në Departamentin e Burimeve Turistike, Rekreacionit dhe Parqeve.

Kërkimet e Paige Viren bazohen mbi marketingun, komunikimin dhe sjelljen konsumatore lidhur me turizmin, me interes të veçantë te turizmi i aventurës dhe eko-turizmi, si dhe në zhvillimin e qëndrueshëm të komunitetit. Me një përvojë të gjatë në industrinë e turizmit, shpalos një qasje me vlerë për këtë industri. Znj. Viren ka punuar për organizatat Adventure Travel Trade Association (ATTA) dhe Konservimi Ndërkombëtar dhe ka kryer studime për kërkesën dhe ofertën në industrinë e turizmit.

Paige Viren ka punuar gjithashtu me komunitetet rurale me interes në zhvillimin e qëndrueshëm bazuar mbi turizmin, si një alternativë për të diversifikuar ekonominë rurale. Turizmi i qëndrueshëm, sikurse nënvizohet edhe nga Organizata Botërore e Turizmit, duhet të ketë një përdorim optimal të burimeve mjedisore, të cilat ndihmojnë që të ruhet trashëgimia natyrore dhe biodiversiteti, të respektohet origjinaliteti socio-kulturor i komuniteteve mikpritëse dhe të mundësonte përfitime socio-ekonomike për të gjitha grupet e interesit.
Turizmi i qëndrueshëm ka potencialin që të krijojë lidhje midis ruajtjes së natyrës dhe mirëqenies së komuniteteve lokale përmes përfitimeve si gjenerimi i të ardhurave, ruajtja e kulturës dhe kapaciteteve ndërtuese.

Eksperte në:
Sjellje konsumatore
Turizmin e aventurës
Zhvillimin e qëndrueshëm të turizmit
Marketingun e turizmit
Anketat studimore

Revista Monitor,  04.11.2017

Dëmtohet gjatë punimeve të një Hidrocentrali në Velçan, një segment rrugor i rrugës së vjetër “Egnatia” me gjatësi 80 m.

Policia e Pogradecit ka proceduar penalisht në gjendje të lirë administratorin e firmës private që po ndërton Hidrocentralin në Velçan për dëmtim të rrugës.

Sipas bluve, kompania gjatë punimeve për HEC-in ka dëmtuar një segment rrugor të rrugës së vjetër “Egnatia” me gjatësi 80 m.

Për këtë arsye është proceduar penalisht E.K, 51 vjeç, banues në Tiranë. Administratori i firmës private akuzohet për veprën penale “Shkatërrimi i rrugëve”.

“Procedimi ndaj tij filloi pasi ky shtetas duke qenë me detyrë administrator i një shoqërie e cila po kryhen punime për ndërtimin e një Hidrocentrali në Njësinë Administrative Velçan, (gjatë punimeve) ka dëmtuar një segment rrugor me gjatësi 80 m dhe gjerësi 1.5 m, e cila i përket rrugës së vjetër EGNATIA” sqaron policia.

Materialet i kaluan Prokurorisë të Rrethit Gjyqësor Pogradec, për veprime të mëtejshme.

Ora News,  16.10.2017

Unaza e Re, një pjesë e Laprakës, Pallatet Hawai, dhe ish Fusha e Aviacionit kanë mbetur pa energji elektrike pasditen e djeshme.

Sipas OSHEE shkak për këtë është bërë rrëshqitja e dheut në gropën e themeleve të një pallati, ku si pasojë është dëmtuar fidri 334 i nënstacionit të Selitës.

Për shkak të terrenet punimet për riparimin e dëmit dhe kthimin e energjisë zgjatën rreth 2 orë.

Shqiptarja.com  03.08.2017

Fshati Lure në Gjirin e Lalzit ka mbetur sot pa drita.

Shkak për këtë është bërë dëmtimi i  linjës së tensionit të mesëm pjesë e fidrit të F7 që lidh nënstacionin Sallmone me Gjirin e Lalzit.

Ky dëmtim i linjës erdhi si pasojë e rënies së një zjarri në zonën Hamallaj.

Grupet e OSHEE Durrës po marrin masat e nevojshme për rikthimin sa më shpejt të energjisë elektrike në zonë.

Shqiptarja.com  24.07.2017

Operatori i Shpërndarjes së Energjisë Elektrike, OSHEE, po ndjek me vëmendje situatën e furnizimit me energji elektrike, në kushtet rrjeti elektrik vijon të goditet nga institucione shtetërore dhe subjekte private, për të cilat kompania ka kryer kallëzim penal.

Kështu ditët e fundit, OSHEE është përballur me dëmtime të shumta të rrjetit elektrik, kryesisht nga ndërmarrja e ujësjellës-kanalizime, duke sjellë jo vetëm dëm në bazën materiale, por më e rëndësishmja, duke lënë pa energji elektrike abonentë në zona të ndryshme të Tiranës.

Si pasojë e punimeve nga Bashkia Kamëz në ujësjellës-kanalizime është dëmtuar tre herë brenda 5 ditëve sistemi elektrik i OSHEE, duke lënë pa drita Kamzën dhe zonën e Paskuqanit.

Tjetër rast, nga firma kontraktore 4AM, duke punuar për Unazën e Madhe, për llogari të Drejtorisë së Përgjithshme të Rrugëve, dëmtoi linjat e OSHEE duke lënë një pjesë të Kopshtit Botanik pa energji elektrike.

Dëme kanë shkaktuar edhe punimet e kryera nga Bashkia Tiranë apo Ujësjellës Kanalizime Tiranë.
Kështu, dy ditë më parë, 2 fidra pësuan dëmtime nga punonjës të ujësjellësit, duke lënë pa energji elektrike zonën pranë ish-Stadiumit “Qemal Stafa” dhe një pjesë të “Rrugës së Elbasanit”, ndërsa dëmi tjetër la pa energji zonën e Tiranes së Re, ish-bllokun, etj.
Tjetër rast, vjen nga Ujësjellës Kanalizime Tiranë, e cila la për afro 2 orë pa energji një pjesë të zonës së Liqenit të Thate dhe Saukut.

Çdo defekt apo dëmtim është bërë publik në media, ndërsa OSHEE ka marrë masat duke penalizuar dhe kallëzuar subjektet për dëmin material të shkaktuar.

OSHEE, i bën thirrje të gjitha kompanive private / palëve të treta, që për çdo punim, të njoftojnë paraprakisht kompaninë e shpërndarjes për tu njohur me azhurnimet e rrjetit. Gjithashtu, kompania ka bërë thirrje disa herë që për çdo punim, shoqëritë të njoftojnë në kohë për të patur prezencën dhe asistencën e inxhinierëve të OSHEE.

Për fat të kaq kjo nuk ndodh gjithnjë dhe pasojat kanë qenë të konsiderueshme, si në dëmin ekonomik të kompanisë për bazën materiale, ashtu dhe për imazhin e OSHEE në opinionin publik për ndërprerje të energjisë që nuk vijnë për shkakun tonë.

energjia.al  01.07.2016

Administratori Adrian Çela tha se OSHEE do të vendosë sanksione ndaj firmave private që do te dëmtojnë linjat elektrike.
Nga Lapraka ai denoncoi një tjetër rast të dëmtimin të linjave dhe aseteve të OSHEE nga kompani private që punojnë në projekte publike, dhe kjo situatë po bëhet permanente tashmë, gati alarmante.

“Dy ditë më parë denoncuam subjektin privat, “CoGet”, e cila po punon për Koperacionin Italian në sistemin e ujësjellësit, e cila dëmtoi linjat tona, duke lënë për mbi 3 orë banorët pa energji elektrike.
Po sot, e njëjta firmë, dy metra më tutja, ka dëmtuar sërish, në dy pika të ndryshme, linjën e tensionit të mesëm dhe linjën e tensionit të ulët, duke lënë 3500 abonentë pa energji elektrike në zonën e Laprakës.

Pasi na dëmtoi herën e parë, të shtunën, kompani na njoftoi me shkresë për suport nga ana e OSHEE, të cilën e ofruam dhe të Hënën nuk patëm asnjë problem, ndërsa ata kanë vepruar me projektin, por pa na njoftuar për më tej, dhe rezultati është ky që shihni, dëmtim i linjave tona në dy pika.

Problemi është se OSHEE është duke përballuar ditët e fundit me dëmtime të shumta:
• Vetëm në pesë ditët e para të muajit dhjetor 2016, kemi 6 dëmtime të linjave tona nga operatorë të tillë,
• Në muajin Nëntor për qytetin e Tiranës kemi 15 dëmtime të kryera nga kompani private për llogari të institucioneve publike.

Këto dëmtime, nuk sjellin vetëm kosto te linjat apo fidrat tanë, por zhvlerësojnë investimet tona, dhe më e rëndësishmja, tjetër kosto është se lënë pa drita abonentët familjarë dhe bizneset, për aq kohë sa duhet riparuar linja.

OSHEE, nga ana e saj i ka paraqitur këto raste në organet kompetente, por siç duket rezultati është i papërfillshëm. Për rastet e dëmtimeve, kemi thërritur policinë dhe më tej çështja kalon në prokurori, por këtu mbyllet hetimi.

Ka patur raste që kompani të ndryshme i kemi denoncuar 2-3 herë rresht, si “Salillari” apo “Albavia”, që kanë punuar për Unazën e Madhe ose të Kodra e Diellit, zona këto që janë kthyer në gangrenë për OSHEE dhe abonentët e saj, për shkak të dëmtimeve të shumta, duke lënë banorët për orë të tëra pa energji elektrike, edhe pse OSHEE ka investuar në ato zona.

Doja t’ju bëj me dije se, po marrim nisma ligjore dhe do t’ia propozojmë edhe Këshillit të Ministrave për të parashikuar sanksione të forta ndaj kompanive që dëmtojnë linjat tona, madje deri në konfiskim të garancive apo ndërprerje të energjisë elektrike të atyre institucioneve që financojnë këto punime.

Kjo pasi, jemi duke bërë investime, dhe nga ana tjetër po na dëmtohet imazhi, ku qytetarët me të drejtë ankohen, por nuk e dinë të vërtetën nga kush shkaktohen këto ndërprerje të energjisë elektrike.

Në lidhje me kompanitë private, për të evituar çdo dëmtim, po ribëj apel për të disatën herë, që të kontaktojnë OSHEE-në për çdo suport dhe mbështetje të mundshme, pasi nën prezencën tonë, me informacionin ku janë shtrirë fidrat, evitohet dëmtimi i kabëllit”, tha administratori i OSHEE-së Çela.

Revista Monitor,  07.12.2016

Operatori i Shpërndarjes së Energjisë Elektrike (OSHEE) shpreh shqetësimin e ngritur disa herë mbi fenomenin alarmant të dëmtimit të rrjetit shpërndarës, shkaktuar nga palë të treta, duke sjellë jo vetëm kosto financiare për kompaninë, por edhe mungesë të energjisë elektrike ndaj abonentëve, tjetër kosto kjo, më e madhe në lidhje me imazhin e kompanisë.

OSHEE i është drejtuar institucioneve përkatëse me denoncime në 9 raste vetëm gjatë kaq kohësh për kompani private, të cilët gjatë kryerjes së punimeve publike apo private kanë dëmtuar rrjetin elektrik duke sjellë për pasoje lënien pa energji me orë të gjata të abonentëve. Situata në fjale shfaqet problematike kryesisht në Tiranë.

energjia.al  07.11.2016

Nje firme private, duke punuar per llogari te Ujesjellesit ne Vlore demtoi sot rrjetin elektrik, duke lene pa drita nje pjese te zones prane Marines.

OSHEE, pasi mori njoftimin, nisi punen dhe riparoi defektin. Sakaq, kemi nisur hartimin e procesverbalit mbi demin e shkaktuar

Edhe nje here, me kete rast, u bejme thirrje kompanive te ndertimit, te puneve publike dhe private, te respektojne udhezimet teknike dhe planimetrine e vendosjes se linjave te OSHEE, per te evituar demtimin e linjave, te cilat sjellin per pasoje mungese te energjise elektrike.

Kompania shpreh ne cdo rast bashkepunimin per çdo projekt publik apo privat, per te bashkerenduar procesin ndertimin te x infrastrukture, per evituar demtimin e linjave.

energjia.al  06.07.2016

Nga 1 korriku kush thyen ose dëmton matësin e energjisë elektrike nuk do të ketë më drita. Është ky paralajmërimi i kryeministrit Edi Rama i bërë gjatë pajisjes me matësa për rrethin e Matit. Gjithashtu kryeministri paralajmëroi edhe heqjen e faturimit afrofe. Kreu i qeverisë, i shoqëruar nga ministri i Energjisë, Damian Gjinkuri si dhe kreu i OSHEE, Ardian Çela inspektuan vendosjen e matësave të fundit në rrethin e Matit.

“Ne jemi të angazhuar që t’i japim fund aforfesë. Jemi të angazhuar të çojmë matësin në çdo shtëpi dhe biznes që konsumon energji elektrike Por ta kenë të qartë të gjithë ata që kujtojnë se duke thyer matësin do ti shpëtojnë rregullit të përgjithshëm se kush thyen matësin nuk ka për të marrë energji elektrike nga 1 korriku dhe kush nuk pranon matësin, nuk do të marrë energji elektrike nga 1 korriku. Matësat janë pjesë e investimit të përbashkët. Paguhen me paratë e kontributeve të përbashkëta dhe janë domosdoshmëri, e para për të mos rënduar njerëzit me fatura aforfe dhe secili të paguajë atë që konsumon. E dyta për ti dhënë fund dhe për ti vënë pikë historisë që dikush paguan dhe dikush nuk paguan. Kjo histori për ne i takon të kaluarës. Kush do që të jetojë me të kaluarën, do të jetojë në errësirë, nuk do të ketë drita”, u shpreh Rama.

Me investimin prej 5 milion lekësh të realizuar nga OSHEE në linjën e shpërndarjes, 25 familjet e fshatit Gjinovec furnizohen me energji elektrike pas 15 vitesh. Ndërsa 15 familjet e fshatit Val-Martanesh të cilët vuanin nga mungesa e energjisë elektrike prej 17 vitesh, përfituan një investim prej 14 milion lekësh, që i riktheu ata në një situatë normale të furnizimit me energji. “Ky investim që po inspektojmë është me vlerë rreth 180 milion lekë të reja, po rinovojmë dhe ndërtojmë rreth 64 kabina të reja. Përmirësohet ndjeshëm cilësia e shërbimit, tensionet dhe ulen ndjeshëm humbjet. Në 2013, 14 milion lekë të reja investime, 44 milion në 2015.

Në tre fshatra që kishin mungesë energjie prej 15 vjetësh, përfundojnë investimet.

Kryeministri Rama inspektoi edhe minierën e Bulqizës, në qarkun e Dibrës. Tetëmbëdhjetë vjet pas braktisjes, një nga projektet e rëndësisë së veçantë për industrinë minerare, traverbanku i Klosit ka avancuar punimet, e rifilluara në gusht të vitit 2015, me mbështetjen që iu dha nga Ministria e Energjetkës dhe Industrisë.

Kryeministri Edi Rama, i shoqëruar nga Ministri i Energjetikës dhe Industrisë Damian Gjiknuri, ishte sot në minierën e Bulqizës, ku kompania po investon 5.8 milionë dollarë për zhvillimin e këtij projekti që përbën një hallkë të rëndësishme në ciklin e mbyllur prodhim-përpunim. Përmes tij, minerali do të transportohet nga niveli i pestë i minierës drejt impiantit të seleksionimit të kromit në Klos. Sipas drejtuesve të kompanisë, rëndësia primare në projekt është se shmnag përmbytjen e minierës dhe rrit sigurinë në punë.

“Është një investim prej 5.8 milionë dollarë që ka filluar në gusht të vitit 2015 është pjesë e kompleksit minerar të Bulqizës dhe qëllimi kryesor që ka është i shërben sigurisë në punë, eliminon një herë e mirë mundësinë e përmbytjes së minierës së Bulqizës, pra, sigurinë e jetës së njerëzve së pari. Paralelisht me zhvillimin e minierës së Bulqizës dhe të vendburimit të Qafë Buallit parashikohet që minerali i Bulqizës të transportohet me anë të një linje hekurudhore në impiantin e seleksionimit të Klosit, ku pasi të përpunohet të shkojë në uzinat e Ferro-kromit. Impianti i Klosit është gati, janë investuar rreth 1.2 milionë dollarë” – shpjegoi projektin drejtuesi i kompanisë.

Inxhinieri, i cili 18 vjet më parë ishte pjesë e punimeve për ndërtimin e traverbankut dhe sërish sot, me një ekip prej 60 vetash, i ka rinisur ato, e vlerësoi projektin me një rëndësi të veçantë për zhvillimin e minierës dhe të industrisë minerare. Kryeministri Rama vuri theksin tek rëndësia e investimeve që riaktivizimin e industrisë përpunuese, që i jep një vlerë të shtuar kësaj industrie. “Gjëja më e rëndësishme është se ne kalojmë në përpunim. Përpunimi rrit gjithë vlerën e shtuar dhe nga ana tjetër sjell edhe rritje punësimi, rrogash e mirëqenie”.

Shqiptarja.com  22.06.2016