info@energjia.al

U dënua me 11 vite burg nga gjykata penale e Tiranës për skandalin e borxheve të CEZ, Kastriot Ismailaj kërkon pafajësi në Apel.

ReportTv ka mësuar se Ismailaj ka depozituar ankim të dënimit të tij më 8 nëntor 2017 dhe pritet që gjykata e Apelit të caktojë trupën gjykuese.

Ismailaj u mor i pandehur më 23 dhjetor 2015, ndërsa pas 45 seancave ai u dënua me akuzën e mashtrimit me pasoja të rënda kryer në bashkëpunim dhe pastrim parash.

Shqiptarja.com  17.11.2017

Skandali CEZ bën bujë edhe në Çeki, teksa këtë të hënë gazeta më e madhe çeke, IDNES është hapur pikërisht me këtë ngjarje, ku thekson se hetimet kanë nisur edhe në Pragë.

Në artikull kjo gazetë investigon transfertën 6.8 mln euro të CEZ tek Nue Kalaj, shqiptari i Kosovës që u bë sekser i marrëveshjes mes qeverisë Berisha dhe kompanisë CEZ për privatizimin e OSSH.

Gazeta çeke flet për disa llogari bankare të Nue Kalajt, i cili ka tërhequr nga bankat kesh miliona euro pak kohe para zgjedhjeve të 2009.

Në shkrim theksohet se autoritetet shqiptare dhe çeke po hetojnë nëse paratë që iu dhanë Kalajit kanë përfunduar në xhepat e politikanëve shqiptarë.

Përfaqësuesit e CEZ kanë refuzuar të prononcohen për IDNES, për shkak të hetimit të policisë.

IDNES shkruan se çështja CEZ u ndikua në Shqipëri edhe nga zgjedhjet e fundit parlamentare, ndërsa i kanë marrë një prononcim edhe kreut të komisionit parlamentar hetimor të CEZ-it, Taulant Balla.

“Ne kemi kërkuar një shpjegim të pagesave për z. Kalaj, por kompania refuzoi” tha për thënë IDNES, Taulant Balla.

IDNES duke cituar Ballën, shkruan më tej se komisioni hetimor ka kërkuar dëshminë e disa drejtuesve të CEZ, ndërsa në shkrim i referohet dokumenteve të gjetura nga komisioni i drejtuar nga socialisti Balla.

Shqiptarja.com  17.11.2017

Kreu i grupit parlamentar të Partisë Socialiste, Taulant Balla, tha se për çështjen “CEZ” prokuroria “duhet të kishte marrë deklarimet e personave”, siç ishte vendimi i Kuvendit me 74 vota pro.

“Si ka mundësi që ka prokurorë që mendojnë se në vitin 2017 mund të mbyllet afera korruptive pa bërë asnjë hetim. Kush ua ka dhënë këtyre prokurorëve pushtetin që të sillen me drejtësinë si në pazar”, tha Balla.

“Kush janë këta që kanë tagrin të falin pa e hetuar aspak Sali Berishën për shpërdorim të detyrës, mashtrim, refuzim për të dëshmuar, të gjitha këto vepra penale”, shtoi Balla.

Top Channel,  09.11.2017

Avokati mbrojtës i ish-drejtuesve të CEZ, Josef Hejsek dhe Jan Ivan, kërkon në gjykatë pushimin e gjykimit penal ndaj tyre. Hejsek dhe Ivan gjykohen në mungesë për dëm të konsiderueshëm në buxhetin e shtetit të shkaktuar nga kompania çeke pas privatizimit të OSSH-së në vitin 2009.

Avokati Arben Rakipi ka deklaruar gjatë seancës së sotme se “shteti shqiptar po del gënjeshtar, pasi sipas tij marrëveshja mes shtetit shqiptar dhe CEZ në pikën 12 të saj përjashton nga ndjekja penale personat dhe ish-drejtuesit e CEZ”.

Nga ana tjetër, prokurorja Antoneta Sevdari ka sqaruar se është Prokuroria ajo që vendos për ndjekjen penale. “Të drejtën për ndjekje penale e ka Prokuroria dhe asnjë institucion tjetër”.

Për t’u shprehur për këtë kërkesë të avokatit mbrojtës Arben Rakipi, gjyqtari Sokol Toma ka vendosur datën 16 nëntor ku do të shprehet me vendim, nëse do të pushohet apo jo çështja ndaj tyre.

Shqiptarja.com  01.11.2017

Prokuroria e kryeqytetit kërkon 15 vite burg për ish-administratorin e kompanisë DIA, Kastriot Ismailajn, ndërsa i janë konfiskuar rreth 4.5 milionë euro të cilat kalojnë në favor të shtetit.

Shumat e konfiskuara, të gjetura në disa llogari bankare, janë 3,215,176 dollarë, 938.868 dollarë, 452 160 euro, 1028 euro si dhe 12 360 000 lekë.

Ai akuzohet për tre vepra penale, mashtrim me pasoja të rënda me borxhet e CEZ, rreth 5 milionë euro, pastrim parash dhe falsifikim dokumentesh.

Ismailaj nuk ka qenë i pranishëm në seancën gjyqësore kur është dhënë pretenca nga organi i akuzës, ndërsa përfaqësohej nga avokati.

DIA kishte nënshkruar dy kontrata me kompaninë çeke CEZ për identifikimin dhe mbledhjen e borxheve nga debitoret ndërsa pas përplasjeve përfundoi në gjyq, pasi prokuroria e akuzoi për mashtrim.

Pas pretencës pritet vendimi i gjykatës për dënimin e ish-administratorit te kompanisë DIA, Kastriot Ismailajn.

Kërkesa e Prokurorise së Tiranë:

1. Deklarimin fajtor të të pandehurit Kastriot Ismailaj për veprën penale të “Mashtrimit me pasoja të rënda” të parashikuar nga nenei 143/3 të Kodit penal ( të ndryshuar me ligjin nr.36 të vitit 2017) dhe dënimin e tij me 10 vjet burgim;

2. Deklarimin fajtor të të pandehurit Kastriot Ismailaj per veprën penale të “ pastrimti të produktreve të veprës penale të parashikuar nga neni 28/2 të Kodit Penal dhe denimin e tij me 8 vjet burgim;

3. Nё bashkim tё dёnimeve i pandehuri Kastriot ismailaj tё dёnohet me 15 vite burgim;

4. Shuma 3,215,176 $ dhe 451.132 Euro te sekuestruara prane bankes Credit Agricole, si dhe shuma 938.868 $, 1028 Euro si dhe 12.360.000 lek, prane Bankes Venetto, nё llogaritё e shoqёrisё “Adriatic Development Corporation Ltd” me NIPT K71319002B tё konfiskohen dhe tё kalojnё nё favor tё shtetit.

Si vepronte skema e mashtrimit
Nga provat e administruara gjatë gjykimit të këtij proçedimi penal rezultoj plotësisht e provuar, se i pandehuri Kastriot Ismailaj, nёpërmjet gënjeshtrës dhe paraqitjes së dokumentave fiktive, në bashkëpunim me të bashkë të pandehurit e tjerë ka krijuar një mekanizën të tërë fiktiv, nëpërmjet të cilit ka bërë të mundur vjedhjen e shumës 649, 803, 520 lekë, nga shoqëria “Çez Shpërndarja”, në vitet 2010-2011.

Një pjesë të parave të  vjedhura me anё tё mashtrimit nga shoqëria “Çez Shpërndarja”, i kanë kaluar subjekteve të tjera me fatura fiktive për punë apo shërbime të cilat nuk rezultojnë të jenë kryer,janë përdorur apo   investuar(si psh vendosja nё depozitё) nga i pandehuri Kastriot Ismailaj. Gjithashtu i pandehuri Kastriot Ismailaj ka kryer  transaksionet financiare nё shoqёrinё “Adriatic Development Corporation ltd” sh.pk, me qëllim për të fshehur dhe mbuluar  natyrën e paligjshme të parave pёr tё cilat arrihet nё konkluzionin që vijnë nga veprimtari tё paligjshme kriminale. Ai duke i copëzuar shumën e transferuar në këtë shoqëri (kryerjes së transfertave në shuma të vogla) ka kryer transferimin e këtyre parave me qëllim fshehjen dhe mbulimin e origjinës së tyre të paligjshme.

Ismailaj, Matajt: Ti bëj letra, të tjerat mendoj unë

cez-shperndarjeI pyetur rreth fakteve objekt hetimi shtetasi Elvis Mataj me detyrё drejtor ekzekutiv pranё DIA ka deklaruar në gjykatë se: “…DIA ka arritur numrin maksimal tё stafit prej 115 personash nё muajin dhjetor tё vitit 2010. Nga tё cilët mbi 20 veta ishin pjesё e administratës nё qёndёr dhe pjesa tjetër drejtues dhe punonjës terreni, por ata nuk morën as makina as karburant, as mjete pune. Nё dy muajёt e parё disa nga punonjёsit punuan me automjetet karburantin dhe mjetet dhe paisjet e tyre, me idenё e kompesimit tё mёvonshёm, por kjo nuk ndodhi asnjёherё.

Numri simbolik i punonjёsve, mungesa totale e logjistikёs, mungesa e urdhёrave dhe udhёzimeve e metodologjisё sё punёs nga drejtoria qёndrore e Dia-se, nuk justifikonin nё asnjё mёnyrё dhe anjё rrethanё realizimin e detyrimit qё ishtё marrё pёrsipёr tё kryhej nga DIA…”. Nё vazhdim tё deklarimit tё tij ky shtetas ka shpjeguar se: “…Kastriot Ismailaj donte vetёm tё prodhonte letra si provё pёr tё justifikuar punёn e identifikimit tё debitorёve por jo tё kishte si synim qё tё bёnte ndonjё pёrpjekje pёr tё identifikuar debitor e mbledhur borxhe apo tё shpenzonte para pёr kёtё qёllim…”. Ai disa herё pёrcolli tek unё mesazhin: “…Ti prodho letra dhe pёr pjesёn tjetёr merren unё…”.

Rrëfimi i punonjësve: Na u dha një kompjuter

Dëshmimtarët  Ardian Suku,  Xhezmi  Haliti, Ilir Shabani, Filton Kiri, Edmond Laci, Oligert Kume, Sokol Hysenaj  deklaruan përpara gjykatës në mënyrë të përmbledhur , se ata ne  ditët e para të punës ( punë që ka filluar nga muaji tetor – nentor 2010 )  punuam sa mundën  me mjetet  e tyre  dhe bёmё diçka me shpresё se do  t’u jepeshin  jepnin mjete, paisje zyra dhe do tё na mbulonin shpenzimet qё do tё bёnim pёr punёn. Por në fakt  iu dha   vehtёm njё zyrё brenda nё Çez, njё kompjutёr njё tavolinё pune dhe kёto tё Çez-it dhe asgjё tjeter.

As makina as paratё e naftёs dhe as para për nevoja të tjera pune. Meqёnёse nuk u mbёshteten fare me mjete llogjistike puna u zbeh fare pas dy ose tre muaj.  Ata deklaruan se bënë aq sa mundën pёr shkak tё kapaciteteve tё vogla, nё njёrёz mjete dhe pasije, mё pas takohehsin nёpёr kafe, bisedonin me njёri tjeterin, kёrkonin  pasije mjete zyra ato nuk na jepeshin dhe atёhere çtё bёnin rrinin”.

Zbardhen E-mailet: Si kordinoheshin Ismailaj-Hejsek

Sipas prokurorisë së Tiranës i pandehuri Josef Hejsek,njoftonte   tё pandehuritn Kastriot Ismailaj, për çcdo shkresë që vinte nga Prokuroria e Tiranës. Në vitin 2011, mbi dyshimet e ngritura nga organet ligjzbatuese, Prokuroria filloi verifikimet mbi paratë e përfituara nga shoqëria “DIA” që kishin si burim shoqërinë “Cez Shperndarje”. Në këtë kuadër, Prokuroria dërgoji një kërkesë në CEZ, për marjen e informacionit tek shoqëria “Cez Shpërndarje”. Josef Hejsek, menjëherë kërkesën e bërë nga Prokuroria e Tiranës, ia dërgoji me e-mail Kastriot Ismailaj duke i kërkuar që ai ta verifikonte kërkesën.

Ai i premtoi Kastriotit se ata do të proçedonin me kthimin e përgjigjes nё Prokurori vetëm atëherë kur ata të binin dakort së bashku. Gjithashtu Prokuroria nisi një kërkesë të dytë atë me nr.2700 prot datë 20.05.2011, në të cilin kërkonte të dhëna mbi transaksionet financiare dhe arsyet e ketyre transaksioneve. Josef Hejsek kreu të njëjtin veprim  përsëri informoi Katriot Ismailaj me email-in e datës 1 qershor 2011 ora 5:18 minuta,duke shkruar:

“Kjo kërkesë e re sot. Kush është opinioni juaj. Unë mendoj se nuk kemi shumë për të fshehur tani. Ata mund të vijnë dhe të sekuestrojnë kontratën dhe mund të kërkojnë më shumë dhe ky nuk është qëllimi ynë…”. Kastriot Ismailaj në bashkёpunim me të pandehurin Josef Hejsek ka paraqitur para kёshillit Mbikqyrёs tё shoqërisë “Cez Shperndarje” një sërë faktesh të pavërteta( të gënjeshtra). Paraqitja e këtyre të dhënave ka bërë të mundur miratimin e kontratës, me qёllim justifikimin e kalimit tё parave për një punë e cila nuk u krye, sepse palёt nuk patёn asnjёherё si qёllim kryerjen e punёs por vetёm vjedhjen e parave.

Shqiptarja.com  28.09.2017

Eksperti ligjor i OSHEE-së, Romeo Kara paralajmëron se do të zbulojë një skandal të madh me përmasat e çështjes “CEZ”.

Kara njofton në faqen e tij të Facebook se së shpejti do të nxjerrë në pah prova dhe fakte tronditëse ku thotë se janë të përfshirë “oligarkë, të djeshëm e të sotëm, disa drejtues të CEZ, dhe që kanë vjedhur nëpermjet mashtrimit, jo më pak se 19 milionë dollarë”.

Juristi e cilëson skandalin që do të bëjë publik një “uragan” në drejtësi.

Paralajmërimi

Uragani “Irma” po iken, por nje uragan tjeter hapjesh aferash korruptive do te kaloje tek ne.

Duke pritur deri sa te kostituohet qeveria, pasi nuk duam t’i marrim rendesine ketij akti, do te bej prezent nje afere te ngjashme me ate te DIA-CEZ, ku jane perfshire disa oligarke, te djeshem e te sotem, disa drejtues te CEZ, dhe qe kane vjedhur nepermjet mashtrimit, jo me pak se 19 milione dollare.

Do te jap prova e fakte si dhe argumentimet e mija, se kontratat e mbledhjes se borxheve, ishin qoka politike shumengjyreshe, te lidhura edhe me ndikimin e paligjshem ndaj ERE-s, lidhur me vendimet famekeqe te saj, te vendosjes se cmimit te energjise ne favor te CEZ-it dhe ne disfavor te Shtetit Shqiptar, duke bere qe pasojat dhe demet reale te ketyre kontratave te jene shume me teper se 19 milione dollare.

Do te bej prezente per publikun cdo kontrate dhe cdo pagese, si dhe personat pergjegjes ne lidhje per sa me siper.

Prokuroria te veproje si te doje, pasi une se pari, po i drejtohem atij qe eshte realisht i demtuar, populli.

Shqiptarja.com  12.09.2017

Emri i Shkëlzen Berishës në lidhje me historinë e privatizimit të OSSH nga qeveria ‘Berisha’ dhe kompania çeke ‘CEZ’ u lakua për herë të parë nga juristi i OSHEE, Romeo Kara, i cili u shndërrua në dëshmitarin kyç që zbardhi prapaskenat e privatizimit abuziv, me një kosto 400 milionë euro për buxhetin e përbashkët të shqiptarëve.

Konkretisht, gjatë seancës së komisionit hetimor për çështjen CEZ, në nëntor të vitit 2016, Romeo Kara tha se mund të kishte lidhje mes Shkëzlen Berishës dhe sekserit Nuel Kalaj, por dëshmitari ka deklaruar se nuk kishte dokumente për këtë pretendim.

Ka pasur lidhje të forta me kryeministrin e atëhershëm. Ka takuar ministrin Genc Ruli. Ka edhe fotografi të tij me Genc Rulin.

Thuhet se ka telefonuar mbi 100 herë ish-kryeministrin Berisha. Nuk është vetëm një e-mail, por janë disa e-maile që unë kamë gjetur, të cilat konfirmojmë që ky person merrte përsipër për të negociuar mes shtetit shqiptar dhe CEZ. Tarifa e suksesit për këtë marrëveshje ishte 3.6 milionë euro, e vendosur në mënyrë të çuditshme për t’u paguar nga ana e fituesit, që ishte CEZ. Thuhet në këtë letër që ky person, në vitin 2011, ka pasur në llogari të tij, 3.6 milionë euro. Thuhet se ka pasur lidhje edhe me të birin e kryeministrit, por nuk ka materiale të plota për këtë”, ka deklaruar Kara para komisionit hetimor.

Dokumenti
Ka një dokument i cili ishte vendimtar që komisioni hetimor për çështjen CEZ të investohej për të hetuar rolin e Shkëlzen Berishën në procesin e privatizimit si dhe të vendoste për ta thirrur ata si dëshmitar.

Bëhet fjalë për një e-maili të ish-drejtorit të CEZ në Shqipëri, Josef Hejsek, i cili i shkruante nëndrejtorit të CEZ-it në Pragë, Tomas Pleskac, rreth takimit të planifikuar me Shkëlzenin dhe ish-kryeministrin Berisha. Sipas e-mailit, Josef Hejsek ishte me Nuel Kalajn në sallën VIP të aeroportit të Rinasit, dhe kishte ardhur në Tiranë për të negociuar me Shkëlzen Berishën dhe Sali Berishën.

Nga përmbajtja e e-mailit del qartë se, Nuel Kalaj është negociatori kryesor i marrëveshjes mes CEZ dhe qeverisë shqiptare.

Me Nuelin sapo mbarova negociatat e tjera. I shpjegova në detaje se çfarë kërkojmë. Takimi me të birin, sipas Nuelit, është shtyrë për nesër pas ardhjes së PM (Kryeministrit). Çfarë duhet të presim nga kryeministri? Sipas Nuelit rezultatet në mënyrë të sigurt do të jenë pozitive dhe në 90 % konkrete. Ai më siguroi se për kryeministrin po punon një komision ndërministror, i cili në mënyrë të specializuar po trajton problematikën tonë. (Mund t’ju konfirmoj që kam folur me disa anëtarë të komisionit që po merren me këtë marrëveshje)”,shkruan Hejsek.

Komisioni hetimor
Komisioni hetimor administroi një llogari bankare të Nue Kalajt, i cili ka marrë nga CEZ transferta bankare mbi 7 milionë euro. Këto shuma i ka tërhequr cash me 16 qershor 2009, vetëm pak ditë para zgjedhjeve të vitit 2009.

“Komisioni hetimor për privatizimin e OSSH tek CEZ ka administruar prova shumë të rëndësishme lidhur person Nuel (Nue) Kalaj i cili sipas dëshmive të deritanishme ka qenë “sekseri” i martesës së qeverisë shqiptare të Sali Berishës me kompaninë CEZ. Komisioni ka administruar llogari bankare të Nue Kalaj, i cili ka marre nga CEZ transferta bankare mbi 7 milionë euro. Dhe këto shuma më pas i ka tërhequr cash me 16 qershor 2009, vetëm pak ditë para zgjedhjeve të vitit 2009. Komisioni po heton pse CEZ i ka bërë këto transferta tek ky individ dhe ku i ka çuar paratë cash Nue Kalaj, mik i ngushtë i djalit të Sali Berishës, Shkëlzen Berisha”, ka deklaruar ish-kryetari i komisionit hetimor, Taulant Balla.

Privatizimi i OSSH, 5 dëshmi kontradiktore

1. Dëshmia e Rome Karajt
“Thuhet se ka pasur lidhje edhe me të birin e kryeministrit, por nuk ka materiale të plota për këtë”.

2. E-maili i Josef Hejsek për Tomas Pelskac
“Do të të pres ty me Nuelin në aeroport, në sallonin VIP. Me Nuelin sapo mbarova negociatat e tjera. I shpjegova në detaje se çfarë kërkojmë. Takimi me të birin, sipas Nuelit, është shtyrë për nesër pas ardhjes së PM (Kryeministrit). Çfarë duhet të presim nga kryeministri? Sipas Nuelit rezultatet në mënyrë të sigurt do të jenë pozitive dhe në 90 % konkrete. Ai më siguroi se për kryeministrin po punon një komision ndërministror i cili në mënyrë të specializuar po trajton problematikën tonë. (Mund t’ju konfirmoj që kam folur me disa anëtarë të komisionit që po merren me këtë marrëveshje). Rezultatet e tyre nuk janë akoma të mbaruara apo përfundimtare. Ai më siguroi se përfundojnë shpejt dhe pas kësaj do ulemi sërish. Si përfundim, sapo detajet e negociatave do jenë gati, do të fitojmë MR në Tiranë (Martin Roman). Gjithë të mirat”.

3. Reagimi i Shkëlzen Berishës
“Në serinë e re të shpifjeve papagalli i Ramës flet mbi një takim që do duhej të ndodhte mes meje, drejtorëve të CEZ dhe z. Kalaj. E përsëris që nuk kam asnjë lidhje me z. Kalaj dhe aktivitetin e tij. Nuk kam pasur asnjë kërkesë për një takim të tille. Ky takim nuk ka ndodhur kurrë. Falsiteti i këtij takimi mund të provohet lehtësisht duke pyetur personat e përmendur. Është thjesht shpifja e radhës që i serviret publikut nga shpifësi Ramës”.

4. Varianti i Nuel Kalajt
“Me Shkëlzen Berishën nuk kam asnjë lidhje. Nuk i kam premtuar askujt organizimin e takimeve me të. Me ish-kryeministrin Berisha jam takuar si pjesë e delegacionit të CEZ-it kur ata kanë ardhur në Tiranë. E gjithë veprimtaria ime ka qenë në përputhje me ligjet e Shqipërisë dhe Çekisë ku zhvillon aktivitetin e saj kompania CEZ. Nuk kam negociuar, po kam pasur një kontratë për të mbledhur informacionet e nevojshme për nevojat që kjo kompani kishte në Shqipëri. Paratë i kam tërhequr nga banka për qëllime investimi dhe drejtime te tjera”.

5. Varianti i Sali Berishës
“Ke çuar mesazh tekstual (i drejtohet ministrit Gjiknuri) se ekziston firma e Shkëlzen Berishës mbi një letër të Nua apo Noel Kalaj dhe të një tjetri që quhet Merxhani dhe unë të ktheva përgjigje që ta dërgoje menjëherë në prokurori, përndryshe do të paditesh ti në prokurori për dy gjëra: për 100% falsifikim dokumentesh, se ai është falsifikim dhe së dyti, për shantazh dhe përpjekje të tjera. Çoje në prokurori dhe nuk të them asgjë! Kaq! Po nuk e çove në prokurori, ti do të jesh i paditur dhe absolutisht je i pashpresë dhe do të humbasësh se ai është një falsifikim i mirëfilltë. Për sa i përket marrëveshjes që do të shpëtosh, ja ku e ke përgjigjen më qesharake”.

Shqiptarja.com  15.07.2017

Policia çeke dhe autoritetet shqiptare po shqyrtojnë korrupsionin e dyshuar që përfshin kompaninë çeke të energjisë CEZ, njoftuan sot mediat çeke që iu referuan gazetës vendase “Mladá fronta Dnes”.

Hetimi është përqendruar në pretendimin se CEZ ka transferuar rreth 7 milionë euro në llogarinë e një lobisti shqiptar në vitin 2009, pak pasi mori kontrollin e kompanisë së shpërndarjes së energjisë në Shqipëri.

Mediat çeke pohojnë se policia lokale beson se paratë mund të jenë përdorur më vonë si rryshfete për politikanët dhe zyrtarët shqiptarë.

Shkrimi i plotë në gazetën Mladá fronta Dnes”, thotë se transaksioni bankar i kompanisë më të fuqishme çeke CEZ po shqyrtohet nga autoritetet shqiptare dhe policia çeke mbi dyshime serioze për korrupsion.

CEZ dërgoi rreth 200 milionë koruna në Ballkan (7 mln euro). Sipas mediave çeke  autoritetet shqiptare konsiderojnë se paratë më vonë u përdoren për ryshfete për politikanët dhe zyrtarët. Rasti po shqyrtohet nga dedektivët çekë, zbuloi gazeta MF DNES.

Gazeta çeke pohon se, autoritetet shqiptare dhe policia çeke janë gjithashtu të interesuara përse CEZ ka dërguar në Shqipëri shtatë milionë euro në vitin 2009 në epokën e ish shefit të Çekosllovakisë, Martin Romano. Mediat çeke thonë se, paratë shkuan në llogarinë private të lobistit të Kosovës Nue Kalaja.

“Policia u kthye tek ne duke na pyetur për këtë transaksion tetë-vjeçar të bankës. Duke pasur parasysh faktin se çështja është në hetim, ne nuk mund të komentojmë detajet. Megjithatë, si gjithmonë, ne japim sinergji të plotë,” zëdhënësi i CEZ Ladislav Kříž konfirmoi.

Mediat çeke referojnë se, autoritetet shqiptare dyshojnë se paratë e përdorura për ryshfet për politikanët dhe zyrtarët lokalë kanë ndodhur pasi Grupi CEZ mori përsipër distributorin shqiptar të energjisë.

CEZ u tërhoq nga Shqipëria tre vjet më parë pasi marrëveshja përfundoi në gjykatat e arbitrazhit dhe shkaktoi fërkime midis Pragës dhe Tiranës, përfundon artikulli i gazetës çeke.

Revista Monitor,  29.06.2017

Juristi i OSHEE, Romeo Kara, njeriu që zbërtheu prapaskenat privatizimit korruptiv të OSSH, me kosto 450 milionë euro, rrëfen detaje të tjera rreth lidhjeve të ish-drejtuesve të CEZ dhe njerëzve pranë pushtetit të Sali Berishës.

Gjatë një interviste për Shqiptarja.com, Kara thotë ish-drejtori i CEZ-SHPERNDARJE, Jozef Hejsek banonte në shtëpinë e Berishës së vogël, kur punonte në Tiranë. Romeo Kara pohon gjithashtu se pas denoncimit të aferës, në adresë të tij kanë ardhur kërcënime.

Ai thotë se jeta e tij dhe e familjes janë në rrezik. Kara deklaron se fotografia e tij është gjetur në qelinë e burgut 302, duke hedhur dyshime për një plan të mundshëm eliminimi, me porosi. Po ashtu, dëshmitari kyç i çështjes CEZ thotë se kohë më parë bashkëshortja dhe vajza e tij kanë pësuar një aksident, duke hedhur dyshime për aksident të qëllimesh. Romeo Kara thekson se ka njoftuar përfaqësitë diplomatike dhe organet ligjzbatuese.

Shqiptarja.com  19.06.2017

Prokuroria e Përgjithshme ka hapur dosjen ‘CEZ’, referuar nga juristi i OSHEE, Romeo Kara, mbi prapaskenat e privatizimit abuziv të OSSH, tërësinë e shkeljeve të legjislacionit në fuqi, favorizimet, dëmin ekonomik, mbi sekserët, zyrtarët e implikuar, e-mailet komprometuese, letrat, raportet etj.

Teksa e gjithë vëmendja është zhvendosur tek ngërçi politik, organi qendror i akuzës ka marrë në shqyrtim kallëzimin e ‘nxehtë’ penal, i cili ngarkon me përgjegjësi ish-kryeministrin Sali Berisha, disa ish-ministra, ish-zëvendësministra, ish-drejtorë dhe sekserin Nuel Kalaj.

Në kuadër të verifikimit të dokumenteve dhe provave të dosjes, Shqiptarja.com ka mësuar se Prokuroria e Përgjithshme ka thirrur dëshmitarin kyç Romeo Kara, për të dhënë një dëshmi më të plotë, të detajuar dhe të thelluar.

Dy seancat e para kanë zgjatur disa orë, ndërsa priten edhe disa seanca të tjera, në ditët në vijim. Sipas burimeve, gjatë dy seancave maratonë, juristi i OSHEE, Romeo Kara, ka dhënë shpjegime të shtuara mbi provat e paraqitura rreth privatizimit abuziv të OSSH, i cili u ka shkaktuar taksapaguesve shqiptar një dëm ekonomik prej 450 milionë euro.

Kara, gjatë pyetjeve në prokurori, i është përmbajtur dëshmisë së dhënë para komisionit hetimor parlamentar për investigimin e privatizimit të OSSH-së nga qeveria ‘Berisha’ dhe kompania çeke ‘CEZ’. Juristi i OSHEE u është përmbajtur gjithashtu të gjitha deklarimeve rreth rolit të ish-kryeministrit dhe të 15 ish-zyrtarëve në procesin e privativit. Nëse prokuroria do të thellojë hetimet dhe të çojë dosjen në gjykatë, dëshmia e Karajt pritet të jetë një nga pikat më të forta për ndëshkimin e të akuzuarave.

Ndërkaq, për fatin e dosjes në fjalë ka edhe një interesim nga faktori ndërkombëtar. “Unë kam pasur takime me disa përfaqësues të ambasadave të ndryshme në Tiranë. I kam informuar ato në detaje për këtë çështje dhe jam më se i bindur se ato i kanë vlerësuar drejt ato çfarë unë paraqita dhe thashë. Fakti që janë realizuar këto takime me këto ambasada, shpreh interesimin e tyre për këtë çështje. Megjithatë ata vlerësojnë shumë rolin e vetë shqiptarëve në këto momente”, ka theksuar Kara.

Akuzat
Referuar dosjes së dorëzuar në prokurori, protagonistët e privatizimit të OSSH akuzon për konsumimin e pesë veprave penale. “Mbi bazën e këtyre të dhënave që pasqyrohen edhe në dokumentacionin e sipërpërmendur, rezulton se ndodhemi përpara fakteve dhe provave të pakundërshtueshme se personat e lartpërmendur kanë konsumuar elementët e veprave penale “Shpërdorimi i detyrës”, “Shkelja e barazisë së pjesëmarrësve në tendera apo ankande publike”, “Mashtrimit”, “Ushtrimi i ndikimit të paligjshëm ndaj personave që ushtrojnë funksione publike”, “Pastrim i produkteve të veprës penale ose veprimtarisë kriminale”, vepra penale këto të parashikuara nga nenet 143, 245/1, 248, 258 dhe 287 të Kodit Penal”, thuhet në kallëzimin penal.

Lista e të kallëzuarave

1. Z. Sali Berisha (Ish Kryeministër)
2. Z. Nuel (Nue) Kalaj, sekser
3. Z. Genc Ruli (Ish Ministër i Ekonomisë, Tregtisë dhe Energjetikës/Kryetar i Komitetit të Konsulencës dhe Transparencës).
4. Znj. Mimoza Vokshi (Anëtare e Grupit të Negocimit/Ish Drejtor i METE)
5. Znj. Suzana Guxholli, Ish-Këshilltare e Kryeministrit Berisha
6. Z. Neritan Alibali, (Ish Zv. Ministër i METE/Kryetari i Grupit të Negocimit me CEZ dhe Kryetar i Komisionit të Vlerësimit të Ofertave)
7. Z. Alfred Rushaj (Ish Zv. Ministër i Financave/ Anëtar i Grupit të Negocimit me CEZ).
8. Z. Fatjon Tugu (Anëtar i Grupit të Negocimit me CEZ/ Anëtar i Komisionit të Vlerësimit të Ofertave)
9. Z. Sherefedin Shehu (Anëtar i Grupit të Negocimit me CEZ)
10. Z. Asllan Sherra (Anëtar i Grupit të Negocimit me CEZ)
11. Z. Viktor Gumi (Anëtar i Grupit të Negocimit me CEZ)
12. Z. Miran Kopani (Anëtar i Grupit të Negocimit me CEZ)
13. Z. Bujar Nepravishta (Ish Kryetar i ERE)
14.  Z. Durim Kraja (Ish Sekretar i Përgjithshëm i METE/Anëtar i Komisionit të Vlerësimit të Ofertave).
15. Z. Engjell Qorlaze (Anëtar i Komisionit të Vlerësimit të Ofertave)
16 . Z. Vasil Pano (Anëtar i Komisionit të Vlerësimit të Ofertave)

Shqiptarja.com  18.05.2017