info@energjia.al

Përfaqësuesi ligjor i OSHEE-së në Arbitrazhin Ndërkombëtar dhe dëshmitari i mbrojtur i Drejtësisë, Romeo Kara, rrëfen në mënyrë të detajuar atë çka ndodhur me privatizimin e CEZ dhe vjedhjet që janë bërë gjatë atij procesi.

Duke folur për ‘DITA’, ai thotë se do i shkoj këtij skandali deri në fund për të gjetur hajdutët e parave të shqiptarëve.

Edhe pse i rrezikuar, Kara shprehet se nuk tërhiqet. Ai flet për rolin e Nuel Kalajt, Sali  dhe Shkëlzen Berishës.

Romeo, ditët e fundit keni qenë në qendër të vëmendjes për shkak të skandalit që keni denoncuar. Përse iu futët kësaj rruge duke ditur rreziqet që paraqiten në një vend si yni?

Frika prej nevojës i ka ngurtësuar njerëzit dhe të ndiejnë se janë të huaj në këtë tokë, në vendin e tyre, prej vetes së tyre dhe mbi të gjitha prej punës së ndershme. Kjo frikë si dhe të gjitha llojet e frikërave kanë qenë dhe janë aleatët më të mirë të pushtetarëve hajdutë të këtij vendi. Minimumi njerëzit kanë frikë për vendin e punës për të mos thënë pastaj për frikën për jetën. Provat janë dhënë se pushtetarët tanë janë përdorues të çdo mjeti për pasurimin e tyre si dhe ruajtjen e kësaj statukuoje, ku i pasuri nuk ndalet në pasurimin e tij dhe i varfri gjithashtu në mjerimin e tij. Kjo lloj varfërie dhe ky lloj sistemi i ka ndrydhur të gjitha virtytet, dhe ka rritur cmirën dhe barbarizmin. Pra, thënë më troç, jemi në pikën ku sistemi nuk po funksionon më. Ky sistem mund të jetë i pranueshëm për ata që e mjelin, por jo për ata të cilët i vuajnë pasojat. Unë i përkas asaj shtrese që i vuan pasojat e këtij sistemi, ku plotësimi i nevojave të popullit nuk shihet si detyrë e pushtetarit, por si bamirësi e tij ndaj popullit. Pra janë shembur kolonat kryesore të shoqërisë, një nga të cilat është drejtësia. Drejtësia tek ne është ngushtuar vetëm brenda një rrethi, i cili mund ta interpretojë atë dhe të përfitojë prej saj. Frika e cila mbështetet dhe rritet në mungesën e drejtësisë është aleati më i mirë i çdo lloj keqbërësi.

Dy janë alternativat për ata që duan të jetojnë në normalitet dhe qytetari: të braktisin këtë vend; apo ta ndryshojnë këtë vend. Unë kam zgjedhur të dytën, se të parët janë shumë dhe për më tepër i përkasin karakterit të pesimistëve. Unë mendoj se vendin tim të marrë peng prej politikanëve kusarë, ma kanë lënë të parët e mi, dhe është detyra ime si qytetar t’i kthej dinjitetin vendit tim, me aq sa unë kam mundësi. Është detyrë morale e çdo qytetari që sot të qëndrojë ballë për ballë me shpërdoruesit e të gjitha llojeve të cilët kanë sunduar përgjatë gjithë kohës tek ne. Kjo bëhet duke hedhur poshtë frikën për t’u shprehur si dhe atë për të vepruar. Njerëzit përgjithësisht nuk janë të lirë në zgjedhjet e tyre, pasi është frika ajo që i mban peng ata. Frika nga gjithçka.

E kam studiuar gjatë konceptin e riskut dhe të fitimit, dhe mund të them me bindje se: ku ka rrisqe të larta ka edhe fitime të larta, pra pa rrezikuar nuk do të fitojmë asgjë. Unë i përkas atyre njerëzve që nuk kanë shumë arsye për t’u frikësuar pasi dhe nuk kemi se çfarë të humbim. Nuk është ndonjë qamet i madh se humbëm këtë “parajsën” e fajdexhinjve, gangsterëve deputetë, prostitutave, gjykatësve milionerë, e dreqit dhe të birit, të cilët e kanë kaluar çdo kufi talljeje dhe poshtërimi karshi nesh.

Njerëzit përgjithësisht thonë me vete dhe me njëri-tjetrin: pse nuk po del kush të ndryshojë këtë realitet prej ferri? Një ditë unë i bëra pyetjen vetes, nëse ti nuk ngrihesh, me çfarë të drejte do kërkosh që këtë ta bëjë dikush tjetër? Edhe pse shoqëria është e molepsur, ku palaçot krekosen dhe të ndershmit që vuajnë, prapë duhet të kuptojmë se zgjidhja jemi vetë ne. Këtë gjë unë e kam parë vetëm si një sfide me dy plane: morale dhe profesionale dhe i kam hyrë kësaj pune pa bërë shumë hesapin e frikës, përkundrazi, kam menduar dhe jam shprehur se tani duhet të kenë frikë ata që do të jenë përballë meje. Ata kanë shumë se çfarë të humbin tani. Koha e shpagesës ka ardhur.

Cila ishte arsyeja që shkuat në Turqi? Përse u takuat me Izet Haxhinë?

Në Turqi kam vajtur për arsye pune. Unë ndjek disa procese gjyqësore dhe më duhet të mbledh dhe të verifikoj mjaft fakte si dhe të takohem me shumë persona të cilët kanë dijeni për çështjet me të cilat unë merrem. Me këtë rast u takova edhe me mikun tim të vjetër Izet Haxhia, i cili mund të them se është purifikuar totalisht tashmë dhe qëndron në pozita shumë parimore, mbi të gjitha si njeri. Ai sot përfaqëson një iniciativë personale shumë interesante në hedhjen dritë në mjaft ngjarje, si dhe është një shembull se e vërteta mund të thuhet dhe shërbehet nga çdo pozicion apo pikë e globit. Ai është i qartë në qëndrimet dhe qëllimet e tij si dhe mjetet për arritjen e tyre. Mesa pashë i mbështetej tashmë plotësisht të vërtetës dhe këtë po e bën mjaft mirë, duke pasur parasysh edhe qetësinë me të cilën po e bën duke më prezantuar një Izet më të përmbajtur dhe më të devotshëm nga ai që njihja dikur. Izetin e konsideroj personin më të motivuar për t’i besuar diçka në lidhje me çështjet që kanë të bëjnë me ish-kryeministrin Berisha. Nuk ka nevojë për argumentim, pasi pozicioni i Izetit është publik tashmë.

Duket se jeta juaj që nga denoncimi që keni bërë ka ndryshuar? Me çfarë po merreni tani dhe cila është një ditë e zakonshmja e juaja?

Është normale që jeta ime ka ndryshuar në mjaft drejtime. Unë deri diku jam bërë peng i punës sime. Kam punuar jashtëzakonisht shumë që OSHEE të fitonte gjyqin e arbitrazhit karshi DIA-s në Vienë. Objekti i kërkimit nga ana e DIA-s ishin rreth 170 milionë euro duke llogaritur edhe interesat si dhe pagesat e eksperteve. Do të ishte katastrofike një humbje e asaj çështjeje. E them me zë të lartë se ndryshimi i pushtetit në qershor 2013 ishte faktori politik që mbështeti këtë fitore. Po të mos ishte ndërruar pushteti në ato zgjedhje, sot Ismailaj do të ishte pronar i OSHEE si dhe i gjithë sistemit energjetik shqiptar.

Synimi i tij diabolik ishte të paguhej me të gjitha aksionet e OSHEE-së, si dhe më pas të imponohej edhe në politikë me krijimin e një partie të re të financuar nga paratë e vjedhura me anë të mashtrimit. Për këtë ai ka pasur edhe bekimin e Berishës. Duke bërë një arritje të tillë, je i detyruar që të punosh në vazhdimësi për ta ruajtur atë, si dhe për ta zbardhur tërësisht ngjarjen. Kështu që në aktivitetin tim të përditshëm janë të gjitha çështjet e mëdha në sektorin energjetik shqiptar dhe që kanë pasur lidhje edhe me çështjen DIA.

Nisur nga pesha e fakteve që ju keni bërë publike, a ndiheni i kërcënuar?

Kërcënimi është publik, por më tepër se kërcënim është një pretencë për atë që mund të ndodhë në të ardhmen karshi meje. Sot kam dalë në rrugë dhe mjaft njerëz me shihnin me çudi dhe mendoj se atyre u jam dukur si një i vdekur që ecën. Kjo është pasojë e frikës që ka mbjellë kryekusari. E neveris pretencën e kryekusarit dhe po i bëj publike pretencën time: ndëshkim dhe shpronësim total prej çdo prone të tij, familjes së tij dhe bashkëpunëtorëve të tij. Do punoj gjithë jetën për arritjen e këtij qëllimi.

Nëse mund t’ju pyesim, cila është pasuria juaj dhe të ardhurat tuaja mujore?

Nuk kam pasuri, jetoj në një apartament me qera prej 7 vjetësh dhe të ardhurat e mija përbëhen nga rroga ime si ekspert ligjor pranë OSHEE diku rreth 1000 euro. Të ardhura të tjera nuk kam.

Të flasim për çështjen CEZ, cilat ishin faktet që ju bënë të dyshonit se kishim të bënim me një skandal?

Fakti kryesor që më bindi se kishim të bënim me një aferë ishte e-maili i Nuel Kalajt drejtuar Martin Roman, Drejtues i CEZ-Group në Pragë në 7 shtator 2009. Në atë e-mail Kalaj shprehej se nuk i vinte mirë sukseset e punës së tij 4 vjeçare e negocim pas negocimesh për futjen e CEZ-it në sektorin energjetik shqiptar të rrezikoheshin nga puna e drejtuesve të CEZ-Shpërndarje në Tiranë. Isha në dijeni se CEZ-i ka hyrë në sektorin energjetik shqiptar nëpërmjet procesit të privatizimit të 76% të aksioneve të OSSH, gjë e cila ligjërisht ishte bërë me tender të hapur ne 2008. Ky e-mail më zgjoi interesin për të parë pastaj me detaje të gjithë procesin e privatizimit.

Cila është lidhja e Nuel Kalajt me Shkëlzen Berishën?

Sipas e-maileve që kanë bërë midis njëri-tjetrit drejtuesit CEZ të asaj kohe, ne kuptojmë se Nuel Kalaj ishte midis të tjerave ai që organizonte takimet e palës çeke me Berishën e madh dhe me Berishën e vogël. Kjo mjafton për të thënë se ata ishin konfidentë me njëri-tjetrin dhe Kalaj ishte në shërbim të tyre. Nuk mendoj se ai ishte në shërbim të Berishës së vogël në veçanti, por ai i shërbente atij në kuadër të shërbesës që i bënte Berishës së madh. Pra Shkëlzeni është respektuar nga Kalaj dhe çekët si biri i të atit.

Kohë ma parë DITA ka shkuar se i biri Sali Berishës ka transportuar valixhe me para nga Rinasi. A mund të kenë ikur edhe lekët e CEZ jashtë vendi?

Nuk e di saktësisht se çfarë ka shkruar DITA lidhur me këtë gjë dhe çfarë faktesh ka pasur parasysh. Nuk jam marrë shumë me këtë pjesë, pasi jam fokusuar tek argumentimi i shkeljeve ligjore që janë bërë në rastin e privatizimit te OSSH-së. Kjo që thoni ju është shumë e rëndë dhe përfshin minimumin policinë e aeroportit të Rinasit si dhe atë të pastrimit të parave në atë kohë. Nuk çuditem të ketë ndodhur një gjë e tillë. Me aq para sa mungojnë në buxhetin e shtetit nuk është çudi të kenë kaluar me kamionë dhe jo me valixhe. Për Nuelin është e sigurt që paratë i ka lëvizur me valixhe, pasi nuk ka bërë deklarimet e rastit në kufi dhe me këtë ai ka konsumuar të paktën një vepër penale. Sot Nuel Kalaj duhet të ishte në burg edhe për ndikim të paligjshëm, korrupsion, pastrim parash etj. Aty do të fillonte siparin edhe vetë dënimi i Berishës. Kam frikë se Berisha më shumë ruhet nga Nueli se nga unë tani. Është e sigurt që pushtetarët tanë paratë e vjedhura këtu i dërgojnë jashtë. Aty ku kanë çuar paratë aty është atdheu i tyre i vërtetë. Këtu është vetëm vendi i grabitjes.

Ku dyshoni se mund të jenë çuar?

Jam shumë i interesuar për t’i gjetur se ku kanë shkuar këto para pasi ato duhet të kthehen këtu patjetër. Zakonisht ata përdorin off shoret në mënyrë që paratë t’i riinvestojnë përsëri këtu duke bërë kështu pastrimin e tyre. Mbase do të kem fatin dhe mundësinë që ta zhbiriloj edhe këtë punë. Ky është edhe qëllimi final i imi. Dënimi i hajdutëve ka vlerë si ndëshkim edhe si bërjen shembull për të tjerët, por kompensimi është sfida përfundimtare për drejtësinë. Duhen gjetur ligje të tjera. Jemi shumë të varfër për të mbajtur mijëra pushtetarë kusarë në burg me kosto mbi 800 euro në muaj personi. Kusarët kanë marrë aq shumë sa nuk kanë menduar as për koston e burgimit të tyre.

Në bisedën që pata me Izetin ai më foli për Shkëlzenin dhe të motrën në një hotel në Pragë dhe për një takim me Nuel Kalanë por pa më dhënë shumë detaje. Çfarë është ky takim?

Izeti ka qenë më i afërt me familjen Adams. Ai di jashtëzakonisht shumë detaje për to. Unë jam i interesuar për takimet që mund të jenë bërë në Pragë midis Berishës së vogël dhe Kalajt, Berishës së vogël dhe Ismailajt si dhe Argitës me Ismailaj këtu. Nuk e di çfarë takimesh kanë qenë, por me siguri nuk kanë qenë takime patriotike. Shumë miza ishin mbledhur mesa duket tek mjalti i CEZ-it.

Gazeta Dita,  20.01.2017

E thirrur nga komisioni hetimor për CEZ, i ngritur nga opozita, ish-Avokatja e Shtetit në qeverinë “Berisha”, pohoi se qeveria Rama ka marrë përsipër të zgjidhë me marrëveshje jo vetëm kontratën e saj me CEZ, por edhe marrëveshjen që çekët kishin me kompaninë DIA, duke konfirmuar dyshimet e opozitës.

Edmond Spaho: CEZ është shprehur që konflikti me DIA-n është i tyre dhe nuk ka pse të merret përsipër nga shteti shqiptar?

Ledina Mandia, Ish-Avokate e Shtetit: Po!

Edmond Spaho: E përsëris këtë sepse në marrëveshjen me CEZ-in qeveria shqiptare ka marrë përrsipër edhe detyrimin e DIA-s prej 138 mln euro. Keni vënë në dijeni ministrin Gjiknuri për këtë?

Ledina Mandia: Po, patjetër!

Por ka një problem. Sipas mazhorancës mungojnë provat për ta vertetuar këtë. ish avokatja e shtetit në kohën e berishës konfirmoi gjithashtu këtë problem.

Blerina Gjylameti: Zonjë keni korrespondencë të shkruar, që ta faktoni që keni vënë në dijeni ministrin Gjiknuri për këtë?

Ledina Mandia: Nuk kam patur mundësi ta bëj…

Blerina Gjylameti: Epo nuk e keni bërë, ju kujtoj që për dëshmi të rreme mbani përgjegjësi penale.

Ish Avokatja e Shtetit u shpreh në komsion se ka patur edhe një kallëzim penal ndaj CEZ-it, por që me marrëveshjen ky fakt nuk është marrë parasysh.

Top Channel,  20.01.2017

Ditë ankthi dhe pasigurie për ish-kryeministrin Sali Berisha dhe djalin e tij, Shkëlzen Berisha, të cilët me ndërmjetësimin e sekserit Nuel Kalaj, rezultojnë se kanë mundësuar shitjen abuzive të 75 për qind të aksioneve të kompanisë shtetërore ‘OSSH’ tek kompania çeke ‘CEZ’, duke i shkaktuar shtetit shqiptar një dëm ekonomik prej 414 milionë eurosh.

Pas publikimit të transaksioneve dhe dokumenteve nga komisioni hetimor parlamentar, për tërheqjen e 7 milionë eurove nga sekseri Nuel Kalaj, me çanta, në një bankë të nivelit të dytë në Tiranë, pa paguar asnjë taksë dhe pa kryer një punë të dokumentuar, në lëvizje janë vënë menjëherë institucionet kompetente.

Shqiptarja.com ka mësuar se, institucionet ligjzbatuese, përfshirë Drejtorinë e Përgjithshme të Parandalimit të Pastrimit të Parave, kanë nisur hetimet ndaj shtetasit kosovar Nuel Kalaj, për pastrim parash, evazion fiskal dhe pastrim të produkteve të veprës penale. Autoritet përgjegjëse, përfshirë edhe shërbimet inteligjente, bazuar në indiciet e ditëve të fundit, po hetojnë burimin e 7 milionë eurove të tërhequra nga Nuel Kalaj, mundësinë e ndarjes me persona të tjerë, tjetërsimin si dhe skemën e investimit në pasuri të paluajtshme, nëse ka.

Shkëlzen Berisha nën hetim 
Shqiptarja.com ka mësuar gjithashtu se verifikimit për pastrim parash po i nënshtrohen edhe rrethi i personave të lidhur me sekserin Nuel Kalaj, ku përfshihet edhe i biri i Sali Berishës, Shkëlzen Berisha.

Sipas një e-maili të ish-drejtorit të CEZ në Shqipëri, Josef Hejsek, drejtuar nëndrejtorit të CEZ-it në Pragë, Tomas Pleskac, Nuel Kalaj rezulton mik i besuar i Shkëlzen Berishës, ku ky i fundit duket se i ka vënë vulën shitjes së OSSH tek çekët. Po ashtu, organet kompetente po verifikojnë edhe veprimet dhe mosveprimet e ish-drejtuesve, gjatë kohës kur Nule Kalaj ka mundur të tërheqë 7 milionë euro, nën hundën e institucioneve, pa paguar taksa dhe pa kryer një shërbim të dokumentuar.

Për një hetim sa më efikas, ka nisur edhe një bashkëpunim mes institucioneve kompetente, në bazë të marrëveshjeve të nënshkruara vitet e fundit. Në ditët në vijim pritet të dalin edhe rezultatet e para të verifikimit për lëvizjen e parave dhe personat e përfshirë në skandalin më të madh të 25 viteve të fundit.

Lëvizja e parave  
Edhe pse ka dyshime të forta se paratë e tërhequra mund të jenë ndarë jashtë sistemit bankar, mes personave që kanë mundësuar shitjen e OSSH në dëm të shqiptarëve, komisioni hetimor parlamentar u ka kërkuar bankave transaksionet bankare për Nule Kalajn, Shkëlzen Berishën, Sali Berishën dhe Hamza Merxhanin. Komisioni hetimor ka dyshimet të forta për 15 milionë euro transaksione bankare të dyshimta, të cilat kanë lidhjet me privatizimin e OSSH.

Po ashtu komisioni u ka kërkuar bankave transaksionet bankare për Suzana Guxhollin, Mimoza Vokshin, Neritan Alibalin, Enno Bozdon dhe familjarët e tyre, si dhe transaksionet bankare për anëtarët e Komisionit të Vlerësimit, Negocimit dhe Transparencës.

Po verifikohen gjithashtu edhe lëvizjet e Kastriot Ismailajt dhe Shkëlzen Berishës, pas informacioneve se në periudhën 2009, 2010, 2011 kanë qenë së bashku në Pragë.

Po verifikohen edhe tablatet telefonike të Sali Berishës dhe Nuel Kalaj, pas informacioneve se ka pasur mbi 100 telefona mes tyre. Gjithashtu po verifikohen në sistemin TIMS lëvizjet e Sali Berishës, Shkëlzenit dhe të Nuel Kalajt nëse përkojnë me e-mailet dhe dëshmitë e administruara nga komisioni hetimor.

Shqiptarja.com  20.01.2017

Zbulohen të tjera dokumente për sekserin e privatizimit të OSSH te CEZ, biznesmenin nga Prizreni Nuel Kalaj.

Sipas përgjigjes së Drejtorisë së Përgjithshme të Tatimeve për Komisionin Hetimor të CEZ që drejtohet nga Taulant Balla, shtetasi Nuel Kalaj megjithëse pretendon se ka bërë konsulencë dhe është paguar 7 milionë Euro, nuk ka paguar asnjë taksë në Shqipëri.

Drejtoria e Tatimeve në dokumentin drejtuar Komisionit shkruan se Nuel Kalaj u regjistrua si person fizik në dhjetor të vitit 2007 me aktivitet konsulent ekonomik.

Në shtator 2010 Nuel Kalaj ndërpreu deklarimet në tatime, ndërsa nuk ka paguar asnjë taksë në shtetin shqiptar.

Në Tatime Nuel Kalaj rezulton i punësuar deri në Tetor të 2015 në subjektin HAM Group shpk nën administrimin e Drejtorisë Rajonale Tatimeve Kukës.

I njohur si mik i djalit të ish-kryeministrit Shkëlzen Berisha, Nuel Kalaj ka përfituar nga çekët e CEZ-it transferta bankare 6.8 milionë euro; dhe këto shuma më pas i ka tërhequr cash më 16 qershor 2009, vetëm pak ditë para zgjedhjeve të vitit 2009.

Emri i Nue ose Nuel Kalajt doli në skenë pas dëshmisë në komisionin hetimor të juristit të kompanisë OSHEE, Romeo Karajt.

Sipas tij, Nue ose Nuel Kalaj ka telefonuar mbi 100 herë brenda një muaji ish-kryeministrin Berisha, madje ka zhvilluar dhe takime në zyrën e këtij të fundit.

Nuel Kalaj është kërkuar nga Komisioni Hetimor që të sillet forcërisht për të dëshmuar për aferën, pasi e ka refuzuar dy herë komisionin.

Kryetari i Komisionit Hetimor për çështjen e privatizimit të OSSH te çekët e CEZ, Taulant Balla përmes në shkrese drejtuar Drejtorit të Policisë së Shtetit i kërkon që të verifikojë të gjitha lëvizjet e Sali Berishës dhe të Nuel Kalajt.

Komisioni kërkon verifikimin në sistemin TIMS të lëvizjeve të Berishës nga Janari deri në Shkurt të 2010 dhe të Nuel Kalajt nga Janari 2006 deri në shtator të 2012.

Komisioni kërkon verifikimin nëse shtetasi Nuel Kalaj nga Prizreni ka shtetësi shqiptare, nëse po a ka leje qëndrimi.

Gjithashtu në letër komisioni kërkon që nëse rezulton se Nuel Kalaj në Shqipëri ka lëvizuar me makina me targa shqiptare të vendosen në dispozicion se në emrin e kujt kanë qenë regjistruar.

Shqiptarja.com  19.01.2017

Nëse komisioni hetimor parlamentar për çështjen ‘CEZ’ do ta konsiderojë të vlefshme dëshminë e tij, ish-kryeministri Sali Berisha rrezikon të ndiqet penalisht për dëshmi të rreme.

Ish-kryeministri ka mashtruar me dëshminë e tij para komisionit hetimor për zbatimin e legjislacionit dhe pasojat e privativit të OSSH, duke konsumuar kësisoj veprën penale të dëshmisë së rreme, parashikuar në nenin 306 të Kodit Penal.

Konkretisht, Sali Berisha ka mohuar njohjen dhe takimet me shtetasin kosovar, Nuel Kalaj, i cili në bazë të dokumenteve, dëshmive dhe transaksioneve të zbardhura, rezulton si sekseri i shitjes së OSSH tek CEZ nga qeveria “Berisha”.

I pyetur nga kryetari i komisionit hetimor, Taulant Balla, nëse e njihje dhe nëse ishte takuar me shtetasin Nuel Kalajn, Sali Berisha është përgjigjur duket thënë “shpifje e mirëfilltë”, “shpifje e ndyrë”. Me fjalë të tjera, Berisha ka mohuar në komision njohjen me sekserin Nuel Kalaj, i cili refuzon që të dëshmojë në komisionin hetimor.

Por, ka dy dëshmi, një e-mail dhe një dokument që provojnë të kundërtën. Deklarata e vetë Nuel Kalajt, dëshmia e juristit të OSHEE, Romeo Kara, një e-mail ish-drejtorit të CEZ në Shqipëri, Josef Hejsek dhe një dokumentet i vitit 2006 konfirmojnë jo vetëm njohjen, por edhe takimet mes Nuel Kalajt dhe ish-kryeministrit, Sali Berisha.

“Me ish¬kryeministrin Berisha jam takuar si pjesë e delegacionit të CEZ¬it, kur ata kanë ardhur në Tiranë”, ka deklaruar Kalaj. Ndërkaq, një dokument i vitit 2006, i administruar nga komisioni hetimor, konfirmon se Nuel Kalaj ka një miqësi të konsoliduar me Sali Berishën. Në dokument del qartë se Kalaj është një njeri i besueshëm i Sali Berishës, aq i besueshëm saqë ka vënë në rresht edhe ish-ministrat e tij.

Dëshmia para komisionit si ajo para prokurorit 
Dëshmia para komisionit hetimor është e barabartë me dëshminë para prokurorit dhe me dëshminë para gjyqtarit. Por pasojë, edhe dëshmia e rreme para komisionit hetimor ndëshkohet njëlloj si dëshmia e rreme para prokurorit.

Neni 16 i ligjit për komisionet hetimore parashikon që komisioni hetimor thërret dëshmitarë për të sqaruar rrethana të ndryshme që lidhen me çështjen, sipas rregullave të parashikuara në Kodin e Procedurës Penale. Sipas nenit 360 të Kodit të Procedurës Penale, para se të fillojë pyetja, kryetari i komisionit hetimor paralajmëron dëshmitarin për detyrimin dhe përgjegjësinë ligjore që ka për të thënë të vërtetën.

Sa i takon, përgjegjësisë ligjore, neni 306 i Kodit Penal parashikon që dëshmia e rreme përbën kundërvajtje penale dhe dënohet me gjobë ose me burgim gjer në dy vjet. Por, pika 2 e nenit 360 të Kodit të Procedurës Penale, parashikon që dëshmitari duhet të betohet dhe të tregojë gjeneralitetet e tij. Në rastin konkret, Berisha refuzoi që të betohej se do të thoshte të vërtetën.

Shkelja e kësaj pike mund ta bëjë të pavlefshme dëshmitë e tij. Ndoshta Berisha ka refuzuar qëllimisht që të betohej. Megjithatë, do të jenë organet e Kuvendit, ata që të cilat do të vendosin për vlefshmërinë e dëshmisë. Ndërsa kallëzimi penal për dëshmi të rreme mund të bëhet nga komisioni hetimor.

Dëshmia e Sali Berishës 
-Taulant Balla: Dakord. Kur të shprehet Gjykata e Lartë, patjetër. A e njihni ju zotin Nuel Kalaj apo Nue Kalaj, sepse ai përdor dy emra?

-Sali Berisha: Shpifje e mirëfilltë. Ti vetëm shpif!

-Taulant Balla: Mos u skuq! A e njihni këtë emër? Përgjigjuni me po, apo jo!

-Sali Berisha: Për shpifësin kam vetëm një përgjigje: je shpifës.

-Taulant Balla: A jeni takuar ndonjëherë me Nuel Kalaj?

-Sali Berisha: Për shpifësin kam vetëm një përgjigje: ti je shpifës i certifikuar.

-Taulant Balla: Z. dëshmitar! Sillini një shishe ujë! E paska! A keni folur ndonjëherë në telefon me Nuel Kalajn?

-Sali Berisha: Shpifje e ndyrë. Për shpifësin kam vetëm një përgjigje: je një shpifës i
pakorrigjueshëm.

-Taulant Balla: Kush është shpifësi, Nueli?

-Sali Berisha: Shpifësi jeni ju.

4 dëshmitë që provojnë takimet e Sali Berishës me Nuel Kalajn 

1. Dëshmia e Romeo Kara 
“Në dokument del se Nuel Kalaj ka hyrë në këtë valle pasi dështoi një person tjetër me origjinë kosovare, Hamza Merxhani, i cili jeton në Çeki, sipas të dhënave që kemi ne dhe kërkimeve tona, dhe ka dështuar në vitin 2005 për të ndërhyrë në lidhje me privatizimin e OSSH-së, apo KESH-it që ishte në atë kohë, në favor të CEZ-it. Me ndërrimin e qeverisë, ka futur në lojë apo ka ftuar Nuel Kalajn, i cili paska lidhur, sipas kësaj letre, një kontratë tremujore për të lobuar pranë qeverisë shqiptare me një sous-estimer të përcaktuar atje, ka ardhur ne vjeshtën e vitit 2006 në Shqipëri, thuhet, ka pasur lidhje të forta me kryeministrin, ka takuar ministrin e linjës, Genc Ruli, ka edhe fotografi të tij me Genc Rulin në këtë material që unë kam. Thuhet se ka telefonuar mbi 100 herë brenda një muaji kryeministrin Berisha… Kështu e thotë letra dhe kështu e thonë edhe e-mailet e tjera që unë kam gjetur, të cilat do t’jua ofroj juve…”.

2. Deklarata e Nuel Kalajt 
“Me Shkëlzen Berishën nuk kam asnjë lidhje. Nuk i kam premtuar askujt organizimin e takimeve me të. Me ish¬kryeministrin Berisha jam takuar si pjesë e delegacionit të CEZ¬it, kur ata kanë ardhur në Tiranë. E gjithë veprimtaria ime ka qenë në përputhje me ligjet e Shqipërisë dhe të Çekisë ku zhvillon aktivitetin e saj kompania CEZ. Nuk kam negociuar, por kam pasur një kontratë për të mbledhur informacionet e nevojshme për nevojat që kjo kompani kishte në Shqipëri”.

3. E-maili i Josef Hejsek për Tomas Pelskac
“Do të të pres ty me Nuelin në aeroport, në sallonin VIP. Me Nuelin sapo mbarova negociatat e tjera. I shpjegova në detaje se çfarë kërkojmë. Takimi me të birin, sipas Nuelit, është shtyrë për nesër pas ardhjes së PM (Kryeministrit). Çfarë duhet të presim nga kryeministri? Sipas Nuelit rezultatet në mënyrë të sigurt do të jenë pozitive dhe në 90 % konkrete. Ai më siguroi se për kryeministrin po punon një komision ndërministror i cili në mënyrë të specializuar po trajton problematikën tonë. (Mund t’ju konfirmoj që kam folur me disa anëtarë të komisionit që po merren me këtë marrëveshje)”.

4. Dokumenti i 2006, takimi Ruli-Kalaj 
“Nga vetë Nueli konfirmohet se takimi i parë me Genc Rulin nuk ishte shumë domethënës. Në vijim Nuel Kalaj i ka kërkuar ballafaqim ministrit Ruli me në prani të kryeministrit Berisha, kjo pasi Ruli kishte filluar tratativat e privatizimit të OSSH me kompaninë Enel Energia”.

Shqiptarja.com 17.01.2017

Ka munguar për të dytën herën dëshmitari kyç, Nuel Kalaj që ka negociuar për privatizimin e OSSH tek CEZ. Kryetari i Komisionit Taulant Balla përsëri i ka kërkuar policisë ta sjellë me forcë sapo të shkelë në tokën shqiptare duke qenë se rezulton jashtë vendit. Debatet për përfshirjen e Kalaj në këtë çështje janë zhvilluar mes Ballës dhe ish ministrit Bode i cili ka kërkuar të mos nxirren përfundime para kohe.

Nuel Kalaj i cilësuar si “sekseri” i shitjes së OSSH tek CEZ nuk i është përgjigjur për të dytën herë kërkesës për të dëshmuar në komisonin hetimor të ngritur për këtë çështje.

Kryetari i Komisionit, Taulant Balla, në mbledhjen e radhës tha se dëshmitari kyç i kësaj çështje ndodhet jashtë vendit.

Deputeti ka depozituar disa emaile të Nuel Kalaj në komunikimet e tij me drejtues të kompanisë çeke CEZ në Shqipëri dhe Pragë në vitet 2008, 2009 dhe 2010.

Ndërsa për ish-Ministrin, Ridvan Bode, këto biseda nuk provojnë asgjë duke i kërkuar kryetarit Balla të mos dalë në përfundime të parakohëshme.

Balla: Kemi dhe konfirmimin këtu që do të jetë për Komisionin. Nga ky moment ne i kërkojmë policisë së shtetit të bëhet sjellja me forcë e këtij dëshmitari shumë të rëndësishëm. Depozitoj disa emaile që ky dëshmitar i quajtur Nuel Kalaj ka komunikim me drejtues të ÇEZ në Shqipëri dhe në Pragë.

Bode: Nëse kemi kompetencë dhe të drejtë të kërkojmë të vinë këtu ata që i kanë dhënë paratë këtij. Pse të marrim me mend ne që ky Noeli ja paska marrë Hashekut paratë për këtë qëllim dhe u vendos kjo punë sepse kemi gjetur një email etj. Janë personat, të vinë këtu dhe të deponojnë.

Komisioni Hetimor do të përsërisë kërkesën për policinë e shtetit për të sjellë në komision me forcë dëshmitarin Kalaj.

Më herët ky Komision ka admnistruar llogaritë bankare të shtetasit Kalaj nga një bankë e nivelit të dytë, për transferta bankare disa miliona euro.

Ndërsa janë kërkuar edhe informacione shtesë.

Ora News,  16.01.2017

Komisioni Hetimor në Kuvendin e Shqipërisë për veprimtarinë e CEZ-it shtyn për një tjetër datë seancën e pyetjeve me dëshmitarin kyç, Nuel, apo Nue Kalaj, pasi thuhet se ai është larguar nga Shqipëria.

Ky i fundit akuzohet se ka luajtur rolin e sekserit mes CEZ-it dhe përfaqësuesve të qeverisë paraardhëse, ndërkohë që  kryetari i këtij komisioni, Taulant Balla, pranoi zyrtarisht edhe shumën e mëdha të transaksioneve të kryera brenda një dite në vitin 2009.

Nga ana e tij deputeti i Partisë Demokratike Ridvan Bode, i cili ka qenë ministër i Financave në kohën kur negociuar me CEZ-in, replikoi në mbledhje duke i quajtur të pavërteta pretendimet e socialistit Balla.

Mbledhja e radhës e Komisionit Hetimor për CEZ-in pritet të mbahet në datën 23 janar.

Scan TV,  16.01.2017

SHISH dhe KLSH u orientuan të mos hetojnë skandalin e privatizimit të OSSH-së tek CEZ.

Romeo Kara juristi i OSHEE në një rrëfim ekskluziv per Report TV jep fakte të reja të reja rreth këtij skandali.

Ndërhyrja e Nuel Kalaj tek Sali Berisha, lidhjet me djalin e ish-kryeministrit, Shkëlzen Berisha e ministrat kabinetit.

Publikohet fotoja e një prej ministrave me të akuzuarin si sekser i këtij privatizimi.

Romeo Kara njeriu që hapi “Kutinë e Pandorës” për skandalin CEZ rrëfen ekskluzivisht për Report Tv detaje të reja që lidhin ish-kryeministrin Berisha, familjarë dhe ish-ministra me skandalin që i kushtoi Shqipërisë miliona euro dëm.

Janë të mëdha shumat e abuzimit dhe po aq të mëdha ndërhyrjet nga jashtë, madje dhe nga agjenci inteligjente të huaja.

Por çuditërisht Kontrolli i Lartë i Shtetit dhe Shërbimi Informativ u urdhëruan të mos hetonin këtë çështje që prek drejtpërsëdrejti interesin kombëtar.

“Ka ardhur dita që organet ligjzbatuese duke përfshirë edhe SHISH-in, të prononcohen për këto të vërteta dhe çfarë ato dinë dhe si ato mund të ndihmojnë në zbardhjen e të vërtetës. Nuk më vjen mirë që edhe KLSH-ja edhe SHISH-i, kanë pasur një lloj orientimi për të mos mbledhur të dhëna për privatizimin e SHISH, nga ata të cilët ata i marrin orientimet”, u shpreh Karaj.

Juristi i OSHEE i cili negocioi me çekët dhe marrëveshjen e zgjidhjes së kontratës së shitjes, e lidh privatizimin dhe lëshimin që iu bë më pas, CEZ-it dhe me ndikimin e Nuel Kalajt te Sali Berisha dhe ministrat e tij.

Ndërsa lidhjet e sekserit me Shkëlzen Berishën janë të faktuara nga email-ed e drejtuesve çek të CEZ-it.

“Më intriguese është sesi Nuel Kalaj ka interferuar midis drejtuesve të CEZ-it dhe qeverisë shqiptare, direkt me zotin Berisha apo me ministra të tjerë”, thotë ai.

Sipas Romeo Kara janë të shumtë ata që meritojnë burgun dhe me faktet e reja, Prokuroria duhet të rinisë hetimet.

“Palët kanë pasur të drejtë të diskutuojnë vetëm çfarë do të quhet borxh i keq, jo për të prekur borxhin e keq. Palët kanë ndërhyrë dhe kanë prekur nivelin e borxhit të keq, nga 4% e kanë çuar në 14%. 1% e këtij borxhi të keq e ka pasur koston 7 milionë dollarë. 10% janë 70 milionë dollarë të pastra dëm ekonomik të shkaktuar nga një proces i paligjshëm, i parregullt dhe i paautorizuar. Përgjegjësit janë aty, nga qeveria që ka miratuar kontratën dhe nga ata që e kanë miratuar në Parlament, edhe komisioni që është ngritur mban përgjegjësitë e veta edhe komisioni i negocimit që ka kaluar tagrin, si dhe personat e tjerë të cilët kanë ndikuar. Kam dëgjuar raste që mjaft persona kanë shkuar në burg për vjedhjen e një celulari, ata është kollaj t’i çojnë në burg. Sfida e vërtetë e zbatimit të ligjit është të çojnë në burg fajtorët e mëdhenj”, thekson Karaj.

Por a ka njeriu që hodhi dritë mbi këtë skandal, frikë për jetën e tij?

“Nuk kam as frikë nga personat që kanë bërë këto shkelje, as respekt dhe as borxh ndaj tyre. Përkundrazi, rrezikun e vetëm që ndjej ndaj vetes është, të mos ia dal deri në fund kësaj çështje…”, thekson më tej juristi i OSHEE, Romeo Kara.

Intervista e plotë e juristit të OSHEE, Romeo Karaj:

-Zoti Kara, ju jeni kthyer në personazhin e ditës në skenën politike për sa i përket privatizimit të CEZ-it dhe ishit i pari që zbuluat emrin e Nuel Kalaj, personi i pretenduar si sekser për këtë privatizim. Si ndjeheni tashmë që jeni kthyer në qendër të vëmendjes dhe a ndjeheni i rrezikuar për jetën tuaj?
Me veten time e kam kapërcyer këtë pikë. Nuk kam as frikë nga personat që kanë bërë këto shkelje dhe për të cilat jam i bindur. Nuk kam as respekt dhe as borxh karshi tyre. Përkundrazi, rreziku i vetëm që ndiej karshi vetes është që të mos ia dal deri në fund kësaj çështjeje. Jam i vendosur t’i shkoj deri në fund kësaj çështjeje dhe të gjitha çështjeve që lidhen me këtë pikë dhe zbardhjen e kësaj të vërtete, e cila do të ketë vlerë jo vetëm për vendosjen e drejtësisë, por edhe për kompensimin e çdo dëmi që është bërë nga këta keqbërës.

-Jeni kontaktuar nga ndonjëri prej emrave që keni përmendur, siç është z. Kalaj, z. Berisha, i biri?
Absolutisht jo.

-Për sa i përket këtij të fundit, ishit njeriu që nxori gjithashtu në skenë një lidhje të presupozuar të Shkëlzen Berishës në tërë privatizimin e CEZ-it. Përveç dokumentit që u publikua nga komisioni hetimor, a ekzistojnë të tjera dokumente që faktojnë ndikimin e tij të drejtpërdrejtë në këtë proces?
Patjetër që ekzistojnë dokumente të tjera. Janë disa e-maile në të cilat përfshihet personi Nuel Kalaj apo Nue Kalaj. E-maili i parë i cili më ka bërë përshtypje ka qenë ai i shtatorit të vitit 2009, ku ai i drejtohet Drejtorit të CEZ Group Martin Roman dhe nga vetë përmbajtja e e-mailit shprehet se “përpjekjet e mia 4-vjeçare, negocime pas negocimesh për t’u futur në sektorin energjitik shqiptar mund të shkojnë dëm për arsye të një aktiviteti jo të kënaqshëm”, sipas tij, “nga drejtuesit prezentë të CEZ Shpërndarje në Shqipëri”. Dhe kjo më intrigoi. Një prononcim konfidencial i një shqiptari direkt me Drejtorin e CEZ Group Martin Roman, nuk është normale, pra tregon për një konfidencë, për një afrimitet për një person që kishte një lloj pushteti në rrethin e CEZ-it, në qarqet e CEZ-it. Dhe verifikimi i mëtejshëm tregoi që periudha 4-vjeçare paska qenë më reale se sa periudha në të cilën pretendohet se ky tender ka filluar vetëm në vitin 2008. Kjo ishte intriguese dhe unë e pashë me seriozitet.

-Për sa i përket emrit të Shkëlzen Berishës, ishte pyetja konkrete, a ka dokumente të tjera që faktojnë rolin e tij në privatizim?
Mendova që pyetja ishte për Nuel Kalajn. Për Shkëlzen Berishën është ai e-maili i cili ka dalë nga Parlamenti, me nr. 6, aty është sigla ime. Është pjesë e dokumenteve të dosjes që unë kam dorëzuar në Parlament, në komisionin hetimor. Është i mjaftueshëm. Nuk mendoj se opinioni do të përqendrohet në lidhjen e tij me Shkëlzen Berishën, por me të gjithë aktorët që kanë qenë ligjërisht persona të ngarkuar për t’u marrë me këtë privatizim dhe të cilët janë ndikuar apo kanë përdorur në mënyrë jo të ligjshme Nuel Kalajn. Më intriguese është mënyra se si Nuel Kalaj ka interferuar midis qarqeve drejtuesve të CEZ-it dhe qeverisë shqiptare direkt me z. Berisha apo me ministra të tjerë. Kjo është më intriguese dhe më e saktë mbase. Nuk është fare në interesin tim që të zbuloj një lidhje të Nuel Kalajt me fëmijët e ish-kryeministrit.

-Përveç emrit të Shkëlzen Berishës a ka dokumente ligjore që faktojnë edhe përfshirjen e vajzës së ish-kryeministrit? Është lakuar shpeshherë si e përfshirë në biznese që lidhen me vendime të qeverisë. Nuk dua të paragjykoj për bizneset e tjera. Në lidhje me këtë proces për privatizimin, dokumente të shkruara, për aq sa kam parë unë, nuk ka.

-Mund të na thoni se si u përfshitë në gjithë këtë zbulim, për sa u përket shkeljeve që janë bërë në kontratat e privatizimit të CEZ-it?
Siç duket kishte ardhur dita, por e deshi fati të merresha unë me këtë punë. I ngarkuar me procesin e arbitrazhit, kam qenë i interesuar së bashku me avokatët gjermanë të KIFERSHENC-it, për të parë momentet se si janë sjellë palët para lidhjes së kontratës DIA-CEZ. Dhe duke parë të gjitha materialet që na kanë ardhur në mënyrë eksplicite nga CEZ Group kanë ardhur në mënyrë ligjore, në vjeshtën e vitit 2014, e konsideruam që të shohim edhe pjesën që ka të bëjë me procesin e privatizimit. Ne ishim të interesuar të shihnim nëse ishte e ligjshme lidhja e kontratës DIA-CEZ apo jo? A kishim ndikime të sjelljes së palëve më përpara apo jo? Duke parë këto zbuluam diçka tjetër, që ishte procesi i parregullt i privatizimit të OSSH-së. Edhe si detyrim ligjor, por mbi të gjitha, si qytetar, si njeri, dhe karshi Zotit, e ndjeva për detyrë që t’i shkoj deri në fund. I kam referuar konkluzionet e mia në një dosje të plotë ministrit Gjiknuri, në vjeshtë të vitit 2015, i cili ia ka nisur Prokurorisë. Prokuroria ka bërë një mbyllje të çështjes. Kemi fakte të reja për në komision që mendoj se do të çojnë në një rihapje të çështjes dhe në një trajtim më serioz dhe më dinjitoz të saj.

-Cilat janë, në qoftë se mundeni?
Siç thashë, fakti për Nuel Kalajn, që ky proces nuk ka nisur në vitin 2008 siç pretendohet nga drejtuesit e asaj kohe, por paska nisur më përpara. Pra, ka qenë i ndikuar. Kemi një përgatitje nga vitet 2005-2006 të qeverisë së asaj kohe deri në vitet 2008-2009 për të shkuar në një shitje të përcaktuar të OSSH-së drejt CEZ Group.

-Ndërkohë në një seancë parlamentare ka qenë ish-kryeministri Berisha që ka përmendur për herë të parë emrin e Nuel Kalajt dhe akuzonte ministrin Gjiknuri se po i bënte shantazh me një dokument që, sipas tij, nuk ekzistonte por ku pretendohej se ishte firma e të birit Shkëlzenit, e Nuel Kalajt dhe e z. Merxhani. A keni dijeni për një dokument të tillë?
Unë nuk kam ndonjë dokument të tillë. Mund të ekzistojë një dokument i tillë, por jo tek unë. Dhe nuk e kam parë dhe nuk i jam referuar ndonjë dokumenti të tillë, që të jetë i firmosur bashkërisht nga Shkëlzen Berisha dhe Nuel Kalaj.

-Si nisi e gjithë historia, në qoftë se mundeni, zbulimet tuaja dhe ku janë bërë shkeljet më të mëdha?
Kam kërkuar dokumentacion pranë OSHE-së, ku unë punoj, pranë Ministrisë së Energjetikës dhe Industrisë, pranë Kryeministrisë dhe kam parë që dokumentacioni është shumë i mangët. Pra, është një nga shkeljet ligjore që protokolli dhe dosja totale e këtij dokumentacioni nuk është e plotë dhe e keqmenaxhuar. Me qëllim apo jo, këtë nuk mund ta them, por ishte e vështirë të krijoje fillimisht një dokumentacion të plotë. Kam krijuar një dokumentacion të plotë, rreth 30-40 mijë faqe, i kam kaluar të gjitha në sitë duke i lexuar, duke i trajtuar dhe kam krijuar një dosje me rreth 500-600 faqe, kam bërë një opinion ligjor të mbështetur në rreth 50 prova dhe bazë ligjore se çfarë ka ndodhur dhe çfarë duhet të ndodhë, duke konstatuar të gjitha shkeljet e mundshme si edhe dëmin ekonomik, përveçse edhe shkeljet në procedurë. Në vitin 2008 ne kemi qenë të papërgatitur nga ana e legjislacionit për të bërë këtë lloj privatizimi. Ky privatizim është mbështetur në atë kohë nga Banka Botërore. Por vetë Banka Botërore duke parë krizën e palëve, pak para heqjes së dy licencave nga ERE të CEZ-it, licencave të operimit të tij në tregun shqiptar, është shprehur nëpërmjet drejtuesve të saj në Tiranë, në dhjetor të vitit 2012, që ky proces ka qenë i nxituar pavarësisht se Banka Botërore e ka mbështetur atë. Kemi hyrë në këtë proces me një legjislacion totalisht të pamjaftueshëm, për këtë lloj privatizimi që është i veçantë. Megjithëse është miratuar ligji për ankandin publik pak muaj para privatizimit, ne kemi hyrë në këtë privatizim me një ligj, i cili parashikonte privatizimin me tender të hapur, në një kohë që shitja është bërë pa çmim dysheme. Për shitje procedohet me anë të ankandit. Është hyrë në këtë procedurë privatizimi pa u zgjidhur problematika e titullit të pronësisë për asetet e OSSH-së, të cilat edhe sot i përkasin akoma KESH-it, në një pjesë të tyre. Pra, kërkon të shesësh një aset, i cili nuk i ka të zgjidhura problemet e pronësisë. Përgjatë kësaj kohe që kemi zhvillime të tenderit zyrtarisht të hapur, kemi letra të bëra nga ministri i linjës Ruli, i cili interesohet pranë Zyrës së Pasurisë për të shpejtuar procesin e regjistrimit të aseteve të CEZ-it, të OSSH-së. Pra si është e mundur që ti ke hyrë në këtë proces dhe akoma nuk ke zgjidhur problemin e pronësisë. OSSH-ja sapo ishte ndarë nga KESH-i dhe nuk kishin zgjidhur ende me njëri-tjetrin problemin e të drejtave dhe të detyrimeve. Dhe OSSH-ja në atë kohë nuk kishte akoma e adaptuar mirë dhe akoma e paprovuar mirë me modelin e ri të tregut të energjisë, i cili sapo ishte miratuar dhe ne nuk e dinim akoma kapacitetin real të kësaj ndërmarrjeje. Nuk është zbatuar porosia ligjore për ruajtjen e aksionit të artë. Nuk kishte aryse që neve të ruanim vetëm 24% të aksioneve duke dhënë 76% të aksioneve palës çeke dhe me 76% të aksioneve të dhëna me VKM, edhe me anë të procesit të privatizimit, të shoqëruara me ligjin për tregtarët, aksionerit mazhoritar që ka 76% të aksioneve dhe më tepër i jepet e drejta e pakufizuar mbi ndërmarrjen deri në prishjen e saj pa marrë parasysh aksionerin minoritar, ne ia hoqëm të drejtën shtetit shqiptar ta ruante aksionin e artë dhe të ruante si duhet interesat publike dhe interesat shtetërore. Përkundrazi, shkelja e kësaj provoi që të gjitha shkeljet e mundshme janë bërë nga aksioneri mazhoritar. Nuk e mbrojmë aksionerin mazhoritar, por ligjërisht ne ishim të pamundur më pas për t’i mbrojtur ato. Parashikohej se pjesa e mbetur e aksioneve prej 24% do t’u ofrohej ish-subjekteve të shpronësuara të truallit dhe ndërtesave, punonjësve të OSSH-së në këmbim të aksioneve me bono të privatizimit apo letra me vlerë dhe të persekutuarve. Kjo gjë nuk ka ndodhur. Nuk e di për pagesën e tarifës për shoqërinë konsulente që mund të jetë bërë, për komisionin e vlerësimit mund të jetë bërë, por jam i sigurt që punonjësit e OSSH-së që dolën të papunë dhe janë rreth 1 400, nuk e morën kurrë këtë trajtim në bazë të ligjit të këtij privatizimi. Kurse në lidhje me shoqërinë konsulente, kjo parashikohet në ligj për t’u paguar nga ana jonë OSSH si shtet shqiptar, nga paratë e marra nga privatizimi, ndërsa me VKM parashikohet të paguhet nga subjekti fitues siç është CEZ-i. Pra të paguhet dy herë. Kemi hyrë pa vlerësuar asetet e OSSH-së, që pranohet. Në tender i është lënë një mundësi dhe vetë CEZ-it apo subjektit fitues, nëpërmjet klauzolës rregullimi i çmimit të blerjes. Duke shfrytëzuar këtë iu la dera e hapur subjektit fitues që ishte CEZ-i për ta riparë çmimin e blerjes, pra në favor të tij. Megjithëse ne kishim investuar para të tjera përgjatë vitit 2008, pra edhe 10 milionë euro të tjera, çmimi i blerjes kur është riparë është riparë në dëm të shtetit shqiptar dhe në favor të CEZ-it. Kur kanë dorëzuar ofertat të gjithë pjesëmarrësit, në 27 shtator të vitit 2009, janë hapur ofertat dhe pas tyre ishte parashikuar një procedurë negocimi jo për të diskutuar specifikimet teknike në tender, por për të diskutuar mënyrën e transferimit dhe mënyrën e marrjes në dorëzim. Pra nuk kishte lidhje për të diskutuar ata parametra kryesorë të cilët ishin miratuar nga qeveria, një pjesë me miratim të ERE-s etj., sipas kompetencave për të hyrë në tender. Kemi një rënie poshtë të të gjithë procedurës së tenderit, sepse palët kalojnë në një proces negocimi kur i kanë prekur të gjitha. Edhe vetë persona të ndryshëm nga ERE apo të tjerë nga stafi shqiptar e kanë vënë në dukje këtë gjë nëpër procesverbalet e negocimit, që ne po prekim ato që nuk duhen prekur. Po të marr një shembull: është parashikuar që në tender të hyhet me nivelin e borxhit të keq 4%. Pra, ajo pjesë e arkëtimeve që ishte e pamundur për t’u mbledhur do të kompensohej nga shteti shqiptar. Palët kanë pasur të drejtë të diskutojnë vetëm se çfarë do të quhet borxh i keq, jo të prekin nivelin e borxhit të keq. Palët kanë hyrë dhe kanë prekur nivelin e borxhit të keq, nga 4% e kanë çuar në 14%. 1% e këtij borxhi të keq e ka pasur koston 7 milionë dollarë, 10% janë 70 milionë dollarë, janë të pastra dëm ekonomik të shkaktuar nga një proces i paligjshëm, i parregullt dhe i paautorizuar.

-Duhet të shkojë dikush në burg për këtë? Ka përgjegjës, emra konkretë? Ju jeni jurist.
Përgjegjësit janë aty, që nga qeveria që ka miratuar këtë kontratë, unë jam më gjithëpërfshirës në idetë e mia, edhe ata që e kanë miratuar në Parlament. Sepse këta e kanë çuar në Parlament për të shmangur përgjegjësinë e tyre, për t’i bërë të gjithë bashkautorët bashkëfajtorë. Por këtu ka një kokë. Ky tender është bazuar mbi dy VKM, që i ka bërë qeveria. Edhe komisioni që është ngritur ka përgjegjësitë e veta, si komisioni i parë edhe i dyti; edhe komisioni i negocimit që ka kaluar tagrin, ka diskutuar ato që nuk duhej të diskutoheshin; si edhe persona të tjerë që kanë ndikuar. Asnjëherë në negocime nuk kemi pasur pretendime për rënien e vlerës së aseteve të OSSH-së gjatë vitit 2008. Pretendohet që palët pjesëmarrëse kanë hyrë në tender duke u bazuar në vlerësimin e aseteve për vitin 2007 dhe në një takim të bërë në fund të shkurtit të vitit 2009, me pjesëmarrjen e Genc Rulit dhe Suzana Guxhollit, ngrihet nga Genc Ruli pretendimi, i pangritur kurrë më parë nga komisioni i negocimit, se kemi të bëjmë me një rënie të vlerës së aseteve dhe meqë çmimi 102 milionë euro përfaqëson një simbolikë politike do të investojmë që vlerën e aseteve ta çojmë në këtë çmim se me këtë çmim nuk e ulim dot vlerën e aseteve. Dhe më 6 mars del një VKM e famshme, e cila të gjitha aktivet i kalon tek OSSH-ja dhe pasivet te KESH-i, kreditë e marra për investime në OSSH paguheshin nga KESH-i, lirohej OSSH-ja nga këto pagesa, dhe favorizimi që i është bërë në atë kohë CEZ-it ishte rreth 55 milionë euro. Më pyetët se fajtorët duhet të shkojnë në burg apo jo? Kam dëgjuar raste kur mjaft persona kanë vajtur në burg vetëm për një celular të vjedhur. Ata është kollaj t’i çojnë në burg. Sfida e vërtetë e atyre që merren me drejtësinë dhe zbatimin e ligjit është që të çojnë fajtorë të mëdhenj, që janë edhe shkaktarë edhe për këta që vjedhin celularët pastaj.

-Ju pyeta dhe më herët, ndjeheni i rrezikuar për jetën tuaj apo jo? Ndërkohë keni statusin e të mbrojturit nga drejtësia. Pse? Mund të na jepni ndonjë detaj?
Nuk është ndonjë pikë për të cilën kam qejf të përgjigjem. Kam një bashkëpunim shumë të mirë me disa organe ligjzbatuese. Do të doja ta kisha me të gjitha organet ligjzbatuese. Meqë më dhatë rastin, po e devijoj me qëllim përgjigjen karshi pyetjes suaj, mendoj që ka ardhur dita që këto organe ligjzbatuese, duke përfshirë edhe SHISH-in, të prononcohen për këto të vërteta dhe çfarë ato dinë dhe si ato mund të ndihmojnë në zbardhjen e të vërtetës.

-Mund të ketë pasur një hetim nga SHISH për këtë ngjarje?
Unë mendoj që duhet të ketë pasur. Në qoftë se nuk ka pasur është gabim. Dhe nuk më vjen mirë që edhe Kontrolli i Shtetit, edhe SHISH, kanë pasur një lloj orientimi për të mos mbledhur të dhëna për privatizimin e OSSH-së.

-Nga kush?
Nga ata, nga të cilët ata i marrin orientimet. Pse nuk kemi deri tani qoftë edhe një investigim lidhur me privatizimin e OSSH-së? Është bërë një investigim joreal, qesharak, së fundmi nga Kontrolli i Shtetit, i nisur për një çështje tjetër dhe mbaruar për çështje tjetër. Nuk i ka parë këto dokumente me syrin e të vërtetës, nuk i ka ballafaquar faktet dhe është me shumë vonesë. Për mendimin tim, ka qenë detyra e Kontrollit të Shtetit që brenda vitit ta investigonte apo ta asistonte madje këtë privatizim kaq të rëndësishëm. Nuk është bërë.

-Folët për rihapjen e hetimit në kuadër të gjetjes së provave të reja, siç është rasti i ndërhyrjes së Kalajt. Kush duhet ta rihapë, kryesisht Prokuroria apo komisioni hetimor ta vërë në lëvizje?
Komisioni hetimor duhet të dalë me disa vendime, por vendime gjyqi ai nuk mund të japë. Do të ketë vendimet e tij. Nuk është një çështje që mund të zgjidhet në një kohë kaq të shkurtër disajavore apo disamujore, të ketë një mandat më të gjatë. Por, përfundimisht duhet të shkojë para organeve që njeh Kushtetuta në lidhje me zbatimin dhe vënien e drejtësisë, që janë Prokuroria dhe gjykatat.

Shqiptarja.com  14.01.2017

Deputeti i PS, njëkohësisht kryetar i komisionit hetimor parlamentar për privatizimin e OSHEE-së, Taulant Balla ka paraqitur këtë të mërkurë për mediat një mesazh elektronik, që sipas tij vërteton rolin e shtetasit Nuel Kalaj në marrëveshjen mes CEZ dhe qeverisë Berisha.

Sipas Ballës, email-i i shkëmbyer mes krerëve të kompanisë çeke provon edhe përfshirjen e të birit të ish-kryeministrit Berisha në aferën e privatizimit.

“Sot po publikojmë një ndër shumë provat e pakontestueshme, e cila dëshmon qartë rolin që ka luajtur Nuel Kalaj. Ai ka qenë i lidhur me të birin e kryeministrit të asaj kohe, Sali Berisha. Kjo kuptohet qartë në këtë e-mail ku drejtori çek në Shqipëri, Josef Hejsek i thotë nëndrejtorit të CEZ në Pragë, Tomas Pleskaç, se do ta priste së bashku me Nuelin në aeroport, në sallonin VIP. Hejsek thotë gjithashtu se, sipas Nuelit, ‘takimin me të birin do ta shtyjmë për nesër, pas ardhjes së kryeministrit’. Pra, kuptohet qe Tomas Pleskaç, së bashku me Hejsekun dhe të tjerë janë takuar me kryeministrin dhe pastaj me të birin e tij”, ka thënë Balla.

Ai ka theksuar se, ky mesazh do të jetë në fokus të mbledhjes së ardhshme të komisionit hetimor parlamentar. “Sot nuk po bëj asnjë pyetje. Pyetjet do t’i bëhen në komsion hetimor dhe më pas”, ka thënë Balla.

Ai ka shtuar se, ndërkohë komisioni ka marrë nën administrim edhe disa dokumente nga banka të nivelit të dytë, të cilat konfirmojnë kryerjen e transfertave bankare me vlerë miliona euro nga CEZ, të cilat më pas janë tërhequr në formë kesh nga Nuel Kalaj në qershor të vitit 2009, pak ditë para zgjedhjeve.

“Gjithashtu, komisioni ka kerkuar informacione shtesë nga banka, por edhe nga banka të tjera, pse CEZ i ka bërë keto transferta tek ky individ dhe ku i ka çuar paratë kesh Nue Kalaj”, ka shtuar Balla.

Top Channel,  12.01.2017

Pasi nuk është paraqitur në komisionin hetimor parlamentar për çështjen CEZ, Nuel Kalaj, i dyshuari për lidhjet mes qeverisë Berisha dhe kompanisë çeke në privatizmin e OSHEE-së në 2009, ka reaguar përmes një email-i.

Ai thotë se, këto ditë ndodhet në Kosovë për arsye familjare, ndërsa njoftimin për t’u paraqitur në komision e ka marrë vetëm një ditë para mbledhjes.

Kalaj thotë se, për shkak të kushteve të vështira atmosferike e kishte të pamundur të udhëtonte në Tiranë. I dyshuari si sekser thotë se, në asnjë rrethanë nuk do të fshihet dhe nuk do t’i largohet përgjegjësisë sa i përket kësaj çështjeje.

Kalaj mbron aktivitetin e tij duke thënë se, është i mbështetur në baza ligjore dhe se marrëveshja me ÇEZ-in është kontraktuale. Pas periudhës së pushimit, Kalaj thotë se është i gatshëm të paraqitet vullnetarisht pranë komisionit parlamentar.

Top Channel,  12.01.2017