info@energjia.al

Një makinë dy vëndëshe e cila përshkruan një distancë autonome 100-120 kilometra dhe e aftë për një shpejtësi deri në 80 km në orë ka hyrë në prodhim dhe tashmë është në dispozicion për shitje në Greqi.

E projektuar dhe prodhuar përmes bashkëpunimit të firmës greke Ecosun dhe një fabrike industrial kineze “Ecocar” u prezantua për herë të parë në Panairin Ndërkombëtar të 82 të Selanikut në shtator.

Kompania greke Ecosun  krijoi idenë tre vjet më parë duke projektuar produktin dhe duke furnizuar sistemet elektrike dhe bateritë.

Ndërkohë pjesa tjetër është bërë në Kinë, ku edhe ka më shumë eksperiencë më prodhimin e automjeteve elektrike dhe kushte shumë më fleksibël të prodhimitq ë luajnë një rol të rëndësishëm në konkurrueshmërinë e çmimit përfundimtar të produktit.

Është vetëm 224.5 centimetra e gjatë, 129 centimetra e gjerë dhe 157 centimetra e lartë, duke peshuar në një total prej 670 kg me bateritë e saj. Në këtë makinë rehatohen lehtësisht 2 persona dhe motori elektrik i saj 7.5 kW mundësohet nga gjashtë bateri me 72 volt.

Këto bateri mund të ngarkohen me 80 për qind brenda disa minutave dhe stacionet e ngarkimit janë vende publike .

Sipas prodhuesve rimbushja e plotë e një automjeti me një prizë normale kërkon 6 deri në 8 orë.

Scan Tv,  16.10.2017

Ditën e djeshme, kompania LG njoftoi se  do të hapë fabrikën më të madhe në Evropë të prodhimit të baterive litium-ion për makinat elektrike.

Sipas Reuters, kjo fabrikë do të hapet në vitin 2019-ën në Poloni dhe do të ketë një kapacitet prodhimi prej 100,000 bateri çdo vit.

Për ta krahasuar, duhet të marrim parasysh fabrikën më të madhe në botë për prodhimit e baterive në pronësi të Panasonic në Kinë e cila prodhon 200,000 bateri në vit.

Por sipas Elon Musk fabrika e tij Gigafactory do të prodhojë 500,000 baterinë vit.

LG do të shpenzojë afro 1.63 miliard dollar për fabrikën e cila do të ndërtohet në Wroclaw, 190 kilometër larg nga kufiri me Gjermaninë, shtëpinë e grupit Volkswagen i cili synon të investojë 20 miliard Euro në makinat elektrike deri më 2030-ën.

Scan Tv,  14.10.2017

Të paktën 8 incidente janë raportuar që kur Apple lançoi telefonat në 22 shtator.

Në secilën prej këtyre rasteve problemi ka qenë i njëjtë me bateritë e telefonit të cilat fryheshin aq sa hapnin edhe kapakun e telefonit duke e bërë kështu telefonin të papërdorshëm.

Apple konfirmoi se po e heton këtë problem dhe se është në dijeni të të gjitha situatave.

Numri duket i madh, por ende nuk është statistikisht i rëndësishëm duke marrë parasysh se sa milionë njësi iPhone 8 Apple ka shitur deri më tani.

Ekspertët mendojnë se është një gabim në prodhim dhe Apple po përpiqet të identifikojë linjën e prodhimit.

Kur bëhet fjalë për incidente të tilla njerëzit e kanë akoma të freskët rastin vitit të kaluar të  Galaxy Note 7.

Por pavarësisht incidentit me Galaxy Note 7, Samsung dëshmoi me Galaxy S8 dhe Galaxy Note 8 se mësoi shumë nga fatkeqësia e Galaxy Note 7.

Scan Tv,  12.10.2017

Konglomerati i njohur japonez “Toshiba” ka shënuar një humbje neto prej 965,7 miliardë jenësh (8,8 miliardë dollarë) në pasqyrën financiare të vitit të kaluar.

Kompania 142-vjeçare ka të ngjarë të përjashtohet nga Bursa e Tokios (TSE), pasi rezultatet e vonuara financiare u miratuan pjesërisht nga kompania e auditit “PricewaterhouseCoopers Aarata” (PCA).

Megjithatë, PCA-ja ka lëshuar një opinion të pafavorshëm lidhur me kontrollet e brendshme të “Toshiba”-s, pasi kompania ka pësuar humbje të mëdha që lidhen me njësinë amerikane të energjisë bërthamore “Westinghouse Electric”, tashmë jofunksionale.

Gjithashtu, në mars, “Toshiba” raportoi një vlerë neto negative prej 552,9 miliardë jen.

“Toshiba”, e cila është ende duke u përballur me frikën se mund të përjashtohet nga TSE-ja, po përpiqet të shesë njësinë e vet fitimprurëse për të mbledhur para.

Kompania do të çregjistrohet nga Bursa e Tokios nëse raporton një vlerë neto negative edhe për vitin e dytë.

Agjensia e lajmeve ekonomia,  05.09.2017

Shkencërarët në SHBA kanë prezantuar për herë të parë prototipin e telefonit celular pa bateri, i cili përdorë një teknologji të re për të cilën shpresohet se shumë shpejt do të implementohet në prodhimet për tregun masiv.

Ky telefon është krijuar nga grupi i hulumtuesve nga universiteti “Washington” në Siettle dhe punon në parim të gjenerimit të sasive të vogla të energjisë nga radio sinjalet, të njohura si radio frekuenca ose valët “RF”.

Top Channel,  11.08.2017

Qeveria britanike ka bërë publike planet për të ndihmuar konsumatorët dhe industrinë të kursejnë deri në 40 miliardë paund nga faturat e tyre duke e hapur rrjetin e energjisë ndaj mjeteve të ruajtjes me bateri, duke stimuluar centralet energjetike me ndotje të ulët.

Departament për Biznesin, Energjinë dhe Strategjinë Industriale ka shpallur planet për të investuar 246 milionë paund në kërkim për teknologji baterish.

Pjesë e planit janë edhe disa amendime në ligje, të cilat do të përcaktonin ruajtjen e energjisë dhe do t’i lejonin investitorët të mbështesnin projekte të tilla. Ligji aktual nuk ka një definicion për bateritë, të cilët shihen si gjeneratorë por edhe përdorues të energjisë.

Investimi në bateri do të kryhet përgjatë 4 viteve dhe do të përfshijë një program konkurrueshmërie për të nxitur kërkimet dhe avancimin në këtë teknologji.

“Elementi i parë do të jetë një konkurs i drejtuar nga Këshilli i Inxhinierisë dhe Kërkimit të Shkencave Fizike, që do të bashkojë mendjet dhe kapacitetet më të mira së bashku për të krijuar Institutin e Baterisë”, tha Ministri i Biznesit, Greg Clack.

“Duhet të sigurohemi që të gjejmë dhe përfitojmë nga mundësitë për të punuar në mënyrë për produktive”, shtoi ai.

Nisma është vlerësuar edhe nga institucionet e tjera energjetike në vend, si një drejtim i qartë për të siguruar një sistem energjetik të sigurt, fleksibël dhe me emetime të ulëta karboni. Duke përdorur eficiencën dhe inovacionin, do të ndihmojë të ulë kostot e faturave.

Scan Tv,  25.07.2017

Nuk ka më fisha, karikues baterie dhe celulari që duhet t’i kesh me vete vazhdimisht, ka nevojë vetëm për energjinë e ambientit. Ky është vizioni për telefonin e parë që do të funksionojë pa bateri.

Shkencëtarët nga Universiteti në Uashington treguan se në të ardhmen mundemi të zgjidhim në tërësi problemin e baterisë.

Pajisja e re, e cila ndodhet në fazën e hershme të kërkimit, përdor teknologji të sinjalit kthyes. Konkretisht, funksionimi i tij është i bazuar në radiovalët, të cilat sillen rreth nesh derisa ne komunikojmë, shkruan IFLScience.

Ekipi shkencor nga Uashingtoni deri më tash ka arritur të demonstrojë thirrjen me zë prej telefonit pa bateri te telefoni i mençur Android.

Megjithatë, stacioni bazë mundëson telefonin mobil që të jetë deri 15 metra larg gjatë bisedës, por gjërat mund të ndryshojnë nëse stacionet bazë integrohen në kullat telefonike.

“Ato kanë disa qindra herë energji më të fuqishme, andaj diametri mund të rritet ndoshta deri në një kilometër”, ka thënë pjesëmarrësi i projektit Joshua Smith, i cili ka punuar në prototip.

Ekipi tash po punon në përmirësimin e kualitetit dhe zhvillimin e thirrjeve. Shpikja aktualisht funksionin sikur walky-talky, andaj duhet të shtypni butonin për t’u transferuar nga biseda në dëgjim dhe anasjelltas. Po shqyrtohet edhe vendosja e ekranit e-ink, për të mundësuar dërgimin e porosive.

Top Channel,  12.07.2017

Një nga shqetësimet kryesore të botës moderne padyshim është edhe jetëgjatësia e baterisë së telefonave sidomos nëse nuk keni mundësi karikimi në çast.

Por pas kaq shumë vitesh shkencëtarët e kanë një përgjigje. Ata kanë zhvilluar një telefon pa bateri, energjia e të cilit vjen nga valët radio dhe zëri i përdoruesit.

Sipas Pcworld, prototipi i parë mund të kryejë vetëm telefonata dhe nuk ka ekran me prekje e as lidhje interneti. Megjithatë ai ngelet i rëndësishëm në rast emergjence.

Telefoni u krijua nga hulumtuesit e Universitetit të Washingtonit dhe konsumon mesatarisht 2 deri në 3 mikrovat energji. Kur është pranë një stacioni valor mund të marrë valët radio dhe ti përdorë ato në formë energjie sa për të kryer telefonata.

Ai dërgon sinjale përmes reflektimit të sinjaleve radio dhe pulseve elektromagnetike të gjeneruara nga dridhjet e telefonit ndërsa përdoruesi flet pranë mikrofonit.

Scan Tv,  11.07.2017

Pas suksesit me OnePlus 3, shoqëria kineze do të hedhë në treg modelin e ri, OnePlus 5.

Telefoni do të jetë në dy versione dhe mund të porositet edhe online duke filluar nga data 27 qershor.

Dash Charge, si të karikoni smartphone në vetëm 30 minuta

OnePlus do t’i gëzohet teknologjisë së zhvilluar nga kompania kineze, Dash Charge, që ju lejon të karikoni telefonin në një kohë të shkurtër. OnePlus siguron se kohëzgjatja e baterisë do të jetë 1 ditë dhe do të karikohet në vetëm 30 minuta. Bateria është 3300mAh.

Revista Monitor,  23.06.2017

Imagjinoni një skenë të jetës së përditshme – ktheheni nga puna por keni vetëm 20 minuta, maksimumi 30 minuta, për t’u ndërruar dhe për të dalë sërish. Çfarë të bëni nëse smartphone është thuajse pa bateri? Shumë e thjeshtë… përdorni këto truke për të përshpejtuar procesin e karikimit të telefonit.

Më poshtë janë disa truke të vogla për të karikuar baterinë e telefonit kur keni pak kohë në dispozicion. Këshillat vlejnë si për pajisjet e ndryshme Apple (iPhone dhe iPad) edhe për smartphone-t Android.

Nëse keni pajisje të ndryshme Apple në shtëpi, këshillohet të përdorni karikuesin e iPad për të karikuar edhe telefonin tuaj. Mund t’ju duket e çuditshme, por karikuesi i tablet-it është më i fuqishëm.

Në këtë mënyrë, iPhone do të karikohet më shpejt dhe sipas përdoruesve kjo nuk ka efekt negativ në jetëgjatësinë e baterisë.

Airplane mode

Një këshillë efikase për të reduktuar kohën e rikarikimit është që të aktivizoni funksioninairplane mode gjatë procesit. Në këtë mënyrë, konsumi i baterisë gjatë karikimit do të jetë minimal. Disa smartphone-ve u duhet gjysma e kohës për t’u rikarikuar nëse është aktivizuar funksioni airplane mode. Natyrisht në fund mos harroni ta çaktivizoni këtë funksion, ndryshe nuk do të mundni të bëni/merrni telefonata, dërgoni/merrni mesazhe si dhe të lundroni në internet.

Hiqni kapakun

Kjo është një këshillë me vlerë të dyfishtë. Kapakët, veçanërisht ata plastikë, kanë tendencë për ta ngrohur telefonin gjatë rikarikimit. Kjo gjë shkakton dy probleme: I pari lidhet me jetëgjatësinë e baterisë, në përpjekje për ta rikarikuar telefonin shpejt, në temperatura të larta, ajo do të prishet shpejt. Së dyti, temperaturat e larta ngadalësojnë procesin e karikimit. Kështu që përpara se të rikarikoni telefonin, hiqni kapakun dhe lëreni atë në një vend të freskët.

Mos e përdorni smartphone-n

Një ndër zakonet më të shpeshta, që e ngadalëson së tepërmi procesin e rikarikimit dhe mund të jetë i dëmshëm për baterinë, është përdorimi i smartphone. Sa herë që aktivizojmë Wi-Fi ose kontrollojmë thirrjet, më keq akoma nëse luajmë, smartphone humb fuqinë e karikimit – në këtë rast do të duhet më shumë kohë për të arritur një nivel të pranueshëm në baterinë tuaj.

Karikues portativ

Nëse e kemi të pamundur të mos e përdorni shpesh smartphone nuk na mbetet gjë tjetër veçse që të blejmë një karikues portativ. Bëni kujdes që të zgjidhni një model që të jetë kompatibël me telefoni tuaj.

Revista Monitor,  11.05.2017