info@energjia.al

Zona përreth Stadiumit Qemal Stafa mbeti për orë të tëra pa furnizim me energji elektrike gjatë pasdites së djeshme.

Ndërprerja nisi rreth orës 14. Burime zyrtare pranë OSHEE thanë se shkak i ndërprerjes u bë një defekt tek fakulteti i Gjeologji Minierave, i shkaktuar nga Ndërmarrja e Bashkisë që kryente punime në zonë.

OSHEE tha gjithashtu se riparimi i defektit do të zgjaste rreth tre orë, duke bërë që furnizimi i zonës me energji të bëhet i mundur vetëm rreth orës 20:00 të mbrëmjes.

Shqiptarja.com  17.03.2017

Bashkia e Tiranës në bashkëpunim me Bankën Europiane për Rindërtim dhe Zhvillim, kanë nisur planin e veprimit për ta shndërruar kryeqytetin shqiptar në një qytet të gjelbër, ndryshe nga sa jemi mësuar ta shohim deri tani, ku hapësirat jeshile janë të limituara.

BERZH ka si synim që pjesa më e madhe e projekteve të financuara të përqendrohen në këtë drejtim, për të mundësuar një qytet më të gjelbër.

“Jeshilja duhet të jetë gjithnjë e më e rëndësishme për Shqipërinë, pasi bujqësia është një ndër shtyllat kryesore për rritjen ekonomike. Shqipëria duhet ta shfrytëzojë jeshilen për një ekonomi të qëndrueshme dhe konkurrencë në rajon. Kemi investuar 240 milion euro për projekte në Shqipëri dhe 80 për qind e tyre kanë qenë projekte jeshile. Presim që ky plan veprimi të çojë në masa konkrete që do të thithin investime substanciale. Ne do të marrim rolin udhëheqës për këto investime bashkë me banka dhe donatorë të tjerë”, deklaroi Mateo Colangeli, përfaqësues i BERZH.

Nga ana e tij, Kryebashkiaku Erion Veliaj theksoi se Tirana po ecën në këtë drejtim, pasi tashmë ka një plan të qartë vendor dhe janë marrë vendime që kanë si qëllim rritjen e sipërfaqeve të gjelbërta siç është edhe vendimi për kufizimin e ndërtimeve pa kriter.

Veliaj kërkoi ndihmë nga konsulentët që ky plan të përkthehet në projekte të implementueshme. Veliaj njoftoi gjithashtu që do të hapet diskutimi për ligjin  e financave vendore në mënyrë që Bashkitë të kenë më shumë akses në fonde dhe kreditim.

Scan Tv,  09.02.2017

Të gjitha institucionet publike do të jenë të parat të zbatojnë legjilacionin që lidhet me kursimin e energjisë përmes ndërtimit brenda standardeve apo ndërhyrjeve për izolim.

Por të dhënat tregojnë se, shumica e Bashkive në vend, kanë qenë indiferente ndaj nismës së qeverisë dhe këtë rezultat e tregoi auditimi i bërë nga ana e Agjencisë Kombëtare të Burimeve të Natyrës.

“Në të vërtetë, gjatë periudhës 2014-2015, u vunë re vetëm përmirësime të vogla. AKBN-ja ka audituar 10 bashkitë më të mëdha të vendit (gjatë 2011-2013), me qëllim që të kontrollojë zbatimin e Ligjit për Ruajtjen e Energjisë në Ndërtesa. Nga auditimet u vu re se asnjë nga bashkitë e audituara nuk e ka zbatuar ligjin në shkallë të madhe (niveli aktual është vlerësuar të jetë jo më shumë se 10%)”, thuhet në një dokument të Ministrisë së Energjisë dhe Industrisë.

Por funksionimi dhe zbatimi ligjor përfshin një sërë institucionesh dhe në disa raste edhe Inspektoratin e Ndërtimit.

Ky i fundit është ai që kontrollon zbatimin e lejeve dhe projekteve të miratuara te ndërtimi nëse i përmbushin apo jo parametrat, por sipas të njëjtit dokument institucioni ka mungesë të ekspertizës teknike që lidhet me kodin energjetik.

Scan Tv,  16.09.2016

Kandidati për kryebashkiak të Dibrës Sherefedin Shehu u takua me banorë të fshatrave Rreth-Kale,  Vajmëdhej dhe Reç ku ka thënë se, bashkia e drejtuar prej tij do të paguajë energjinë elektrike për të gjitha familjet në varfëri ekstreme.

Shehu u njoh dhe me shqetësimin e banorëve për furnizimin me energji. Banorët u ankuan se dhe pse ua kanë ndërprerë energjinë, pasi s’kanë mundësi ta paguajnë, faturat vazhdojnë t’u vijnë. Ata treguan se së fundmi punonjësit e OSHEE –së u kanë premtuar lidhje të energjisë në këmbim të votës, por u shprehën të bindur se pas zgjedhjeve do t’ua presin sërish.

Banor: Tre muaj ja kanë prerë dritat por i vinte fatura edhe pse i kishin prerë.

Banor: Po dhe mua mi kanë prerë e tani thonë më jep votën, të japi dritat. Këto metoda përdorin.

Banor:  Na koritën (turpëruan) vendin, tokën dhe njerëzit në vorre (varre). Duke e njohur njeri pa familje, pa edukatë, pa moral, hajdut, jepëm votën, çfarë kërkon populli më?! Duhen larguar një orë e më parë.

Shehu theksoi se në Bashkinë e Dibrës nuk do të ketë më asnjë familje që do të rrijë në errësirë se s’paguan dot energjinë. Bashkia do të vërë në dispozicion një fond të posaçëm për familjet në pamundësi ekonomike për t’u paguar faturën e energjisë që fëmijët të kenë mundësi të mësojnë në dritë.

Sipas tij, infrastruktura rrugore dhe bujqësore si dhe furnizimi me ujë  janë problemet parësore të banorëve.

Shehu theksoi se ndërmarrjet e Bashkisë, ajo e Mirëmbajtjes, Ujësjellësi dhe Bordi i Kullimit do të vihen në punë 24 orë për t’u shërbyer banorëve, në përmirësimin e infrastrukturës, ujësjellësin dhe riparimin e pastrimin e  kanaleve vaditëse

“Në postin e kryebashkiakut që në ditën e parë do të punoj për lidhjen e ujësjellësit nga lagjja Sheh i Sipërm me Sopanitin. Do të vazhdojmë zgjatimin e kanaleve vaditës, riparimin dhe pastrimin e tyre. Këtë do ta bëj me bordin e kullimit që i është transferuar Bashkisë. Dhe e kam unë të drejtën për të marrë vendimin se ku do t’i përdor ato njerëz dhe ku do t’i përdor ato para.Infrastruktura për mua do të ndahet në dy kategori. Infrastruktura e fshatrave që sot nuk ju sheh kush me sy kur bashkia ka një ndërmarrje të mirëmbajtjes së rrugëve. Ata njerëz do të marrin rrogat për të punuar për ju. Por ka edhe projekte të mëdhaja dhe ato janë projektet e zhvillimit. Unë do të bashkëpunoj me institucione ndërkombëtare për ti realizuar,”

Sot News,  30.08.2016

Tirana do të ketë 5 unaza, 2 prej të cilave do t’i dedikohen vetëm transportit publik  dhe këmbësorëve dhe biçikletave.

Kryetari i Bashkisë, Erion Veliaj ka prezantuar planin e përgjithshëm rregullues në njësitë bashkiake 5 dhe 7.

“Dy unazat e reja që ne po bëjmë, pra Unaza e Vogël, ajo që po bëjmë sot, Unaza e Mesme dhe e Madhja, janë tre unaza të fokusuara tek transporti i makinave. Propozimi ynë është që unaza 2 dhe 4 të jenë të fokusuara tek transporti publik, biçikletat, korsitë e pedonaleve dhe pistat e vrapimit”, tha kryebashkiaku Veliaj.

Një tjetër propozim për njësinë numër 7 është futja e autobusëve elektrikë dhe hapësirat sportive.

“Të nisim të konceptet e një transporti të ri, autobusët elektrikë që bijnë distancën Tiranë-Rinas, ndalojnë edhe në zonën industriale, që nuk ndotin dhe që ta bëjmë me një kompani të bashkisë. Për njësinë 7 plani është që të ribëjmë nga e para një arenë të mirëfilltë sportive. Të njëjtën gjë po bëjmë me njësinë 5”, deklaroi kreu i Bashkisë së Tiranës, Erion Veliaj.

Për të disiplinuar bashkëjetesën në komunitet tanimë vendosja e administratorëve në çdo pallat do të kontrollohet nga Bashkia e Tiranës. Ndërkohë, plani i ri rregullues parashikon ndërtimin e brezit të gjelbër të qytetit, shkolla të reja, displinim të trafikut e të tjera.

Top Channel,  15.07.2016

Kryebashkiaku i Tiranës, Erjon Veliaj ka sjellë disa pamje nga puna e punonjësve të bashksë për ndriçimin e qytetit.

Çdo natë, në Tiranë paisen me ndriçim dhe disa rrugë e sheshe të tjera, që çdo mëngjes ta gjejë qytetin pak më dinjitoz”, shkruan sot Veliaj në Facebook, duke bashkangjitur në postimin e tij edhe disa fotografi në albumin dixhital: “Respekt për kolegët që e bëjnë natën ditë”.

Shqiptarja.com  17.03.2016

Zona e njohur si “Pallati me Shigjeta” do të ketë ndriçim të ri. Kjo u bë e ditur nga kryetari i bashkisë së Tiranës Erion Veliaj, me anë të një postimi në rrjetin social “Facebook”.

“Ndriçim i ri tek ‘Pallati me Shigjeta’. Faleminderit mjeshtërve për mbështetjen konstante në pastrimin, ndriçimin e zbukurimin e qytetit”, shkruan Veliaj.

Mungesa e ndriçimit është një prej problemeve kryesore në Tiranë, por pritet që shumë shpjet situata të përmirësohet.

Gazeta Shqip,  19.12.2015

Operatori i Shpërndarjes së Energjisë Elektrike në bashkëpunim me bashkinë e Tiranës, kanë kryer një aksion të përbashkët për zhvendosjen e shtyllës së tensionit të lartë, e cila prej vitesh ndodhej në mes të rrugës “Don Bosko” dhe pengonte kalimin normal të qytetarëve dhe makinave.

Administratori i kompanisë OSHEE, Adrian Çela, dhe kryebashkiaku i Tiranës, Erjon Veliaj në prononcimin e tyre për mediat e cilësuan këtë ndërhyrje mjaft të rëndësishme e cila do të sjellë një investim për rehabilitimin e plotë të trotuareve në këtë rrugë.

“Me bashkinë kemi marrë impenjimin madhor, çlirimin e nënstacionit pas hotel “Tirana”.

Të gjithë qytetarët e kanë parasysh se sa gangrenë është kthyer ai nënstacion dhe ne kemi marrë impenjimin që brenda pranverës të nisim punimet për spostimin e tij”, ka deklaruar administratori I OSHEE, Adrian Çela.

Kryetari i Bashkisë së Tiranës tha se kjo frymë bashkëpunimi me OSHEE-në i hap rrugë një investimi të ri, jo vetëm në këtë rrugë, por edhe në zona të tjera të Tiranës.

Kryebashkiaku Veliaj tha se në bashkëpunim me OSHEE është bërë e mundur që të hiqen kabllot ajrore për t’u vendosur nën tokë.

“Në një pjesë të arterieve kryesore të Tiranës, të gjitha kabllot ajrorë janë vendosur nën tokë, për t’u siguruar që më në fund sjellim një erë të re civilizimi në qytetin tonë, duke u shkëputur nga skenat e telave si rrjeta merimangash”, u shpreh Veliaj.

energjia.al 15.12.2015

Buxheti i bashkisë së Tiranës për njësinë numër 2 do të jetë 182 mln lekë të cilat do të shkojnë kryesisht për ndërtimin e rrugëve dhe rehabilitimin e institucioneve arsimore, por edhe krijimine një tregu të ri.

“Në Sauk, fokusin më të madh e kemi në rehabilitimin e ujit të pijshëm. Po planifikojmë ndërtimin e një tregu të ri, si dhe kemi piketuar tashmë një vend për zhvendosjen e tregut, në mënyrë që ata që shesin të kenë mundësi t’i shërbejnë komunitetit me produktet e tyre”, tha Veliaj.

Veliaj tha se një vëmendje të vecante i eshte kuashtuar edhe ndriçimit.

“Kemi konceptuar një ndriçim në masën 85% të zonës. Që në vitin tonë të parë kjo është katër herë më mirë se gjendja aktuale, ku vetëm 20% e zonës ndriçohet”, tha Veliaj.

Një tjetër investim i Bashkisë së Tiranës për njësinë 2 do të jetë mirëmbajtja e rrugëve dhe plotësimi i zgarave e pusetave në masën 75%, projekte për shtimin e gjelbërimit, planifikimin e rindërtimit të dy shkollave 9-vjeçare dhe ndërhyrja, rehabilitimi dhe sigurimi i ngrohjes për 5 kopshte dhe 4 çerdhe.

Ora News,  16.11.2015

Bankers ka kënaqësinë të njoftojë nënshkrimin e Memorandumit të Mirëkuptimit me Bashkinë e Roskovecit, për studimin e fizibilitetit për hartimin e projektit e furnizimit me ujë, për të gjithë banorët e Marinzës.

Ky memorandum mirëkuptimi është i pari i një serie të Partneritetit Publiko-Privat që Bankers shpreson ta çojë përpara këtë partneritet me njësitë vendore në të cilat kompania operon, si pjesë e angazhimit të saj për një zhvillim të qëndrueshëm.

Qëllimi i Bankers është të jetë partner me njësitë vendore, për të ndihmuar në financimin shumë të nevojshëm të studimeve të fizibilitetit për mirëqenien sociale dhe projektet e infrastrukturës në komunitetet ku ne operojmë.

Bankers ka paguar rreth 510 milion dollarë taksa për gjatë 10 viteve të fundit që operon në Shqipëri, ku përfshin mbi 230 milionë dollarë rentë minerare. Njësitë vendore që ndodhen brenda zonës së operacioneve në fushën e naftës, kanë të drejtë kontraktuale të përfitojnë një pjesë të këtyre dollarëve, për t’i shpenzuar në përmirësimin e jetës së familjeve që jetojnë brenda kësaj zone. Sapo studimet e fizibilitetit të kenë përfunduar, njësitë vendore mund të përdorin pjesën e tyre nga taksa e rentës minerare që Bankers i ka paguar shtetit, për të ndihmuar në financimin e këtyre projekteve shumë të nevojshme dhe për të rritur ndikimin pozitiv të operacioneve të naftës brenda këtyre komuniteteve.

Memorandumi do të nënshkruhet në emër të kompanisë nga Z. Mark Hodgson, Zv. President i Bankers dhe Zj. Majlinda Bufi, Kryetare e Bashkisë Roskovec, në mjediset e Bashkisë. Të dy palët bien dakord që të angazhojnë një ekspert si palë të tretë, për hartimin dhe zhvillimin e këtij projekti të përbashkët të furnizimit me ujë në Marinëz, i cili synon të përmirësojë cilësinë e jetës për banorët e këtij fshati.

“Kjo është një marrëveshje historike për komunitetet e Patos-Marinzës. Është hapi i parë ndaj një partneriteti të vërtetë publik-privat  i cili do të kthejë dollarët e paguar nga Bankers ndaj Shtetit, në Patos-Marinëz duke investuar direkt në komunitetet e saj. Këto komunitete meritojnë të përfitojnë nga puna që po zhvillohet këtu dhe ndërkohë që Bankers ka investuar miliona dollarë drejt zhvillimit të komunitetit në mënyrë direkte me programet tona të komunitetit në 10 vitet e fundit, është fantastike të shikojmë një qeveri të përkushtuar për të përdorur dollarët e paguar sipas synimit të tyre, që është shërbimi i popullit shqiptar. Dëshiroj të falenderoj Kryetaren e Bashkisë Bufi për stilin e saj progresiv dhe transparent në qeverisje dhe dëshirën e saj të fortë për të takuar të gjitha nevojat e qytetarëve të saj”, u shpreh Hodgson‏.

Projekti i studimit të fizibilitetit pritet të hartohet në dy muajt e ardhshëm dhe pas aprovimit, do të fillojnë më pas punimet për realizimin e tij. Me këtë investim banorët e Marinzës do të kenë furnizim me ujë të rrjedhshëm në shtëpitë e tyre.

Furnizimi me ujë ka qenë gjithmonë një problematikë dhe një shqetësim për 600 familjet e Marinzës. Si pjesë e angazhimit të vazhdueshëm i Bankers në zonën e Marinzës, kompania është e angazhuar të mbështesë këtë projekt, si në fazën e fizibilitetit ashtu edhe në fazën e zbatimit të projektit.

Bankers dëshiron të falënderojë Kryetaren e Bashkisë Zj. Bufi për përkushtimin e saj ndaj Marinzës dhe punën e saj të vazhdueshme së bashku me Bankers, për ta bërë këtë si i pari Partneritet Publiko-Privat të suksesshëm në rajon.

Bankers përpiqet të jetë një fqinj i mirë për komunitetin ku operon. Gjatë dekadës së fundit, Bankers ka investuar mbi 74 milionë dollarë në projekte mjedisore dhe sociale për përmirësimin e jetës së komunitetit dhe të mjedisit. Këto investime të Bankers janë ndër të parat në Shqipëri, të tilla si ndërtimi i një njësie të trajtimit të mbetjeve dhe menaxhimi i gropave të mbetjeve të naftës, rehabilitimi i 887 vendndodhje pusesh të Albpetrol dhe rehabilitimi i afro 48 hektarë tokë.

Shpresojmë që legjislacioni i ri i miratuar këtë vit nga Qeveria, i cili siguron që dollarët e rentës minerare të paguara çdo vit nga Bankers, të cilët janë një detyrim i shtetit ndaj njësive të vendore, do të shkojnë për investime nga ku do të mund të përfitojnë ata që jetojnë brenda kufijve të këtij aseti kombëtar, siç është përcaktuar edhe në marrëveshjen e nënshkruar nga Bankers në vitin 2004. Ndërkohë, Bankers synon të asistojë ku do të jetë e mundur për të financuar planifikimin dhe mundësimin e ekspertizës vendase dhe të huaj për të maksimizuar impaktin e këtyre projekteve në vitet në vijim.

Shqiptarja.com  17.09.2015