Publisher is the useful and powerful WordPress Newspaper , Magazine and Blog theme with great attention to details, incredible features...

Energjia e paguar për serbët e veriut, shkelje e të drejtave

Komisioni për të Drejtat e Njeriut, Barazi Gjinore dhe Persona të Pagjetur sot ka diskutuar për raportin e Avokatit të Popullit, në lidhje me faturimin e energjisë elektrike të shpenzuar në katër komunat veriore të Kosovës.

Në Komision ka raportuar Avokati i Popullit, Hilmi Jashari, duke bërë një kronologji gjatë hetimit të këtij rasti, nga 7 prilli i këtij viti, tha se kostoja vjetore që kanë paguar qytetarët e Kosovës është diku 8 milionë euro , me arsyetimin e ZRRE-së se KEDS-i ka humbje të mëdha nëse nuk zbatohet edhe ky vendim.

Jashari shtoi se ky vlerësim ka qenë i gabuar dhe diskriminues për të drejtat e konsumatorëve dhe sipas tij, me këtë vendim po dëmtohen qytetarët dhe po krijohen dëme të pa riparueshme.

“Ne në vlerësimet që kemi pasur me ZRRE-në kur kemi parashtruar këtë pyetje , na është thënë pikërisht se kjo ngarkesës 4.5 përqind në faturat e energjisë që janë paguar për veriun, janë futur në nivelin e çmimit, dhe unë supozova që është pikërisht për mos me u diktuar kjo në fatura, sepse çdo qytetarë sigurisht se do ta kishte shfrytëzuar mekanizmin e ankesave.”

“Mirëpo, ka qenë jo korrekte dhe jo transparente sa i përket trajtimit të kësaj çështje. Në anën tjetër është edhe një dukuri tjetër që ne e kemi ngritur me ZRRE-në, sepse 4.5 përqind në nivelin e çmimit me një faturë ta zëmë prej 20 euro, dallon prej asaj që mund të jetë 30 ose 40 euro, sepse nuk është më 4.5 përqind, mirëpo vlera është shumë më e madhe, çështje kjo që shumë lehtë edhe ekspertët munden me vërtetuar”, ka theksuar Jashari.

Për çështjen e kompensimit, Avokati i Popullit ka thënë se mënyra më e mirë është që kjo formë të bëhet në faturat vijuese në vlerën e njëjtë.  Jashari: Kompensimi të bëhet në faturat vijuese në vlerën e njëjtë 48’15 Video “Pa dijeninë e tyre dhe pa ju dhënë mundësinë për të kontestuar një vendim të tillë, (qytetarët) janë ngarkuar me këtë borxh, tani më është detyrë e autoriteteve shtetërore që ta lirojnë qytetarin prej kësaj barre të procedimeve, eventualisht edhe gjyqësore, mirëpo forma më e lehtë që ne kemi propozuar ka qenë kompensimi në formën e reduktimit të nivelit që është paguar në faturat e kaluara, në faturat vijuese në vlerën e njëjtë”, ka deklaruar Avokati i Popullit.

Miljana Nikoliq anëtare e komisionit e  ka pyetur Jasharin nëse në faturat që marrin qytetarët e Kosovës shkruan  shuma e shpenzuar për veriun, Jashari tha se  arsyetimi përse qytetarët nuk e kanë vërejtur ngarkesën, ka qenë për shkak të përfshirjes në çmim.

Mexhide Mjaku deputete nga PDK ka thënë se kjo çështje e diskriminimit duhet të bëhet me një rekomandim dhe të diskutohet në seancën e ardhshme të Kuvendit, në ditën edhe kur do të diskutohet një raport i tillë.

Ajo shtoi se është shkelje ligjore që qytetarët të paguajnë energji elektrike për qytetarët e veriut. Ndërsa deputetja e PDK-së  Luljeta Veselaj tha se 8 milionë euro të paguhen për militantët e atyre që kanë vrarë  shqiptarë në Kosovë, është dy herë shkelje e të drejtave të njeriut.

“Si qytetarë të Kosovës në çdo familje tonë ka prek ky shqetësim dhe ne e kemi vërejtur që faturat e rrymës janë shumë të fryra karshi shpenzimeve, mirëpo nuk e kemi ditur se ku është problemi… Ka qenë edhe më shqetësuese, sepse ka familje që kanë njerëz të vrarë, të humbur që nuk i dinë ku I kanë dhe paguajnë për njerëzit, të cilët ja kanë vrarë familjarët e tyre. Tetë milionë euro ta paguhen për militant të cilët kanë vra kanë përdhunua dhe kanë   dëbuar njerëz prej shtëpive, është dy herë shkelje e të drejtave të njeriut”, ka theksuar Veselaj.

Deputetja e LDK-së Lirije Kajtazi tha kjo çështje është ngritur me të drejtë nga Avokati i Popullit, Hilmi Jashari.  Sipas saj, ky model i shkeljes së të drejtave të njeriut nuk ekziston askund në botë dhe ky diskriminim pa tjetër duhet të ndërpritet. Ajo ka propozuar që në mbledhjen e ardhshme të raportojë edhe bordi i Zyrës së Rregullatorit të Energjisë (ZRRE) në këtë komision parlamentar, për të cilin propozim u pajtuan shumica e anëtarëve të komisionit.

Edhe deputeti Sami Kurteshi nga Vetëvendosje tha se nëse është bërë me vetëdije kjo shkelje e të drejtave të qytetarëve, është vepër penale.

Ndërsa, në bazë të këtyre konstatimeve, Avokati i Popullit ka adresuar tri rekomandime. Në rekomandimin e parë thuhet që ZRRE urgjentisht të ndalë praktikat e kundërligjshme të faturimit të energjisë elektrike të shpenzuar në veri të Republikës së Kosovës tek konsumatorët në pjesën tjetër të vendit.

Në rakomandimin e dytë thuhet që Qeveria, në bashkëpunim me ZRRE-në dhe KEDS-in, të gjejë një mënyrë alternative për t’iu shmangur humbjeve në veri të vendit, duke trajtuar të gjithë konsumatorët në mënyrë të barabartë sipas normave kushtetuese dhe ligjore kundër diskriminimit.

Po ashtu në rekomandimin e tretë të Avokatit të Popullit thuhet që ZRRE-ja, në pajtim me Ligjin për Rregullatorin e Energjisë, të nxjerrë një vendim, me anë të të të cilit do të miratohej zbritja e tarifave deri në atë masë që do të mundësonte kompensimin e konsumatorëve të cilët, padrejtësisht, janë faturuar, dhe vazhdojnë të faturohen, për energjinë elektrike të shpenzuar në katër komunat e veriore.  Përveç anëtares Miljana Nikoliq nga Lista Serbe, anëtarë tjerë të Komisionit për të Drejtat e Njeriut, e kanë votuar raportin e Avokatit të Popullit.

Agjensia e lajmeve ekonomia,  13.12.2017