info@energjia.al

Reshjet e shiut nuk sollën vetëm fatkeqësi në Shqipëri, por kishin edhe të mira.

Ato kanë rritur prodhimin e energjisë në hidrocentralet e kaskadës së Drinit, ndërsa tepricat po depozitohen në Kosovë, ani që mosvënia në funksionim e linjës së interkonjeksionit 400 kilovolt në mes dy vendeve limiton sasinë e transmetimit të energjisë, raportojnë mediat në Shqipëri.

Drejtori i Divizionit të Shpërndarjes në Korporatën Elektroenergjetike Shqiptare (KESH), Ilir Bela, tha se pasi janë plotësuar nevojat e Shqipërisë me energji elektrike është eksportuar 2.9 milionë euro vetëm në 5 ditë, si dhe janë depozituar rreth 14 mijë megavat energji në Kosovë.

Telegrafi,  05.12.2017

Korporata Energjetike e Kosovës (KEK) i bënë thirrje banorve të fshatrave Hade e Shipitullë të shfrytëzojnë të drejtën e tyre që brenda afateve ligjore të lajmohen në zyrat e KEK-ut Departamenti Pronës, për të nënshkruar marrëveshjet për zhvendosje jo me vone se deri me 15 dhjetor 2017.

Qeveria e Republikës së Kosovës ka marrë vendim për shpronësimin e këtyre zonave kadastrale dhe tani është në të mirën e banorëve dhe të gjitha palëve të interesit që ky proces të përfundoj sa më shpejt, pra brenda afateve ligjore dhe mos të kemi edhe më tutje vonesa që rrezikojnë funksionimin e mirëfilltë të korporatës.

Përveç kësaj, vazhdimi i vonesave për marrëveshje nuk është as në të mirën e banorëve por edhe është duke ndikuar  direkt edhe në stabilitetin financiar të korporatës dhe punëtorëve e mbi të gjitha po e rrezikon vendin të mbetët pa energji elektrike ose të paguajnë me çmimin shumëfish me të lartë për import të energjisë elektrike.

Për të dalë nga kjo situatë, KEK-u edhe një herë i bënë thirrje banorëve të fshatrave Hade e Shipitullë që të reflektojnë karshi ofertave shumë të favorshme të KEK-ut dhe Qeverisë së Republikës së Kosovës duke nënshkruar sa më parë marrëveshjet për zhvendosje.

Ky veprim mbi të gjitha duhet të shihet si obligim e interes nacional por edhe të pajtohen më të gjitha institucionet relevante dhe palët kryesore të interesit të cilat në vazhdimësi kanë bërë përpjekje që banorëve të dy këtyre fshatrave t’i ofrohen kushte me standardet më të larta ndërkombëtare për zhvendosje.

Agjensia e lajmeve ekonomia,  04.12.2017

Ndërmarrja e Ujësjellës Kanalizimeve në Tiranë ka njoftuar banorët e zonës së Kombinatit se mungesa e furnizimit me ujë ka ardhur si pasojë e ndërhyrjeve në infrastrukturë.

Sipas UKT, është Operatori i Shpërndarjes së Energjisë Elektrike që po kryen një remont në depon e ujit të zonës periferike dhe për rrjedhojë ka pasur ndërprerje të vazhdueshme në furnizim.

UKT paralajmëron se për këtë arsye, zona e Kombinatit do të ketë furnizim të përkohshëm me ujë deri në përfundim të punimeve.

“Operatorët e OSHEE dhe të UKT-së janë të angazhuar maksimalisht dhe po punojnë për të rikthyer situatën në normalitet”, thuhet në një njoftim për shtyp.

Scan TV,  05.12.2017

E gjithë Shqipëria u përball me një situatë të pazakontë prej tre ditësh, ku reshjet e dendura të shiut ‘pushtuan’ vendin. Pothuajse i gjithë vendi ‘notoi’ nën ujë, për shkak të përmbytjeve masive, që lanë pas jo pak pasoja.

Gjatë këtyre ditëve nuk ka dhe angazhimi i madh i ushtrisë, policisë, por edhe punonjësve të OSHEE, të cilët në disa raste iu desh të luftonin me ujin për të shpëtuar banorët e përmbytur apo për t’iu risjellë atyre energjinë elektrike, pasi jo vetëm mes ujit, por një pjesë e tyre mbetën dhe pa drita.

Një rast i tillë shihet dhe në videon e mëposhtme, e cila është kthyer në virale në rrjet dhe është shpërndarë nga shumë media online, ku një punonjës i OSHEE rrezikon jetën e tij për t’iu sjellë dritat qytetarëve. Videoja është regjistruar në fshatrat e Lunxhërisë dhe ky hero i OSHEE nuk pyet për jetën, por sfidon dallgët e mëdha të ujit për të kryer misionin e tij.

Shqiptarja.com  05.12.2017

Çmimet e naftës e kanë filluar javën në rënie, për shkak të rritjes së aktivitetit të shpim-kërkimit në Shtetet e Bashkuara të Amerikës. Por megjithatë, humbjet po kufizohen nga vendimi i OPEC dhe vendeve të tjera prodhuese për të shtyrë marrëveshjen për uljen e prodhimit, deri në fund të vitit 2018.

Numri i puseve aktive në SHBA u rrit në 749, gjatë javës që u mbyll më 1 dhjetor, niveli më i lartë që nga shtatori i këtij viti. Kontratat “futures” për shkurtin të naftës Brent të Londrës ranë në rreth 63.2 dollarë për fuçi, ndërsa nafta bruto amerikane tregtohet pranë 57.7 dollarë për fuçi.

Megjithatë, dy bençmarkët kryesorë po qëndrojnë pranë nivelit më të lartë në 2 vitet e fundit. Numri i puseve aktive në SHBA është rritur ndjeshëm, gjatë këtij viti, pasi në të njëjtën periudhë të një viti më parë, puse aktive ishin 477.

Gjatë 2017, kompanitë e energjisë kanë rritur ndjeshëm shpenzimet e tyre, për aktivitetet e shpim-kërkimit, për shkak të rritjes së çmimeve të naftës. Analistët mendojnë se, reagimi i tregut deri më tani ka qenë pozitiv ndaj vendimit të OPEC, për të shtyrë marrëveshjen për uljen e prodhimit.

Në marrëveshje parashikohet edhe rritja e prodhimit nga vendet anëtare, nëse tregu mbinxehet. Zyrtarët rusë kanë shprehur vazhdimisht shqetësimin se, rritja e çmimeve mund të inkurajojë kompanitë amerikane të prodhojnë më shumë naftë argjilore.

Gjatë muajit shtator, prodhimi në SHBA u rrit në 9.5 milionë fuçi në ditë, niveli më i lartë që nga prilli i vitit 2015. Ndërsa niveli më i lartë, referuar të dhënave të qeverisë amerikane, është regjistruar në vitin e largët 1970, në një total prej 9.6 milionë fuçi në ditë.

Scan Tv,  05.12.2017

Situata e furnizimit me energji elektrike në veri është e stabilizuar, pas avarive të shkaktua nga reshjet e shiut dhe dëborës.

Lajmi u dha nga Operatori i Shpërndarjes së Energjisë Elektrike ku ndër të tjera në një njoftim të fundit thuhet: “Në zonën e Dukagjinit, ku përfshihet Thethi, Pulti, Shoshi, etj u vendos në punë HEC Ndërlys (privat), i cili pësoi avari për shkak të bllokimit të turbinës nga rrëshqitja e dherave. Nga ana e OSHEE u morën masat me bazë materiale dhe staf shtesë, duke sistemuar disa linja dhe vendosjen e dy transformatorëve”, thuhet në njoftim.

Sakaq, të gjithë fiderat e zonës së Koplikut punojnë normalisht dhe se kabina e fundit pa energji në Vermosh u vu në punë, pavarësisht kushteve të motit.

Scan Tv,  05.12.2017

Çmimet e naftës shënuan rënie mëngjesin e ditës së sotme.

Treguesit referencë për naftën e papërpunuar europiane, Brent, ranë me 25 cent ose me 0.4 për qind, duke u tregutar me 62.20 dollarë për fuçi.

Treguesit referencë për naftën e papërpunuar amerikane, WTI, ranë me 20 cent ose me 0.4 për qind dhe u tregtuan me 57.27 dollarë për fuçi.

Revista Monitor,  05.12.2017

Rrjeti i mbrojtjes së të drejtave të njeriut dhe mjedisit në Europën Qendrore dhe Lindore dhe Komiteti i Helsinkit në Shqipëri vërejnë parregullsi procedurale të shumta nga Gazsjellësit Trans-Adriatik. Detyruan fermerët që të pranojnë kompensimin përballë kërcënimit për shpronësim nga shteti

Një raport i publikuar të enjten nga Bankëatch zbuloi se pronarët shqiptarë të tokave të prekura nga Gazsjellësi Trans-Adriatik, TAP janë kompensuar në mënyrë të zhdrejtë dhe jotransparente. Sipas monitorimit të kryer në maj 2017 nga rrjeti i mbrojtjes së të drejtave të njeriut dhe mjedisit në Europën Qendrore dhe Lindore, Bankëatch, dhe Komiteti i Helsinkit në Shqipëri u vërejtën parregullsi procedurale të shumta nga ana e TAP. “Përveç niveleve të pamjaftueshme të kompensimit, shkeljet që kemi mësuar varionin nga procesi jo-transparent i kompensimit te mungesa e ndihmës ligjore dhe administrative dhe te intimidimi dhe parregullsitë e dyshimta në procesin e certifikimit të tokës, ku kompania është përfshirë,” thuhet në raportin e Bankëatch.

“Bazuar në gjetjet tona, TAP ngre shqetësime serioze në lidhje me përputhjen me të drejtën themelore të pronës së individëve,” vazhdon raporti. Bankëatch thotë se ashtu si në vitin 2016, edhe në 2017-ën ende shumica e fermerëve ishin të pakënaqur dhe pretendonin se kompensimi nuk mbulonte humbjet e të ardhurave të tyre dhe pronës. Mungesë transparence është vërejtur nga raporti edhe në normat e kompensimit në kontratat individuale të fermerëve, ku nuk është i qartë kompensimi për hektar apo pemë. Marrëveshjet e kompensimit të paraqitura te fermerët nuk përmendin fitimin e munguar nga asetet e patundshme, të cilat duan një kohë të gjatë të sjellin përfitime.

“Ndryshe nga deklaratat e TAP, asnjë nga dhjetëra oferta kompensimet e ofruara nga TAP nuk ofrojnë detaje për asetet e kompensuara, por vetëm një shumë totale të parcelës së prekur,” thotë raporti. Kontaktuar nga BIRN, TAP argumentoi se i përmbahet besimit të vet për transparencë, dialog dhe krijimit të marrëdhënieve afatgjata me të gjitha komunitetet e prekura. “Personat e prekur janë konsultuar në lidhje me të drejtat e kompensimit dhe mënyrën e llogaritjes,” u shpreh zyra e Gazsjellësit Trans-Adriatik në Shqipëri, duke listuar fazat e krijimit të normave të kompensimit, prezantimit të tyre, gjatë inventarit të aseteve personale, në takimin e komunitetit për kompensimin dhe takimet individuale të kompensimit. Tubacioni Trans-Adriatik është pjesa më perëndimore e Korridorit Jugor të Gazit, një projekt gazsjellësi që synon të dërgojë gazin nga Azerbajxhani në Europë. Gazsjellësi TAP kalon në Greqi, Shqipëri dhe përmes detit Adriatik shkon në Itali. Në të tjera vendet, njerëzit e prekur kanë shprehur kundërshtime ndaj projektit.

Duke qenë se konsiderohet një “projekt me interes të përbashkët” nga BE dhe Unioni Energjetik, projekti aktualisht po merret në konsideratë për të huazuar një kredi gjigande prej 2.5 miliard eurosh nga Banka Europiane e Zhvillimit dhe Banka Europiane për Rindërtim dhe Zhvillim. Për të përfituar nga kjo kredi, TAP duhet t’u nënshtrohet standardeve të institucioneve financiare ndërkombëtare për kompensimin, sipas të cilave kompensimi duhet të llogaritet në bazë të vlerës së tregut dhe të përfaqësojë zëvendësim të plotë të vlerës, përfshirë humbjen e të ardhurave derisa të kthehet toka në prodhim të plotë dhe të ofrohen investimet e nevojshme fillestare si farat e reja dhe infrastruktura bujqësore.

Raporti i Bankëatch ngre të tjera dyshime lidhur me certifikatat e pronësisë, ku TAP pati akses në Zyrën e Regjistrimit të Pasurisë së Patundshme për të krijuar dhe përditësuar të dhëna kadastrale brenda korridorit të gazsjellësit. Raporti thotë se pati raste të ndryshimeve të kufijve dhe madhësisë së tokës në certifikatat e reja që lanë të pakënaqur dhe pa shpjegime pronarët. Ai vëren se pronarëve të tokave iu shkel e drejta e pronës sipas ligjit shqiptar dhe të drejtave ndërkombëtare përmes deprivimit arbitrar të pronës.

Raporti ngre pikëpyetje pse TAP pati akses në ndryshimin e të dhënave kadastrale në përfitim të vet pa autoritet mbikëqyrës dhe pse nuk iu dha shpjegime personave të prekur për ndryshimet dhe kompensimet e humbjes së tokës. Pa ndihmë dhe pa mundësi ankimi, personave të prekur nga gazsjellësi nuk iu ofrua ndihmë ligjore dhe administrative e paanshme, thotë Bankëatch, duke shtuar se në disa raste fermerët që i rezistuan nënshkrimit të marrëveshjes me TAP u kërcënuan se do t’u shtetëzohej prona. “Rezistenca u pakësua nga TAP përmes referimit të procesit kombëtar të shpronësimit që do të aplikohej në rast të refuzimit të kompensimit. Kjo u konsiderua si kërcënim nga fermerët, të cilët hoqën dorë nga ankimet nga frika e dhunës së autoriteteve shtetërore,” thotë raporti.

Nga ana e tij, TAP i tha BIRN se i përgjigjet të gjitha ankesave brenda 7 ditëve dhe merr kohë për të hetuar çështjet e tyre dhe për të kthyer një përgjigje përfundimtare brenda 30 ditëve nëse e lejon natyra e ankimit. Projekti ndërkombëtar TAP kalon në Greqi, Shqipëri dhe Itali, ku duke krahasuar metodologjinë e kompensimit fermerët shqiptarë pretendojnë se janë diskriminuar krahasuar me fqinjët e tyre grekë. Sipas Bankëatch parimet e përgjithshme të kompensimit të propozuara nga TAP janë thuajse të njëjta në të dyja vendet dhe nuk ka asnjë shpjegim përse ka dy formua të ndryshme për këto vende në lidhje me kompensimin. Së fundmi, Bankëatch i bëri thirrje institucioneve financiare europiane që të mos e mbështesin një projekt që shkel të drejtat e njeriut.

“Bazuar në gjetjet tona në Shqipëri, TAP ngre shqetësime serioze në lidhje me respektimin e të drejtës thelbësore të pronës,” thotë ai. Rrjeti Bankëatch rekomandoi që të krijohet një grup pune që do të shqyrtojë metodologjinë e kompensimit në mënyrë që projekti TAP të mos dëmtojë mjetet e jetesës së personave të prekur. Gjithashtu “TAP dhe kompania AG duhet të ofrojë kompensime shtesë për rastet kur pronarët nuk kanë marrë kompensimin e plotë bazuar në vlerën e tregut, përfshirë humbjen e të ardhurave deri në prodhimin e plotë dhe investimet e nevojshme fillestare”. Bankëatch gjithashtu kushtëzon TAP në marrjen e borxhit europian derisa të informojë të prekurit për mekanizmat e ankimimit, si dhe derisa të rishqyrtojë marrëveshjet me pronarët e tokave në mënyrë që këto të respektojnë standardet shoqërore dhe ligjin ndërkombëtar, përfshirë të drejtën e pronësisë. Rrjeti i kërkoi TAP AG të japë informacion për ankesat e marra dhe mënyrën si janë zgjidhur ato.

Gazeta Shekulli,  05.12.2017