info@energjia.al

Përfundimisht është pezulluar vendimi i Zyrës së Rregullatorit të Energjisë, i cili i detyronte qytetarët  që nëpërmjet faturave të energjisë të paguajnë për rrymën që nuk e shpenzojnë vetë, por që shpenzohet në veri të vendit.

Këtë vendim e ka marrë edhe Gjykata e Apelit pas asaj të themelores, pas ankesës së bërë nga Avokati i Popullit. Ky i fundit thotë se më vendim gjyqësor i jepet fund diskriminimit dhe dëmeve që u janë shkaktuar qytetarëve nga ZRRE-ja.

“Shkalla e parë ka vendos pro kërkesës sonë, edhe ndërkohë është dhënë mundësi palës tjetër që të bën ankesë në gjykatën e apelit. Para disa ditësh përfundimisht edhe gjykata e Apelit e ka miratuar kërkesën tonë prapë edhe me fjalë tjera është pezulluar ekzekutimi i këtij vendimi”, deklaroi Ilmi Jashari, Avokat i Popullit.

Por, zëdhënësja e zyrës së Rregullatorit, Adelina Murtezaj, nëpërmjet telefonit tha se në mungesë të bordit funksional, nuk mund të ketë zbatim të vendimit gjyqësor, që pezullon vendimi e ZRRE-së.

Për avokatin e popullit, ky qëndrim i Zyrës së Rregullatorit është absurd, dhe prokuroria e shtetit duhet të merret me këtë çështje nëse nuk zbatohet vendimi i Gjykatave

“Ajo çka na brengos ka qenë vlerësimi që gjoja se ZRRE së në mungesë të bordit nuk mund të marrin një vendim, për mua kjo ka qenë absurde se sistemi gjyqësor i merr vendimet dhe janë të plotfuqishme dhe nuk varen nga bordi apo jo, sepse bordi nuk është i autorizuar për të vlerësoj vendimin gjyqësor. Ata duhet ta zbatojnë si të tillë. Duhet ta zbatoj zyra ligjore, duhet ta vë menjëherë në zbatim…Mendoj që Prokuroria do të ketë shumë punë nëse ky vendim nuk zbatohet, presim tash të shohim se cilët janë hapat që kjo zyre do të merr edhe do të ketë një njoftim zyrtar nga vet gjykata”, deklaroi Jashari.

Sipas Avokatit të Popullit, qytetarët kanë paguar rreth 8 milionë euro në vit për rrymën e shpenzuar në veri, që i bie se nga viti 2012 kur është marrë vendimi nga ZRRE, qytetarët kanë paguar rreth 40 milionë euro për rrymën të cilën fare nuk e kanë shpenzuar.

Scan TV,  06.11.2017

Çmimet e naftës e kanë filluar në rritje edhe këtë javë, duke prekur nivelin më të lartë që nga korriku i vitit 2015, ndërkohë që princi i Arabisë Saudite çimentoi pushtetin e tij, gjatë fundjavës, përmes goditjes anti-korrupsion, që përfshinte arrestime të rangut të lartë.

Kontratat “futures” të naftës Brent të Londrës tregtohen pranë 62.5 dollarëve për fuçi, rreth 40% më lart se niveli minimal i këtij viti, i regjistruar në qershor.

Nafta Bruto amerikane po tregtohet pranë 56 dollarëve për fuçi, niveli më i lartë në 2 vitet e fundit. Princi i kurorës, Mohammed bin Salman, që pritet të jetë mbreti i ardhshëm i Arabisë Saudite, ka forcuar pozitat e tij në pushtet, nëpërmjet një aksioni anti-korrupsion, duke arrestuar anëtarë të Mbretërisë, ministra dhe investitorë, përfshirë edhe miliarderin Alwaleed bin Talal dhe kreun e Gardës Kombëtare, Princin Miteb bin Abdullah.

Sipas analistëve, ky aksion konsolidon procesin e reformimit, pjesë e së cilës është edhe dëshira për të rritur çmimet e naftës. Reformat e Bin Salman përfshijnë edhe një plan për të listuar një pjesë të aksioneve të kompanisë gjigante të naftës, që zotërohet nga shteti, Saudi Aramco, vitin e ardhshëm dhe çmime më të larta të naftës.

Përsa i përket informacioneve të tjera, kompanitë amerikane të energjisë, reduktuan aktivitetin e shpim-kërkimit gjatë javës që u mbyll më 3 nëntor.

Rënia vjen në një kohë që Organizata e Vendeve Eksportuese të Naftës, OPEC, dhe vendet e tjera prodhuese kanë rënë dakord të ulin prodhimin me 1.8 milionë fuçi në ditë, deri në mars të vitit të ardhshëm.

Scan Tv,  06.11.2017

Qeveria e Arabisë Saudite thotë se do të ndërtojë një mega-qytet prej 500 miliardë dollarësh. Qëllimi i ndërtimit të këtij qyteti është që të diversifikohet ekonomia e vendet, për t’u përqendruar më pak në industrinë e naftës.

Projekti i quajtur NEOM do të shtrihet në 10.230 kilometra katrorë, nga ku do të zhvillohet 100% energjia e rinovueshme. Arabia Saudite është eksportuesi më i madh i naftës në botë, por çmimet e ulëta të saj e kanë bërë më të vështirë për vendin shlyerjen e pagesave të punonjësve në këtë sektor.Tashmë qeveria e Arabisë Saudite ka dalë me një projekt që mund të japë një nxitje për ekonominë e saj: Një mega-qytet prej 500 miliardë dollarësh që do të lidhet me Jordanin dhe Egjiptin, ku do të përdoret plotësisht energjia e rinovueshme.

Princi i Kurorës Saudite Mohammed bin Salman njoftoi projektin në konferencën e Iniciativës për Investime të Ardhshme në Riad.

Biznesi dhe qyteti i fokusuar në industri do të përfshijë 10.230 kilometra katrorë, që do të thotë për këtë projekt do të përdoret një hapësirë 33 herë më e madhe se Nju Jorku.

“Qëllimi më i madh i NEOM është të zvogëlojë mbështetjen e Arabisë Saudite në eksportet e naftës, duke zgjeruar ekonominë e vendit përtej naftës”, tha Bin Salman në konferencë.

Qyteti do të fokusohet në një sërë industrish, duke përfshirë energjinë, ujin, bioteknologjinë, ushqimin, prodhimin e avancuar dhe argëtimin. Edhe pse është lancuar si projekt, Arabia Saudite nuk ka bërë ende publik masterplanin e NEOM.

Scan Tv,  06.11.2017

Çmimet e naftës shënuan nivelin e tyre më të lartë mëngjesin e kësaj të hëne, njëkohësisht edhe nivelin e tyre më të lartë që prej 2015.

Treguesit referencë për naftën e papërpunuar europiane, Brent, u tregtuan me 62.90 dollarë për fuçi. Një çmim i tillë ishte rreth 40 për qind më i larë se ai i shënuar në korrik.

Treguesit referencë për naftën e papërpunuar amerikane, WTI, u tregtuan me 56.15 dollarë për fuçi, niveli i tij më i lartë që prej korrikut 2015.

Revista Monitor,  06.11.2017

Çmimet e karburanteve kanë shënuar një rritje me rreth 5 lekë për litër ditët e fundit, duke kaluar sërish mbi 170 lekë për litër, kryesisht në zonën Tiranë-Durrës.

Në pikat e tregtimit të Kastrati, tregtuesi më i madh në vend, një litër naftë tregtohet aktualisht me 172 lekë, nga 167 lekë që ishte më parë, ndërsa një litër benzinë shitej me 173 lekë, nga 168 lekë.

Edhe Eida, operatori i dytë më i madh në treg e ka shtrenjtuar naftën dhe benzinën po me pesë lekë për litër,  përkatësisht në 171 dhe 172 lekë.

Në pikat e tregtimit të Bolv Oil dhe Gega, karburanti tregtohet me rreth 168-170 lekë për litër.

GULF dhe Alpet e kishin shtrenjtuan naftën që disa javë më parë në 173-175 lekë për litër.

Aktorët e tregut pohojnë se dy janë arsyet e këtij shtrenjtimi:

Së pari, tarifa e rilicencimit të pikave të karburantit, e cila edhe pse u rrezua fillimisht nga Gjykata Kushtetuese u rivendos sërish në nivele më të ulëta, përkatësisht 3 milionë lekë për pikat e tregtimit në kryqytet dhe 1 milion lekë në rrethe. Për Tiranën kjo tarifë filloi të mblidhej nga Bashkia pak javë më parë, në muajin shtator. Tregtuesit paralajmëruan se ajo do të reflektohej në çmim, teksa është një tarifë që do paguhet nga konsumatori fundor. Tregtuesit, siç e argumentuan dhe në Kushtetuese thanë se qëlimi i tarifës është thjesht të mbulojë shpenzimet administrative për kryerjen e shërbimit përkatës, por në këtë rast ajo u vendos jashtëzakonisht e lartë dhe si rrjedhojë ata e reflektuan në çmim.

Arsyeja e dytë lidhet me bursat ndërkombëtare, ku nafta ka arritur në nivelet më të larta që nga qershori i vitit 2015. Treguesi referencë i naftës europiane, Brent, tregtohej në fund të javës me gati 63 dollarë për fuçi.

Shqipëria renditen ndër vendet me çmimet më të larta në naftës në rajon dhe Europë, si rrjedhojë e barrës së lartë të taksave që rëndojnë mbi të. Rreth 63% të çmimit të naftës e përbëjnë taksat.

Sipas të dhënave të Global Price Petrol, të përditësuara në 30 tetor, Shqipëria renditej e 27-a në botë përsa i përket vendeve me çmime më të larta të benzinës.

Revista Monitor,  06.11.2017

Kreta, ishulli më i madh i Greqisë, do të bëhet një kryqëzim i ndërlidhjes së energjisë dhe një shembull që duhet ndjekur në përputhje me iniciativën e Energjisë së Pastër të Bashkimit Europian për Ishujt e BE-së, nëse zbatohet një plan ambicioz për të kryer energji nga Afrika dhe Evropa.

Kompania Green Power 2020 ka hartuar një plan për transmetimin e energjisë diellore nëpërmjet kabullit nënujor nga porti i Tobruk në Libi në Kretë – i cili gjithashtu pritet të lidhet me rrjetin Attica në të ardhmen – dhe mbështetet në politikën e BE për zbatimin e tij, tha themeluesi i kompanisë, Gassan Anbar,për Kathimerini.

“Me 2.700 ishujt e saj, Greqia është një pjesë e domosdoshme dhe jetike e asaj iniciative evropiane për zhvillimin e ishujve evropianë dhe zvogëlimin e varësisë së tyre të kushtueshme ndaj lëndëve djegëse fosile”, tha Anbar.

Ai paraqiti planin e kompanisë së tij në Forumin e Ishujve të Energjisë së Pastër për BE, që u zhvillua në Hania në Kretë dhe tani thekson se projekti “Leg 1” që do të lidhë Tobruk me Kretën nëpërmjet një ure nënujore prej dy mijë megavat dy rrugë lidhja nuk do të ketë ndikim në buxhetin e shtetit grek pasi mbështetet në fondet private. Ai gjithashtu theksoi se kompanitë greke do të preferohen për punën ndërtimore të kërkuar.

Revista Monitor,  11.06.2017

Që pas privatizimit, rafineria e përpunimit të thellë të naftës, ARMO, është shndërruar në një burim evazioni, për shkak se kompanitë, që e kanë administruar, nuk kanë paguar në mënyrë periodike detyrimet në shtet.

Për rrjedhojë, ARMO  dhe kompanitë që e kanë administruar atë kanë krijuar në vite rreth 33  miliardë lekë (rreth 240 milionë euro) detyrime tatimore, të cilat me procesin e fshirjes zbritën në 13.2 miliardë lekë në fund të shtatorit 2017, sipas tabelave të publikuara nga tatimet për kompanitë që kanë borxhin më të madh tatimor në vend. Vetëm në 2017-n, kompanitë e lidhura me ARMO-n krijuan 27 milionë euro detyrime të reja (11% e totalit).

Sipas një raporti të tatimeve në lidhje me borxhin tatimor shihet se, ARMO kishte 21 miliardë lekë detyrime të mbartura deri në fund të vitit 2016. Një pjesë e detyrimit është krijuar në momentin kur ajo administrohej nga Taçi Oil, e cila është në proces falimenti dhe me pak mundësi për të rikuperuar detyrimin. Por me falimentin e Taçi Oil dhe shitjen e ARMO-s tek azerët e Heaney Assets Corporation në gusht 2013, edhe kompanitë që e morën në përdorim vijuan me kulturën e mospagimit të taksave. Detyrime të larta krijuan edhe nënkontraktorët. Borxhin më të lartë e krijoi kompania Deveron që, sipas tatimeve, deri në fund të vitit 2016 kishte akumuluar mbi  7 miliardë lekë detyrime në tatime.

Deveron Oil është krijuar në fund të vitit 2013, sipas ekstraktit në QKR, por që u rrit me shpejtësi në 2014-n e 2015-n. Qarkullimi i saj vjetor ishte 10.7 miliardë lekë në 2014-n dhe 11 miliardë lekë në 2015-n, sipas tatimeve, duke u katapultuar me shpejtësi në 20 kompanitë më të mëdha në vend. Deveron Oil është 100% në pronësi të Deveron Advisor Corp dhe aksionet e saj janë aktualisht të bllokuara nga urdhra të shumë të përmbaruesve për llogari të doganës, tatimeve e të tretëve.

Detyrimet e ARMO u ulën në mënyrë drastike me procesin e fshirjes së detyrimeve që nisi në vjeshtë të vitit të kaluar, nga 21.2 mld lekë në 9.5 mld lekë, ndërsa Devenon nuk figuron më në listën e debitorëve në vitin 2017, sipas tabelave të publikuara nga tatimet.

Vetëm në vitin 2017 u shtuan 27 milionë euro detyrime të reja

Teksa nga “aministia”, detyrimet e ARMOs janë ulur me shumë se 55%  shihet se kompania që aktualisht administron ARMO-n, IRTC, vetëm në një vit ka akumuluar detyrime ndaj tatimeve në vlerën e 3.7 miliardë lekëve ose 27 milionë euro.

Në shtator të 2016, Jonian Refining dhe Trading Co. –IRTC SH.A mori në shfrytëzim rafinerinë problematike të naftës, ARMO. Kompania rezulton e regjistruar off-shore në ishujt britanikë Virgin. Transaksioni mbeti i paqartë, teksa zyrtarisht 80% të ARMO-s i kanë ende azerët e Heaney Assets Corp., që blenë 80% të aksioneve nga Taçi Oil (Anika Enterprises SA) në gusht 2013.

Ekspertë të tregut pohojnë se me ARMO-n është abuzuar sistematikisht. Kompanitë që e marrin atë në përdorim nëpërmjet qirasë apo marrëveshjeve me bankat e shfrytëzojnë dhe ndërkohë nuk shlyejnë detyrimet ndaj shtetit.

Sipas të dhënave nga Ministria e Financave, në fund të shtatorit 2017 nafta e prodhuar nga ARMO zuri 30 për qind të tregut, teksa eksporton edhe nga Kosovë.

Nafta vendase, sipas të dhënave të publikuara për 5-mujorin nga Ministria e Financave rezulton të kishte paguar vetëm akcizën dhe jo TVSH-në. Sipas të dhënave të 5-mujorit, të përpunuara në gusht nga Monitor, bazuar në informacionin zyrtar të financave, rezultonte se nga prodhimi vendas i naftës prej 69 mijë tonë ishte paguar vetëm rreth 40 lekë për litër (pra vetëm akciza, që është fikse 37 lekë për litër, por pagesa varion në bazë të densitetit të deklaruar të naftës), ndërkohë që taksimi minimal për një litër naftë është minimumi 80 lekë për litër (përfshirë TVSH-në që është 20%, taksë qarkullimi fiske prej 27 lekë për litër dhe taksë karburanti prej 3 lekë për litër). Për një prodhim prej rreth 66 mijë ton më shumë, me një çmim minimal prej 140-150 lekë për litër, TVSH e arkëtuar shtesë për 5 mujorin nga nafta vendase duhet të ishte të paktën 2-2.2 miliardë lekë.

Revista Monitor,  06.11.2017