info@energjia.al

Çmimet e naftës janë stabilizuar në sesionin e sotëm, duke iu rikthyer fitimeve, për shkak të pritshmërive se, Arabia Saudite dhe Rusia do të shtyjnë në kohë marrëveshjen për uljen e prodhimit, përtej marsit të vitit të ardhshëm.

Megjithatë, eksportet rekord nga Shtetet e Bashkuara të Amerikës kanë kufizuar fitimet. Nafta Brent e Londrës ka fituar mbi 0.5% të vlerës dhe tregtohet pranë 56 dollarë për fuçi. Ndërsa nafta Bruto amerikane po tregtohet pranë 50 dollarëve për fuçi.

Presidenti rus, Vladimir Putin deklaroi se, nevojitet një angazhim tjetër i OPEC dhe vendeve të tjera prodhuese, për të shtyrë përtej marsit të 2018, marrëveshjen për uljen e prodhimit, në mënyrë që raporti kërkesë-ofertë të balancohet dhe çmimet të rriten.

Deklarata vjen në vigjilje të vizitës së Mbretit Salman në Moskë. Ndërkohë, Administrata për Informimin mbi Energjinë në Shtetet e Bashkuara deklaroi se, eksportet e naftës bruto u rritën në 1.98 milionë fuçi në ditë, javën e kaluar, nga 1.5 milionë fuçi që ishte rekordi i javës paraardhëse.

Scan Tv,  05.10.2017

Ishte dhjetori i vitit 2016 kur qytetarët e Prishtinës u alarmuan për shkallën e lartë të ndotjes së mjedisit në kryeqytet. Duke u bazuar fillimisht në të dhënat e monitoruesit të cilësisë së ajrit nga Ambasada Amerikane në Prishtinë, u konfirmua se gjendja e ajrit është në nivele të larta të ndotjes.

Përveç kushteve atmosferike, termocentraleve të vjetra dhe gazrave që lëshojnë veturat e vjetra në qarkullim, një faktor tjetër i ndotjes ishte konstatuar të jetë edhe ngrohja me lëndë djegëse, siç është thëngjilli.

Ministrja e Mjedisit dhe Planifikimit Hapësinor, Albena Reshitaj, ka deklaruar se një nga prioritetet në mandatin e saj, do të jetë ngritja e cilësisë së ajrit.

Andaj, ndër masat e para në këtë drejtim, ajo ka përmendur ndalimin e përdorimit të thëngjillit për ngrohje nga bizneset dhe ekonomitë familjare.

Kryeshefi ekzekutiv i Agjencisë për Mbrojtjen e Mjedisit të Kosovës, Ilir Morina, i ka thënë Radios Evropa e Lirë, se një vendim i tillë do t’i kontribuonte shëndetit të njerëzve, duke e ruajtur mjedisin, sidomos gjatë stinës së dimrit kur kushtet atmosferike e rëndojnë gjendjen e ajrit. Sipas tij, gradualisht duhet të fillohet me alternativa të tjera për ngrohje.

“Thëngjillin mund ta zëvendësojnë me dru, mund ta shfrytëzojnë më pak, mund ta shfrytëzojnë në ditët kur janë më të pastra, jo në momentet kur kemi javën e smogut. Do të pretendohet të arrihet një kontroll i shtuar, një inspektim i shtuar dhe një dënim i keqpërdoruesve“, ka thënë ai.

Bazuar në të dhënat e fundit nga rezultatet në terren, Morina ka konstatuar se për muajt, korrik dhe gusht, gjendja e ajrit ishte e qëndrueshme për kah cilësia. Ndërkaq, shqetësimet rreth cilësisë së ajrit rriten gjatë stinës së vjeshtës.

Por, pavarësisht paralajmërimeve nga ministrja e Mjedisit dhe Planifikimit Hapësinor, Morina thotë se nuk ka ende ndonjë datë specifike se nga kur do të fillonte të zbatohej vendimi për ndalimin e thëngjillit për ngrohje.

“Gjithçka është duke u bërë që të përgatitemi për nëntorin, dhjetorin, janarin, sepse ne e dimë se si do të jetë gjendja. Ne tanimë kemi përvojë 10 vjeçare. Çdo vit është përmirësuar gjendja e cilësisë së ajrit në Kosovë, falë vendosjes së filtrave të rinj, falë vendimeve që po merren për automjete dhe import. Por, fatkeqësisht disa nuk po implemetohen nga Ministria e Transportit siç është kontrolli teknik i lirimit të gazrave”.

“Mirëpo, do të ndikojë pozitivisht në ngritjen e cilësisë së ajrit dhe në marrjen e masave, por edhe në vetëdijesimin e shoferëve, vetëdijesimin e familjeve për lëndët djegëse, industrive, ekonomive e të gjitha këtyre”, ka shtuar ai.

Por, qytetarët e konsiderojnë si sfiduese një deklaratë të tillë të ministres Reshitaj, marrë parasysh buxhetin e ekonomive familjare.

Luljeta Zymberi mendon që situata ekonomike e imponon një gjë të tillë:

“Ne duhet të vetëdijesohemi që ambientin ta kemi më të pastër dhe të kemi kujdes për shumë gjëra dhe jo vetëm për ngrohje, mirëpo situata ekonomike e imponon që njerëzit të zgjedhin rrugën më të lirë”.

Edhe qytetari Hamit Kasabaçi shprehet ngjashëm:

“Përpos druve dhe thëngjillit, ne tjetër mundësi nuk kemi që të ngrohemi, andaj nuk e di se si ajo ka menduar që ta heqë drurin dhe thëngjillin. Me çka do të ngrohet ky popull?”.

Përveç tjerash, Kosova vazhdon të përballet me nivele të larta të ndotjes që vijnë nga termocentralet dhe veturat e vjetra.

Bazuar në një hulumtim të mëparshëm të Institutit GAP, vjetërsia mesatare e automjeteve në Kosovë është 18 vjet.

Më 27 qershor të këtij viti ka hyrë në fuqi Ligji i ri për automjete, i cili parasheh se në Kosovë nuk mund të importohen vetura më të vjetra se 10 vjet.

Radio Evropa e Lirë,  05.10.2017

Një 70-vjeçar ka gjetur vdekjen teksa tentonte të lidhte në mënurë të paligjshme energjinë elektrike.

Policia thotë se ngjarja ka ndodhur në Dropull, ndërsa viktimë është Vangjel Beka nga fshati Llongo.

I moshuari mësohet se është ngjitur me shkallë në një shtyllë të tensionit, por nga pakujdesi dhe padija, ra në kontakt me energjinë elektrike dhe për pasojë ka ndërruar jetë.

Policia mbërriti në vendin e ngjarjes për të kryer hetimet e rastiti.

Ora News,  05.10.2017

Edhe këtë vit, si tri vitet e mëparshme, 10 studentë të përzgjedhur të KEDS Academy IV udhëtuan për disa ditë vizitë në Stamboll të Turqisë.

Qëllimi i këtij udhëtimi ishte njohja nga afër e kompanive prestigjioze Çalik Holding dhe Limak Energy dhe në Universitetin Boğaziçi.

Prezenca dhe marrja e njohurive gjatë kësaj vizite, do t’iu ndihmojë atyre që të kenë një ndërlidhje të suksesshme me tregun e punës.

Ekipit nga Kosova në Çalik Holding, mirëseardhje i uroi z. Ridvan Aktürk, Drejtori i Përgjithshëm i kompanisë YEDAŞ. Aty studentët u njohën me historinë, të arriturat dhe sfidat e kompanisë, si dhe shtrirjen e rrjetit të bizneseve të ndryshme nëpër botë. Një bisedë interaktive pati mes studentëve dhe përfaqësuesit të kompanisë Çalik Holding.

Gjatë vizitës së tyre në Turqi, si pjesë e kurikulës së zakonshme, studentët e KEDS Academy kanë vizituar mjediset e korporatës Limak. Studentët në selinë e kësaj korporate janë mirëpritur nga zoti Serhat Dinc, zëvendësdrejtor i Limak Energy, si dhe njëri nga themeluesit e KEDS Academy.

Është viti i katërt që z.Dinc mirëpret grupet e studentëve dhe prezanton kompaninë Limak, duke treguar një gatishmëri për t’u përgjigjur në pyetjet gjithnjë kureshtare të studentëve.

“Para katër vitesh kemi pasur objektiva të qarta dhe shumë ambicioze për këtë projekt. Sot ky projekt jo vetëm që ka arritur këto objektiva, por i ka tejkaluar ato. KEDS Academy është bërë një krenari jo vetëm për kompaninë KEDS, por edhe për korporatat Limak dhe Çalik”, ka thënë zoti Dinc.

“Edukimi profesional është shumë i rëndësishëm dhe ky program besoj po ju ndihmon në rrugën tuaj drejt edukimit. Ne jemi shumë të lumtur që jemi pjesë e projektit dhe njëkohësisht e edukimit tuaj profesional,” u shpreh gjatë ceremonisë mikpritëse zDinc.

Në takim u shtruan pyetje të ndryshme nga të dyja palët, duke pasur në fokus kapacitetet energjetike të kompanisë. Studentët ishin të interesuar edhe të dinin se kush ishte ideatori i programit të KEDS Aacademy. Aylin LÖle, prezente në takim, foli për rrugëtimin dhe sukseset e projektit të KEDS Academy. Ajo falënderoi studentët duke qenë shumë krenare për ta.

“Jam shumë krenare me ju. Ju jeni e  ardhmja e Kosovës”, ka thënë LÖle.

Në Universiteti Boğaziçi, njërin ndër më të mirët në botë, studentët u ndjenë si në shtëpinë e tyre. Vizita filloi me prezantimin për universitetin dhe vazhdoi me trajnimet në fushat profesionale si dhe me vizitën e universitetit dhe kampuseve. Trajnimi ishte shumë atraktiv dhe i rëndësishëm për studentët në fushën e komunikimit, i shoqëruar edhe me muzikë dhe me video të ndryshme.

Trajnerja z.Burcu Erturk Kilic, në mënyrë praktike dhe interaktive u tregoi studentëve se sa i rëndësishëm është komunikimi, si në jetën e përditshme ashtu edhe në atë profesionale dhe biznesore. Studentët të ndarë në grupe u sfiduan me disa detyra të parashtruara nga trajnerja.

Trajnimi u përmbyll me porosinë “Mos harroni të shpërndani buzëqeshje!”

Studentët patën rastin të marrin informata në një laborator të veçantë që shërben për testimin e pajisjeve elektrike të tensionit të lartë për distribucion dhe transmision. Ky laborator është i vetmi në Turqi, dhe gjithashtu ndër laboratoret e rralla në Evropë.

Një pjesë e kohës u nda edhe për vizita të vendeve historike dhe kulturore që janë me bollëk në Stamboll.

Për nxënësin Flakron Gashi, ishte hera e parë që vizitonte Stambollin dhe emocionet ishin të pafund.

“Gjatë qëndrimit tonë në Turqi të organizuar nga KEDS, patëm përvoja si dhe kënaqësi të paharruara. Gjatë vizitave jemi njoftuar me punën dhe sukseset e kompanive Çalik e Limak dhe veprimtaritë e tyre të shtrira në Europë dhe botë. Në Universiteti Boğaziçi ne u njoftuam me programet, laboratorët, si dhe me profesorët tepër të përgatitur profesionalisht. Vizita e monumenteve historike, sidomos emocionet që përjetova në përjetimin 3D të Stambollit, do të më mbesin në mendje. Përvojat që morëm këtu ishin tepër profesionale dhe mjaft të rëndësishme për ne”, ka thënë Gashi.

Për studenten e inxhinierisë elektrike, Sidorela Dodaj, vizita në Turqi ka tejkaluar të gjitha pritshmëritë.

“Vizita në Turqi ka qenë mbresëlënëse. I ka tejkaluar të gjitha pritshmëritë tona. Vizita në kompanitë Çalik dhe Limak na ka treguar se sa shumë ata janë të kënaqur me bashkëpunimin me KEDS-in dhe ju gëzohen të gjitha arritjeve tona si studentë të KEDS Academy.

Mua si inxhiniere e ardhshme me ka lënë përshtypje mjaft të mëdha laboratori i tensionit të lartë, që ishte për siguri në punë dhe testimin e pajisjeve. Ku ligjërim i profesorit ka qenë shumë i mirë dhe na ka aftësuar mjaft në këtë drejtim, duke mos e lënë anash vizitën në Universiteti Boğaziçi dhe trajnimin që kemi mbajtur aty.

Për sa i përket vizitave kulturore që bëmë, vetëm mund të them që jemi mahnitur me bukuritë që kemi parë”, ka thënë Doda.

KEDS Academy do të vazhdojë tutje dhe së shpejti do të fillojë aplikimi për gjeneratën e pestë.

Agjensia e lajmeve ekonomia,  05.10.2017

Paga e punonjësve në miniera duhet të caktohet nga kontrata e punës, por jo më pak  se 200% e pagës minimale në shkallë vendi . Ky është propozimi i deputetit të  LSI, Përparim Spahiu, i sjellë në komision e Punës, Çështjeve Sociale dhe Shëndetësisë, përmes projektligjit për statusin e minatorit. Sipas Spahiut, ky ligj parashikon pension për këtë kategori në vlerën 131% të pagës minimale .

“Projektligji parashikon pagën dhe shtesën vjetore. Paga e punonjësve përcaktohet nga kontrata e punës, por projektligji parashikon që kjo të mos jetë më pak se 200% të pagës minimale në shkallë vendi. Sa i takon pensionit, ky të jetë jo më pak se 131% i pagës minimale zyrtare. Këto janë dy termat kryesore që kanë të bëjnë me pagesën e këtyre punëmarrësve që përfitojnë këtë status”,tha Spahiu.

Më tej në projektligjin e prezantuar, Spahiu shtoi se në ligjin e ri parashikohet trajtim shëndetësor dhe social. Këto trajtime do jenë të financuar nga buxheti i shtetit, ndërsa për të punësuarit do të mbulohen nga punëdhënësi.

Scan Tv,  05.10.2017

The Trans Adriatic Pipeline Consortium plans to invest around 800 million euros for the period 2017-2020 in Albania, Albania project manager Shkëlqim Bozgo has declared.

In overall, this project is expected to generate 1.5 billion euros in investment in the country.

Not long ago, the consortium stated that only in 2017 the value of the investment reached the figure of about 500 million euros, turning practically the gas pipeline into the locomotive of the Albanian economy during the current year.

The Trans-Adriatic Pipeline is the largest project in our country and region.

The European Union has placed it on the list of its strategic priorities and has repeatedly called for the project to be completed within the deadlines, i.e. by 2020.

Several weeks ago, TAP AG declared that in Albania and Greece were completed two thirds of the construction works.

Scan Tv,  05.10.2017

Konsorciumi i gazsjellësit Trans-Adriatik njoftoi se, në Shqipëri dhe Greqi ka përfunduar më shumë se 75% e volumit të punës. Mesa duket, në dy vendet punimet po ecin me ritme te përshpejtuara, duke sinjalizuar se, projekti do të përfundojë brenda afateve të parashikuara, pra, brenda vitit 2020.

Ndër të tjera, në Shqipëri dhe Greqi shtrihet edhe pjesa dërrmuese e projektit, mbi 80%, ndërkohë që pa filluar mbetet vetëm pjesa nënujore në shtratin e Adriatikut, ku do të bëhet edhe lidhja me tubacione mes Shqipërisë dhe Italisë.

Por, fakti që “TAP” po përfundon, nuk është domosdoshmërisht një lajm i mirë, sidomos për kuadrin makroekonomik. Të dhënat e fundit sugjerojnë se, deri më tani gazsjellësi ka investuar rreth 1.2 miliardë euro në vendin tonë, çka do të thotë se, nga totali i investimit mbeten vetëm 300 milionë euro në tre vite.

Investimet e Tap prekën kulmin gjatë këtij viti me një total prej rreth 500 milionë euro, ose një e treta e totalit. Së fundmi, Fondi Monetar Ndërkombëtar paralajmëroi për rënien e investimeve të huaja në vendin tonë gjatë viteve në vijim, kryesisht si pasojë e tkurrjes së investimeve në sektorin energjetik, rrjedhojë e drejtpërdrejtë e zbehjes së investimeve nga TAP.

Ky nuk ishte as paralajmërimi i parë e as i fundit. Gjatë vitit, edhe Banka Botërore si dhe Komisioni Europian, por edhe Fondi Monetar në raportet e kaluara kanë paralajmëruar qeverinë shqiptare se, stoku i investimeve të huaja do të bjerë.

Diçka e tillë do të reflektohet edhe në termat e rritjes ekonomike. Gjatë vitit të ardhshëm, rritja projektohet më e ulët se viti aktual.

Scan Tv,  05.10.2017