info@energjia.al

Turqia rriti me 17 herë importin e arit, duke e çuar në 28.2 tonë në muajin mars. Qytetarët iu përgjigjën kështu kërkesës së Presidentit Rexhep Tajip Erdogan për të blerë ar në vend të dollarëve, si masë për t’u mbrojtur nga rreziku i zhvlerësimit të monedhës përpara referendumit.

Pas rënies së fuqishme të lirës, Erdogan u bëri thirrje qytetarëve të shisnin dollarë dhe për të blerë lira ose ar për të mbështetur monedhën vendase. Importet e arit u rritën si rrallë ndonjëherë.

“Njerëzit kanë filluar të investojnë në ar më shumë sesa në monedha të huaja”, tha Mehmet Ali Yıldırımtürk, një specialist ari në Grand Bazaar, Stamboll.

Sipas tij, njerëzit kanë rritur investimet në ar edhe për t’u përgatitur për muajt e verës, kur kërkesa rritet edhe më shumë.

“Një arsye ka të bëjë edhe me kërkesën për bizhuteri ari 21 karat nga Iraku dhe Siria edhe pse në mesin e tensioneve gjeopolitike”, tha Yıldırımtürk.

Importet e arit në Turqi u rritën pothuajse tetëfish, duke arritur në 36.7 tonë në dhjetor 2016, pas thirrjeve të Erdoganit.

Çmimi i arit në janar në Turqi u rrit me 132 lira (36 USD) ndërsa më 4 prill, çmimi arriti në 148 lira.

Revista Monitor,  10.04.2017

Më 2016, investimet private në projektet e mëdha të infrastrukturës kanë nxitur rritjen ekonomike në Shqipëri (kryesisht në sektorin e energjisë) dhe Bosnjë-Hercegovinë (energji dhe turizëm). Për Serbinë, rol parësor kanë luajtur investimet private, të nxitura kryesisht nga Investimet e Huaja Direkte (IHD) në industrinë përpunuese dhe ndërtim. Kosova pritet të përfitojë si nga investimet publike (kryesisht në rrugë) dhe nga investimet private vendase. Rritja ekonomike e Malit të Zi është mbështetur nga një projekt i madh autostrade me financim publik. Ndërsa në Maqedoni, pasiguria e tejzgjatur politike ka dobësuar investimet. Edhe pse IHD-të kanë qenë disi fleksibël në këtë vend, investimet e brendshme kanë rënë ndjeshëm vitin e kaluar.

Banka Botërore, në një analizë të fundit mbi zhvillimet në rajon, vë në dukje se financimet e huaja në formën e investimeve direkte janë burim i madh i rritjes ekonomike në rajon, për pasojë edhe në Shqipëri. Rritja ekonomike në vendin tonë vitin e kaluar pati një varësi të lartë prej këtyre investimeve të përqendruara kryesisht në projektit e gazsjellësit TAP dhe ndërtimit të HEC–eve mbi lumin Devoll.

Gjatë dy viteve në vijim, Banka sqaron se, në Serbi, BeH dhe Maqedoni, ritmet e rritjes ekonomike pritet të përshpejtohen në periudhë afatmesme, për shkak të investimeve të diversifikuara në aktivitete prodhuese dhe në Shqipëri, Kosovë dhe Mal të Zi-vendet ku projektet e mëdha publike janë pjesë e zgjerimit ekonomik, rritja ekonomike parashikohet të ngadalësohet për shkak të efektit të stabilizimit të aktiviteteve të projekteve. Banka gjithashtu sjell në vëmendje të autoriteteve që të mendojnë për burimet e reja të rritjes së ekonomisë, pas përfundimit të projekteve të mëdha infrastrukturore.

Sipas BB, tani, më shumë se kurrë, rreziqet më të larta theksojnë urgjencën e reformave strukturore për të përforcuar ribalancimin e saponisur nga burimet e brendshme të rritjes ekonomike, në ato të jashtme me mbështetje më të madhe tek investimet.

Përfitimet e rritjes ekonomike me krijimin e vendeve të reja të punës duhet të konsolidohen dhe zgjerohen, në mënyrë që të thyhet zinxhiri i emigracionit, reformave të cekëta, si dhe rritjes së ngadaltë ekonomike. Për të arritur këtë, siç është diskutuar edhe më sipër në këtë publikim, pesë fusha të reformave janë veçanërisht urgjente:

-Eliminimi i faktorëve dekurajues dhe barrierave për punësimin formal, për të mundësuar ritme më të shpejta të rritjes ekonomike, krijimin e vendeve të reja të punës dhe reduktimin e varfërisë;

-Përmirësimi i klimës së biznesit dhe qeverisjes për të mundësuar kompanitë që të krijojnë më shumë vende pune, të zgjerohen dhe të rrisin produktivitetin;

-Rritja e barazisë, cilësisë dhe efikasitetit të shërbimeve publike dhe sistemeve të mbrojtjes sociale, duke reduktuar në të njëjtën kohë rolin e qeverisë;

-Thellimi i integrimit global në mënyrë që ekonomitë të përfitojnë më shumë nga rritja e eksporteve;

-Garantimi i përdorimit të qëndrueshëm të energjisë dhe burimeve natyrore dhe administrimi dhe mbrojtja e mjedisit.

Revista Monitor,  10.4.2017

Çmimet e naftës së papërpunuar shënuan rritje mëgjesin e ditës së sotme.
Treguesit referencë për naftën e papërpunuar amerikanë, WTI, u rritën me 25 cent ose me 0.49 për qind dhe u tregtuan me 52.49 dollarë për fuçi.
Treguesit referencë për naftën e papërpunuar europiane, Brent, u rritën me 23 cent ose me 0.42 për qind dhe u tregtuan me 55.47 dollarë për fuçi.
Ndërsa ari u tregtua me 1,252.70 dollarë për onz.

Revista Monitor,  10.04.2017

Në tre vite krijuam volumin më të madh të investimeve në energji për të rimëkëmbur rrjetin e amortizuar që në 80 për qind të tij ishte mbi 40 vjeçar”.

Kështu e ka nisur postimin e tij në rrjetin social Facebook kryeministri Rama, ku ndër të tjera shkruan se ky ndryshim ka ardhur vetëm falë mbështetjes së qytetarëve dhe familjeve që i dhanë mundësi rilindjes së shtetit dhe rivendosjes së rendit ligjor në këtë sektor.

Sipas kryeministrit, i është dhënë fund një epoke të turpshme në historinë e vendit tonë dhe duke e kthyer këtë sektor strategjik për ekonominë, nga një barrë e rëndë për buxhetin në një sektor çdo vit e më fitimprurës për Shqipërinë e shqiptarët.

Më tej në këtë postim Rama shkruan “ Mirëmëngjesi dhe ju uroj një ditë të mbarë me këtë imazh të stacioneve të energjisë më 2013 dhe sot. Në tre vjet kemi krijuar volumin më të madh të investimeve në energji për të rimëkëmbur rrjetin e amortizuar, që në 80% të vetin ishte mbi 40 vjeçar. Kjo vetëm falë mbështetjes së qytetarëve dhe familjeve që i dhanë mundësi rilindjes së shtetit dhe rivendosjes së rendit ligjor në këtë sektor, duke i dhënë fund një epoke të turpshme në historinë e vendit tonë dhe duke e kthyer këtë sektor strategjik për ekonominë nga një barrë e rëndë për buxhetin në një sektor çdo vit e më fitimprurës për Shqipërinë e shqiptarët. Bashkë kemi bërë shumë. Më shumë mbetet për t’u bërë”, shkruan Rama.

Scan Tv,  10.04.2017

Përshkallëzimi i konflikteve në Siri, si dhe të dhënat e fundit që flasin për një rritje të kërkesës globale për arin e zi kanë përforcuar edhe më shumë “marshimin” e çmimeve të naftës, që ka filluar që prej fillim-javës së kaluar.

Rritja e prodhimit dhe aktivitetit të shpim-kërkimit në Shtetet e Bashkuara nga ana tjetër ka frenuar një rritje edhe më të madhe të çmimeve gjatë sesionit të parë të kësaj jave. Në çelje të sesionit të sotëm, Nafta Brent e Londrës kuotohej pranë nivelit të 55.49 dollarëve për fuçi, ndërsa ajo bruto amerikane pranë 52.48 dollarëve për fuçi.

Janë pikërisht Shtetet e Bashkuara që po pengojnë naftën Brent të thyejë barrierën e 56 dollarëve për fuçi. Goldman Sachs projekton se prodhimi amerikan do të rritet me rreth 215 mijë fuçi në ditë gjatë 2017-ës.

Scan Tv,  10.04.2017