info@energjia.al

Ministri italian i Mjedisit Gian Luca Galletti është shprehur se po shqyrtohen 14 opsione të ndryshme për pjesën e gazsjellësit TAP që do të takojë me bregdetin italian.

Për të shmangur çfarëdo impakti në plazhin e San Foca-s në Itali, TAP po ndërton një mikrotunel 1.5 km të gjatë. Kjo vepër inxhinierike minimizon dëmet në natyrë dhe e bën gazsjellësin të padukshëm.

Për të nisur punimet e mikrotunelit, fillimisht duhet të zhvendosen 231 pemë ullinjsh, në një zonë 800 metra larg nga plazhi.

Ndërkohë, sa i përket prostestave në Puglia për heqjen e ullinjve, ministri u shpreh i bindur se logjika në fund do të mbizotërojë. Sipas tij, pasi punimet të kenë përfunduar në vitin 2019, këto pemë do të mbillen sërish.

Deklaratat e ministrit vijnë pas dritës jeshile për ndërtimin e TAP në vend, duke mohuar apelin e qeverisë rajonale të Puglia-s. Situata në kantierin e ndërtimit vazhdon të jetë e tensionuar.

Scan Tv,  30.03.2017

Shteti shqiptar do të përfitojë një tarifë fikse nga konsorciumi TAP për mirëmbajtjen e tubacionit të gazit në territorin shqiptar.

Mirëmbajtja e gazsjellësit do të kryhet nga kompania më e re publike e transmetimit dhe shpërndarjes së gazit, që sapo është krijuar duke u ndarë nga Albpetrol.

“Ne kemi filluar hapat e para të negociatave me TAP-in dhe kjo do të jetë një e ardhur shtesë që garanton të ardhura për shtetin shqiptar përsa i përket transmetimit të gazit përmes tubacionit të TAP-it në Shqipëri”, deklaron Klodian Gradeci, administrator i ALBGAZ.

Administratori i ALBGAZ thotë se ka disa kompani ndërkombëtare që kanë shprehur interes për të investuar në ngritjen e rrjetit të shpërndarjes së gazit në Shqipëri.

Projektet prioritare janë lidhja me gazsjellësin Jonian-Adriatik, ndërtimi i tubacionit që do të lidhë Shqipërinë me Kosovën, si dhe rrjeti i shpërndarjes së gazit fillimisht për industrinë.

“Shqipëria ka të trashëguar një rrjet shpërndarjeje kryesisht të gazit që shtrihet përafërsisht në 500 km. Ky është një rrjet tërësisht i amortizuar, është mbi 40-vjeçar, dhe aktualisht ne jemi duke bërë një vlerësim për të parë dhe për të vlerësuar kapacitetet transmetuese faktike të këtij tubacioni”, thotë Gradeci.

Synimi tjetër, ndonëse më afatgjatë, është rrjeti i shpërndarjes për konsum familjar, kryesisht për zonat e ftohta.

“Kemi sot një interes nga Bashkia e Korçës dhe disa kompani të huaja që kanë interes për të zhvilluar rrjetin e shpërndarjes, pasi Korça supozohet të jetë një nga vendet më të ftohta dhe që mund të ketë konsumin më të madh të gazit”, vijon drejtori i ALBGAZ.

Gazi i parë do të shpërndahet nga fushat e Shah Deniz drejt Europës në 2020-n. Ai nis në kufirin midis Turqisë dhe Greqisë, ku lidhet me Gazsjellësin TANAP. Përshkon Greqinë e veriut për 550 km dhe Shqipërinë për 215 km, ku nis edhe pjesa detare në Adriatik.

Kapaciteti fillestar i TAP është 10 mld meter kub gaz në vit dhe dyfishohet me futjen në punë të dy kompresorëve të rinj.

Top Channel,  30.03.2017

I ndërtuar rreth 30 viteve më parë për të internuarit gjatë diktaturës, fshati Adriatik në njësinë administrative Remas të Bashkisë Divjakë, zor se mund të konsiderohet një vendbanim normal edhe në ditët e sotme.

Provë e kësaj është dhe kabina elektrike pa mure që ndodhet në mes të fshatit.

“Është korrenti i hapur këtu. Të paktën ta kishin rrethuar me rrjetë. Fijet bëjnë masë herë pas here”, thonë banorët.

Problemi është i dukshëm, ditë e natë aty kalojnë njerëz apo luajnë fëmijë dhe rreziku shtohet në mot me shi, por ende nuk ka zgjidhje.

Administratori Engjëll Guri thotë: “Ne kemi folur me drejtorin e OSHEE-së dhe kemi rënë dakord për një projekt që do i japë zgjidhje shumë shpejt këtij problemi. Brenda 2-3 muajve do të zgjidhet”.

Banorët shpresojnë se problemi i tyre 10-vjeçar dhe shumë shqetësime të tjera të trashëguara nga pushtetet që janë ndërruar në vite do të zgjidhen në këtë fushatë elektorale.

Top Channel,  30.03.2017

Golemi, zona më e populluar gjatë sezonit turistik, nuk do të vuajë më ndërprerjen e energjisë elektrike. Ka përfunduar rikonstruksioni i nënstacionit të Golemit 110/20kV, që jep siguri të plotë në furnizim me energji për të gjithë zonën nga Plepat deri në Shkëmbin e Kavajës në Golem. Jo vetëm ndërprerjet e energjisë, por edhe luhatjet e tensionit u kishin shkaktuar shpesh dëme në pajisje 9 mijë abonentëve. Vendosja e transformatorit të ri, me tre nivele  tensioni, zgjidh edhe këtë problem, duke rritur cilësinë e parametrave të furnizimit me energji elektrike, me standarte të reja teknike. Furnizimi bëhet me fidera të rinj dalës 20kV dhe lidhja në unazë me fiderat nga Kavaja dhe Shkozeti, për t’i lehtësuar nga ngarkesat e tyre. Ndërkohë ka nisur faza e dytë, ku investimi po shtrihet në gjithë zonën bregdetare nga Shkëmbi i Kavajës deri në Qerret. Ky investim që shkon në total 900 milionë lekë zhvillon një infrastrukture elektrike të përshtatshme për gjithë zonën bregdetare, që jo vetëm  garanton një shërbim cilësor duke filluar nga ky sezon turistik, por parashikon zhvillimin afatgjatë të Golemit si zonë turistike.

“Dy fiderat e parë mbarojnë në korrik dhe brenda vitit mbarojnë edhe 4 të tjerët, që përfshijnë nga Rreth Plepat deri në plazhin e Qerretit. Hyjnë në punë këto fidera dhe kalojnë për muze të vjetrit. Janë automatike, sistem skada, manovrohen dhe komandohen online, komandohen edhe nga Qendra në Tiranë. I gjithë investimi në total shkon 900 milionë lekë të reja. Ky investim përfshin 60 kabina, 36 km kabull dhe përfitojnë mbi 9000 abonentë. Përveç kësaj, në zonën e Kavajës dhe në fshatrat përreth kemi investuar dhe 2.6 milionë euro të tjerë. Banorët e zonës turistike dhe banorët e zonës së Golemit deri në plazhin e Qerretit nuk do të kenë më probleme me energjinë elektrike,” – shpjegoi investimin drejtori i OSHEE, Ardian Çela.

Në zonën e plazhit, investimet janë shtrirë krahas rrjetit të shpërndarjes së energjisë, edhe në rrjetin e ujësjellës-kanalizimeve dhe transformimit të hapësirave urbane. Një projekt kompleks që, siç e vlerësoi Kryeministri, transformon të gjithë infrastrukturën turistike të zonës.

“Është një projekt kompleks, që ka gjithë ripërtëritjen e rrjetit të furnizimit me energji të zonës, por ka dhe gjithë ripërtëritjen e rrjetit të ujësjellës- kanalizimeve në gjithë zonën e plazhit. Kemi disa projekte të tjera që fillojnë tani, për të rehabilituar gjithë rrugët midis godinave në plazh, nga Durrësi deri në Golem, në mënyrë që t’i japim atë energjinë e Rilindjes Urbane dhe të kemi një transformim rrënjësor nga pikëpamja e cilësisë së ambientit. 20 e kusur vite duke bërë turizëm me gropa septike dhe duke hedhur të gjithë ujërat e zeza në det, ka qenë një katastrofë. Këtu deri në 2015-n nuk ndizeshin dritat,” – u shpreh Kryeministri.

Impakti i këtij investimi, sipas administratorit të komunës Golem, është shumë i madh dhe sëbashku me impiantin e ujërave të zeza në përfundim zgjidhen dy nga problemet e mëdha të zonës. “Tensioni ka qenë i dobët në të gjithë zonën. Investimi ka një impakt të madh. Zgjidh një nga 3 hallet e mëdha që ka zona, zgjidh përfundimisht transmetimin  e energjisë elektrike. Edhe impianti i ujërave të zeza është duke përfunduar, vetëm loti i fundit  është, nga fundi i plazhit deri tek Përroi  i Agait”.

Kryeministri nënvizoi se edhe për këtë zonë po ndërmerren investime që nuk janë bërë në 40 vjet, ndërkohë që ka qenë e nevojshme rishikimi nga e para i projekteve për shkak të mungesës së cilësisë.

“Rilindje në kuptimin e vërtetë të fjalës, nga pikëpamja e infrastrukturës së energjisë dhe infrastrukturës së ujësjellës-kanalizimeve. Këtu as drita, as uji dhe ujërat e zeza derdheshin në det dhe në gropa septike. Sigurisht që ka kërkuar kohën e vet. Ka dhe pak kohë që duhet të bëjnë durim njerëzit, sepse nuk mund të bëhen dot brenda ditës. Janë projekte që kanë pasur nevojë që të rishikohen nga e para. Janë investime që nuk janë bërë 40 vjet.”

energjia.al  30.03.2017

Çmimet e naftës së papërpunaur shënuan rritje mëngjesin e ditës së sotme.

Treguesit referencë për naftën e papërpunuar amerikane, WTI, u rritën me 0.3 për qind dhe u tregtuan me 49.67 dollarë për fuçi.

Treguesit referencë për naftën e papërpunuar europiane, Brent, u rritën me 0.2 për qind dhe u tregtuan me 52.50 dollarë për fuçi.

Revista Monitor,  30.03.2017

Prokuroria e Tiranës ka gjetur një rrugëdalje ligjore për të marrë të pandehur dhe dërguar dosjen në gjykatë ish-drejtorin e “CEZ Shpërndarje” Josef Hejsek.

Ky i fundit sipas prokurorisë ka bëshkëpunuar me shtetasin shqiptar të arrestuar Kastriot Ismailaj dhe ky bashkëpunim ka qënë në fillesat e këtij mega mashtrimi duke përfunduar deri në lëvrimin e pagesës prej 4.6 milion euro nga kompania “CEZ Shpërndarje” në kompaninë “Debt International Advistory”.

Po si do e akuzojë në gjykatë prokuroria e Tiranës Josef Hejsek, në një kohë kur ky i fundit ka pasur mbrojtje ligjore, nga marrëveshja e lidhur mes CEZ Albania dhe shtetit Shqiptar, e cila i garantonte atij mos nisjen e asnjë procedimi penal?

Për këtë,prokuroria shprehet se kanë gjetur dhe rrugën ligjore që rrëzon mburojën për ish-drejtorin Hejsek.Sipas akuzës,marëveshja mes “CEZ Albania” dhe shtetit shqiptar, është miratuar në parlament nëpërmjet një ligji, dhe kjo marëveshje është bërë me ligj, dhe jo me ratifikim.

Nisur nga situatë,duke marrë hierakinë juridike të Shtetit Shqiptar,në këtë rast prevalon më tepër Kodi Penal se sa ligji që ka shërbyer për lidhjen e marrëveshjes mes “CEZ Albania” dhe shtetit. Nisur nga këto kushte sipas burimeve të prokurorisë shtetasi Austriak Josef Hejsek nuk ka asnjë mburojë ligjore, dhe ai do gjykohet në mungesë.

Dërgimi i dosjes në gjykatë
Ish-drejtori i “CEZ Albania” Josef Hejsek është marrë i pandehur në mungesë dhe dosja në ngarkim të tij, i është përcjellë për gjykim të mëtejshëm, gjykatës së kryeqytetit.

Ka qënë prokuroria Antoneta Sevdarasi, e cila ka ngritur akuzën e “Mashtrimit me shuma të mëdha” dhe “Pastrim të produkteve të veprës penale” ndaj shtetasit çek, duke i kërkuar këtij të fundit që për këtë akuzë të vijë dhe të japë llogari në gjykatën e Tiranës.

Sipas akuzës, Hejsek në bashkëpunim me Kastriot Ismailajn që tashmë po gjykohet, kanë mashtruar duke përvetësuar rrerth 4.6 mln euro nga fondi I kompanisë CEZ-shpërndarja.

Kjo shumë, sipas prokurorisë, I ka kaluar Ismailajt nga Hejsek me anë të mashtrimit dhe falsifikimit të dokumenteve, me arsyetimin se kompania DIA ka evidentuar debitoret problematic dhe më pas ka mbledhur borxhet e kompanisë CEZ. Hejsek në asnjë moment nuk ka dhënë shpjegime për këtë akuzë,madje ka refuzuar ti përgjigjet pyetjeve të prokurorisë, të cilat u janë dërguar me letërporosi në Austri.

Madje herë pas herë avokatët mbrojtës të Kastriot Ismailaj, kanë kërkuar në gjykatë që Hejsek të paraqitet në sallën e gjyqit dhe të dëshmojë, por në asnjë seancë ai nuk është paraqitur.

Marëveshja që i jep imunitet
Marëveshja mes CEZ-it dhe Shtetit Shqiptar i ka dhënë “imunitet” ish-drejtorit të parë të CEZ-it në Shqipëri Josef Hejsek. Ky imunitet është krijuar nga ish-qeveria e Sali Berisha, e cila dhe ka ratifikuar në parlament marëveshjen mes CEZ dhe shtetit Shqiptar Shqiptar.

Nisur nga kjo situatë, ish-drejtori ka përfituar nga kjo marëveshje, e cila e zhvishte atë nga përgjegjësia penale. Sipas pikës 9 të kësaj marrveshje, ku parashtrohen pikat për zgjidhjen me pajtim, lirim apo shkarkim.

Në një nga këto pika thuhet se “me zgjidhjen e plotë dhe përfundimtare, palët shqiptare lirojnë dhe shkarkojnë nga përgjegjësia grupin CEZ dhe të punësuarit e tyre. Sipas kësaj marrveshje, deri në momentin e nënshktrimin nuk kishte ndonjë procedim ndaj shtetasve çek dhe çdo hetim i nisur pas kësaj marrveshje nga pala shqiptare është “nul”.

Shqiptarja.com  30.03.2017

Ari pritet të arrijë në nivelin e vitit 2013, ku një onz tregtohej mbi vlerën e 1500 dollarëve,  ndërkohë që rritja e inflacionit dhe normat reale të interesave poshtë zeros, ka gjasa të nxisin kërkesën.

Sipas kompanisë së manaxhimit të aktiveve në Lihtenshtein,  Incermentum AG,  tregu është në fazat e hershme të rritjes dhe çmimet mund të arrijnë 1400-1500 dollarë për onz brenda këtij viti.

Këtë javë, çmimi i metalit të çmuar është sjellë rreth 1250 dollarëve, çka nënkupton një rritje me rreth 20% që të arrihen ato nivele.

Ari është rritur këtë vit ndërkohë që investitorët dyshojnë mbi zbatimin e reformave tatimore nga Donald Trump dhe prej shqetësimeve në lidhje me zgjedhjet në Europë dhe negociatat e Brexit.

Investitorët po shohin edhe të dhënat mbi inflacionin,  pasi matësi që përdor Rezerva Federale thuajse preku nivelin objektiv. Kompania thekson se përshpejtimi i vrullit mund të nisë në verën e këtij viti.

Metali i çmuar është përdorur tradicionalisht si mbrojtës efektiv ndaj rritjes së inflacionit.

Ndërsa rritja e normës së interesit nga FED mund të nxisë dollarin, metali i çmuar është rritur pavarësisht këtyre ndërhyrjeve, duke dobësuar korelacionin negativ që ka me valutën amerikane.

Megjithatë, jo të gjithë janë optimist. Societe Generale e projekton në rënie metalin e çmuar, duke nënvizuar se ndodhitë politike do të kenë ndikim të limituar. Banka e parashikon arin në një mesatare prej 1124 dollarë për onz në tremujorin e katërt të këtij viti.

Edhe banka tjetër franceze, BNP Paribas, që pati projeksionet më të sakta për tremujorin e kaluar, bën të ditur se ari do të bjerë me rritjen e normës bazë të interesit në SHBA dhe prej dollarit të fortë.

Scan Tv,  30.03.2017