info@energjia.al

Korporata Energjetike e Kosovës (KEK) ka theksuar se me vendimin e qeverisë së Republikës së Kosovës për shpalljen e asaj zone “Zonë e Interesit të Veçantë Ekonomik” janë obliguar MMPH-ja dhe Kuvendi Komunal i Obiliqit të zbatojnë këto vendime, respektivisht, ndalimin e ndërtimeve apo mbindërtimeve të reja.

Në këtë drejtim KEK-u është njoftuar nga inspektorati i MMPH-së se sot do të ndërmerret një aksion për ta zbatuar ligjshmërinë konforme vendimeve të qeverisë, me çast ne fushën nga e cila duhet te furnizohen Termocentralet ekzistuese me qymyr , janë demoluar disa themele të sapo ndërtuara.

Në bazë të Ligjit për shpronësim dhe Kornizës së Politikave të Zhvendosjes, për këtë fushe të përfshirë në zonën e interesit të veçantë, me datë: 24 Tetor, 2016 është shpallur e ashtuquajtura data e prerjes (“cutt off date”), pas së cilës  datë çdo veprim i ndërmarr rreth ndërtimeve te reja konsiderohet veprim ilegal.

Për më tepër ndërtimi i objekteve ilegale në këtë zonë sipas KEK edhe vite më parë ka dëmtuar buxhetin e vendit dhe të KEK-ut, por edhe të qytetarëve duke ndikuar ne  mënyrë te drejtpërdrejtë në tarifat e energjisë elektrike. Prandaj, KEK-u përkrahë çdo nismë të institucioneve vendore në zbatimin e ligjshmërisë.

Për më shumë, ne zonën e zgjerimit te mihjes sipas licencës,  KEK-u së bashku me palët tjera të interesit është duke zbatuar standardet më të mira që janë të ndërlidhura me zhvendosje dhe asnjë qytetar i vetëm legjitim nuk do te dëmtohet nga ky proces përkundrazi do të ketë përfitime më të larta të cilat janë të parapara me standardet e cekura me lartë.

Në këtë vazhdë, KEK-u fton të gjithë banorët që të mos  shpenzojnë mjete sepse do të ndeshen me zbatimin  e ligjit,  gjithashtu mos të lejojnë as të ndërtohet në pronat e tyre.

Njeherit KEK-u falenderon inspektoriatin e MMPH –se dhe inspektoriatin  e Komunës se Obiliqit  per aksionin e sotem lidhur me zbatimin e ligjshmërisë ne kete zone.

Telegrafi,  08.03.2017

Çmimet e naftës u regjistruan në rënie gjatë orëve të para të sesionit të sotëm, pasi të dhënat e  fundit sinjalizojnë një rritje të mëtejshme të prodhimit dhe të rezervave në Shtetet e Bashkuara të Amerikës.

Investitorët janë të shqetësuar për një mbingarkesë të vazhdueshme në treg, pavarësisht përpjekjeve të OPEC për ta balancuar tregun nëpërmjet shkurtimit të prodhimit. Në çelje të sesionit të sotëm, nafta Brent e Londrës kuotohej pranë nivelit të 55.69 dollarëve për fuçi, ndërsa ajo bruto amerikane pranë 52.85 dollarëve për fuçi.

Të dhënat tregojnë se, gjatë javës së kaluar, rezervat e naftës në Shtetet e Bashkuara u rritën për të 9-tën javë me radhë duke prekur rekorde të reja maksimale.

Nga ana tjetër, vetëm një ditë më parë, Agjencia Ndërkombëtare e Energjisë shkurtoi projeksionet për rritjen e kërkesës globale për arin e zi gjatë vitit, duke nxitur një rënie të çmimeve.

Scan Tv,  08.03.2017

Operatori i Shpërndarjes së Energjisë Eklektike ka kërkuar që të pajisje më sistemin GPS të gjithë mjetet në dispozicion në drejtoritë rajonale të saj, ato që janë të Task Force apo pajisje rezervë. Në një njoftim të bërë nga kompania kërkohet pajisja me sistem monitorimi për 345 mjete në total nga të cilat 55 janë mjete për sensor karburanti.

Kjo nismë duket se vjen në kuadër të disiplinimit të mënyrës së përdorimit të mjeteve nga ana e stafit në drejtoritë rajonale si dhe optimizmit të kostove për karburant. Këtë e tregon më mirë edhe pjesa e specifikimeve teknike që bëhet në kërkesën e operatorit.

Kështu sistemi duhet të përcaktojë vendndodhjen e automjetit në kohë reale e me frekuence gjurmimi çdo pesë sekonda. Nga ana tjetër duhet të ofrohet informacion i detajuar  mbi identifikimin e mjetit, shpejtësinë e lëvizjes, gjendja e motorit ndezur ose fikur, adresën e vendndodhjes e saktë dhe e përditësuar, gjendja e baterisë, gjenerimi i rrymës në mjet, përshpejtimi i menjëhershëm, frenimi i menjëhershëm.

Një tjetër kërkesë ka të bëjë me raportet e karburantit të konsumuar gjatë lëvizjes, furnizimi përkatës sipas vendit dhe litrave.

Scan Tv,  08.03.2017

Mosformimi i Asociacionit të Komunave Serbe ka bërë që Serbia të mos e zbatojë marrëveshjen për energjinë.

Kështu tha ministrja për Dialog, Edita Tahiri, gjatë raportimit në Komisionin Parlamentar për Zhvillim Ekonomik me qellim që t’i njoftojë anëtarët e këtij komisioni për ecuritë e anëtarësimit të KOSTT-it në ENTSO.

Tahiri, po ashtu ka treguar arsyen pse Kosova nuk mund të zbatojë masa reciproke ndaj Serbisë duke thënë se me ndaljen e rrymës nga ana e Kosovës do të destabilizonte tregun energjetik.

“Ju i përmendet masat edhe unë i përmenda në fillim masat. Krejt i bëjmë bashkë edhe ato që i prezantova unë që i kam biseduar me KOSTT-in edhe ministrinë… Po a e dini pse bash është e bllokuar. Edhe ne e kemi një marrëveshje që ende nuk po e zbatojmë . E pra edhe pala tjetër . Po besoj që e keni të qartë . Kështu shkojnë proceset. Ne të gjitha i kemi zbatuar. Vetëm marrëveshjen për Asociacionin ende nuk e kemi nis me e zbatua si kundër reagim . Kushti jonë është që nuk ka themelim të Asociacionit që i bie që të hartohet statuti me vendimin e Gjykatës Kushtetuese. Pra nuk ka themelim të tij pa u shuar strukturat e mbetura paralele të Serbisë në Kosovë”, tha Tahiri.

Por kryetari i Komisionit parlamentar për Zhvillim Ekonomik, Muhamet Mustafa, tha se Asociacionin nuk po e bllokon pala kosovare por vetë serbët duke aluduar në deputetët e Listës Serbe.

“Ata nuk po duan ta zbatojnë. Ne nuk jemi duke e bllokuar Asociacionin. Janë duke e bllokuar pikërisht ata që nuk po duan të punojnë me Qeverinë dhe nuk po duan që të kthehen në Qeveri. Por, tjetër është në qoftë se ju keni informacion tjetër“, tha Mustafa.

Anëtarët e komisionit, u shprehën të pakënaqur me ngecjen e zbatimit të marrëveshjes. Ata me këtë rast propozuan edhe masa konkrete ndaj Serbisë, ndërkaq, nga Qeveria kërkuan sjellje të kujdesshme dhe adekuate lidhur me çështjen.

Ata kanë kërkuar të dinë nga Tahiri arsyet pse Kosova nuk merr masa që të ndaloja palën serbe t’i shfrytëzoj linjat energjetike në pjesën veriore.

Tahiri ka thënë se ato masa do të destabilizojnë tregun energjetik në rajon.

“Ne mundemi natyrisht ta bllokojmë Serbinë që t’i shfrytëzoj rrugët e transmisionit të Kosovë se derisa nuk nisë që të paguaj ato kompensimet që janë kompensime të caktuara me standarde evropiane. Mirëpo ky veprim lidhet me atë që a jemi të gatshëm të krijojmë edhe një situatë jostabile në rajon . Sepse ata që janë inxhinier të elektroteknikës e dinë që rryma nuk ndalet. Me qenë një tjetër material e kishe ndal dhe e kishe vendos në depo mirëpo kjo nuk ndalet. Sa herë që provon me e ndal mund të krijohet destabilizimi dhe ne jemi mundura mbi supet tona me ruajt stabilitetin energjetik dhe këtëija bëjmë me dije vazhdimisht jo vetëm evropianëve por edhe SHBA-së. Sepse i bë gjatë që Kosova mban mbi supe stabilitetin rajonal për shkak të shkeljeve të Serbisë”, tha Tahiri.

Besim Beqaj, anëtar i Komisionit për Zhvillim Ekonomik , ka thënë se duhet të dihet se anëtarësimi i KOSTT-it ka qenë me kushte.

“Duhet ta kuptojmë që anëtarësimi i KOSTT-it në ENTSO është me kusht. Nuk është anëtarësim i plotë është me kusht dhe kushti është që të bëhet regjistrimi i ndërmarrjes, e cila unë konsideroj që ka qenë gabim në marrëveshje marrë parasysh se iniciativa fillestare ka qenë që duhet të bëhet një kompani, e cila do të jetë nënkontraktor i KEK-ut për të kontrolluar paratë në veri . Ashtu ka qenë fillimi i të gjitha negociatave. Unë besoj që marrëveshja teknike , sepse unë po e shoh që dinamika është e shpejtë dhe kur gjërat bëhen shpejt për Kosovën bëhen keq. Po e themi shumë hapur pa asnjë lloj hezitimi. Unë kisha hezituar shumë që të hymë në një marrëveshje teknike . Sido që të jetë ju jeni persona përgjegjës të cilit i sillni vendimet. Por besoj që duhet të kemi kujdes….Unë po propozoj nuk janë masa krejtësisht adekuate në raporte normale me shtetin po që ka masa dhe ne i kemi marrë edhe më herët”, tha Beqaj.

Ai ka treguar se marrëveshjet teknike janë ofruar edhe më herët. Madje sipas tij ka pas ide që të bëhen edhe investime të përbashkëta .

Por sipas Tahirit, qëllimi i bisedimeve me palën serbe në Bruksel është që zbatimi i marrëveshjes nga pala serbe do të nënkuptonte që të Serbia me strukturat paralele të hiqet nga veriu, Kosova të shtrijë sovranitetin në energji dhe të vejë kontrollin në të gjithë vendin në fushën e energjisë. Po ashtu sipas Tahirit, marrëveshja është që në këmbim të shuarjes së strukturave në këmbim t’i lejohet një kompanie që do të bëjë furnizim dhe e njëjta kompani do të bëjë shërbime teknike në bashkëpunim apo si nënkontraktore e KEDS-it për t’i shpërndarë fakturat dhe mbledhë paratë për pagesat e rrymës.

Telegrafi,  08.03.2017

Rritja e përgjithshme çmimeve në muajin shkurt kaloi objektivin e poshtëm të Bankës së Shqipërisë duke shënuar 2,2 për qind rritje, të ndikuara nga çmimet më të larta të gazit për ngrohje dhe ato të ushqimeve.

Sipas të dhënave të INSTAT ndikimi i grupeve kryesore në ndryshimin vjetor të indeksit të çmimeve të konsumit. Rritja vjetore e çmimeve në muajin shkurt është ndikuar kryesisht nga grupi “Ushqime dhe pije joalkoolike” me +1,57 pikë përqindje.

Çmimet e grupit “Transporti” kanë kontribuar me +0,20 pikë përqindje. Çmimet e grupit “Mallra dhe shërbime të ndryshme” kanë kontribuar me +0,14 pikë përqindje.

Çmimet e grupit “Qira, ujë, lëndë djegëse dhe energji” me +0,12 pikë përqindje. Çmimet e grupit “Argëtim e kulturë” kanë kontribuar me +0,07 pikë përqindje.

Çmimet e grupeve “Pije alkoolike dhe duhan” dhe “Shërbimi arsimor” kanë kontribuar secili me nga +0,02 pikë përqindje. Çmimet e grupeve “Shëndeti” dhe “Hotele, kafene dhe restorante” kanë kontribuar secili me nga +0,01 pikë përqindje. Çmimet e grupit “Veshje dhe këpucë” kanë kontribuar me -0,02 pikë përqindje.

Krahasuar me muajin Shkurt 2016, rritja më e madhe e çmimeve vërehet në grupin “Ushqime dhe pije joalkoolike” me 3,9 %, pasuar nga grupet “Transporti” me 3,2 %, “Mallra dhe shërbime të ndryshme” me 3,0 %, “Argëtim dhe kulturë” me 2,8 %, “Shërbimi arsimor” me 0,7 %, etj.

Brenda grupit të ushqimeve çmimet e nëngrupit “zarzavate përfshirë patatet“ u rriten me 12,9 %, pasuar nga nëngrupet “fruta” me 6,1 %, “sheqer, reçelra e ëmbëlsira” me 6,4 %, “qumësht, djathë e vezë” me 6,0 %, etj.

Nga ana tjeter çmimet e nëngrupit “vajra dhe yndyrna” u ulën me 1,6 %. Ndryshimi mujor i indeksit është +0,5 %.

Krahasuar me muajin Janar 2017 rritja më e madhe mujore e çmimeve vërehet në grupin “Ushqime dhe pije jo alkoolike” me 1,5 %. Ulja më e madhe mujore e çmimeve vërehet në grupin “Veshje dhe këpucë” me -2,3 %.

Revista Monitor,  08.03.2017