info@energjia.al

Rritja e çmimeve të naftës në tregjet ndërkombëtare gjatë sesionit të së Martës është  reflektuar edhe në tregun me shumicë në vend gjatë ditës së sotme. Gjatë sesionit të sotëm, nafta me shumicë në dy portet e vendit shitet me 147.57 lekë për litër, në rritje me 0.47% në krahasim me sesionin e kaluar.

Çmimi i pasqyruar është aktual dhe i referohet vetëm ditës së sotme. Luhatjet në çmimin e shumicës vijnë, përveç çmimit me të cilin kuotohet në bursë, edhe në bazë të kostove të transportit, cilësisë së produktit të zhdoganuar, kursit të këmbimit ndërmjet dollarit dhe lekut, si dhe barrës  shtetërore.

Këto të dhëna i referohen çmimit përfundimtar me të cilin nafta del nga dy portet e vendit, atë të Durrësit dhe atë të Vlorës, ku përfshihen edhe të gjitha kostot që janë të detyruara me ligj, përfshirë barrën shtetërore, që sot fiksohet në rreth 91.7 lekë për litër.

Scan Tv,  22.02.2017

Çmimet e naftës janë konfirmuar pranë niveleve maksimale të muajit të fundit gjatë sesionit të sotëm, pasi OPEC dha sinjale pozitive sa i përket aplikimit të marrëveshjes së shkurtimit të prodhimit.

Organizata e vendeve eksportuese mund ta zgjerojë marrëveshjen edhe drejt prodhuesve të tjerë, gjë që do të prodhojë edhe shkurtimin e mëtejshëm të tepricës së ofertës në tregun global. Në çelje të sesionit të sotëm, Nafta Brent e Londrës kuotohej pranë nivelit të 56.83 dollarëve për fuçi, ndërsa ajo bruto amerikane pranë 54.50 dollarëve për fuçi.

Ekspertët shprehen se trendi gjatë javës do të vazhdojë të jetë i njëjtë, ndërkohë që benchmarkët mund të thyejnë edhe rekorde të reja.

Scan Tv  22.02.2017

Komisioni Europian do të alokojë rreth 14 milionë euro për gazsjellësin Trans-Adriatik. Ky fond do të përdoret për hulumtime në zonat arkeologjike duke garantuar kështu mos cënimin e tyre nga punimet e gazsjellësit që do të transportojë gazin nga Azerbaixhani në Europën perëndimore duke kaluar edhe përmes Shqipërisë.

Në total vendet anëtare janë dakordësuar të financojnë projekte të Komisioni Europian për një vlerë prej 444 milionë eurosh. Në total janë 18 projekte, të cilësuara si prioritet për unionin, dhe Tap është një prej tyre.

Pak ditë më parë, zëvendës Presidenti i Komisionit Europian deklaronte se gazsjellësi Trans-Adriatik si  pjesë e korridorit jugor të gazit është një prioritet kyç për Bashkimin Europian, pasi garanton stabilitet energjetik nëpërmjet diversifikimit.

Ndër të tjera, Bashkimi Europian nënvizonte se përfundimi i projektit brenda afateve, pra në vitin 2020, është me rëndësi të veçantë për unionin. Ditën e Enjte ndërkohë, në Baku të Azerbaixhanit do të mbahet takimi i tretë ministerial i Këshillit të Korridorit Jugor të Gazit, dhe ku do të marrin pjesë përfaqësues të Shqipërisë, Azerbaixhanit, Bosnje Hercegovinës, Bullgarisë, Kroacisë, Gjeorgjisë, Greqisë, Italisë, Malit të Zi, Serbisë, Turqisë si dhe përfaqësues nga Mbretëria e Bashkuar dhe Shtetet e Bashkuara të Amerikës.

Scan Tv  22.02.2017

Një godinë në rrënim, e mbuluar vazhdimisht nga uji ishte deri dje nënstacioni elektrik i Lezhës. I ndërtuar që në vitet ’60-të dhe i pozicionuar nën nivelin e detit, gjendej e përmbytur edhe në shiun më të parë dhe në nivelin më të ulët të operimit. Si pasojë, banorët e Lezhës kanë vuajtur mungesën për mbi 5 orë në ditë të energjisë elektrike. Rikonstruksioni i vetëm dhe i fundit i nënstacionit ishte bërë në vitin ’73-të. Për herë të parë, pas mbi katër dekadash, OSHEE investoi 1.9 milionë dollarë, duke garantuar sigurinë nga reshjet dhe furnizimin të pandërprerë me energji. Kryeministri Edi Rama, i shoqëruar nga Ministri i Energjisë, Damian Gjiknuri dhe Drejtori i OSHEE, Ardian Çela, inspektuan rivënien plotësisht në punë të nënstacionit.

“Stacioni i Lezhës është ndërtuar në vitet ’60-të dhe ristrukturimin e fundit e ka pasur në ’73-n. Çdo shi që binte, ky dilte jashtë funksionimit, se përmbytej nga uji. Ngelej i gjithë qyteti pa energji. Përveç kësaj përmbytej qyteti, sepse 4-5 hidrovoret që marrin energji nga këtu nuk furnizoheshin dhe dilnin jashtë pune. Këto janë çelat, prodhim i vitit 1970. Është investim 190 milionë lekë [të reja] nga të ardhurat e OSHEE-së. Kjo është faza e parë, sepse jemi në proces,” – u shpreh drejtori i OSHEE-së, Ardian Çela, duke shpjeguar rëndësinë e investimit jo vetëm për qytetin, por edhe për zonën turistike.

Krahas risjelljes në standarde pune të nënstacionit, u vendosën pajisjet e reja për 21 fidrat që lidhen me nënstacionin. Ndërkohë 1 milionë dollarë janë duke u investuar për ndërtimin e dy fiderave të rinj 10 kV për Shëngjinin, që do të lidhen me nënstacionin e Lezhës. Investimi do të përfundojë para sezonit turistik dhe së bashku me dy fiderat ekzistues, Shëngjini, i cili katërfishohet gjatë sezonit veror, ofron siguri të plotë në furnizimin normal me energji. Një investim shumë i rëndësishëm është edhe investimi 1 milionë euro që fillon në prill, për sigurinë dhe mirëfunksionimin e linjave elektrike në Zejmen, ku aktualisht si pasojë e amortizimit të rrjetit, 70% e energjisë humb në rrjet. Në Lezhë, OSHEE ka investuar 4 milionë dollarë, për të rritur cilësinë e furnizimit me energji elektrike dhe mirëfunksionimin në linjat të furnizimit me energji të 5 hidrovorëve të zonës.

“Janë 26 çela  të reja automatike dhe  dy fidera të rinj që shkojnë drejt Shëngjinit. Me këtë investim, edhe Shëngjini për 10-15 vitet e ardhshme është i garantuar për çdo lloj ngarkese. Kemi investuar tani, vetëm në Lezhë, 4 milion euro.  Në prill fillon në  Zejmen, 1 milionë euro investimi tjetër, për  të gjithë rrjetin e Zejmenit,” – tha drejtori OSHEE.

OSHEE, për herë të parë po ndjek një plan ambicioz investimesh nga të ardhurat e saj, falë reformës dhe mirëmenaxhimit të sektorit. Reforma të vështira, nënvizoi Kryeministri, të cilat po rehabilitojnë dhe rivitalizojnë sektorin.

“Falë reformës, falë faktit që nga gjysma që paguante edhe për gjysmën që vidhte kaluam në një fazë të re, ku të gjithë janë të vetëdijshëm dhe kontribuojnë, jo vetëm që nuk harxhojmë 150 milionë dollarë çdo vit, për të mbushur gropën e vjedhjeve, që të ndezim dritat, por, përkundrazi, kemi filluar të investojmë. Me këtë investim  këtu në  Lezhë i jepet zgjidhje një problemi gangrenë 25 vjet. Por do vazhdojmë edhe në zonën e Zejmenit, që mbetet akoma një pikë e dobët dhe pastaj për gjithë Bashkinë e re të Lezhës, nga ky aspekt problemi është i zgjidhur. Ndërkohë do të vrazhdojmë të rrisim cilësinë e furnizimit në mënyrë që edhe përsa i përket turizmit, Shëngjini, më në fund, pas 20 e ca vitesh të funksionojë normalisht si një zonë turistike. Është kjo rruga për të bërë shtet dhe është kjo mënyra sesi reforma të dhimbshme, të lodhshme, me kosto, japin rezultatin e tyre. Operacione që japin rezultat. Ky është një operacion i suksesshëm që tani, por na mundëson të fillojmë të rehabilitojmë organizmin komplet të bllokuar nga kanceri i kaq shumë viteve rrumpallë dhe hajdutëri,” – u shpreh Kryeministri.

Ministri Gjiknuri nënvizoi se është kryer niveli më i madh i investimeve në sektorin elektroenergjitik. Ndërkohë investimet që janë në proces dhe ato që pritet të nisin do të kthejnë këtë sektor, tha Gjiknuri, në gjenerator zhvillimi për vendin.

“Stabiliteti financiar na ka krijuar mundësi që të vazhdojmë të investojmë në përmirësimin e furnizimit me energji elektrike. Ky është një shembull konkret se çdo të thotë një investim, i cili mund të ndryshojë totalisht cilësinë e furnizimit për gjithë zonën e Lezhës, aq shumë problematike sa herë që kishte shi dhe përmbytje. Ky vit është viti më i madh i investimeve në sektorin elektroenergjitik që është parë ndonjëherë, aq më tepër i bërë në kushte kur kemi pasur një krizë nga pikëpamja e motit, ku sistemi as nuk kolapsoi, siguruam furnizimin me energji. Mbi të gjitha, për shkak të mirëmenaxhimit po investohet në përmbushje të objektivave që ne i kemi vënë vetes, që të stabilizojmë përfundimisht sektorin elektroenergjitik, për ta kthyer atë në një gjenerator zhvillimi për gjithë vendin, për shoqërinë shqiptare,” – u shpreh Gjiknuri.

energjia.al  22.02.2017

Përkrahja e Bankës Botërore (BB) për Termocentralin “Kosova e Re” është kushtëzuar me përmbushjen e të gjitha kritereve të nevojshme teknike, ekonomike, mjedisore, sociale, ligjore dhe financiare.

Banka Botërore nuk e ka ndryshuar qëndrimin ndaj projektit të qeverisë së Kosovës për ndërtimin e një termocentrali në afërsi të Obiliqit.

Cyril Muller, zëvendëspresident i Bankës Botërore për Europë dhe Azi Qendrore në një letër të dërguar ministrit të Zhvillimit Ekonomik Blerand Stavileci i ka numëruar kushtet që Qeveria e Kosovës duhet t’i plotësojë para se bordi i këtij institucioni financiar të marrë vendim nëse do ta përkrahë këtë projekt për prodhimin e energjisë nga djegia e qymyrit. Letra ishte dërguar te qeveria si përgjigje ndaj kërkesës së Stavilecit për përkrahjen e Bankës Botërore për projektin e ndërtimit të një termocentrali prej 450 megavat.

Përkrahja eventuale e bankës do të ishte një garanci për huadhënësit komercialë për projektin e propozuar energjetik të Kosovës si dhe përkrahjen nga Korporata Ndërkombëtare Financiare (IFC) dhe Agjencia Multilaterale për Garancione të Investimeve (MIGA). Këto garancione do të jenë të nevojshme për financimin e ndërtimit të termocentralit, i cili pritet të kushtojë rreth 1 miliard euro.

Kompania “Contour Global” pritet të financojë 30 për qind të kësaj kostoje, ndërsa pjesa tjetër prej 70 për qind do të financohet nga kreditë.

Lista e kushteve që ka vendosur Banka Botërore është e gjatë dhe nuk ka ndryshuar që nga viti 2012. Në vitin 2012, zëvendëspresidenti i Bankës Botërore për Europë dhe Azi ia kishte dërguar një letër Qeverisë së Kosovës duke konfirmuar se “Banka Botërore do të ishte e gatshme në parim të shqyrtojë dhënien e një garancioni për huadhënësit komercialë për projektin e propozuar energjetik të Kosovës”.

I njëjti qëndrim është ripërsëritur edhe njëherë në letrën e muajit tetor të vitit 2016.

“Dua t’u siguroj se kjo përkrahje në parim mbetet, sikurse edhe kërkesat dhe politikat tona që do të aplikohen, përderisa lëvizim përpara në përgatitjen e garancionit nga IDA dhe detajimin e përkrahjes nga IFC dhe MIGA”, thuhet në këtë shkresë.

Por, në këtë letër janë listuar punët dhe kushtet që duhet t’i plotësojë Qeveria e Kosovës për të marrë përkrahjen e Bankës Botërore.

“Kjo përkrahje në parim ishte e kushtëzuar me vlerësimin e kënaqshëm të projektit nga Grupi i Bankës Botërore, pajtimin me të gjitha kërkesat e aplikueshme, duke përfshirë këtu ato që kanë të bëjnë me çështjet sociale dhe mjedisore, si dhe aprovimin nga drejtorët ekzekutivë të Grupit të Bankës Botërore”, thuhet në letrën e Mullerit, zëvendëspresidentit të Bankës Botërore për Europë dhe Azi Qendrore.

E njëjta është rikonfirmuar edhe nga menaxheri i Bankës Botërore në Kosovë, Marco Mantovanelli.

“Banka Botërore do të marrë vendim se a do të përkrahë projektin e ri energjetik të Kosovës vetëm atëherë kur të gjitha analizat relevante mjedisore, sociale dhe teknike të jenë zhvilluar, kur konsultimet me publikun të jenë mbajtur dhe kur Bordi i Bankës dhe aksionarët e saj ta kenë shqyrtuar projektin”, tha Mantovanelli.

Menaxheri i Bankës Botërore në Kosovë ka thënë se letra e dërguar në tetor është rikonfirmim i pozicionit të ditur tashmë të Bankës Botërore.

“Kjo përkrahje në parim është e kushtëzuar me përmbushjen e të gjitha kërkesave të aplikueshme, përfshirë këtu ato të lidhura me çështjet sociale dhe mjedisore, si dhe aprovimin e Bordit të Drejtorëve të Bankës Botërore”, tha ai, shkruan Kallxo.com.

Banka Botërore ia ka kujtuar qeverisë së duhet të rifreskohet studimi i opsioneve dhe të ketë një riangazhim të panelit të ekspertëve të jashtëm.

“Një hap i parë i rëndësishëm në përmbushjen e kritereve strikte të Grupit të Bankës Botërore për përkrahjen e gjenerimit të ri të energjisë nga djegia e thëngjillit, siç definohet në Kornizën Strategjike për Zhvillim dhe Ndryshime Klimatike (SFDCC), do të jetë rifreskimi i studimit të opsioneve dhe ri-angazhimi i Panelit të Ekspertëve të Jashtëm për të vlerësuar pajtueshmërinë e projektit me SFDCC”, thuhet në shkresën e Mullerit.

Ai ka thënë se aktualisht janë në proces të një kujdesi të duhur (due-diligence) për projektin e termocentralit.

Në shkresën e Bankës Botërore thuhet se do të rishikohet vlerësimi mjedisor dhe social i projektit. Por, në fakt një studim i tillë asnjëherë nuk është publikuar nga institucionet e Kosovës.

“Ne po ashtu do të duhet të rishikojmë një vlerësim të rifreskuar të Impaktit Mjedisor dhe Social (ESIA) për konfigurimin e ri të propozuar të projektit, ta publikojmë draftin e tij dhe të zhvillojmë konsulta publike para vlerësimit nga ana e bankës. Sigurimi i shëndetit dhe mirëqenies së qytetarëve të Kosovës është prioritet ynë i përbashkët”, thuhet në shkresën e Bankës Botërore.

Përveç kësaj, Banka Botërore ia ka kujtuar Qeverisë së Kosovës që edhe zhvillimi i minierës së re të qymyrit prej nga do të furnizohet me qymyr termocentrali i ri duhet t’i përmbushë të gjitha politikat mjedisore dhe sociale të bankës. Këto politika njihen si standard botëror për mbrojtjen e njerëzve të ndikuar nga projektet.

Pas heqjes së minierës së qymyrit nga pakoja e projektit, barra për zhvillimin e minierës dhe zhvendosjen eventuale të qytetarëve që preken nga zgjerimi i mihjes i bie Qeverisë së Kosovës.

“Duam të përsërisim se Grupi i Bankës Botërore i jep prioritetin më të lartë përkujdesit që zhvendosja e asocuar me KRPP-në të menaxhohet sipas standardeve ndërkombëtare”, thuhet në shkresën e zëvendëspresidentit të Bankës Botërore për Europë dhe Azi.

Banka Botërore ka edhe një tjetër kusht të veçantë për përkrahjen e projekteve që për bazë kanë djegien e qymyrit.

Telegrafi,  22.02.2017

Minatorët e minierës së Trepçës në Stantërg, i kanë kërkuar Qeverisë së Kosovës që të fillojë së zbatuari Ligjin për kombinatin dhe të krijojë kushte më të mira të punës për ata.

Isuf Beqiri, minator në minierën e Stantërgut që prej vitit 1978, thotë për Radion Evropa e Lirë, se përveç moszbatimit të Ligjit për Trepçën, ata po përballen edhe me kushte të vështira të punës.

Sipas tij, minatorët e Trepçës janë të harruar nga institucionet e Kosovës dhe se nuk po punohet asgjë në krijimin e kushteve më të mira për ta.

“Nuk është bërë asgjë për neve minatorët. Një ligj që është bërë nuk ka filluar të zbatohet akoma. Gjendja e minatorëve është e vështirë, nuk kemi as sigurime shëndetësore, që nga pas lufta nuk kemi asgjë. Qeveria e Kosovës duhet të marrë masat për përmirësimin e kushteve të minatorëve”, thekson Beqiri.

Lidhur me zbatimin e Ligjit për Trepçën, i cili është miratuar nga Kuvendi i Kosovës në tetorin e vitit të kaluar, minatorët e Trepçës dhe udhëheqësit e këtij kompleksi metalurgjik thanë se autoritetet e vendit kanë treguar neglizhencë.

Më 7 tetor të vitit të kaluar, Kuvendi i Kosovës miratoi Ligjin për Trepçën, me të cilin mëtohet të rimëkëmbet dhe rivitalizohet ndërmarrja.

Por, që nga hyrja në fuqi e Ligjit për Trepçën, Qeveria e Kosovës nuk ka arritur të krijojë ende Bordin mbikëqyrës të Trepçës, në mënyrë që të mund të fillohet me zbatimin e ligjit.

Ministri i Zhvillimit Ekonomik në Qeverinë e Kosovës, Blerand Stavileci, i pati thënë Radios Evropa e Lirë se që nga hyrja në fuqi e Ligjit për Trepçën, ka gjashtë muaj afat për të themeluar Bordin për Trepçën.

“Bëhet fjalë për një ndërmarrje, e cila do të jetë në pronësi të qeverisë, prandaj edhe nuk është gjë e lehtë dhe e thjeshtë zgjedhja e bordit dhe e strukturave të tjera për këtë çështje”, kishte thënë Stavileci.

Ndërkohë, ish drejtori i Trepçës Halil Qela në një prononcim për Radion Evropa e Lirë e quan të pakuptimtë mos zbatimin e Ligjit për Trepçën.

Ai thotë se pavarësisht që Ligji për Trepçën ia ndërron pronësinë kompleksit Trepça, nga Agjencia Kosovare e Privatizimit tek ekzekutivi, Trepça vazhdon ende në disa gjëra të caktuara të menaxhohet nga AKP-ja dhe jo Qeveria e Kosovës.

“Fatkeqësisht sot e festuam 28 vjetorin në një kohë kur Ligji për Trepçën është miratuar, por që nuk është duke u zbatuar. Kjo është absurde. Kemi pritur që këtë përvjetor të grevës ta shënojmë me një bord profesionist siç e parasheh Ligji, me rezultatet e para të ligjit që e kemi kërkuar një kohë shumë të gjatë, por kjo nuk ka ndodhur”, thekson Qela.

Sipas Ligjit, qeverisja për Trepçën bëhet nga Bordi Mbikëqyrës dhe Bordi Menaxhues.

Bordi Mbikëqyrës përbëhet nga nëntë anëtarë, të cilët nuk mund të jenë anëtarë të forumeve politike, por që duhet të jenë ekspertë në fusha të caktuara, që nevojiten për mbikëqyrjen e kombinatit. Ky bord më pas zgjedh edhe anëtarët e Bordit Menaxhues të Trepçës.

Edhe statuti i Trepçës hartohet nga Bordi Mbikëqyrës dhe miratohet nga aksionarët.

Ndërkohë, drejtori i Trepçës, Ahmet Tmava, kërkon nga Qeveria e Kosovës që sa më shpejt të themelohen bordet mbikëqyrëse në mënyrë që të fillohet sa më shpejt me rimëkëmbjen e kombinatit Trepça.

“Jemi në kontakt tëpërhershëm më Qeverinë e Kosovës dhe ata janë zotuar që sa më shpejt që është e mundur të formohen këto organe që do të bëjmë zbatimin e ligjit. Edhe pse më hyrjen në fuqi të Ligjit ne mbikëqyremi nga Qeveria e Kosovës”, thekson Tmava për Radion Evropa e Lirë.

Trepça llogaritej si një prej ndërmarrjeve më të mëdha jo vetëm në Kosovë, por edhe në ish-Jugosllavi. Në vitet e tetëdhjeta, në kombinat punonin mbi 20 mijë punëtorë. Ndërkaq, vitet e fundit, ajo e kaloi fazën e mbijetesës dhe nuk numëronte më shumë se 1,400 punëtorë

Telegrafi,  22.02.2017

Konsumi i energjisë elektrike u ul me 2.3% në vitin 2016 sipas të dhënave të Entit Rregullator të Energjisë. Shifrat mbi bilancin e energjetik tregojnë se në vitin 2016 konsumi vendas i energjisë arriti ne 7,094,576 MW/h, ndërsa më 2015 konsumi ishte 7,265,526.

Por nga të dhënat krahasuese shihet se është ulur në mënyrë të ndjeshme konsumi në konsumatorët e tensionit të lartë. Kjo kategori janë kryesisht biznese, konsumi i të cilave ra me 17% në vitin 2017.

Nga 610,2017 MW/h që konsumoi kjo kategori më 2015, vitin e kaluar ka konsumuar 502,895 MW/h.

Treguesit e tjerë të konsumit nuk kanë pësuar luhatje, pasi ndryshimet janë afër zeros.

Shitjet për institucionet familjare dhe jofamiljare janë rritur me respektivisht 0,02 dhe 0,04%.

Konsumi i energjisë shënoi ulje për të tretin vit radhazi. Arsyetimi më i hershëm i OSHEE-së për këtë çështje lidhet me tendencën për të mos shpërdoruar energjinë elektrike nga konsumatorët. Shtrëngimi i politikave dhe mjeteve për grumbullimin e faturave të energjisë i ka bërë më racionalë konsumatorët. Por të dhënat e vitit të fundit tregojnë së rënia erdhi nga konsumatorët e mëdhenj të energjisë (bizneset e mëdha).

Operatori i Shpërndarjes së Energjisë Elektrike (OSHEE) parashikon që konsumi i energjisë do të ulet me 27% deri më 2018 në krahasim me 2016.

Kjo ulje, sipas përllogaritjeve të OSSHE -se do të vijë për disa arsye që kanë të bëjnë me uljen e popullsisë, me ngrohjen e motit dhe me liberalizimin e tregut.

Metodologjia e përllogaritjes së kërkesës për energji merr për bazë historikun e të dhënave mbi energjinë totale të injektuar në rrjetin e OSHEE gjatë periudhës 2007-2015, informacionin mbi sasitë e shitura të energjisë gjatë periudhës 2007-2015, planin e veprimeve të ndërmarra për reduktimin e humbjeve teknike dhe joteknike.

Në treguesit e konsumit, OSSHE ka marrë në konsideratë edhe ndryshimet klimatike. Nisur nga fakti që konsumatori familjar në Shqipëri zë konsumin më të madh i cili ndikohet drejtpërdrejt nga kushtet e klimatike në vend.

Revista Monitor,  22.02.2017