info@energjia.al

Ministri i Energjisë dhe Industrisë z.Damian Gjiknuri bashkë me administratorët e OSHEE-së, KESH-it dhe OST-së realizuan një bashkëbisedim me gazetarët referuar treguesve të sektorit elektroenergjitik për vitin 2016.

Ministri Gjiknuri deklaroi se raportet e fundit të institucioneve prestigjioze ndërkombëtare si Fondi Monetar Ndërkombëtar, Banka Botërore apo agjenci të njohura si “Standart & Poor’s” dhe “Moody’s” e kanë konsideruar reformën në sektorin elektroenergjitik shumë të suksesshme.

“Hapat e ndërmarra kanë krijuar një efekt pozitiv në financat publike duke e çliruar Buxhetin e Shtetit nga barra e rëndë e këtij sektori që rrezikonte të fundoste financat publike. Vetëm gjatë tre viteve të fundit janë paguar 23 miliard lekë në tatim/taksa si kontribut direkt në Buxhetin e Shtetit. Ndërkaq, 135 milion Euro është efekti pozitiv indirekt në Buxhet përmes reduktimit të mbështetjes buxhetore për sektorin dhe çlirimin e garancive sovrane në 2013-2017”, u shpreh Gjiknuri.

Sipas tij, në 2016 niveli i humbjeve u reduktua në shifrën rekord prej 28.04% ndërsa në vitin 2013 u gjet jo pak por 45%.  Operatori i Shpërndarjes arkëtoi për vitet 2015-2016 shumën totale prej 126 miliard lek ndërsa tre vite më parë mblidheshin vetëm 38,3 miliard. Arkëtimi i faturave korente nga 66.7% që ishte në 2013, vitin e fundit u arrit në 86.6%. Totali i arkëtimeve për vitin 2016 përfshirë edhe kamatat arrin në 93.8%.

Rezultati ekonomik vjetor për OSHEE-në u mbyll pozitiv me 11.5 miliard lekë, Korporata Elektroenergjitike Shqiptare me bilanc pozitiv vjetor prej 1.7 miliard lekësh dhe Operatori i Sistemit të Transmetimit 1 miliard lek.

Në tre vitet e fundit, KESH, OST dhe OSHEE kanë investuar në sektor një shumë prej 45.6 miliard lekësh ndërsa për vitin 2017 plani i investimit arrin në 24 miliard lek.

Detyrimet e të tretëve ndaj OSHEE-së, pra rikuperimi i gjendjes së debisë përfshirë kamatat ka ardhur në rënie. Nëse në vitin 2013 ato ishin 117.8 miliard lekë, në vitin e fundit u mbyllën me 105.2 miliard lekë.

Borxhi i OSHEE-së ndaj KESH, OST dhe palëve të tjera të treta nga 99.9 miliard lekë që ishte në vitin 2013 është ulur tashmë në 93.6 miliard lekë.

Nëse në vitin 2013 shpenzoheshin 151 milion euro për mbulimin e humbjeve me blerje energjie nga importi, në vitin e fundit kjo është reduktuar në 61 milion euro.

Ndërkaq, KESH shpenzoi 12 milion euro më pak për blerje energjie nga importi krahasuar me vitin 2015 dhe 34 milion euro më pak se mesatarja e 5 viteve të fundi. Korporata Elektroenergjitike rriti gjithashtu me 22 milion euro të ardhurat nga eksporti krahasuar me 2015 dhe 41 milion euro krahasuar me mesataren e 5 viteve të fundit.

Normat e interesit të KESH-it për stokun e borxhit të trashëguar u ulën nga 6.58 % që ishte në 2013 tashmë në 3.94%.

Referuar përfituesve të skemave lehtësuese të shlyerjes së borxheve të prapambetura, deri më tani kanë përfituar 332 000 abonentë nga reduktimi deri në zerim të plotë të kamatëvonesës. Vlera e përfituar prej tyre deri më tani është 147 milion USD për periudhën 2014-2016. Deri në Qershor 2017 pritet të përfitojnë edhe 68000 abonentë duke e çuar shumën totale të detyrimeve të falura në 230 milion USD.

energjia.al  16.02.2017

Një projekt serioz investiv që është bërë nga KEDS në Istog, nga ndikuar dukshëm pozitivisht edhe në jetën dhe punën e ekonomive kryesisht familjare në fshatin Rakosh të kësaj ane.

Rakoshi, fshat i njohur për kultivimin e pemëtarisë është përfitues i  investimeve të KEDS-it, gjithnjë me normat e standardeve të larta evropiane, e që drejtpërdrejt kanë ndikuar në përmirësimin e kualitetit të energjisë, tensionin stabil dhe rënien në masë të madhe të humbjeve në këtë anë.

Lehtësirat nga investimi i shohin dukshëm banorët dhe institucionet lokale të komunës së Istogut. Hakim Jahaj, nga kjo anë thotë se projekti i KEDS-it që ka zgjatur në disa faza, tashmë po i jap efektet pozitive.

“Thënë të drejtën kur punët kanë filluar, shumë kush pak e ka besuar se po bëhet diçka serioze. Kjo nga fakti se ky fshat asnjëherë nuk ka pasur mbështetje nga ndonjë institucion ose organizatë nga niveli qendror, përpos nga komuna. Por, kur KEDS dërgojë operatorët në terren atëherë u pa se po bëhet diçka. Kjo ishte gjëja e parë. Tjetra që mund të them është se investimi ka dhënë efekte dukshëm edhe tek shtëpitë tona, konkretisht tek amvisëritë, pastaj ekonomitë në përgjithësi. Këtu në të kaluarën kemi pasur tension me të cilin as stabilishmentet më elementare nuk kanë funksionuar, si TV, frikot e kështu” shprehet Jahaj.

Zëdhënëse e komunës së Istogut, Jeta Balaj konfirmon bashkëpunimin e mirë të KEDS-it me komunën edhe në këtë projekt.

“Gjatë vitit 2015, sidomos 2016, KEDS-i ka sjellë investime te shumta në komunën tonë. Investime janë bërë në shume fshatra rreth. Projekte të tilla si ai në fshatin Rakosh i cili ka përmirësuar furnizimin stabil e kualitativ me energji janë shembuj të punës që kjo kompani po e bënë. Rakoshi normalisht që meriton investime të tilla” , thotë zëdhënësja BalaSe investimi në fshatin Rakosh ka qenë madhor, e konfirmon edhe KEDS.

“Dy Trafo, njëra me fuqi 400 kVA dhe tjetra me fuqi 100 kVA, 43 shtylla betoni për tension të mesëm, 110 shtylla betoni për tension të ulët dhe 7 mijë metra kabllo ajrore për tension të ulët janë pjesë e pakos investive që i kanë takuar fshatit Rakosh, në kuadër të investimeve të kompanisë tonë, të cilat po shtrihen në tërë Kosovën” , thuhet në përgjigjen e KEDS-it rreth investimeve në këtë projekt.

Vetëm në fshatin Rakosh, nga investimet e KEDS-it drejtpërdrejt kanë përfituar 121 ekonomi familjare.

Agjensia e lajmeve ekonomia,  16.02.2017

Mbledhja e komisionit hetimor për aferën CEZ është shoqëruar nga debate të ashpra mes kryetarit të këtij komisioni Taulant Balla dhe nënkryetarit, Arben Ristani.

Shkak i kësaj përplasje u bë akuzat e Ballës për Shkëlzen Berishën dhe sekserin e marrëveshjes së privatizimit të OSSH te CEZ, Nuel Kalaj. Balla ironizoi mungesën e Shkëlzenit në komision për të dëshmuar duke theksuar se po feston Shën Valentinin.

Pas deklaratës së Ballës e menjëhershme ishte ndërhyrja e Ristanit i cili dukshëm i nxehur polemizoi ashpër me kryetarin e komisionit të CEZ.

Ai u ngrit disa herë  në këmbë dhe i fiku mikrofonin Ballës, duke i kërkuar që të mos e ndërpresë kur flet.

Ndërsa Balla e quajti të dehur Ristanin dhe kërkoi nga komisioni përjashtimin e tij nga mbledhja. Komisioni vendosi me votat e mazhorancës përjashtimin e nënkryetarit Arben Ristani.

Më pas nga mbledhja u larguan edhe përfaqësuesit e tjerë të Partisë Demokratike në shenjë proteste për përjashtimin e Ristanit.

Debati Ristani-Balla në komision

Ristani: Është bërë një transaksion në 2009 dhe është bërë një veprim tjetër më vonë.

Balla: Se atëherë ishte në pushtet ti, babai i Shkëlzenit dhe ai.

Ristani: Që ta dish mirë dhe vërë vath në vesh në këto raste hyn afati i parashikimit. Kjo tregon, se unë nuk marr në mbrojte asnjë njeri.

Ndërhyn Balla: Pse bën avokatin e tij?

Ristani: Mos më ndërhyj kur flas.

Balla: Pse bën avokatin e Kalajt?

Ristani: Mos më ndërhy kur flas.

Balla: Këtë mbledhje e drejtoj unë…

Ristani: Mbylle mikfrononin.

(Ristani i afrohet Ballës duke i fikur mikrofonin) 

Balla: Komisionit i kërkoj përjashtimin e nënkryetarit (Ristanit) nga mbledhja. Largohet nga mbledhja për dhunë të ushtruar. Nënkryetari është i pirë tapë duhet të largohet nga mbledhja.

Shqiptarja.com  16.02.2017

Hidrocentralet private dhe ato me koncesion kontribuuan me 28% të prodhimit vendas të energjisë më 2016.

Roli i tyre në rritjen e prodhimit vendas ka ardhur gjithnjë e në rritje, teksa për herë të parë pas shumë vitesh, Shqipëria ishte një eksportues neto në energji.

Sipas të dhënave nga Enti Rregullator i Energjisë, prodhimi vendas shënoi vitin e kaluar 7,136,351Mw/h, nga të cilat 5,091,616 Mw/h u prodhuan nga HEC në pronësi të KESH dhe 2,044,735 Mw/h u prodhuan nga HEC private dhe ato me koncesion.

Nga kjo sasi, HEC-i i ri i Banjës në lumin Devoll që u vu në punë për herë të parë më 2016 prodhoi 69,848 Mw/h.

Pavarësisht kostove që kanë dhënë në ambient dhe ndikimin ne habitatet e zonave ku janë, HEC-et private e kanë rritur dukshëm prodhimin e energjisë në vend, duke u bërë kështu pritë për daljen e parave jashtë vendit për blerjen e energjisë.

Ekspertët e sektorit pohojnë se investimet në energjinë nga burime të rinovueshme kanë një kthyeshmëri të lartë. Çmimet e këtij produkti në tregun ndërkombëtar janë në rritje të vazhdueshme për shkak të politikave që po ndjek BE për ndotjen.

Të njëjtët ekspertë pohojnë se duke marrë në konsideratë këtë leverdishmëri, qeveria duhet kishte përfshirë në paketën e financimit 1 miliard euro edhe ndërtimin e HEC të Skavicës. Ndërtimi i këtij objekti i planifikuar qysh në komunizëm do të rrisë ofertën për energji me 35%.

Përveç prodhimit që do të realizojë eficenca e Skavicës do të sillte përfitimin më të madh edhe në menaxhimin e rezervës ujore në Fierzë. Me ndërtimin e këtij objekti, Shqipëria ka shumë shanse të kthehet në një eksportues neto energjisë dhe kostot e furnizimit me energji do të uleshin ndjeshëm.

Revista Monitor,  16.02.2017

Faza e parë e rezervimit të sasisë prej 10 miliardë metër kub gaz i gazsjellësit Trans Adriatik tashmë është përmbyllur.

Ky është kapaciteti fillestar që parashikohet të transportohet, ndërsa do të zgjerohet deri në 20 miliardë metër kub.

“Për fazën e parë, i gjithë kapaciteti fillestar i TAP-it (10 bcm në vit) është i rezervuar. Bëhet fjalë për kontrata afatgjata 25-vjeçare që nga fillimi i operimit”, tha Ulrike Andres, drejtore Komerciale dhe e Çështjeve të Jashtme për New Europe.

“Megjithatë, ka një sasi të vogël e cila do të lihet në dispozicion për një periudhë më të shkurtër kohore (njëvjeçare ose më pak). Këto kapacitete mund të vihen në dispozicion për tregun sekondar, si kërkesa që mund të vijnë nga transportuesit”, tha Andres.

E pyetur nëse në fazën e dytë do të transportohet gaz nga Azerbajxhani, ajo tha se: “Azerbajxhani është burimi më i mundshëm i gazit në fazën e dytë. Megjithatë, në përputhje me rregulloren e BE-së (TAP është një ITO dhe ecën në përputhje me Direktivën e Tretë), çdo transportues që dëshiron të marrë pjesë në ‘sezonet e hapura’ mund ta bëjë këtë për sa kohë që ato janë në përputhje me kërkesat”.

Më 24 janar, zëvendësdrejtori ekzekutiv i Gazprom Alexander Medvedev tha nga Vjena se Rusia ishte e gatshme që të merrte në konsideratë mundësinë për t’u lidhur me TAP.

Nga ana tjetër, Komisionieri Europian dhe nënkryetari për Energjinë, Maroš Šefčovič, ka deklaruar gjithmonë synimin e BE-së për të diversifikuar furnizimin me gaz për të reduktuar varësinë nga Rusia.

TAP-së do të mundësojë furnizimin me gaz të disa vendeve të Europës Juglindore, përfshirë Bullgarinë, Shqipërinë, Bosnjë dhe Hercegovinën, Malin e Zi, Kroacinë etj.

Nga Italia, gazit kaspik mund të arrijë në tregjet europiane në Gjermani, Francë, Britaninë e Madhe, Zvicër dhe Austri.

Andres tha për New Europe se zhvillimet e fundit në rajonin e Mesdheut Lindor në lidhje me eksplorimin dhe nxjerrjen e hidrokarbureve janë të rëndësishme dhe shihen me interes për diversifikimin e burimeve të ndryshme të gazit”.

“TAP do të transportojë molekulat e gazit, për këtë po ndërtohet”, tha Andres.

Revista Monitor,  16.02.2017

Çmimet e naftës së papërpunuar shënuan rënie mëngjesin e ditës së sotme.

Treguesit referencë për naftën e papërpunuar amerikane, WTI, ranë me 0.1 për qind dhe u tregtuan me 53.07 dollarë për fuçi.

Treguesit referencë për naftën e papërpunuar europiane, Brent, shënuan rënie në krahasim me një ditë më parë dhe u tregtuan me 55.74 dollarë për fuçi.

Revista Monitor,  16.02.2017

Ministria e Energjetikës raportoi zyrtarisht sot se OSHEE e mbylli 2016 me fitim 11.5 miliardë lekë, Korporata Elektroenergjetike Shqiptare rezultoi me bilanc pozitiv vjetor prej 1.7 miliardë lekësh dhe Operatori i Sistemit të Transmetimit 1 miliard lekë.

Gjithsej fitimi i kompanive këtë vit arriti në 14,2 miliardë lekë, ose 104 milionë euro.

Në tre vitet e fundit, KESH, OST dhe OSHEE kanë investuar në sektor një shumë prej 45.6 miliardë lekësh, ndërsa për vitin 2017 plani i investimit arrin në 24 miliardë lekë.

Ministri i Energjisë dhe Industrisë, z. Damian Gjiknuri, bashkë me administratorët e OSHEE-së, KESH-it dhe OST-së realizuan një bashkëbisedim me median referuar treguesve të sektorit elektroenergjetik për vitin 2016.

Ministri Gjiknuri deklaroi se raportet e fundit të institucioneve prestigjioze ndërkombëtare si Fondi Monetar Ndërkombëtar, Banka Botërore apo agjenci të njohura si “Standart & Poor’s” dhe “Moody’s” e kanë konsideruar reformën në sektorin elektroenergjetik shumë të suksesshme.

“Hapat e ndërmarra kanë krijuar një efekt pozitiv në financat publike duke e çliruar Buxhetin e Shtetit nga barra e rëndë e këtij sektori që rrezikonte të fundoste financat publike. Vetëm gjatë tre viteve të fundit janë paguar 23 miliardë lekë në tatim-taksa si kontribut direkt në Buxhetin e Shtetit. Ndërkaq, 135 milionë euro është efekti pozitiv indirekt në Buxhet përmes reduktimit të mbështetjes buxhetore për sektorin dhe çlirimin e garancive sovrane në 2013-2017”, u shpreh Gjiknuri.

Sipas tij, në 2016, niveli i humbjeve u reduktua në shifrën rekord prej 28.04% ndërsa në vitin 2013 u gjet jo pak por 45%. Operatori i Shpërndarjes arkëtoi për vitet 2015-2016 shumën totale prej 126 miliardë lekë ndërsa tre vite më parë mblidheshin vetëm 38,3 miliard. Arkëtimi i faturave korente nga 66.7% që ishte në 2013, vitin e fundit u arrit në 86.6%. Totali i arkëtimeve për vitin 2016, përfshirë edhe kamatat, arrin në 93.8%.

Detyrimet e të tretëve ndaj OSHEE-së, pra rikuperimi i gjendjes së debisë përfshirë kamatat, ka ardhur në rënie. Nëse në vitin 2013 ato ishin 117.8 miliardë lekë, në vitin e fundit u mbyllën me 105.2 miliardë lekë.

Borxhi i OSHEE-së ndaj KESH, OST dhe palëve të tjera të treta nga 99.9 miliardë lekë që ishte në vitin 2013 është ulur tashmë në 93.6 miliardë lekë.

Revista Monitor,  16.02.2017