info@energjia.al

Banka Botërore dhe “Botas” që është operatori turk i gazit, nënshkruan marrëveshjen e financimit të gazsjellësit “Trans-anatolian”, i njohur ndryshe si TANAP. Financimi kap vlerën e 400 milionë dollarëve.

Ky gazsjellës është mjaft i rëndësishëm për Europën pasi është ai me të cilin do të lidhet edhe gazsjellësi Trans-Adriatik. Të dy gazsjellësit do të bëjnë të mundur furnizimin me gaz, jo vetëm të Turqisë dhe Ballkanit, por edhe të një pjese të mirë të Europës perëndimore.

Do të jetë pikërisht Shqipëria që do të bëjë urën lidhëse me pjesën perëndimore të Europës. Marrëveshja me Bankën Botërore vjen pas asaj të arritur në fund të vitit të kaluar me qeverinë e Azerbajxhanit për një vlerë të njëjtë, prej $400 milionë , për të financuar pjesën azere të projektit.

Ministri turk i energjisë, Berat Albayrak u shpreh se, marrëveshja ka një rëndësi të madhe, jo vetëm për tregun global të energjisë, por edhe për ekonominë turke.

Ai shtoi se, qeveria po punon për një paketë financimi prej $3 miliardë për këtë vit, dhe jo vetëm me Bankën Botërore. Edhe zëvendësi presidenti i Bankës Botërore për rajonin premtoi se $2.4 miliardë do të financohen nga institucione të tjera.

TANAP është pjesë e atij që njihet si korridori jugor i gazit. Kapaciteti fillestar i gazsjellësit do të jetë prej 16 miliardë metër kub, nga të cilat 6 miliardë do të shkojnë për tregun turk, dhe pjesa e mbetur, prej 10 miliardë, për në Greqi, Shqipëri, Itali e më gjerë, apo edhe Mal të Zi, pas ndërtimit të një tjetër gazsjellësi, që njihet me emrin adriatiko-jonian.

Scan Tv,  09.02.2017

Bashkia e Tiranës në bashkëpunim me Bankën Europiane për Rindërtim dhe Zhvillim, kanë nisur planin e veprimit për ta shndërruar kryeqytetin shqiptar në një qytet të gjelbër, ndryshe nga sa jemi mësuar ta shohim deri tani, ku hapësirat jeshile janë të limituara.

BERZH ka si synim që pjesa më e madhe e projekteve të financuara të përqendrohen në këtë drejtim, për të mundësuar një qytet më të gjelbër.

“Jeshilja duhet të jetë gjithnjë e më e rëndësishme për Shqipërinë, pasi bujqësia është një ndër shtyllat kryesore për rritjen ekonomike. Shqipëria duhet ta shfrytëzojë jeshilen për një ekonomi të qëndrueshme dhe konkurrencë në rajon. Kemi investuar 240 milion euro për projekte në Shqipëri dhe 80 për qind e tyre kanë qenë projekte jeshile. Presim që ky plan veprimi të çojë në masa konkrete që do të thithin investime substanciale. Ne do të marrim rolin udhëheqës për këto investime bashkë me banka dhe donatorë të tjerë”, deklaroi Mateo Colangeli, përfaqësues i BERZH.

Nga ana e tij, Kryebashkiaku Erion Veliaj theksoi se Tirana po ecën në këtë drejtim, pasi tashmë ka një plan të qartë vendor dhe janë marrë vendime që kanë si qëllim rritjen e sipërfaqeve të gjelbërta siç është edhe vendimi për kufizimin e ndërtimeve pa kriter.

Veliaj kërkoi ndihmë nga konsulentët që ky plan të përkthehet në projekte të implementueshme. Veliaj njoftoi gjithashtu që do të hapet diskutimi për ligjin  e financave vendore në mënyrë që Bashkitë të kenë më shumë akses në fonde dhe kreditim.

Scan Tv,  09.02.2017

Shkupi është qyteti më i ndotur në Maqedoni. Ekspertët thonë se në disa raste, shkalla e grimcave të pluhurit ka arritur edhe në mbi 1,200 PM10 mikrogramë për metër kub.

Kryetari i bashkisë, Koce Trajanovski, tha se duhet të ulet qarkullimi i automjeteve private.

Nevena Smilevska nga shoqata ekologjike “Eko Vetëdija”, thotë se në ndotjen e ajrit, rol të madh kanë lëndët djegëse që përdorin amvisëritë, andaj ka kërkuar që autoritetet shtetërore të ndajnë mjete sa i përket efikasitetit energjetik, duke subvencionuar izolimin e banesave të vjetra.

“Para së gjithash, autoritetet shtetërore duhet të fokusohen në efikasitetin energjetik, të objekteve të banesave për çka ka më shumë fonde edhe nga Bashkimi Europian, të cilat janë të pashfrytëzuara. Pastaj qytetarët duhet të vetëdijesohen për shfrytëzimin e energjisë diellore, për çka shteti ndan subvencione, por shumë pak punohet në ngritjen e vetëdijes së qytetarëve në këtë drejtim”, tha Smilevska.

Shoqata ekologjike “Go Green” thotë se me ndërtimin e projektit Shkupi 2014 për katër herë janë zvogëluar hapësirat e gjelbra në kryeqendër, duke theksuar se “nuk ka logjikë që të priten drunjtë në interes të mafies urbane, përderisa shkalla e ndotjes së ajrit është në rritje”.

Organizatat ekologjike, duke komentuar mosreagimin e autoriteteve të shtetit për shkallën në rritje të nivelit të ndotjes së ajrit, thonë se nevojitet një aktivizim më i madh i sektorit civil për të ngritur vetëdijen e drejtuesve të institucioneve për t’iu qasur me seriozitet problemeve me ndotjen e ambientit jetësor dhe jo t’i neglizhojnë ato.

“Kemi të bëjmë me mungesën e vetëdijes te politikanët, jo vetëm tek këta që janë aktualisht por në përgjithësi për të gjykuar drejt lidhur me këto tema, le të themi moderne të kohës. Më shumë organizata joqeveritare, të cilat veprojnë në fushën e mbrojtjes së mjedisit, të bëjnë presion më të madh tek autoritetet shtetërore, që të vetëdijesohet politika sepse politika është ajo që merr vendime dhe jo qytetarët”, thotë për Radion Europa e Lirë, Arianit Xhaferi nga shoqata ekologjike EKO Guerila.

Ndaj shkallës së lartë të ndotjes së ajrit në Shkup dhe disa qytete të tjera të Maqedonisë ka reaguar edhe ambasada për fëmijë në Shkup “Megjashi”, duke theksuar se “fëmijëve u është cenuar e drejta elementare, ajo për të jetuar”.

Ata u janë referuar të dhënave që kanë dalë nga hulumtimi i kryer nga Banka Botërore, ku thuhet se ndotja e ajrit në Maqedoni për çdo vit vret nga 1350 persona.

“Një në dy fëmijë vitin e kaluar është kuruar nga sëmundjet respiratore të cilat më së shumti janë pasojë direkt nga ajri i ndotur. Fëmijët janë më të goditurit, veçanërisht në sezonin e ngrohjes kur përqendrimi i grimcave rritet”, theksohet në reagimin me shkrim të ambasadës për fëmijë në Shkup “Megjashi”.

Edhe Instituti për Shëndetit Publik thotë se rritja e nivelit të ajrit të ndotur ka rritur dhe numrin e pacientëve të cilët vuajnë nga sistemi respirator.

Revista Monitor,  09.02.2017

Një incinerator për përpunimin ë mbetjeve të projektit TAP është projektuar të ndërtohet në fshatin Floq të Korçës.

Incineratori do të përdoret për incinerimin e mbetjeve urbane të përftuara nga veprimtaria  e projektit TAP.  Impianti do të përpunojë mbetjet që do të krijohen nga puna në kantierin e TAP dhe mbetjet që krijohen nga shtrimi i tubacionit.

Kompania Spiecapag ka ofruar një alternativë për menaxhimin e mbetjeve që krijon TAP nëpërmjet incinerimit.

Kompania synon që fillimisht të nisë punë me djegien e 500 kilogramëve mbetje në ditë, por kapaciteti instalues i impiantit është që të djegë 200 kilogramë mbetje në orë.

Impianti është i certifikuar nga BE dhe në përputhje me direktivat e BE. Ky impiant është në gjendje të përpunojnë të gjitha mbetjet që prodhohen nga projekti.

Sheshi ku do të vendoset impianti është 20 kilometër nga qyteti i Korçës dhe fshatrat më të afërt janë Ujëbardha dhe Pulaha. Të dy këto fshatra ndodhen 1.5 kilometër nga dy sheshet ku do të vendosen impiantet e djegies. Gjithashtu largësia me rrugën nacionale është 500 metra.

Impianti i do të jetë i lëvizshëm në përshtatje të nevojave të projektit. Spiecapag TransAdriatik është e kontraktuar nga TAP në Shqipëri për ndërtimin e tubacionit të projektit. Por kompania ka kërkuar vlerësim mjedisor për instalimin e impiantit të trajtimit të mbetjeve që krijohen gjatë punimeve për shtrimin e gazsjellësit.

Zhvillimi i veprimtarisë për ndërtimin e TAP gjeneron mbetje të llojeve të ndryshme. Impianti do të trajtojë mbetje kartoni dhe letre, mbetje ambalazhe plastike, mbetje ambalazhe druri, qelqi, tekstili, substanca të kontaminuara të rrezikshme, mbetje tekstili, filtra vaji dhe nafte, dhera dhe gurë.

Revista Monitor,  09.02.2017

Inflacioni në janar arriti nivelin më të lartë të kohëve të fundit me rreth 2.8% nga 1.5% që ishte në të njëjtën periudhë të vitit të kaluar.
Ky nivel kaq i lartë i dedikohet kryesisht rritjes së çmimeve që erdhi për shkak të motit tjetër të ftohtë që bëri gjatë muajit janar, ku vendi u përfshi i gjithi nga reshjet e dëborës. Ndikim pati edhe rritja e çmimit të gazit për shkak të vendosjes së akcizës 8 lekë për litër.

Instituti i Statistikave bëri të ditur se rritja vjetore e çmimeve në muajin janar është ndikuar kryesisht nga grupi “Ushqime dhe pije joalkoolike” me + 2,33 pikë përqindje. Çmimet e grupit “Transporti” kanë kontribuar me +1,17 pikë përqindje.

Çmimet e grupit “Mallra dhe shërbime të ndryshme” kanë kontribuar me +0,15 pikë përqindje.
Çmimet e grupeve “Qira, ujë, lëndë djegëse dhe energji” dhe “Argëtim e kulturë” kanë kontribuar secili me nga + 0,08 pikë përqindje. Çmimet e grupit “Pije alkoolike dhe duhan” kanë kontribuar me +0,04 pikë përqindje.

Çmimet e grupeve “Veshje dhe këpucë” dhe “Shërbimi arsimor” kanë kontribuar secili me nga +0,02 pikë përqindje. Çmimet e grupeve “Komunikimi” dhe “Shëndeti” kanë kontribuar secili me nga + 0,01 pikë përqindje.

Ndryshimet vjetore të grupeve kryesore: Krahasuar me muajin janar 2016, rritja më e madhe e çmimeve vërehet në grupin “Ushqime dhe pije joalkoolike” me 5,8 %, pasuar nga grupet “Mallra dhe shërbime të ndryshme” me 3,2 %, “Argëtim e kulturë” me 3,1 %, “Transport” me 2,8 %, “Pije alkoolike dhe duhan” me 0,9 %, etj. Brenda grupit të ushqimeve, çmimet e nëngrupit “zarzavate përfshirë patatet“ u rritën me 24,8%, pasuar nga nëngrupet “fruta” me 8,8%, “sheqer, reçelna e ëmbëlsira” me 6,6%, “qumësht, djath e vezë” me 4,9%, etj. Nga ana tjetër, çmimet e nëngrupit “vajra dhe yndyra” u ulën me 1,8%, pasuar nga nëngrupi “mish” me 0,5%.

Ndryshimi mujor i indeksit është + 1,5%. Krahasuar me muajin dhjetor 2016, rritja më e madhe mujore e çmimeve vërehet në grupin “Ushqime dhe pije joalkoolike” me 3,7 %. Ulja më e madhe mujore e çmimeve vërehet në grupin “Veshje dhe këpucë” me -1,0%.

Revista Monitor,  09.02.2017

Çmimet e naftës së papërpunuar shënuan rritje mëngjesin e ditës së sotme.

Treguesit referencë për naftën e papërpunuar europiane, Brent, u rritën me 40 cent ose me 0.7 për qind, duke u tregtuar me 55.52 dollarë për fuçi.

Treguesit referencë për naftën e papërpunuar amerikane, WTI, u rritën me 39 cent duke u tregtuar me 52.73 dollarë për fuçi.

Revista Monitor,  09.02.2017

Ministria e Energjisë dhe Industrisë, MEI, ka bërë të ditur se do t’i kërkojë kompanisë Bankers të ndalojë operacionet e injektimit të ujit gëlqeror në zonën e Zharrëzës dhe të përdorë alternativa të tjera për trajtimin e ujit teknologjik pa dëmtuar mjedisin, si dhe masa riparuese të nëntokës dhe mbitokës, sipas standardeve ndërkombëtare, në mënyrë që të shmangen në të ardhmen pasojat negative për komunitetin. Kjo është masa e dytë, në vazhdim të urdhrit të lëshuar MEI për ndalimin e injektimit të ujit teknologjik në puset gëlqerorë në Zharrëz, të datës 26.12.2017.

Vendimi erdhi, teksa në dhjetor të vitit të kaluar, u ngrit një grup pune “Për vlerësimin e situatës së krijuar nga lëkundjet e tokës në zonën e fshatit Zharrëz dhe për përcaktimin e masave që duhet të merren në varësi të shkaqeve të ndodhjes së fenomenit të lëkundjeve të tokës”.

Sipas MEI, Drejtoria e Përgjithshme e Emergjencave Civile, në bashkëpunim me Institucionin e Prefektit të Qarkut të Fierit dhe me Bashkinë e Patosit do të marrë masa të menjëhershme për sistemimin e përkohshëm të banorëve, banesat e të cilëve janë vlerësuar si të pabanueshme dhe riparimin e shtëpive me dëmtime të rënda, deri sa të konkludohet me pranim nga të dy palët, qeveria dhe Bankers, përgjegjësia për shkaktimin e lëkundjeve sizmike, ose të disponohet një vendim i formës së prerë nga një palë e tretë e pranuar për zgjidhjen e mosmarrëveshjes apo nga arbitrazhi për këtë çështje.

Albpetrol do të finalizojë blerjen dhe instalimin e 3 sizmomarrësve shtesë dhe 6 akseleromarrësve, si dhe pajiset përkatëse në bashkëpunim me IGJEUM.

MEI do të angazhojë, në përputhje me parashikimet në Marrëveshjen Hidrokarbure dhe Licencë Marrëveshjen për shfrytëzimin e vendburimit të Patos-Marinzës nga Bankers Petroleum, një ekspert teknik ndërkombëtar të pavarur për të përcaktuar në mënyrë objektive dhe asnjanëse shkakun e lëkundjeve, por edhe për të propozuar zgjidhjen më optimale për teknologjinë e trajtimit të ujit dhe mbetjeve teknologjike që shoqërojnë nxjerrjen e naftës nga nëntoka, sipas standardeve më të mira ndërkombëtare.

Revista Monitor,  09.02.2017