Zbehen eksportet, rriten “lënda djegëse dhe energjia”

Eksportet shqiptare pësuan sërish rënie gjatë muajt qershor. Sipas të dhënave nga Instituti i Statistikave, eksportet ranë me 6.4%, krahasuar me qershorin e vitit të kaluar.

Për gjashtëmujorin e parë të vitit, bilanci i eksporteve rezultoi negativ, me 7.7% më pak krahasuar me gjashtëmujorin e parë 2015. Rënia e eksporteve i detyrohet sidomos grupit “minerale, lëndë djegëse, energji”, ku për gjashtë muajt e këtij viti eksportet kanë rënë me afro 45% krahasuar me një vit më parë.

Sektori i industrisë nxjerrëse po e vuan ndjeshëm rënien e çmimeve të lëndëve të para, duke humbur njëkohësisht edhe pozicionin e rëndësishëm në strukturën e eksporteve shqiptare.

Nëse një vit më parë mineralet siguronin 29% të eksporteve, pesha e tyre tashmë ka rënë në 17%. Në rënie të dukshme është edhe grupi “materiale ndërtimi e metale”, me 26% më pak eksporte krahasuar me një vit më parë.

Në dy vitet e fundit kolona kryesore e eksporteve është rikthyer të jetë sektori i fasoneve. Për gjashtëmujorin, eksportet e tekstileve dhe këpucëve arritën në 53.7 miliardë lekë, në rritje vjetore me 23%.

Eksportet e këtij grupi përbëjnë tashmë afro 46% të totalit të eksporteve. Importet kanë vijuar rritjen me bazë vjetore edhe gjatë qershorit, me 14.4% më shumë kundrejt qershorit 2015. Për të gjithë gjashtëmujorin, vlera e importeve është 8.9% më e lartë krahasuar me të njëjtën periudhë të një viti më parë.

Rritja është e shpërndarë në shumicën e grupmallrave, por udhëhiqet sidomos nga grupet “minerale, lëndë djegëse, energji” dhe “material ndërtimi e metale”. Kjo tregon se rritja e importeve po vjen sidomos falë zgjerimit të investimeve në ekonomi.

Ecuria e kundërt e eksporteve dhe importeve ka rritur ndjeshëm deficitin tregtar të vendit. Për gjashtë muaj, deficiti i këmbimve tregtare ka arritur në 161 miliardë lekë, 25% më shumë krahasuar me një vit më parë.

Scan TV,  29.06.2016