Shpirag, Petromanas shet aksionet tek Shell
Kompania Petromanas Energy Inc. ka njoftuar në 1 shkurt se ka hyrë në një marrëveshje shitblerjeje me Shell Upstream Albania B.V. (“Shell”), një degë që është tërësisht në pronësi të Royal Dutch Shell plc, sipas të cilit Shell ka rënë dakord që të marrë asetet shqiptare të Petromanas për 45 milionë dollarë. Transaksioni i propozuar pritet të mbyllet rreth datës 15 mars. Më parë Shell kishte 25% të aksioneve në aktivitetin në Shqipëri.
Transaksioni
Petromanas Albania GmbH (“PAG”), dhe Shell janë pjesë të kontratës së përbashkët në bllokun mbi tokë (“Blloku 2-3 PSC”) dhe janë pjesë në një marrëveshje të përbashkët operative për Bllokun 2-3 PSC. Aktualisht Petromanas ka 75% të aksioneve dhe Shell 25%. Kompania beson se ky transaksion do të sjellë përfitime pasi do të kthejë kapitalin te aksionerët, do të mundësojë tërheqjen nga aktivitetet në Shqipëri në mënyrën e duhur dhe do të ofrojë kapital që kompania të riorganizohet, përfshirë vendimet strategjike të aseteve në Francë.
Procesi strategjik
Transaksioni i propozuar pritet të përfundojnë procesin strategjik të shpallur më parë të kompanisë. Në tetor të vitit 2014, dhe bazuar në shpenzimet lidhur me shpimin e puseve të Shpiragut-2 dhe Molisht-1, menaxhimi hyri në një proces strategjik për të identifikuar dhe shqyrtuar të gjitha mundësitë për të mbështetur kërkesat financiare të një vlerësimi afatgjatë dhe zhvillimit të blloqeve 2 -3. Kompania punesoi Peters & Co për të vepruar si këshilltar financiar të saj në lidhje me procesin e rishikimit. Bordi ka marrë një opinion nga Peters & Co se shuma që do të merret nga kompania në bazë të Marrëveshjes është e drejtë nga pikëpamja financiare për Petromanas.
Rreth Petromanas Energy Inc.
Petromanas Energy Inc është një kompani ndërkombëtare e naftës dhe gazit fokusuar në eksplorimin dhe zhvillimin e aseteve të saj në Shqipëri. Petromanas, nëpërmjet degës së saj tërësisht në pronësi, ka një kontratë të ndarjes së prodhimit, me qeverinë shqiptare. Sipas kushteve të kontratës, Petromanas ka një interes punues 25% në blloqet 2-3 që përfshin rreth 638,0000 akra bruto në periferinë e Beratit.
Nafta në Shpirag rriti interesin për Shqipërinë
Në dhjetor të vitit 2013, Agjencia Kombëtare e Hidrokarbureve njoftoi se pas 4 vjet kërkime në Blloqet Shpiragu 2 dhe 3, kompania Royal Dutch Shell Plc. dhe kompania Petromanas Energy Inc. njoftuan rezultatet pozitive të testit të pusit Shpiragu-2.
Ky zbulim ngjalli interesin e shumë kompanive për të eksploruar për naftë në Shqipëri. Aktualisht qeveria ka nxjerrë në shitje 13 blloqe nafte në vende të ndryshme të Shqipërisë.
Në korrik 2015, Shell i është përgjigjur ftesës së qeverisë shqiptare për të zhvilluar nxjerrjen e naftës në blloqet e paaktivizuara ende kryesisht në zonën e Dumresë.
Revista monitor, 02.02.2016