Banesa në flakë, shkak shkëndija elektrike

Një banesë dykatëshe është përfshirë nga flakët në qytetin e Shkodrës.

Zjarri ka rënë në orët e pasdites në një objekt në lagjen “Gjuhadol”.

Derën e banesës në vend të policëve e shpërtheu pronari i objektit Bep Gjeloshi.

Brenda ndërtesës për fatin e mirë nuk ndodhej askush edhe pse u dyshua fillimisht se gjendej një e moshuar.

Edhe pse zjarrëfikësit mbërritën në kohën e duhur humbën kohë derisa u futën në rrugicën ku ndodhej banesa për shkak të makinave të parkuara të cilat u desh të largoheshin me forcë.

Dyshohet se ajo zonë nuk ka patur energji elektrike e ndoshta as shërbim të telefonisë si shkak i djegies edhe të kabllove.

Shkak i rënies së zjarrit mendohet të jetë një shkëndijë elektrike.

Nga rënia e zjarrit në ndërtesën dykatëshe u rrezikua përhapja e flakëve edhe në banesat aty pranë por falë ndërhyrjes së zjarrëfikësve u arrit të shpëtoheshin.

Dëmet materiale të shkaktuara janë të konsiderueshme ndërkohë që ajo zonë po mbikqyret deri në normalizimin e situatës.

Shqiptarja.com 04.06.2015