Shpërthim gazi në një minierë në Ukrainë

Një shpërthim i dyshuar gazi në një minierë qymyri në zonën e kontrolluar nga rebelët në lindje të Ukrainës ka shkaktuar 30 viktima dhe ende nuk dihet asgjë mbi fatin e 40 të tjerëve.

Zyrtarë të palës së rebelëve pro-Rusë deklaruan se nuk mund të konfirmojnë numrin zyrtar të vdekjeve në minierën e Zasyadko në Donetsk. Të paktën 14 minatorë kanë mbetur të lënduar në Zasyadko, në fatkeqësinë më të madhe të shënuar në 8 vitet e fundit.

Familjarët e minatorëve janë mbledhur në pritje të lajmeve të reja në afërsi të zonës së shpërthimit. Ende nuk ka shumë informacione mbi situatën e minatorëve të bllokuar brenda minierës. Në zonën e Donetskut raportohet se nuk ka patur luftime gjatë ditëve të fundit, ndonëse aty janë zhvilluar luftime të ashpra mes rebelëve separatistë dhe trupave qeveristare të Kievit.

Ekonomia e Ukrainës ka pësuar një dëm të madh që prej nisjes së konfliktit në prill të vitit të kaluar dhe minierat e qymyrit vazhdojnë punën në zonën në lindje të Ukrainës. Para zhvillimit të konfliktit aksidentet në minierë kanë qenë të zakonshme për shkak të standarteve të ulëta të sigurisë.

Shqiptarja.com  04.03.2015